𞤃𞤋𞤍𞤌 𞤀𞥄𞤐𞤀𞤐𞤋 𞤉𞤐

𞤃𞤭𞤯𞤮 𞤢𞥄𞤲𞤢𞤲𞤭 𞤫𞤲.
𞤉𞤲 𞤶𞤢𞤤𞤢𞤲𞤭𞥅 𞤦𞤮𞤲𞤫 𞤧𞤢𞤦𞤵 𞤮𞤥𞤮 𞤥𞤢𞤯𞥆𞤭𞥅 𞤤𞤮𞤪𞥆𞤢𞤴𞤯𞤭 𞤪𞤫𞤲𞤣𞤮. 𞤏𞤮𞤼𞤢 𞤫𞤲 𞤴𞤢𞤱𞤭𞤼𞤮.

𞤏𞤮𞤼𞤢 𞤫𞤲 𞤶𞤮𞥅𞤯𞤮 𞤫 𞤶𞤢𞤤𞤢𞤲𞤺𞤮𞤤 𞤥𞤢𞤤𞥆𞤢 𞤫 𞤲𞤢𞥄𞤬𞤭𞤲𞤹𞤭𞤲𞤢𞤲𞤢𞤺𞤮𞤤 𞤶𞤮𞤺𞤲𞤮𞥅𞤩𞤫 𞤢𞤻𞤵𞤩𞤫 𞤫𞤲⹁ 𞤢𞥄𞤤𞤢𞥄𞤶𞤭 𞤯𞤭 𞤩𞤫𞤲 𞤨𞤭𞤴𞤭𞤪𞤢 𞤫𞤲.

𞤒𞤭𞤥𞤩𞤫 𞤲𞤮 𞤤𞤮𞤲𞤺𞤭𞤲𞤢𞤲𞤮𞥅 𞤺𞤭𞤦𞤭 𞤬𞤫𞤱𞤲𞤣𞤮 𞤤𞤢𞥄𞤥𞤵 𞤐𞤁𞤵𞤪𞤵 𞤄𞤵𞥅𞤧𞤫 𞤱𞤮𞤲𞤣𞤫𞤥𞤢 𞤳𞤮 𞤫𞤲 𞤸𞤮𞤩𞥆𞤫 𞤱𞤫𞥅𞤪𞤲𞤢𞤲𞤮𞥅𞤩𞤫 𞤲𞤣𞤫𞤪 𞤊𞤵𞥅𞤼𞤢 𞤔𞤢𞤤𞤮𞥅. 𞤇𞤫 𞤤𞤮𞤲𞤺𞤭𞤲𞤢𞥄 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤫𞤲 𞤶𞤫𞤴𞤢𞥄 𞤤𞤫𞤴𞤣𞤭 𞤊𞤵𞥅𞤼𞤢 𞤲𞤣𞤭𞤲⹁ 𞤫𞤲 𞤶𞤫𞤴𞤢𞥄𞤳𞤢 𞤳𞤢𞤣𞤭 𞤫 𞤥𞤢𞤴𞤪𞤭. 𞤇𞤫 𞤶𞤢𞤲𞤺𞤭𞤲𞤢𞥄 𞤱𞤮𞤲𞤣𞤫𞤥𞤢 𞤳𞤮 𞤫𞤲 𞤭𞤱𞤵𞤩𞤫 𞤳𞤢 𞤱𞤮𞤯𞥆𞤭 (𞤦𞤮𞥅 𞤴𞤮𞤪𞤮 𞤶𞤢𞤲). 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤱𞤮𞥅 𞤳𞤮 𞤲𞤫𞥅𞤩𞤢 𞤥𞤢𞥄 𞤴𞤢𞥄𞤱𞤢⹁ 𞤫𞤲 𞤴𞤢𞤤𞤼𞤢𞤴 𞤥𞤢𞤤𞥆𞤢 𞤫𞤲 𞤴𞤢𞤤𞤼𞤭𞤲𞤼𞤫 𞤲𞤣𞤫𞤪 𞤊𞤵𞥅𞤼𞤢𞥄𞤪𞤭 𞤲𞤣𞤭𞤲⹁ 𞤩𞤫 𞤸𞤫𞤩𞤼𞤢 𞤲𞤣𞤭.

𞤔𞤮𞥅𞤲𞤭 𞤲𞤮 𞤴𞤢𞤤𞤼𞤵𞤣𞤫 𞤫 𞤳𞤵𞤲𞤣𞤵𞤤𞤫 𞤴𞤮𞤺𞤢 𞤫 𞤶𞤢𞤲𞤺𞤵𞤩𞤫 𞤥𞤫𞤫𞤲⹁ 𞤧𞤫𞤥𞤦𞤭𞤲𞤮𞥅𞤩𞤫 𞤯𞤫𞤲 𞤨𞤫𞤲𞤢𞥄𞤤𞤫. 𞤇𞤢𞤴𞤼𞤭 𞤫𞤯𞤫𞤲 𞤱𞤢𞤯𞤭 𞤱𞤢 𞤧𞤭 𞤳𞤮 𞤫𞤲𞤫𞤲 𞤼𞤢𞤲 𞤬𞤵𞤯𞥆𞤭 𞤶𞤢𞤲𞤺𞤵𞤣𞤫 𞤬𞤢𞤸𞤥𞤢. 𞤅𞤭 𞤴𞤭𞤥𞤩𞤫 𞤯𞤭𞤴𞤢 𞤪𞤫𞤲𞤣𞤮𞥅𞤶𞤭 𞤲𞤮 𞤶𞤢𞤲𞤺𞤵𞤣𞤫 𞤬𞤭𞥅 𞤲𞤮 𞤧𞤫𞤥𞤦𞤭𞤲𞤭𞤪𞤢 𞤸𞤮𞥅𞤪𞤫 𞤥𞤵𞤵𞤲⹁ 𞤳𞤫𞤲𞤫𞤲 𞤩𞤫 𞤢𞥄𞤥𞤢𞤼𞤢𞥄 𞤸𞤢𞤴 𞤱𞤢𞤴𞤤𞤵𞤺𞤮𞤤 𞤨𞤫𞤰𞥆𞤭 𞤥𞤢𞤩𞥆𞤫 𞤯𞤭𞤲 𞤬𞤭𞥅 𞤲𞤮 𞤩𞤫 𞤥𞤢𞤱𞤲𞤭𞤲𞤭𞤪𞤢 𞤤𞤢𞥄𞤱𞤭 𞤫 𞤨𞤭𞤲𞤫 𞤥𞤢𞤩𞥆𞤫.

𞤉𞤲𞤫𞤲 𞤳𞤢𞤲⹁ 𞤴𞤮𞤺𞤢 𞤫 𞤴𞤭𞤥𞤩𞤫 𞤥𞤫𞤫𞤲⹁ 𞤳𞤮 𞤴𞤮 𞤶𞤢𞤲𞤺𞤵 𞤲𞤮 𞤢𞤴𞤦𞤭𞤲𞤭𞤪𞤢 𞤫𞤲⹁ 𞤶𞤢𞤤𞤳𞤭𞤼𞤢 𞤨𞤭𞤲𞤫 𞤥𞤫𞤫𞤲⹁ 𞤳𞤮𞤴𞤬𞤭𞤼𞤢 𞤥𞤢𞤱𞤩𞤫 𞤫 𞤳𞤢𞤤𞤢 𞤳𞤮 𞤼𞤢𞤱𞤵𞤲𞤮𞥅 𞤲𞤮 𞤧𞤫𞤥𞤦𞤭𞤲𞤭 𞤫𞤲. 𞤉𞤲𞤫𞤲 𞤳𞤢𞤲⹁ 𞤥𞤮 𞤥𞤫𞤫𞤲 𞤮𞤲 𞤧𞤭 𞤶𞤢𞤲𞤺𞤭𞥅⹁ 𞤳𞤮 𞤭𞤱𞤣𞤭 𞤥𞤢𞤳𞥆𞤮 𞤲𞤣𞤭𞤲 𞤮 𞤢𞤣𞤮𞤼𞤮𞥅 𞤸𞤮𞤤𞥆𞤵𞤣𞤫 𞤺𞤢𞤲𞤣𞤢𞤤 𞤥𞤢𞤳𞥆𞤮 𞤲𞤺𞤢𞤤.

𞤍𞤫𞤥𞤺𞤢𞤤 𞤥𞤢𞤳𞥆𞤮⹁ 𞤮 𞤱𞤮𞤨𞥆𞤢. 𞤌 𞤯𞤵𞥅𞤪𞤮𞥅 𞤥𞤢𞤤𞥆𞤢 𞤮 𞤢𞤴𞤦𞤭𞤲𞤢 𞤣𞤭𞥅𞤲𞤢 𞤮𞤳𞥆𞤵𞤲𞤮𞥅𞤳𞤢 𞤫𞤲 𞤣𞤮𞥅𞤤𞤫 𞤫 𞤷𞤫𞤥𞤦𞤫 𞤸𞤢𞥄 𞤤𞤢𞥄𞤥𞤭 𞤯𞤫𞤲 𞤺𞤭𞤦𞤭 𞤸𞤭𞥅𞤪𞤲𞤢 𞤸𞤢𞥄 𞤷𞤢𞤳𞤢 𞤀𞤬𞤪𞤭𞤳. 𞤊𞤭𞥅 𞤮𞤥𞤮 𞤶𞤢𞤲𞤺𞤮𞤴𞤭 𞤶𞤵𞥅𞤯𞤫 𞤨𞤮𞤪𞤼𞤮 𞤥𞤢𞤤𞥆𞤢 𞤤𞤫𞤴𞤯𞤫 𞤢𞥄𞤪𞤢𞤦𞤵⹁ 𞤮 𞤢𞥄𞤥𞤢𞤼𞤢𞥄 𞤱𞤭𞤴𞤵𞤣𞤫 𞤳𞤢𞤤𞤢 𞤳𞤮 𞤥𞤢𞤱𞤩𞤫 𞤥𞤢𞤳𞥆𞤮 𞤶𞤮𞤳𞥆𞤵𞤲𞤮𞥅⹁ 𞤳𞤮 𞤬𞤫𞤲𞤢𞥄𞤲𞤣𞤫.

𞤀𞤲𞤣𞤢 𞤤𞤫⹁ 𞤳𞤮 𞤥𞤮 𞤼𞤭𞤨𞥆𞤭𞥅 𞤳𞤢 𞤼𞤭𞥅𞤯𞤭 𞤧𞤭 𞤮𞤲𞤼𞤭𞤺𞤭 𞤣𞤵𞤻𞤢 𞤳𞤮 𞤼𞤫𞤣𞥆𞤭. 𞤃𞤮 𞤲𞤮 𞤩𞤢𞥄𞤪𞤭𞥅 𞤳𞤢 𞤴𞤫𞤯𞥆𞤭⹁ 𞤱𞤮𞤲𞤢𞥄 𞤳𞤮 𞤱𞤭𞤬𞤭 𞤱𞤮𞥅⹁ 𞤪𞤵𞥅𞤴𞤭𞤲𞤼𞤢 𞤥𞤮. 𞤅𞤭 𞤫𞤲 𞤱𞤢𞤯𞤼𞤢𞤲𞤢𞥄𞤤𞤭 𞤸𞤭𞥅𞤤𞤢⹁ 𞤫𞤲 𞤸𞤫𞤪𞤧𞤢𞤴 𞤥𞤢𞤱𞤩𞤫 𞤥𞤫𞤫𞤲 𞤢𞤣𞤭𞤲𞤮𞥅𞤩𞤫 𞤫𞤲.

𞤖𞤢𞤲𞤣𞤫 𞤫𞤯𞤫𞤲 𞤶𞤵𞤪𞤮𞤪𞤫𞥅𞤣𞤫 𞤷𞤫𞤲𞤯𞤫 𞤬𞤮𞤨. 𞤍𞤫𞤥𞤺𞤢𞤤 𞤥𞤫𞤫𞤲 𞤲𞤮 𞤥𞤵𞤼𞤭𞤲𞤫𞥅𞤣𞤫⹁ 𞤶𞤢𞤱𞤤𞤫 𞤥𞤫𞤫𞤲 𞤲𞤮 𞤴𞤫𞥅𞤦𞤫𞥅𞤣𞤫⹁ 𞤴𞤭𞤥𞤩𞤫 𞤥𞤫𞤫𞤲 𞤲𞤮 𞤱𞤢𞤪𞤫𞥅𞤣𞤫 𞤥𞤢𞤤𞥆𞤢 𞤧𞤢𞤧𞤭𞤲𞤫𞥅 𞤫 𞤤𞤫𞤴𞤯𞤫 𞤯𞤵𞥅𞤯𞤵𞤯𞤫. 𞤍𞤮𞥅 𞤴𞤮 𞤶𞤢𞤲𞤺𞤵𞤩𞤫 𞤫 𞤱𞤢𞥄𞤱𞤵𞤩𞤫 𞤩𞤫𞤲 𞤭𞤥𞥆𞤮 𞤣𞤢𞤪𞤮𞥅 𞤬𞤭𞥅 𞤲𞤮 𞤬𞤢𞥄𞤦𞤮𞤪𞤢 𞤫𞤲⹁ 𞤳𞤮 𞤳𞤢 𞤆𞤵𞤤𞥆𞤮 𞤤𞤮𞤭𞤲𞤼𞤫𞥅 𞤼𞤢𞤲 𞤴𞤭𞤢𞤼𞤢𞥄 𞤩𞤫. 𞤖𞤢𞤴 𞤧𞤭 𞤩𞤫 𞤪𞤫𞤲𞤣𞤭𞥅 𞤬𞤭𞥅 𞤆𞤵𞤤𞤢𞥄𞤳𞤵 𞤥𞤢𞥄 𞤧𞤭 𞤢 𞤴𞤢𞤸𞤭𞥅 𞤳𞤢 𞤺𞤮𞤤𞥆𞤫 𞤥𞤢𞤩𞥆𞤫⹁ 𞤢 𞤼𞤢𞤱𞤢𞤼𞤢𞥄 𞤸𞤭𞤩𞤫 𞤸𞤢𞥄𞤤𞤢 𞤆𞤵𞤤𞤢𞤪.

𞤅𞤭 𞤮𞤲 𞤲𞤢𞤲𞤭𞥅 𞤺𞤮𞥅𞤯𞥆𞤮 𞤲𞤮 𞤴𞤢𞤤𞤼𞤢 𞤱𞤭𞤴𞤢 𞤳𞤮 𞤤𞤫𞤻𞤮𞤤 𞤳𞤢𞥄𞤪𞤭𞤱𞤮𞤤 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤲𞤣𞤫𞤪 𞤤𞤫𞤧𞤣𞤭 𞤘𞤭𞤲𞤫 𞤲𞤣𞤭𞤲⹁ 𞤢𞤲𞤣𞤫𞥅 𞤮𞤲𞤼𞤭𞤺𞤭 𞤬𞤢𞥄𞤤𞤢 𞤴𞤢𞤤𞤼𞤭𞤲𞤣𞤫 𞤴𞤮𞤺𞤢 𞤫 𞤊𞤵𞤤𞤩𞤫 𞤺𞤮𞥅 𞤲𞤣𞤫𞤪 𞤆𞤵𞤤𞤢𞥄𞤳𞤵 𞤲𞤺𞤵𞤲. 𞤅𞤭 𞤱𞤮𞤲𞤢𞥄 𞤯𞤵𞤥⹁ 𞤸𞤢𞤴 𞤤𞤭𞤥𞤼𞤮 𞤲𞤺𞤮 𞤤𞤢𞥄𞤥𞤵 𞤬𞤮𞤤𞥆𞤢𞥄𞤲𞤺𞤵 𞤲𞤺𞤵𞤲 𞤱𞤢𞤯𞤵𞤲𞤮𞥅⹁ 𞤸𞤮𞤤𞥆𞤵𞤲𞤮 𞤫 𞤢𞤻𞤭 𞤥𞤢𞤩𞥆𞤫 𞤱𞤮𞤲𞤣𞤫 𞤳𞤮 𞤊𞤵𞤤𞤩𞤫 𞤩𞤫𞤲 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤘𞤭𞤲𞤫. 𞤔𞤮𞥅𞤲𞤭 𞤲𞤮𞤲⹁ 𞤢𞤲 𞤱𞤭𞤴𞤢𞥄𞤯𞤮 𞤮𞤲 𞤳𞤮 𞤢 𞤆𞤵𞤤𞥆𞤮 𞤺𞤢𞤲𞤣𞤮⹁ 𞤰𞤫𞤤𞥆𞤭𞤼𞤭𞥅𞤯𞤮 𞤫 𞤺𞤢𞤲𞤣𞤢𞤤 𞤸𞤢𞥄 𞤁𞤮𞤬𞤼𞤮𞤴𞤭𞥅⹁ 𞤢𞤯𞤢 𞤴𞤢𞤤𞤼𞤵𞤣𞤫 𞤱𞤭𞤴𞤢𞥄 𞤱𞤮𞤲𞤣𞤫𞤥𞤢 𞤯𞤵𞤥 𞤱𞤮𞤲𞤢𞥄 𞤺𞤮𞥅𞤲𞤺𞤢. 𞤖𞤮𞤤 𞤳𞤮 𞤬𞤢𞥄𞤤𞤢𞤲𞤢𞤯𞤢𞥄 𞤊𞤵𞤤𞤩𞤫 𞤩𞤫𞤲 𞤧𞤭 𞤱𞤮𞤲𞤢𞥄 𞤶𞤢𞤹𞤧𞤭𞤲𞤺𞤮𞤤 𞤩𞤫؟

𞤊𞤭𞥅 𞤳𞤢𞤤𞤢 𞤤𞤭𞤥𞤼𞤮 𞤤𞤢𞥄𞤥𞤵 𞤘𞤭𞤲𞤫 𞤳𞤭𞤯𞤲𞤺𞤵 𞤲𞤺𞤵𞤲 𞤲𞤮 𞤸𞤮𞤤𞥆𞤵𞤲𞤮𞥅 𞤳𞤮 𞤆𞤵𞤤𞤢𞤪 𞤩𞤵𞤪𞤢𞥄 𞤸𞤢𞥄𞤤𞤫𞥅𞤣𞤫 𞤫 𞤤𞤫𞤴𞤣𞤭 𞤲𞤣𞤭𞤲⹁ 𞤳𞤮 𞤺𞤢𞤲𞤣𞤮 𞤆𞤵𞤤𞥆𞤮 𞤺𞤮𞥅𞤼𞤮 𞤴𞤢𞤤𞤼𞤵𞤲𞤮𞥅 𞤱𞤭𞤴𞤭 𞤱𞤮𞤲𞤣𞤫𞤥𞤢 𞤫 𞤱𞤭𞤯𞤼𞤮 𞤥𞤢𞤳𞥆𞤮 𞤲𞤺𞤮𞤲⹁ 𞤳𞤮 𞤅𞤮𞥅𞤧𞤮𞥅𞤪𞤫 𞤲𞤣𞤫𞤲 𞤩𞤵𞤪𞤢𞥄 𞤸𞤢𞥄𞤤𞤫𞥅𞤣𞤫⹁ 𞤮 𞤸𞤭𞤳𞥆𞤭𞤲𞤭 𞤫 𞤥𞤢𞤴𞤪𞤫 𞤃𞤢𞤲𞤭𞤲𞤳𞤢𞥄𞤪𞤫 𞤲𞤣𞤫𞤲. 𞤌 𞤱𞤢𞤯𞤭 𞤆𞤵𞤤𞤢𞤪 𞤲𞤺𞤢𞤤 𞤼𞤢𞤼𞤢𞤩𞤢𞤤 𞤫 𞤲𞤣𞤫𞤪 𞤘𞤭𞤲𞤫. 𞤖𞤮𞤤 𞤳𞤮 𞤱𞤮𞤲𞤭 𞤲𞤢𞤬𞤢 𞤲𞤺𞤢𞥄𞤤 𞤺𞤢𞤲𞤣𞤢𞤤؟ 𞤺𞤢𞤲𞤣𞤢𞤤 𞤸𞤢𞤴𞤬𞤭𞤲𞤭𞤪𞤲𞤺𞤢𞤤 𞤪𞤫𞤲𞤣𞤮!

𞤔𞤢𞤲𞤺𞤵𞤺𞤮𞤤 𞤼𞤢𞤲 𞤩𞤢𞥄𞤱𞤮 𞤷𞤢𞥄𞤸𞤵 𞤫 𞤨𞤭𞤲𞤢𞤤 𞤴𞤮𞤲𞤢𞤼𞤢𞥄. 𞤃𞤮 𞤶𞤢𞤲𞤺𞤭𞥅⹁ 𞤲𞤮 𞤸𞤢𞥄𞤲𞤭 𞤢𞤲𞤣𞤵𞤣𞤫 𞤱𞤮𞤲𞤢𞥄 𞤸𞤮𞥅𞤪𞤫 𞤥𞤢𞤳𞥆𞤮 𞤼𞤢𞤲 𞤮 𞤶𞤢𞤲𞤺𞤢𞤲𞤭. 𞤑𞤢𞤤𞤢 𞤳𞤮 𞤮 𞤸𞤵𞥅𞤱𞤢𞤼𞤢⹁ 𞤮𞤥𞤮 𞤸𞤢𞥄𞤲𞤭 𞤢𞤪𞤣𞤭𞤲𞤣𞤫 𞤲𞤢𞤬𞤮𞥅𞤪𞤫 𞤪𞤫𞤲𞤣𞤮 𞤥𞤢𞤳𞥆𞤮 𞤫 𞤤𞤫𞤴𞤣𞤭 𞤥𞤢𞤳𞥆𞤮.

𞤑𞤮𞤲𞤮⹁ 𞤳𞤮 𞤸𞤫𞥅𞤱𞤭 𞤫 𞤴𞤭𞤥𞤩𞤫 𞤥𞤫𞥅𞤯𞤫𞤲 𞤩𞤫𞤲⹁ 𞤳𞤮 𞤸𞤮𞥅𞤪𞤫 𞤥𞤢𞤩𞥆𞤫 𞤼𞤢𞤲⹁ 𞤩𞤫 𞤢𞥄𞤲𞤢𞤲𞤭. 𞤑𞤮 𞤯𞤵𞤥 𞤱𞤢𞤯𞤭 𞤴𞤮𞤺𞤢 𞤫 𞤶𞤢𞤲𞤺𞤵𞤩𞤫 𞤥𞤫𞤫𞤲 𞤩𞤫𞤲 𞤲𞤮 𞤣𞤵𞤽𞤭𞥅 𞤴𞤫𞥅𞤴𞤵𞤺𞤮𞤤 𞤲𞤣𞤭𞤥𞤵 𞤫 𞤪𞤫𞤲𞤣𞤮 𞤥𞤵𞥅𞤯𞤵𞤲 𞤬𞤭𞥅 𞤺𞤫𞤩𞤵𞤲. 𞤑𞤫𞤲𞤫𞤲⹁ 𞤩𞤫 𞤱𞤢𞤳𞥆𞤭𞤤𞤮𞤼𞤮 𞤸𞤢𞤴 𞤱𞤢𞤯𞤫𞥅𞤣𞤫 𞤧𞤢𞤱𞤪𞤵 𞤥𞤢𞤤𞥆𞤢 𞤤𞤮𞤴𞤪𞤵 𞤳𞤮 𞤴𞤭𞤥𞤩𞤫 𞤥𞤢𞤩𞥆𞤫 𞤩𞤫𞤲 𞤨𞤭𞤴𞤭𞤪𞤫𞥅.

𞤅𞤭 𞤫 𞤴𞤭𞤭𞥅 𞤊𞤵𞥅𞤼𞤢 𞤧𞤢𞥄𞤤𞤭𞥅 𞤸𞤢𞤲𞤣𞤫 𞤸𞤮𞥅𞤪𞤫 𞤫𞤯𞤫𞤲 𞤥𞤢𞤪𞤭 𞤯𞤫 𞤢𞤤𞤯𞤵𞤩𞤫 𞤫 𞤶𞤢𞤲𞤺𞤵𞤩𞤫⹁ 𞤳𞤮 𞤼𞤢𞤱𞤵𞤣𞤫 𞤫𞤲 𞤢𞤤𞤢𞥄 𞤸𞤭𞤳𞥆𞤭𞤲𞤣𞤫 𞤴𞤫𞥅𞤧𞤮 𞤳𞤮 𞤲𞤢𞤬𞤢𞤼𞤢 𞤪𞤫𞤲𞤣𞤮 𞤲𞤺𞤮𞤲 𞤬𞤮𞤨.

𞤀𞤲𞤣𞤫𞤲 𞤤𞤫⹁ 𞤧𞤭 𞤧𞤵𞤳𞤢𞥄𞤩𞤫 𞤩𞤫𞤲 𞤬𞤮𞤨 𞤴𞤢𞤤𞤼𞤭𞥅⹁ 𞤸𞤫𞤣𞥆𞤭𞤳𞤫 𞤥𞤢𞤱𞤩𞤫 𞤩𞤫𞤲 𞤼𞤵𞤲⹁ 𞤻𞤢𞤤𞤲𞤣𞤫 𞤩𞤫𞤲 𞤬𞤫𞤰𞥆𞤭 𞤱𞤮𞥅⹁ 𞤴𞤫𞤤𞤢 𞤢𞤴𞤩𞤫 𞤩𞤫𞤲 𞤤𞤢𞥄𞤼𞤮𞤼𞤮. 𞤑𞤮 𞤯𞤵𞤲 𞤱𞤮𞤲𞤭 𞤫𞤲 𞤱𞤮𞤲𞤼𞤢𞤴 𞤱𞤢𞥄𞤱𞤢𞥄𞤩𞤫 𞤫 𞤸𞤮𞤩𞥆𞤫.

𞤉𞤯𞤫𞤲 𞤸𞤢𞥄𞤲𞤭 𞤢𞤪𞤣𞤭𞤲𞤣𞤫 𞤸𞤢𞤳𞥆𞤭𞤤⹁ 𞤸𞤵𞥅𞤱𞤼𞤮𞤪𞤫𞤲 𞤲𞤺𞤫𞥅𞤼𞤵 𞤲𞤺𞤵 𞤘𞤫𞤲𞤮 𞤴𞤫𞤯𞤭 𞤫𞤲 𞤲𞤺𞤵𞤲. 𞤏𞤮𞤼𞤢 𞤫𞤲 𞤱𞤮𞤲𞤵 𞤴𞤭𞥅𞤤𞤢𞤲𞤢𞤴𞤩𞤫 𞤤𞤢𞥄𞤥𞤩𞤫 𞤫 𞤢𞤤𞤯𞤵𞤩𞤫 𞤨𞤢𞤯𞤫. 𞤉𞤲𞤫𞤲 𞤳𞤢𞤣𞤭 𞤱𞤢𞤳𞥆𞤭𞤤𞤮𞤯𞤫𞤲 𞤲𞤢𞤲𞤣𞤫𞤲 𞤫 𞤥𞤢𞥄𞤥𞤭𞤪𞤢𞥄𞤩𞤫 𞤥𞤫𞥅𞤯𞤫𞤲. 𞤀𞤪𞤣𞤭𞤲𞤫𞤲 𞤲𞤣𞤭𞤥𞤵 𞤥𞤫𞥅𞤯𞤫𞤲 𞤫 𞤲𞤢𞤬𞤮𞥅𞤪𞤫 𞤪𞤫𞤲𞤣𞤮 𞤲𞤺𞤮𞤲.

𞤁𞤮𞥅𞤤𞤲𞤮𞤪𞤫𞤲 𞤯𞤫𞤥𞤺𞤢𞤤 𞤫 𞤨𞤭𞤲𞤫 𞤥𞤫𞥅𞤯𞤫𞤲. 𞤑𞤮 𞤯𞤫𞤲𞤺𞤢𞤤 𞤱𞤮𞤲𞤭 𞤱𞤮𞤲𞤳𞤭 𞤤𞤫𞤻𞤮𞤤. 𞤏𞤭𞤴𞤵𞤺𞤮𞤤 𞤫𞤯𞤫𞤲 𞤯𞤵𞥅𞤯𞤭⹁ 𞤫𞤯𞤫𞤲 𞤢𞤤𞤯𞤭⹁ 𞤫𞤯𞤫𞤲 𞤶𞤢𞤲𞤺𞤭⹁ 𞤯𞤵𞤥 𞤲𞤢𞤬𞤢𞤼𞤢𞥄 𞤧𞤭 𞤼𞤢𞤱𞤭𞥅 𞤸𞤵𞥅𞤱𞤼𞤮𞤪𞤢𞥄𞤳𞤢 𞤫 𞤱𞤢𞤤𞥆𞤵𞤺𞤮𞤤 𞤪𞤫𞤲𞤣𞤮 𞤲𞤺𞤮𞤲.

𞤃𞤭𞤲 𞤣𞤮𞥅 𞤳𞤮 𞤥𞤭 𞤆𞤵𞤤𞥆𞤮⹁ 𞤀𞤬𞤪𞤭𞤳𞤲𞤢𞥄𞤶𞤮 𞤶𞤵𞥅𞤤𞤯𞤮. 𞤑𞤢𞤤𞤢 𞤳𞤮 𞤥𞤵𞥅𞤧𞤭 𞤆𞤵𞤤𞥆𞤮⹁ 𞤥𞤵𞥅𞤧𞤢𞤴 𞤤𞤢𞤥. 𞤑𞤢𞤤𞤢 𞤳𞤮 𞤥𞤵𞥅𞤧𞤭 𞤩𞤢𞤤𞤫𞥅𞤶𞤮⹁ 𞤥𞤵𞥅𞤧𞤢𞤴 𞤤𞤢𞤥. 𞤑𞤢𞤤𞤢 𞤳𞤮 𞤼𞤢𞤥𞤨𞤭𞤲𞤼𞤢 𞤤𞤫𞤻𞤮𞤤 𞤢𞤥⹁ 𞤥𞤭 𞤱𞤮𞤲𞤢𞤲𞤼𞤢𞥄 𞤯𞤵𞤥 𞤸𞤢𞤴 𞤧𞤭 𞤲𞤢𞤬𞤮𞥅𞤪𞤫 𞤢𞤥 𞤲𞤮 𞤫 𞤥𞤵𞤵𞤲. 𞤒𞤭𞤯𞤢𞤲𞤺𞤮𞤤 𞤪𞤫𞤲𞤣𞤮 𞤥𞤵𞤵𞤲⹁ 𞤱𞤮𞤲𞤢𞥄 𞤢𞤻𞤢𞤲𞤺𞤮𞤤 𞤸𞤢𞤴 𞤺𞤮𞥅𞤼𞤮.
𞤑𞤢𞤤𞤢 𞤶𞤢𞤤𞤢𞤲𞤢𞤴𞤯𞤮 𞤺𞤢𞤻𞤮 𞤪𞤫𞤲𞤣𞤮⹁ 𞤥𞤭 𞤸𞤮𞥅𞤤𞤮𞤼𞤢𞥄𞤳𞤮 𞤮𞤲.

𞤀𞤦𞤣𞤵𞤤𞥆𞤢𞥄𞤸𞤭 𞤶 𞤄𞤢𞤪𞤭