𞤃𞤌𞤈𞤋𞤚𞤀𞤐𞤋: 𞤀𞤈𞤁𞤌 𞤌𞤐 𞤉 𞤔𞤀𞥄𞤘𞤌𞤈𞤀𞤂 𞤐𞤘𞤀𞤂 𞤏𞤀𞤒𞤂𞤀𞥄𞤃𞤀
𞤖𞤮𞥅𞤪𞤫𞥅𞤶𞤮 𞤃𞤮𞤪𞤭𞤼𞤢𞤲𞤭 𞤮𞤲 𞤶𞤮𞤯𞥆𞤭𞤲𞤭𞥅 𞤶𞤢𞥄𞤺𞤮𞤪𞤢𞤤 𞤳𞤫𞤧𞤢𞤤⹁ 𞤲𞤣𞤫 𞤼𞤢𞤱𞤵𞤲𞤮𞥅 𞤭𞤲𞤯𞤫 𞤴𞤮𞤺𞤢 𞤫 𞤶𞤢𞥄𞤺𞤮𞤪𞤢𞥄𞤩𞤫 𞤸𞤭𞤯𞤩𞤫 𞤩𞤫𞤲 𞤲𞤮 𞤶𞤢𞤲𞤼𞤢𞥄 𞤫 𞤲𞤣𞤫𞤪 𞤷𞤫𞤥𞤼𞤮𞤤 𞤴𞤮𞤱𞤭𞤼𞤭𞥅𞤲𞤺𞤮𞤤 𞤫 𞤺𞤫𞥅𞤲𞤢𞥄𞤶𞤭 𞤃𞤵𞤸𞤢𞤥𞥆𞤢𞤣𞤵 𞤓𞤤𞤣 𞤀𞤦𞤣𞤵𞤤 𞤀𞥁𞤭𞥅𞥁⹁ 𞤸𞤮𞥅𞤪𞤫𞥅𞤶𞤮 𞤳𞤭𞤯𞥆𞤮 𞤮𞤲.
𞤀𞥄𞤣𞤢𞤥𞤢 𞤄𞤮𞤳𞤢𞤪 𞤅𞤮𞤳𞤮⹁ 𞤦𞤭𞤲𞤣𞤮 𞤥𞤢𞤱𞤯𞤮 𞤼𞤢𞤳𞥆𞤮 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤲𞤣𞤭𞤲⹁ 𞤸𞤮𞤤𞥆𞤭𞤼𞤭𞥅 𞤸𞤫𞤧𞤤𞤮𞥅𞤩𞤫 𞤩𞤫𞤲 𞤱𞤮𞤲𞤣𞤫𞤥𞤢 𞤱𞤢𞤴𞤤𞤵𞤺𞤮𞤤 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤⹁ 𞤲𞤫𞤱𞤭𞤲𞤢𞤲𞤢𞤴 𞤩𞤫𞤲 𞤩𞤫 𞤭𞤲𞤯𞤫 𞤥𞤵𞤲 𞤶𞤢𞤥𞤼𞤢𞥄 𞤳𞤢 𞤷𞤫𞤥𞤼𞤮𞤤⹁ 𞤸𞤫𞤩𞤵𞤺𞤮𞤤 𞤬𞤫𞤸𞤪𞤫 𞤲𞤮 𞤩𞤫 𞤤𞤢𞤩𞥆𞤭𞤲𞤭𞤪𞤢 𞤭𞤲𞤯𞤫 𞤥𞤢𞤩𞥆𞤫 𞤯𞤫𞤲.
𞤑𞤮𞤲𞤮 𞤶𞤢𞥄𞤺𞤮𞤪𞤢𞤤 𞤳𞤫𞤧𞤢𞤤 𞤲𞤺𞤢𞤤 𞤲𞤮 𞤲𞤢𞤲𞤣𞤭𞤼𞤭 𞤫 𞤶𞤢𞥄𞤺𞤮𞤪𞤢𞤤 𞤳𞤭𞤯𞤲𞤺𞤢𞤤 𞤲𞤺𞤢𞤤 𞤬𞤮𞤼𞤢 𞤧𞤢𞤦𞤵𞤲𞤢 𞤴𞤭𞤥𞤩𞤫 𞤧𞤢𞤨𞥆𞤮𞤴 𞤫 𞤲𞤶𞤫𞥅𞤼𞤢𞤼𞤮 (𞥑𞥘) 𞤼𞤢𞤱𞤢𞤲𞤮𞥅𞤩𞤫 𞤫 𞤶𞤢𞥄𞤺𞤮𞤪𞤢𞤤 𞤳𞤭𞤯𞤲𞤺𞤢𞤤 𞤲𞤺𞤢𞤤⹁ 𞤢𞤪𞤼𞤭𞤪𞤢𞥄𞤥𞤢.
𞤄𞤭𞤲𞤣𞤮 𞤮𞤲 𞤸𞤮𞤤𞥆𞤭𞤼𞤭𞥅 𞤳𞤢𞤣𞤭 𞤱𞤮𞤲𞤣𞤫 𞤤𞤭𞤥𞤮𞥅𞤪𞤫 𞤶𞤢𞥄𞤺𞤮𞤪𞤢𞥄𞤩𞤫 𞤩𞤫𞤲 𞤵𞤧𞤼𞤢𞥄𞤥𞤢. 𞤔𞤮𞥅𞤲𞤭 𞤳𞤮 𞤩𞤫 𞤲𞤮𞥅𞤺𞤢𞤴 𞤫 𞤯𞤭𞤯𞤮. 𞤀𞤪𞤣𞤮 𞤳𞤫𞤧𞤮 𞤼𞤮𞤯𞥆𞤢𞥄𞤥𞤢 𞤳𞤢𞤣𞤭.
𞤑𞤮 𞤢𞤪𞤣𞤮 𞤳𞤭𞤯𞥆𞤮 𞤮𞤲 𞤳𞤢𞤻𞤵𞤲 𞤫 𞤶𞤢𞥄𞤺𞤵𞤪𞤢𞥄𞤩𞤫 𞤸𞤭𞤯𞤩𞤫 𞤼𞤢𞤼𞤮 𞤱𞤮𞤲𞤭 𞤳𞤮 𞤶𞤢𞤲𞤼𞤢𞥄 𞤫 𞤷𞤫𞤥𞤼𞤮𞤤 (𞤪𞤢𞤨𞤮𞥅𞤪) 𞤺𞤮𞥅𞤥𞤵 𞤧𞤵𞥅𞤣𞤵 𞤧𞤢𞤪𞤴𞤭𞤲𞤮𞥅𞤪𞤵 𞤲𞤣𞤵𞤲.
𞤐𞤺𞤵𞥅 𞤺𞤮𞥅𞤥𞤵 𞤳𞤮 𞤸𞤭𞤳𞥆𞤢 𞤯𞤮𞥅 𞤫 𞤅𞤭𞥅𞤤𞤼𞤮 𞤲𞤺𞤵 𞤶𞤮𞤯𞥆𞤭𞤲𞤢𞥄. 𞤐𞤺𞤵 𞤸𞤢𞤤𞤬𞤭𞤲𞤢𞥄 𞤴𞤵𞤪𞤲𞤭𞤼𞤢𞤺𞤮𞤤 𞤳𞤮 𞤬𞤫𞤰𞥆𞤭 𞤳𞤮𞤲 𞤸𞤢𞤳𞥆𞤵𞤲𞥋𞤣𞤫 𞥒𞥐𞥐𞥘 𞤫 𞥒𞥐𞥑𞥙 𞤬𞤫𞤱𞤲𞤣𞤮 𞤀𞤦𞤣𞤵𞤤 𞤀𞥁𞤭𞥅𞥁 𞤤𞤢𞥄𞤼𞤭𞤲𞤮𞥅 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤃𞤮𞤪𞤭𞤼𞤢𞤲𞤭 𞤲𞤣𞤭𞤲.
𞤀𞤦𞤣𞤵𞤤 𞤀𞥁𞤭𞥅𞥁 𞤳𞤮 𞤫 𞥒𞥐𞥐𞥘 𞤮 𞤱𞤢𞤤𞥆𞤭𞤼𞤮𞤪𞤭 𞤳𞤮𞤲𞤵 𞤃𞤮𞤪𞤭𞤼𞤢𞤲𞤭 𞤲𞤺𞤵𞤲 𞤮 𞤰𞤫𞤼𞥆𞤭 𞤤𞤢𞥄𞤥𞤵. 𞤇𞤢𞤱𞤼𞤭 𞤯𞤵𞤥⹁ 𞤮 𞤣𞤢𞤪𞤭𞥅 𞤫 𞤧𞤵𞤩𞤮⹁ 𞤲𞤺𞤮 𞤮 𞤸𞤫𞤩𞥆𞤭𞤼𞤭𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥙 𞤳𞤢𞤻𞤵𞤲 𞤫 𞤸𞤭𞤳𞥆𞤭𞥅𞤲𞤺𞤮 𞤲𞤺𞤮𞤲 𞤯𞤮𞤲 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔.
𞤘𞤮𞥅𞤥𞤵 𞤲𞤺𞤵𞤲 𞤳𞤮 𞤴𞤵𞤪𞤲𞤭𞤼𞤭𞥅 𞤫 𞤬𞤫𞤱𞤲𞤣𞤮 𞤤𞤢𞥄𞤥𞤵 𞤥𞤢𞤳𞥆𞤮 𞤲𞤺𞤵𞤲⹁ 𞤳𞤮 𞤳𞤫𞤩𞤢𞤤 𞤴𞤫𞥅𞤴𞤵𞤺𞤮𞤤 𞤳𞤵𞤩𞥆𞤢𞤲 𞤳𞤢𞤻𞤵𞤲 𞤫 𞤤𞤫𞤴𞤣𞤭⹁ 𞤲𞤣𞤭 𞤤𞤢𞥄𞤥𞤵 𞤲𞤺𞤵𞤲 𞤶𞤫𞤴𞤭 𞤫 𞤲𞤣𞤫𞤪 𞤐𞤵𞤱𞤢𞤳𞥃𞤮𞤼⹁ 𞤳𞤢𞤻𞤵𞤲 𞤳𞤢𞤣𞤭 𞤫 𞤴𞤫𞥅𞤴𞤵𞤺𞤮𞤤 𞤳𞤢𞤬𞤵 𞤳𞤢 𞤻𞤢𞤥𞤯𞤭 𞤥𞤮𞤰𞥆𞤭𞤲𞤼𞤫𞥅.
𞤉 𞤐𞤶𞤫𞤧𞤤𞤢𞥄𞤪𞤫 𞤬𞤫𞤰𞥆𞤵𞤲𞥋𞤣𞤫 𞤯𞤮𞥅⹁ 𞤻𞤢𞥄𞤱𞤭𞤲𞤣𞤮𞥅𞤼𞤮𞥅𞤩𞤫 𞤃𞤮𞤪𞤭𞤼𞤢𞤲𞤭 𞤩𞤫𞤲 𞤸𞤮𞤤𞥆𞤭𞥅 𞤱𞤮𞤲𞤣𞤫 𞤩𞤫 𞤸𞤫𞤲𞤣𞤭𞤳𞤫 𞤷𞤫𞤥𞤼𞤮𞤤 𞤺𞤮𞥅𞤥𞤵 𞤲𞤺𞤵𞤲⹁ 𞤶𞤮𞥅𞤲𞤭 𞤩𞤫 𞤬𞤵𞤯𞥆𞤮𞤼𞤮 𞤼𞤫𞤬𞤮 𞤲𞤺𞤮𞤲.
𞤀𞤁𞤂𞤢𞤃 𞤱𞤮𞤲𞤢𞥄 𞤧𞤢𞤥𞤢𞤳𞤢𞤤𞤢.
𞤀𞤁𞤂𞤢𞤃 𞤳𞤮 𞤐𞤉𞥅𞤃𞤀.
𞤮𞤲 𞤶𞤢𞥄𞤪𞤢𞥄𞤥𞤢 𞤬𞤮𞤼𞤢 𞤬𞤭𞥅 𞤳𞤵𞤥𞤨𞤭𞤼𞤫 𞤯𞤫𞤲.