𞤁𞤌𞤐𞤀𞤂 𞤚𞤈𞤓𞤃 𞤒𞤀𞤂𞤚𞤋𞥅 𞤑𞤀 𞤂𞤀𞤄𞤚𞤀𞤐𞤈𞤓

𞤁𞤮𞤲𞤢𞤤 𞤚𞤪𞤮𞤥𞤨⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤀𞤥𞤫𞤪𞤭𞤳𞤢𞥄 𞤲𞤣𞤭𞤲⹁ 𞤴𞤢𞤤𞤼𞤭𞥅 𞤳𞤢 𞤤𞤢𞤦𞤵𞤼𞤢𞥄𞤲𞤪𞤵.

𞤑𞤮 𞤸𞤢𞤲𞤳𞤭 𞤳𞤭𞥅𞤳𞤭𞥅𞤯𞤫 𞤫 𞤢𞥄𞤩𞤵𞤲𞥋𞤣𞤫⹁ 𞤮 𞤴𞤢𞤤𞤼𞤭 𞤮 𞤸𞤮𞥅𞤼𞤭 𞤳𞤢 𞤅𞤵𞥅𞤣𞤵 𞤈𞤢𞤲𞤫𞥅𞤪𞤵. 𞤖𞤢𞤪𞤭 𞤺𞤭𞤤𞤢 𞤥𞤢𞤱𞤲𞤣𞤫 (𞤶𞤵𞤥𞤢) 𞤮𞤥𞤮 𞤱𞤢𞤤𞥆𞤭𞤲𞤢𞥄 𞤏𞤢𞤤𞤼𞤫𞤪 𞤈𞤭𞥅𞤣⹁ 𞤯𞤵𞤥 𞤳𞤮 𞤤𞤢𞤦𞤵𞤼𞤢𞥄𞤲𞤪𞤵 𞤳𞤮𞤲𞤵 𞤢𞤥𞤫𞤪𞤭𞤳𞤢𞥄 𞤲𞤣𞤵𞤲.

𞤑𞤮 𞤫 𞤲𞤢𞥄𞤧𞤢𞥄𞤲𞤣𞤫 (𞤢𞤤𞤳𞤢𞤥𞤭𞤧𞤢)⹁ 𞤁𞤮𞤲𞤢𞤤 𞤚𞤪𞤮𞤥𞤨 𞤸𞤮𞤤𞥆𞤭𞤼𞤭 𞤫 𞤩𞤢𞤼𞤢𞥄𞤳𞤫𞤱𞤮𞤤 𞤲𞤺𞤮𞤤 𞤮 𞤱𞤫𞤲𞤺𞤭 𞤳𞤢 𞤚𞤱𞤭𞤼𞤫𞤪 (Twitter) 𞤱𞤮𞤲𞤣𞤫𞤥𞤢 𞤻𞤢𞤱𞤵 𞤑𞤮𞤪𞤮𞤲𞤢𞤾𞤭𞤪𞤭𞥅𞤧 𞤲𞤺𞤵𞤲 𞤪𞤢𞥄𞤩𞤭𞥅 𞤥𞤮 𞤳𞤢𞤲𞤳𞤮 𞤫 𞤣𞤫𞤦𞥆𞤮 𞤥𞤢𞤳𞥆𞤮 𞤮𞤲 𞤃𞤫𞤤𞤢𞥄𞤲𞤭𞤴𞤢 𞤚𞤪𞤮𞤥𞤨.

𞤇𞤢𞤴𞤼𞤭 𞤻𞤢𞤱𞤵 𞤲𞤺𞤵𞤲 𞤼𞤭𞥅𞤯𞤭𞥅 𞤬𞤮𞤼𞤢⹁ 𞤩𞤫 𞤸𞤫𞤻𞤭𞤲𞤭 𞤥𞤮 𞤳𞤢 𞤤𞤢𞤦𞤼𞤢𞤲𞤪𞤵 𞤫 𞤥𞤢𞤱𞤲𞤣𞤫. 𞤌 𞤶𞤮𞤲𞥆𞤢𞥄 𞤼𞤮𞤲 𞤤𞤫𞤳𞥆𞤫𞥅𞤤𞤫 𞤯𞤵𞥅𞤯𞤵𞤯𞤫 𞤻𞤢𞤱𞤲𞤣𞤭𞤪𞤯𞤫 𞤑𞤮𞤾𞤭𞤣-𞥑𞥙. 𞤑𞤮𞤲𞤮 𞤴𞤮𞤺𞤢 𞤫 𞤯𞤫𞤲 𞤤𞤫𞤳𞥆𞤫𞥅𞤤𞤫 𞤸𞤫𞥅𞤪𞤭𞤲𞤢𞤲𞤢𞥄𞤳𞤢 𞤴𞤭𞤥𞤩𞤫 𞤩𞤫𞤲 𞤼𞤢𞤸𞤮.

𞤘𞤭𞤤𞤢 𞤮 𞤱𞤢𞤤𞥆𞤭𞤲𞤢𞥄 𞤳𞤢 𞤤𞤢𞤦𞤵𞤼𞤢𞥄𞤲𞤪𞤵⹁ 𞤮 𞤶𞤢𞤩𞤢𞥄𞤤𞤭 𞤸𞤫𞤰𞤵𞤣𞤫 𞤼𞤮𞤲. 𞤌 𞤶𞤢𞤩𞤢𞥄𞤤𞤭 𞤳𞤢𞤣𞤭 𞤯𞤮𞤬𞤼𞤢𞥄𞤣𞤫 𞤴𞤢𞤥𞤭𞤪𞤮𞥅𞤶𞤫 𞤻𞤢𞤱𞤲𞤣𞤮𞥅𞤩𞤫 𞤩𞤫𞤲. 𞤑𞤮 𞤢𞥄𞤲𞤭𞤲𞤭 𞤥𞤮 𞤼𞤢𞤲 𞤳𞤮 𞤲𞤮 𞤮 𞤸𞤫𞤩𞥆𞤭𞤼𞤮𞤪𞤢 𞤢𞤣𞤮𞤲𞥋𞤣𞤭𞤪𞤢𞤤 𞤬𞤭𞥅 𞤤𞤢𞥄𞤥𞤵 𞤬𞤫𞤱𞤲𞤣𞤭𞥅𞤲𞤺𞤵 𞤲𞤺𞤵𞤲 𞤀𞤥𞤫𞤪𞤭𞤳𞤢𞥄. 𞤑𞤮 𞤯𞤵𞤥 𞤱𞤢𞤯𞤭 𞤸𞤢𞥄 𞤮 𞤴𞤢𞤤𞤼𞤭 𞤸𞤢𞤴 𞤮 𞤺𞤢𞤴𞤲𞤢𞥄𞤤𞤭 𞤲𞤣𞤭𞤳𞥆𞤵𞤣𞤫.

𞤇𞤢𞤴𞤼𞤭 𞤲𞤮𞤲 𞤮 𞤸𞤮𞥅𞤼𞤭 𞤳𞤢 𞤅𞤵𞥅𞤣𞤵 𞤈𞤢𞤲𞤫𞥅𞤪𞤵⹁ 𞤮𞤥𞤮 𞤴𞤢𞤥𞤭𞤪𞤢𞥄 𞤱𞤮𞤼𞤢 𞤮 𞤴𞤢𞤤𞤼𞤵 𞤸𞤢𞥄 𞤫 𞤢𞥄𞤩𞤵𞤲𞥋𞤣𞤫 𞤢𞤪𞤮𞥅𞤪𞤫. 𞤑𞤮𞤲𞤮 𞤼𞤭𞤶𞥆𞤢𞥄𞤳𞤢 𞤮 𞤯𞤮𞤬𞤼𞤮𞤼𞤮 𞤯𞤵𞤥 𞤧𞤢𞤦𞤵𞤲𞤢 𞤮 𞤬𞤵𞤯𞥆𞤭𞤳𞤫 𞤤𞤵𞤲𞤣𞤢𞥄𞤣𞤫 𞤴𞤢𞤥𞤭𞤪𞤮𞥅𞤶𞤫 𞤻𞤢𞤱𞤲𞤣𞤮𞥅𞤩𞤫 𞤱𞤵𞤪𞤭𞤲 𞤮 𞤸𞤫𞤱𞤼𞤭𞤼𞤢𞥄𞤤𞤭. 𞤐𞤣𞤫 𞤮 𞤸𞤫𞤱𞤼𞤵𞤲𞤮𞥅 𞤳𞤢 𞤧𞤫𞤥𞤨𞤫𞤼𞤫𞤲𞤶𞤫 𞤅𞤵𞥅𞤣𞤵 𞤈𞤢𞤲𞤫𞥅𞤪𞤵⹁ 𞤮 𞤭𞤼𞥆𞤭 𞤳𞤭𞤧𞤢𞤲 𞤧𞤵𞥅𞤥𞤭𞤪𞤯𞤵𞤲 𞤴𞤫𞥅𞤧𞤫 𞤥𞤢𞤳𞥆𞤮 𞤲𞤺𞤮𞤲.

𞤘𞤭𞤤𞤢 𞤲𞤺𞤵𞥅 𞤻𞤢𞤱𞤵 𞤪𞤢𞥄𞤩𞤭 𞤥𞤮⹁ 𞤮 𞤪𞤢𞥄𞤩𞤭𞤲𞤭𞥅 𞤲𞤺𞤵 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫 𞤶𞤫𞤴𞤢𞥄𞤩𞤫 𞤫 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲. 𞤐𞤮 𞤼𞤢𞤱𞤢𞥄 𞤸𞤫𞤲 𞤧𞤢𞤪𞤴𞤭𞤲𞤮𞥅𞤩𞤫 (𞤧𞤫𞤲𞤢𞤼𞤮𞥅𞤩𞤫).

𞤐𞤺𞤵𞥅 𞤻𞤢𞤱𞤵 𞤸𞤮𞤤𞥆𞤭𞥅 𞤱𞤮𞤲𞤣𞤫 𞤲𞤺𞤵 𞤢𞤷𞥆𞤭𞤪𞤼𞤢𞥄 𞤺𞤮𞥅𞤼𞤮 𞤧𞤢𞤦𞤵 𞤣𞤢𞤪𞤲𞤣𞤫 𞤮𞤲𞤼𞤭𞤺𞤭⹁ 𞤥𞤢𞥄 𞤶𞤢𞤱𞤣𞤭 𞤮𞤲𞤼𞤭𞤺𞤭. 𞤐𞤺𞤵 𞤢𞤤𞤢𞥄 𞤤𞤫 𞤳𞤢𞤣𞤭 𞤤𞤫𞤳𞥆𞤭. 𞤃𞤮 𞤳𞤢𞤤𞤢 𞤲𞤮 𞤸𞤢𞥄𞤲𞤭 𞤪𞤫𞥅𞤲𞤼𞤢𞥄𞤣𞤫. 𞤌𞤲𞤼𞤭𞤺𞤭 𞤲𞤮 𞤸𞤢𞥄𞤲𞤭 𞤻𞤫𞤥𞤼𞤭𞤲𞤣𞤫 𞤴𞤢𞤥𞤭𞤪𞤮𞥅𞤶𞤮 𞤣𞤢𞤯𞤲𞤭𞤼𞤮𞤪𞤯𞤫 𞤯𞤫𞤲. 𞤍𞤫𞤲 𞤳𞤮:
𞥑 – 𞤔𞤓𞥅𞤍𞤉 𞤍𞤉𞤐, 𞤤𞤮𞥅𞤼𞤢 𞤯𞤫 𞤧𞤮𞥅𞤲𞤮 𞤳𞤢𞤤𞤢. 𞤌𞤲𞤼𞤭𞤺𞤭 𞤧𞤮𞥅𞤯𞤮𞤪𞤢 𞤧𞤢𞥄𞤦𞤵𞤲𞤣𞤫 𞤫 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲
𞥒 – 𞤅𞤌𞤇𞥆𞤓𞤐𞥋𞤁𞤓 𞤐𞤁𞤓𞤐⹁ 𞤯𞤮𞤶𞥆𞤢 𞤥𞤢𞥄 𞤭𞥅𞤤𞤢 𞤫 𞤲𞤣𞤫𞤪 𞤥𞤢𞤴𞤪𞤵.
𞥓 – 𞤒𞤉𞥅𞤅𞤌 𞤐𞤘𞤌𞤐⹁ 𞤱𞤮𞤼𞤢 𞤮𞤲𞤼𞤭𞤺𞤭 𞤥𞤫𞥅𞤥𞤵 𞤲𞤺𞤮⹁ 𞤼𞤫𞤲𞤼𞤭𞤲𞤭𞥅 𞤧𞤮 𞤶𞤵𞥅𞤯𞤫 𞤯𞤫𞤲 𞤤𞤢𞥄𞤩𞤢𞥄.
𞥔 – 𞤚𞤉𞤆𞥆𞤉 𞤚𞤀𞤚𞤋⹁ 𞤴𞤮 𞤯𞤵𞤥 𞤱𞤮𞤲𞤵 𞤸𞤢𞤳𞥆𞤵𞤲’𞤣𞤫 𞤮𞤲𞤼𞤭𞤺𞤭 𞤫 𞤴𞤭𞤥𞤩𞤫 𞤩𞤫𞤲.
𞥕 – 𞤃𞤌 𞤅𞤌𞤋𞥅 𞤲𞤢𞤱𞤲𞤵𞤣𞤫⹁ 𞤴𞤮 𞤤𞤵𞤼𞥆𞤫𞥅 𞤳𞤢 𞤧𞤵𞥅𞤣𞤵 𞤥𞤵𞤲.
𞥖 – 𞤅𞤓𞥅𞤃𞤀 𞤳𞤭𞤲𞤢𞤤 𞤲𞤺𞤢𞤤 𞤫 𞤸𞤵𞤲𞤣𞤵𞤳𞤮 𞤳𞤮𞤲 𞤧𞤮 𞤼𞤢𞤱𞤭𞥅 𞤮𞤲𞤼𞤭𞤺𞤭 𞤴𞤢𞤤𞤼𞤢𞤴.