𞤅𞤓𞤑𞤀𞥄𞤇𞤉 𞤑𞤀𞤐𞤑𞤀𞤐 𞤇𞤉𞤐 𞤒𞤀𞤂𞤚𞤓𞤐𞤌 𞤖𞤀𞤐𞤁𞤉 𞤑𞤀𞤁𞤋

𞤖𞤢𞤲𞤣𞤫 𞤳𞤢𞤣𞤭 𞤫 𞤥𞤢𞤱𞤦𞤢𞥄𞤪𞤫⹁ 𞥒𞥑 𞤃𞤮𞤪𞤧𞤮⹁ 𞤧𞤵𞤳𞤢𞥄𞤩𞤫 𞤑𞤢𞤲𞤢𞤳𞤢𞤲 𞤩𞤫𞤲 𞤴𞤢𞤤𞤼𞤵𞤲𞤮⹁ 𞤩𞤫 𞤲𞤢𞤲𞤺𞤭 𞤤𞤢𞥄𞤱𞤭 𞤯𞤭𞤲 𞤲𞤺𞤢𞤥 𞤰𞤢𞤥𞤼𞤵𞤺𞤮𞤤 𞤤𞤢𞥄𞤥𞤵 𞤲𞤺𞤵𞤲 𞤲𞤣𞤢𞤴𞤺𞤵. 𞤐𞤣𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤯𞤢𞤩𞥆𞤢𞤴𞤲𞤮𞥅 𞤤𞤢𞥄𞤥𞤵⹁ 𞤮 𞤬𞤮𞤣𞤵𞤲𞤮 𞤑𞤢𞤲𞤳𞤢𞤳𞤢𞤲 𞤳𞤢𞤻𞤵𞤲 𞤫 𞤷𞤢𞤫 𞤯𞤫𞤲 𞤳𞤢 𞤣𞤮𞤱𞤪𞤭 𞤘𞤭𞤲𞤫⹁ 𞤲𞤣𞤭𞤴𞤢𞤲 𞤫 𞤲𞤣𞤢𞤴𞤺𞤵. 𞤑𞤮𞤲𞤮 𞤸𞤢𞥄 𞤶𞤮𞥅𞤲𞤭 𞤯𞤵𞤥 𞤤𞤢𞥄𞤼𞤢𞥄𞤳𞤭.

𞤑𞤮 𞤤𞤢𞥄𞤱𞤮𞤤 𞤲𞤢𞤴𞤢𞤩𞤮𞤤 𞤲𞤺𞤮𞤤 𞤲𞤭𞥅 𞤧𞤵𞤳𞤢𞥄𞤩𞤫 𞤑𞤢𞤲𞤳𞤢𞤲 𞤩𞤫𞤲 𞤲𞤮 𞤴𞤢𞤤𞤼𞤵𞤣𞤫. 𞤔𞤮𞥅𞤲𞤭 𞤳𞤮 𞤩𞤫 𞤬𞤢𞥄𞤤𞤢 𞤳𞤮 𞤴𞤮 𞤺𞤮𞤥𞤲𞤢𞤼𞤫𞥅𞤪𞤭 𞤲𞤣𞤭𞤲 𞤣𞤢𞤪𞤲𞤢𞤲 𞤩𞤫 𞤘𞤢𞥄𞤤𞤢𞤤 (𞤦𞤢𞥄𞤪𞤢𞥄𞤧𞤭) 𞤲𞤮 𞤩𞤫 𞤸𞤫𞤩𞤭𞤪𞤢 𞤴𞤭𞥅𞤼𞤫 𞤫 𞤲𞤣𞤢𞤴𞤺𞤵. 𞤖𞤢𞤪𞤭 𞤀𞤤𞤬𞤢𞥄 𞤑𞤮𞤲𞤣𞤫 𞤬𞤮𞤣𞤭𞥅𞤲𞤮 𞤣𞤢𞤪𞤲𞤵𞤺𞤮𞤤 𞤺𞤢𞥄𞤤𞤢𞤤 𞤫 𞤲𞤮𞥅𞤳𞥆𞤵𞥅𞤪𞤫 𞤱𞤭𞤫𞤼𞤫𞥅𞤲𞤣𞤫 𞤑𞤮𞥅𞥀𞤫𞤣𞤵. 𞤑𞤮𞤲𞤮 𞤸𞤢𞤴 𞤼𞤵𞥅𞤬𞤫𞥅𞤪𞤫 𞤱𞤮𞥅𞤼𞤫𞤪𞤫 𞤶𞤮𞥅𞤯𞥆𞤭𞤲𞤢𞥄𞤳𞤢 𞤯𞤮𞤲 𞤼𞤢𞤸𞤮.

𞤅𞤢𞤺𞤮 𞤥𞤢𞤩𞥆𞤫⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤸𞤵𞥅𞤩𞤲𞤢𞤴 𞤳𞤮 𞤮 𞤬𞤮𞤣𞤭 𞤩𞤫 𞤳𞤮𞤲 𞤢𞤣𞤮 𞤮 𞤭𞤥𞥆𞤢𞥄𞤣𞤫 𞤳𞤢 𞤶𞤵𞤤𞥆𞤫𞤪𞤫. 𞤁𞤮𞤧𞤼𞤫𞤪𞤫 𞤤𞤫𞤴𞤣𞤭 𞤲𞤣𞤫𞤲 𞤲𞤮 𞤱𞤢𞤯𞥆𞤭𞤲𞤭 𞤥𞤮 𞤭𞤥𞥆𞤢𞤺𞤮𞤤 𞤧𞤢𞤦𞤵𞤲𞤢 𞤮 𞤼𞤭𞤥𞥆𞤢𞤲𞤢𞤴 𞤶𞤮𞥅𞤯𞤢𞤲𞤯𞤫 𞤯𞤭𞤯𞤭 𞤯𞤫𞤲 𞤸𞤭𞤳𞥆𞤢. 𞤑𞤮𞤲𞤮 𞤲𞤮𞤲⹁ 𞤮𞤥𞤮 𞤢𞥄𞤣𞤭𞥅 𞤮 𞤣𞤢𞤪𞤮𞤼𞤮 𞤳𞤢𞤣𞤭 𞤼𞤢𞤼𞤢𞤩𞤵𞤲. 𞤑𞤮 𞤯𞤵𞤥 𞤮 𞤢𞤣𞥆𞤭𞤪𞤢𞤲𞤭 𞤣𞤮𞤧𞤼𞤫𞤪𞤫 𞤸𞤫𞤧𞤪𞤫. 𞤑𞤮𞤲𞤮 𞤱𞤮𞥅𞤣𞤭𞥅 𞤫 𞤧𞤵𞤳𞤢𞥄𞤩𞤫 𞤑𞤢𞤲𞤳𞤢𞤲 𞤩𞤫𞤲⹁ 𞤱𞤭𞤵𞤩𞤫 𞤱𞤮𞤲𞤣𞤫 𞤶𞤮𞥅𞤯𞤢𞤲𞤣𞤫 𞤼𞤢𞤼𞤢𞤩𞤫𞤪𞤫 𞤱𞤢𞤯𞤢𞤼𞤢𞥄. 𞤇𞤫 𞤬𞤢𞥄𞤤𞤢 𞤴𞤮 𞤮 𞤭𞤥𞥆𞤮⹁ 𞤺𞤮𞤤𞥆𞤮𞥅𞤱𞤮 𞤤𞤮𞤲𞤼𞤮𞥅 𞤥𞤮.

𞤖𞤢𞤲𞤣𞤫⹁ 𞤫 𞤲𞤣𞤫𞤪 𞤲𞤶𞤢𞤥𞤯𞤭 𞤼𞤢𞤼𞤭 𞤧𞤵𞤳𞤢𞥄𞤩𞤫 𞤩𞤫𞤲 𞤧𞤵𞤲𞥆𞤵𞤲𞤮 𞤼𞤢𞤤𞥆𞤭𞥅𞤶𞤫 𞤫 𞤷𞤢𞤤𞤯𞤭 𞤳𞤢 𞤯𞤢𞤼𞤫-𞤷𞤫𞤤𞤫⹁ 𞤩𞤫 𞤬𞤭𞤯𞤭 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤫 𞤯𞤢𞤲𞤣𞤮𞤳𞤢𞥄𞤩𞤫 (𞤨𞤮𞤤𞤭𞥅𞤧𞤢𞥄𞤩𞤫) 𞤩𞤫𞤲 𞤳𞤢𞥄𞤰𞤫. 𞤂𞤢𞥄𞤥𞤵 𞤲𞤺𞤵𞤲 𞤭𞤼𞥆𞤵𞤲𞤮 𞤧𞤮𞥅𞤪𞤭𞥅𞤩𞤫 𞤳𞤮 𞤱𞤢𞤤𞥆𞤭𞤼𞤮𞥅 𞤯𞤢𞤲𞤣𞤮𞤳𞤢𞥄𞤩𞤫 𞤩𞤫𞤲. 𞤄𞤵𞤴 𞤫 𞤥𞤢𞤩𞥆𞤫 𞤦𞤢𞤪𞤥𞤵𞤲𞤮. 𞤑𞤮𞤲𞤮⹁ 𞤳𞤭𞥅𞤳𞤭𞥅𞤯𞤫 𞤯𞤮𞥅⹁ 𞤩𞤵𞥅𞤩𞤼𞤵 𞤲𞤺𞤵𞤲 𞤬𞤵𞤯𞥆𞤭𞤳𞤫 𞤢𞤪𞤼𞤵𞤣𞤫 𞤳𞤢 𞤧𞤢𞥄𞤪𞤫 𞤑𞤢𞤲𞤳𞤢𞤲

𞤉 𞤖𞤮𞤪𞤦𞤭𞤪𞥆𞤫 𞤬𞤫𞤰𞥆𞤵𞤲𞥋𞤣𞤫⹁ 𞤃𞤮𞤸𞤢𞤥𞥆𞤫𞤣 𞤔𞤢𞥄𞤲𞤫𞥅⹁ 𞤶𞤢𞥄𞤺𞤮𞤪𞤢𞥄𞤯𞤮 𞤮𞤲 𞤳𞤢 𞤲𞤣𞤫𞤲𞤳𞤢⹁ 𞤴𞤢𞤸𞤵𞤲𞤮 𞤑𞤢𞤲𞤳𞤢𞤲 𞤻𞤭𞤨𞥆𞤵𞤺𞤮𞤤 𞤩𞤫𞤪𞤯𞤫 𞤧𞤵𞤳𞤢𞥄𞤩𞤫 𞤩𞤫𞤲. 𞤑𞤮𞤲𞤮 𞤩𞤫 𞤶𞤢𞤩𞤢𞥄𞤤𞤭. 𞤇𞤫 𞤶𞤢𞤩𞥆𞤮𞤪𞤭 𞤥𞤮 𞤱𞤭𞤵𞤺𞤮𞤤⹁ 𞤔𞤀𞥄𞤐𞤉𞥅! 𞤇𞤌𞤑𞥆𞤀𞤚𞤀𞥄!

𞤅𞤭𞤺𞤭𞤪𞤭 𞤫 𞤑𞤵𞤪𞤵𞤧𞤢 𞤳𞤢𞤣𞤭⹁ 𞤷𞤢𞤫 𞤯𞤭𞤯𞤭 𞤳𞤫𞤪𞤲𞤵𞤣𞤵𞤯𞤫 𞤫 𞤑𞤢𞤲𞤳𞤢𞤲⹁ 𞤴𞤢𞤤𞤼𞤵𞤲𞤮 𞤫 𞤯𞤫𞥅 𞤦𞤢𞤤𞤯𞤫 𞤬𞤫𞤰𞥆𞤵𞤯𞤫. 𞤑𞤮 𞤤𞤫𞤴𞤣𞤭 𞤲𞤣𞤭𞤲 𞤬𞤮𞤨 𞤸𞤢𞥄𞤲𞤵𞤲𞤮𞥅 𞤭𞤥𞥆𞤮𞤣𞤢𞥄𞤣𞤫 𞤬𞤭𞥅 𞤣𞤢𞤪𞤼𞤢𞤺𞤮𞤤 𞤲𞤺𞤵𞥅 𞤲𞤶𞤢𞤺𞥆𞤵 𞤣𞤵𞥅𞤥𞤭𞥅𞤲𞤺𞤵 𞤸𞤮𞥅𞤪𞤫 𞤘𞤭𞤲𞤫.