𞤄𞤀𞥄 𞤏𞤓𞥅𞤈𞤋 𞤖𞤌𞥅𞤈𞤉 𞤊𞤉𞤁𞥆𞤉 𞤖𞤉𞤅𞤉𞤈𞤉.

𞤀𞤸𞤥𞤢𞤣𞤵 𞤏𞤵𞥅𞤪𞤭 𞤄𞤢𞥄 𞤸𞤮𞤤𞥆𞤭𞤼𞤭𞥅 𞤸𞤢𞤲𞤣𞤫 𞤳𞤢 𞤼𞤮𞤲𞤺𞤮𞥅𞤣𞤫 Twitter 𞤥𞤢𞥄𞤳𞥆𞤮 𞤱𞤮𞤲𞤣𞤫 𞤩𞤫 𞤧𞤭𞤲𞤷𞤭𞥅 𞤬𞤫𞤣𞥆𞤫 𞤱𞤭𞤫𞤼𞤫𞥅𞤣𞤫 𞤆𞤮𞤼𞥆𞤢𞤤 𞤁𞤫𞤥𞤮𞤳𞤢𞤪𞤢𞥄𞤩𞤫 𞤊𞤭𞥅 𞤋𞤥𞥆𞤭𞤼𞤢𞤤 𞤘𞤭𞤲𞤫 (UDRG). 𞤐𞤣𞤫𞥅 𞤬𞤫𞤣𞥆𞤫 𞤳𞤮 𞤫 𞤳𞤢𞤱𞤼𞤭𞤼𞤢𞤤 𞤨𞤫𞤣𞤤𞤫 𞤯𞤭𞤯𞤭 𞤸𞤢𞥄𞤲𞤣𞤭𞤲𞤢𞥄𞤯𞤫 (𞤣𞤢𞤺𞤭𞥅𞤯𞤫) 𞤳𞤢 𞤧𞤢𞤪𞤭𞤴𞤢 𞤱𞤮𞤲𞤭 𞤳𞤮 𞤲𞤣𞤫 𞤴𞤢𞤤𞤼𞤭. 𞤏𞤮𞥅𞤣𞤭𞥅 𞤱𞤭𞤵𞤩𞤫 𞤯𞤫𞤲 𞤨𞤫𞤣𞤤𞤫 𞤳𞤮 PPDG  𞤳𞤢𞤻𞤵𞤲 𞤫 PGT.

𞤑𞤮 𞤸𞤮𞤥𞤦𞤮 𞤱𞤮𞤲𞤭 𞤄𞤢𞥄 𞤏𞤵𞥅𞤪𞤭؟

𞤄𞤢𞥄 𞤏𞤵𞥅𞤪𞤭 𞤳𞤮 𞤆𞤭𞤼𞤢 𞤲𞤣𞤫𞤪 𞤊𞤵𞥅𞤼𞤢 𞤔𞤢𞤤𞤮𞥅⹁ 𞤱𞤮𞤲𞤭 𞤳𞤮 𞤮 𞤶𞤭𞤦𞤭𞤲𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥕𞥘. 𞤐𞤣𞤫 𞤮 𞤴𞤮𞤼𞥆𞤭𞤲𞤮𞥅 𞤣𞤵𞥅𞤩𞤭 𞤶𞤫𞥅𞤺𞤮𞤮⹁ 𞤮 𞤴𞤢𞤸𞤣𞤭 𞤫 𞤦𞤫𞤲 𞤥𞤢𞤳𞥆𞤮𞤲 𞤁𞤢𞤳𞤢𞥄𞤪𞤵⹁ 𞤤𞤫𞤧𞤣𞤭 𞤅𞤫𞤲𞤫𞤺𞤢𞤤. 𞤑𞤮 𞤯𞤮𞤲 𞤮 𞤬𞤵𞤯𞥆𞤭 𞤶𞤢𞤲𞤺𞤣𞤫 𞤸𞤢𞥄 𞤮 𞤼𞤭𞤥𞥆𞤭𞤲𞤭 𞤣𞤵𞤯𞤢𞤤 𞤼𞤮𞥅𞤱𞤲𞤺𞤢𞤤 𞤲𞤺𞤢𞤤 (𞤤𞤭𞥅𞤧𞤫𞥅). 𞤇𞤢𞥄𞤱𞤮 𞤯𞤵𞤥⹁ 𞤮 𞤴𞤢𞤸𞤭 𞤶𞤢𞤲𞤺𞤵𞤺𞤮𞤤 𞤸𞤭𞥅𞤧𞤮 𞤫 𞤶𞤢𞥄𞤩𞤭 𞤸𞤢𞤼𞥆𞤭𞤪𞤣𞤫 𞤊𞤢𞤪𞤢𞤲𞤧𞤭. 𞤇𞤢𞤴𞤼𞤭 𞤮 𞤩𞤢𞥄𞤪𞤭𞥅⹁ 𞤮 𞤱𞤮𞤲𞤭 𞤊𞤢𞤪𞤢𞤲𞤧𞤭⹁ 𞤮 𞤶𞤢𞤲𞤺𞤲𞤭 𞤣𞤵𞥅𞤩𞤭 𞤧𞤫𞥅𞤯𞤢 𞤧𞤮 𞤮 𞤴𞤭𞤤𞤼𞤭𞥅 𞤘𞤭𞤲𞤫 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫 𞤫 𞤸𞤭𞤼𞥆𞤢𞥄𞤲𞤣𞤫 𞥑𞥙𞥘𞥔.

𞤉 𞤸𞤭𞤼𞤢𞥄𞤲𞤣𞤫 𞥑𞥙𞥙𞥑⹁ 𞤳𞤢𞤲𞤳𞤮 𞤫 𞤄𞤢𞤳𞤢𞤪𞤭 𞤔𞤢𞤳𞤭𞤼𞤫𞥅⹁ 𞤫 𞤄𞤵𞥅𞤦𞤢𞤳𞤢𞤪 𞤔𞤢𞤤𞥆𞤮 𞤳𞤢𞤻𞤵𞤲 𞤫 𞤃𞤢𞤥𞥆𞤢𞤣𞤵 𞤄𞤢𞥄𞤣𞤭𞤳𞥆𞤮 𞤄𞤢𞥄⹁ 𞤩𞤫 𞤧𞤭𞤲𞤷𞤭𞤣𞤭 𞤬𞤫𞤣𞥆𞤫 𞤭𞤲𞥆𞤫𞤼𞤫𞥅𞤲𞤣𞤫 UFD (𞤆𞤮𞤼𞥆𞤢𞤤 𞤕𞤫𞤥𞤦𞤫 𞤁𞤫𞤥𞤮𞤳𞤢𞤪𞤢𞥄𞤩𞤫). 𞤉 𞤸𞤭𞤼𞤢𞥄𞤲𞤣𞤫 𞥑𞥙𞥙𞥗⹁ 𞤦𞤢𞤯𞤼𞤢𞤲𞤫 𞤤𞤵𞤪𞥆𞤢𞤤 𞤸𞤢𞤳𞥆𞤵𞤲𞥋𞤣𞤫 𞤩𞤫𞥅 𞤧𞤭𞤲𞤷𞤵𞤩𞤫 𞤲𞤣𞤫⹁ 𞤬𞤫𞤣𞥆𞤫 𞤲𞤣𞤫𞤲 𞤱𞤢𞤴𞤤𞤭𞥅 𞤱𞤮𞤲𞤼𞤭 UFDG 𞤫 𞤤𞤫𞤴 𞤴𞤭𞥅𞤤𞤮 𞤄𞤢𞥄 𞤏𞤵𞥅𞤪𞤭. 𞤉 𞥒𞥐𞥐𞥒⹁ UFDG 𞤼𞤮𞥅𞤤𞤲𞤭 𞤄𞤢𞥄 𞤃𞤢𞤥𞥆𞤢𞤣𞤵 𞤱𞤢𞤯𞤭 𞤥𞤮 𞤸𞤮𞥅𞤪𞤫𞥅 𞤬𞤫𞤣𞥆𞤫 𞤲𞤣𞤫𞤲⹁ 𞤄𞤢𞥄 𞤏𞤵𞥅𞤪𞤭 𞤱𞤮𞤲𞤭 𞤄𞤭𞤲𞤣𞤮 𞤥𞤢𞤱𞤯𞤮 𞤮𞤲.

𞤑𞤮 𞤫 𞤔𞤮𞤤𞤮 𞥒𞥐𞥐𞥗⹁ 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤁𞤢𞤤𞤫𞤲 𞤔𞤢𞤤𞥆𞤮 𞤲𞤢𞥄𞤼𞤭𞥅 UFDG⹁ 𞤮 𞤤𞤮𞤲𞤼𞤭𞥅 𞤄𞤢𞥄 𞤃𞤢𞤥𞥆𞤢𞤣𞤵 𞤸𞤮𞥅𞤪𞤫 𞤬𞤫𞤣𞥆𞤫 𞤲𞤣𞤫𞤲. 𞤄𞤢𞥄 𞤏𞤵𞥅𞤪𞤭 𞤱𞤮𞤲𞤭 𞤷𞤵𞤳𞥆𞤮 𞤮𞤲. 𞤀𞤪𞤣𞤵 𞤅𞤫𞤤𞥆𞤵 𞤁𞤢𞤤𞤫𞤲 𞤲𞤣𞤵𞤲 𞤩𞤫𞤴𞤣𞤢𞤲𞤭 𞤬𞤫𞤣𞥆𞤫 𞤲𞤣𞤫𞤲 𞤴𞤭𞤥𞤩𞤫 𞤫 𞤣𞤢𞤪𞤲𞤣𞤫.

𞤉 𞥒𞥐𞥐𞥘⹁ 𞤩𞤢𞥄𞤱𞤮 𞤀𞤸𞤥𞤢𞤣𞤵 𞤚𞤭𞤶𞥆𞤢𞥄𞤲 𞤅𞤵𞤱𞤢𞥄𞤪𞤫𞥅 𞤱𞤢𞤯𞤫𞥅𞤣𞤫 𞤢𞤪𞤣𞤮 𞤺𞤮𞤥𞤲𞤢𞤼𞤫𞥅𞤪𞤭 𞤘𞤭𞤲𞤫 𞤲𞤣𞤭𞤲⹁ 𞤄𞤢𞥄 𞤏𞤵𞥅𞤪𞤭 𞤼𞤮𞤯𞥆𞤢𞥄 𞤴𞤮 𞤱𞤮𞤲𞤵 𞤶𞤢𞥄𞤺𞤮𞤪𞤢𞥄𞤯𞤮 𞤥𞤢𞤤𞥆𞤢 𞤧𞤢𞤤𞤢𞤤𞤮 𞤲𞤣𞤫𞤱𞤪𞤭𞤼𞤢𞤤 (𞤥𞤮𞤰𞥆𞤭𞤲𞤼𞤭𞤲𞤮) 𞤺𞤫𞤲𞤣𞤭𞤲𞤳𞤮𞤱𞤢𞤤 𞤸𞤭𞤤𞤲𞤭𞥅𞤯𞤮 𞤬𞤭𞥅 𞤱𞤫𞤤𞤣𞤭𞤲𞤼𞤭𞤲𞤺𞤮𞤤 𞤸𞤢𞤳𞥆𞤵𞤲𞥋𞤣𞤫 𞤩𞤭𞤯𞤩𞤫  𞤤𞤫𞤴𞤣𞤭 𞤲𞤣𞤭𞤲.

𞤉 𞥒𞥐𞥑𞥑⹁ 𞤲𞤣𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤼𞤵𞥅𞤥𞤵𞤲𞤮𞥅 𞤥𞤮 𞤼𞤢𞤱𞤫𞤺𞤮𞤤 𞤫 𞤬𞤢𞥄𞤤𞤢𞥄𞤩𞤫 𞤱𞤢𞤪𞤵𞤣𞤫 𞤥𞤮 𞤩𞤫𞤲⹁ 𞤄𞤢𞥄 𞤏𞤵𞥅𞤪𞤭 𞤣𞤮𞤺𞤭 𞤬𞤢𞥄𞤦𞤼𞤭𞤲𞤮𞤴𞤭𞥅 𞤊𞤢𞤪𞤢𞤲𞤧𞤭. 𞤑𞤮 𞤼𞤮𞤲 𞤮 𞤱𞤮𞤲𞤭 𞤸𞤢𞤲 𞥒𞥐𞥑𞥕 𞤲𞤣𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤴𞤢𞥄𞤬𞤭𞤲𞤮𞥅 𞤥𞤮⹁ 𞤲𞤫𞤱𞤲𞤢𞤲𞤭 𞤥𞤮 𞤢𞤪𞤼𞤵𞤺𞤮𞤤 𞤘𞤭𞤲𞤫.

𞤐𞤣𞤫 𞤮 𞤢𞤪𞤼𞤵𞤲𞤮𞥅 𞤘𞤭𞤲𞤫⹁ 𞤤𞤵𞤪𞥆𞤢𞤤 𞤲𞤺𞤢𞤲 𞤸𞤢𞤳𞥆𞤵𞤲𞥋𞤣𞤫 𞤥𞤢𞤳𞥆𞤮 𞤫 𞤸𞤮𞥅𞤪𞤫𞥅𞤩𞤫 UFDG 𞤩𞤫𞤲 𞤩𞤫𞤴𞤣𞤭𞥅 𞤬𞤮𞤼𞤢. 𞤉 𞤥𞤭𞥅𞤶𞤮 𞤸𞤫𞥅𞤱𞤵𞤩𞤫 𞤫 𞤥𞤢𞤩𞥆𞤫⹁ 𞤄𞤢𞥄 𞤏𞤵𞥅𞤪𞤭 𞤲𞤮 𞤲𞤢𞤲𞤼𞤮𞤲𞥋𞤣𞤭𞤪𞤭 𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤲𞤺𞤢𞤥 𞤤𞤮𞤭𞤲𞤺𞤮𞤤 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤳𞤢𞤻𞤵𞤲 𞤫 UFDG. 𞤙𞤢𞤤𞤲𞤣𞤫 𞥕 𞤕𞤮𞤤𞤼𞤮 𞥒𞥐𞥑𞥖⹁ 𞤸𞤮𞥅𞤪𞤫𞥅𞤩𞤫 UFDG 𞤩𞤫𞤲 𞤻𞤢𞥄𞤱𞤭 𞤸𞤢𞥄𞤤𞤣𞤭 𞤴𞤢𞤤𞤼𞤭𞤲𞤺𞤮𞤤 𞤥𞤮 𞤫 𞤬𞤫𞤣𞥆𞤫 𞤲𞤣𞤫𞤲.

𞤉 𞤅𞤭𞤤𞤼𞤮 𞥒𞥐𞥑𞥙⹁ 𞤄𞤢𞥄 𞤏𞤵𞥅𞤪𞤭 𞤢𞤪𞤣𞤭𞤲𞤢𞥄 𞤸𞤮𞥅𞤪𞤫 𞤬𞤫𞤣𞥆𞤫 UDD 𞤲𞤣𞤫 𞤟𞤢𞤲 𞤄𞤭𞤴𞤫𞤲𞤫𞤥𞤫 𞤖𞤢𞤦𞤢 𞤧𞤭𞤲𞤷𞤵𞤲𞤮𞥅. 𞤑𞤮𞤲𞤮 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤥𞤢𞤩𞥆𞤫 𞤩𞤮𞥅𞤴𞤢𞥄𞤲𞤮 𞤧𞤢𞤦𞤵𞤲𞤢 𞤸𞤢𞤴 𞤼𞤭𞤥𞥆𞤢𞥄𞤲𞤭 𞤸𞤭𞤼𞤢𞤲𞥋𞤣𞤫 𞤸𞤢𞤪𞤭 𞤩𞤫 𞤤𞤢𞤲𞤷𞤭𞥅. 𞤉 𞤢𞥄𞤩𞤵𞤲𞤣𞤫⹁ 𞤻𞤢𞤤𞤲𞤣𞤫 𞥑𞥑 𞤁𞤵𞥅𞤶𞤮 𞥒𞥐𞥒𞥐⹁ 𞤄𞤢𞥄 𞤏𞤵𞥅𞤪𞤭 𞤸𞤮𞤤𞥆𞤭𞤼𞤭 𞤳𞤢 𞤼𞤮𞤲𞤺𞤮𞥅𞤣𞤫 Twitter 𞤥𞤢𞤳𞥆𞤮⹁ 𞤱𞤮𞤲𞤣𞤫𞤥𞤢 𞤮 𞤶𞤮𞤺𞤲𞤭𞤼𞤭𞥅 𞤄𞤭𞤴𞤫𞤲𞤫𞤥𞤫𞥅 𞤖𞤢𞤦𞤢𞥄 𞤭𞤲𞤣𞤫 𞤫 𞤥𞤢𞥄𞤲𞤣𞤫 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲.

𞤄𞤢𞥄 𞤏𞤵𞥅𞤪𞤭 𞤲𞤮 𞤼𞤢𞤱𞤢𞥄 𞤸𞤢𞤲𞤣𞤫 𞤫 𞤩𞤵𞤪𞤵𞤩𞤫 𞤤𞤭𞤣𞥆𞤢𞥄𞤣𞤫 𞤫 𞤣𞤢𞤪𞤼𞤢𞥄𞤣𞤫 𞤤𞤢𞥄𞤥𞤵 𞤀𞤤𞤬𞤢𞥄 𞤑𞤮𞤲𞤣𞤫 𞤲𞤺𞤵𞤲. 𞤌 𞤣𞤢𞤪𞤼𞤭𞤲𞤮 𞤱𞤢𞤴𞤤𞤵𞤺𞤮𞤤 𞤁𞤮𞤧𞤼𞤫𞤪𞤫 𞤤𞤫𞤴𞤣𞤭 𞤲𞤣𞤫𞤲. 𞤉 𞤧𞤢𞤺𞤮 𞤥𞤢𞤳𞥆𞤮⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤻𞤭𞥅𞤩𞤲𞤢𞤴𞤲𞤮 𞤧𞤢𞤪𞤭𞤴𞤢 𞤳𞤢𞤲 𞤸𞤢𞤪𞤢 𞤮 𞤯𞤢𞤩𞥆𞤢𞥄𞤤𞤭 𞤶𞤮𞥅𞤯𞤭𞤼𞤢𞤺𞤮𞤤 𞤳𞤢 𞤶𞤵𞤤𞥆𞤫𞤪𞤫 𞤩𞤢𞥄𞤱𞤮 𞤫 𞤱𞤢𞤯𞤵𞤣𞤫 𞤣𞤵𞥅𞤩𞤭 𞤧𞤢𞤨𞥆𞤮 𞤸𞤮𞥅𞤪𞤫 𞤘𞤭𞤲𞤫.