𞤊𞤀𞤈𞤀𞤐𞤔𞤋 𞤘𞤋𞤐𞤉 𞤍𞤋𞤐 𞤁𞤓𞥅𞤇𞤋𞤚𞤋𞥅 𞥖𞥒. 𞤆𞤉𞤎𞥆𞤌𞤂 𞤃𞤀𞤔𞥆𞤋 𞤉 𞤑𞤌 𞤈𞤌𞤑𞥆𞤀𞤚𞤀 𞤍𞤋 𞤕𞤉𞤃𞤄𞤉.

𞤑𞤮 𞤫 𞤺𞤮𞤮 𞤤𞤫𞤱𞤪𞤵 𞤐𞤦𞤮𞥅𞤴𞤮⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐⹁ 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤧𞤭𞤲𞤷𞤢𞤲𞤭 𞤸𞤮𞥅𞤪𞤫 𞤥𞤵𞤵𞤲 𞤳𞤢𞥄𞤤𞤭𞤧𞤭 𞤳𞤮 𞤸𞤵𞥅𞤱𞤼𞤮𞤪𞤫𞥅 𞤫 𞤥𞤢𞤴𞤪𞤭. 𞤑𞤮 𞤸𞤢𞤲𞤣𞤫 𞤫 𞤺𞤮𞤮 𞤲𞤦𞤮𞥅𞤴𞤮 𞤸𞤭𞤼𞤢𞥄𞤲𞤣𞤫 𞥒𞥐𞥒𞥒 𞤣𞤵𞥅𞤩𞤭𞤼𞤭 𞥖𞥒 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮 𞤫 𞤯𞤭𞤯𞤭) 𞤺𞤭𞤤𞤢 𞤯𞤭 𞤧𞤭𞤲𞤷𞤢𞥄.

𞤂𞤢𞥄𞤥𞤵 𞤺𞤭𞤲𞤫 𞤲𞤺𞤵𞤲 𞤭𞤲𞥆𞤭 𞤲𞤦𞤵𞥅𞤯𞤭 𞤯𞤭𞤲 “𞤊𞤢𞤪𞤢𞤲 𞤘𞤭𞤲𞤫“. 𞤇𞤫 𞤴𞤫𞤪𞤭𞤲𞥋𞤣𞤭𞤪𞤭 𞤊𞤢𞤪𞤢𞤲 𞤘𞤭𞤲𞤫 𞤺𞤮𞥅𞤼𞤮 𞤉 𞤬𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮. (𞥑 FG = 𞥑 FCFA).
𞤑𞤮 𞤢𞤣𞤭𞥅 𞤯𞤭𞥅 𞤳𞤢𞥄𞤤𞤭𞤧𞤭𞥅𞤶𞤭 𞤧𞤭𞤲𞤷𞤫𞥅𞤲𞤣𞤫⹁ 𞤸𞤢𞤪𞤭 𞤘𞤭𞤲𞤫 𞤳𞤢𞤣𞤭 𞤳𞤮 𞤊𞤢𞤪𞤢𞤲 𞤅𞤫𞥅𞤬𞤢𞥄 (FCFA) 𞤸𞤵𞥅𞤱𞤼𞤮𞤪𞤢𞤴𞤲𞤮𞥅 𞤱𞤢𞤲𞤮 𞤯𞤫𞤴𞤢 𞤤𞤫𞤴𞤯𞤫 𞤖𞤢𞥄𞤤𞤭-𞤬𞤢𞤪𞤢𞤲𞤧𞤫𞥅𞤶𞤫 𞤖𞤭𞤪𞤲𞤢 𞤀𞤬𞤪𞤭𞤳.

𞤊𞤭𞥅 𞤳𞤮 𞤣𞤢𞤱𞤪𞤢 𞤥𞤢𞤤𞥆𞤢 𞤳𞤮 𞤸𞤫𞤩𞥆𞤭𞤼𞤮𞥅 𞤯𞤭𞥅 𞤲𞤦𞤵𞥅𞤯𞤭 𞤳𞤫𞤧𞤭⹁ 𞤤𞤢𞥄𞤥𞤩𞤫 𞤘𞤭𞤲𞤫 𞤩𞤫𞤲 𞤵𞤣𞥆𞤭𞤼𞤭 𞤃𞤢𞤲𞤳𞤭𞤪𞤺𞤢𞤤 𞤂𞤢𞤪𞤢𞤲𞤳𞤮𞤱𞤢𞤤 (Banque d’État)⹁ 𞤪𞤫𞤬𞤼𞤭 𞤩𞤫 𞤥𞤢𞤩𞥆𞤭 𞤥𞤢𞤲𞤳𞤭𞤪𞤯𞤫 𞤸𞤫𞤪𞤼𞤮𞤪𞤢𞥄𞤯𞤫 𞤯𞤫𞤲 𞤬𞤮𞤨 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲. 𞤇𞤫 𞤼𞤮𞤽𞤭 𞤳𞤢𞤣𞤭 𞤵𞤣𞥆𞤵𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤳𞤫𞤧𞤫 . 𞤑𞤮 𞤱𞤮𞤲𞤭 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤥𞤢𞤤𞥆𞤢 𞤸𞤫𞤪𞤼𞤮𞤪𞤢𞥄𞤯𞤫⹁ 𞤳𞤮 𞤥𞤢𞤲𞤳𞤭𞤪𞤯𞤫 𞤯𞤫 𞤴𞤭𞤥𞤩𞤫 𞤩𞤫𞤲 𞤶𞤫𞤴𞤢𞤲𞤭 𞤸𞤮𞥅𞤪𞤫 𞤥𞤵𞤵𞤲 𞤸𞤢𞤪𞤢 𞤤𞤢𞥄𞤥𞤵 𞤲𞤺𞤵𞤲 𞤶𞤫𞤴𞤢𞥄. 𞤘𞤭𞤤𞤢 𞤮𞤲𞤼𞤵𞤥𞤢 𞤸𞤢𞥄 𞤲𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤥𞤢𞥄𞤴𞤭⹁ 𞤤𞤢𞥄𞤥𞤵 𞤘𞤭𞤲𞤫 𞤲𞤺𞤵𞤲 𞤲𞤫𞤱𞤲𞤢𞤲𞤢𞥄𞤤𞤭 𞤸𞤢𞤴 𞤺𞤮𞥅𞤼𞤮 𞤵𞤣𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤺𞤢𞤤 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲.

𞤇𞤢𞥄𞤱𞤮 𞤯𞤭𞥅 𞤳𞤢𞥄𞤤𞤭𞤧𞤭𞥅𞤶𞤭 𞤴𞤤𞤢𞤼𞤭𞤲𞤫𞥅𞤣𞤫⹁ 𞤯𞤭 𞤸𞤫𞤩𞤵𞤲𞤮 𞤷𞤢𞤯𞤫𞥅𞤤𞤫 𞤯𞤵𞥅𞤯𞤵𞤯𞤫 𞤲𞤮𞤲. 𞤐𞤮 𞤶𞤫𞤴𞤢𞥄 𞤫 𞤯𞤫𞤲⹁ 𞤲𞤣𞤫 𞤼𞤢𞤱𞤵𞤲𞤮𞥅 𞤊𞤢𞤪𞤢𞤲 𞤘𞤭𞤲𞤫 𞤳𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤼𞤢𞤲 𞤸𞤵𞥅𞤱𞤼𞤮𞤪𞤼𞤫𞥅 𞤬𞤭𞥅 𞤧𞤮𞥅𞤣𞤵𞤺𞤮𞤤. 𞤐𞤣𞤫 𞤼𞤢𞤱𞤵𞤲𞤮𞥅⹁ 𞤶𞤢𞤲𞤢𞤲𞤩𞤫 𞤩𞤫𞤲 𞤧𞤭 𞤸𞤫𞤩𞤭𞥅 𞤳𞤢𞥄𞤤𞤭𞤧𞤭 𞤘𞤭𞤲𞤫⹁ 𞤩𞤫 𞤱𞤢𞥄𞤱𞤢𞤼𞤢𞥄 𞤲𞤢𞤩𞤼𞤵𞤣𞤫 𞤯𞤭 𞤳𞤢 𞤥𞤢𞤩𞥆𞤫⹁ 𞤊𞤢𞤪𞤢𞤲𞤧𞤭𞥅𞤩𞤫 𞤩𞤫𞤲 𞤫 𞤶𞤢𞤲𞤢𞤲𞤩𞤫 𞤸𞤫𞤣𞥆𞤭𞤲𞤮𞥅𞤩𞤫 𞤩𞤫𞤲 𞤘𞤭𞤲𞤫 𞤣𞤢𞤪𞤼𞤭𞤲𞤭 𞤥𞤵𞤪𞤢𞥄𞤯𞤭 𞤥𞤢𞤩𞥆𞤫⹁ 𞤩𞤫 𞤪𞤵𞤼𞥆𞤭𞥅 𞤳𞤢 𞤥𞤢𞤩𞥆𞤫.

𞤐𞤣𞤫 𞤘𞤭𞤲𞤫 𞤸𞤫𞤩𞤼𞤭𞤼𞤭𞤲𞤮𞥅⹁ 𞤊𞤢𞤪𞤢𞤲𞤧𞤭 𞤼𞤮𞤽𞤵𞤲𞤮 𞤭𞤼𞥆𞤵𞤺𞤮𞤤 𞤨𞤭𞥅𞤶𞤭 𞤊𞤢𞤪𞤢𞤲𞤧𞤭 𞤲𞤢𞤩𞤢 𞤯𞤭 𞤘𞤭𞤲𞤫. 𞤊𞤢𞤪𞤢𞤲𞤧𞤭 𞤼𞤮𞤽𞤭 𞤳𞤢𞤣𞤭 𞤭𞤼𞥆𞤵𞤺𞤮𞤤 𞤊𞤢𞤪𞤢𞤲𞤶𞤭 𞤊𞤢𞤪𞤢𞤲𞤧𞤭 𞤯𞤭𞤲 𞤲𞤢𞤩𞤢 𞤯𞤭 𞤘𞤭𞤲𞤫. 𞤌𞤲𞤼𞤵𞤥𞤢⹁ 𞤳𞤢𞥄𞤤𞤭𞤧𞤭𞥅𞤶𞤭 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤯𞤫𞤲 𞤧𞤢𞤯𞤭 𞤫 𞤲𞤣𞤫𞤪 𞤘𞤭𞤲𞤫. 𞤉 𞤸𞤭𞤲𞤤𞤫 𞤳𞤮 𞤯𞤭𞤲 𞤨𞤭𞥅𞤶𞤭 𞤧𞤮𞥅𞤣𞤭𞤪𞤼𞤫𞥅 𞤳𞤢 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤢𞤣𞥆𞤫𞥅 𞤘𞤭𞤲𞤫.

𞤐𞤣𞤫 𞤲𞤦𞤵𞥅𞤯𞤭 𞤶𞤢𞤲𞤢𞤲𞤭 𞤯𞤭𞤲 𞤧𞤢𞤯𞤵𞤲𞤮𞥅 𞤘𞤭𞤲𞤫⹁ 𞤷𞤮𞤺𞥆𞤵 𞤥𞤢𞤶𞥆𞤭 𞤰𞤢𞤱𞤭 𞤬𞤮𞤼𞤢⹁ 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲 𞤼𞤭𞤨𞥆𞤭𞥅 𞤬𞤮𞤼𞤢. 𞤇𞤢𞤴𞤼𞤭 𞤤𞤫 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤳𞤮 𞤳𞤢 𞤶𞤢𞤲𞤢𞤲𞤭𞤪𞤭 𞤭𞤱𞤢𞤴𞤲𞤮𞥅 𞤫 𞤸𞤭𞤲𞤤𞤫 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲 𞤴𞤢𞤲𞤭𞥅⹁ 𞤷𞤮𞤺𞥆𞤵 𞤨𞤭𞥅𞤶𞤭 𞤯𞤭𞤲 𞤰𞤢𞤱𞤭 𞤬𞤮𞤼𞤢 𞤳𞤢 𞤤𞤵𞥅𞤥𞤮.

𞤐𞤮 𞤨𞤭𞥅𞤶𞤭 𞤧𞤢𞤯𞤭𞤪𞤭 𞤱𞤮𞥅⹁ 𞤳𞤮 𞤲𞤮𞤲 𞤷𞤮𞤺𞥆𞤵 𞤥𞤢𞤶𞥆𞤭 𞤩𞤫𞤴𞤣𞤮𞤪𞤼𞤢⹁ 𞤳𞤮𞤲 𞤲𞤮𞤲 𞤳𞤢𞤣𞤭 𞤳𞤢𞥄𞤤𞤭𞥅𞤧𞤭𞥅𞤶𞤭 𞤘𞤭𞤲𞤫 𞤯𞤭𞤲 𞤶𞤢𞥄𞤧𞤭𞤪𞤼𞤢.

𞤊𞤭𞥅 𞤸𞤫𞤩𞥆𞤭𞤼𞤢𞤺𞤮𞤤 𞤯𞤫𞥅 𞤷𞤢𞤯𞤫𞥅𞤤𞤫 𞤫 𞤶𞤵𞤺𞥆𞤭𞤲𞤺𞤮𞤤 𞤲𞤦𞤵𞥅𞤯𞤭 𞤘𞤭𞤲𞤫 𞤯𞤭𞤲⹁ 𞤅𞤫𞥅𞤳𞤵 𞤚𞤵𞥅𞤪𞤫 𞤧𞤮𞤳𞤭 𞤳𞤫𞥅𞤪𞤭 𞤘𞤭𞤲𞤫 𞤯𞤭𞤲 𞤬𞤮𞤨. 𞤌 𞤼𞤮𞤽𞤢𞤲𞤭 𞤴𞤭𞤥𞤩𞤫 𞤩𞤫𞤲 𞤴𞤫𞥅𞤴𞤵𞤺𞤮𞤤 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤭𞤱𞤢𞤴𞤯𞤭 𞤳𞤢 𞤶𞤢𞤲𞤢𞤲𞤭𞤪𞤭⹁ 𞤱𞤢𞤲𞤮 𞤥𞤢𞥄𞤪𞤮⹁ 𞤤𞤫𞤱𞤻𞤢𞤲 (𞤧𞤵𞤳𞥆𞤢𞤪)⹁ 𞤲𞤫𞤦𞥆𞤢𞤲 𞤫 𞤳𞤮 𞤲𞤢𞤲𞤣𞤭 𞤫 𞤯𞤭𞥅. 𞤚𞤢𞤱𞤭 𞤳𞤮 𞤤𞤢𞥄𞤥𞤵 𞤲𞤺𞤵𞤲 𞤴𞤫𞥅𞤴𞤢𞤼𞤢 𞤯𞤭𞤲.

𞤐𞤣𞤫 𞤷𞤢𞤯𞤫𞥅𞤤𞤫 𞤯𞤫𞤲 𞤯𞤵𞥅𞤯𞤭𞤪𞤲𞤮𞥅 𞤤𞤢𞥄𞤥𞤩𞤫 𞤘𞤭𞤲𞤫 𞤩𞤫𞤲⹁ 𞤫 𞤲𞤮 𞤩𞤫 𞤤𞤭𞤩𞤭𞤪𞤢 𞤲𞤶𞤵𞤤𞤢𞥄𞤩𞤫 𞤩𞤫𞤲⹁ 𞤻𞤢𞤤𞤲𞤣𞤫 𞥒 𞤒𞤢𞤪𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥗𞥒⹁ 𞤤𞤢𞥄𞤥𞤩𞤫 𞤘𞤭𞤲𞤫 𞤩𞤫𞤲⹁ 𞤱𞤢𞤴𞤤𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲⹁ 𞤩𞤫 𞤤𞤮𞤲𞤼𞤭𞤲𞤭𞤪𞤭 𞤯𞤭 𞤳𞤢𞥄𞤤𞤭𞤧𞤭𞥅𞤶𞤭 𞤳𞤫𞤧𞤭⹁ 𞤯𞤭 𞤩𞤫 𞤭𞤲𞥆𞤭 𞤅𞤭𞤤𞤭 (𞤻𞤭𞥅𞤱𞤢 𞤥𞤢𞤤𞥆𞤢 𞤥𞤢𞤱𞤦𞤢 𞤳𞤢 𞤧𞤮𞥅𞤧𞤮𞥅𞤪𞤫).

𞤊𞤢𞤪𞤢𞤲𞤶𞤭 𞤧𞤢𞤨𞥆𞤮⹁ 𞤤𞤮𞤲𞤼𞤭𞤲𞤭𞤪𞤢𞥄 𞤅𞤭𞤤𞤭𞥅𞤪𞤵 𞤱𞤮𞥅𞤼𞤵𞤪𞤵. 𞤍𞤵𞤥 𞤧𞤢𞤦𞤭𞤲𞤭 𞤴𞤫𞥅𞤦𞤢𞤺𞤮𞤤 𞤶𞤢𞤱𞤤𞤫 𞤯𞤵𞥅𞤯𞤵𞤯𞤫. 𞤅𞤭 𞤢𞤯𞤢 𞤥𞤢𞤪𞤵𞤲𞤮𞥅 𞤼𞤫𞥅𞤥𞤫𞤣𞤫𞤪𞤫 𞤢𞤣𞤮 𞤅𞤭𞤤𞤭⹁ 𞤶𞤮𞥅𞤲𞤭 𞤳𞤮 𞤧𞤢𞤨𞥆𞤮 𞤸𞤫𞤣𞥆𞤮𞤪𞤯𞤢𞥄. 𞤍𞤵𞤥 𞤤𞤫⹁ 𞤳𞤮 𞤱𞤢𞤴𞤤𞤭𞤲𞤮𞥅 𞤼𞤢𞤲⹁ 𞤳𞤮 𞤭𞤲𞤣𞤫 𞤲𞤦𞤵𞥅𞤯𞤭 𞤯𞤭𞤲. 𞤏𞤮𞤲𞤢𞥄 𞤱𞤮𞤲𞤣𞤫𞤥𞤢 𞤳𞤮 𞤲𞤦𞤵𞥅𞤯𞤭 𞤶𞤢𞤲𞤢𞤲𞤭 𞤢𞤣𞥆𞤢𞥄.

𞤋𞤼𞥆𞤵𞤺𞤮𞤤 𞤊𞤢𞤪𞤢𞤲 𞤢𞤣𞥆𞤢 𞤅𞤭𞤤𞤭 𞤧𞤫𞤲𞤣𞤢𞥄𞤲𞤮 𞤘𞤭𞤲𞤫 𞤫 𞤷𞤢𞤯𞤫𞥅𞤤𞤫. 𞤚𞤢𞤥𞤨𞤫𞤪𞤫 𞤲𞤣𞤫𞤲 𞤫 𞤼𞤮𞤪𞥆𞤢 𞤳𞤢𞤲 𞤩𞤵𞤪𞤼𞤵𞤲𞤮 𞤩𞤫𞤴𞤣𞤢𞥄𞤣𞤫. 𞤑𞤮 𞤱𞤢𞤯𞤭 𞤯𞤵𞤥⹁ 𞤳𞤮 𞤩𞤢𞤴𞤼𞤭 𞤳𞤫𞥅𞤪𞤭 𞤯𞤭𞤲 𞤧𞤮𞤳𞤼𞤢𞤲𞤮𞥅𞤳𞤢 𞤬𞤭𞥅 𞤲𞤮 𞤴𞤭𞤥𞤩𞤫 𞤩𞤫𞤲 𞤧𞤮𞥅𞤣𞤭𞤪𞤮𞤴𞤢 𞤨𞤭𞥅𞤶𞤭 𞤢𞤣𞥆𞤢 𞤺𞤭𞤲𞤫. 𞤚𞤢𞤱𞤼𞤭 𞤳𞤢𞤣𞤭⹁ 𞤥𞤢𞤲𞤳𞤭𞤪𞤯𞤫 𞤯𞤫𞤲 𞤫 𞤴𞤫𞥅𞤴𞤭𞤪𞤤𞤫 𞤥𞤢𞤱𞤯𞤫 𞤯𞤫𞤲 𞤣𞤵𞤽𞤭𞤲𞤢𞤲𞤮𞥅𞤳𞤢 𞤳𞤢𞤣𞤭 𞤵𞤣𞥆𞤭𞤼𞤵𞤺𞤮𞤤.

𞤀𞤪𞤼𞤵𞤺𞤮𞤤 𞤊𞤢𞤪𞤢𞤲 𞤘𞤭𞤲𞤫

𞤑𞤮 𞤅𞤭𞤤𞤭 𞤤𞤢𞥄𞤼𞤭𞤲𞤮𞥅 𞤲𞤦𞤵𞥅𞤯𞤭 𞤘𞤭𞤲𞤫 𞤯𞤭𞤲 𞤸𞤢𞥄 𞤲𞤣𞤫 𞤤𞤢𞥄𞤥𞤵 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤲𞤺𞤵𞤲 𞤬𞤫𞤰𞥆𞤵𞤲𞤮𞥅 𞤩𞤢𞥄𞤱𞤮 𞤥𞤢𞥄𞤴𞤣𞤫 𞤥𞤢𞤳𞥆𞤮 𞤻𞤢𞤤𞤲𞤣𞤫 𞥒𞥖 𞤐𞤦𞤮𞥅𞤴𞤮 𞥑𞥙𞥘𞥔.

𞤐𞤣𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤰𞤫𞤼𞥆𞤵𞤲𞤮𞥅 𞤤𞤢𞥄𞤥𞤵 𞤲𞤺𞤵𞤲 𞤻𞤢𞤤𞤲𞤣𞤫 𞥓 𞤅𞤫𞥅𞤯𞤼𞤮 𞥑𞥙𞥘𞥔⹁ 𞤩𞤫 𞤼𞤮𞤽𞤼𞤭 𞤲𞤺𞤫𞤴𞤺𞤵⹁ 𞤩𞤫 𞤣𞤵𞤽𞤭𞤲𞤭 𞤳𞤢𞤣𞤭 𞤵𞤣𞥆𞤭𞤼𞤵𞤺𞤮𞤤 𞤥𞤢𞤲𞤳𞤭𞤪𞤯𞤫 𞤸𞤢𞤤𞤮𞤪𞤢𞤤𞤶𞤫 𞤯𞤫𞤲.

𞤉 𞤸𞤭𞤼𞤢𞥄𞤲𞤣𞤫 𞥑𞥙𞥘𞥕⹁ 𞤩𞤫 𞤭𞤼𞥆𞤭 𞤅𞤭𞤤𞤭⹁ 𞤩𞤫 𞤢𞤪𞤼𞤭𞤪𞤭 𞤊𞤢𞤪𞤢𞤲 𞤘𞤭𞤲𞤫 𞤳𞤫𞤧𞤭. 𞤅𞤭𞤤𞤭𞥅𞤪𞤵 𞤱𞤮𞥅𞤼𞤵𞤪𞤵 𞤤𞤮𞤲𞤼𞤭𞤲𞤭𞤪𞤢𞥄 𞤬𞤢𞤪𞤢𞤲𞤪𞤵 𞤱𞤮𞥅𞤼𞤵𞤪𞤵. 𞤙𞤢𞤤𞤲𞤣𞤫 𞤯𞤭 𞤴𞤢𞤤𞤼𞤭𞤲𞤢𞤲𞤮𞥅⹁ 𞤸𞤢𞤪𞤭 𞤬𞤢𞤪𞤢𞤲 𞤘𞤭𞤲𞤫 𞤺𞤮𞥅𞤼𞤮 𞤲𞤮 𞤬𞤮𞤼𞤢 𞤫 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮. 𞤑𞤮𞤲𞤮 𞤸𞤢𞤲𞤣𞤫 𞤮𞤲𞤼𞤭𞤺𞤭 𞤭𞤼𞥆𞤢𞤴 𞤳𞤮 𞤩𞤵𞤪𞤭 𞤊𞤢𞤪𞤢𞤲𞤶𞤭 𞤘𞤭𞤲𞤫 𞥑𞥕 (𞤧𞤢𞤨𞥆𞤮𞤴 𞤫 𞤶𞤮𞤱𞤭)⹁ 𞤧𞤭 𞤸𞤫𞤩𞤢 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞥅𞤼𞤮.

𞤏𞤵𞤪𞤭𞤲⹁ 𞤪𞤮𞤱𞤢𞤲𞤭 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤺𞤮𞤼𞤮 𞤴𞤢𞤸𞤵𞤲𞤮 𞤸𞤢𞥄 𞤬𞤮𞤼𞤭 𞤫 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤲𞤮𞥅𞤺𞤢𞤴. 𞤘𞤭𞤤𞤢 𞤀𞤤𞤬𞤢𞥄 𞤑𞤮𞤲𞤣𞤫 𞤬𞤮𞤤𞥆𞤢𞥄⹁ 𞤊𞤢𞤪𞤢𞤲𞤶𞤭 𞤘𞤭𞤲𞤫 𞤯𞤭𞤲 𞤲𞤮 𞤩𞤫𞤴𞤣𞤢𞥄𞤣𞤫 𞤷𞤫𞤥𞤦𞤫. 𞤕𞤮𞤺𞥆𞤵 𞤁𞤢𞤤𞤢⹁ 𞤉𞤪𞤮 𞤫 𞤅𞤫𞥅𞤬𞤢𞥄 𞤵𞤧𞤼𞤭𞤳𞤫 𞤬𞤮𞤼𞤢 𞤳𞤮𞤲𞤮 𞤷𞤮𞤺𞥆𞤵 𞤨𞤭𞥅𞤶𞤭 𞤯𞤭𞤲 𞤳𞤢 𞤤𞤵𞥅𞤥𞤮 𞤼𞤭𞤨𞥆𞤢𞥄𞤳𞤭.

𞤍𞤵𞥅𞤯𞤵𞤩𞤫 𞤲𞤮 𞤤𞤢𞤲𞤣𞤭𞤼𞤢𞥄𞤣𞤫 𞤳𞤮 𞤱𞤮𞤲𞤭 𞤧𞤢𞤦𞤵 𞤯𞤵𞤥؟

𞤑𞤢𞥄𞤤𞤭𞤧𞤭𞥅𞤶𞤭 𞤶𞤢𞤲𞤢𞤲𞤭 𞤯𞤭𞤲 𞤤𞤭𞥅𞤦𞤭𞥅 𞤱𞤮𞤲𞤭 𞤳𞤢 𞤲𞤣𞤫𞤪 𞤤𞤫𞤴𞤣𞤭. 𞤐𞤮 𞤢𞤲𞤣𞤢𞥄𞤤𞤫 𞤳𞤮 𞤧𞤭 𞤸𞤵𞥅𞤲𞤣𞤫 𞤧𞤢𞤯𞤭𞥅 𞤧𞤭 𞤲𞤣𞤫 𞤧𞤢𞤯𞤼𞤢 𞤷𞤮𞤺𞥆𞤵. 𞤑𞤮𞤲𞤮 𞤧𞤭 𞤲𞤣𞤫 𞤤𞤭𞥅𞤦𞤭𞥅⹁ 𞤲𞤣𞤫 𞤤𞤢𞥄𞤬𞤢𞤴 𞤷𞤮𞤺𞥆𞤵.

𞤊𞤫𞤱𞤲𞤣𞤮 𞤯𞤮𞤮⹁ 𞤯𞤵𞥅𞤯𞤵𞤩𞤫 𞤫 𞤲𞤶𞤵𞤤𞤢𞥄𞤩𞤫 (𞤴𞤫𞥅𞤴𞤮𞥅𞤩𞤫) 𞤩𞤫𞤲 𞤲𞤮 𞤶𞤮𞥅𞤯𞤭𞥅 𞤸𞤮𞥅𞤪𞤫 𞤲𞤦𞤵𞥅𞤯𞤭 𞤥𞤵𞥅𞤯𞤵𞤲. 𞤇𞤫 𞤢𞤤𞤢𞥄 𞤧𞤮𞥅𞤣𞤮𞤴𞤣𞤫 𞤳𞤮 𞤩𞤫 𞤴𞤫𞥅𞤴𞤭𞤼𞤢⹁ 𞤩𞤫 𞤢𞤤𞤢𞥄 𞤬𞤵𞤯𞥆𞤢𞥄𞤣𞤫 𞤥𞤵𞤪𞤢𞥄𞤯𞤭 𞤳𞤫𞤧𞤭 𞤧𞤢𞤦𞤵 𞤤𞤫𞤴𞤣𞤭 𞤲𞤣𞤭𞤲 𞤣𞤫𞥅𞤰𞤢𞥄.

𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤲𞤺𞤵𞥅 𞤻𞤢𞤱𞤵 𞤑𞤮𞤱𞤭𞤣-𞥑𞥙 𞤱𞤮𞤲𞤭𞥅 𞤧𞤢𞤦𞤵 𞤴𞤮 𞤷𞤮𞤺𞥆𞤵 𞤨𞤭𞥅𞤶𞤭 𞤯𞤵𞥅𞤯𞤵𞤯𞤭 𞤩𞤫𞤴𞤣𞤮 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤬𞤮𞤨 𞤱𞤮𞤲𞤢𞥄 𞤘𞤭𞤲𞤫 𞤼𞤵𞤲.

𞤏𞤢𞤴𞤤𞤢𞤺𞤮𞤤 𞤤𞤢𞥄𞤥𞤵 𞤲𞤺𞤵𞤲 𞤘𞤭𞤲𞤫 𞤩𞤫𞤴𞤣𞤢𞤲𞥆𞤮 𞤯𞤵𞥅𞤯𞤵𞤩𞤫 𞤫 𞤺𞤭𞤲𞤫𞤲𞤢𞥄𞤩𞤫 𞤴𞤢𞤤𞤼𞤵𞤩𞤫 𞤩𞤫𞤲 𞤼𞤢𞤥𞤢𞤵. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤴𞤮 𞤴𞤮𞤺𞤢 𞤫 𞤥𞤢𞤩𞥆𞤫 𞤢𞤪𞤼𞤵⹁ 𞤢𞤣𞥆𞤮𞤪𞤢 𞤉𞤪𞤮 𞤫 𞤁𞤢𞤤𞤢. 𞤒𞤮𞤺𞤢 𞤫 𞤥𞤢𞤩𞥆𞤫 𞤣𞤢𞤪𞤼𞤭𞤲𞥆𞤮𞥅𞤩𞤫 𞤸𞤢𞥄𞤶𞤵𞥅𞤶𞤭 𞤥𞤵𞥅𞤯𞤵𞤲 𞤯𞤭𞤲 𞤳𞤢 𞤤𞤫𞤴𞤣𞤭⹁ 𞤬𞤵𞤯𞥆𞤭𞤼𞤭𞥅 𞤯𞤭. 𞤍𞤵𞤥 𞤲𞤮 𞤶𞤫𞤴𞤢𞥄 𞤫 𞤳𞤮 𞤩𞤫𞤴𞤣𞤭 𞤁𞤢𞤤𞤢 𞤫 𞤉𞤪𞤮 𞤳𞤢 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫. 𞤅𞤭 𞤔𞤮𞥅𞤯𞤭𞥅𞤩𞤫 𞤩𞤫𞤲 𞤲𞤮 𞤼𞤢𞤥𞤭 𞤲𞤦𞤵𞥅𞤯𞤭 𞤥𞤵𞤵𞤲 𞤣𞤫𞤰𞥆𞤭𞤲𞤭𞥅 𞤸𞤢𞤦𞥆𞤭𞥅⹁ 𞤘𞤭𞤲𞤫𞤲𞤢𞥄𞤩𞤫 𞤩𞤫𞤲 𞤳𞤢 𞤶𞤢𞤲𞤢𞤲𞤭𞤪𞤭 𞤲𞤮 𞤱𞤮𞤲𞤣𞤵𞤲𞤮𞥅 𞤫 𞤶𞤢𞤱𞤯𞤫𞥅𞤲𞤣𞤫.

𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤺𞤵𞤴𞤢𞥄𞤤𞤫 𞤯𞤫𞤲 𞤯𞤵𞤴𞤼𞤭𞤳𞤫 𞤬𞤮𞤼𞤢 𞤳𞤢 𞤤𞤫𞤴𞤣𞤭. 𞤊𞤫𞤱𞤲𞤣𞤮 𞤤𞤢𞥄𞤥𞤵 𞤀𞤤𞤬𞤢𞥄 𞤑𞤮𞤲𞤣𞤫⹁ 𞤧𞤭 𞤤𞤢𞥄𞤥𞥆𞤭𞤲𞤢𞥄𞤩𞤫 𞤩𞤫𞤲 𞤱𞤵𞤶𞥆𞤭𞥅𞤲𞤮 𞤲𞤦𞤵𞥅𞤯𞤭⹁ 𞤩𞤫 𞤴𞤢𞤸𞤢𞤴 𞤳𞤭𞤧𞤢𞤲 𞤩𞤫 𞤱𞤢𞤴𞤤𞤢 𞤯𞤭 𞤫 𞤁𞤢𞤤𞤢 𞤥𞤢𞥄 𞤫 𞤁𞤪𞤮 𞤧𞤢𞤦𞤵 𞤳𞤮 𞤯𞤭𞤲 𞤲𞤫𞤱𞤭𞥅 𞤥𞤢𞤪𞤵𞤺𞤮𞤤. 𞤔𞤮𞥅𞤲𞤭 𞤲𞤮𞤲⹁ 𞤩𞤢𞤴𞤼𞤭 𞤺𞤵𞤴𞤢𞥄𞤤𞤫 𞤯𞤫𞤲 𞤵𞤧𞤼𞤭𞤳𞤫 𞤥𞤮𞤰𞥆𞤢⹁ 𞤤𞤢𞤲𞤣𞤮𞤼𞤮𞥅𞤩𞤫 𞤩𞤫𞤲 𞤉𞤪𞤮 𞤫 𞤁𞤢𞤤𞤢 𞤧𞤢𞤯𞤭𞥅.

𞤑𞤮 𞤱𞤢𞤯𞤭 𞤲𞤮𞤲 𞤷𞤮𞤺𞥆𞤵 𞤲𞤺𞤵𞤲 𞤯𞤵𞤴𞤼𞤢𞥄𞤳𞤭 𞤳𞤢 𞤶𞤫𞤸𞤫 (𞤤𞤵𞥅𞤥𞤮)⹁ 𞤳𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤳𞤮 𞤧𞤮𞥅𞤣𞤢𞤲𞤮𞥅 𞤳𞤮𞤲 𞤬𞤫𞤱𞤲𞤣𞤮 𞤁𞤢𞤤𞤢 𞤰𞤢𞤱𞤭 𞤱𞤮𞤲𞤢𞥄 𞤴𞤫𞥅𞤴𞤫𞥅𞤣𞤫 𞤳𞤫𞤲𞤫𞤲.

𞤍𞤵𞤲 𞤯𞤮𞥅 𞤬𞤮𞤨 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤧𞤭 𞤤𞤢𞥄𞤥𞤩𞤫 𞤩𞤫𞤲 𞤲𞤮 𞤴𞤭𞤯𞤭 𞤴𞤮 𞤲𞤦𞤵𞥅𞤯𞤭 𞤤𞤫𞤴𞤣𞤭 𞤥𞤢𞤩𞥆𞤫 𞤲𞤣𞤭𞤲 𞤣𞤮𞥅𞤤𞤲𞤵⹁ 𞤩𞤫 𞤺𞤫𞤪𞤢𞤴 𞤸𞤢𞥄 𞤬𞤭𞥅 𞤥𞤢𞤶𞥆𞤭 𞤸𞤭𞤼𞥆𞤢. 𞤅𞤭 𞤲𞤦𞤵𞥅𞤯𞤭 𞤸𞤭𞤼𞥆𞤭𞥅⹁ 𞤯𞤭 𞤣𞤮𞥅𞤤𞤲𞤢𞤴.

𞤐𞤦𞤵𞥅𞤯𞤭 𞤸𞤭𞤼𞥆𞤭𞥅 𞤱𞤮𞥅 𞤧𞤮 𞤼𞤢𞤱𞤭𞥅 𞤨𞤭𞥅𞤶𞤭 𞤴𞤫𞥅𞤴𞤫𞤼𞤫𞥅𞤯𞤭 𞤴𞤢𞤤𞤼𞤢𞤴𞤯𞤭 𞤫 𞤤𞤫𞤴𞤣𞤭 𞤲𞤣𞤭𞤲 𞤲𞤮 𞤩𞤵𞤪𞤭 𞤳𞤮 𞤢𞤣𞥆𞤫𞤼𞤫𞥅 𞤲𞤢𞥄𞤣𞤫𞥅 𞤫 𞤥𞤢𞤴𞤪𞤭 𞤬𞤭𞥅 𞤴𞤫𞥅𞤴𞤵𞤼𞤵𞤺𞤮𞤤.
𞤅𞤮 𞤼𞤢𞤱𞤭𞥅 𞤨𞤭𞥅𞤶𞤭 𞤯𞤭 𞤶𞤢𞤲𞤢𞤲𞤭𞤪𞤭 𞤲𞤣𞤭𞤲 𞤸𞤢𞤼𞤮𞤲𞤶𞤭𞤲𞤭 𞤲𞤮 𞤥𞤮𞤰𞥆𞤭𞤲𞤫𞥅𞤣𞤫 𞤫 𞤤𞤫𞤴𞤣𞤭 𞤲𞤣𞤭𞤲⹁ 𞤳𞤢𞥄𞤤𞤭𞤧𞤭𞥅𞤶𞤭 𞤶𞤢𞤲𞤢𞤲𞤭 𞤯𞤭𞤲 𞤲𞤢𞥄𞤼𞤢𞤴 𞤬𞤮𞤼𞤢 𞤧𞤫𞤥𞤦𞤭𞤲𞤢 𞤲𞤦𞤵𞥅𞤯𞤭 𞤤𞤫𞤴𞤣𞤭 𞤲𞤣𞤭𞤲. 𞤑𞤮𞤲𞤮 𞤧𞤮 𞤼𞤢𞤱𞤭𞥅 𞤸𞤢𞤼𞤮𞤲𞤶𞤭𞤲𞤢𞥄𞤯𞤭 𞤯𞤭𞤲 𞤳𞤮 𞤳𞤢 𞤶𞤢𞤲𞤢𞤲𞤭𞤪𞤭 𞤭𞤱𞤢𞤼𞤢⹁ 𞤲𞤦𞤵𞥅𞤯𞤭 𞤤𞤫𞤴𞤣𞤭 𞤲𞤣𞤭𞤲 𞤶𞤢𞥄𞤧𞤢𞤴 𞤼𞤵𞤲.

𞤊𞤫𞤱𞤲𞤣𞤮 𞤊𞤢𞤪𞤢𞤲 𞤘𞤭𞤲𞤫 𞤢𞤪𞤼𞤭𞤪𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥕⹁ 𞤸𞤢𞤪𞤭 𞤱𞤵𞥅𞤲𞤣𞤵 𞤫 𞤲𞤦𞤵𞥅𞤯𞤭 𞤯𞤭𞤯𞤭 𞤬𞤮𞤨 𞤲𞤮 𞤱𞤮𞥅𞤣𞤵𞤲𞤮𞥅. 𞤑𞤮 𞤳𞤢 𞤺𞤵𞤤𞤵𞥅𞤶𞤫 𞤶𞤮𞤱𞤭 𞤳𞤢𞥄𞤳𞤭 𞤯𞤭𞤲 𞤸𞤢𞥄𞤯𞤵𞤲𞤮𞥅. 𞤑𞤮 𞤻𞤢𞤤𞤲𞤣𞤫 𞥑𞥑 𞤑𞤮𞤪𞤧𞤮 𞥒𞥐𞥐𞥗⹁ 𞤲𞤣𞤫 𞤬𞤭𞥅𞤪𞤢 𞤱𞤢𞤤𞥆𞤢 𞤣𞤮𞥅𞤤𞤫 𞤵𞤧𞤼𞤭𞤲𞤮𞥅 𞤫 𞤊𞤢𞤪𞤢𞤲⹁ 𞤳𞤢𞥄𞤳𞤮𞤤 𞤺𞤵𞤤𞤵𞥅𞤶𞤫 𞤧𞤢𞤨𞥆𞤮 𞤲𞤺𞤮𞤤 𞤩𞤫𞤴𞤣𞤭𞤼𞤢𞥄. 𞤁𞤵𞥅𞤩𞤭 𞤶𞤫𞥅𞤼𞤢𞤼𞤭 𞤩𞤢𞥄𞤱𞤼𞤭 𞤯𞤵𞤥⹁ 𞤳𞤢𞥄𞤳𞤮𞤤 𞤺𞤵𞤤𞤵𞥅𞤶𞤫 𞤲𞤮𞥅𞤺𞤢𞤴 𞤩𞤫𞤴𞤣𞤭𞤼𞤢𞥄 𞤳𞤢𞤣𞤭. 𞤐𞤮 𞤬𞤭𞥅𞤪𞤢 𞤱𞤮𞤲𞤭 𞤵𞤴𞤼𞤮𞤪𞤣𞤫 𞤲𞤮𞤲 𞤫 𞤲𞤦𞤵𞥅𞤯𞤭 𞤯𞤭𞤲⹁ 𞤤𞤭𞤥𞤮𞥅𞤶𞤫 𞤥𞤢𞤶𞥆𞤭 𞤱𞤮𞤲𞤭 𞤩𞤫𞤴𞤣𞤮𞤪𞤣𞤫. 𞤔𞤮𞥅𞤲𞤭 𞤷𞤫𞤱𞤯𞤭 𞤯𞤭𞤲 𞤥𞤵𞤼𞤭𞥅𞤲𞤮 𞤱𞤢𞤲𞤮 𞥑⹁ 𞥒⹁ 𞥕⹁ 𞥑𞥐⹁ 𞥒𞥕⹁ 𞥕𞥐 𞤫 𞥑𞥐𞥐. 𞤑𞤮 𞤴𞤭𞤫𞤼𞤫𞥅 𞤱𞤮𞥅 𞤶𞤮𞥅𞤲𞤭 𞤳𞤮 𞤺𞤭𞤦𞤭 𞥕𞥐𞥐.