𞤅𞤉𞤂𞥆𞤓 𞤁𞤀𞤂𞤉𞤐 𞤁𞤓𞥅𞤇𞤋𞤚𞤋𞥅 𞥗𞥐
𞤑𞤮 𞤖𞤢𞤲𞤣𞤫 𞤫 𞤐𞤢𞥄𞤧𞤢𞥄𞤣𞤫⹁ 𞤻𞤢𞤤𞤲𞤣𞤫 𞥓 𞤕𞤮𞤤𞤼𞤮 𞥒𞥐𞥒𞥒 𞤼𞤭𞤥𞥆𞤭 𞤣𞤵𞥅𞤩𞤭 𞤷𞤢𞤨𞤢𞥄𞤲𞤯𞤫 𞤶𞤫𞥅𞤯𞤭𞤯𞤭 (𞥗𞥐) 𞤺𞤭𞤤𞤢 𞤶𞤭𞤦𞤭𞤲𞤢𞥄 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤁𞤢𞤤𞤫𞤲 𞤔𞤢𞤤𞥆𞤮⹁ 𞤸𞤮𞥅𞤪𞤫𞥅𞤶𞤮 𞤬𞤫𞤣𞥆𞤫 𞤆𞤮𞤼𞥆𞤢𞤤 𞤁𞤮𞥅𞤤𞤫 𞤁𞤫𞤥𞤮𞤳𞤢𞤪𞤢𞤲𞤳𞤮𞥅𞤶𞤫 𞤘𞤭𞤲𞤫 𞤯𞤫𞤲 (UFDG).
𞤑𞤮 𞤂𞤢𞤦𞤫 𞤮 𞤶𞤭𞤦𞤭𞤲𞤢𞥄⹁ 𞤳𞤮 𞤯𞤮𞤲 𞤳𞤢𞤣𞤭 𞤮 𞤬𞤵𞤯𞥆𞤭 𞤶𞤢𞤲𞤺𞤵𞤣𞤫. 𞤇𞤢𞥄𞤱𞤼𞤭 𞤯𞤵𞤥 𞤮 𞤼𞤭𞤥𞥆𞤭𞤲𞤮𞤴𞤭 𞤺𞤢𞤲𞤣𞤢𞤤 𞤳𞤢 𞤔𞤢𞥄𞤩𞤭 𞤖𞤢𞤼𞥆𞤭𞤪𞤣𞤫 𞤑𞤮𞤲𞤢𞥄𞤳𞤭𞤪𞤭 𞤫 𞤳𞤢 𞤔𞤢𞤲𞤺𞤭𞤪𞤣𞤫 𞤆𞤢𞤪𞤭 𞤬𞤭𞥅 𞤃𞤢𞤲𞤳𞤵𞤺𞤮𞤤 .
𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥖 𞤮 𞤬𞤵𞤯𞥆𞤭 𞤺𞤮𞤤𞥆𞤢𞤲𞤣𞤫 𞤺𞤮𞤥𞤲𞤢𞤼𞤫𞥅𞤪𞤭 𞤘𞤭𞤲𞤫 𞤲𞤣𞤭𞤲.𞤑𞤮 𞤲𞤣𞤢𞥄𞤪𞤼𞤮 𞤲𞤺𞤫𞤴𞤺𞤵 𞤮 𞤬𞤵𞤯𞥆𞤮𞤪𞤭. 𞤌 𞤰𞤢𞤱𞤭𞤪𞤭 𞤧𞤫𞥅𞤯𞤢 𞤧𞤫𞥅𞤯𞤢 𞤸𞤢𞤲 𞤮 𞤼𞤮𞤯𞥆𞤢𞥄 𞤫 𞤃𞤮𞤪𞤧𞤮 𞥑𞥙𞥙𞥖 𞤳𞤮 𞤤𞤢𞥄𞤼𞤮𞥅 𞤶𞤢𞥄𞤺𞤮𞤪𞤢𞥄𞤯𞤮 𞤮𞤲 𞤳𞤢 𞤀𞤣𞤮 𞤳𞤢 𞤶𞤢𞥄𞤺𞤮𞤪𞤢𞤤 𞤅𞤭𞤣𞤭𞤴𞤢 𞤚𞤵𞥅𞤪𞤫. 𞤖𞤭𞤼𞤢𞥄𞤲𞤣𞤫 𞤫 𞤧𞤫𞥅𞤯𞤢 𞤩𞤢𞥄𞤱𞤼𞤭 𞤯𞤵𞤥⹁ 𞤫 𞤒𞤢𞤪𞤳𞤮 𞥑𞥙𞥙𞥗⹁ 𞤮 𞤱𞤢𞤯𞤢𞥄 𞤶𞤢𞥄𞤺𞤮𞤪𞤢𞥄𞤯𞤮 𞤳𞤢 𞤥𞤢𞤸𞤮𞥅𞤣𞤭. 𞤑𞤮 𞤯𞤮𞤲 𞤮 𞤤𞤵𞤼𞥆𞤭𞥅 𞤸𞤢𞥄 𞤫 𞤁𞤵𞥅𞤶𞤮 𞥑𞥙𞥙𞥙⹁ 𞤮 𞤢𞤪𞤼𞤭𞤪𞤢𞥄 𞤳𞤢 𞤶𞤢𞥄𞤺𞤮𞤪𞤢𞤤 𞤬𞤭𞥅 𞤀𞤣𞤮⹁ 𞤮 𞤩𞤫𞤴𞤣𞤭𞤼𞤢𞤲𞤢𞥄 𞤸𞤮𞥅𞤪𞤫 𞤯𞤮𞤲 𞤘𞤮𞤤𞥆𞤫 𞤖𞤵𞥅𞤩𞤵𞤯𞤫 𞤸𞤢𞤬𞤢𞥄𞤯𞤫.
𞤑𞤮 𞤫 𞤲𞤺𞤢𞤤 𞤶𞤢𞥄𞤺𞤮𞤪𞤢𞤤 𞤮 𞤩𞤵𞤪𞤭 𞤲𞤫𞥅𞤩𞤵𞤣𞤫 𞤫 𞤥𞤵𞤵𞤲. 𞤁𞤵𞥅𞤩𞤭 𞤶𞤮𞤱𞤭 𞤼𞤭𞤥𞥆𞤵𞤯𞤭 𞤳𞤮 𞤳𞤢𞤲𞤳𞤮 𞤶𞤮𞤺𞤭𞥅 𞤲𞤺𞤢𞤤 𞤶𞤢𞥄𞤺𞤮𞤪𞤢𞤤. 𞤑𞤮 𞤯𞤮𞤲 𞤮 𞤭𞤱𞤭 𞤮 𞤱𞤢𞤯𞤢𞥄 𞤶𞤢𞥄𞤺𞤮𞤪𞤢𞥄𞤯𞤮 𞤮𞤲 𞤳𞤢 𞤴𞤵𞤲𞤺𞤮. 𞤑𞤮𞤲𞤮 𞤱𞤵𞤪𞤭𞤲 𞤮 𞤲𞤫𞥅𞤩𞤢𞥄𞤤𞤭 𞤯𞤮𞤲⹁ 𞤸𞤢𞤪𞤭 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫 𞤼𞤮𞤯𞥆𞤭𞤳𞤫 𞤥𞤮 𞤳𞤮 𞤢𞤪𞤣𞤮𞥅 𞤶𞤢𞥄𞤺𞤮𞤪𞤢𞤤 𞤺𞤭𞤲𞤫 𞤲𞤺𞤢𞤤 𞤻𞤢𞤤𞤲𞤣𞤫 𞥙 𞤄𞤮𞤱𞤼𞤮 𞥒𞥐𞥐𞥔.
𞤅𞤢𞤦𞤵 𞤨𞤮𞥅𞤯𞤮𞤲’𞤣𞤭𞤪𞤢𞤤 𞤸𞤢𞤳𞤵𞤲’𞤣𞤫 𞤥𞤢𞤳𞥆𞤮 𞤫 𞤊𞤮𞤣𞤫 𞤄𞤢𞤲𞤺𞤵𞤪𞤢 𞤫 𞤱𞤢𞤴𞤤𞤭𞤼𞤢𞤤 𞤲𞤺𞤢𞤤 𞤮 𞤫𞤩𞥆𞤵𞤲𞤮𞥅 𞤱𞤢𞤯𞤵𞤣𞤫 𞤳𞤢 𞤶𞤢𞥄𞤺𞤮𞤪𞤢𞤤⹁ 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫 𞤭𞤼𞥆𞤭 𞤥𞤮 𞤳𞤢 𞤢𞤪𞤣𞤢𞥄𞤳𞤵 𞤻𞤢𞤤𞤲𞤣𞤫 𞥔 𞤅𞤫𞤯𞤼𞤮 𞥒𞥐𞥐𞥖.
𞤖𞤭𞤼𞤢𞥄𞤲𞤣𞤫 𞤫 𞤬𞤫𞤷𞥆𞤫𞤪𞤫 𞤩𞤢𞤱𞤼𞤭 𞤯𞤵𞤥⹁ 𞤻𞤢𞤤𞤲𞤣𞤫 𞥘 𞤔𞤮𞤤𞤮 𞥒𞥐𞥐𞥗 𞤬𞤫𞤣𞥆𞤫 UFDG 𞤲𞤣𞤫𞤲 𞤼𞤮𞤯𞥆𞤭𞥅 𞤥𞤮 𞤳𞤮 𞤤𞤮𞤲𞤼𞤮𞥅 𞤄𞤢𞥄 𞤃𞤢𞥄𞤥𞤢𞤣𞤵 𞤳𞤢 𞤸𞤮𞥅𞤪𞤫. 𞤑𞤮 𞤫 𞤭𞤲𞤣𞤫 𞤲𞤣𞤫𞥅 𞤬𞤫𞤣𞥆𞤫 𞤮 𞤣𞤢𞤪𞤭𞥅 𞤤𞤢𞥄𞤦𞤭 𞤼𞤢𞤼𞤭 𞤬𞤭𞥅 𞤤𞤢𞥄𞤥𞤢𞤺𞤮𞤤 𞤘𞤭𞤲𞤫.
𞤑𞤢 𞤧𞤵𞤩𞤮 𞥒𞥐𞥑𞥐⹁ 𞤩𞤢𞥄𞤱𞤮 𞤮 𞤱𞤮𞤲𞤵𞤣𞤫 𞤢𞤪𞤢𞤲𞤮 𞤳𞤢 𞤴𞤢𞤸𞤢𞤲𞤣𞤫 𞤢𞤪𞤢𞤲𞤫𞤪𞤫 𞤸𞤢𞤳𞥆𞤵𞤲’𞤣𞤫 𞤴𞤭𞤥𞤩𞤫 𞥒𞥔⹁ 𞤳𞤮 𞤀𞤤𞤬𞤢𞥄 𞤑𞤮𞤲𞤣𞤫 𞤴𞤢𞤤𞤼𞤭 𞤸𞤮𞥅𞤪𞤫 𞤳𞤢 𞤴𞤢𞤸𞤢𞤲𞤣𞤫 𞤯𞤭𞤯𞤢𞤩𞤫𞤪𞤫. 𞤉 𞥒𞥐𞥑𞥕 𞤮 𞤣𞤢𞤪𞤼𞤭𞥅 𞤀𞤤𞤬𞤢𞥄 𞤑𞤮𞤲𞤣𞤫 𞤳𞤢𞤣𞤭⹁ 𞤳𞤮𞤲𞤮 𞤮𞤲 𞤯𞤮𞤲 𞤶𞤮𞥅𞤯𞤭𞤼𞤭𞥅.
𞤐𞤣𞤫 𞤼𞤢𞤱𞤵𞤲𞤮𞥅 𞤣𞤮𞤧𞤼𞤫𞤪𞤫 𞤘𞤭𞤲𞤫 𞤲𞤣𞤫𞤲 𞤣𞤵𞤽𞤭𞤲𞤢𞤲𞤢𞥄 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤸𞤢𞤨𞥆𞤵 𞤼𞤢𞤼𞤢𞤩𞤮⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤱𞤢𞤴𞤤𞤭𞤼𞤭 𞤲𞤣𞤫 𞤮 𞤧𞤭𞤲𞤷𞤭 𞤣𞤮𞤧𞤼𞤫𞤪𞤫 𞤸𞤫𞤧𞤫𞤪𞤫 𞤬𞤭𞥅 𞤲𞤮 𞤮 𞤣𞤢𞤪𞤮𞤪𞤢 𞤫 𞤧𞤵𞤩𞤮 𞤧𞤢𞥄𞤼𞤭𞤲𞤮𞥅𞤲𞤺𞤮 𞤲𞤺𞤮𞤲 𞤻𞤢𞤤𞤲𞤣𞤫 𞥑𞥘 𞤒𞤢𞤪𞤳𞤮 𞥒𞥐𞥒𞥐.
𞤅𞤫𞤤𞥆𞤵 𞤁𞤢𞤤𞤫𞤲 𞤣𞤢𞤪𞤼𞤭𞥅 𞤥𞤮 𞤫 𞤲𞤺𞤮𞤲 𞤧𞤵𞤩𞤮 𞤯𞤮𞤲 𞤳𞤢𞤣𞤭. 𞤙𞤢𞤤𞤲𞤣𞤫 𞥑𞥙 𞤒𞤢𞤪𞤳𞤮 𞥒𞥐𞥒𞥐⹁ 𞤻𞤢𞤤𞥆𞤢𞤤 𞤩𞤢𞥄𞤱𞤮 𞤧𞤵𞤩𞤮 𞤲𞤺𞤮𞤲 𞤸𞤮𞤥𞤦𞤵𞤣𞤫⹁ 𞤅𞤫𞤤𞥆𞤵 𞤁𞤢𞤤𞤫𞤲 𞤴𞤢𞤤𞤼𞤭 𞤸𞤮𞤤𞥆𞤭𞤼𞤭 𞤳𞤮 𞤳𞤢𞤲𞤳𞤮 𞤬𞤮𞥅𞤤𞤭. 𞤑𞤮𞤲𞤮 𞤘𞤮𞥅𞤥𞤵 𞤸𞤢𞤤𞤬𞤭𞤲𞤢𞤲𞤮𞥅𞤲𞤺𞤵 𞤅𞤵𞤩𞤮 𞤲𞤺𞤮𞤲 𞤼𞤢𞤦𞤭𞤲𞤼𞤭𞤲𞤢𞥄𞤤𞤭 𞤯𞤫𞤲 𞤦𞤮𞤼𞤫 𞤯𞤫 𞤅𞤫𞤤𞥆𞤵 𞤁𞤢𞤤𞤫𞤲 𞤴𞤢𞤤𞤼𞤭𞤲𞤭. 𞤙𞤢𞤤𞤲𞤣𞤫 𞥒𞥔 𞤒𞤢𞤪𞤳𞤮 𞤘𞤮𞥅𞤥𞤵 𞤲𞤺𞤵𞤲 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤳𞤮 𞤀𞤤𞤬𞤢 𞤑𞤮𞤲𞤣𞤫 𞤬𞤮𞥅𞤤𞤭. 𞤃𞤵𞤪𞤼𞤮 𞤱𞤢𞤯𞤭⹁ 𞤳𞤮 𞤩𞤢𞤣𞤭𞥅 𞤴𞤭𞤥𞤩𞤫 𞤷𞤢𞤨𞥆𞤢𞤲𞤯𞤫 𞤼𞤢𞤼𞤮 𞤱𞤢𞤪𞤢𞥄
𞤖𞤭𞤼𞤢𞥄𞤲𞤣𞤫 𞤩𞤢𞥄𞤱𞤮 𞤲𞤣𞤵𞥅 𞤶𞤭𞥅𞤩𞤮𞤤𞤣𞤵⹁ 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢 𞤫 𞤧𞤮𞥅𞤪𞤭𞥅𞤩𞤫 𞤥𞤵𞤵𞤲 𞤬𞤮𞤤𞥆𞤭 𞤀𞤤𞤬𞤢𞥄 𞤑𞤮𞤲𞤣𞤫. 𞤍𞤵𞤥 𞤳𞤮 𞤫 𞤈𞤫𞤬𞤦𞤭𞤪𞥆𞤫 𞤻𞤢𞤤𞤲𞤣𞤫 𞥕 𞤅𞤭𞤤𞤼𞤮 𞥒𞥐𞥒𞥑 𞤱𞤢𞤯𞤭.
𞤅𞤫𞤤𞥆𞤵 𞤁𞤢𞤤𞤫𞤲 𞤸𞤮𞤤𞥆𞤭𞤼𞤭𞥅 𞤫 𞤳𞤫𞤲𞤫 𞤱𞤮𞤲𞤣𞤫𞤥𞤢 𞤮𞤥𞤮 𞤱𞤮𞤲𞤢𞤲𞤭 𞤬𞤮𞤤𞥆𞤵𞤪𞤵 𞤲𞤣𞤵𞤲.
𞤁𞤵𞥅𞤩𞤭𞤼𞤢𞤲𞤣𞤫 𞤫 𞤶𞤢𞤥 𞤀𞤤𞤸𞤢𞤶𞥆𞤭 𞤅𞤫𞤤𞥆𞤵 𞤁𞤢𞤤𞤫𞤲. 𞤕𞤫𞤤𞥆𞤢𞤤⹁ 𞤥𞤢𞤤𞤢𞤤 𞤫 𞤶𞤵𞥅𞤼𞤢𞤤 𞤦𞤢𞥄𞤤𞤯𞤫.🎉🎂
𞤁𞤢𞤱𞤪𞤵𞤲𞤳𞤮𞤴𞤢𞥄𞤺𞤢𞤤 𞤥𞤢𞤳𞥆𞤮 𞤲𞤺𞤢𞤤 𞤲𞤮 𞤽𞤢𞤳𞥆𞤭 𞤩𞤢𞤲𞤺𞤵𞤺𞤮𞤤 𞤫 𞤺𞤭𞥅𞤯𞤫 𞤢𞤲.
𞤀𞤱𞤢 𞤮𞤲 𞤶𞤢𞥄𞤪𞤢𞥄𞤥𞤢 𞤳𞤮 𞤸𞤮𞤲𞥆𞤮 𞤣𞤢𞤱𞤪𞤮𞤲𞤳𞤮𞤴𞤢𞥄𞤳𞤵 𞤲’𞤺𞤵𞤲 𞤽𞤢𞤳𞥆𞤭𞤪𞤢𞤲𞤭-𞤥𞤮 𞤫 𞤴𞤭𞤢𞤲𞤣𞤫 𞤥𞤮𞤲 𞤷𞤫𞤪𞤲𞤮؟