𞤄𞤉𞤁𞤋𞤒𞤉𞥅 𞤐𞤌 𞤊𞤀𞥄𞤂𞤀𞥄 𞤁𞤀𞤈𞤀𞥄𞤁𞤉 𞤑𞤀𞤁𞤋
𞤀𞤲𞤪𞤭𞥅 𞤑𞤮𞤲𞤢𞤲 𞤄𞤫𞤣𞤭𞤴𞤫𞥅⹁ 𞤤𞤢𞥄𞤼𞤭𞤲𞤮𞥅𞤯𞤮 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤑𞤮𞤼𞤣𞤭𞤾𞤢𞥄𞤪 𞤲𞤣𞤭𞤲 𞤺𞤭𞤤𞤢𞥄𞥑𞥙𞥙𞥓 𞤸𞤢𞥄 𞥑𞥙𞥙𞥙⹁ 𞤩𞤢𞤲𞤺𞤭𞤲𞤭𞥅 𞤬𞤢𞥄𞤤𞤫 𞤣𞤢𞤪𞤢𞤺𞤮𞤤 𞤳𞤢 𞤧𞤵𞤩𞤮 𞤧𞤢𞥄𞤼𞤭𞥅𞤲𞤺𞤮 𞤫 𞤒𞤢𞤪𞤳𞤮 𞤸𞤭𞤼𞤢𞥄𞤲𞤣𞤫 𞥒𞥐𞥒𞥐. 𞤑𞤮 𞤳𞤢 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤫𞤩𞥆𞤢𞥄𞤲𞤺𞤢𞤤 𞤺𞤭𞤤𞤢 𞥒𞥕 𞤸𞤢𞥄 𞥒𞥖 𞤃𞤮𞤪𞤧𞤮⹁ 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤧𞤵𞤩𞤮𞤼𞤮𞥅 𞤣𞤢𞤪𞤮𞤼𞤮𞥅𞤯𞤮 𞤮𞤲 𞤫 𞤭𞤲𞤣𞤫 𞤥𞤢𞤴𞤪𞤫. 𞤐𞤣𞤫𞤲 𞤬𞤫𞤣𞥆𞤫 𞤥𞤢𞤤𞥆𞤢 𞤸𞤫𞥅𞤪𞤼𞤮 𞤳𞤮 𞤆𞤫.𞤁𞤫.𞤅𞤫.𞤋. (PDCI) 𞤱𞤮𞤲𞤭 𞤭𞤲𞤣𞤫 𞤥𞤢𞤴𞤪𞤫⹁ 𞤲𞤣𞤫 𞤶𞤫𞤴𞤢𞥄 𞤫 𞤨𞤫𞤣𞤤𞤫 𞤥𞤢𞤱𞤯𞤫 𞤑𞤮𞤼𞤣𞤭𞤾𞤢𞥄𞤪 𞤯𞤫𞤲.
𞤄𞤫𞤣𞤭𞤴𞤫𞥅 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥘𞥖 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤼𞤢𞤼𞤭 𞤫 𞤶𞤫𞥅𞤺𞤮𞤮). 𞤑𞤮 𞤳𞤢𞤲𞤳𞤮 𞤱𞤮𞤲𞤭 𞤯𞤭𞤯𞤢𞤩𞤮 𞤫 𞤤𞤢𞥄𞤥𞤢𞥄𞤣𞤫 𞤤𞤫𞤧𞤣𞤭 𞤑𞤮𞤼𞤣𞤭𞤾𞤢𞥄𞤪 𞤲𞤣𞤭𞤲. 𞤑𞤮 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫 𞤌𞤬𞤮𞤴 𞤄𞤵𞤱𞤢𞥄𞤻𞤭 𞤻𞤢𞤤𞤲𞤣𞤫 𞥗 𞤄𞤮𞤱𞤼𞤮 𞥑𞥙𞥙𞥓⹁ 𞤀𞤲𞤪𞤭𞥅 𞤑𞤮𞤲𞤢𞤲 𞤄𞤫𞤣𞤭𞤴𞤭𞥅 𞤤𞤮𞤲𞤼𞤭𞥅 𞤥𞤮⹁ 𞤲𞤣𞤫 𞤼𞤢𞤱𞤲𞤮𞥅 𞤳𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤸𞤮𞥅𞤪𞤫𞥅𞤶𞤮 𞤚𞤫𞥅𞤳𞤵𞥅𞤪𞤵 𞤲𞤣𞤵𞤲 (𞤧𞤵𞥅𞤣𞤵 𞤧𞤢𞤪𞤭𞤴𞤭𞤲𞤮𞥅𞤪𞤵 𞤲𞤣𞤵𞤲). 𞤀𞤣𞤮 𞤧𞤵𞤩𞤮 𞤲𞤺𞤮𞤲 𞥑𞥙𞥙𞥕⹁ 𞤄𞤫𞤣𞤭𞤴𞤫𞥅 𞤱𞤢𞤴𞤤𞤭 𞤧𞤢𞤪𞤼𞤭𞥅𞤶𞤭 𞤧𞤵𞤩𞤮 𞤲𞤺𞤮𞤲 𞤲𞤺𞤢𞤥 𞤸𞤢𞤯𞤵𞤺𞤮𞤤 𞤀𞤤𞤸𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤣𞤢𞤪𞤢𞤺𞤮𞤤. 𞤌 𞤧𞤭𞤲𞤷𞤭 𞤲𞤵𞤥𞤮 𞤢𞤲𞤣𞤭𞤪𞤢𞥄𞤲𞤺𞤮 “𞤭𞤾𞤢𞥄𞤪𞤭𞤼𞤫” 𞤥𞤢𞤤𞥆𞤢 𞤋𞤱𞤢𞤪𞤢𞥄𞤳𞤵. 𞤒𞤮𞤺𞤢 𞤫 𞤧𞤢𞤪𞤼𞤭𞥅𞤶𞤭 𞤳𞤫𞤧𞤭 𞤯𞤭 𞤮 𞤢𞤣𞥆𞤭 𞤯𞤭𞤲 𞤳𞤮:
- 𞤖𞤢𞤴 𞤺𞤮𞥅𞤼𞤮 𞤱𞤢𞥄𞤱𞤢𞤼𞤢𞥄 𞤣𞤢𞤪𞤢𞥄𞤣𞤫 𞤬𞤭𞥅 𞤤𞤢𞥄𞤥𞤵 𞤧𞤮 𞤼𞤢𞤱𞤭𞥅 𞤶𞤭𞥅𞤣𞤲𞤢𞥄𞤩𞤫 𞤮𞤲𞤼𞤭𞤺𞤭 𞤩𞤫𞤲 𞤯𞤭𞤯𞤮 𞤱𞤮𞤲𞤢𞥄 𞤭𞤾𞤢𞤪𞤲𞤢𞥄𞤩𞤫
- 𞤑𞤢𞤣𞤭⹁ 𞤴𞤮 𞤼𞤢𞤱𞤵 𞤮𞤲𞤼𞤭𞤺𞤭 𞤲𞤮 𞤸𞤮𞤯𞤭 𞤲𞤣𞤫𞤪 𞤑𞤮𞤼𞤣𞤭𞤾𞤢𞥄𞤪 𞤣𞤵𞥅𞤩𞤭 𞤶𞤮𞤱𞤭 𞤶𞤮𞤳𞥆𞤮𞤲𞥋𞤣𞤭𞤪𞤯𞤭 𞤢𞤣𞤮 𞤧𞤵𞤩𞤮 𞤲𞤺𞤮𞤲.
𞤑𞤮 𞤯𞤭𞥅 𞤧𞤢𞤪𞤼𞤭𞥅𞤶𞤭 𞤳𞤫𞤧𞤭 𞤳𞤢𞤻𞤵𞤲 𞤫 𞤼𞤭𞤶𞥆𞤢𞥄𞤣𞤫 𞤱𞤮𞤲𞤣𞤫 𞤶𞤢𞤲𞤬𞤢 𞤱𞤢𞤯𞤢𞤴 𞤫 𞤧𞤵𞤩𞤮 𞤲𞤺𞤮𞤲⹁ 𞤱𞤮𞤲𞤭 𞤧𞤢𞤦𞤵 𞤂𞤮𞤪𞤢𞤲 𞤄𞤢𞤺𞤦𞤮𞥅 𞤫 𞤀𞤤𞤸𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤧𞤢𞤤𞤭𞥅 𞤼𞤢𞤱𞤫𞥅𞤣𞤫 𞤫 𞤲𞤺𞤮𞤲 𞤧𞤵𞤩𞤮 𞤸𞤭𞤼𞤢𞥄𞤲𞤣𞤫 𞥑𞥙𞥙𞥕. 𞤇𞤫 𞤴𞤢𞤥𞤭𞤪𞤭 𞤳𞤢𞤣𞤭 𞤴𞤭𞤥𞤩𞤫 𞤥𞤢𞤩𞥆𞤫 𞤩𞤫𞤲 𞤴𞤮 𞤤𞤵𞤼𞥆𞤵 𞤳𞤢 𞤷𞤵𞥅𞤯𞤭 𞤥𞤵𞤲.
𞤕𞤢𞤺𞥆𞤢𞤤 𞤲𞤺𞤮𞤲 𞤧𞤵𞤩𞤮⹁ 𞤄𞤫𞤣𞤭𞤴𞤫𞥅 𞤤𞤢𞥄𞤥𞤭𞤼𞤭𞥅 𞤸𞤢𞥄 𞤲𞤣𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤬𞤮𞤤𞥆𞤵𞤲𞤮𞥅 𞤥𞤮 𞤻𞤢𞤤𞤲𞤣𞤫 𞥒𞥔 𞤄𞤮𞤱𞤼𞤮 𞥑𞥙𞥙𞥙. 𞤈𞤮𞤦𞤫𞥅𞤪 𞤘𞤫𞤴𞤭 𞤤𞤮𞤲𞤼𞤭𞥅 𞤥𞤮.
𞤐𞤣𞤫𞤲𞤧𞤢𞤴⹁ 𞤄𞤫𞤣𞤭𞤴𞤫𞥅 𞤣𞤮𞤺𞤭 𞤬𞤢𞥄𞤦𞤼𞤭𞤲𞤮𞤴𞤭𞥅 𞤳𞤢 𞤣𞤢𞥄𞤳𞤢 𞤊𞤢𞤪𞤢𞤲𞤧𞤭𞥅𞤩𞤫 𞤩𞤫𞤲. 𞤇𞤫𞤲 𞤯𞤮𞤲 𞤱𞤢𞤤𞥆𞤭 𞤥𞤮⹁ 𞤮 𞤴𞤢𞤤𞤼𞤭 𞤑𞤮𞤼𞤣𞤭𞤾𞤢𞥄𞤪 𞤮 𞤴𞤢𞤸𞤭 𞤚𞤮𞤺𞤮 𞤻𞤢𞤤𞤲𞤣𞤫 𞥒𞥖 𞤄𞤮𞤱𞤼𞤮 𞥑𞥙𞥙𞥙. 𞤑𞤮 𞤯𞤮𞤲⹁ 𞤳𞤢𞤲𞤳𞤮 𞤫 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤩𞤫 𞤱𞤮𞤲𞤭 𞤸𞤢𞥄 𞤻𞤢𞤤𞤲𞤣𞤫 𞥓 𞤅𞤭𞥅𞤤𞤮 𞥒𞥐𞥐𞥐⹁ 𞤲𞤣𞤫𞤲 𞤩𞤫 𞤴𞤢𞤸𞤭 𞤩𞤫 𞤥𞤮𞤱𞤤𞤭𞤲𞤮𞤴𞤭𞥅 𞤊𞤢𞤪𞤢𞤲𞤧𞤭. 𞤌 𞤪𞤵𞤼𞥆𞤢𞥄𞤣𞤫 𞤑𞤮𞤼𞤣𞤭𞤾𞤢𞥄𞤪 𞤱𞤮𞥅 𞤻𞤢𞤤𞤲𞤣𞤫 𞥑𞥕 𞤒𞤢𞤪𞤳𞤮 𞥒𞥐𞥐𞥑 𞤲𞤣𞤫 𞤂𞤮𞤪𞤢𞤲 𞤄𞤢𞤺𞤦𞤮𞥅 𞤤𞤢𞥄𞤥𞤭𞤲𞤮𞥅.
𞤑𞤢 𞤧𞤵𞤩𞤮 𞥒𞥐𞥑𞥐⹁ 𞤮 𞤼𞤢𞤱𞤼𞤭 𞤀𞤤𞤸𞤢𞤧𞤢𞥄𞤲 𞤏𞤢𞤼𞤢𞤪𞤢𞥄 𞤩𞤫 𞤬𞤮𞥅𞤤𞤭 𞤂𞤮𞤪𞤢𞤲 𞤄𞤢𞤺𞤦𞤮𞥅. 𞤉 𞤧𞤵𞤩𞤮 𞤸𞤭𞤳𞥆𞤭𞤲𞤮𞥅𞤲𞤺𞤮 𞤲𞤺𞤮𞤲 𞤯𞤮𞤲 𞤳𞤢𞤣𞤭 𞥒𞥐𞥑𞥕⹁ 𞤄𞤫𞤣𞤭𞤴𞤫𞥅 𞤣𞤢𞤪𞤢𞤲𞤮𞥅𞤳𞤭⹁ 𞤮 𞤢𞤷𞥆𞤢𞤲𞤭 𞤏𞤢𞤼𞤢𞤪𞤢𞥄 𞤲𞤣𞤫 𞤼𞤢𞤱𞤲𞤮𞥅 𞤫𞤩𞤫 𞤼𞤢𞤱𞤣𞤢𞥄 𞤫 𞤥𞤮𞤶𞤮𞤦𞤫𞤪𞤫 𞤌𞤬𞤮𞤴𞤭𞤴𞤢𞤲𞤳𞤮𞥅𞤪𞤫 𞤲𞤣𞤫𞤲.
𞤑𞤮𞤲𞤮 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤩𞤮𞥅𞤴𞤢𞥄𞤲𞤮 𞤧𞤢𞤦𞤵 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥘⹁ 𞤄𞤫𞤣𞤭𞤴𞤫𞥅 𞤼𞤢𞤱𞤼𞤭 𞤣𞤢𞤪𞤼𞤭𞥅𞤩𞤫 𞤤𞤢𞥄𞤥𞤵 𞤲𞤺𞤵𞤲. 𞤌𞤥𞤮 𞤬𞤫𞤤𞤭𞤪𞤭 𞤏𞤢𞤼𞤢𞤪𞤢𞥄 𞤬𞤭𞤪𞤼𞤵𞤺𞤮𞤤 𞤬𞤮𞤣𞤮𞥅𞤪𞤫 𞤱𞤮𞤲𞤵𞤺𞤮𞤤 𞤩𞤢𞥄𞤱𞤮 𞤣𞤢𞤪𞤮𞤼𞤮𞥅𞤯𞤮 𞤮𞤲 𞤫 𞤭𞤲𞤣𞤫 𞤬𞤫𞤣𞥆𞤫 𞤆𞤫.𞤁𞤫.𞤅𞤫.𞤋 𞤲𞤣𞤫𞤲.
𞤅𞤭 𞤦𞤫𞤣𞤭𞤴𞤫𞥅 𞤼𞤢𞤦𞤭𞤲𞤼𞤭𞤲𞤭𞥅 𞤣𞤢𞤪𞤢𞤺𞤮𞤤⹁ 𞤸𞤢𞤪𞤢𞤴 𞤮 𞤸𞤮𞤤𞥆𞤭𞥅 𞤱𞤮𞤲𞤣𞤫 𞤮 𞤸𞤢𞥄𞤪𞤢𞤼𞤢𞥄 𞤤𞤢𞥄𞤥𞤵⹁ 𞤮 𞤸𞤢𞥄𞤩𞤢𞤼𞤢𞥄 𞤳𞤢𞤣𞤭. 𞤅𞤢𞤦𞤵 𞤮 𞤤𞤢𞥄𞤥𞤭𞤲𞤮𞤳𞤫 𞤣𞤵𞥅𞤩𞤭 𞤶𞤫𞥅𞤺𞤮𞤮. 𞤀𞤣𞤮 𞤯𞤵𞤥 𞤳𞤢𞤣𞤭⹁ 𞤫 𞤲𞤣𞤫𞤪 𞤣𞤵𞥅𞤩𞤭 𞤧𞤢𞤨𞥆𞤮-𞤫-𞤼𞤢𞤼𞤭⹁ 𞤳𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮 𞤸𞤮𞥅𞤪𞤫𞥅𞤶𞤮 𞤅𞤵𞥅𞤣𞤵 𞤅𞤢𞤪𞤭𞤴𞤭𞤲𞤮𞥅𞤪𞤵 𞤲𞤣𞤵𞤲.
𞤌𞤲 𞤶𞤢𞥄𞤪𞤢𞥄𞤥𞤢