𞤃𞤓𞤖𞤀𞤃𞥆𞤀𞤁𞤓 𞤒𞤓𞥅𞤅𞤓𞤊𞤓 𞤃𞤀𞥄𞤏𞤀𞤐𞤀𞥄𞤂𞤋 𞤀𞤂𞤊𞤀𞥄 𞤑𞤌𞤐𞤁𞤉

𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵⹁ 𞤸𞤮𞥅𞤪𞤫𞥅𞤶𞤮 𞤐𞤭𞥅𞤶𞤫𞤪 𞤢𞤷𞥆𞤵𞤼𞤵𞤯𞤮 𞤮𞤲⹁ 𞤼𞤢𞤳𞥆𞤢𞤲𞤢𞥄𞤳𞤭 𞤀𞤤𞤬𞤢𞥄 𞤑𞤮𞤲𞤣𞤫.

𞤉 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤸𞤮𞥅𞤪𞤫 𞤳𞤭𞤦𞤭𞤪𞤺𞤢𞤤 𞤐𞤭𞥅𞤶𞤫𞤪 𞤫 𞤃𞤢𞤱𞤲𞤣𞤫 𞤻𞤢𞤤𞤲𞤣𞤫 𞥒𞥓 𞤅𞤫𞥅𞤯𞤼𞤮⹁ 𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤮 𞤸𞤵𞤼𞤭𞤳𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤸𞤮𞥅𞤪𞤫𞥅𞤶𞤮 𞤘𞤭𞤲𞤫 𞤮𞤲⹁ 𞤧𞤢𞤦𞤵 𞤤𞤵𞤲𞤣𞤢𞤺𞤮𞤤 𞤬𞤮𞤣𞤮𞥅𞤪𞤫 𞤫 𞤷𞤢𞤼𞤢𞤺𞤮𞤤 𞤫 𞤤𞤢𞥄𞤥𞤵 𞤫 𞤸𞤮𞥅𞤪𞤫 𞤢𞤻𞤭 𞤴𞤭𞤥𞤩𞤫 𞤤𞤫𞤴𞤣𞤭 𞤥𞤢𞤳𞥆𞤮 𞤲𞤣𞤭𞤲.

𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵 𞤱𞤭𞤭 : “𞤃𞤭 𞤽𞤢𞤤𞤯𞤭𞥅⹁ 𞤱𞤢𞤲𞤮 𞤺𞤮𞤪𞤫𞥅𞤩𞤫 𞤢𞤥𞤫𞤲⹁ 𞤩𞤫 𞤥𞤫𞤲 𞤸𞤢𞤩𞤭𞤣𞤭 𞤬𞤭𞥅 𞤣𞤫𞤥𞤮𞤳𞤢𞤪𞤢𞥄𞤳𞤵 𞤽𞤢𞤤𞤯𞤭𞤪𞤭. 𞤅𞤢𞤦𞤮 𞤳𞤮 𞤥𞤫𞤲 𞤱𞤢𞤯𞤭 𞤳𞤮𞤲 𞤬𞤮𞤨 𞤬𞤭𞥅 𞤲𞤢𞥄𞤣𞤵𞤺𞤮𞤤 𞤣𞤫𞤥𞤮𞤳𞤢𞤪𞤢𞥄𞤳𞤵⹁ 𞤳𞤢𞤻𞤵𞤲 𞤫 𞤤𞤢𞥄𞤥𞤵 𞤧𞤢𞤪𞤭𞤴𞤢 𞤲𞤣𞤫𞤪 𞤀𞤬𞤪𞤭𞤳𞤢𞥄⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤲𞤮 𞤸𞤢𞥄𞤲𞤵𞤲𞤮 𞤶𞤮𞤲𞥆𞤵𞤼𞤵𞤺𞤮𞤤 𞤤𞤢𞥄𞤥𞤵 𞤲𞤺𞤵𞤲⹁ 𞤮 𞤴𞤢𞤤𞤼𞤭𞤣𞤢 𞤫 𞤼𞤫𞤣𞥆𞤵𞤲𞥋𞤺𞤢𞤤. 𞤑𞤮𞤲𞤮 𞤮 𞤴𞤫𞤶𞥆𞤭𞤼𞤭𞥅 𞤬𞤮𞥅𞤣𞤮𞥅𞤶𞤫 𞤥𞤢𞤳𞥆𞤮 𞤯𞤫𞤲 𞤬𞤮𞤨 𞤯𞤫 𞤮 𞤬𞤮𞤣𞤵𞤲𞤮𞥅 𞤬𞤫𞤱𞤲𞤣𞤮 𞤮 𞤱𞤮𞤲𞤵𞤲𞤮𞥅 𞤧𞤵𞤳𞤢. 𞤍𞤵𞤥 𞤲𞤮 𞤦𞤮𞤲𞤢𞤲𞤭 𞤥𞤮⹁ 𞤦𞤮𞤲𞤢𞤲𞤭 𞤘𞤭𞤲𞤫⹁ 𞤦𞤮𞤲𞤢𞤲𞤭 𞤳𞤢𞤣𞤭 𞤻𞤭𞥅𞤩𞤲𞤵𞤺𞤮𞤤 𞤣𞤫𞤥𞤮𞤳𞤢𞤪𞤢𞥄𞤳𞤵 𞤲𞤺𞤵𞤲 𞤲𞤣𞤫𞤪 𞤀𞤬𞤪𞤭𞤳𞤢𞥄.

𞤳𞤮 𞤫 𞤅𞤭𞥅𞤤𞤮 𞥒𞥐𞥑𞥙⹁ 𞤥𞤫𞤲 𞤱𞤢𞤴𞤪𞤭 𞤴𞤫𞤱𞤼𞤵𞤣𞤫. 𞤌𞤲𞤼𞤵𞤥𞤢 𞤥𞤭 𞤲𞤮𞤣𞥆𞤵𞤲𞤮 𞤥𞤮⹁ 𞤥𞤭 𞤱𞤭𞤭 𞤥𞤮 𞤴𞤮 𞤮 𞤸𞤫𞤯𞤭𞤼𞤮 𞤴𞤭𞤥𞤩𞤫 𞤤𞤫𞤴𞤣𞤭 𞤥𞤢𞤳𞥆𞤮 𞤲𞤣𞤭𞤲⹁ 𞤴𞤮 𞤮 𞤴𞤫𞤯𞤵 𞤤𞤫𞤴𞤣𞤭 𞤥𞤢𞤳𞥆𞤮 𞤲𞤣𞤭𞤲 𞤥𞤮𞤰𞥆𞤫𞤪𞤫⹁ 𞤮 𞤱𞤮𞤲𞤢 𞤻𞤫𞤥𞤼𞤭𞤲𞤼𞤫𞥅𞤯𞤮 𞤫 𞤲𞤶𞤮𞤪𞤲𞤣𞤭 𞤀𞤬𞤪𞤭𞤳𞤢𞥄 𞤲𞤣𞤭𞤲. 𞤑𞤮𞤲𞤮 𞤲𞤮 𞤮 𞤶𞤢𞥄𞤦𞤮𞤪𞤭 𞤲𞤮𞤲 𞤽𞤢𞤤𞤯𞤭𞤲𞤭 𞤤𞤢𞤲. 𞤌 𞤼𞤭𞤳𞥆𞤭 𞤬𞤮𞤼𞤢⹁ 𞤮 𞤱𞤭𞤭 𞤳𞤢𞤲𞤳𞤮 𞤮𞤥𞤮 𞤬𞤢𞥄𞤥𞤮𞤼𞤭𞤪𞤭 𞤫 𞤴𞤭𞤥𞤩𞤫 𞤥𞤢𞤳𞥆𞤮 𞤩𞤫𞤲⹁ 𞤫𞤩𞤫 𞤲𞤮 𞤱𞤮𞤲𞤢𞤲𞤭 𞤥𞤮. 𞤌 𞤱𞤭𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢: “𞤇𞤫𞥅 𞤧𞤵𞤳𞤢𞥄𞤩𞤫 𞤱𞤮𞤲𞤵𞤩𞤫 𞤴𞤢𞤤𞤼𞤵𞤣𞤫 𞤳𞤢 𞤤𞤢𞥄𞤱𞤭⹁ 𞤳𞤮 𞤱𞤫𞤥𞤦𞤭𞥅𞤩𞤫⹁ 𞤸𞤢𞥄𞤪𞤵𞤩𞤫 𞤻𞤮𞥅𞤺𞤫⹁ 𞤩𞤫 𞤣𞤢𞤱𞤪𞤮𞥅𞤩𞤫 𞤦𞤮𞤲𞤩𞤫 𞤩𞤫𞤲 𞤱𞤮𞤲𞤭 𞤫 𞤯𞤢𞥄𞤴𞤲𞤵𞤣𞤫.”

𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵 𞤳𞤢𞤻𞤵𞤲 𞤱𞤢𞤪𞤶𞤮𞤪𞤢𞥄𞤥𞤢 𞤐𞤦𞤢𞤪𞤶𞤢𞥄𞤪𞤭 𞤋𞤦𞤪𞤢𞥄𞤸𞤭𞥅𞤥𞤢 𞤬𞤭𞥅 𞤑𞤮𞥅𞤸𞤢𞥄𞤳𞤵 𞤲𞤣𞤭 𞤁𞤵𞤦𞤵𞤲𞤫 𞤔𞤮𞤱𞤭 𞤣𞤮𞤤𞤢 ($𞥕 𞤥𞤭𞤤𞤭𞤴𞤮𞤲) 𞤧𞤢𞤦𞤵 𞤻𞤭𞥅𞤩𞤲𞤵𞤺𞤮𞤤 𞤁𞤮𞤧𞤼𞤫𞤪𞤫 𞤐𞤭𞥅𞤶𞤫𞤪 𞤲𞤣𞤫𞤲⹁ 𞤫 𞤶𞤮𞤺𞤲𞤭𞤼𞤵𞤺𞤮𞤤 𞤤𞤢𞥄𞤥𞤵 𞤲𞤺𞤵𞤲 𞤲𞤣𞤫 𞤸𞤢𞤨𞥆𞤵 𞤥𞤢𞤳𞥆𞤮 𞤲𞤺𞤵𞤲 𞤼𞤭𞤥𞥆𞤵𞤲𞤮𞥅. 𞤌 𞤱𞤢𞤪𞤶𞤮𞤪𞤢𞥄 𞤳𞤢𞤣𞤭 𞤧𞤢𞤦𞤵 𞤼𞤭𞥅𞤯𞤲𞤢𞥄𞤪𞤫 𞤥𞤢𞤳𞥆𞤮 𞤫 𞤩𞤢𞤲𞤼𞤵𞤺𞤮𞤤 𞤤𞤫𞤴𞤣𞤭 𞤥𞤢𞤳𞥆𞤮 𞤲𞤣𞤭𞤲.

𞤊𞤫𞤱𞤲𞤣𞤮 𞤮 𞤢𞤪𞤢𞤴𞤲𞤮𞥅 𞤳𞤢 𞤤𞤢𞥄𞤥𞤵⹁ 𞤸𞤢𞤪𞤭 𞤐𞤭𞥅𞤶𞤫𞤪 𞤳𞤮 𞤫𞤥𞤦𞤫𞤪𞤫 𞤣𞤵𞤶𞤵𞤲𞤫 𞤶𞤫𞥅𞤲𞤢𞤴 𞤣𞤮𞤤𞤢 ($𞥙 𞤥𞤭𞤤𞤭𞤴𞤢𞤪) 𞤥𞤮𞤰𞥆𞤭𞤲𞤢𞤴𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫. 𞤑𞤮𞤲𞤮 𞤬𞤫𞤱𞤲𞤣𞤵 𞤮 𞤭𞤱𞤢𞤼𞤢 𞤳𞤢 𞤤𞤢𞥄𞤥𞤵⹁ 𞤸𞤢𞤪𞤭 𞤲𞤺𞤢𞤤𞤵 𞤐𞤭𞥅𞤶𞤫𞤪 𞤸𞤫𞤱𞤼𞤭𞥅 𞤣𞤵𞤶𞤵𞤲𞤫 𞤧𞤢𞤨𞥆𞤮-𞤫-𞤼𞤢𞤼𞤭 𞤣𞤮𞤤𞤢 𞤫 𞤲𞤣𞤫𞤪 𞤸𞤭𞤼𞤢𞥄𞤲𞤣𞤫. 𞤌 𞤧𞤫𞥅𞤳𞤭 𞤤𞤢𞥄𞤱𞤭 𞤯𞤵𞥅𞤯𞤵𞤯𞤭⹁ 𞤥𞤢𞥄𞤴𞤫𞥅𞤤𞤫 𞤬𞤢𞤴𞤩𞤫 𞤫 𞤩𞤫𞤴𞤩𞤫 𞤯𞤵𞤴𞤼𞤭𞥅⹁ 𞤦𞤢𞥄𞤧𞤢𞤤 𞤲𞤺𞤢𞤤 𞤯𞤵𞤴𞤼𞤭𞥅 𞤳𞤢𞤣𞤭 𞤫 𞤲𞤣𞤫𞤪 𞤤𞤫𞤴𞤣𞤭 𞤲𞤣𞤭𞤲.

𞤐𞤣𞤭𞥅 𞤐𞤦𞤢𞤪𞤶𞤢𞥄𞤪𞤭 𞤋𞤦𞤪𞤢𞥄𞤸𞤭𞤥𞤢 𞤊𞤭𞥅 𞤑𞤮𞥅𞤸𞤢𞥄𞤳𞤵⹁ 𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥗 𞤲𞤣𞤭 𞤧𞤭𞤲𞤷𞤢𞥄. 𞤐𞤣𞤭𞥅 𞤲𞤮 𞤸𞤫𞥅𞤪𞤼𞤭𞤲𞤢𞤲𞤢𞥄 𞤤𞤢𞥄𞤥𞤩𞤫 𞤸𞤫𞤲𞤣𞤮𞤪𞤩𞤫 𞤤𞤢𞥄𞤥𞤵 𞤣𞤫𞤥𞤮𞤳𞤢𞤪𞤢𞥄𞤳𞤵⹁ 𞤩𞤫 𞤶𞤢𞤩𞤭 𞤳𞤢𞤣𞤭 𞤭𞤱𞤵𞤣𞤫 𞤲𞤣𞤫 𞤸𞤢𞤨𞥆𞤵 𞤥𞤢𞤩𞥆𞤫 𞤲𞤺𞤵𞤲 𞤼𞤭𞤥𞥆𞤵𞤲𞤮𞥅⹁ 𞤩𞤫 𞤩𞤫𞤴𞤣𞤭 𞤳𞤢𞤣𞤭 𞤥𞤮𞤰𞥆𞤭𞤲𞤣𞤫 𞤲𞤮 𞤤𞤢𞥄𞤥𞤮𞤪𞤢𞥄 𞤲𞤮𞤲⹁ 𞤫 𞤲𞤮 𞤴𞤭𞤥𞤩𞤫 𞤩𞤫𞤲 𞤱𞤮𞤲𞤭𞤪𞤭 𞤫 𞤲𞤮 𞤩𞤫 𞤱𞤵𞥅𞤪𞤭𞤪𞤭.

𞤑𞤮 𞤉𞤤𞤫𞤲 𞤔𞤮𞤸𞤲𞤧𞤮𞤲⹁ 𞤤𞤢𞥄𞤼𞤭𞤲𞤮𞥅𞤯𞤮 𞤮𞤲 𞤸𞤮𞥅𞤪𞤫𞥅𞤶𞤮 𞤂𞤢𞤦𞤭𞤪𞤭𞤴𞤢𞥄 𞤧𞤢𞤳𞥆𞤭𞤼𞤭𞤲𞤮𞥅 𞤶𞤮𞤺𞤲𞤫𞥅𞤣𞤫 𞤲𞤣𞤭𞥅 𞤲𞤦𞤢𞤪𞤶𞤢𞥄𞤪𞤭. 𞤯𞤵𞤥 𞤳𞤮 𞤫 𞥒𞥐𞥑𞥗 𞤱𞤢𞤯𞤭. 𞤘𞤭𞤤𞤢 𞤮𞤲𞤼𞤵𞤥𞤢⹁ 𞤸𞤢𞤪𞤭 𞤸𞤫𞤩𞤢𞥄𞤳𞤭 𞤼𞤭𞤥𞥆𞤭𞤲𞤯𞤮 𞤧𞤢𞤪𞤼𞤭𞥅𞤶𞤭 𞤲𞤣𞤭𞥅 𞤲𞤦𞤢𞤪𞤶𞤢𞥄𞤪𞤭 𞤸𞤢𞥄 𞤲𞤣𞤫 𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵 𞤸𞤫𞤲𞤣𞤭𞤲𞤮𞥅 𞤲𞤣𞤭.

𞤑𞤢𞤲𞤳𞤮 𞤳𞤢𞤣𞤭⹁ 𞤮𞤥𞤮 𞤱𞤢𞥄𞤱𞤵𞤲𞤮𞥅 𞤷𞤢𞤼𞤮𞤪𞤣𞤫 𞤳𞤢 𞤤𞤢𞥄𞤥𞤵 𞤱𞤢𞤲𞤮 𞤀𞤤𞤬𞤢𞥄 𞤑𞤮𞤲𞤣𞤫⹁ 𞤀𞤤𞤢𞤧𞤢𞤲 𞤏𞤢𞤼𞤢𞤪𞤢 𞤫 𞤋𞤣𞤪𞤭𞤧 𞤁𞤫𞤦𞤭 𞤱𞤢𞤯𞤭𞤪𞤲𞤮𞥅 𞤲𞤮𞤲. 𞤑𞤮 𞤣𞤵𞥅𞤩𞤭 𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮 𞤮 𞤥𞤢𞤪𞤭⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤤𞤫 𞤲𞤮 𞤥𞤢𞤪𞤭 𞤣𞤵𞥅𞤩𞤭 𞤷𞤢𞤨𞥆𞤢𞤯𞤫 𞤶𞤫𞥅𞤼𞥆𞤢𞤼𞤭 𞤫 𞤼𞤢𞤼𞤭.

𞤊𞤭𞥅 𞤳𞤢𞤤𞤢 𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵 𞤲𞤮 𞤱𞤢𞥄𞤱𞤵𞤲𞤮 𞤷𞤢𞤼𞤢𞥄𞤣𞤫⹁ 𞤮 𞤱𞤭𞤭 𞤮 𞤤𞤵𞤲𞤣𞤮𞤼𞤢𞥄𞤳𞤮 𞤬𞤮𞤣𞤮𞥅𞤪𞤫 𞤥𞤢𞤳𞥆𞤮⹁ 𞤳𞤢𞤻𞤵𞤲 𞤫 𞤱𞤮𞤲𞤣𞤮𞥅𞤪𞤫 𞤲𞤣𞤫 𞤮 𞤰𞤫𞤼𞥆𞤭 𞤴𞤫𞥅𞤧𞤮 𞤪𞤫𞤲𞤣𞤮 𞤥𞤢𞤳𞥆𞤮 𞤲𞤺𞤮𞤲 𞤫 𞤴𞤫𞥅𞤧𞤮 𞤀𞤤𞤤𞤢. 𞤌 𞤱𞤭𞤵𞤲𞤮:

“𞤃𞤭𞤯𞤮 𞤼𞤫𞤣𞥆𞤭𞤲𞤭 𞤣𞤮𞤧𞤼𞤫𞤪𞤫 𞤲𞤣𞤫𞤲. 𞤃𞤭𞤯𞤮 𞤼𞤫𞤣𞥆𞤭𞤲𞤭 𞤬𞤮𞤣𞤮𞥅𞤪𞤫 𞤲𞤣𞤫 𞤥𞤭 𞤬𞤮𞤣𞤵𞤲𞤮𞥅 𞤲𞤣𞤫𞤲 𞤩𞤭𞤯𞤩𞤫 𞤐𞤭𞥅𞤶𞤫𞤪 𞤼𞤫𞤣𞥆𞤭𞤲𞤭𞤪𞤩𞤫 𞤤𞤢𞤲 𞤢𞤪𞤣𞤢𞤺𞤮𞤤 𞤫 𞤸𞤢𞤨𞥆𞤵𞥅𞤶𞤭 𞤯𞤭𞤯𞤭. 𞤐𞤣𞤫𞥅 𞤬𞤫𞥅𞤪𞤫 𞤲𞤮 𞤴𞤢𞤸𞤣𞤭 𞤫 𞤳𞤮 𞤥𞤭 𞤺𞤮𞤥𞤯𞤭𞤲𞤭 𞤳𞤮𞤲⹁ 𞤸𞤭𞤲𞥋𞤣𞤫 𞤴𞤢𞤸𞤣𞤭 𞤳𞤢𞤣𞤭 𞤫 𞤴𞤭𞤢𞤲𞤣𞤫 𞤢𞤲 𞤬𞤭𞥅 𞤲𞤮 𞤁𞤫𞤥𞤮𞤳𞤢𞤪𞤢𞥄𞤳𞤵 𞤸𞤢𞥄𞤲𞤭 𞤻𞤭𞥅𞤩𞤭𞤪𞤲𞤣𞤫 𞤐𞤭𞥅𞤶𞤫𞤪𞥋”