𞤊𞤀𞤈𞤀𞤐𞤅𞤋 𞤂𞤓𞤃𞤄𞤋𞥅 𞤀𞤈𞤔𞤀𞤐𞤚𞤋𞤐𞤀 𞤍𞤋𞤏𞤚𞤋𞥅

𞤖𞤢𞤲𞤣𞤫 𞤳𞤮 𞤳𞤢𞥄𞤳𞤢𞤪𞤢𞥄𞤶𞤭 𞤼𞤵𞤲 𞤬𞤮𞤼𞥆𞤭 𞤑𞤢𞤼𞤢𞤪

𞤑𞤮 𞤚𞤵𞤲𞤭𞥅𞤧𞤭𞤴𞤢 𞤫 𞤌𞤧𞤼𞤢𞤪𞤢𞤤𞤭𞤴𞤢 𞤢𞤣𞤭𞥅 𞤬𞤭𞤶𞤵𞤣𞤫 𞤸𞤢𞤲𞤣𞤫. 𞤑𞤮𞤲𞤮 𞤸𞤢𞥄 𞤶𞤮𞥅𞤲𞤭 𞤶𞤢𞤤𞤦𞤢𞤲𞤢𞥄𞤤𞤭 𞤤𞤫𞤴𞤯𞤫 𞤀𞤬𞤪𞤭𞤳 𞤴𞤢𞤸𞤵𞤯𞤫 𞤯𞤫𞤲 𞤑𞤢𞤼𞤢𞤪 𞤧𞤭 𞤱𞤮𞤲𞤢𞥄 𞤅𞤫𞤲𞤫𞤺𞤢𞤤. 𞤖𞤢𞤴 𞤌𞤧𞤼𞤢𞤪𞤢𞤤𞤭𞤴𞤢⹁ 𞤤𞤫𞤴𞤲𞤣𞤭 𞤲𞤣𞤭 𞤢𞤲𞤣𞤭𞤪𞤢𞥄𞤳𞤢 𞤼𞤭𞥅𞤯𞤲𞤢𞥄𞤪𞤫 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫⹁ 𞤨𞤭𞤴𞤵𞤲𞤮 𞤚𞤵𞤲𞤭𞥅𞤧𞤭𞤴𞤢.

𞤑𞤮 𞤃𞤭𞤼𞤷𞤮𞤤 𞤁𞤴𞤵𞤳 𞤱𞤮𞤲𞤭 𞤳𞤮 𞤲𞤢𞥄𞤣𞤢𞤲𞤭 𞤌𞤧𞤼𞤢𞤪𞤢𞤤𞤭𞤴𞤢 𞤳𞤵𞥅𞤤𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥒𞥓. 𞤃𞤵𞤤𞥆𞤫𞤪𞤫 𞤲𞤣𞤫𞤲 𞤳𞤮 𞤫 𞤳𞤮𞤴𞤯𞤫 𞤬𞤭𞤶𞤢𞤲𞤮𞥅𞤱𞤮 𞤚𞤵𞤲𞤭𞥅𞤧𞤭𞤴𞤢 𞤲𞤣𞤫 𞤼𞤢𞤨𞥆𞤭𞥅 𞤧𞤭 𞤃𞤭𞤼𞤷𞤮𞤤 𞤦𞤮𞥅𞤼𞤭 𞤲𞤣𞤫⹁ 𞤲𞤣𞤫 𞤲𞤢𞥄𞤼𞤮𞤴𞤭. 𞤊𞤭𞥅 𞤳𞤢𞤤𞤢 𞤊𞤢𞤪𞤢𞤲𞤧𞤭 𞤨𞤭𞤴𞤵𞤲𞤮 𞤩𞤫⹁ 𞤶𞤮𞥅𞤲𞤭 𞤳𞤮 𞤌𞤧𞤼𞤢𞤪𞤢𞤤𞤭𞤴𞤢 𞤱𞤮𞤲𞤭 𞤯𞤭𞤯𞤢𞤩𞤮 𞤫 𞤣𞤫𞤲𞤼𞤢𞤤 𞤥𞤢𞤩𞥆𞤫 𞤲𞤺𞤢𞤤. 𞤒𞤮 𞤚𞤵𞤲𞤭𞥅𞤧𞤭𞤴𞤢 𞤬𞤵𞤯𞥆𞤮 𞤥𞤮𞥅𞤩𞤵𞤣𞤫 𞤳𞤭𞤧𞤢𞤲 𞤧𞤢𞤦𞤵𞤲𞤢 𞤩𞤫 𞤱𞤢𞥄𞤱𞤭𞥅 𞤤𞤵𞤥𞤦𞤵𞤣𞤫 𞤱𞤮𞥅 𞤧𞤭 𞤩𞤫 𞤨𞤭𞤴𞤭𞥅 𞤊𞤢𞤪𞤢𞤲𞤧𞤭. 𞤑𞤮𞤲𞤮 𞤪𞤮𞤲𞤳𞤵𞤯𞤮 𞤌𞤧𞤼𞤢𞤪𞤢𞤤𞤭𞤴𞤢 𞤩𞤫 𞤊𞤢𞤪𞤢𞤲𞤧𞤭 𞤻𞤢𞤥𞥆𞤭𞤲𞤭 𞤳𞤵𞥅𞤤𞤫 𞤲𞤢𞤴𞤭⹁ 𞤢𞤤𞤢𞥄 𞤳𞤮 𞤮𞤲 𞤱𞤢𞥄𞤱𞤢𞤲𞤭 𞤊𞤢𞤪𞤢𞤲𞤧𞤭.

𞤇𞤢𞥄𞤱𞤮 𞤲𞤺𞤮𞤲 𞤬𞤭𞤶𞤮 𞤯𞤮𞤲⹁ 𞤳𞤮 𞤆𞤮𞤤𞤮𞤻⹁ 𞤤𞤫𞤴𞤣𞤭 𞤤𞤫𞤾𞤢𞤣𞤮𞤱𞤧𞤳𞤭 𞤲𞤣𞤭𞤲⹁ 𞤳𞤢𞥄𞤳𞤢𞤪𞤢𞥄𞤶𞤮 𞤳𞤢𞤣𞤭 𞤳𞤢 𞤤𞤢𞤼𞤮 𞤥𞤵𞤤𞥆𞤫𞤪𞤫⹁ 𞤬𞤮𞤼𞥆𞤭 𞤫 𞤅𞤢𞤱𞤵𞤣𞤭𞥅. 𞤄𞤵𞤴 𞤲𞤮 𞤴𞤮𞤱𞤵𞤲𞤮𞥅 𞤶𞤭𞤳𞥆𞤫 𞤫 𞤥𞤢𞤩𞥆𞤫 𞤩𞤢𞥄𞤱𞤮 𞤩𞤫 𞤸𞤫𞤪𞤧𞤭𞤲𞤣𞤫 𞤀𞤪𞤶𞤢𞤲𞤼𞤭𞤲𞤢𞥄 𞤲𞤣𞤫𞤴𞤢 𞤻𞤢𞤤𞤲𞤣𞤫. 𞤑𞤮𞤲𞤮 𞤴𞤫𞤤𞤢 𞤳𞤢𞤲 𞤳𞤮 𞤯𞤮𞤲 𞤸𞤢𞥄𞤯𞤭⹁ 𞤧𞤢𞤦𞤵𞤲𞤢 𞤸𞤢𞤲𞤣𞤫 𞤩𞤫 𞤥𞤵𞥅𞤯𞤭𞤲𞤢𞤲𞤮 𞤲𞤶𞤢𞥄𞤪𞤫 𞤷𞤫𞥅𞤲𞤢𞤤 𞤥𞤢𞤩𞥆𞤫 𞤲𞤺𞤢𞤤. 𞤐𞤮 𞤺𞤢𞤧𞤢 𞤄𞤫𞤲 𞤅𞤢𞤤𞤥𞤢𞥄𞤲𞤢 𞤶𞤢𞤩𞤭𞤼𞤢𞤴 𞤱𞤫𞤪𞤤𞤢𞥄𞤶𞤫 𞤯𞤫 𞤮 𞤪𞤮𞤳𞥆𞤭 𞤩𞤫 𞤯𞤫𞤲. 𞤐𞤢𞤲𞤣𞤭 𞤸𞤢𞤪𞤭 𞤸𞤭𞤩𞤫 𞤧𞤭𞤳𞥆𞤵𞤣𞤫 𞤩𞤫 𞤰𞤫𞤼𞥆𞤭𞥅 𞤬𞤫𞤤𞤺𞤮 𞤲𞤺𞤮𞤲 𞤩𞤢𞥄𞤱𞤮 𞤩𞤫 𞤨𞤭𞤴𞤵𞤣𞤫 𞤀𞤪𞤶𞤢𞤲𞤼𞤭𞤲𞤢. 𞤇𞤢𞥄𞤱𞤮 𞤯𞤵𞤥⹁ 𞤥𞤮 𞤳𞤢𞤤𞤢 𞤫 𞤥𞤢𞤩𞥆𞤫 𞤸𞤫𞤲𞤣𞤭𞤲𞤢𞤲𞤮 𞤱𞤫𞤪𞤤𞤢𞤱𞤢𞤤 𞤲𞤺𞤢𞤤 𞤷𞤮𞤺𞥆𞤵 𞤥𞤵𞤵𞤲 𞤱𞤮𞤲𞤭 𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤶𞤮𞤱𞤭 𞤣𞤢𞤤𞤢.

𞤑𞤮 𞤟𞤫𞤤𞤫𞤲𞤧𞤳𞤭 𞤲𞤢𞥄𞤣𞤢𞤲𞤭 𞤆𞤮𞤤𞤮𞤻 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥓𞥙 𞤩𞤢𞥄𞤱𞤮 𞤂𞤫𞤱𞤢𞤲𞤣𞤮𞤧𞤳𞤭 𞤪𞤮𞤼𞥆𞤢𞤲𞤣𞤫 𞤥𞤮. 𞤑𞤮 𞤂𞤫𞤾𞤢𞤣𞤮𞤧𞤳𞤭 𞤼𞤭𞤺𞤭 𞤲𞤢𞥄𞤣𞤭 𞤳𞤵𞥅𞤳𞤢𞤤 𞤯𞤭𞤯𞤢𞤩𞤢𞤤 𞤲𞤺𞤢𞤤 . 𞤔𞤮𞥅𞤲𞤭 𞤳𞤮 𞤳𞤢𞤲𞤩𞤫 𞤱𞤮𞤲𞤭 𞤸𞤮𞥅𞤪𞤫 𞤣𞤫𞤲𞤼𞤢𞤤 𞤥𞤢𞤩𞥆𞤫 𞤲𞤺𞤢𞤤.


𞤉 𞤬𞤭𞤶𞤮 𞤸𞤭𞤳𞥆𞤭𞥅𞤲𞤺𞤮 𞤲𞤺𞤮𞤲 𞤯𞤮𞤲⹁ 𞤊𞤢𞤪𞤢𞤲𞤧𞤭 𞤨𞤭𞤴𞤵𞤲𞤮 𞤁𞤢𞤲𞤥𞤢𞤪𞤳⹁ 𞤲𞤣𞤫 𞤑𞤭𞤤𞤭𞤴𞤢𞤲 𞤐𞤦𞤢𞤨𞥆𞤫 𞤧𞤭𞤱𞤼𞤢𞤲𞥆𞤮𞥅 𞤩𞤫 𞤳𞤵𞥅𞤤𞤫 𞤯𞤭𞤯𞤭. 𞤑𞤮𞤲𞤮 𞤁𞤢𞤲𞤥𞤢𞤪𞤳 𞤭𞤼𞥆𞤵𞤲𞤮 𞤺𞤮𞥅𞤼𞤢𞤤.

𞤑𞤭𞤨𞥆𞤮𞤤 𞤊𞤢𞤪𞤢𞤲𞤧𞤭 𞤲𞤺𞤮𞤤 𞤤𞤵𞤥𞤦𞤭𞥅 𞤸𞤢𞤲𞤣𞤫 𞤩𞤢𞥄𞤱𞤮 𞤩𞤫 𞤼𞤭𞤥𞥆𞤭𞤲𞤣𞤫 𞤼𞤮𞤩𞥆𞤫 𞤶𞤫𞥅𞤺𞤮𞤮. 𞤁𞤢𞤲𞤥𞤢𞤪𞤳 𞤬𞤭𞤶𞤵𞤲𞤮 𞤥𞤮𞤰𞥆𞤢 𞤳𞤮𞤲𞤮 𞤯𞤵𞤥 𞤴𞤮𞤲𞤢𞥄𞤤𞤭 𞤲𞤣𞤫 𞤼𞤢𞤱𞤵𞤲𞤮𞥅 𞤊𞤢𞤪𞤢𞤲𞤧𞤭 𞤸𞤮𞤤𞥆𞤭𞥅 𞤴𞤫𞤪𞤵 𞤥𞤢𞤩𞥆𞤫 𞤯𞤵𞥅𞤯𞤢𞥄 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤫 𞤲𞤣𞤫𞤪 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲. 𞤏𞤵𞤪𞤭𞤲⹁ 𞤳𞤮 𞤳𞤢𞤥𞤩𞤫 𞤶𞤮𞤺𞤭𞥅 𞤬𞤫𞤤𞤺𞤮 𞤲𞤺𞤮𞤲 𞤬𞤫𞤱𞤲𞤣𞤮 𞤯𞤮𞥅.

𞤑𞤮 𞤀𞤪𞤶𞤢𞤲𞤼𞤭𞤲𞤢 𞤫 𞤃𞤫𞤳𞤧𞤭𞤳 𞤸𞤮𞤥𞤦𞤭 𞤻𞤢𞤤𞥆𞤢𞤤 𞤲𞤺𞤢𞤤 𞤸𞤢𞤲𞤣𞤫. 𞤔𞤢𞤳𞤢 𞤸𞤢𞤪𞤭 𞤀𞤪𞤶𞤢𞤲𞤼𞤭𞤲𞤢 𞤲𞤮 𞤯𞤢𞤩𞥆𞤵𞤣𞤫 𞤳𞤢 𞤬𞤭𞤼𞥆𞤢 𞤺𞤮𞤥𞤯𞤭 𞤦𞤢𞤯𞤼𞤢𞤲𞤫 𞤸𞤫𞤪𞤧𞤢 𞤳𞤢 𞤩𞤫 𞤸𞤫𞤩𞤵𞤲𞤮𞥅 𞤫 𞤤𞤫𞤴 𞤳𞤮𞤴𞤯𞤫 𞤅𞤢𞤱𞤵𞤣𞤭𞥅. 𞤇𞤫 𞤭𞤼𞥆𞤵𞤲𞤮 𞤮𞤲 𞤥𞤮𞤲𞤫𞥅 𞤬𞤮𞤨 𞤫 𞤃𞤫𞤳𞤧𞤭𞤳 𞤧𞤢𞤦𞤵𞤲𞤢 𞤩𞤫 𞤨𞤭𞤴𞤵𞤲𞤮 𞤩𞤫𞤲 𞤳𞤵𞥅𞤤𞤫 𞤯𞤭𞤯𞤭.

𞤃𞤫𞤧𞤭 𞤲𞤢𞥄𞤣𞤭 𞤺𞤮𞥅𞤼𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥔 𞤩𞤢𞥄𞤱𞤮 𞤁𞤭 𞤃𞤢𞤪𞤭𞤴𞤢 𞤪𞤮𞤼𞥆𞤢𞤲𞤣𞤫 𞤥𞤮. 𞤑𞤢 𞤸𞤮𞤶𞤮𞤥𞤢𞥄𞤪𞤫 𞥘𞥗⹁ 𞤉𞤲𞥁𞤮 𞤊𞤫𞤪𞤲𞤢𞤦𞤲𞤣𞤫𞥁 𞤯𞤭𞤯𞤥𞤭𞤼𞤢𞤲𞤭 𞤀𞤪𞤶𞤢𞤲𞤼𞤭𞤲𞤢 𞤩𞤢𞥄𞤱𞤮 𞤃𞤫𞤧𞤭 𞤬𞤫𞤰𞥆𞤭𞤲𞤢𞤣𞤫 𞤥𞤮 𞤥𞤵𞤤𞥆𞤫𞤪𞤫 𞤲𞤣𞤫𞤲.

𞤔𞤮𞥅𞤲𞤭 𞤳𞤮 𞤀𞤪𞤶𞤢𞤲𞤼𞤭𞤲𞤢 𞤱𞤮𞤲𞤭 𞤯𞤭𞤯𞤢𞤩𞤮 𞤫 𞤣𞤫𞤲𞤼𞤢𞤤 𞤥𞤢𞤩𞥆𞤫 𞤲𞤺𞤢𞤤. 𞤑𞤢𞤥𞤩𞤫 𞤫 𞤅𞤢𞤱𞤵𞤣𞤭𞥅⹁ 𞤥𞤮 𞤳𞤢𞤤𞤢 𞤫 𞤥𞤢𞤩𞥆𞤫 𞤲𞤮 𞤥𞤢𞤪𞤭 𞤼𞤮𞤩𞥆𞤫 𞤼𞤢𞤼𞤭. 𞤑𞤮𞤲𞤮 𞤸𞤭𞤩𞤫 𞤬𞤫𞤰𞥆𞤭𞤼𞤮𞤪𞤭 𞤅𞤢𞤱𞤵𞤣𞤭𞥅 𞤫𞤥𞤦𞤫𞤪𞤫 𞤳𞤵𞥅𞤤𞤫 𞤲𞤢𞥄𞤣𞤢𞥄𞤯𞤫. 𞤆𞤮𞤤𞤮𞤻 𞤳𞤢𞤲 𞤲𞤮 𞤥𞤢𞤪𞤭 𞤼𞤮𞤩𞥆𞤫 𞤲𞤢𞤴𞤭.

𞤉 𞤲𞤺𞤢𞥄𞤤 𞤣𞤫𞤲𞤼𞤢𞤤 𞤯𞤮𞤮⹁ 𞤸𞤢𞤴 𞤺𞤮𞥅𞤼𞤮 𞤴𞤢𞤤𞤼𞤢𞥄𞤤𞤭 𞤼𞤢𞤸𞤮. 𞤃𞤮 𞤳𞤢𞤤𞤢 𞤫 𞤥𞤢𞤩𞥆𞤫 𞤲𞤮 𞤥𞤢𞤪𞤭 𞤤𞤢𞥄𞤱𞤮𞤤 𞤲𞤮 𞤤𞤵𞤥𞤦𞤭𞤪𞤢 𞤬𞤭𞥅 𞤳𞤢𞤤𞤢 𞤲𞤺𞤮𞤤 𞤲𞤭𞤩𞥆𞤭𞤼𞤢𞤲𞤭𞥅 𞤃𞤫𞤳𞤧𞤭𞤳𞤮 𞤬𞤮𞤼𞤢 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤼𞤮𞤩𞥆𞤫𞤪𞤫 𞤱𞤮𞥅𞤼𞤫𞤪𞤫 𞤨𞤫𞤼 𞤩𞤫 𞤥𞤢𞤪𞤭.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪.