𞤖𞤢𞤪𞤭 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫 𞤳𞤮 𞤱𞤭𞤲𞤣𞤭𞥅⹁ 𞤳𞤮𞤲𞤮 𞤲𞤣𞤫𞤪 𞤁𞤵𞥅𞤩𞤭 𞥑𞥗 𞤥𞤭𞤯𞤮 𞤶𞤢𞤲𞤺𞤲𞤵𞤣𞤫 (𞤶𞤢𞤲𞥆𞤵𞤣𞤫)

 𞤔𞤮𞤸𞤲 𞤑𞤮𞤪𞤳𞤮𞤪𞤢𞤲⹁ 𞤳𞤮 𞤯𞤵𞤥 𞤱𞤮𞤲𞤭 𞤭𞤲𞤣𞤫 𞤥𞤢𞤳𞥆𞤮 𞤲𞤣𞤫𞤲. 𞤑𞤮 𞤐𞤭𞤱-𞤃𞤫𞤳𞤧𞤭𞤳𞤮𞥅 𞤫 𞤲𞤣𞤫𞤪 𞤤𞤫𞤧𞤣𞤭 𞤀𞤥𞤫𞤪𞤭𞤳𞤢𞥄 𞤮 𞤶𞤭𞤦𞤭𞤲𞤢𞥄⹁ 𞤮 𞤥𞤢𞤱𞤲𞤭. 𞤑𞤮 𞤯𞤮𞤲 𞤳𞤢𞤣𞤭 𞤮 “𞤶𞤢𞤲𞤺𞤭” 𞤸𞤢𞥄 𞤮 𞤶𞤮𞥅𞤬𞤭𞤲𞤭 𞤸𞤢𞤴 𞤧𞤭 𞤮 𞤱𞤢𞥄𞤱𞤢𞤼𞤢𞥄𞤲𞤮 𞤶𞤢𞤲𞤺𞤵𞤣𞤫 𞤳𞤮 𞤱𞤭𞤲𞤣𞤭𞥅. 𞤇𞤢𞥄𞤱𞤮 𞤮 𞤺𞤢𞤴𞤲𞤵𞤣𞤫 𞤶𞤢𞤲𞤺𞤣𞤫⹁ 𞤮 𞤤𞤢𞥄𞤼𞤭𞥅 𞤶𞤢𞤲𞤺𞤲𞤮𞥅𞤱𞤮. 𞤉 𞤲𞤣𞤫𞤪 𞤣𞤵𞥅𞤩𞤭 𞥑𞥗 (𞤧𞤢𞤨𞥆𞤮-𞤫-𞤶𞤫𞥅𞤯𞤭𞤯𞤭)⹁ 𞤮𞤥𞤮 𞤶𞤢𞤲𞤺𞤭𞤲𞤣𞤫⹁ 𞤳𞤮𞤲𞤮 𞤫 𞤲𞤣𞤫𞤪 𞤯𞤭𞤲 𞤣𞤵𞥅𞤩𞤭 𞤬𞤮𞤬⹁ 𞤮𞤥𞤮 𞤧𞤮𞥅𞤥𞤵𞤲𞤮𞥅 𞤺𞤵𞤲𞤣𞤮𞥅 𞤥𞤢𞤱𞤯𞤮. 𞤉 𞤳𞤮𞤲𞤺𞤮𞤤 𞤥𞤢𞤳𞥆𞤮⹁ 𞤸𞤫𞤯𞤭𞤼𞤫𞥅:

𞤊𞤫𞤱𞤲𞤣𞤮 𞤥𞤭 𞤱𞤮𞤲𞥆𞤮𞥅 𞤨𞤢𞤴𞤳𞤵𞤲⹁ 𞤥𞤢𞤱𞤩𞤫 𞤢𞤲 𞤩𞤫𞤲 𞤲𞤮 𞤱𞤮𞥅𞤱𞤵𞤲𞤮𞥅 𞤴𞤫𞥅𞤼𞤢𞤺𞤮𞤤 𞤤𞤢𞤲 𞤱𞤮𞤲𞤣𞤫 𞤥𞤭 𞤱𞤮𞤲𞤮𞤴𞤢𞤴 𞤥𞤢𞤤𞤢𞥄𞤯𞤮. 𞤀𞤣𞤮 𞤲𞤮𞤲 𞤥𞤭 𞤼𞤮𞤩𞥆𞤢𞤲𞤫𞥅𞤣𞤫 𞤥𞤢𞤤𞥆𞤢 𞤥𞤭 𞤱𞤭𞤲𞤣𞤫𞥅𞤣𞤫 𞤫 𞤣𞤵𞤯𞤢𞤤⹁ 𞤥𞤭𞤯𞤮 𞤸𞤮𞥅𞤤𞤭𞤲𞤮𞥅 𞤳𞤮 𞤩𞤫 𞤴𞤫𞥅𞤼𞤭𞤲𞤮𞥅 𞤤𞤢𞤲 𞤳𞤮𞤲.

𞤊𞤭𞥅 𞤳𞤢𞤤𞤢 𞤲𞤫𞥅𞤩𞤵𞤲𞤮𞥅 𞤸𞤢𞥄 𞤧𞤮 𞤥𞤭 𞤱𞤢𞥄𞤱𞤭 𞤸𞤢𞥄𞤤𞤵𞤣𞤫⹁ 𞤩𞤢𞤴𞤼𞤭 𞤥𞤭 𞤶𞤭𞤦𞤭𞤲𞤢𞥄𞤥𞤢⹁ 𞤲𞤣𞤫 𞤥𞤭𞤯𞤮 𞤲𞤢𞥄𞤼𞤢𞤴𞤲𞤮𞥅 𞤶𞤢𞤲𞤺𞤣𞤫⹁ 𞤸𞤢𞤪𞤭 𞤥𞤭𞤯𞤮 𞤱𞤮𞤲𞤣𞤭 𞤫 𞤼𞤢𞤥𞤰𞤭𞤲𞤢𞥄𞤪𞤫 𞤥𞤢𞤱𞤲𞤣𞤫 𞤱𞤢𞥄𞤱𞤵𞤺𞤮𞤤 𞤶𞤢𞤲𞤺𞤵𞤣𞤫 𞤲𞤮 𞤦𞤢𞤲𞤣𞤭𞤪𞤢𞥄𞤩𞤫 𞤢𞤲 𞤩𞤫𞤲 𞤬𞤮𞤬 𞤱𞤢𞥄𞤱𞤭𞤪𞤭 𞤲𞤮𞤲. 𞤖𞤭𞤼𞤢𞥄𞤲𞤣𞤫 𞤺𞤮𞤢𞤩𞤫𞤪𞤫 𞤲𞤣𞤫𞤲 𞤬𞤫𞤰𞥆𞤭 𞤫 𞤶𞤢𞤥 𞤧𞤢𞤦𞤵 𞤳𞤮 𞤥𞤭 𞤸𞤢𞤦𞥆𞤮𞤪𞤢𞤲𞤮𞥅 𞤳𞤮𞤲⹁ 𞤱𞤮𞤲𞤢𞥄 𞤳𞤮 𞤯𞤵𞥅𞤯𞤭. 𞤑𞤮 𞤥𞤭 𞤼𞤭𞤶𞥆𞤭𞤪𞤢𞤲𞤮𞥅 𞤱𞤮𞥅 𞤳𞤮 𞤣𞤢𞤪𞤢𞤺𞤮𞤤 𞤳𞤢 𞤥𞤭 𞤸𞤢𞥄𞤲𞤭 𞤣𞤢𞤪𞤢𞥄𞤣𞤫 𞤯𞤮𞤲⹁ 𞤫 𞤶𞤮𞥅𞤯𞤢𞤺𞤮𞤤 𞤮𞤥𞤦𞤢 𞤸𞤵𞤲𞤣𞤵𞤳𞤮 𞤳𞤮𞤲⹁ 𞤳𞤢𞤻𞤵𞤲 𞤫 𞤴𞤢𞤸𞤵𞤺𞤮𞤤 𞤸𞤵𞤪𞤺𞤮 𞤸𞤢𞤪𞤢 𞤥𞤭 𞤥𞤮𞤣𞥆𞤭𞤲𞤢𞥄𞤤𞤭 𞤸𞤮𞥅𞤪𞤫 𞤢𞤲.

 𞤑𞤢 𞤸𞤭𞤼𞤢𞥄𞤲𞤣𞤫 𞤯𞤭𞤯𞤢𞤩𞤫𞤪𞤫⹁ 𞤳𞤮 𞤯𞤮𞤲 𞤥𞤫𞤲 𞤸𞤢𞥄𞤲𞤭 𞤫𞤳𞥆𞤭𞤼𞤢𞥄𞤣𞤫 𞤶𞤢𞤲𞤺𞤵𞤺𞤮𞤤. 𞤑𞤮𞤲𞤮 𞤧𞤮 𞤥𞤭 𞤵𞤣𞥆𞤭𞤼𞤭𞥅𞤲𞤮 𞤣𞤫𞤬𞤼𞤫𞤪𞤫 𞤥𞤭 𞤲𞤣𞤢𞥄𞤪𞤭𞥅 𞤦𞤭𞤲𞤣𞤭 𞤯𞤭𞤲⹁ 𞤸𞤢𞤪𞤭 𞤯𞤵𞤥 𞤲𞤮 𞤱𞤢𞤭𞤼𞤢𞤲𞤭 𞤤𞤢𞤲 𞤱𞤢 𞤵𞤣𞥆𞤭𞤼𞤵𞤺𞤮𞤤 𞤸𞤫𞤧𞤤𞤢𞤤 𞤱𞤭𞤲𞤣𞤭𞤪𞤢𞥄𞤲𞤺𞤢𞤤 𞤦𞤭𞤲𞤣𞤭 𞤷𞤢𞤴𞤲𞤢𞤲𞤳𞤮𞥅𞤪𞤫. 𞤃𞤭 𞤢𞤤𞤢𞥄𞤲𞤮 𞤬𞤢𞥄𞤥𞤵𞤣𞤫 𞤳𞤮 𞤯𞤭𞤲 𞤷𞤭𞥅𞤬𞤭 𞤬𞤭𞤪𞤼𞤭⹁ 𞤳𞤮𞤲𞤮 𞤸𞤢𞤪𞤭 𞤥𞤭 𞤢𞤲𞤣𞤢𞥄 𞤲𞤮 𞤥𞤭 𞤴𞤫𞥅𞤼𞤮𞤪𞤢 𞤲𞤣𞤫𞥅 𞤽𞤢𞤳𞥆𞤫𞤪𞤫 𞤸𞤢𞤴 𞤺𞤮𞥅𞤼𞤮.

  𞤔𞤫𞤥𞥆𞤢𞥄𞤶𞤫 𞤺𞤮𞥅 𞤲𞤵𞤲⹁ 𞤥𞤭 𞤼𞤮𞤪𞤮𞤼𞤮𞤲𞤮 𞤀𞤤𞤤𞤢 𞤥𞤭 𞤱𞤭𞤢: “𞤔𞤮𞥅𞤥𞤭 𞤢𞤲⹁ 𞤢𞤲𞤣𞤭𞤲𞤢𞤲 𞤲𞤮 𞤥𞤭 𞤶𞤢𞤲𞤺𞤭𞤪𞤢 𞤧𞤮 𞤥𞤭 𞤬𞤭𞤲𞤭𞥅”. 𞤑𞤫𞤲𞤫𞤲 𞤧𞤮 𞤥𞤭 𞤺𞤢𞤴𞤲𞤭𞥅 𞤼𞤮𞤪𞤢𞥄𞤣𞤫⹁ 𞤥𞤭 𞤸𞤵𞤩𞥆𞤭𞤲𞤢 𞤲𞤣𞤢𞤴𞤺𞤵 𞤲𞤺𞤵𞤲⹁ 𞤥𞤭 𞤵𞤣𞥆𞤭𞤼𞤢 𞤣𞤫𞤬𞤼𞤫𞤪𞤫 𞤥𞤭 𞤲𞤣𞤢𞥄𞤪𞤢 𞤧𞤮 𞤳𞤢𞥄𞤱𞤫𞥅 𞤱𞤢𞤯𞤭𞥅⹁ 𞤳𞤮𞤲𞤮 𞤼𞤢𞤱𞤢 𞤱𞤢𞤯𞤢𞥄𞤤𞤭. 

𞤑𞤢 𞤣𞤵𞤯𞤢𞤤⹁ 𞤥𞤭 𞤧𞤢𞤳𞥆𞤭𞤼𞤮𞤪𞤭 𞤳𞤢 𞤺𞤮𞤪𞤮𞤤 𞤩𞤢𞥄𞤱𞤮𞤱𞤮𞤤⹁ 𞤱𞤮𞤲𞤣𞤵𞤣𞤫 𞤫 𞤬𞤢𞤴𞤩𞤫 𞤥𞤢𞤪𞤵𞤩𞤫 𞤷𞤢𞤯𞤫𞥅𞤤𞤫 𞤳𞤢 𞤦𞤢𞤲𞤽𞤫 𞤶𞤢𞤲𞤺𞤣𞤫. 𞤃𞤭 𞤢𞤲𞤣𞤢𞥄 𞤸𞤢𞤴 𞤲𞤮 𞤥𞤭 𞤸𞤫𞤱𞤼𞤭𞤪𞤭 𞤼𞤮𞤲. 𞤃𞤭 𞤢𞤲𞤣𞤢𞥄𞤲𞤮 𞤳𞤢𞤣𞤭 𞤲𞤮 𞤥𞤭 𞤭𞤱𞤭𞤪𞤢 𞤼𞤮𞤲 𞤥𞤢𞥄 𞤥𞤮 𞤥𞤭 𞤸𞤢𞥄𞤲𞤭 𞤤𞤢𞤲𞤣𞤢𞥄𞤣𞤫 𞤯𞤵𞤥.

 𞤔𞤢𞤲𞤺𞤭𞤲𞤮𞥅𞤱𞤮 𞤮𞤲 𞤲𞤮𞤣𞥆𞤭𞤪𞤼𞤢𞥄𞤲𞤮 𞤲𞤺𞤮𞤤 𞤺𞤮𞤪𞤮𞤤 𞤩𞤢𞥄𞤱𞤮𞤱𞤮𞤤⹁ 𞤺𞤮𞤪𞤮𞤤 𞤥𞤵𞥅𞤥𞤩𞤫⹁ 𞤳𞤮𞤲𞤮 𞤳𞤮 𞤲𞤮𞤲 𞤬𞤢𞤴𞤩𞤫 𞤩𞤫𞤲 𞤲𞤮𞤣𞥆𞤭𞤪𞤢𞤴𞤲𞤮𞥅 𞤲𞤺𞤮𞤤. 𞤅𞤮 𞤢 𞤩𞤮𞥅𞤴𞤭𞥅 𞤲𞤮𞤲 𞤱𞤮𞤲𞤣𞤫 𞤼𞤮𞤲⹁ 𞤢 𞤬𞤵𞤯𞥆𞤮𞤼𞤮 𞤧𞤭𞤳𞥆𞤵𞤺𞤮𞤤 𞤱𞤮𞤲𞤣𞤫 𞤢𞤲 𞤳𞤢𞤣𞤭 𞤳𞤮 𞤢 𞤥𞤵𞥅𞤥𞤮.

 𞤑𞤢 𞤼𞤵𞤥𞤦𞤮𞤲𞥋𞤣𞤭𞤪𞤫 𞤸𞤢𞤳𞥆𞤵𞤲𞥋𞤣𞤫 𞤶𞤢𞤲𞤺𞤭𞤲𞤮𞥅𞤩𞤫 𞤩𞤫𞤲 𞤫 𞤥𞤢𞤱𞤩𞤫 𞤬𞤢𞤴𞤩𞤫 𞤩𞤫𞤲⹁ 𞤶𞤢𞤲𞤺𞤭𞤲𞤮𞥅𞤱𞤮 𞤮𞤲 𞤴𞤫𞥅𞤼𞤮𞤼𞤮𞤲𞤮 𞤥𞤢𞤱𞤩𞤫 𞤢𞤲 𞤩𞤫𞤲: “𞤃𞤵𞤻𞥆𞤫𞥅 𞤼𞤵𞤲⹁ 𞤳𞤮 𞤨𞤢𞤴𞤳𞤵𞤲 𞤥𞤢𞤪𞤵𞤳𞤵𞤲 𞤸𞤢𞤳𞥆𞤭𞤤⹁ 𞤳𞤵𞤲 𞤬𞤢𞤸𞤥𞤮𞤴𞤢𞤴.” 𞤐𞤣𞤫𞤲⹁ 𞤮 𞤬𞤫𞤰𞥆𞤭𞤲𞤢 𞤤𞤢𞤲 𞤳𞤢 𞤧𞤵𞥅𞤣𞤵 𞤼𞤢𞤼𞤢𞤩𞤵𞤪𞤵.

 𞤑𞤮 𞤢𞤪𞤢𞤼𞤢 𞤳𞤢𞤣𞤭⹁ 𞤶𞤢𞤲𞤺𞤭𞤲𞤮𞥅𞤱𞤮 𞤯𞤮𞤲 𞤮𞤲 𞤱𞤭𞤢𞤲𞤢 𞤥𞤢𞤱𞤩𞤫 𞤢𞤲 𞤩𞤫𞤲:”𞤑𞤮 𞤨𞤢𞤴𞤳𞤵𞤲 𞤶𞤮𞥅𞤥𞤢 𞤸𞤢𞤳𞥆𞤭𞤤 𞤸𞤵𞤲⹁ 𞤳𞤵𞤲 𞤬𞤢𞤸𞤥𞤮𞤴𞤢𞤴.” 𞤌𞤲 𞤯𞤮𞤲 𞤳𞤢𞤣𞤭 𞤬𞤫𞤰𞥆𞤭𞤲𞤭 𞤤𞤢𞤲 𞤳𞤢 𞤧𞤵𞥅𞤣𞤵 𞤲𞤢𞤴𞤢𞤩𞤵𞤪𞤵.

 𞤑𞤮 𞤢𞤪𞤼𞤮𞤴𞤼𞤢⹁ 𞤶𞤢𞤲𞤺𞤭𞤲𞤮𞥅𞤱𞤮 𞤯𞤮𞤲 𞤮𞤲 𞤳𞤢𞤣𞤭 𞤱𞤭𞤢𞤲𞤢 𞤥𞤢𞤱𞤩𞤫 𞤢𞤲 𞤩𞤫𞤲 𞤧𞤭𞤬𞤢 𞤳𞤮 𞤱𞤮𞥅𞤱𞤭 𞤳𞤮𞤲. 𞤌𞤲 𞤯𞤮𞤲 𞤳𞤢𞤣𞤭 𞤬𞤫𞤰𞥆𞤭𞤲𞤭 𞤤𞤢𞤲 𞤳𞤢 𞤧𞤵𞥅𞤣𞤵 𞤶𞤮𞤱𞤢𞤩𞤵𞤪𞤵.

 𞤑𞤮𞤲𞤮 𞤫𞤤𞥆𞤢 𞤮𞤲⹁ 𞤫 𞤲𞤣𞤫𞤪 𞤯𞤵𞤥 𞤬𞤮𞤬⹁ 𞤸𞤢𞤪𞤭 𞤥𞤭 𞤢𞤤𞤢𞥄𞤲𞤮 𞤬𞤢𞤸𞤥𞤵𞤣𞤫 𞤸𞤢𞤴 𞤬𞤵𞤧.

𞤐𞤣𞤫 𞤥𞤭𞤯𞤮 𞤸𞤫𞤱𞤼𞤢𞤴𞤲𞤮𞥅 𞤳𞤢 𞤧𞤵𞥅𞤣𞤵 𞤶𞤮𞤱𞤢𞤩𞤵𞤪𞤵⹁ 𞤸𞤢𞤪𞤭 𞤥𞤭 𞤺𞤢𞤴𞤲𞤭𞥅 𞤼𞤢𞤰𞤢𞥄𞤣𞤫 𞤱𞤮𞤲𞤣𞤫 𞤥𞤭 𞤱𞤢𞥄𞤱𞤮𞤴𞤢𞤴 𞤶𞤢𞤲𞤺𞤵𞤣𞤫 𞤨𞤮𞥅𞤥𞤢𞥄. 𞤙𞤢𞤤𞤲𞤣𞤫 𞤥𞤭 𞤬𞤭𞤲𞤭 𞤳𞤢𞤤𞤢⹁ 𞤥𞤭 𞤩𞤮𞤪𞤲𞤮𞥅 𞤸𞤢𞥄 𞤥𞤮𞤰𞥆𞤢⹁ 𞤥𞤭 𞤴𞤢𞤸𞤢 𞤳𞤢 𞤣𞤵𞤯𞤢𞤤 (𞤶𞤢𞤲𞤺𞤭𞤪𞤣𞤫). 𞤑𞤮𞤲𞤮 𞤸𞤢𞤪𞤭 𞤯𞤵𞤥 𞤲𞤮 𞤱𞤢𞤭𞤼𞤢𞤲𞤭 𞤤𞤢𞤲 𞤱𞤢 𞤴𞤢𞤸𞤵𞤺𞤮𞤤 𞤸𞤢𞤩𞤪𞤫 (𞤶𞤭𞤸𞤢𞥄𞤣𞤭) 𞤥𞤢𞤤𞥆𞤢 𞤺𞤫𞤪𞤫. 𞤖𞤢𞤪𞤭 𞤧𞤵𞥅𞤣𞤵 𞤶𞤢𞤲𞤺𞤭𞤪𞤣𞤵 𞤲𞤣𞤵𞤲 𞤬𞤵𞤯𞥆𞤭 𞤲𞤫𞤬𞤵𞤣𞤫 𞤤𞤢𞤲. 𞤐𞤣𞤵 𞤥𞤫𞤼𞥆𞤭𞤼𞤭𞥅 𞤤𞤢𞤲 𞤷𞤫𞤨 𞤲𞤮𞤲⹁ 𞤧𞤢𞤦𞤵 𞤸𞤫𞥅𞤱𞤵𞤺𞤮𞤤 𞤳𞤮𞤲𞥆𞤢𞥄𞤺𞤵 𞤫 𞤥𞤢𞤴𞤪𞤵. 𞤅𞤮 𞤥𞤭 𞤱𞤮𞤲𞤢𞤴 𞤼𞤮𞤲⹁ 𞤳𞤮 𞤦𞤫𞥅 𞤥𞤭 𞤯𞤢𞤩𞥆𞤢 𞤲𞤮 𞤥𞤭 𞤣𞤢𞤪𞤼𞤮𞤪𞤢.

𞤇𞤢𞤴𞤼𞤭 𞤥𞤭 𞤸𞤫𞤱𞤼𞤭𞥅 𞤳𞤢 𞤧𞤵𞥅𞤣𞤵 𞤶𞤫𞥅𞤯𞤭𞤯𞤢𞤩𞤵𞤪𞤵⹁ 𞤻𞤢𞤤𞤲𞤣𞤫 𞤱𞤮𞥅 𞤸𞤢𞤪𞤭 𞤥𞤭𞤯𞤮 𞤲𞤮𞤣𞥆𞤢𞥄 𞤳𞤢 𞤴𞤭𞥅𞤤𞤭𞤪𞤣𞤵 𞤸𞤮𞥅𞤪𞤫𞥅𞤶𞤮 𞤣𞤵𞤯𞤢𞤤 𞤮𞤲. 𞤅𞤮 𞤱𞤮𞤲𞤢𞥄 𞤨𞤭𞤴𞤪𞤮⹁ 𞤳𞤮 𞤤𞤭𞤺𞥆𞤭𞤼𞤫𞤪𞤫⹁ 𞤼𞤢𞤰𞤢𞥄𞤤𞤫 𞤫 𞤲𞤶𞤢𞤺𞥆𞤵⹁ 𞤸𞤢𞥄 𞤥𞤭 𞤪𞤢𞤯𞤢𞥄 𞤳𞤢 𞤣𞤵𞤯𞤢𞤤.

 𞤑𞤮𞤲𞤮 𞤲𞤺𞤵𞤲 𞤺𞤭𞤳𞥆𞤵 𞤲𞤺𞤵 𞤥𞤭 𞤱𞤮𞤲𞥆𞤮 𞤸𞤮𞤤𞥆𞤵𞤣𞤫⹁ 𞤱𞤮𞤲𞤢𞥄 𞤺𞤭𞤳𞥆𞤵 𞤢𞤲 𞤲𞤺𞤵𞤲 𞤲𞤮𞤲⹁ 𞤧𞤢𞤦𞤵 𞤱𞤮𞤲𞤢𞥄 𞤲𞤮𞤲 𞤥𞤭 𞤱𞤢𞤭𞤪𞤭. 𞤃𞤭 𞤥𞤢𞤪𞤢𞥄𞤲𞤮 𞤼𞤵𞤲 𞤬𞤫𞥅𞤪𞤫. 𞤅𞤮 𞤱𞤮𞤲𞤢𞥄 𞤯𞤵𞤥⹁ 𞤱𞤮𞤲𞤢𞥄 𞤲𞤮𞤲 𞤥𞤭 𞤬𞤢𞥄𞤤𞤭𞤪𞤢𞤲𞤮𞥅 𞤱𞤮𞤲𞤭𞤪𞤣𞤫. 𞤑𞤮 𞤥𞤭 𞤬𞤢𞥄𞤤𞤢𞤲𞤮𞥅⹁ 𞤳𞤮 𞤤𞤢𞥄𞤼𞤢𞤺𞤮𞤤 𞤺𞤢𞤴𞤲𞤵𞤯𞤮. 𞤅𞤢𞤺𞤮 𞤢𞤲⹁ 𞤥𞤭 𞤱𞤮𞤲𞤢𞤴𞤲𞤮 𞤶𞤢𞤲𞤺𞤢𞤲𞤢𞥄𞤳𞤵𞥅𞤶𞤮 𞤥𞤮𞤰𞥆𞤮⹁ 𞤳𞤮𞤲𞤮 𞤥𞤭 𞤫𞤼𞤭𞥅 𞤸𞤢𞥄 𞤥𞤭 𞤪𞤮𞤲𞤳𞤭 𞤬𞤫𞤧.

 𞤐𞤣𞤫 𞤥𞤭𞤯𞤮 𞤸𞤫𞤱𞤼𞤢𞤴𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫 𞤶𞤫𞥅𞤼𞤢𞤼𞤢𞤩𞤫𞤪𞤫 𞤲𞤣𞤫𞤲⹁ 𞤸𞤢𞤪𞤭 𞤥𞤭 𞤸𞤢𞥄𞤩𞤭𞥅 𞤱𞤮𞤲𞤵𞤺𞤮𞤤 𞤶𞤢𞤤𞤲𞤮𞤪𞤭 𞤫 𞤸𞤫𞤪𞤧𞤢 𞤱𞤮𞤲𞤢𞤲𞤣𞤫 𞤥𞤢𞤱𞤩𞤫 𞤢𞤲 𞤩𞤫𞤲. 𞤘𞤭𞤦𞤭 𞤮𞤲𞤼𞤵𞤥𞤢⹁ 𞤥𞤭 𞤬𞤭𞤩𞤭 𞤱𞤮𞤲𞤣𞤫 𞤥𞤭 𞤶𞤮𞤺𞤭𞤼𞤮𞤪𞤢𞤴 𞤸𞤮𞥅𞤪𞤫 𞤢𞤲 𞤲𞤫𞥅𞤣𞤭⹁ 𞤧𞤢𞤦𞤵 𞤧𞤮 𞤢𞤯𞤢 𞤲𞤫𞤭𞥅⹁ 𞤸𞤢𞥄𞤶𞤵𞥅𞤶𞤭 𞤥𞤢𞥄 𞤸𞤫𞥅𞤱𞤵𞤯𞤭 𞤧𞤮𞤳𞤼𞤢𞤴. 𞤀 𞤢𞤲𞤣𞤢𞤴 𞤳𞤢𞤣𞤭 𞤲𞤮 𞤸𞤫𞤩𞤭𞤪𞤢𞥄 𞤤𞤢𞥄𞤱𞤮𞤤 𞤲𞤮 𞤸𞤵𞤥𞤼𞤭𞤪𞤢𞥄 𞤸𞤢𞥄𞤶𞤵𞥅𞤶𞤭 𞤥𞤢𞥄 𞤯𞤭𞤲. 𞤁𞤭𞤺𞤢 𞤮𞤲𞤼𞤵𞤥𞤢⹁ 𞤥𞤭 𞤱𞤢𞤯𞤼𞤭 𞤥𞤮𞥅𞤥𞤢𞥄𞤣𞤫 𞤶𞤢𞤲𞤺𞤭𞤲𞤮𞥅𞤩𞤫 𞤩𞤫𞤲⹁ 𞤥𞤭 𞤱𞤢𞤯𞤭 𞤸𞤮𞥅𞤪𞤫 𞤢𞤲 𞤲𞤶𞤢𞥄𞤼𞤭𞤪𞤢𞥄𞤱𞤮 𞤥𞤢𞤩𞥆𞤫 𞤬𞤭𞥅 𞤲𞤮 𞤥𞤭 𞤬𞤫𞤰𞥆𞤭𞤪𞤢.

 𞤃𞤭 𞤬𞤢𞥄𞤤𞤢𞤲𞤮 𞤱𞤮𞤲𞤣𞤫 𞤳𞤢𞤣𞤭 𞤰𞤢𞥄𞤲𞤮⹁ 𞤧𞤢𞤦𞤵 𞤥𞤭 𞤫𞤤𞤼𞤮𞤼𞤮𞤲𞤮 𞤬𞤮𞤼𞤢. 𞤃𞤭𞤯𞤮 𞤬𞤢𞥄𞤥𞤵𞤲𞤮 𞤳𞤢𞤣𞤭 𞤤𞤭𞤥𞤮𞥅𞤪𞤫. 𞤃𞤭𞤯𞤮 𞤱𞤢𞥄𞤱𞤵𞤲𞤮𞥅 𞤤𞤭𞤥𞤵𞤣𞤫 𞤴𞤭𞤤𞤼𞤢 𞤷𞤫𞤱𞤯𞤭 𞤢𞤣𞤮 𞤥𞤭 𞤬𞤵𞤯𞥆𞤢𞥄𞤣𞤫 𞤴𞤢𞤸𞤵𞤺𞤮𞤤 𞤫 𞤣𞤵𞤯𞤢𞤤. 𞤖𞤢𞤴 𞤳𞤢𞥄𞤼𞤭𞤥𞤫 𞤧𞤮𞤱𞤭𞤲𞥋𞤣𞤭𞤪𞤮 𞤯𞤫𞤲⹁ 𞤸𞤢𞤪𞤭 𞤥𞤭𞤯𞤮 𞤸𞤵𞤲𞤶𞤭𞤲𞤮𞥅. 

 𞤇𞤢𞥄𞤱𞤼𞤭 𞤯𞤵𞤥⹁ 𞤥𞤭 𞤬𞤵𞤯𞥆𞤭 𞤥𞤵𞤴𞤦𞤭𞤲𞤣𞤫. 𞤑𞤮 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤶𞤢𞥄𞤩𞤭-𞤸𞤢𞥄𞤯𞤼𞤭𞤪𞤯𞤫 𞤯𞤫𞤲⹁ 𞤥𞤭 𞤶𞤭𞤲𞤣𞤭𞤣𞤢𞤴𞤲𞤮𞥅. 𞤃𞤭 𞤲𞤶𞤢𞥄𞤼𞤭𞥅 (𞤳𞤫𞤤𞤭𞥅)𞤳𞤢𞤣𞤭 𞤶𞤭𞤱𞤮 𞤩𞤵𞤪𞤯𞤮 𞤮𞤲 𞤣𞤢𞤪𞤲𞤣𞤫 𞤳𞤢 𞤶𞤢𞤲𞤺𞤣𞤫. 𞤑𞤮 𞤸𞤢𞤲𞤳𞤮 𞤼𞤫𞤣𞥆𞤭𞤲𞤭𞤪𞤢𞥄𞤲𞤮𞥅 𞤴𞤫𞤱𞤼𞤵𞤺𞤮𞤤 𞤻𞤢𞤤𞤲𞤣𞤫 𞤧𞤢𞥄𞤸𞤭𞤲𞤮 𞤲𞤺𞤮𞤲. 𞤃𞤭𞤯𞤮 𞤥𞤢𞤪𞤲𞤮𞥅 𞤳𞤢𞤣𞤭 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫⹁ 𞤩𞤫 𞤲𞤮 𞤱𞤢𞤤𞥆𞤭𞤼𞤮𞥅 𞤤𞤢𞤲 𞤱𞤢𞤯𞤵𞤺𞤮𞤤 𞤪𞤫𞤱𞤼𞤮𞤪𞤯𞤭 𞤧𞤵𞥅𞤣𞤵. 𞤑𞤮 𞤸𞤫𞥅𞤱𞤭 𞤫 𞤩𞤫𞤲⹁ 𞤸𞤢𞤪𞤭 𞤳𞤮 𞤶𞤭𞤱𞤩𞤫 𞤥𞤢𞤤𞥆𞤢 𞤷𞤵𞤪𞤦𞤢𞥄𞤩𞤫.

𞤑𞤮 𞤥𞤭 𞤱𞤢𞥄𞤱𞤵𞤲𞤮𞥅 𞤱𞤮𞥅⹁ 𞤳𞤮 𞤱𞤭𞤲𞤣𞤵𞤺𞤮𞤤 𞤭𞤲𞤣𞤫 𞤢𞤲 𞤲𞤣𞤫𞤲 𞤳𞤢𞤻𞤵𞤲 𞤫 𞤳𞤮𞤲𞤺𞤵𞤯𞤭 𞤧𞤫𞥅𞤯𞤢𞥄𞤶𞤭 𞤯𞤭 𞤥𞤭 𞤸𞤵𞤲𞤶𞤭𞥅⹁ 𞤳𞤮𞤲𞤮 𞤸𞤢𞤪𞤭 𞤥𞤭 𞤱𞤢𞥄𞤱𞤢𞤼𞤢𞥄 𞤱𞤭𞤲𞤣𞤵𞤣𞤫 𞤧𞤢𞤺𞤢𞤪𞤢𞤱𞤮𞤤 𞤼𞤭𞤥𞥆𞤵𞤲𞥋𞤺𞤮𞤤.

 𞤃𞤭 𞤱𞤢𞤳𞥆𞤭𞤤𞤭𞥅 𞤸𞤢𞥄 𞤥𞤭 𞤸𞤫𞤱𞤼𞤭 𞤫 𞤣𞤵𞤯𞤢𞤤 𞤼𞤮𞥅𞤱𞤲𞤺𞤢𞤤 𞤲𞤺𞤢𞤤 (𞤤𞤭𞥅𞤧𞤫𞥅)⹁ 𞤸𞤢𞤪𞤭 𞤤𞤫 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫 𞤩𞤵𞤪𞤭 𞤨𞤢𞤴𞤳𞤵𞤲 𞤱𞤮𞤲𞤵𞤳𞤵𞤲 𞤫 𞤸𞤭𞤼𞤢𞥄𞤲𞤣𞤫 𞤯𞤭𞤯𞤢𞤩𞤫𞤪𞤫 𞤥𞤢𞤤𞥆𞤢 𞤼𞤢𞤼𞤢𞤩𞤫𞤪𞤫. 𞤑𞤮𞤲𞤮 𞤲𞤮𞤲⹁ 𞤥𞤭 𞤸𞤢𞥄𞤤𞤢𞤲𞤢𞥄𞤤𞤭 𞤸𞤢𞤴 𞤺𞤮𞥅𞤼𞤮 𞤱𞤮𞤲𞤣𞤫 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫 𞤳𞤮 𞤱𞤭𞤲𞤣𞤭𞥅.

 𞤅𞤭 𞤲𞤣𞤢𞤪𞤼𞤭𞤲𞤮 𞤸𞤫𞤱𞤼𞤭𞥅𞤲𞤮⹁ 𞤳𞤮 𞤴𞤮 𞤥𞤭 𞤴𞤵𞤪𞤲𞤮 𞤫 𞤳𞤢𞤴𞤣𞤭𞥅𞤪𞤭 𞤶𞤮𞥅𞤯𞤭𞥅𞤯𞤮 𞤱𞤮𞥅 𞤼𞤢𞤳𞥆𞤮 𞤢𞤲⹁ 𞤥𞤢𞤤𞥆𞤢 𞤥𞤭 𞤶𞤮𞤺𞤲𞤢 𞤳𞤢𞤴𞤣𞤭 𞤢𞤲 𞤲𞤣𞤭𞤲 𞤺𞤮𞥅𞤼𞤯𞤮 𞤺𞤮𞥅⹁ 𞤮𞤲𞤼𞤭𞤺𞤭 𞤶𞤢𞥄𞤦𞤢𞤲𞤮𞥅 𞤤𞤢𞤲 𞤤𞤢𞤲𞤣𞤫 𞤯𞤫𞤲. 𞤑𞤮 𞤲𞤭𞥅 𞤥𞤭 𞤱𞤢𞤯𞤭𞤪𞤭 𞤸𞤢𞥄 𞤥𞤭 𞤸𞤫𞤱𞤼𞤭 𞤳𞤢 𞤔𞤢𞥄𞤩𞤭-𞤸𞤢𞥄𞤯𞤼𞤭𞤪𞤣𞤫.

 𞤐𞤣𞤫 𞤥𞤭 𞤸𞤫𞤱𞤼𞤵𞤲𞤮𞥅 𞤯𞤮𞤲⹁ 𞤥𞤭 𞤼𞤢𞤱𞤭 𞤶𞤢𞤳𞤢 𞤯𞤮𞥅 𞤳𞤢𞤣𞤭 𞤳𞤮 𞤺𞤮𞥅𞤼𞤯𞤵𞤥 𞤺𞤮𞤮. 𞤃𞤭 𞤥𞤭𞥅𞤶𞤭𞥅: “𞤀𞤱𞤢 𞤶𞤮𞥅𞤲𞤭 𞤳𞤢𞤴⹁ 𞤯𞤵𞤥 𞤯𞤮𞥅 𞤬𞤫𞤰𞥆𞤭𞤼𞤭𞥅 𞤤𞤢𞤲 𞤸𞤮𞥅𞤪𞤫 𞤲𞤣𞤫𞤲. 𞤑𞤮 𞤖𞤮𞤤 𞤲𞤮 𞤥𞤭 𞤴𞤢𞤤𞤼𞤭𞤪𞤮𞤴𞤼𞤢 𞤫 𞤯𞤵𞤥؟”

 𞤑𞤢 𞤶𞤢𞥄𞤩𞤭-𞤸𞤢𞥄𞤯𞤼𞤭𞤪𞤣𞤫⹁ 𞤥𞤭 𞤲𞤢𞥄𞤼𞤭𞥅 𞤫 𞤴𞤭𞤪𞤣𞤫 (𞤣𞤫𞤲𞤼𞤢𞤤) 𞤥𞤢𞤪𞤵𞤲𞤮𞥅𞤲𞤺𞤢𞤤 𞤲𞤣𞤢𞤪𞤼𞤭𞤲𞤭𞤪𞤯𞤫 𞤳𞤭𞤯𞥆𞤫 𞤯𞤫𞤲 𞤬𞤮𞤨. 𞤑𞤮 𞤯𞤵𞤥 𞤱𞤮𞤲𞥆𞤮𞥅 𞤺𞤮𞥅𞤼𞤮𞤤 𞤫 𞤤𞤢𞥄𞤱𞤭 𞤯𞤭 𞤥𞤭 𞤱𞤵𞤶𞥆𞤭𞤪𞤢𞤴𞤲𞤮𞥅 𞤯𞤭𞤲 𞤳𞤢 𞤲𞤣𞤢𞤪𞤼𞤭𞤲𞤮. 𞤑𞤫𞤲𞤫𞤲 𞤳𞤮 𞤴𞤮 𞤥𞤭 𞤺𞤫𞤪𞤵 𞤥𞤭 𞤸𞤢𞤬𞤭𞤲𞥋𞤣𞤭𞤪𞤫𞥅 𞤫 𞤺𞤮𞥅𞤼𞤯𞤮 𞤱𞤢𞥄𞤱𞤢𞤴𞤯𞤮 𞤱𞤢𞤤𞥆𞤵𞤣𞤫 𞤤𞤢𞤲 𞤳𞤢 𞤲𞤣𞤢𞤪𞤼𞤭𞤲𞤮. 𞤔𞤢𞤲𞤺𞤭𞤲𞤮𞥅𞤩𞤫 𞤺𞤮𞥅 𞤳𞤢𞤣𞤭⹁ 𞤳𞤮 𞤤𞤢𞤲𞤣𞤫 𞤺𞤮𞥅𞤼𞤫 𞤯𞤫𞤲 𞤲𞤣𞤢𞤪𞤼𞤭𞤲𞤭𞤪𞤢𞤴𞤲𞤮𞥅 𞤥𞤫𞤲 𞤸𞤭𞤼𞤢𞥄𞤲𞤣𞤫 𞤦𞤫𞥅 𞤸𞤭𞤼𞤢𞥄𞤲𞤣𞤫. 𞤑𞤫𞤲𞤫𞤲 𞤲𞤮𞤲⹁ 𞤥𞤭 𞤪𞤫𞤱𞤪𞤢𞤴𞤲𞤮 𞤤𞤢𞥄𞤱𞤭 𞤸𞤢𞤱𞤲𞤭𞥅𞤯𞤭 𞤺𞤮𞥅 𞤲𞤮 𞤥𞤭 𞤬𞤫𞤰𞥆𞤭𞤪𞤢 𞤧𞤮 𞤼𞤢𞤱𞤭𞥅 𞤥𞤭 𞤥𞤢𞤪𞤢𞥄 𞤬𞤫𞤸𞤪𞤫 𞤲𞤫𞤱𞤭𞥅𞤲𞤣𞤫.

 𞤙𞤢𞤤𞤲𞤣𞤫 𞤲𞤣𞤢𞤪𞤼𞤭𞤲𞤮 𞤺𞤮𞥅⹁ 𞤶𞤢𞤲𞤺𞤭𞤲𞤮𞥅𞤱𞤮 𞤮𞤲 𞤱𞤭𞤲𞤣𞤭 𞤤𞤢𞤲𞤣𞤫 𞤲𞤢𞤴𞤭 𞤳𞤢 𞤢𞤤𞥆𞤵𞤱𞤢𞤤 𞤥𞤢𞤸𞤣𞤭. 𞤃𞤭𞤲⹁ 𞤥𞤭𞤯𞤮 𞤶𞤮𞥅𞤯𞤭𞤲𞤮𞥅 𞤩𞤢𞥄𞤱𞤮 𞤬𞤮𞤨 𞤳𞤢 𞤼𞤢𞤳𞥆𞤮 𞤸𞤫𞤲𞤮𞤪𞤣𞤫. 𞤃𞤭 𞤻𞤫𞤥𞤦𞤭 𞤸𞤢𞥄 𞤥𞤭 𞤱𞤢𞥄𞤱𞤭 𞤱𞤭𞤲𞤣𞤭𞤼𞤢𞥄𞤣𞤫 𞤤𞤢𞤲𞤣𞤫 𞤯𞤫𞤲 𞤲𞤢𞤴𞤭 𞤬𞤮𞤨⹁ 𞤬𞤭𞥅 𞤳𞤢𞤤𞤢 𞤥𞤭 𞤢𞤲𞤣𞤢𞥄 𞤳𞤮 𞤯𞤫 𞤬𞤭𞤪𞤼𞤭. 𞤖𞤢𞤪𞤭 𞤲𞤮𞤲⹁ 𞤥𞤭𞤲 𞤫 𞤱𞤫𞤤𞤣𞤭𞥅𞤯𞤮 𞤢𞤲 𞤺𞤮𞥅⹁ 𞤥𞤫𞤲 𞤸𞤢𞥄𞤤𞤣𞤭𞥅𞤲𞤮 𞤴𞤮 𞤮 𞤣𞤢𞤪𞤮 𞤳𞤢 𞤩𞤢𞥄𞤱𞤮 𞤸𞤫𞤲𞤮𞤪𞤣𞤫. 𞤑𞤮 𞤳𞤢𞤲𞤳𞤮 𞤩𞤵𞤪𞤲𞤮𞥅 𞤣𞤵𞤯𞤢𞤤 𞤲𞤺𞤢𞤤 𞤬𞤮𞤨 𞤶𞤮𞤺𞤢𞥄𞤣𞤫 𞤸𞤢𞤳𞥆𞤭𞤤 𞤳𞤮𞤲𞤮 𞤲𞤮𞤲⹁ 𞤸𞤢𞤪𞤭 𞤳𞤮 𞤸𞤫𞤪𞤧𞤮𞥅𞤱𞤮 𞤬𞤮𞤼𞤢. 𞤚𞤢𞤱𞤭 𞤲𞤮𞤲⹁ 𞤮 𞤤𞤢𞤲𞤣𞤭𞤲𞤮𞤳𞤫 𞤤𞤢𞤲 𞤴𞤮 𞤥𞤭 𞤱𞤢𞤤𞥆𞤵 𞤥𞤮 𞤲𞤮 𞤮 𞤸𞤫𞤩𞤭𞤪𞤢 𞤸𞤮𞥅 𞤶𞤭𞤱𞤮 𞤭𞤲𞥆𞤫𞤼𞤫𞤲𞤮𞥅𞤯𞤮 𞤃𞤢𞤪𞤭. 𞤑𞤮 𞤮𞤲⹁ 𞤮 𞤬𞤢𞥄𞤤𞤢𞤲𞤮𞥅 𞤴𞤢𞤸𞤣𞤵𞤣𞤫 𞤫 𞤺𞤢𞤥𞤮𞤤. 𞤃𞤭 𞤴𞤢𞤤𞤼𞤭𞤲𞤭 𞤤𞤢𞤲𞤣𞤫 𞤯𞤫𞤲⹁ 𞤮 𞤶𞤢𞥄𞤦𞤭𞥅 𞤯𞤫 𞤬𞤮𞤨. 𞤑𞤮𞤲𞤮 𞤸𞤢𞤪𞤭 𞤥𞤭 𞤢𞥄𞤲𞤭𞥅 𞤬𞤮𞤼𞤢 𞤲𞤮𞤲⹁ 𞤱𞤮𞤼𞤢 𞤮 𞤪𞤮𞤲𞤳𞤵 𞤢𞤪𞤼𞤭𞤪𞤢𞤲𞤣𞤫 𞤤𞤢𞤲 𞤳𞤢𞤴𞤣𞤭𞥅𞤶𞤭 𞤯𞤭𞤲.

 𞤙𞤢𞤤𞤲𞤣𞤫 𞤺𞤮𞥅𞤪𞤫 𞤳𞤢𞤣𞤭⹁ 𞤸𞤢𞤪𞤭 𞤥𞤭 𞤢𞤲𞤣𞤢𞥄 𞤲𞤮 𞤥𞤭 𞤬𞤫𞤰𞥆𞤭𞤪𞤢 𞤲𞤣𞤢𞤪𞤼𞤭𞤲𞤮 𞤧𞤢𞥄𞤼𞤭𞥅𞤲𞤺𞤮 𞤫 𞤶𞤢𞤲𞤺𞤢𞤲𞤣𞤫 𞤢𞤲. 𞤃𞤭 𞤬𞤢𞤣𞤭𞥅 𞤸𞤢𞥄 𞤼𞤵𞤥𞤦𞤮 𞤶𞤫𞤥𞥆𞤢⹁ 𞤥𞤭 𞤴𞤢𞤸𞤭 𞤳𞤢 𞤴𞤭𞥅𞤤𞤭𞤪𞤣𞤵 𞤶𞤢𞤲𞤺𞤭𞤲𞤮𞥅𞤱𞤮 𞤮𞤲. 𞤃𞤭 𞤵𞤣𞥆𞤭𞤼𞤭𞤪𞤭 𞤸𞤫𞤲𞤮𞤪𞤺𞤢𞤤 𞤥𞤢𞤳𞥆𞤮 𞤲𞤺𞤢𞤤 𞤤𞤢𞤩𞤭⹁ 𞤥𞤭 𞤲𞤢𞥄𞤼𞤭. 𞤃𞤭 𞤤𞤭𞤻𞤭 𞤲𞤣𞤫𞤪 𞤼𞤮𞤲 𞤬𞤮𞤨⹁ 𞤥𞤭 𞤴𞤭𞤢𞥄𞤤𞤭 𞤳𞤣𞤢𞤴𞤣𞤭𞥅𞤶𞤭 𞤲𞤣𞤢𞤪𞤼𞤭𞤲𞤭𞤪𞤯𞤭 𞤯𞤭𞤲. 𞤑𞤮𞤲𞤮 𞤸𞤢𞤪𞤭 𞤮𞤥𞤮 𞤶𞤮𞤺𞤭𞥅 𞤼𞤮𞤲 𞤥𞤢𞤪𞤣𞤵𞤺𞤢𞤤 (𞤢𞤪𞤥𞤵𞤱𞤢𞥄𞤪) 𞤺𞤮𞥅𞤼𞤢𞤤 𞤧𞤮𞤳𞤭𞥅𞤲𞤺𞤢𞤤. 𞤔𞤫𞤥𞥆𞤢𞥄𞤶𞤫 𞤼𞤢𞤼𞤭 𞤥𞤭𞤯𞤮 𞤢𞤪𞤣𞤫 𞤳𞤢 𞤴𞤭𞥅𞤤𞤭𞤪𞤣𞤵 𞤯𞤢𞤩𞥆𞤵𞤼𞤵𞤺𞤮𞤤 𞤯𞤭𞤲 𞤲𞤣𞤢𞤪𞤼𞤭𞤲𞤭𞤪𞤯𞤭⹁ 𞤳𞤮𞤲𞤮 𞤥𞤭 𞤴𞤭𞤢𞥄𞤤𞤭 𞤯𞤭. 𞤑𞤮 𞤸𞤫𞤣𞥆𞤭𞤲𞤮𞥅 𞤱𞤮𞥅⹁ 𞤳𞤮 𞤲𞤣𞤢𞥄𞤪𞤵𞤺𞤮𞤤 𞤫 𞤲𞤺𞤢𞤤 𞤥𞤢𞤪𞤣𞤵𞤺𞤢𞤤 𞤧𞤮𞤳𞤭𞥅𞤲𞤺𞤢𞤤.

 𞤔𞤫𞤥𞥆𞤢𞥄𞤪𞤫 𞤱𞤮𞥅𞤪𞤫 𞤲𞤮𞤲⹁ 𞤥𞤭 𞤢𞤪𞤣𞤭 𞤫 𞤱𞤫𞤤𞤣𞤭𞥅𞤩𞤫 𞤢𞤲 𞤼𞤢𞤼𞤮. 𞤃𞤫𞤲 𞤨𞤫𞤨𞤭 𞤲𞤺𞤢𞤤 𞤥𞤢𞤪𞤣𞤵𞤺𞤢𞤤 𞤶𞤵𞥅𞤼𞤵𞤲𞥋𞤺𞤢𞤤 𞤧𞤢𞤦𞤵 𞤳𞤮 𞤧𞤮𞥅𞤪𞤮𞥅𞤶𞤭 𞤼𞤢𞤼𞤭 𞤥𞤢𞤤𞥆𞤢 𞤷𞤵𞥅𞤯𞤭 𞤼𞤢𞤼𞤭 𞤲𞤺𞤢𞤤 𞤥𞤢𞤪𞤭.  𞤥𞤫𞤲 𞤵𞤳𞥆𞤭 𞤲𞤺𞤢𞤤 𞤳𞤢 𞤱𞤫𞤪𞤤𞤢 𞤢𞤥𞤫𞤲⹁ 𞤥𞤫𞤲 𞤴𞤢𞤸𞤭. 𞤚𞤢𞤱𞤭 𞤲𞤮𞤲⹁ 𞤥𞤭 𞤸𞤢𞥄𞤤𞤣𞤭𞤣𞤭𞥅 𞤫 𞤼𞤢𞤬𞤮𞥅𞤱𞤮 𞤧𞤢𞥄𞤦𞤭. 𞤃𞤭 𞤩𞤮𞤪𞤲𞤭𞥅 𞤸𞤢𞥄 𞤥𞤮𞤰𞥆𞤭⹁ 𞤥𞤭 𞤬𞤢𞥄𞤥𞤭𞤲𞤭 𞤱𞤢 𞤧𞤭 𞤳𞤮 𞤥𞤭 𞤶𞤢𞥄𞤺𞤮𞤼𞤮𞥅𞤯𞤮 𞤬𞤮𞤳𞥆𞤵𞤼𞤵𞤯𞤮 𞤴𞤢𞤸𞤣𞤵. 𞤌 𞤵𞤣𞥆𞤭𞤼𞤭 𞤥𞤢𞤪𞤣𞤵𞤺𞤢𞤤 𞤲𞤺𞤢𞤤⹁ 𞤮 𞤶𞤮𞤺𞤲𞤭 𞤤𞤢𞤲 𞤳𞤢𞤣𞤭 𞤧𞤮𞤳𞤼𞤭𞤪𞤺𞤢𞤤 𞤺𞤮𞥅𞤼𞤢𞤤. 𞤃𞤭 𞤲𞤣𞤢𞥄𞤪𞤭⹁ 𞤼𞤢𞤱𞤭 𞤤𞤫 𞤲𞤣𞤢𞤪𞤼𞤭𞤲𞤭𞤪𞤯𞤭 𞤯𞤭𞤲 𞤲𞤮 𞤲𞤣𞤫𞤪 𞤼𞤮𞤲. 𞤃𞤭 𞤰𞤫𞤼𞥆𞤭 𞤯𞤫𞤪𞤮𞤤 𞤺𞤮𞥅𞤼𞤮𞤤. 𞤃𞤫𞤲 𞤲𞤢𞤩𞤼𞤭 𞤥𞤢𞤪𞤣𞤵𞤺𞤢𞤤 𞤲𞤺𞤢𞤤 𞤸𞤢𞤪𞤭 𞤶𞤢𞤥𞤣𞤭 𞤶𞤮𞤱𞤢𞤩𞤭𞤪𞤭 𞤲𞤣𞤭𞤲 𞤴𞤮𞤲𞤭𞥅.

 𞤑𞤮𞤲𞤮 𞤲𞤣𞤫𞤲 𞤻𞤢𞤤𞤲𞤣𞤫⹁ 𞤩𞤢𞤴𞤼𞤭 𞤥𞤭 𞤸𞤮𞥅𞤼𞤭𞥅 𞤳𞤢 𞤧𞤵𞥅𞤣𞤵⹁ 𞤥𞤭 𞤱𞤢𞥄𞤤𞤭𞥅 𞤳𞤢 𞤣𞤢𞤲𞤳𞤭⹁ 𞤥𞤭 𞤬𞤫𞤧𞤭𞤪𞤭 𞤱𞤢 𞤦𞤮𞥅𞤦𞤮. 𞤖𞤮𞤤 𞤳𞤮 𞤲𞤢𞥄𞤣𞤭 𞤤𞤢𞤲 𞤫 𞤯𞤵𞤲 𞤯𞤮𞥅 𞤬𞤮𞤨؟ 𞤑𞤮 𞤸𞤢𞤯𞤵𞤲𞤮𞥅 𞤤𞤢𞤲 𞤯𞤢𞤩𞥆𞤵𞤺𞤮𞤤 𞤦𞤢𞤤𞥆𞤢𞤤؟ 𞤖𞤢𞤪𞤭 𞤥𞤭 𞤧𞤭𞤳𞥆𞤢𞥄𞤲𞤮⹁ 𞤲𞤮 𞤱𞤮𞥅𞤣𞤭 𞤸𞤢𞤴 𞤺𞤮𞥅𞤼𞤮 𞤱𞤢𞥄𞤱𞤢𞤴𞤯𞤮 𞤫𞤳𞥆𞤭𞤼𞤵𞤣𞤫 𞤤𞤢𞤲 𞤶𞤢𞤲𞤺𞤵𞤺𞤮𞤤. 𞤑𞤢𞤣𞤭⹁ 𞤳𞤮 𞤺𞤵𞤲𞤣𞤮𞥅 𞤢𞤲 𞤮𞤲⹁ 𞤥𞤭 𞤴𞤭𞤯𞤢𞥄𞤲𞤮 𞤴𞤮 𞤺𞤮𞥅𞤼𞤯𞤮 𞤺𞤮𞥅 𞤢𞤲𞤣𞤵 𞤥𞤮. 𞤑𞤮 𞤯𞤵𞤥 𞤱𞤢𞤯𞤭 𞤥𞤭 𞤥𞤢𞤪𞤭 𞤥𞤮 𞤬𞤮𞤼𞤢.

𞤃𞤭 𞤲𞤢𞤲𞤢𞤴𞤲𞤮 𞤶𞤢𞤲𞤺𞤲𞤮𞥅𞤩𞤫 𞤩𞤫𞤲 𞤫 𞤥𞤢𞤱𞤩𞤫 𞤢𞤲 𞤩𞤫𞤲 𞤲𞤮 𞤱𞤭𞤢 𞤱𞤮𞤲𞤣𞤫𞤥𞤢⹁ 𞤳𞤢𞤤𞤢 𞤶𞤢𞤲𞤺𞤵𞤯𞤮 𞤸𞤢𞥄 𞤸𞤫𞤩𞤭 𞤷𞤫𞥅𞤣𞤮𞤤 𞤶𞤢𞥄𞤩𞤭-𞤸𞤢𞥄𞤯𞤼𞤭𞤪𞤣𞤫⹁ 𞤸𞤫𞤩𞤢𞤴 𞤺𞤮𞤤𞥆𞤫 𞤥𞤮𞤰𞥆𞤫 𞤳𞤢𞤻𞤵𞤲 𞤫 𞤲𞤺𞤵𞥅𞤪𞤲𞤣𞤢𞤲 𞤥𞤮𞤰𞥆𞤢𞤲. 𞤃𞤭𞤲 𞤳𞤢𞤣𞤭 𞤥𞤭 𞤺𞤮𞤥𞤯𞤭𞤲𞤭 𞤯𞤵𞤥. 𞤒𞤫𞤤𞤢 𞤢𞤲 𞤳𞤢𞤲 𞤬𞤮𞤨⹁ 𞤳𞤮 𞤲𞤮 𞤥𞤭 𞤸𞤫𞤩𞤭𞤪𞤢 𞤲𞤣𞤫𞤲 𞤴𞤫𞤩𞤪𞤫 𞤥𞤢𞤤𞥆𞤢 𞤲𞤣𞤭𞤲 𞤳𞤢𞤴𞤣𞤭𞥅𞤪𞤭 𞤧𞤫𞥅𞤣𞤭𞤲𞤼𞤭𞤲𞤣𞤭 𞤱𞤮𞤲𞤣𞤫 𞤥𞤭 𞤶𞤢𞤲𞤺𞤵𞤲𞤮 𞤫 𞤶𞤢𞥄𞤩𞤭-𞤸𞤢𞤯𞤼𞤭𞤪𞤣𞤫 𞤸𞤢𞥄 𞤥𞤭 𞤶𞤮𞥅𞤬𞤭𞤲𞤭. 𞤖𞤢𞤴 𞤧𞤭 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫 𞤳𞤮 𞤱𞤭𞤲𞤣𞤭𞥅⹁ 𞤢𞤪𞤥𞤢 𞤻𞤢𞤤𞤲𞤣𞤫 𞤺𞤮𞥅𞤪𞤫⹁ 𞤳𞤢𞥄𞤱𞤫𞥅 𞤱𞤢𞤯𞤢 𞤥𞤭 𞤱𞤢𞥄𞤱𞤢 𞤶𞤢𞤲𞤺𞤵𞤣𞤫 𞤧𞤢𞤦𞤵 𞤼𞤮𞤪𞤢𞥄𞤶𞤫 𞤯𞤫𞤲.

𞤑𞤮 𞤲𞤮𞤲 𞤥𞤭 𞤶𞤮𞤳𞥆𞤭𞤪𞤭 𞤸𞤢𞥄 𞤥𞤭 𞤺𞤢𞤴𞤲𞤭 𞤶𞤢𞤲𞤺𞤵𞤣𞤫 𞤳𞤢 𞤶𞤢𞥄𞤩𞤭-𞤸𞤢𞥄𞤯𞤼𞤭𞤪𞤣𞤫. 𞤇𞤢𞤴𞤼𞤭 𞤥𞤭 𞤺𞤢𞤴𞤲𞤭𞥅⹁ 𞤯𞤵𞤥 𞤸𞤢𞤱𞤪𞤮𞤲𞥋𞤣𞤭𞤪𞤭 𞤸𞤢𞤪𞤭 𞤶𞤢𞤲𞤺𞤭𞤲𞤮𞥅𞤩𞤫 𞤲𞤮 𞤧𞤢𞤯𞤭 𞤬𞤮𞤼𞤢. 𞤐𞤣𞤫𞤲 𞤥𞤭 𞤪𞤮𞤳𞥆𞤢𞥄 𞤺𞤮𞤤𞥆𞤫 𞤶𞤢𞤲𞤺𞤭𞤲𞤺𞤮𞤤. 𞤌𞤲 𞤸𞤮𞥅𞤤𞤮𞤼𞤮 𞤯𞤵𞤥؟ 𞤏𞤵𞤪𞤭𞤲⹁ 𞤸𞤢𞤴 𞤥𞤭 𞤺𞤢𞤴𞤲𞤢𞥄𞤤𞤭 𞤧𞤮𞤪𞤼𞤢𞥄𞤣𞤫 𞤫 𞤬𞤢𞤥𞥆𞤫𞥅𞤪𞤫 𞤲𞤺𞤢𞤴𞤵𞥅𞤪𞤭 𞤲𞤣𞤭𞤲⹁ 𞤼𞤢𞤱𞤢 𞤳𞤢𞤣𞤭 𞤳𞤮 𞤴𞤮 𞤥𞤭 𞤴𞤭𞤤𞤼𞤭𞤼𞤮 𞤼𞤮𞤲.

𞤖𞤮𞤤 𞤳𞤮 𞤲𞤢𞥄𞤣𞤭 𞤤𞤢𞤲 𞤫 𞤶𞤢𞤲𞤺𞤭𞤲𞤺𞤮𞤤؟ 𞤅𞤮 𞤥𞤭 𞤥𞤭𞥅𞤶𞤭𞤼𞤭𞤳𞤫 𞤸𞤢𞤲𞤣𞤫⹁ 𞤥𞤭 𞤼𞤢𞤱𞤢𞤴 𞤳𞤮 𞤬𞤫𞥅𞤼𞤫𞤪𞤫 𞤱𞤢𞤯𞤭𞤲𞤭 𞤤𞤢𞤲 𞤯𞤵𞤥. 𞤑𞤮𞤲𞤮 𞤳𞤮 𞤥𞤭 𞤱𞤮𞤲𞥆𞤮𞥅 𞤫 𞤥𞤭𞥅𞤶𞤢𞥄𞤲𞤣𞤫⹁ 𞤧𞤮 𞤥𞤭 𞤱𞤢𞥄𞤱𞤭𞥅 𞤬𞤫𞤰𞥆𞤵𞤣𞤫 𞤣𞤵𞤯𞤢𞤤 𞤼𞤮𞥅𞤱𞤲𞤺𞤢𞤤 𞤲𞤺𞤢𞤤⹁ 𞤸𞤢𞤴 𞤺𞤮𞥅𞤼𞤮 𞤢𞤲𞤣𞤢𞥄𞤤𞤭 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫⹁ 𞤥𞤭 𞤶𞤢𞤲𞤺𞤭𞥅 𞤳𞤢𞤣𞤭 𞤳𞤢 𞤶𞤢𞥄𞤩𞤭-𞤸𞤢𞥄𞤯𞤼𞤭𞤪𞤣𞤫 𞤸𞤢𞥄 𞤥𞤭 𞤺𞤢𞤴𞤲𞤭𞥅⹁ 𞤸𞤢𞤴 𞤺𞤮𞥅𞤼𞤮 𞤲𞤢𞤲𞤺𞤢𞥄𞤤𞤭 𞤤𞤢𞤲⹁ 𞤸𞤢𞤪𞤢𞤴 𞤳𞤢 𞤧𞤵𞥅𞤯𞤫𞥅 𞤩𞤵𞤪𞤢𞤼𞤢𞥄 𞤱𞤮𞤲𞤵𞤺𞤮𞤤 𞤶𞤢𞤲𞤺𞤲𞤮𞥅𞤱𞤮. 𞤑𞤮 𞤸𞤮𞤥𞤦𞤮 𞤱𞤢𞥄𞤱𞤢𞤼𞤢𞥄 𞤥𞤭𞥅𞤶𞤢𞥄𞤣𞤫 𞤱𞤮𞤲𞤣𞤫 𞤶𞤢𞤲𞤺𞤲𞤮𞥅𞤱𞤮 𞤮𞤲 𞤱𞤢𞥄𞤱𞤢𞤼𞤢 𞤶𞤢𞤲𞤺𞤵𞤣𞤫 𞤳𞤮 𞤱𞤭𞤲𞤣𞤭𞥅؟⹁ 𞤖𞤢𞤴 𞤺𞤮𞥅𞤼𞤮 𞤱𞤢𞥄𞤱𞤢𞤼𞤢𞥄 𞤧𞤮𞤺𞤭𞤼𞤢𞥄𞤣𞤫 𞤯𞤵𞤥 𞤫 𞤥𞤭𞥅𞤶𞤮 𞤢𞤲.

 𞤃𞤭 𞤱𞤮𞤲𞤭 𞤫𞤤𞤼𞤮𞥅𞤱𞤮 𞤳𞤢 𞤰𞤢𞥄𞤲𞤫. 𞤃𞤭 𞤶𞤢𞤲𞤺𞤭𞤲𞤭 𞤳𞤢𞤣𞤭 𞤺𞤢𞤲𞤣𞤫 𞤪𞤫𞤲𞤣𞤮 𞤥𞤢𞤤𞥆𞤢 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤴𞤭𞤥𞤩𞤫 𞤳𞤢𞤻𞤵𞤲 𞤫 𞤼𞤢𞤨𞥆𞤵𞤺𞤮𞤤 𞤦𞤭𞤲𞤣𞤭. 𞤃𞤭𞤯𞤮 𞤱𞤢𞥄𞤱𞤵𞤲𞤮𞥅 𞤼𞤢𞤨𞥆𞤵𞤣𞤫 𞤳𞤮𞤲𞤺𞤵𞤯𞤭 𞥖𞥕 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮 𞤫 𞤶𞤮𞤱𞤭) 𞤫 𞤲𞤣𞤫𞤪 𞤸𞤮𞤶𞤮𞤥𞤫𞤪𞤫 𞤱𞤮𞥅𞤼𞤫𞤪𞤫 𞤳𞤮𞤲𞤮 𞤸𞤢𞤪𞤢 𞤥𞤭 𞤢𞤲𞤣𞤢𞥄 𞤳𞤮 𞤥𞤭 𞤱𞤮𞤲𞤭 𞤫 𞤱𞤭𞤲𞤣𞤵𞤣𞤫. 𞤑𞤮𞤲𞤮 𞤥𞤭 𞤶𞤢𞤩𞤢𞤼𞤢𞥄𞤲𞤮 𞤱𞤭𞤲𞤣𞤵𞤺𞤮𞤤 𞤳𞤢 𞤥𞤢𞤸𞤣𞤭 𞤬𞤫𞤧. 𞤅𞤮 𞤸𞤭𞤼𞤢𞥄𞤲𞤣𞤫 𞤲𞤣𞤫𞤲 𞤬𞤵𞤯𞥆𞤭𞤳𞤫⹁ 𞤥𞤭 𞤲𞤣𞤢𞥄𞤪𞤢𞤴 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤼𞤢𞤼𞤮 𞤩𞤵𞤪𞤵𞤩𞤫 𞤶𞤮𞤺𞤢𞥄𞤣𞤫 𞤩𞤫𞤲 𞤸𞤢𞤳𞥆𞤭𞤤𞤫 𞤳𞤮 𞤱𞤢𞤤𞥆𞤭𞤼𞤮𞥅 𞤤𞤢𞤲. 𞤑𞤮𞤲𞤮 𞤸𞤢𞤴 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤧𞤮𞤺𞤭𞤼𞤢𞤲𞤮𞥅𞤳𞤭 𞤱𞤮𞤲𞤣𞤫 𞤥𞤭 𞤱𞤢𞥄𞤱𞤢𞤼𞤢𞥄 𞤱𞤭𞤲𞤣𞤵𞤣𞤫. 𞤏𞤵𞤪𞤭𞤲⹁ 𞤳𞤮 𞤸𞤮𞤤 𞤲𞤮 𞤺𞤮𞥅𞤼𞤯𞤮 𞤧𞤮𞤺𞤭𞤼𞤮𞤪𞤼𞤢 𞤱𞤮𞤲𞤣𞤫 𞤶𞤢𞤲𞤺𞤭𞤲𞤮𞥅𞤱𞤮 𞤮𞤲 𞤱𞤢𞥄𞤱𞤢𞤼𞤢 𞤶𞤢𞤲𞤺𞤵𞤣𞤫؟ 

𞤑𞤮 𞤩𞤵𞤪𞤢𞤴𞤲𞤮𞥅 𞤢𞥄𞤲𞤭𞤲𞤣𞤫 𞤤𞤢𞤲⹁ 𞤳𞤮 𞤼𞤵𞤥𞤦𞤮𞤲𞥋𞤣𞤭𞤪𞤫 𞤶𞤢𞤲𞤺𞤭𞤲𞤮𞥅𞤩𞤫 𞤩𞤫𞤲. 𞤃𞤫𞤲𞤫𞤲 𞤶𞤢𞤲𞤺𞤭𞤲𞤮𞥅𞤩𞤫 𞤩𞤫𞤲 𞤳𞤢𞤻𞤵𞤲 𞤫 𞤸𞤮𞥅𞤪𞤫 𞤣𞤵𞤯𞤢𞤤 𞤲𞤺𞤢𞤤⹁ 𞤥𞤫𞤲 𞤼𞤵𞤥𞤦𞤮𞤲𞥋𞤣𞤭𞤪𞤢𞤴𞤲𞤮 𞤴𞤮𞤲𞤼𞤫𞤪𞤫 𞤳𞤢𞤤𞤢 𞤲𞤣𞤫 𞤱𞤮𞥅𞤼𞤫𞤪𞤫. 𞤅𞤮 𞤼𞤢𞤱𞤭𞥅 𞤲𞤮𞤲⹁ 𞤥𞤭𞥅𞤶𞤮𞥅𞤶𞤭 𞤲𞤮 𞤶𞤢𞥄𞤩𞤮𞤼𞤭𞤪𞤫𞥅𞤣𞤫⹁ 𞤸𞤮𞥅𞤪𞤫𞥅𞤶𞤮 𞤣𞤵𞤯𞤢𞤤 𞤲𞤺𞤢𞤤 𞤼𞤮𞤯𞥆𞤮𞤼𞤮𞤲𞤮 𞤶𞤢𞤲𞤺𞤭𞤲𞤮𞥅𞤱𞤮 𞤺𞤮𞥅𞤼𞤮 𞤳𞤮 𞤱𞤭𞤲𞤣𞤢 𞤯𞤭𞤲 𞤥𞤭𞥅𞤶𞤮𞥅𞤶𞤭 𞤳𞤢 𞤥𞤢𞤸𞤣𞤭. 𞤒𞤮𞤲𞤼𞤫𞤪𞤫 𞤳𞤢𞤤𞤢 𞤥𞤭𞤯𞤮 𞤱𞤮𞤲𞤣𞤵𞤲𞤮𞥅 𞤫 𞤳𞤵𞤤𞤮𞤤 𞤱𞤮𞤼𞤢 𞤮 𞤩𞤢𞥄𞤰𞤮 𞤤𞤢𞤲. 𞤑𞤮𞤲𞤮 𞤥𞤭 𞤥𞤭𞥅𞤶𞤭𞤼𞤭𞥅 𞤸𞤢𞥄 𞤥𞤭 𞤸𞤫𞤩𞤭 𞤬𞤫𞤱𞤪𞤫 𞤲𞤣𞤫 𞤥𞤭 𞤱𞤢𞤯𞤢 𞤧𞤭 𞤮 𞤼𞤮𞤯𞥆𞤭𞤳𞤫 𞤤𞤢𞤲.

 𞤅𞤭 𞤮 𞤧𞤢𞤨𞥆𞤭𞤲𞤮 𞤤𞤢𞤲 𞤼𞤵𞤲⹁ 𞤥𞤭 𞤭𞤥𞥆𞤮𞤪𞤢𞤴𞤲𞤮 𞤣𞤮𞤴 𞤳𞤢 𞤶𞤵𞤤𞥆𞤫𞤪𞤫 𞤢𞤲⹁ 𞤥𞤭 𞤱𞤢𞤯𞤢 𞤼𞤫𞤨𞥆𞤫 𞤯𞤭𞤯𞤭⹁ 𞤲𞤣𞤫𞤲⹁ 𞤥𞤭 𞤲𞤢𞤲𞤺𞤢 𞤩𞤫𞤪𞤲𞤣𞤫 𞤢𞤲 𞤲𞤣𞤫𞤲⹁ 𞤥𞤭 𞤨𞤭𞥅𞤼𞤮𞥅 𞤳𞤢 𞤲𞤣𞤫𞤤𞤮 𞤬𞤭𞥅 𞤴𞤮 𞤩𞤫 𞤲𞤮𞤣𞥆𞤵 𞤪𞤢𞤽𞤢𞤥𞤫𞤪𞤫 (𞥙𞥑𞥑) 𞤬𞤢𞥄𞤦𞤮 𞤲𞤣𞤫𞤲. 𞤑𞤢𞤤𞤢 𞤳𞤮 𞤥𞤭 𞤱𞤢𞤯𞤢𞤼𞤢 𞤲𞤺𞤢𞤥 𞤱𞤮𞤼𞤢 𞤥𞤭 𞤲𞤢𞤲𞤺𞤫⹁ 𞤥𞤭 𞤱𞤢𞤯𞤵𞤲𞤮. 𞤁𞤵𞥅𞤩𞤭 𞤧𞤢𞤨𞥆𞤮-𞤫-𞤶𞤫𞥅𞤯𞤭𞤯𞤭⹁ 𞤥𞤭𞤯𞤮 𞤶𞤢𞤲𞤺𞤲𞤵𞤣𞤫 𞤳𞤮𞤲𞤮 𞤥𞤭 𞤲𞤢𞤲𞤺𞤢𞥄𞤳𞤢 𞤸𞤢𞤴 𞤲𞤣𞤫 𞤱𞤮𞥅𞤼𞤫𞤪𞤫.

 𞤑𞤫𞤲𞤫𞤲 𞤥𞤭 𞤱𞤭𞤭𞤼𞤮𞤼𞤮 𞤳𞤮 𞤥𞤭 𞤶𞤢𞤲𞤺𞤲𞤮𞥅𞤱𞤮 𞤥𞤮𞤰𞥆𞤮 𞤧𞤢𞤦𞤵 𞤥𞤭 𞤺𞤮𞤤𞥆𞤢𞤴 𞤬𞤮𞤼𞤢⹁ 𞤥𞤭𞤯𞤮 𞤸𞤭𞤼𞥆𞤭𞤲𞤢𞤲𞤭 𞤳𞤢𞤣𞤭 𞤬𞤭𞥅 𞤳𞤮 𞤥𞤭 𞤱𞤮𞤲𞤭 𞤫 𞤸𞤵𞥅𞤱𞤵𞤣𞤫 𞤳𞤮𞤲. 𞤑𞤮𞤲𞤮 𞤥𞤭𞤯𞤮 𞤢𞤲𞤣𞤵𞤲𞤮𞥅 𞤱𞤮𞤲𞤣𞤫𞤥𞤢 𞤯𞤵𞤥 𞤱𞤮𞤲𞤢𞥄 𞤺𞤮𞥅𞤲𞤺𞤢. 𞤃𞤮𞤰𞥆𞤢𞥄 𞤳𞤢𞤣𞤭 𞤬𞤫𞤧! 𞤆𞤫𞤤𞥆𞤫𞤼 𞤱𞤮𞤲𞤢𞥄 𞤫 𞤲𞤣𞤫𞤪 𞤣𞤵𞤯𞤢𞤤 𞤥𞤭 𞤸𞤢𞥄𞤲𞤵𞤲𞤮𞥅 𞤱𞤮𞤲𞤣𞤫. 𞤑𞤫𞤲𞤫𞤲 𞤳𞤮 𞤥𞤭 𞤱𞤮𞤲𞥆𞤮𞥅 𞤳𞤮𞤲 𞤸𞤵𞥅𞤱𞤵𞤣𞤫 𞤲𞤢𞥄𞤱𞤭𞤲𞤢𞤴𞤲𞤮 𞤤𞤢𞤲. 𞤑𞤮𞤲𞤮 𞤸𞤢𞤪𞤭 𞤥𞤭 𞤲𞤢𞤲𞤺𞤭𞤳𞤫 𞤫 𞤥𞤵𞤲⹁ 𞤫 𞤸𞤭𞤲𞤮 𞤤𞤫 𞤥𞤭 𞤱𞤢𞥄𞤱𞤢𞤼𞤢𞥄 𞤴𞤫𞥅𞤼𞤢𞥄𞤣𞤫 𞤸𞤢𞤴 𞤺𞤮𞥅𞤼𞤮.

 

𞤊𞤫𞤱𞤲𞤣𞤮 𞤥𞤭 𞤱𞤮𞤲𞥆𞤮 𞤫 𞤶𞤢𞤲𞤺𞤭𞤲𞤣𞤫⹁ 𞤥𞤭 𞤩𞤢𞤽𞤭 𞤣𞤫𞤦𞥆𞤮. 𞤁𞤫𞤧𞤢𞤤 𞤤𞤫 𞤳𞤮 𞤸𞤵𞥅𞤲𞤣𞤫 𞤸𞤮𞤪𞤥𞤭𞤲𞤭𞥅𞤲𞤣𞤫. 𞤑𞤮 𞤱𞤮𞥅𞤲𞤣𞤮𞥅𞤪𞤫 𞤸𞤮𞥅𞤤𞤮𞤲𞥋𞤣𞤭𞤪𞤢𞤤 𞤫 𞤸𞤢𞥄𞤤𞤭𞤲𞥋𞤣𞤭𞤪𞤢𞤲𞤺𞤮𞤤 𞤺𞤮𞥅𞤲𞤺𞤢 𞤸𞤢𞤳𞥆𞤵𞤲𞥋𞤣𞤫 𞤴𞤭𞤥𞤩𞤫 𞤯𞤭𞤯𞤮. 𞤑𞤮 𞤮𞤲𞤼𞤵𞤥𞤢 𞤥𞤭 𞤥𞤭𞥅𞤶𞤭𞥅: “𞤀𞤱𞤢 𞤶𞤮𞥅𞤲𞤭⹁ 𞤥𞤭 𞤸𞤫𞤩𞤭𞥅 𞤥𞤮 𞤥𞤭 𞤸𞤮𞥅𞤤𞤮𞥅. 𞤃𞤭 𞤸𞤢𞥄𞤤𞤢𞤲𞤢𞤴 𞤥𞤮.”

 

𞤃𞤭 𞤣𞤢𞤪𞤮𞤼𞤮𞤲𞤮 𞤴𞤫𞥅𞤧𞤮 𞤼𞤭𞤲𞤼𞤮𞤪𞤺𞤢𞤤 (𞤲𞤣𞤢𞥄𞤪𞤮𞤪𞤺𞤢𞤤) 𞤥𞤭 𞤬𞤭𞤤𞥆𞤭𞤼𞤮𞥅 𞤱𞤭𞤵𞤺𞤮𞤤: “𞤑𞤢𞤼𞤭𞥅⹁ 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤺𞤮𞤤. 𞤑𞤢𞤼𞤭𞥅⹁ 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤺𞤮𞤤.”

 𞤙𞤢𞤤𞤲𞤣𞤫 𞤱𞤮𞥅𞤪𞤫 𞤳𞤭𞥅𞤳𞤭𞥅𞤯𞤫⹁ 𞤥𞤫𞤯𞤫𞤲 𞤶𞤮𞥅𞤯𞤭𞥅 𞤫 𞤤𞤫𞥅𞤧𞤮⹁ 𞤥𞤭 𞤱𞤭𞤭: “𞤑𞤢𞤼𞤭𞥅⹁ 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤺𞤵𞤣𞤫 𞤳𞤮 𞤱𞤭𞤲𞤣𞤭𞥅.”

 𞤑𞤮𞤲𞤮 𞤸𞤮 𞤸𞤢𞥄𞤤𞤢𞥄𞤤𞤭 𞤸𞤢𞤴 𞤬𞤵𞤧. 𞤐𞤢𞤲𞤣𞤭 𞤖𞤮 𞤧𞤭𞤳𞥆𞤭 𞤥𞤭 𞤱𞤭𞤵 𞤥𞤭 𞤢𞤷𞥆𞤵𞤼𞤭𞥅 𞤶𞤢𞤲𞤺𞤵𞤺𞤮𞤤 𞤳𞤮 𞤯𞤵𞥅𞤯𞤭.

 𞤌𞤲 𞤼𞤭𞤲𞤭𞥅⹁ 𞤺𞤭𞤯𞤺𞤮𞤤 𞤢𞤤𞥆𞤢 𞤲𞤣𞤢𞥄𞤪𞤯𞤫⹁ 𞤲𞤺𞤮𞤤 𞤢𞤤𞤢𞥄 𞤳𞤢𞤣𞤭 𞤲𞤢𞤲𞤯𞤫.

 𞤃𞤫𞤲 𞤶𞤮𞤥𞤦𞤭𞤲𞥋𞤣𞤭𞤪𞤭⹁ 𞤬𞤢𞥄 𞤥𞤫𞤲 𞤸𞤫𞤩𞤭𞤣𞤭 𞤩𞤭𞤯𞥆𞤮⹁ 𞤳𞤮𞤲𞤮 𞤸𞤮 𞤢𞤲𞤣𞤵𞤣𞤫 𞤱𞤮𞥅 𞤸𞤢𞤪𞤭 𞤣𞤵𞥅𞤩𞤭 𞤸𞤫𞥅𞤱𞤵𞤯𞤭 𞤬𞤫𞤰𞥆𞤭𞥅.

 𞤙𞤢𞤤𞤲𞤣𞤫 𞤱𞤮𞥅𞤪𞤫⹁ 𞤸𞤢𞤪𞤭 𞤥𞤭𞤯𞤮 𞤱𞤭𞥅𞤼𞤢𞤲𞤢 (𞤶𞤢𞤲𞤺𞤢𞤲𞤢) 𞤶𞤭𞤱𞤵𞤲 𞤢𞤥𞤫𞤲 𞤣𞤫𞤬𞤼𞤫𞤪𞤫. 𞤑𞤮 𞤣𞤵𞥅𞤩𞤭 𞤼𞤢𞤼𞤭 𞤨𞤫𞤼 𞤳𞤵𞤲 𞤶𞤮𞤺𞤭𞤲𞤮𞥅. 𞤑𞤮𞤲𞤮 𞤸𞤢𞤪𞤭 𞤥𞤭 𞤢𞤤𞤢𞥄 𞤶𞤢𞤲𞤺𞤢𞤲𞤣𞤫 𞤳𞤵𞤲 𞤳𞤮 𞤱𞤭𞤲𞤣𞤭𞥅 𞤳𞤮𞤲. 𞤃𞤭 𞤬𞤫𞤬𞤭𞤲𞥋𞤣𞤮𞤼𞤮𞤲𞤮 𞤱𞤮𞤲𞤭 𞤼𞤢𞥄𞤤𞤭⹁ 𞤥𞤢𞥄 𞤥𞤭 𞤸𞤢𞥄𞤤𞤢𞤲𞤢 𞤥𞤮 𞤼𞤢𞥄𞤤𞤭 𞤯𞤭 𞤥𞤭 𞤢𞤲𞤣𞤭 𞤱𞤢𞤲𞤮 𞤼𞤢𞥄𞤤𞤮𞤤 𞤘𞤮𞤤𞤣𞤭𞤤𞤮𞤳𞤧 𞤫 𞤨𞤭𞤧𞤢𞥄𞤶𞤭 𞤯𞤭𞤲 𞤼𞤢𞤼𞤭. 𞤃𞤭 𞤩𞤫𞤴𞤣𞤭𞤼𞤢 𞤫 𞤥𞤵𞤲 𞤲𞤮 𞤥𞤭 𞤬𞤢𞤲𞤼𞤭𞤲𞤭𞤪𞤢.

 𞤑𞤮𞤲𞤮 𞤲𞤣𞤫𞤲 𞤻𞤢𞤤𞤲𞤣𞤫⹁ 𞤼𞤢𞤱𞤭 𞤳𞤮 𞤣𞤫𞤬𞤼𞤫𞤪𞤫 𞤸𞤫𞤧𞤫𞤪𞤫 𞤥𞤭 𞤱𞤮𞤲𞥆𞤮𞥅 𞤶𞤢𞤲𞤺𞤭𞤲𞤳𞤭𞤲𞤢𞤲𞤢𞥄𞤣𞤫 𞤥𞤮. 𞤚𞤵𞤲 𞤶𞤭𞤱𞤵𞤲 𞤢𞤲 𞤳𞤵𞤲 𞤱𞤭: “𞤄𞤢𞥄𞤦𞤢⹁ 𞤢 𞤢𞤤𞤢𞥄 𞤶𞤢𞤲𞤺𞤭𞤪𞤣𞤫 𞤲𞤮 𞤲𞤫𞥅𞤲𞤫 𞤱𞤮𞥅𞤱𞤭𞤪𞤭 𞤲𞤮𞤲 𞤶𞤢𞤲𞤺𞤭𞤪𞤣𞤫”. 𞤑𞤢𞥄𞤱𞤫𞥅!

𞤇𞤫𞤴𞤲𞤺𞤵 𞤢𞤲 𞤲𞤢𞤲𞤭 𞤥𞤭𞤯𞤮 𞤮𞤼𞥆𞤢𞤲𞤢 𞤶𞤢𞤲𞤺𞤵𞤺𞤮𞤤 𞤣𞤫𞤬𞤼𞤫𞤪𞤫 𞤨𞤢𞤴𞤳𞤮𞤴. 𞤑𞤮 𞤲𞤣𞤫𞤲 𞤻𞤢𞤤𞤲𞤣𞤫 𞤤𞤢𞥄𞤩𞤢𞤲𞤭 𞤥𞤮⹁ 𞤶𞤢𞤳𞤢 𞤳𞤮 𞤧𞤮𞥅𞤦𞤫𞥅 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫. 𞤖𞤢𞤪𞤭 𞤯𞤵𞤥 𞤬𞤮𞤬 𞤥𞤭 𞤤𞤢𞤲𞤣𞤮𞤼𞤮𞤲𞤮 𞤥𞤮⹁ 𞤴𞤮 𞤸𞤮 𞤱𞤭𞤲𞤣𞤢𞤲𞤢𞤲 𞤨𞤭𞥅𞤶𞤭 𞤬𞤭𞥅 𞤳𞤢 𞤣𞤵𞤯𞤢𞤤⹁ 𞤳𞤮𞤲𞤮 𞤸𞤢𞤴 𞤬𞤵𞤧 𞤫 𞤯𞤵𞤥 𞤱𞤮𞤲𞤢𞥄𞤲𞤮 𞤧𞤢𞤦𞤵 𞤴𞤮 𞤸𞤮 𞤧𞤮𞤺𞤭𞤼𞤮. 𞤑𞤮𞤲𞤮 𞤲𞤣𞤫𞤲 𞤻𞤢𞤤𞤲𞤣𞤫⹁ 𞤩𞤢𞤲𞤺𞤢𞤲𞤭 𞤥𞤮 𞤫𞤥𞤦𞤫𞤪𞤫 𞤼𞤭𞥅𞤯𞤵𞤺𞤮𞤤 𞤻𞤢𞤱𞤵 𞤲𞤺𞤵𞤲. 𞤑𞤮𞤲𞤮 𞤸𞤢𞤴 𞤬𞤵𞤧 𞤸𞤮 𞤸𞤢𞥄𞤤𞤢𞥄𞤤𞤭. 𞤖𞤮 𞤴𞤭𞤲𞥆𞤢𞥄𞤳𞤭 𞤤𞤢𞤲 𞤳𞤢𞤣𞤭. 𞤖𞤮 𞤶𞤮𞤳𞥆𞤭 𞤫 𞤱𞤢𞤤𞥆𞤭𞤼𞤢𞤺𞤮𞤤 𞤤𞤢𞤲.

 𞤑𞤮𞤲𞤮 𞤬𞤭𞥅 𞤳𞤢𞤤𞤢 𞤸𞤮 𞤢𞤲𞤣𞤭𞥅⹁ 𞤯𞤵𞤴𞤼𞤢𞤲𞤢𞥄𞤤𞤭 𞤤𞤢𞤲 𞤸𞤵𞥅𞤲𞤣𞤫 𞤫 𞤣𞤮𞤲𞤺𞤢𞤤 𞤲𞤺𞤢𞤤. 𞤅𞤢𞤦𞤵 𞤳𞤢 𞤩𞤫𞤪𞤲𞤣𞤫 𞤢𞤲⹁ 𞤥𞤭𞤯𞤮 𞤸𞤮𞥅𞤤𞤭𞤲𞤮𞥅 𞤸𞤮𞤯𞥆𞤭𞥅 𞤳𞤮 𞤥𞤭 𞤲𞤶𞤮𞤬𞤮𞥅𞤶𞤮⹁ 𞤬𞤢𞥄𞤯𞤵𞤯𞤮 𞤸𞤢𞤳𞥆𞤭𞤤𞤫⹁ 𞤶𞤢𞤲𞤬𞤮𞤼𞤮𞥅𞤯𞤮 𞤳𞤢𞤣𞤭. 𞤃𞤭𞤯𞤮 𞤼𞤭𞤲𞤣𞤭𞤲𞤣𞤫 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤢𞤲 𞤩𞤫𞤲𞤯𞤢𞤩𞥆𞤵𞤼𞤵𞤺𞤮𞤤 𞤺𞤮𞥅𞤲𞤺𞤢⹁ 𞤫 𞤸𞤭𞤲𞤮 𞤤𞤫 𞤳𞤮 𞤥𞤭 𞤬𞤫𞤲𞤮𞥅𞤱𞤮 𞤥𞤢𞤱𞤯𞤮. 𞤐𞤺𞤢𞤤 𞤣𞤮𞤲𞤺𞤢𞤤⹁ 𞤭𞤱𞤣𞤫 𞤱𞤮𞥅 𞤲𞤣𞤫 𞤥𞤭 𞤫𞤳𞥆𞤭𞤼𞤭𞤲𞤮𞥅 𞤶𞤢𞤲𞤺𞤵𞤺𞤮𞤤.

 𞤁𞤵𞥅𞤩𞤭 𞥑𞥗 (𞤧𞤢𞤨𞥆𞤮𞤴-𞤫-𞤶𞤫𞥅𞤯𞤭𞤯𞤭) 𞤥𞤭𞤯𞤮 𞤶𞤢𞤲𞤺𞤭𞤲𞤣𞤫 𞤳𞤢 𞤣𞤵𞤯𞤢𞤤 𞤼𞤮𞥅𞤱𞤲𞤺𞤢𞤤. 𞤘𞤭𞤤𞤢 𞥑𞥙𞥖𞥑 𞤬𞤢𞥄 𞥑𞥙𞥗𞥘. 𞤑𞤮 𞤣𞤵𞥅𞤩𞤭 𞤶𞤫𞥅𞤼𞤢𞤼𞤭 𞤩𞤢𞥄𞤱𞤮 𞤥𞤭 𞤢𞤷𞥆𞤵𞤼𞤵𞤣𞤫 𞤶𞤢𞤲𞤺𞤲𞤵𞤺𞤮𞤤⹁ 𞤺𞤮𞥅𞤼𞤯𞤵𞤲 𞤱𞤢𞤴𞤤𞤢𞤲𞤭𞥅 𞤤𞤢𞤲.

𞤌𞤲𞤼𞤵𞤥𞤢 𞤸𞤢𞤪𞤭 𞤥𞤭 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥔𞥗 (𞤷𞤢𞤨𞥆𞤢𞤲𞤯𞤫 𞤲𞤢𞤴𞤭 𞤫 𞤶𞤫𞥅𞤯𞤭𞤯𞤭) 𞤥𞤭𞤯𞤮 𞤸𞤢𞤥𞥆𞤢𞤲𞤭 𞥔𞥘 (𞤲𞤢𞤴 𞤫 𞤶𞤫𞥅𞤼𞤢𞤼𞤭) 𞤧𞤮 𞤥𞤭 𞤴𞤭𞤭 𞤄𞤢𞤪𞤦𞤢𞤪𞤢 𞤄𞤵𞥃 𞤳𞤢 𞤯𞤮𞤱𞤤𞤵 𞤸𞤢𞤪𞤭 𞤮𞤲𞤼𞤵𞤥𞤢 𞤳𞤮 𞤸𞤮 𞤧𞤮𞤲𞥆𞤢𞥄𞤶𞤮 𞤔𞤮𞤪𞤶𞤵 𞤄𞤵𞥃⹁ 𞤷𞤵𞤳𞥆𞤮 𞤸𞤮𞥅𞤪𞤫𞥅𞤶𞤮 𞤀𞤥𞤭𞤪𞤭𞤳𞤢 𞤬𞤫𞤱𞤲𞤣𞤮 𞤮𞤲𞤼𞤵𞤥𞤢. 𞤃𞤭 𞤴𞤭𞤭 𞤸𞤢𞤲𞤳𞤮 𞤄𞤢𞤪𞤦𞤢𞤪𞤢 𞤄𞤵𞥃  𞤳𞤢 𞤯𞤮𞤱𞤤𞤵 𞤸𞤮𞤥𞤮 𞤴𞤫𞤱𞤼𞤢 𞤬𞤭𞥅 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞤢𞥄𞤳𞤵 𞤸𞤫𞤤𞥆𞤭𞤬𞤢𞥄𞤩𞤫. 𞤑𞤮 𞤬𞤭𞥅 𞤯𞤵𞤲𞤯𞤮𞥅 𞤸𞤮 𞤱𞤢𞤯𞤵𞤲𞤮𞥅 𞤸𞤭𞤤𞤲𞤢𞥄𞤪𞤫 𞤸𞤢𞤳𞥆𞤮 𞤥𞤢𞤱𞤲𞤣𞤫 𞤲𞤣𞤫𞤲. 𞤖𞤢𞤪𞤭 𞤲𞤮𞤲⹁ 𞤥𞤭 𞤥𞤫𞥅𞤯𞤢𞥄 𞤲𞤢𞤲𞤣𞤫 𞤺𞤮𞥅𞤼𞤯𞤮 𞤲𞤮 𞤴𞤫𞤱𞤼𞤢 𞤬𞤭𞥅 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞤢𞥄𞤳𞤵 𞤸𞤫𞤤𞥆𞤭𞤬𞤢𞥄𞤩𞤫. 𞤃𞤭𞤯𞤮 𞤧𞤭𞤳𞥆𞤢𞤴𞤲𞤮𞥅 𞤳𞤮 𞤥𞤭𞤲 𞤼𞤵𞤲 𞤱𞤮𞤲𞥆𞤮𞥅 𞤸𞤫𞤤𞥆𞤭𞤬𞤢𞥄𞤯𞤮 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭 𞤱𞤮𞤲𞤣𞤵𞤯𞤮 𞤫 𞤲𞤣𞤫𞥅 𞤢𞥄𞤲𞤣𞤫.

 𞤐𞤣𞤫𞤲𞤧𞤢𞤴⹁ 𞤖𞤢𞤪𞤭 𞤼𞤢𞤻𞤢𞥄𞤪𞤫 𞤸𞤵𞥅𞤩𞤭𞤼𞤭𞥅 𞤤𞤢𞤲. 𞤃𞤭𞤯𞤮 𞤬𞤢𞥄𞤤𞤢𞤲𞤮𞥅 𞤥𞤮 𞤥𞤭 𞤸𞤢𞥄𞤤𞤢𞤲𞤢⹁ 𞤥𞤭𞤯𞤮 𞤬𞤢𞥄𞤤𞤢𞤲𞤮 𞤳𞤢𞤣𞤭 𞤱𞤢𞤤𞥆𞤫𞥅𞤣𞤫. 𞤙𞤢𞤤𞤲𞤣𞤫 𞤺𞤮𞥅⹁ 𞤸𞤢𞤪𞤭 𞤥𞤭𞤯𞤮 𞤫 𞤲𞤣𞤫𞤪 𞤤𞤵𞥅𞤥𞤮⹁ 𞤥𞤭 𞤲𞤢𞤲𞤭 𞤪𞤫𞤱𞤩𞤫 𞤯𞤭𞤯𞤮 𞤲𞤮 𞤴𞤫𞤱𞤼𞤢 𞤬𞤭𞥅 𞤦𞤢𞤲𞤣𞤭𞤪𞤢𞥄𞤱𞤮 𞤥𞤢𞤩𞥆𞤫 𞤸𞤫𞤤𞥆𞤭𞤬𞤢𞥄𞤯𞤮 𞤱𞤮𞤲𞤯𞤮 𞤫 𞤴𞤢𞤸𞤵𞤣𞤫 𞤳𞤢 𞤣𞤫𞤬𞤼𞤫𞤪𞤣𞤵 𞤲𞤺𞤢𞤥 𞤫𞤳𞥆𞤭𞤼𞤢𞤺𞤮𞤤 𞤶𞤢𞤲𞤺𞤵𞤺𞤮𞤤. 𞤇𞤫𞥅 𞤯𞤭𞤯𞤮 𞤲𞤮 𞤱𞤫𞤤𞤼𞤭𞤲𞤮𞥅 𞤬𞤮𞤼𞤢 𞤬𞤮𞤼𞤢. 𞤄𞤫𞤲𞤭𞤲 𞤥𞤭 𞤽𞤢𞤤𞤯𞤭.

 𞤉 𞤥𞤢𞤱𞤲𞤣𞤫𞥅𞤪𞤫 𞤥𞤢𞤤𞥆𞤢 𞤶𞤵𞤥𞤢𞥄𞤪𞤫 𞤳𞤭𞥅𞤳𞤭𞥅𞤯𞤫⹁ 𞤥𞤭 𞤩𞤮𞤪𞤲𞤭𞥅 𞤸𞤢𞥄 𞤥𞤮𞤰𞥆𞤭⹁ 𞤥𞤭 𞤴𞤢𞤸𞤭 𞤳𞤢 𞤣𞤫𞤬𞤼𞤫𞤪𞤣𞤵. 𞤇𞤢𞤴𞤼𞤭 𞤥𞤭 𞤸𞤫𞤱𞤼𞤭𞥅⹁ 𞤥𞤭 𞤤𞤢𞤲𞤣𞤭𞥅 𞤲𞤮 𞤥𞤭 𞤸𞤵𞤥𞤨𞤮𞤲𞥋𞤣𞤭𞤪𞤭𞤪𞤢 𞤫 𞤢𞤪𞤣𞤭𞤲𞤢𞥄𞤯𞤮 𞤮𞤲 𞤬𞤭𞥅 𞤳𞤢 𞤶𞤢𞤲𞤺𞤣𞤫. 𞤃𞤭 𞤶𞤮𞥅𞤯𞤮𞤣𞤭 𞤫 𞤸𞤢𞤳𞥆𞤮⹁ 𞤥𞤭 𞤴𞤫𞥅𞤼𞤭𞥅 𞤥𞤮 𞤥𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫. 𞤑𞤮 𞤸𞤢𞤲𞤳𞤮 𞤱𞤮𞤲𞤭 𞤯𞤭𞤯𞤢𞤩𞤮 𞤫 𞤴𞤭𞤥𞤩𞤫 𞤩𞤫 𞤥𞤭 𞤴𞤫𞥅𞤼𞤭𞥅.

𞤃𞤭 𞤬𞤭𞤩𞤭𞤲𞥋𞤣𞤭𞤪𞤭 𞤤𞤢𞤲 𞤫 𞤫𞤳𞥆𞤭𞤼𞤮𞥅𞤸𞤮 𞤥𞤮 𞤣𞤵𞥅𞤩𞤭 𞥖𞥕 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮 𞤫 𞤶𞤮𞤱𞤭). 𞤖𞤢𞤲𞤳𞤮⹁ 𞤱𞤮𞥅𞤱𞤢𞥄 𞤸𞤮 𞤶𞤢𞤲𞤺𞤭𞤲𞤮𞥅𞤱𞤮 𞤫 𞤣𞤵𞤯𞤢𞤤. 𞤖𞤮 𞤤𞤢𞥄𞤼𞤭𞤲𞤮 𞤼𞤵𞤲 𞤴𞤭𞤯𞤵𞤲𞤮𞥅𞤯𞤮 𞤶𞤢𞤲𞤺𞤵𞤺𞤮𞤤⹁ 𞤺𞤮𞤥𞤯𞤭𞤲𞤯𞤮 𞤳𞤢𞤣𞤭 𞤱𞤮𞤲𞤣𞤫 𞤲𞤫𞤯𞥆𞤮 𞤸𞤢𞥄𞤲𞤢𞥄 𞤱𞤵𞥅𞤪𞤵𞤣𞤫 𞤸𞤢𞤪𞤢 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫.

 𞤐𞤮 𞤼𞤢𞤱𞤢𞥄 𞤫 𞤳𞤮 𞤸𞤮 𞤢𞤣𞤭𞥅 𞤸𞤵𞥅𞤱𞤭𞤲𞤣𞤫 𞤤𞤢𞤲⹁ 𞤫𞤼𞤢𞤺𞤮𞤤 𞤲𞤮 𞤥𞤭 𞤱𞤢𞥄𞤱𞤭𞤪𞤢 𞤱𞤭𞤲𞤣𞤵𞤣𞤫. 𞤅𞤢𞤦𞤵 𞤥𞤭𞤯𞤮 𞤥𞤢𞤪𞤵𞤲𞤮𞥅 𞤥𞤭𞥅𞤶𞤮𞥅𞤶𞤭 𞤯𞤵𞥅𞤯𞤵𞤯𞤭 𞤯𞤭 𞤥𞤭 𞤱𞤭𞤲𞤣𞤢𞥄𞤤𞤭 𞤸𞤢𞥄 𞤸𞤢𞤲. 𞤑𞤮 𞤥𞤭 𞤢𞤣𞤮𞤪𞤭 𞤱𞤭𞤲𞤣𞤵𞤺𞤮𞤤⹁ 𞤳𞤮 𞤺𞤭𞤥𞤯𞤮𞤤 𞤸𞤮𞥅𞤪𞤫 𞤥𞤭𞥅𞤶𞤮𞥅𞤶𞤭 𞤩𞤫𞤪𞤲𞤣𞤫 𞤢𞤲. 𞤑𞤮 𞤲𞤫𞤱𞤭𞤲𞤭 𞤲𞤮𞤲 𞤱𞤭𞤲𞤣𞤵𞤺𞤮𞤤 𞤺𞤭𞤥𞤯𞤭⹁ 𞤳𞤮 𞤲𞤣𞤫 𞤼𞤢𞤱𞤲𞤮𞥅 𞤶𞤢𞤪𞤢𞥄 𞤴𞤮 𞤢 𞤢𞤲𞤣𞤵 𞤳𞤮 𞤱𞤮𞤲𞤭 𞤧𞤢𞤺𞤢𞤪𞤢𞤱𞤮𞤤 𞤼𞤭𞤥𞥆𞤵𞤲𞥋𞤺𞤮𞤤. 𞤏𞤢𞤯𞥆𞤢𞥄𞤳𞤭 𞤥𞤢 𞤳𞤢𞤣𞤭 𞤴𞤮 𞤢 𞤱𞤭𞤲𞤣𞤵 𞤫 𞤧𞤢𞤺𞤢𞤪𞤢𞥄𞤶𞤭 𞤼𞤭𞤥𞥆𞤵𞤯𞤭.

 𞤖𞤮 𞤫𞤳𞥆𞤭𞤼𞤭 𞤤𞤢𞤲 𞤸𞤢𞥄 𞤥𞤭 𞤱𞤢𞥄𞤱𞤭 𞤶𞤢𞤲𞤺𞤭𞤪𞤣𞤫 𞤱𞤢 𞤨𞤢𞤴𞤳𞤵𞤲 𞤬𞤫𞤱𞤲𞤣𞤭𞥅𞤳𞤵𞤲 𞤫 𞤧𞤵𞥅𞤣𞤵 𞤶𞤫𞥅𞤺𞤢𞤩𞤵𞤪𞤵. 𞤇𞤢𞤴𞤼𞤭 𞤥𞤭 𞤱𞤢𞥄𞤱𞤭𞥅 𞤫𞤥𞤦𞤫𞤪𞤫 𞤯𞤵𞤥⹁ 𞤥𞤭 𞤧𞤭𞤳𞥆𞤭 𞤥𞤭 𞤥𞤢𞥄𞤴𞤭𞥅 𞤥𞤭 𞤲𞤢𞥄𞤼𞤭𞥅 𞤶𞤢𞤪𞤲𞤫 (𞤢𞤤𞤶𞤢𞤲𞥆𞤢). 𞤑𞤮𞤲𞤮 𞤰𞤫𞤼𞥆𞤵𞤲𞤮 𞤤𞤢𞤲 𞤣𞤵𞥅𞤩𞤭 𞤶𞤫𞥅𞤯𞤭𞤯𞤭 𞤧𞤮 𞤥𞤭 𞤱𞤢𞥄𞤱𞤭 𞤶𞤢𞤲𞤺𞤵𞤣𞤫. 𞤃𞤭 𞤱𞤵𞤤𞥆𞤭⹁ 𞤥𞤭 𞤱𞤮𞤴𞤭⹁ 𞤥𞤭 𞤬𞤫𞤧𞤭 𞤩𞤢𞤴𞤼𞤭 𞤥𞤭 𞤬𞤵𞤯𞥆𞤭𞤳𞤫 𞤱𞤢𞥄𞤱𞤵𞤣𞤫 𞤶𞤢𞤲𞤺𞤵𞤺𞤮𞤤 𞤳𞤮 𞤱𞤭𞤲𞤣𞤭𞥅. 𞤚𞤢𞤥𞤨𞤫𞤪𞤫 𞤫 𞤩𞤭𞤯𞤼𞤫𞥅𞤲𞤣𞤫 𞤸𞤫𞤩𞤭𞤲𞤮 𞤬𞤮𞤼𞤢⹁ 𞤳𞤮𞤲𞤮 𞤳𞤮 𞤴𞤮𞤤𞤲𞤣𞤫 𞤥𞤢𞤱𞤲𞤣𞤫 𞤱𞤢𞥄𞤱𞤵𞤺𞤮𞤤 𞤶𞤢𞤲𞤺𞤵𞤣𞤫 𞤵𞤣𞥆𞤭 𞤫 𞤱𞤮𞤲𞤳𞤭𞥅 𞤢𞤲. 𞤖𞤫𞤤𞥆𞤭𞤬𞤢𞥄𞤩𞤫 𞤩𞤫 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫⹁ 𞤳𞤮 𞤤𞤵𞤼𞥆𞤵𞤩𞤫 𞤫 𞤯𞤢𞤴𞤪𞤫⹁ 𞤫 𞤦𞤮𞥅𞤦𞤮𞤴𞤢𞥄𞤺𞤢𞤤 𞤳𞤢 𞤥𞤭𞥅𞤶𞤮⹁ 𞤳𞤢 𞤱𞤮𞤲𞤳𞤭𞥅 𞤫 𞤳𞤢 𞤺𞤢𞤲𞤣𞤢𞤤. 𞤌𞤲𞤼𞤭𞤺𞤭 𞤼𞤭𞤥𞥆𞤢𞤼𞤢𞥄 𞤥𞤢𞤱𞤯𞤮 𞤧𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫.

 𞤑𞤮 𞤸𞤮𞥅 𞤣𞤫𞤦𞥆𞤮 𞤫𞤳𞥆𞤭𞤼𞤵𞤯𞤮 𞤤𞤢𞤲 𞤶𞤢𞤲𞤺𞤵𞤺𞤮𞤤⹁ 𞤧𞤮𞥅𞤦𞤭𞤲𞤭 𞤤𞤢𞤲 𞤴𞤮 𞤥𞤭 𞤬𞤭𞤤𞥆𞤮 𞤲𞤺𞤮𞤤 𞤨𞤫𞤰𞥆𞤮𞤤 𞤢𞤲 𞤬𞤭𞥅 𞤴𞤮 𞤲𞤺𞤮𞤤 𞤸𞤭𞤥𞥆𞤭𞤲 𞤸𞤫𞤤𞥆𞤭𞤬𞤢𞥄𞤩𞤫 𞤺𞤮𞥅 𞤳𞤢𞤣𞤭⹁ 𞤱𞤢𞤤𞥆𞤢 𞤫 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞤢𞥄𞤳𞤵. 𞤑𞤮𞤲𞤮 𞤥𞤭 𞤱𞤭𞤭: “𞤍𞤵𞤥 𞤱𞤢𞤯𞤢𞤼𞤢𞥄. 𞤃𞤭 𞤱𞤮𞤲𞤣𞤭𞥅 𞤫 𞤩𞤫𞥅 𞤴𞤭𞤥𞤩𞤫 𞤳𞤮 𞤩𞤵𞤪𞤭 𞤣𞤵𞥅𞤩𞤭 𞤧𞤢𞤨𞥆𞤮𞤴-𞤫-𞤶𞤫𞥅𞤯𞤭𞤯𞤭⹁ 𞤩𞤭𞤯𞤩𞤫 𞤢𞤲 𞤲𞤮 𞤯𞤮𞤮⹁ 𞤩𞤫𞤴𞤲𞤺𞤵 𞤢𞤲 𞤲𞤮 𞤯𞤮𞤮.𞤔𞤭𞥅𞤣𞤲𞤢𞥄𞤩𞤫 𞤥𞤢𞤤𞥆𞤢 𞤥𞤢𞤱𞤩𞤫 𞤢𞤲 𞤩𞤫𞤲 𞤲𞤮 𞤯𞤮𞤮 𞤳𞤢𞤣𞤭⹁ 𞤥𞤭 𞤬𞤭𞤤𞥆𞤮𞤼𞤢𞥄𞤳𞤮 𞤲𞤺𞤮𞤤 𞤨𞤫𞤰𞥆𞤮𞤤⹁ 𞤥𞤭 𞤱𞤭𞤪𞤼𞤢 𞤸𞤮𞥅𞤪𞤫 𞤢𞤲.”

 𞤑𞤮𞤲𞤮 𞤥𞤭 𞤧𞤢𞤳𞥆𞤭𞤼𞤮𞤪𞤭 𞤶𞤢𞤩𞤵𞤺𞤮𞤤. 𞤑𞤮 𞤺𞤵𞤲𞤣𞤮𞥅 𞤸𞤫𞤪𞤧𞤭𞤲𞤭𞥅𞤯𞤮⹁ 𞤳𞤮 𞤯𞤵𞤥 𞤧𞤢𞤼𞥆𞤭𞤲𞤭 𞤬𞤭𞤤𞥆𞤢𞤺𞤮𞤤 𞤥𞤮.

 𞤖𞤮𞤴𞤢𞥄⹁ 𞤳𞤮𞤲𞤮 𞤩𞤢𞤴𞤼𞤭 𞤥𞤭 𞤬𞤭𞤩𞤭𞥅 𞤥𞤭 𞤬𞤭𞤤𞥆𞤮𞤼𞤮 𞤨𞤫𞤰𞥆𞤮𞤤 𞤢𞤲 𞤲𞤺𞤮𞤤⹁ 𞤥𞤭 𞤬𞤭𞤤𞥆𞤢𞤲𞤭𞥅 𞤲𞤺𞤮𞤤 𞤀𞤥𞤫𞤪𞤭𞤳𞤢𞥄 𞤬𞤮𞤨. 𞤑𞤢𞤤𞤢 𞤬𞤢𞥄𞤤𞤢𞥄𞤯𞤮 𞤸𞤫𞤯𞤢𞥄𞤣𞤫 𞤳𞤢𞤣𞤭⹁ 𞤥𞤭 𞤧𞤭𞤬𞤢𞤲𞤭𞥅 𞤮𞤲𞤼𞤭𞤺𞤭. 𞤃𞤭 𞤥𞤢𞤪𞤵𞤲𞤮  𞤲𞤺𞤮𞥅 𞤺𞤵𞤲𞤣𞤮 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫⹁ 𞤲𞤣𞤫𞤲 𞤥𞤭 𞤬𞤵𞤷𞥆𞤭𞤼𞤭 𞤲𞤺𞤮 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤬𞤮𞤬.

𞤔𞤮𞤸𞤲 𞤑𞤮𞤪𞤳𞤮𞤪𞤢𞤲 𞤲𞤮 𞤥𞤢𞤪𞤭 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤶𞤫𞥅𞤼𞤢𞤼𞤭 𞤸𞤢𞤲𞤣𞤫 (𞥘𞥓). 𞤘𞤭𞤤𞤢 𞤮 𞤱𞤢𞥄𞤱𞤭 𞤶𞤢𞤲𞤺𞤵𞤺𞤮𞤤⹁ 𞤮 𞤱𞤭𞤲𞤣𞤭𞥅 𞤣𞤫𞤬𞤼𞤫 𞤯𞤭𞤯𞤭. 𞤌 𞤥𞤮 𞤧𞤭𞤲𞤷𞤭 𞤳𞤢𞤣𞤭 𞤥𞤮𞤶𞤮𞤦𞤫𞤪𞤫 𞤫 𞤭𞤲𞤣𞤫 𞤥𞤢𞤳𞥆𞤮 𞤲𞤺𞤢𞤥 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞤢𞥄𞤳𞤵.

𞤊𞤭𞥅 𞤳𞤢𞤤𞤢 𞤱𞤮𞤲𞤢𞥄 𞤮 𞤸𞤢𞥄𞤲𞤢𞥄𞤯𞤮 𞤻𞤫𞤥𞤦𞤫𞥅𞤣𞤫⹁ 𞤫 𞤧𞤫𞤲𞤺𞤮 𞤺𞤮𞥅 𞤲𞤮𞤲⹁ 𞤲𞤺𞤮𞤤 𞤨𞤫𞤰𞥆𞤮𞤤 𞤔𞤮𞤸𞤲 𞤑𞤮𞤪𞤳𞤮𞤪𞤢𞤲 𞤲𞤮 𞤸𞤮𞤤𞥆𞤭 𞤲𞤢𞤬𞤮𞥅𞤪𞤫 𞤶𞤢𞤲𞤺𞤵𞤺𞤮𞤤 𞤫 𞤯𞤫𞤲𞤺𞤢𞤤 𞤥𞤵𞤲. 𞤅𞤢𞤦𞤵𞤲𞤢⹁ 𞤧𞤮 𞤱𞤮𞤲𞤢𞥄𞤲𞤮 𞤫 𞤸𞤢𞥄𞤤𞤢 𞤥𞤢𞤳𞥆𞤮 𞤮  𞤱𞤮𞤲𞤢𞤲𞤮𞥅 𞤶𞤢𞤲𞤺𞤭𞤲𞤫𞥅𞤣𞤫⹁ 𞤮 𞤱𞤢𞥄𞤱𞤢𞤼𞤢𞥄𞤲𞤮 𞤱𞤢𞤯𞤣𞤫 𞤳𞤮 𞤮 𞤱𞤢𞤯𞤭 𞤳𞤮𞤲 𞤬𞤮𞤱. 𞤑𞤮𞤲𞤮 𞤲𞤣𞤫 𞤼𞤢𞤱𞤲𞤮𞥅 𞤮𞤥𞤮 𞤱𞤢𞥄𞤱𞤭 𞤸𞤢𞥄𞤤𞤢 𞤳𞤢𞤲⹁ 𞤮 𞤸𞤫𞤩𞤵𞤲𞤮 𞤬𞤫𞤸𞤪𞤫 𞤲𞤮 𞤮 𞤥𞤮𞤤𞤼𞤮𞤪𞤢 𞤸𞤢𞥄 𞤮 𞤺𞤢𞤴𞤲𞤭 𞤶𞤢𞤲𞤺𞤣𞤫.                    

 

𞤑𞤮 𞤳𞤵𞤯𞤮𞤤 𞤲𞤺𞤮𞤤 BBC 𞤱𞤭𞤲𞤣𞤭 𞤸𞤮𞥅𞤪𞤫 𞤮𞥅 𞤺𞤮𞤪𞤳𞤮 𞤥𞤭 𞤼𞤵𞥅𞤺𞤮𞤪𞤭 𞤥𞤭 𞤱𞤭𞤲𞤣𞤭 𞤲𞤺𞤮𞤤 𞤯𞤮𞥅 𞤳𞤵𞤯𞤮𞤤  𞤳𞤢 𞤯𞤫𞤲𞤺𞤢𞤤 𞤥𞤫𞤲 .