𞤅𞤉𞤒𞤁𞤋𞤐𞤀𞥄 𞤀𞤂𞤋𞤒𞥆𞤀: 𞤃𞤋𞤅𞤀𞤂 𞤉 𞤒𞤀𞤐𞤑𞤋𞤐𞤀𞥄𞤈𞤉 𞤉 𞤐𞤓𞤐𞤍𞤀𞤂

𞤙𞤢𞤤𞤲𞤣𞤫 𞤺𞤮𞥅𞤪𞤫⹁ 𞤬𞤫𞤱𞤲𞤣𞤮 𞤅𞤫𞤴𞤣𞤭𞤲𞤢𞥄 𞤀𞤤𞤭𞤴𞥆𞤢 𞤤𞤢𞥄𞤼𞤭𞤲𞤮𞥅 𞤑𞤢𞤤𞤭𞥅𞤬𞤵⹁ 𞤩𞤫 𞤸𞤢𞤴𞤲𞤭𞤲𞤮 𞤺𞤮𞤪𞤳𞤮 𞤲𞤢𞤧𞤢𞥄𞤪𞤢𞥄𞤶𞤮 𞤲𞤮 𞤶𞤭𞤲𞤣𞤢 𞤳𞤢 𞤧𞤢𞤸𞤪𞤫 𞤲𞤮 𞤶𞤮𞤺𞤭𞥅 𞤧𞤢𞤬𞤢𞤱𞤢𞤤 𞤥𞤢𞤩𞥆𞤫⹁ 𞤲𞤺𞤢𞤤 𞤩𞤫 𞤧𞤭𞤳𞥆𞤵𞤲𞤮𞥅 𞤥𞤢𞤶𞤭𞥅𞤪𞤭𞥅𞤲𞤮𞥅 𞤩𞤫 𞤩𞤮𞥅𞤴𞤭𞥅. 𞤅𞤫𞤴𞤣𞤭𞤲𞤢𞥄 𞤀𞤤𞤭𞤴𞥆𞤢 𞤩𞤢𞤣𞤭𞥅 𞤺𞤮𞤪𞤳𞤮 𞤮𞤲⹁ 𞤩𞤫 𞤥𞤢𞥄𞤳𞤭: “𞤑𞤮 𞤧𞤢𞤬𞤢𞤱𞤢𞤤 𞤢𞤥 𞤲𞤭𞥅”. 𞤘𞤮𞤪𞤳𞤮 𞤮𞤲 𞤱𞤭𞤴𞤭⹁ “𞤌𞥅𞤮𞥅⹁ 𞤱𞤮𞤲𞤢𞥄. 𞤑𞤮 𞤥𞤭𞤲 𞤶𞤫𞤴𞤭 𞤲𞤺𞤢𞤤”.

𞤅𞤫𞤴𞤣𞤭𞤲𞤢𞥄 𞤀𞤤𞤭𞤴𞥆𞤢⹁  𞤑𞤢𞤤𞤭𞥅𞤬𞤵 𞤔𞤵𞥅𞤤𞤩𞤫 𞤩𞤫𞤲 𞤬𞤮𞤨⹁ 𞤯𞤮𞥅 𞤴𞤮 𞤩𞤫 𞤼𞤵𞥅𞤺𞤮𞤪 𞤣𞤢𞤪𞤲𞤣𞤫 𞤥𞤢𞤩𞥆𞤫⹁ 𞤩𞤫 𞤧𞤵𞥅𞤴𞤲𞤢 𞤫 𞤮𞥅 𞤺𞤮𞤪𞤳𞤮⹁ 𞤲𞤫𞤯𞤣𞤢𞤪𞤭𞥅𞤩𞤫 (𞤺𞤢𞤪𞤣𞤭𞥅𞤩𞤫) 𞤥𞤢𞤩𞥆𞤫 𞤩𞤫𞤲⹁ 𞤬𞤭𞥅 𞤸𞤫𞤩𞤼𞤵𞤺𞤮𞤤 𞤧𞤢𞤬𞤢𞤱𞤢𞤤 𞤥𞤢𞤩𞥆𞤫 𞤲𞤺𞤢𞤤⹁ 𞤩𞤫 𞤱𞤭𞤴𞤭 𞤥𞤮: “𞤺𞤢𞤭𞤧𞤭𞥅⹁ 𞤫𞤤𞥆𞤢 𞤢𞤤𞤢𞥄⹁ 𞤶𞤮𞥅𞤲𞤭 𞤴𞤢𞤸𞤫𞤲 𞤳𞤢 𞤅𞤢𞤪𞤭𞤴𞤢”.

𞤐𞤣𞤢𞥄𞤪𞤫𞥅 𞤴𞤢𞤲𞤳𞤭𞤲𞤢𞥄𞤪𞤫⹁ 𞤸𞤮𞥅𞤪𞤫𞥅𞤶𞤮 𞤶𞤵𞥅𞤤𞤩𞤫 𞤩𞤫𞤲 𞤫 𞤣𞤮𞥅𞤤𞤫 𞤥𞤵𞥅𞤯𞤵𞤲 𞤳𞤢𞤻𞤵𞤲 𞤫 𞤣𞤢𞤪𞤲𞤣𞤫 𞤥𞤵𞥅𞤯𞤵𞤲⹁ 𞤧𞤵𞤩𞤭𞥅 𞤴𞤢𞤸𞤵𞤺𞤮𞤤 𞤳𞤢 𞤧𞤢𞤪𞤭𞤴𞤢 𞤬𞤭𞥅 𞤸𞤵𞥅𞤲𞤣𞤫 𞤲𞤣𞤫 𞤮 𞤶𞤫𞤴𞤭.

𞤐𞤣𞤫 𞤩𞤫 𞤸𞤫𞤱𞤼𞤵𞤲𞤮𞥅 𞤴𞤫𞥅𞤧𞤮 𞤡𞤵𞤪𞤢𞥄𞤴𞤭𞥅⹁ 𞤯𞤵𞤥 𞤳𞤮 𞤻𞤢𞥄𞤱𞤮𞥅𞤱𞤮 𞤮𞤲⹁ 𞤮 𞤲𞤣𞤢𞥄𞤪𞤭 𞤅𞤫𞤴𞤣𞤭𞤲𞤢𞥄 𞤀𞤤𞤭𞤴𞥆𞤢⹁ 𞤮 𞤤𞤢𞤲𞤣𞤭𞥅 𞤩𞤫: “𞤉𞤲𞤫𞥅 𞤀𞤥𞤭𞥅𞤪𞤵 𞤔𞤵𞥅𞤤𞤩𞤫⹁ 𞤴𞤢𞤤𞥆𞤭 𞤮𞤯𞤮𞤲 𞤶𞤮𞤺𞤭𞥅 𞤣𞤢𞤤𞤭𞥅𞤤𞤵 𞤳𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤲𞤺𞤢𞥄𞤤 𞤧𞤢𞤬𞤢𞤱𞤢𞤤 𞤳𞤮 𞤶𞤫𞤴𞤢𞤤 𞤥𞤮𞥅𞤯𞤮𞤲؟”
𞤅𞤫𞤴𞤣𞤭𞤲𞤢𞥄 𞤀𞤤𞤭𞤴𞥆𞤢 𞤥𞤮𞥅𞤧𞤭 𞤪𞤫𞤬𞤼𞤭 𞤱𞤭𞤴𞤭: “𞤀𞤱𞤢 𞤻𞤢𞥄𞤱𞤮𞥅𞤱𞤮 𞤮𞤲 𞤤𞤢𞤲𞤣𞤭𞤳𞤫 𞤤𞤢𞤥 𞤣𞤢𞤤𞤭𞥅𞤤𞤵 𞤳𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤳𞤮 𞤥𞤭𞤲 𞤶𞤫𞤴𞤭 𞤲𞤺𞤢𞥄𞤤 𞤧𞤢𞤬𞤢𞤱𞤢𞤤⹁ 𞤳𞤮𞤲𞤮 𞤨𞤫𞤤𞥆𞤫𞤼 𞤥𞤭 𞤢𞤤𞤢𞥄 𞤣𞤢𞤤𞥆𞤭𞥅𞤤𞤵”. 𞤚𞤭𞤨𞥆𞤵𞤣𞤫 𞤫 𞤯𞤵𞤥⹁ 𞤡𞤵𞤪𞤢𞥄𞤴𞤭𞥅 𞤼𞤢𞤰𞤭 𞤻𞤢𞥄𞤱𞤮𞥅𞤪𞤫 𞤲𞤣𞤫𞤲⹁ 𞤮 𞤶𞤮𞤺𞤲𞤭𞤼𞤭 𞤐𞤢𞤧𞤢𞥄𞤪𞤢𞥄𞤶𞤮 𞤮𞤲 𞤺𞤮𞥅𞤲𞤺𞤢.

𞤇𞤢𞤴𞤼𞤭 𞤩𞤫 𞤴𞤢𞤤𞤼𞤭𞥅⹁ 𞤲𞤺𞤢𞥄𞤤 𞤲𞤵𞤲𞤯𞤢𞤤 𞤲𞤺𞤢𞤤 𞤮 𞤧𞤫𞥅𞤣𞤭𞤼𞤭𞥅 𞤯𞤮𞥅 𞤸𞤫𞤰𞤢𞥄𞤤𞤭 𞤫 𞤮𞥅 𞤺𞤮𞤪𞤳𞤮 𞤲𞤢𞤧𞤢𞥄𞤪𞤢𞥄𞤶𞤮. 𞤌 𞤣𞤢𞤪𞤭𞥅 𞤮 𞤱𞤭𞤴𞤭: “𞤃𞤭 𞤧𞤫𞥅𞤣𞤭𞤳𞤫 𞤱𞤮𞤲𞤣𞤫𞤥𞤢 𞤳𞤮 𞤲𞤭𞥅 𞤱𞤮𞤲𞤭𞤪𞤭 𞤶𞤭𞤳𞥆𞤵 𞤢𞤲𞤢𞤦𞥆𞤢𞥄𞤩𞤫 𞤩𞤫𞤲. 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤬𞤮𞤨 𞤲𞤢𞤩𞤢 𞤤𞤢𞤥 𞤴𞤫𞥅𞤧𞤮 𞤻𞤢𞥄𞤱𞤮𞥅𞤱𞤮 𞤥𞤮 𞤳𞤢𞤲𞤳𞤮 𞤼𞤭𞤺𞤭 𞤮 𞤼𞤮𞤯𞥆𞤭𞥅⹁ 𞤮𞥅𞤲 𞤻𞤢𞥄𞤱𞤮𞥅𞤱𞤮 𞤻𞤢𞥄𞤱𞤢 𞤱𞤭𞤴𞤢 𞤤𞤢𞥄𞤥𞤯𞤮 𞤮𞤲 𞤢𞤤𞤢𞥄 𞤺𞤮𞥅𞤲𞤺𞤢. 𞤂𞤢𞤥𞤯𞤮 𞤮𞤲 𞤳𞤢𞤣𞤭 𞤶𞤢𞤩𞤢 𞤲𞤣𞤫𞥅 𞤻𞤢𞥄𞤱𞤮𞥅𞤪𞤫 𞤸𞤢𞤪𞤢 𞤮 𞤼𞤭𞤳𞥆𞤢𞥄.”

𞤖𞤢𞤳𞥆𞤫𞤪𞤫𞤲 𞤯𞤵𞤥 𞤥𞤫𞥅𞤥𞤭𞥅 𞤲𞤢𞤧𞤢𞥄𞤪𞤢𞥄𞤶𞤮 𞤮𞤲⹁ 𞤮 𞤧𞤭𞤲𞤼𞤭𞤪𞤭 𞤳𞤭𞤧𞤢𞤲 𞤮 𞤶𞤢𞤩𞤭 𞤋𞤧𞤤𞤢𞥄𞤥𞤵 𞤯𞤮𞥅𞤲 𞤫 𞤯𞤮𞥅𞤲. 𞤌 𞤶𞤮𞤺𞤲𞤭𞤼𞤭 𞤅𞤫𞤴𞤣𞤭𞤲𞤢𞥄 𞤀𞤤𞤭𞤴𞥆𞤢 𞤧𞤢𞤬𞤢𞤱𞤢𞤤 𞤲𞤺𞤢𞤤⹁ 𞤮 𞤹𞤭𞤪𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤳𞤮 𞤻𞤢𞤤𞤲𞤣𞤫 𞤸𞤢𞤪𞤫 𞤅𞤭𞥅𞤬𞤭𞥅𞤲 𞤲𞤣𞤫𞤲 𞤮 𞤰𞤫𞤼𞥆𞤵𞤲𞤮𞥅 𞤲𞤺𞤢𞤤.
𞤅𞤫𞤴𞤣𞤭𞤲𞤢𞥄 𞤀𞤤𞤭𞤴𞥆𞤢 𞤥𞤮𞥅𞤧𞤭⹁ 𞤩𞤫 𞤱𞤭𞤴𞤭 𞤥𞤮: “𞤎𞤫𞤼𞥆𞤵 𞤲𞤺𞤢𞤤. 𞤃𞤭 𞤪𞤮𞤳𞥆𞤭𞥅 𞤥𞤢 𞤲𞤺𞤢𞤤 𞤬𞤭𞥅 𞤶𞤢𞤩𞥆𞤢𞤺𞤮𞤤 𞤥𞤢 𞤳𞤢 𞤣𞤭𞥅𞤲𞤢 𞤤𞤭𞤧𞤤𞤢𞥄𞤥𞤵.”

𞤑𞤮 𞤲𞤺𞤢𞥄𞤤 𞤲𞤵𞤲𞤯𞤢𞤤⹁ 𞤲𞤺𞤢𞤤 𞤧𞤫𞤲𞤣𞤭𞤲𞥋𞤣𞤭𞤪𞤼𞤢𞥄 𞤸𞤢𞤳𞥆𞤵𞤲𞥋𞤣𞤫 𞤴𞤭𞤥𞤩𞤫 𞤩𞤫𞤲⹁ 𞤤𞤢𞥄𞤼𞤭𞤲𞤮𞥅 𞤣𞤮𞥅𞤤𞤫 𞤣𞤭𞥅𞤲𞤢 𞤳𞤢𞤲. 𞤑𞤮 𞤲𞤺𞤢𞥄𞤤 𞤨𞤮𞥅𞤯𞤢𞤴𞤲𞤮𞥅 𞤴𞤭𞤥𞤩𞤫 𞤩𞤫𞤲 𞤫 𞤥𞤢𞤳𞥆𞤢.
𞤃𞤭𞥅𞤶𞤭𞤼𞤫𞥅 𞤧𞤭 𞤼𞤢𞤱𞤵𞤲𞤮 𞤯𞤵𞤥 𞤳𞤮 𞤸𞤢𞤲𞤣𞤫 𞤲𞤵𞤲 𞤫 𞤤𞤫𞤴𞤣𞤭 𞤥𞤫𞥅𞤯𞤫𞤲 𞤱𞤮𞤲𞤣𞤵𞤣𞤫 𞤫 𞤩𞤫𞥅 𞤤𞤢𞥄𞤥𞤩𞤫 𞤥𞤫𞥅𞤯𞤫𞤲. 𞤐𞤮 𞤺𞤢𞤧𞤢 𞤸𞤢𞤴 𞤱𞤮𞤲𞤳𞤭𞤸𞤭 𞤮𞥅 𞤺𞤮𞤪𞤳𞤮 𞤣𞤢𞤯𞤢𞤼𞤢𞥄𞤲𞤮. 𞤖𞤢𞤴 𞤧𞤭 𞤩𞤫 𞤸𞤫𞤱𞤼𞤵𞤲𞤮 𞤳𞤢 𞤧𞤢𞤪𞤭𞤴𞤢⹁ 𞤻𞤢𞥄𞤱𞤮𞥅𞤱𞤮 𞤮𞤲 𞤧𞤵𞥅𞤧𞤢𞤼𞤢𞥄𞤲𞤮 𞤻𞤢𞥄𞤱𞤵𞤣𞤫 𞤱𞤭𞤴𞤢 𞤤𞤢𞥄𞤥𞤯𞤮 𞤮𞤲 𞤢𞤤𞤢𞥄 𞤺𞤮𞥅𞤲𞤺𞤢.

𞤧𞤢𞤬𞤢𞤱𞤢𞤤  = 𞤦𞤢𞥄𞤺𞤢𞤤 = armour