𞤐𞤋𞥅𞤔𞤉𞤈: 𞤁𞤫𞤐𞤘𞤖𞤀 𞤈𞤌𞤑𞥆𞤋𞥅 𞤕𞤋𞤒𞤀𞤐𞤋 𞤉 𞤅𞤉𞤐𞤚𞤉𞤈𞤉 𞤃𞤓𞤓𞤐 𞤐𞤁𞤉𞤐 𞤒𞤌𞤐𞤚𞤉𞤈𞤉

𞤕𞤢𞤺𞥆𞤢𞤤 𞤬𞤮𞤤𞥆𞤵𞤪𞤵 𞤲𞤣𞤵𞤲 𞤐𞤭𞥅𞤶𞤫𞤪⹁ 𞤴𞤮𞤺𞤢 𞤫 𞤸𞤮𞥅𞤪𞤫𞥅𞤩𞤫 𞤤𞤫𞤴𞤯𞤫 𞤁𞤫𞤘𞤖𞤀 𞤯𞤫𞤲 (CEDEAO – ECOWAS) 𞤼𞤵𞤥𞤦𞤮𞤲𞥋𞤣𞤭𞤪𞤲𞤮 𞤀𞤄𞤵𞤶𞤢𞥄⹁ 𞤳𞤢 𞤤𞤢𞥄𞤥𞤮𞤪𞤣𞤫 𞤐𞤢𞤶𞤫𞤪𞤭𞤴𞤢. 𞤐𞤺𞤢𞥄𞤤 𞤼𞤵𞤥𞤦𞤵𞤲𞥋𞤣𞤭𞤪𞤢𞤤 𞤱𞤢𞤯𞤭𞥅 𞤸𞤢𞤲𞤣𞤫 𞤫 𞤈𞤫𞤬𞤦𞤭𞥅𞤪𞤫⹁ 𞤻𞤢𞤤𞤲𞤣𞤫 𞥓𞥐 𞤃𞤮𞤪𞤧𞤮 𞥒𞥐𞥒𞥓.
𞤄𞤢𞤯𞤼𞤢𞤲𞤫 𞤲𞤺𞤢𞤤 𞤼𞤭𞤲𞤼𞤭𞤣𞤢𞤤⹁ 𞤸𞤮𞥅𞤪𞤫𞥅𞤩𞤫 𞤁𞤫𞤐𞤘𞤖𞤀 𞤩𞤫𞤲 𞤸𞤢𞤨𞥆𞤢𞤲𞤭𞥅 𞤕𞤭𞤴𞤢𞤲𞤭 𞤫 𞤧𞤮𞥅𞤪𞤭𞥅𞤩𞤫 𞤶𞤢𞤺𞥆𞤵𞤩𞤫 𞤃𞤵𞤸𞤢𞤥𞥆𞤢𞤣 𞤄𞤢𞥁𞤵𞤥 𞤩𞤫𞤲⹁ 𞤴𞤮𞤲𞤼𞤫𞤪𞤫 𞤬𞤭𞥅 𞤶𞤮𞥅𞤯𞥆𞤭𞤲𞤼𞤭𞤲𞤺𞤮𞤤 𞤥𞤮 𞤳𞤢 𞤶𞤵𞤤𞥆𞤫𞤪𞤫 𞤤𞤢𞥄𞤥𞤵. 𞤁𞤫𞤐𞤘𞤖𞤀 𞤸𞤮𞤤𞥆𞤭𞥅 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤩𞤫 𞤭𞤼𞥆𞤭𞤲𞤼𞤭𞤲𞤢𞥄𞤤𞤭 𞤫𞤩𞥆𞤮𞥅𞤪𞤫 𞤸𞤢𞤴 𞤱𞤮𞥅𞤼𞤫𞤪𞤫 𞤬𞤭𞥅 𞤢𞤪𞤼𞤭𞤺𞤮𞤤 𞤄𞤀𞥁𞤵𞤥 𞤳𞤢 𞤤𞤢𞥄𞤥𞤵. 𞤖𞤢𞤴 𞤧𞤭 𞤳𞤮 𞤭𞤥𞥆𞤭𞤲𞤺𞤮𞤤 𞤳𞤮𞤲𞤵⹁ 𞤫𞤩𞤫 𞤱𞤢𞤳𞥆𞤭𞤤𞤢𞤲𞤭𞥅 𞤬𞤭𞥅 𞤢𞤪𞤼𞤭𞤺𞤮𞤤 𞤃𞤵𞤸𞤢𞤥𞥆𞤢𞤣𞤵 𞤄𞤢𞥁𞤵𞤥 𞤳𞤢 𞤤𞤢𞥄𞤥𞤵.
𞤍𞤮𞥅 𞤴𞤮 𞤲𞤣𞤫𞥅𞤲 𞤴𞤮𞤲𞤼𞤫𞤪𞤫 𞤼𞤭𞤥𞥆𞤵⹁ 𞤩𞤫 𞤬𞤢𞤱𞤭𞥅 𞤐𞤭𞥅𞤶𞤫𞤪 𞤼𞤫𞤲𞤼𞤭𞤲𞤭𞥅 𞤧𞤮𞤪𞤭𞥅𞤩𞤫 𞤩𞤫𞤲⹁ 𞤶𞤵𞤳𞥆𞤫 𞤯𞤵𞥅𞤯𞤵𞤯𞤫 𞤼𞤭𞥅𞤯𞤵𞤯𞤫. 𞤉 𞤳𞤢𞥄𞤤𞤮𞤤 𞤲𞤺𞤮𞤤 𞤩𞤫 𞤴𞤢𞤤𞤼𞤭𞤲𞤭 𞤦𞤢𞤯𞤼𞤢𞤲𞤫 𞤳𞤢𞥄𞤤𞤣𞤭𞤺𞤢𞤤 𞤥𞤢𞤩𞥆𞤫⹁ 𞤸𞤮𞥅𞤪𞤫𞥅𞤩𞤫 𞤁𞤫𞤐𞤘𞤖𞤀 𞤩𞤫𞤲 𞤩𞤢𞤲𞤺𞤭𞤲𞤭𞥅 𞤫𞤩𞥆𞤮𞥅𞤶𞤫 𞤶𞤫𞥅𞤲𞤢𞤴𞤭 𞤯𞤫 𞤩𞤫 𞤤𞤫𞤼𞥆𞤭𞤪𞤼𞤢 𞤅𞤮𞥅𞤪𞤭𞥅𞤩𞤫 𞤊𞤮𞤤𞥆𞤵𞤩𞤫 𞤄𞤢𞥁𞤵𞤥 𞤩𞤫𞤲 𞤫 𞤶𞤵𞤳𞥆𞤫 𞤯𞤫 𞤩𞤫 𞤬𞤢𞤱𞤭 𞤯𞤫𞤲 𞤐𞤭𞥅𞤶𞤫𞤪. 𞤐𞤮 𞤼𞤢𞤱𞤢𞥄 𞤫 𞤯𞤫𞤲:
• 𞤵𞤣𞥆𞤵𞤺𞤮𞤤 𞤳𞤫𞥅𞤪𞤭 𞤐𞤭𞥅𞤶𞤫𞤪 𞤯𞤭𞤲 𞤬𞤮𞤨. 𞤖𞤢𞤴 𞤸𞤵𞥅𞤲𞤣𞤫 𞤲𞤢𞥄𞤼𞤭𞤪𞤼𞤢𞥄⹁ 𞤴𞤢𞤤𞤼𞤭𞤪𞤼𞤢𞥄 𞤤𞤫 𞤳𞤢𞤣𞤭 𞤳𞤢 𞤤𞤫𞤴𞤣𞤭 𞤥𞤢𞤤𞥆𞤢 𞤳𞤢 𞤱𞤫𞥅𞤴𞤮. 𞤐𞤁𞤫 𞤼𞤢𞤱𞤲𞤮𞥅 𞤲𞤮𞤲 𞤐𞤭𞥅𞤶𞤫𞤪⹁ 𞤳𞤮 𞤤𞤫𞤴𞤣𞤭 𞤸𞤵𞥅𞤩𞤼𞤭𞤼𞤢𞥄𞤲𞤣𞤭⹁ 𞤲𞤣𞤫𞥅 𞤫𞤩𞥆𞤮𞥅𞤪𞤫 𞤼𞤢𞤥𞤨𞤭𞤲𞤢𞤴 𞤩𞤫 𞤲𞤮 𞤬𞤢𞤲𞤼𞤭𞤪𞤭.
• 𞤁𞤢𞤪𞤼𞤭𞤲𞤺𞤮𞤤 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤼𞤮 𞤦𞤢𞤽𞥆𞤫 𞤲𞤺𞤫𞤴𞤺𞤵 𞤫 𞤳𞤢 𞤳𞤢𞥄𞤤𞤭𞤧𞤭 𞤸𞤢𞤳𞥆𞤵𞤲𞥋𞤣𞤫 𞤐𞤭𞥅𞤶𞤫𞤪 𞤫 𞤤𞤫𞤴𞤯𞤫 𞤸𞤭𞥅𞤪𞤲𞤢 𞤀𞤬𞤪𞤭𞤳 𞤯𞤫𞤲. 𞤆𞤭𞥅𞤶𞤭 𞤫 𞤲𞤦𞤵𞥅𞤯𞤭 𞤲𞤢𞥄𞤼𞤢𞤼𞤢𞥄⹁ 𞤴𞤢𞤤𞤼𞤢𞤼𞤢𞥄 𞤳𞤢𞤣𞤭.
• 𞤁𞤢𞤪𞤼𞤭𞤲𞤺𞤮𞤤 𞤴𞤫𞥅𞤴𞤵𞤺𞤮𞤤 𞤐𞤭𞥅𞤶𞤫𞤪 𞤳𞤢𞤤𞤢 𞤸𞤢𞥄𞤶𞤭𞤼𞤮𞤪𞤯𞤭 𞤱𞤢𞤲𞤮 𞤲𞤣𞤭𞤴𞤢𞤥 𞤫 𞤴𞤭𞥅𞤼𞤫 𞤥𞤢𞤤𞥆𞤢 𞤤𞤢𞤧𞤼𞤫.
• 𞤅𞤮𞤳𞤵𞤺𞤮𞤤 𞤶𞤢𞤱𞤤𞤫 𞤐𞤭𞥅𞤶𞤫𞤪 𞤱𞤮𞤲𞤯𞤫 𞤫 𞤥𞤢𞤲𞤳𞤭𞤪𞤯𞤫 𞤁𞤫𞤐𞤘𞤖𞤀 𞤯𞤫𞤲
• 𞤚𞤮𞤽𞤢𞤲𞤺𞤮𞤤 𞤧𞤮𞥅𞤪𞤭𞥅𞤩𞤫 𞤼𞤢𞤱𞤢𞥄𞤩𞤫 𞤫 𞤬𞤮𞤤𞥆𞤵𞤪𞤵 𞤲𞤣𞤵𞤲 𞤴𞤭𞥅𞤤𞤢𞤺𞤮𞤤

𞤁𞤫𞤘𞤖𞤀 𞤼𞤮𞤯𞥆𞤭𞤳𞤫 𞤋𞤣𞤪𞤭𞤧 𞤁𞤫𞤦𞤭 𞤳𞤮 𞤤𞤢𞥄𞤼𞤮𞥅 𞤲𞤭𞤤𞥆𞤢𞥄𞤶𞤮 𞤫 𞤧𞤮𞥅𞤪𞤭𞥅𞤩𞤫 𞤶𞤵𞤲𞥆𞤭𞤼𞤢𞤤 𞤲𞤺𞤢𞤤 𞤐𞤭𞥅𞤶𞤫𞤪. 𞤊𞤭𞥅 𞤳𞤢𞤤𞤢 𞤕𞤢𞤣 𞤼𞤢𞤱𞤢𞥄𞤳𞤢 𞤫 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤸𞤭𞥅𞤪𞤲𞤢 𞤀𞤊𞤪𞤭𞤳⹁ 𞤁𞤫𞤐𞤘𞤖𞤀 𞤷𞤢𞥄𞤼𞤵𞤲𞤮 𞤋𞤣𞤪𞤭𞤧 𞤁𞤫𞤦𞤭⹁ 𞤲𞤣𞤫 𞤼𞤢𞤱𞤵𞤲𞤮𞥅 𞤕𞤢𞥄𞤣 𞤫 𞤐𞤭𞥅𞤶𞤫𞤪 𞤲𞤮 𞤳𞤫𞥅𞤪𞤲𞤭𞤣𞤭. 𞤏𞤵𞤪𞤭𞤲 𞤋𞤣𞤪𞤭𞤧 𞤁𞤫𞤦𞤭 𞤸𞤫𞤱𞤼𞤮𞤴𞤭𞥅𞤲𞤮 𞤙𞤢𞤥𞤫 𞤳𞤢 𞤤𞤢𞥄𞤥𞤮𞤪𞤣𞤫 𞤐𞤭𞥅𞤶𞤫𞤪 𞤸𞤢𞥄 𞤮 𞤼𞤭𞤲𞤼𞤭𞤣𞤭𞥅 𞤫 𞤅𞤢𞤤𞤭𞥅𞤬𞤵 𞤃𞤮𞥅𞤣𞤭⹁ 𞤢𞤪𞤣𞤭𞥅𞤯𞤮 𞤳𞤮𞤲𞤵 𞤐𞤭𞥅𞤶𞤫𞤪 𞤲𞤺𞤵𞤲.

𞤑𞤮 𞤀𞤦𞤵𞤪𞥆𞤢𞤸𞤥𞤢𞥄𞤲𞤭 𞤕𞤭𞤴𞤢𞤲𞤭 𞤼𞤮𞤯𞥆𞤭𞥅 𞤸𞤮𞥅𞤪𞤫 𞤥𞤵𞤵𞤲 𞤬𞤭𞥅 𞤢𞤪𞤣𞤢𞤺𞤮𞤤 𞤐𞤭𞥅𞤶𞤫𞤪 𞤦𞤢𞤯𞤼𞤢𞤲𞤫 𞤬𞤮𞤤𞥆𞤵𞤪𞤵 𞤲𞤣𞤵𞤲. 𞤑𞤮 𞤮 𞤳𞤵𞥅𞤩𞤢𞤤𞥆𞤮 𞤤𞤢𞥄𞤼𞤭𞤲𞤮𞥅𞤯𞤮 𞤸𞤢𞤱𞤶𞤮𞥅𞤱𞤮 𞤸𞤭𞤱𞤮𞥅𞤩𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤐𞤭𞥅𞤶𞤫𞤪 𞤲𞤣𞤭𞤲 𞤺𞤭𞤦𞤭 𞥒𞥐𞥑𞥑. 𞤑𞤮 𞤃𞤵𞤸𞤢𞤥𞥆𞤢𞤣𞤵 𞤒𞤵𞥅𞤧𞤵𞤬𞤵⹁ 𞤸𞤮𞥅𞤪𞤫𞥅𞤶𞤮 𞤥𞤮 𞤄𞤢𞥁𞤵𞤥 𞤤𞤮𞤲𞤼𞤭𞥅 𞤮𞤲 𞤱𞤮𞤲𞤭 𞤳𞤮 𞤩𞤢𞤣𞤲𞤭𞤼𞤵𞤲𞤮𞥅 𞤕𞤭𞤴𞤢𞤲𞤭 𞤬𞤭𞥅 𞤳𞤮 𞤸𞤭𞤱𞤢 𞤥𞤮.
𞤐𞤮 𞤼𞤵𞥅𞤥𞤢𞥄 𞤱𞤮𞤲𞤣𞤫𞤥𞤢 𞤳𞤮 𞤬𞤢𞥄𞤤𞤫𞥅 𞤄𞤢𞥁𞤵𞤥 𞤭𞤼𞥆𞤵𞤺𞤮𞤤 𞤕𞤭𞤴𞤢𞤲𞤭 𞤱𞤮𞤲𞤭 𞤧𞤢𞤦𞤵 𞤮𞤲 𞤬𞤮𞤤𞥆𞤵𞤣𞤫 𞤥𞤮. 𞤐𞤭𞥅𞤶𞤫𞤪 𞤤𞤫 𞤲𞤮 𞤼𞤢𞤱𞤢𞤲𞤮𞥅 𞤫 𞤤𞤫𞤴𞤯𞤫 𞤖𞤭𞥅𞤪𞤲𞤢 𞤀𞤊𞤪𞤭𞤳 𞤱𞤫𞤤𞤼𞤮𞤪𞤢𞥄𞤯𞤫 𞤫 𞤻𞤭𞥅𞤩𞤲𞤵𞤺𞤮𞤤 𞤣𞤫𞤥𞤮𞤳𞤢𞤪𞤢𞥄𞤳𞤵.
𞤑𞤮𞤲𞤮 𞤲𞤣𞤭 𞤼𞤢𞤱𞤼𞤭 𞤃𞤢𞤤𞤭⹁ 𞤄𞤵𞤪𞤳𞤭𞤲𞤢 𞤫 𞤘𞤭𞤲𞤫 𞤳𞤢 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤶𞤢𞤩𞤼𞤭 𞤤𞤢𞥄𞤥𞤵.