𞤑𞤀𞤃𞤀𞤈𞤓𞤐: 𞤅𞤋𞤑𞥆𞤀𞤐𞤌𞥅𞤍𞤌 𞤌𞤐 𞤃𞤀𞥄𞤒𞤋𞥅⹁ 𞤀𞤈𞤚𞤋𞥅
𞤀𞤱𞤢 𞤧𞤭𞤳𞥆𞤢𞤲𞤮𞥅𞤯𞤮 𞤮𞤲 𞤥𞤢𞤴𞤭𞥅 𞤢𞤪𞤼𞤭𞥅.
𞤆𞤌𞤂 𞤄𞤋𞤒𞤀⹁ 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤑𞤢𞤥𞤢𞤪𞤵𞤲 𞤲𞤣𞤭𞤲⹁ 𞤪𞤵𞤼𞥆𞤭𞤳𞤫 𞤼𞤮 𞤤𞤢𞥄𞤥𞤮𞤪𞤣𞤫 𞤒𞤢𞤱𞤵𞤲𞤣𞤫 𞤸𞤢𞤲𞤳𞤭 𞤫 𞤀𞥄𞤩𞤲𞤣𞤫 𞤻𞤢𞤤𞤲𞤣𞤫 𞥒𞥑 𞤒𞤢𞤪𞤳𞤮. 𞤑𞤮 𞤯𞤵𞤥 𞤎𞤫𞤱𞤤𞤵 𞤲𞤺𞤫𞤲𞤣𞤭𞥅𞤪𞤵 𞤑𞤢𞤥𞤢𞤪𞤵𞤲 𞤲𞤣𞤵𞤲 𞤸𞤮𞤤𞥆𞤭.
𞤸𞤢𞤪𞤭 𞤩𞤵𞤪𞤲𞤭𞥅 𞤶𞤮𞤲𞤼𞤫 𞤶𞤫𞥅𞤺𞤮𞤮⹁ 𞤆𞤮𞤤 𞤄𞤭𞤴𞤢 𞤴𞤭𞤴𞤢𞥄𞤳𞤢 𞤫 𞤳𞤫𞤲𞤫. 𞤑𞤮 𞤻𞤢𞤤𞤲𞤣𞤫 𞥘 𞤅𞤭𞤤𞤼𞤮 𞥒𞥐𞥒𞥔 𞤮 𞤱𞤢𞤴𞤪𞤢𞤲𞤮𞥅 𞤴𞤭𞤴𞤫𞥅𞤣𞤫 𞤳𞤢 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤕𞤢𞤴𞤲𞤢-𞤀𞤬𞤪𞤭𞤳 𞤱𞤢𞤯𞤵𞤲𞥋𞤺𞤢𞤤 𞤄𞤫𞤴𞤶𞤭𞤲𞤺⹁ 𞤤𞤢𞥄𞤥𞤮𞤪𞤣𞤫 𞤕𞤢𞤴𞤲𞤢.
𞤇𞤢𞥄𞤱𞤼𞤭 𞤯𞤵𞤥⹁ 𞤼𞤵𞤥𞤦𞤮𞤲𞥋𞤣𞤭𞤪𞤫 𞤥𞤢𞤱𞤯𞤫 𞤱𞤢𞤯𞤭𞥅 𞤯𞤫 𞤮 𞤼𞤭𞤶𞥆𞤢𞤲𞤮𞥅 𞤮 𞤼𞤢𞤱𞤣𞤫𞤼𞤫⹁ 𞤱𞤢𞤲𞤮 𞤃𞤮𞥅𞤩𞤼𞤮𞤲𞥋𞤣𞤭𞤪𞤢𞤤 𞤑𞤵𞥅𞤩𞤢𞤤 𞤘𞤫𞤲𞤯𞤫 𞤊𞤮𞤼𞥆𞤵𞤯𞤫 (ONU/UN)⹁ 𞤳𞤢𞤻𞤵𞤲 𞤫 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤐𞤶𞤵𞤩𞥆𞤵𞤣𞤭 𞤏𞤭𞤲𞤣𞤫𞤪𞤫𞥅𞤪𞤭 𞤖𞤢𞥄𞤤𞤭-𞤊𞤢𞤪𞤢𞤲𞤧𞤭 𞤫𞤲. 𞤐𞤣𞤫 𞤼𞤢𞤱𞤵𞤲𞤮𞥅 𞤮 𞤴𞤭𞤴𞤢𞥄𞤳𞤢 𞤫 𞤯𞤫𞥅 𞤼𞤵𞤥𞤦𞤮𞤲𞥋𞤣𞤭𞤪𞤫⹁ 𞤸𞤢𞥄𞤤𞤢𞥄𞤶𞤭 𞤬𞤵𞤯𞥆𞤭 𞤶𞤢𞥄𞤤𞤢𞥄𞤣𞤫 𞤱𞤮𞤲𞤣𞤫𞤥𞤢 𞤮𞤥𞤮 𞤲𞤢𞥄𞤱𞤲𞤭 𞤳𞤮 𞤼𞤭𞥅𞤯𞤭. 𞤏𞤵𞤪𞤭𞤲 𞤱𞤮𞥅𞤣𞤭 𞤱𞤭𞤴𞤵𞤲𞤮𞥅𞤩𞤫 𞤮 𞤥𞤢𞥄𞤴𞤭𞥅. 𞤄𞤢𞤯𞤼𞤢𞤲𞤫 𞤯𞤵𞤥⹁ 𞤤𞤢𞥄𞤥𞤵 𞤑𞤢𞤥𞤢𞤪𞤵𞤲 𞤲𞤺𞤵𞤲 𞤼𞤮𞤽𞤭 𞤸𞤢𞥄𞤤𞤵𞤺𞤮𞤤 𞤳𞤮 𞤴𞤮𞤱𞤭𞤼𞤭𞥅 𞤫 𞤷𞤫𞤤𞥆𞤢𞤤 𞤆𞤮𞤤 𞤄𞤭𞤴𞤢 𞤲𞤺𞤢𞤤.
𞤆𞤮𞤤 𞤄𞤭𞤴𞤢 𞤸𞤫𞤩𞤭𞥅 𞤩𞤵𞤪𞤭 𞤣𞤵𞥅𞤩𞤭 𞥙𞥑. 𞤑𞤮 𞤻𞤢𞤤𞤲𞤣𞤫 𞥑𞥓 𞤕𞤮𞤤𞤼𞤮 𞥑𞥙𞥓𞥓 𞤮 𞤶𞤭𞤦𞤭𞤲𞤢𞥄 𞤫 𞤸𞤮𞤯𞤮 𞤱𞤭𞤴𞤫𞤼𞤫𞥅𞤲𞤺𞤮 𞤃𞤾𞤮𞤥𞤫𞤳𞤢⹁ 𞤶𞤫𞤴𞤢𞥄𞤲𞤺𞤮 𞤫 𞤣𞤭𞥅𞤱𞤢𞤤 𞤻𞤢𞥄𞤥𞤲𞤢𞤱𞤢𞤤 𞤑𞤢𞤥𞤢𞤪𞤵𞤲 𞤲𞤺𞤢𞤤. 𞤌 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥔𞥒 𞤫 𞤳𞤮 𞤬𞤢𞤱𞤭 𞤳𞤢 𞤤𞤢𞥄𞤥𞤵.
𞤑𞤮 𞤫 𞤔𞤮𞤤𞤮 𞥑𞥙𞥘𞥒 𞤮 𞤤𞤮𞤲𞤼𞤭𞥅 𞤀𞤸𞤥𞤢𞤣𞤵 𞤀𞤸𞤭𞥅𞤶𞤮 𞤸𞤮𞥅𞤪𞤫 𞤑𞤢𞤥𞤢𞤪𞤵𞤲 𞤩𞤢𞥄𞤱𞤮 𞤮𞤲 𞤢𞤷𞥆𞤭𞤼𞤵𞤣𞤫 𞤤𞤢𞥄𞤥𞤵 𞤲𞤺𞤵𞤲. 𞤊𞤫𞤱𞤲𞤣𞤮 𞤮 𞤤𞤮𞤲𞤼𞤮𞤼𞤮𞥅⹁ 𞤼𞤢𞤱𞤭 𞤳𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤢𞤪𞤣𞤮 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤. 𞤛𞤢𞤤𞤯𞤭𞤲𞤭 𞤯𞤵𞥅𞤯𞤵𞤩𞤫 𞤳𞤮 𞤼𞤢𞤱𞤭 𞤳𞤮𞤲 𞤀𞤸𞤥𞤢𞤣𞤵 𞤀𞤸𞤭𞥅𞤶𞤮⹁ 𞤶𞤵𞥅𞤤𞤯𞤮 𞤭𞤥𞥆𞤮𞤪𞤯𞤮 𞤳𞤢 𞤲𞤢𞥄𞤲𞥆𞤢𞥄𞤪𞤭 𞤑𞤢𞤥𞤢𞤪𞤵𞤲 𞤢𞤷𞥆𞤭𞤼𞤢𞤲𞤭𞥅 𞤶𞤵𞤤𞥆𞤫𞤪𞤫 𞤤𞤢𞥄𞤥𞤵 𞤲𞤣𞤫𞤲 𞤶𞤮𞤳𞥆𞤵𞤯𞤮 𞤲𞤢𞤧𞤢𞥄𞤪𞤢𞥄𞤳𞤵 𞤭𞤥𞥆𞤮𞤪𞤯𞤮 𞤳𞤢 𞤻𞤢𞥄𞤥𞤲𞤢𞥄𞤪𞤭.
𞤑𞤮𞤲𞤮 𞤸𞤮𞥅𞤤𞤢𞥄𞤪𞤫 𞤫 𞤱𞤫𞥅𞤤𞤣𞤭𞤺𞤢𞤤 𞤸𞤢𞤳𞥆𞤵𞤲𞥋𞤣𞤫 𞤥𞤢𞤩𞥆𞤫 𞤩𞤮𞥅𞤴𞤢𞥄𞤲𞤮 𞤩𞤢𞥄𞤱𞤮 𞤀𞤸𞤥𞤢𞤣𞤵 𞤀𞤸𞤭𞥅𞤶𞤮 𞤢𞤷𞥆𞤭𞤼𞤵𞤣𞤫 𞤤𞤢𞥄𞤥𞤵 𞤲𞤺𞤵𞤲. 𞤏𞤵𞤪𞤭𞤲 𞤼𞤭𞤥𞥆𞤢𞥄𞤤𞤭 𞤸𞤭𞤼𞤢𞥄𞤲𞤣𞤫⹁ 𞤫 𞤃𞤮𞤪𞤧𞤮 𞥑𞥙𞥘𞥓⹁ 𞤀𞤸𞤭𞥅𞤶𞤮 𞤣𞤮𞤺𞤭 𞤤𞤫𞤴𞤣𞤭 𞤲𞤣𞤭𞤲 𞤴𞤢𞤸𞤭 𞤬𞤢𞥄𞤦𞤼𞤭𞤲𞤮𞤴𞤭𞥅 𞤊𞤢𞤪𞤢𞤲𞤧𞤭 . 𞤇𞤢𞥄𞤱𞤼𞤭 𞤯𞤵𞤥⹁ 𞤆𞤮𞤤 𞤄𞤭𞤴𞤢 𞤭𞤼𞥆𞤭 𞤴𞤭𞤥𞤩𞤫 𞤀𞤸𞤭𞥅𞤶𞤮 𞤩𞤫𞤲 𞤬𞤮𞤨 𞤳𞤢 𞤶𞤢𞥄𞤺𞤮𞤪𞤢𞤤.
𞤉 𞤕𞤮𞤤𞤼𞤮 𞥑𞥙𞥘𞥔⹁ 𞤀𞤸𞤭𞥅𞤶𞤮 𞤼𞤵𞥅𞤥𞤢𞥄 𞤫𞤼𞤢𞤺𞤮𞤤 𞤲𞤮 𞤱𞤢𞤴𞤤𞤭𞤼𞤭𞤪𞤢 𞤤𞤢𞥄𞤥𞤵 𞤲𞤺𞤵𞤲. 𞤌 𞤻𞤢𞥄𞤱𞤢𞥄 𞤮 𞤬𞤢𞤱𞤢𞥄 𞤱𞤢𞤪𞤫𞥅𞤣𞤫⹁ 𞤳𞤢𞤲𞤳𞤮 𞤮 𞤯𞤵𞥅𞤯𞤵𞤩𞤫. 𞤀𞤸𞤭𞥅𞤶𞤮 𞤴𞤫𞤣𞥆𞤭 𞤼𞤢𞤱𞤣𞤫𞥅𞤣𞤫 𞤫 𞤫𞤩𞥆𞤮𞥅𞤪𞤫 𞤬𞤭𞥅 𞤬𞤮𞤤𞥆𞤵𞤺𞤮𞤤 𞤆𞤮𞤤 𞤄𞤭𞤴𞤢. 𞤘𞤭𞤦𞤭 𞤲𞤣𞤫𞤲⹁ 𞤀𞤸𞤭𞥅𞤶𞤮 𞤱𞤢𞥄𞤱𞤢𞥄𞤤𞤭 𞤪𞤵𞤼𞥆𞤭𞤼𞤢𞥄𞤣𞤫 𞤑𞤢𞤥𞤢𞤪𞤵𞤲 𞤸𞤢𞥄 𞤮 𞤥𞤢𞥄𞤴𞤭 𞤅𞤫𞤲𞤫𞤺𞤢𞤤 𞤻𞤢𞤤𞤲𞤣𞤫 𞥓𞥐 𞤅𞤭𞤤𞤼𞤮 𞥑𞥙𞥘𞥙. 𞤑𞤮 𞤁𞤢𞤳𞤢𞤪 𞤳𞤢𞤣𞤭 𞤮 𞤵𞤦𞥆𞤢𞥄 𞤳𞤢𞤲𞤳𞤮 𞤫 𞤺𞤫𞤲𞤣𞤭𞤪𞤢𞥄𞤸𞤮 𞤥𞤢𞤳𞥆𞤮 𞤬𞤫𞤰𞥆𞤭𞤲𞤯𞤮 𞤫 𞤅𞤫𞥅𞤯𞤼𞤮 𞥒𞥐𞥒𞥑.
𞤌𞤲 𞤱𞤫𞤤𞤼𞤢𞤥𞤢𞥄𞤥𞤢 𞤬𞤮𞤼𞤢-𞤬𞤮𞤼𞤢 𞤺𞤮𞤤𞥆𞤫 𞤯𞤫𞤲 𞤫 𞤳𞤵𞤥𞤨𞤭𞤼𞤢𞤤 𞤲𞤺𞤢𞤤
𞤉𞤥𞤦𞤢 𞤆𞤵𞤤𞥆𞤮 𞤲𞤮 𞤯𞤢𞤴𞤼𞤢𞤲𞤭 𞤣𞤢𞤱𞤪𞤮! 𞤖𞤢𞤯𞤲𞤮 𞤮 𞤰𞤫𞤼𞥆𞤢 𞤂𞤢𞥄𞤥𞤵 𞤲𞤺𞤵𞤲 𞤮 𞤶𞤮𞤲𞥆𞤢 𞤥𞤵𞤧𞤭𞤯𞥆𞤮 𞤥𞤢𞤳𞥆𞤮 𞤨𞤵𞤤𞥆𞤮 …؟