𞤆𞤓𞤂𞥆𞤌 𞤖𞤀𞥄𞤂𞤓 𞤍𞤉𞤃𞤘𞤀𞤂 𞤃𞤀𞥄𞤍𞤀

𞤀𞤤𞤤𞤢 𞤒𞤫𞤲𞤯𞤮 𞤅𞤫𞤲𞤭𞥅𞤯𞤮 𞤮𞤲⹁ 𞤭𞤼𞥆𞤭 𞤫 𞤴𞤵𞤪𞤥𞤫𞥅𞤲𞤣𞤫 𞤥𞤢𞤳𞥆𞤮⹁ 𞤮 𞤴𞤫𞤯𞤭 𞤫𞤲 𞤯𞤫𞤲𞤺𞤢𞤤 𞤲𞤺𞤢𞤤 𞤴𞤫𞤪𞤵 𞤥𞤵𞤵𞤲 𞤫 𞤢𞤤𞤯𞤵𞤣𞤫 𞤯𞤵𞥅𞤯𞤢𞥄 𞤫 𞤲𞤣𞤭𞥅 𞤤𞤫𞤴𞤣𞤭. 𞤌 𞤱𞤢𞤯𞤭 𞤲𞤺𞤢𞤤 𞤳𞤢𞤣𞤭 𞤴𞤮𞥅𞤯𞤵𞤲’𞤺𞤢𞤤⹁ 𞤤𞤢𞤦𞤢𞥄𞤲𞤺𞤢𞤤⹁ 𞤴𞤢𞥄𞤶𞤵𞤲’𞤺𞤢𞤤⹁ 𞤸𞤢𞥄𞤤𞤫𞤼𞤫𞥅𞤲𞤺𞤢𞤤 𞤺𞤭𞤤𞤢 𞤊𞤵𞤯𞤲𞤢𞥄𞤲𞤺𞤫 𞤸𞤢𞥄 𞤸𞤭𞥅𞤪𞤲𞤢𞥄𞤲𞤺𞤫 𞤀𞤬𞤪𞤭𞤳.

𞤑𞤢𞤤𞤢 𞤳𞤢 𞤢 𞤴𞤢𞤸𞤭 𞤫 𞤸𞤭𞤪𞤲𞤢 𞤥𞤢𞤤𞥆𞤢 𞤷𞤢𞤳𞤢 𞤀𞤬𞤪𞤭𞤳⹁ 𞤸𞤢𞥄 𞤸𞤫𞤱𞤼𞤮𞤴𞤭 𞤐𞤭𞤱𞤴𞤮𞤪𞤳 𞤥𞤢𞤤𞥆𞤢 𞤄𞤪𞤭𞤳𞤧𞤫𞤤 𞤫 𞤆𞤢𞤪𞤭⹁ 𞤢 𞤼𞤢𞤱𞤢𞤴 𞤼𞤮𞤲 𞤩𞤭𞤯𞤩𞤫 𞤊𞤵𞤤𞤩𞤫.

𞤀𞤲 𞤮𞥅 𞤩𞤭𞥅 𞤆𞤵𞤤𞥆𞤮⹁ 𞤢 𞤬𞤭𞤲𞤭𞥅⹁ 𞤢 𞤼𞤢𞤱𞤭𞥅 𞤳𞤮 𞤲𞤺𞤢𞤤 𞤯𞤫𞤲𞤺𞤢𞤤 𞤘𞤫𞤲𞤮 𞤮𞤲 𞤴𞤫𞤯𞤵 𞤥𞤢𞥄 𞤥𞤵𞤴𞤲𞤭𞤲𞤫𞥅𞤣𞤫. 𞤍𞤮𞥅 𞤴𞤮 𞤢 𞤱𞤫𞤤𞤼𞤮𞤪 𞤲𞤺𞤢𞤤 𞤴𞤫𞤼𞥆𞤢𞥄 𞤀𞤤𞤤𞤢 𞤥𞤢𞤲𞤼𞤮𞤪𞤢𞥄 𞤲𞤺𞤢𞤤⹁ 𞤼𞤢𞤱𞤢 𞤢 𞤢𞤤𞤢𞥄 𞤳𞤮 𞤱𞤢𞤯𞤢𞥄 𞤧𞤮 𞤱𞤮𞤲𞤢𞥄 𞤴𞤮 𞤢 𞤱𞤮𞤨𞥆𞤵 𞤲𞤺𞤢𞤤 𞤶𞤮𞤳𞥆𞤢𞥄 𞤯𞤫𞤥𞤯𞤫 𞤯𞤫 𞤩𞤵𞤪𞤢𞥄 𞤲𞤺𞤢𞤤 𞤸𞤢𞤴 𞤬𞤵𞤧.

𞤀𞤲𞤣𞤵 𞤤𞤫⹁ 𞤳𞤮 𞤯𞤫𞤥𞤺𞤢𞤤 𞤱𞤮𞤲𞤭 𞤬𞤭𞥅 𞤪𞤫𞤲𞤣𞤮. 𞤅𞤭 𞤲𞤺𞤢𞤤 𞤥𞤢𞥄𞤴𞤭𞥅⹁ 𞤢𞤤𞤢𞥄 𞤳𞤮 𞤸𞤢𞤯𞤢𞤼𞤢 𞤪𞤫𞤲𞤣𞤮 𞤲𞤺𞤮𞤲 𞤥𞤵𞤤𞤵𞤣𞤫. 𞤅𞤫𞥅𞤣𞤫𞥅 𞤯𞤵𞤥 𞤧𞤢𞤯𞤢𞥄. 𞤖𞤢𞤲𞤣𞤫 𞤥𞤮 𞤲𞤣𞤢𞥄𞤪𞤭 𞤲𞤣𞤫𞤪 𞤀𞤬𞤪𞤭𞤳⹁ 𞤍𞤵𞥅𞤯𞤵𞤩𞤫 𞤫 𞤊𞤵𞤤𞤩𞤫 𞤩𞤫 𞤆𞤵𞤤𞤢𞤪 𞤥𞤵𞤼𞤭𞤪𞤭 𞤯𞤵𞤵𞤲⹁ 𞤢𞤤𞤢𞥄 𞤸𞤵𞥅𞤱𞤮𞤲’𞤣𞤭𞤪𞤣𞤫 𞤫 𞤊𞤵𞤤𞤩𞤫 𞤸𞤢𞥄𞤤𞤮𞥅𞤩𞤫 𞤆𞤵𞤤𞤢𞤪 𞤩𞤫𞤲. 𞤑𞤢𞤥𞤩𞤫 𞤳𞤢𞤲⹁ 𞤳𞤮 𞤴𞤭𞤥𞤩𞤫 𞤩𞤫 𞤩𞤫 𞤪𞤫𞤧𞤭 𞤯𞤫𞤥𞤯𞤫 𞤥𞤵𞤵𞤲 𞤩𞤫𞤲⹁ 𞤩𞤫 𞤱𞤮𞤲𞤭 𞤶𞤮𞤳𞥆𞤮𞤲’𞤣𞤭𞤪𞤣𞤫 𞤫 𞤥𞤵𞤵𞤲. 𞤏𞤵𞤪𞤭𞤲 𞤳𞤮 𞤩𞤫𞤲⹁ 𞤩𞤫 𞤦𞤢𞤥𞤦𞤢𞤲𞤼𞤢 𞤣𞤮𞤱 𞤊𞤵𞤤𞤩𞤫 𞤩𞤫𞤲.

𞤅𞤮 𞤢 𞤱𞤭𞤴𞤭𞥅 𞤳𞤮 𞤢 𞤆𞤵𞤤𞥆𞤮⹁ 𞤸𞤢𞥄𞤤𞤵 𞤆𞤵𞤤𞤢𞤪 𞤳𞤢𞤤𞤢 𞤳𞤢 𞤴𞤢𞤸𞤵𞤯𞤢𞥄. 𞤅𞤭 𞤢 𞤬𞤮𞤼𞥆𞤭𞥅 𞤫 𞤶𞤢𞤲𞤢𞤲𞤮⹁ 𞤸𞤢𞤴 𞤧𞤭 𞤱𞤮𞤲𞤢𞥄 𞤮 𞤆𞤵𞤤𞥆𞤮⹁ 𞤸𞤭𞤱𞤪𞤮 𞤥𞤮 𞤼𞤢𞤸𞤮 𞤫 𞤆𞤵𞤤𞤢𞤪⹁ 𞤴𞤫𞤱𞤼𞤢𞥄 𞤥𞤮 𞤫 𞤊𞤵𞤤𞤬𞤵𞤤𞤣𞤫. 𞤑𞤮 𞤧𞤭 𞤼𞤢𞤱𞤭𞥅 𞤢𞤯𞤢 𞤸𞤢𞥄𞤶𞤢𞥄 𞤫 𞤥𞤢𞤳𞥆𞤮⹁ 𞤼𞤢𞤱𞤢 𞤤𞤫 𞤳𞤢𞤣𞤭 𞤮 𞤱𞤢𞥄𞤱𞤢𞤼𞤢𞥄 𞤆𞤵𞤤𞤢𞤪 𞤲𞤺𞤢𞤤 𞤬𞤫𞤧⹁ 𞤲𞤣𞤫𞤲 𞤸𞤢𞥄𞤤𞤢𞤲𞤢𞥄 𞤥𞤮 𞤫 𞤯𞤫𞤲𞤺𞤢𞤤 𞤲𞤺𞤢𞤤 𞤲𞤢𞤲𞤼𞤮𞤲’𞤣𞤭𞤪𞤼𞤮𞤲 𞤫 𞤥𞤵𞥅𞤯𞤵𞤲. 𞤑𞤮𞤲𞤮 𞤲𞤮𞤲 𞤱𞤮𞤲𞤢𞥄 𞤴𞤮 𞤯𞤵𞤥 𞤱𞤮𞤲𞤵 𞤲𞤦𞤮𞥅𞤱𞤳𞤢 𞤸𞤢𞤳𞥆𞤵𞤲’𞤣𞤫 𞤥𞤮𞤮𞤲.

𞤉𞤯𞤫𞤲 𞤬𞤮𞤼𞤭 𞤢𞤲𞤣𞤵𞤣𞤫 𞤱𞤮𞤲𞤣𞤫𞤥𞤢 𞤯𞤫𞤥𞤺𞤢𞤤 𞤳𞤮 𞤢𞥄𞤤𞤢⹁ 𞤯𞤫𞤥𞤺𞤢𞤤 𞤳𞤮 𞤣𞤮𞥅𞤤𞤫. 𞤏𞤮𞤲𞤢𞥄 𞤥𞤫𞤸𞤪𞤫 𞤱𞤢𞤯𞤭 𞤊𞤢𞤪𞤢𞤲𞤧𞤫𞥅𞤩𞤫 𞤫 𞤉𞤲𞤺𞤫𞤤𞤫𞥅𞤩𞤫 𞤲𞤮 𞤲𞤢𞥄𞤣𞤢 𞤶𞤢𞤱𞤤𞤫 𞤯𞤵𞥅𞤯𞤵𞤯𞤫 𞤫 𞤶𞤢𞥄𞤤𞤭𞤲𞤺𞤮𞤤 𞤯𞤫𞤥𞤯𞤫 𞤥𞤢𞤩𞥆𞤫 𞤯𞤫𞤲 𞤫 𞤲𞤣𞤫𞤪 𞤀𞤣𞤵𞤲𞤢𞥄𞤪𞤵 𞤲𞤣𞤵𞤲. 𞤖𞤢𞤲𞤣𞤫⹁ 𞤸𞤢𞤴 𞤕𞤢𞤴𞤲𞤢𞤲𞤳𞤮𞥅𞤩𞤫 𞤩𞤫𞤲 𞤼𞤢𞤱𞤼𞤭𞥅 𞤉𞤪𞤮𞤨𞤲𞤢𞥄𞤩𞤫 𞤩𞤫𞤲 𞤫 𞤲𞤢𞥄𞤣𞤵𞤺𞤮𞤤 𞤶𞤢𞤱𞤤𞤫 𞤯𞤵𞥅𞤯𞤵𞤯𞤫 𞤫 𞤶𞤢𞥄𞤤𞤭𞤲𞤺𞤮𞤤 𞤯𞤫𞤥𞤯𞤫 𞤥𞤢𞤩𞥆𞤫 𞤯𞤫𞤲.

𞤉𞤲𞤫𞥅 𞤥𞤭 𞤤𞤢𞤲𞤣𞤮𞥅 𞤮𞤲. 𞤖𞤮𞤤 𞤳𞤮 𞤱𞤢𞤯𞤭 𞤊𞤢𞤪𞤢𞤲𞤧𞤭 𞤲𞤮 𞤩𞤵𞤪𞤭 𞤢𞤤𞤥𞤢𞤲 (𞤔𞤢𞤪𞤥𞤢𞤲𞤭) 𞤣𞤮𞥅𞤤𞤫 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲⹁ 𞤫 𞤸𞤭𞤲𞤤𞤫 𞤀𞤤𞤥𞤢𞤲 𞤲𞤮 𞤩𞤵𞤪𞤭 𞤊𞤢𞤪𞤢𞤲𞤧𞤭 𞤔𞤢𞤱𞤣𞤭؟ 𞤏𞤮𞤲𞤢𞥄 𞤸𞤢𞤴 𞤸𞤵𞥅𞤲𞤣𞤫 𞤱𞤢𞤯𞤭 𞤯𞤵𞤥 𞤧𞤭 𞤱𞤮𞤲𞤢𞥄 𞤧𞤢𞤦𞤵 𞤣𞤮𞥅𞤤𞤲𞤵𞤺𞤮𞤤 𞤯𞤫𞤥𞤺𞤢𞤤 𞤥𞤢𞤩𞥆𞤫 𞤲𞤺𞤢𞤤. 𞤖𞤮𞤤 𞤱𞤮𞤲𞤭 𞤪𞤮𞤳𞥆𞤵𞤩𞤫 𞤊𞤢𞤪𞤢𞤲𞤧𞤫𞥅𞤪𞤫 𞤲𞤣𞤫𞤲 𞤣𞤮𞥅𞤤𞤫؟ 𞤑𞤮 𞤢𞤬𞤪𞤭𞤳𞤲𞤢𞥄𞤩𞤫 𞤩𞤫𞤲.

𞤍𞤵𞤥 𞤲𞤮 𞤸𞤮𞤤𞥆𞤮 𞤱𞤮𞤲𞤣𞤫𞤥𞤢 𞤳𞤢𞤤𞤢 𞤮𞤲 𞤥𞤮 𞤯𞤫𞤲𞤺𞤢𞤤 𞤥𞤵𞤵𞤲 𞤣𞤮𞥅𞤤𞤲𞤭⹁ 𞤳𞤮 𞤮𞤲 𞤥𞤢𞤪𞤭 𞤣𞤮𞥅𞤤𞤫. 𞤅𞤮 𞤯𞤫𞤲𞤺𞤢𞤤 𞤥𞤢𞥄 𞤶𞤢𞥄𞤧𞤭⹁ 𞤳𞤮 𞤦𞤫𞥅 𞤶𞤢𞥄𞤧𞤢𞥄.

𞤅𞤭 𞤫𞤲 𞤼𞤢𞤧𞤳𞤭𞤳𞤫 𞤸𞤭𞤪𞤲𞤢 𞤀𞤬𞤪𞤭𞤳⹁ 𞤫𞤲 𞤼𞤢𞤱𞤢𞤴⹁ 𞤯𞤫𞤥𞤯𞤫 𞤣𞤮𞥅𞤤𞤲𞤵𞤯𞤫 𞤯𞤫𞤲 𞤬𞤮𞤨⹁ 𞤳𞤮 𞤊𞤵𞤤𞤩𞤫 𞤩𞤫𞤲 𞤱𞤮𞤲𞤭 𞤧𞤢𞤦𞤵 𞤯𞤫 𞤣𞤮𞥅𞤤𞤲𞤵𞤣𞤫.

𞤖𞤮𞤤 𞤳𞤮 𞤪𞤮𞤳𞥆𞤭 𞤖𞤢𞤱𞤧𞤢𞥄𞤪𞤫 𞤲𞤣𞤫𞤲 𞤣𞤮𞥅𞤤𞤫 𞤲𞤣𞤫𞤪 𞤐𞤢𞤶𞤫𞤪𞤭𞤴𞤢؟ 𞤑𞤮 𞤬𞤵𞤤𞤩𞤫 𞤩𞤫𞤲. 𞤑𞤮 𞤱𞤮𞤨𞥆𞤵𞤺𞤮𞤤 𞤥𞤢𞤩𞥆𞤫 𞤊𞤵𞤤𞤬𞤵𞤤𞤣𞤫 𞤲𞤣𞤫𞤲⹁ 𞤥𞤢𞤯𞥆𞤮𞥅 𞤖𞤢𞤱𞤧𞤢𞥄𞤪𞤫 𞤲𞤣𞤫𞤲 𞤢𞤣𞥆𞤭 𞤴𞤮 𞤊𞤵𞤤𞤩𞤫 𞤩𞤫𞤲 𞤲𞤮𞤣𞥆𞤭𞤪𞤫 𞤖𞤢𞤱𞤧𞤢-𞤊𞤵𞤤𞤢𞤲𞤭.

𞤖𞤮𞤤 𞤳𞤮 𞤶𞤮𞤺𞤲𞤭 𞤄𞤢𞤥𞤢𞤪𞤢𞥄𞤪𞤫 𞤲𞤣𞤫𞤲 𞤣𞤮𞥅𞤤𞤫 𞤲𞤣𞤫𞤪 𞤃𞤢𞤤𞤭؟ 𞤏𞤮𞤲𞤢𞥄 𞤸𞤢𞤴 𞤺𞤮𞥅𞤼𞤮 𞤧𞤭 𞤱𞤮𞤲𞤢𞥄 𞤊𞤵𞤤𞤩𞤫 𞤱𞤮𞤨𞥆𞤵𞤩𞤫 𞤆𞤵𞤤𞤢𞤪 𞤱𞤢𞤯𞥆𞤭 𞤄𞤢𞥄𞤥𞤢𞤪𞤢𞥄𞤪𞤫⹁ 𞤱𞤢𞤲𞤮 𞤊𞤵𞤤𞤩𞤫 𞤱𞤢𞥄𞤧𞤵𞤤𞤮𞤲𞤩𞤫 𞤩𞤫𞤲 𞤫 𞤳𞤢𞥄𞤧𞤮𞤲𞤳𞤮𞥅𞤩𞤫 𞤫 𞤊𞤵𞤤𞤩𞤫 𞤭𞤱𞤪𞤵 𞤩𞤫 𞤳𞤢 𞤣𞤮𞤱𞤪𞤭 𞤃𞤢𞤤𞤭 𞤢𞤪𞤭 𞤄𞤢𞤥𞤢𞤳𞤮. 𞤍𞤵𞥅𞤯𞤵𞤩𞤫 𞤫 𞤩𞤫𞤫𞤲⹁ 𞤳𞤮 𞤄𞤢𞥄𞤥𞤢𞤪𞤢𞥄𞤪𞤫 𞤲𞤣𞤫𞤲 𞤸𞤢𞥄𞤤𞤢𞤼𞤢 𞤸𞤢𞤴 𞤳𞤢 𞤺𞤢𞤤𞥆𞤫 𞤥𞤵𞤵𞤲.

𞤐𞤣𞤢𞥄𞤪𞤫𞤲 𞤳𞤢𞤣𞤭 𞤅𞤫𞤲𞤫𞤺𞤢𞤤. 𞤖𞤮𞤤 𞤳𞤮 𞤶𞤢𞥄𞤤𞤭𞤲𞤭 𞤄𞤮𞤤𞤬𞤫𞥅𞤪𞤫 𞤲𞤣𞤫𞤲 𞤣𞤮𞤱 𞤆𞤵𞤤𞤢𞤪 𞤼𞤢𞤱𞤢 𞤤𞤫 𞤥𞤮 𞤬𞤫𞤷𞥆𞤭 𞤅𞤫𞤲𞤫𞤺𞤢𞤤 𞤨𞤫𞤷𞤫 𞤲𞤢𞤴𞤭⹁ 𞤲𞤢𞤴𞤭𞥅𞤶𞤫 𞤯𞤫𞤲 𞤳𞤮 𞤊𞤵𞤤𞤩𞤫 𞤶𞤫𞤴𞤭. 𞤉𞤯𞤫𞤲 𞤶𞤮𞤺𞤭 𞤼𞤮𞤲 𞤊𞤵𞥅𞤼𞤢 𞤚𞤮𞥅𞤪𞤮⹁ 𞤇𞤵𞤲𞤣𞤵 𞤫 𞤊𞤵𞤤𞤢𞤣𞤵. 𞤉𞤯𞤫𞤲 𞤸𞤵𞥅𞤩𞤭𞤼𞤭 𞤅𞤫𞤲𞤫𞤺𞤢𞤤 𞤬𞤮𞤨 𞤧𞤮 𞤱𞤮𞤲𞤢𞥄 𞤳𞤢 𞤬𞤮𞤲𞤺𞤮 𞤃𞤢𞥄𞤴𞤮⹁ 𞤳𞤮𞤲𞤮 𞤸𞤢𞤴 𞤁𞤢𞤳𞤢𞤪 𞤳𞤮 𞤊𞤵𞤤𞤩𞤫 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤼𞤮𞤲. 𞤐𞤮 𞤸𞤢𞥄𞤲𞤵𞤲𞤮𞥅 𞤳𞤢 𞤼𞤢𞤱𞤢𞤼𞤢 𞤅𞤫𞤲𞤫𞤺𞤢𞤤 𞤬𞤮𞤨 𞤲𞤮 𞤸𞤢𞥄𞤤𞤵𞤣𞤫 𞤨𞤵𞤤𞤢𞤪. 𞤑𞤮𞤲𞤮 𞤶𞤮𞥅𞤲𞤭 𞤔𞤮𞤤𞤬𞤫𞥅𞤪𞤫 𞤱𞤢𞤴𞤤𞤭𞤼𞤭𞥅 𞤆𞤵𞤤𞤢𞤪⹁ 𞤸𞤢𞤴 𞤫 𞤺𞤢𞤤𞥆𞤫𞥅𞤶𞤭 𞤊𞤵𞤤𞤩𞤫⹁ 𞤢 𞤼𞤢𞤱𞤢𞤴 𞤳𞤮 𞤏𞤮𞤤𞤮𞤬𞤪𞤫 𞤲𞤣𞤫𞤲 𞤩𞤫 𞤱𞤮𞤲𞤭 𞤸𞤵𞥅𞤱𞤼𞤮𞤪𞤣𞤫.

𞤊𞤭𞥅 𞤳𞤢𞤤𞤢 𞤤𞤫 𞤫𞤯𞤫𞤲 𞤸𞤢𞥄𞤤𞤵𞤣𞤫 𞤯𞤫𞤥𞤯𞤫 𞤯𞤭𞤴𞤢 𞤤𞤫𞤰𞥆𞤭⹁ 𞤯𞤵𞤥 𞤱𞤢𞤯𞤢𞥄𞤤𞤭 𞤸𞤢𞥄 𞤩𞤫 𞤩𞤫𞤴𞤣𞤭 𞤴𞤭𞤯𞤵𞤣𞤫 𞤫𞤲⹁ 𞤯𞤵𞤥 𞤱𞤢𞤯𞤢𞥄𞤤𞤭 𞤸𞤢𞥄 𞤩𞤫 𞤢𞤷𞥆𞤭 𞤴𞤢𞤱𞤢𞥄𞤣𞤫 𞤫𞤲. 𞤑𞤮𞤲𞤮 𞤳𞤮 𞤺𞤮𞥅𞤲𞤺𞤢 𞤥𞤢𞤩𞥆𞤫. 𞤑𞤢𞤤𞤢 𞤢𞤷𞥆𞤵𞤼𞤵𞤯𞤮 𞤳𞤮 𞤶𞤫𞤴𞤭 𞤸𞤢𞤤𞤮𞤪𞤭 𞤲𞤺𞤫𞤤 𞤺𞤮𞥅𞤼𞤯𞤮 𞤺𞤮𞤮⹁ 𞤮𞤲 𞤸𞤢𞤲𞤣𞤢𞥄 𞤫 𞤼𞤫𞤣𞥆𞤭𞤲𞤫𞥅𞤣𞤫.

𞤌𞤲 𞤼𞤭𞤲𞤭𞥅⹁ 𞤳𞤮 𞤲𞤭𞥅 𞤆𞤮𞤪𞤼𞤮𞥅𞤩𞤫 (𞤫𞤪𞤮𞤨𞤲𞤢𞥄𞤩𞤫) 𞤩𞤫𞤲 𞤴𞤢𞤱𞤮𞤪𞤭 𞤩𞤢𞤤𞤫𞥅𞤶𞤮 𞤮𞤲. 𞤑𞤮 𞤲𞤣𞤫 𞤦𞤵𞤺𞤭𞤲𞤮 𞤯𞤫𞤲 𞤳𞤮 𞤶𞤫𞤴𞤵 𞤯𞤫𞤲 𞤳𞤮𞤲⹁ 𞤰𞤫𞤼𞥆𞤵 𞤯𞤫𞤲 𞤳𞤮 𞤥𞤢𞤩𞥆𞤫 𞤳𞤮𞤲⹁ 𞤩𞤫 𞤢𞤲𞤣𞤭𞤪𞤭 𞤫𞤲 𞤸𞤢𞥄𞤲𞤣𞤢𞥄 𞤫 𞤼𞤫𞤣𞥆𞤵𞤲’𞤺𞤢𞤤.

𞤏𞤮𞤲𞤢𞥄 𞤬𞤭𞥅 𞤫𞤲 𞤸𞤢𞥄𞤤𞤭𞥅 𞤯𞤫𞤥𞤺𞤢𞤤 𞤺𞤮𞥅 𞤱𞤢𞤯𞤢𞤼𞤢 𞤶𞤮𞥅𞤥𞤢 𞤲𞤺𞤢𞤤 𞤯𞤫𞤥𞤺𞤢𞤤 𞤴𞤭𞤯𞤢 𞤫𞤲. 𞤑𞤢𞤣𞤭⹁ 𞤳𞤢𞤤𞤢 𞤸𞤮𞤤𞥆𞤵𞤯𞤮 𞤥𞤢 𞤱𞤮𞤲𞤣𞤫𞤥𞤢 𞤮 𞤴𞤭𞤯𞤢𞥄 𞤯𞤫𞤲𞤺𞤢𞤤 𞤥𞤢𞥄𞤯𞤢 ⹁ 𞤮𞤲 𞤯𞤮𞤲 𞤸𞤮𞤤𞥆𞤭𞥅 𞤥𞤢 𞤮 𞤴𞤭𞤯𞤢𞥄 𞤥𞤢.

𞤀𞤱𞤢 𞤱𞤭𞤲𞤣𞤫𞤲 𞤶𞤢𞤲𞤺𞤫𞤲 𞤫 𞤆𞤵𞤤𞤢𞤪 𞤱𞤢𞤤𞥆𞤢 𞤊𞤵𞤤𞤬𞤵𞤤𞤣𞤫. 𞤑𞤮 𞤯𞤵𞤥 𞤪𞤮𞤳𞥆𞤢𞤼𞤢 𞤫𞤲 𞤷𞤫𞤥𞤦𞤫 𞤫 𞤼𞤫𞤣𞥆𞤵𞤲’𞤺𞤢𞤤 𞤸𞤢𞤴 𞤳𞤢 𞤣𞤢𞤱𞤪𞤮.