𞤑𞤌 𞤀𞥄𞤁𞤀𞤃𞤀 𞤄𞤀𞤈𞤌 𞤊𞤌𞥅𞤂𞤋
𞤄𞤢𞤯𞤼𞤢𞤲𞤫 𞤧𞤵𞤩𞤮 𞤬𞤭𞥅 𞤳𞤮𞥅𞤪𞤢𞥄𞤺𞤵 𞤘𞤢𞤥𞤦𞤭𞤴𞤢 𞤲𞤺𞤵𞤲⹁ 𞤳𞤮 𞤀𞥄𞤣𞤢𞤥𞤢 𞤄𞤢𞤪𞤮 𞤬𞤮𞥅𞤤𞤭. 𞤑𞤮 𞤳𞤢𞤲𞤳𞤮 𞤳𞤢𞤣𞤭 𞤱𞤮𞤲𞤭 𞤬𞤮𞥅𞤤𞤵𞤲𞤮𞥅𞤯𞤮 𞤮𞤲 𞤒𞤢𞤸𞤴𞤢𞥄 𞤔𞤢𞤥𞥆𞤫 𞤫 𞤧𞤵𞤩𞤮 𞥒𞥐𞥑𞥖 𞤲𞤺𞤮𞤲.
𞤅𞤵𞤩𞤮 𞤲𞤺𞤮𞤲 𞤸𞤭𞤳𞥆𞤢⹁ 𞤳𞤮 𞤫 𞤸𞤮𞤪𞤦𞤭𞤪𞥆𞤫 𞤻𞤢𞤤𞤲𞤣𞤫 𞥔 𞤄𞤮𞤱𞤼𞤮 𞥒𞥐𞥒𞥑 𞤱𞤢𞤯𞤭. 𞤉 𞤲𞤣𞤫𞤪 𞤴𞤭𞤥𞤩𞤫 𞤲𞤮𞥅𞤺𞤢𞤴𞤮 𞤫 𞤳𞤮 𞤬𞤢𞤱𞤭 𞤬𞤢𞥄𞤤𞤢𞤲𞤮𞥅𞤩𞤫 𞤣𞤢𞤪𞤢𞥄𞤣𞤫⹁ 𞤳𞤮 𞤴𞤭𞤥𞤩𞤫 𞤲𞤶𞤫𞥅𞤺𞤮𞤮 𞤘𞤮𞥅𞤥𞤵 𞤬𞤭𞥅 𞤅𞤵𞤩𞤮 𞤲𞤺𞤮𞤲 𞤣𞤵𞤽𞤭𞤲𞤢𞤲𞥆𞤮𞥅 𞤣𞤢𞤪𞤢𞤺𞤮𞤤.
𞤑𞤮 𞤲𞤺𞤮𞥅 𞤧𞤵𞤩𞤮 𞤸𞤭𞤳𞥆𞤢 𞤯𞤮𞤮 𞤱𞤮𞤲𞤭 𞤢𞤪𞤢𞤲𞤮 𞤫 𞤧𞤵𞤩𞤮 𞤱𞤢𞤯𞤵𞤲𞥋𞤺𞤮 𞤫 𞤲𞤣𞤫𞤪 𞤣𞤵𞥅𞤩𞤭 𞥒𞥗 𞤸𞤢𞤪𞤢 𞤒𞤢𞤸𞤴𞤢 𞤔𞤫𞤥𞥆𞤫 𞤣𞤢𞤪𞤢𞥄𞤳𞤭. 𞤑𞤮𞤲𞤮 𞤬𞤭𞥅 𞤳𞤢𞤤𞤢 𞤮 𞤣𞤢𞤪𞤢𞥄𞤳𞤭⹁ 𞤮 𞤵𞤳𞥆𞤭𞤼𞤮𞤪𞤲𞤮 𞤫 𞤧𞤵𞤩𞤮 𞤲𞤺𞤮𞤲 𞤦𞤢𞤥𞤦𞤢𞤲𞤺𞤮𞤤 𞤣𞤢𞤪𞤼𞤭𞥅𞤩𞤫 𞤀𞥄𞤣𞤢𞤥𞤢 𞤄𞤢𞤪𞤮 𞤩𞤫𞤲. 𞤊𞤭𞥅 𞤳𞤢𞤤𞤢 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤬𞤭𞤩𞤵𞤣𞤵𞤲𞤮 𞤫 𞤬𞤫𞤣𞥆𞤫 𞤄𞤢𞤪𞤮 𞤲𞤣𞤫𞤲⹁ 𞤒𞤢𞤸𞤴𞤢𞥄 𞤔𞤫𞤥𞥆𞤫 𞤼𞤮𞤪𞤭𞥅 𞤴𞤭𞤯𞤩𞤫 𞤥𞤮 𞤩𞤫𞤲 𞤱𞤮𞤼𞤢 𞤩𞤫 𞤧𞤵𞤩𞤮 𞤄𞤢𞤪𞤮⹁ 𞤴𞤮 𞤩𞤫 𞤧𞤵𞤩𞤮 𞤃𞤢𞤥𞥆𞤢 𞤑𞤢𞤲𞤣𞤫.
𞤅𞤵𞤩𞤮 𞤲𞤺𞤮𞤲 𞤲𞤮𞤲 𞤬𞤫𞤰𞥆𞤭𞥅 𞤫 𞤶𞤢𞤥. 𞤑𞤮 𞤸𞤢𞤲𞤳𞤭 𞤫 𞤪𞤫𞤬𞤦𞤭𞤪𞥆𞤫⹁ 𞥕 𞤄𞤮𞤱𞤼𞤮⹁ 𞤘𞤮𞥅𞤥𞤵 𞤬𞤭𞥅 𞤧𞤵𞤩𞤮 𞤲𞤺𞤮𞤲 𞤼𞤢𞤦𞤭𞤲𞤼𞤭𞤲𞤭 𞤦𞤮𞤼𞤫 𞤯𞤫𞤲.
| 𞤁𞤢𞤪𞤭𞥅𞤯𞤮 | 𞤊𞤫𞤣𞥆𞤫 | 𞤄𞤮𞤼𞤫 | 𞤄𞤮𞤼𞤫% |
| 𞤀𞥄𞤣𞤢𞤥𞤢 𞤄𞤢𞤪𞤮 | 𞤉𞤲 𞤆𞤭 𞤆𞤭 (NPP) | 𞥔𞥕𞥘 𞥐𞥐𞥐 | 𞥕𞥓% |
| 𞤖𞤵𞤧𞤫𞤴𞤲𞤭 𞤁𞤢𞥄𞤦𞤮 | 𞤒𞤵 𞤁𞤭 𞤆𞤭 (UDP) | 𞥒𞥓𞥘 𞥐𞥐𞥐 | 𞥒𞥘% |
| 𞤃𞤢𞤥𞥆𞤢 𞤑𞤢𞤲𞤣𞤫 | 𞤔𞤭 𞤁𞤭 𞤅𞤭 (GDC) | 𞥑𞥐𞥖 𞥐𞥐𞥐 | 𞥑𞥒% |
| 𞤖𞤢𞤤𞤭𞥅𞤬𞤢 𞤅𞤢𞥄𞤤 | 𞤆𞤭 𞤁𞤮𞤴𞤧 (PDOIS) | 𞥓𞥒 𞥐𞥐𞥐 | 𞥔% |
| 𞤉𞤧𞤢 𞤊𞤢𞥄𞤤 | 𞥑𞥗 𞥐𞥐𞥐 | 𞥒% | |
| 𞤀𞤦𞤣𞤵𞤤𞥆𞤢𞥄𞤸𞤭 𞤔𞤢𞤥𞥆𞤫 | 𞤉𞤲 𞤒𞤵 𞤆𞤭 (NUP) | 𞥘 𞥐𞥐𞥐 | 𞥑% |
𞤐𞤣𞤫 𞤩𞤢𞤲𞤺𞤢𞤲𞥆𞤮𞥅 𞤴𞤭𞤥𞤩𞤫 𞤄𞤢𞤪𞤮 𞤩𞤫𞤲 𞤱𞤮𞤲𞤣𞤫𞤥𞤢 𞤳𞤮 𞤳𞤢𞤲𞤳𞤮 𞤬𞤮𞥅𞤤𞤭⹁ 𞤯𞤵𞥅𞤯𞤵𞤩𞤫 𞤫 𞤥𞤢𞤩𞥆𞤫 𞤴𞤢𞤤𞤼𞤭 𞤳𞤢 𞤤𞤢𞥄𞤱𞤭 𞤸𞤮𞤤𞥆𞤵𞤺𞤮𞤤 𞤱𞤫𞤤𞤼𞤢𞥄𞤪𞤫 𞤥𞤵𞤵𞤲.
𞤑𞤮𞤲𞤮 𞤲𞤮𞤲⹁ 𞤼𞤢𞤼𞤮 𞤫 𞤣𞤢𞤪𞤭𞤲𞤮𞥅𞤩𞤫 𞤩𞤫𞤲 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤩𞤫 𞤶𞤢𞤩𞤢𞤼𞤢𞥄 𞤦𞤮𞤼𞤫 𞤧𞤵𞤩𞤮 𞤲𞤺𞤮𞤲. 𞤇𞤫𞤲 𞤼𞤢𞤼𞤮 𞤳𞤮 𞤖𞤵𞤧𞤫𞤴𞤲𞤭 𞤁𞤢𞥄𞤦𞤮⹁ 𞤃𞤢𞤥𞥆𞤢 𞤑𞤢𞤲𞤣𞤫 𞤫 𞤉𞤧𞤢 𞤊𞤢𞥄𞤤. 𞤉 𞤴𞤭𞤭 𞤥𞤢𞤩𞥆𞤫⹁ 𞤶𞤢𞤥𞤦𞤢 𞤱𞤢𞤤𞥆𞤢 𞤳𞤢𞤲𞤧𞤢 𞤱𞤢𞤯𞤭𞥅 𞤫 𞤧𞤵𞤩𞤮 𞤲𞤺𞤮𞤲 𞤳𞤮𞤲𞤮 𞤩𞤫 𞤱𞤫𞥅𞤩𞤭𞤼𞤢𞥄𞤤𞤭 𞤧𞤫𞥅𞤣𞤫𞥅 𞤥𞤢𞤩𞥆𞤫⹁ 𞤩𞤫 𞤼𞤮𞤯𞥆𞤢𞥄𞤳𞤭 𞤳𞤢𞤣𞤭 𞤳𞤢 𞤩𞤫 𞤴𞤭𞤭 𞤳𞤢𞤲𞤧𞤢 𞤧𞤭 𞤱𞤮𞤲𞤢𞥄 𞤩𞤫 𞤱𞤭𞤭𞥅 𞤼𞤵𞤲 𞤱𞤮𞤲𞤣𞤫𞤥𞤢 𞤘𞤮𞥅𞤥𞤵 𞤲𞤺𞤵𞤲 𞤲𞤫𞥅𞤩𞤲𞤭𞤼𞤭𞤲𞤮 𞤫 𞤴𞤢𞤤𞤼𞤭𞤲𞤺𞤮𞤤 𞤦𞤮𞤼𞤫 𞤯𞤫𞤲.
𞤀𞥄𞤣𞤢𞤥𞤢 𞤄𞤢𞤪𞤮 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥕𞥖. 𞤌 𞤶𞤵𞤸𞤵𞤲𞤮𞥅 𞤯𞤵𞥅𞤯𞤵𞤩𞤫 𞤲𞤣𞤫 𞤮 𞤬𞤮𞥅𞤤𞤵𞤲𞤮𞥅 𞤒𞤢𞤸𞤴𞤢𞥄 𞤔𞤢𞤥𞥆𞤫 𞤫 𞤧𞤵𞤩𞤮 𞤲𞤺𞤮𞤲 𞥒𞥐𞥑𞥖⹁ 𞤧𞤢𞤦𞤵𞤲𞤢 𞤖𞤢𞤪𞤭 𞤮𞤲𞤼𞤵𞤥𞤢 𞤬𞤭𞥅 𞤥𞤢𞤳𞥆𞤮 𞤢𞤲𞤣𞤢𞥄𞤳𞤢 𞤬𞤮𞤼𞤢. 𞤉 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤸𞤢𞤴 𞤺𞤮𞥅𞤼𞤮 𞤼𞤭𞤶𞥆𞤢𞤲𞤮𞥅𞤳𞤭 𞤱𞤮𞤲𞤣𞤫𞤥𞤢 𞤒𞤢𞤸𞤴𞤢 𞤔𞤢𞤥𞥆𞤫 𞤶𞤢𞤩𞤢𞤴 𞤬𞤮𞥅𞤤𞤫𞥅𞤣𞤫 𞤬𞤭𞥅 𞤳𞤢𞤤𞤢 𞤸𞤢𞤪𞤭 𞤮 𞤱𞤢𞤯𞤭𞥅 𞤣𞤵𞥅𞤩𞤭 𞥒𞥒 𞤳𞤢 𞤤𞤢𞥄𞤥𞤵⹁ 𞤸𞤢𞤪𞤭 𞤳𞤢𞤣𞤭 𞤬𞤭𞥅 𞤥𞤢𞤳𞥆𞤮 𞤥𞤫𞤼𞥆𞤭𞤼𞤭 𞤯𞤵𞥅𞤯𞤵𞤩𞤫 𞤫 𞤘𞤢𞤥𞤦𞤭𞤴𞤢𞥄𞤩𞤫 𞤩𞤫𞤲.
𞤑𞤮 𞤫 𞤬𞤫𞤣𞥆𞤫 𞤖𞤵𞤧𞤫𞤴𞤲𞤭 𞤁𞤢𞥄𞤦𞤮 𞤢𞤲𞤣𞤭𞤪𞤢𞥄𞤲𞤣𞤫 𞤒𞤵𞤁𞤭𞤆𞤭 (UDP) 𞤀𞥄𞤣𞤢𞤥𞤢 𞤄𞤢𞤪𞤮 𞤼𞤢𞤱𞤢𞤲𞤮𞥅 𞤬𞤫𞤱𞤲𞤣𞤮 𞤧𞤵𞤩𞤮 𞤲𞤺𞤮𞤲 𞥒𞥐𞥑𞥖. 𞤑𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤸𞤢𞤤𞤬𞤭𞤲𞤢𞥄𞤯𞤮 𞤮𞤲 𞤬𞤭𞥅 𞤳𞤢𞥄𞤤𞤭𞤧𞤭𞥅𞤶𞤭 𞤬𞤫𞤣𞥆𞤫 𞤲𞤣𞤫𞤲. 𞤑𞤮𞤲𞤮 𞤳𞤮 𞤫 𞤭𞤲𞤣𞤫 𞤨𞤫𞤣𞤤𞤫 𞤶𞤫𞥅𞤼𞤢𞤼𞤭 𞤣𞤢𞤪𞤼𞤭𞤲𞤮𞥅𞤯𞤫 𞤒𞤢𞤸𞤴𞤢𞥄 𞤔𞤢𞤥𞥆𞤫 𞤮 𞤧𞤵𞤩𞤢𞤲𞤮𞥅 𞤬𞤭𞥅 𞤣𞤢𞤪𞤢𞤺𞤮𞤤 𞤫 𞤧𞤵𞤩𞤮 𞤲𞤺𞤮𞤲 𞥒𞥐𞥑𞥖 𞤫 𞤸𞤮𞥅𞤪𞤫 𞤸𞤢𞤤𞤣𞤭𞥅𞤺𞤢𞤤 𞤴𞤮 𞤮 𞤤𞤢𞥄𞤥𞤮 𞤣𞤵𞥅𞤩𞤭 𞤼𞤢𞤼𞤭 𞤨𞤫𞤼⹁ 𞤮𞤲𞤼𞤵𞤥𞤢 𞤮 𞤱𞤢𞤯𞤢 𞤧𞤵𞤩𞤮 𞤸𞤫𞤧𞤮. 𞤑𞤮𞤲𞤮 𞤲𞤣𞤫 𞤄𞤢𞤪𞤮 𞤤𞤢𞥄𞤥𞤭𞤲𞤮𞥅⹁ 𞤼𞤭𞤨𞥆𞤵𞤣𞤫 𞤫 𞤣𞤮𞤧𞤼𞤫𞤪𞤫 𞤲𞤣𞤫𞤲 𞤳𞤢 𞤱𞤭𞤭 𞤱𞤮𞤲𞤣𞤫𞤥𞤢 𞤸𞤢𞤨𞥆𞤵 𞤸𞤮𞥅𞤪𞤫𞥅𞤶𞤮 𞤮𞤲 𞤳𞤮 𞤣𞤵𞥅𞤩𞤭 𞤶𞤮𞤱𞤭⹁ 𞤮 𞤤𞤵𞤲𞤣𞤭𞥅 𞤬𞤮𞤣𞤮𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲. 𞤖𞤵𞤧𞤫𞤴𞤲𞤭 𞤁𞤢𞥄𞤦𞤮 𞤫 𞤬𞤫𞤣𞥆𞤫 𞤥𞤵𞤵𞤲 𞤲𞤣𞤫𞤲 𞤼𞤢𞤱𞤼𞤭 𞤥𞤮 𞤫 𞤸𞤮𞥅𞤪𞤫 𞤯𞤵𞤥 𞤸𞤢𞥄 𞤲𞤣𞤫 𞤩𞤫 𞤸𞤢𞤩𞤵𞤲𞤮𞥅.
𞤐𞤣𞤫 𞤸𞤫𞤲𞤢𞤲𞥆𞤮𞥅 𞤴𞤭𞤥𞤩𞤫 𞤩𞤫𞤲 𞤱𞤮𞤲𞤣𞤫𞤥𞤢 𞤄𞤢𞤪𞤮 𞤱𞤮𞤲𞤭𞤪𞤢𞥄 𞤭𞤥𞥆𞤢𞤺𞤮𞤤 𞤩𞤢𞥄𞤱𞤮 𞤮 𞤼𞤭𞤥𞥆𞤭𞤲𞤣𞤫 𞤣𞤵𞥅𞤩𞤭 𞤼𞤢𞤼𞤭 𞤯𞤭𞤲⹁ 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥙⹁ 𞤴𞤭𞤥𞤩𞤫 𞤦𞤵𞤴 𞤴𞤢𞤤𞤼𞤭 𞤳𞤢 𞤤𞤢𞥄𞤱𞤭 𞤸𞤮𞤤𞥆𞤵𞤺𞤮𞤤 𞤼𞤭𞤳𞥆𞤫𞤪𞤫. 𞤄𞤢𞤯𞤼𞤢𞤲𞤫 𞤯𞤵𞤥⹁ 𞤶𞤢𞥄𞤺𞤮𞤪𞤢𞤤 𞤄𞤢𞤪𞤮 𞤲𞤺𞤢𞤤 𞤼𞤮𞤽𞤭 𞤧𞤫𞤨𞥆𞤮. 𞤑𞤢𞤲𞤳𞤮 𞤄𞤢𞤪𞤮 𞤮 𞤴𞤢𞤤𞤼𞤭 𞤮 𞤱𞤭𞤭: “𞤖𞤢𞤴 𞤺𞤮𞥅𞤼𞤮 𞤱𞤢𞥄𞤱𞤢𞤼𞤢𞥄 𞤤𞤢𞤲 𞤣𞤮𞥅𞤤𞤵𞤣𞤫 𞤫 𞤭𞤱𞤵𞤺𞤮𞤤 𞤸𞤮𞥅𞤪𞤫 𞤤𞤫𞤴𞤣𞤭 𞤲𞤣𞤭𞤲 𞤢𞤣𞤮 𞥒𞥐𞥒𞥑.”
𞤐𞤣𞤫 𞤤𞤵𞤪𞥆𞤫 𞤯𞤫𞤲 𞤯𞤵𞥅𞤯𞤵𞤲𞤮𞥅 𞤸𞤢𞤳𞥆𞤵𞤲𞥋𞤣𞤫 𞤥𞤢𞤳𞥆𞤫 𞤫 𞤖𞤵𞤧𞤫𞤴𞤲𞤭 𞤁𞤢𞥄𞤦𞤮⹁ 𞤮𞥅 𞤥𞤮 𞤮 𞤱𞤢𞤯𞤵𞤲𞤮𞥅 𞤷𞤵𞤳𞥆𞤮 𞤥𞤢𞤳𞥆𞤫 𞤳𞤢𞤻𞤵𞤲 𞤫 𞤶𞤢𞥄𞤺𞤮𞤪𞤢𞥄𞤯𞤮 𞤮𞤲 𞤳𞤢 𞤥𞤵𞥅𞤪𞤢𞥄𞤯𞤭 𞤶𞤢𞤲𞤢𞤲𞤭⹁ 𞤮 𞤭𞤼𞥆𞤭 𞤥𞤮 𞤻𞤢𞤤𞤲𞤣𞤫 𞥑𞥕 𞤐𞤦𞤮𞥅𞤴𞤮 𞥒𞥐𞥑𞥙. 𞤌 𞤭𞤼𞥆𞤭 𞤳𞤢𞤣𞤭 𞤶𞤢𞥄𞤺𞤮𞤪𞤢𞥄𞤩𞤫 𞤒𞤵𞤁𞤭𞤆𞤭 𞤩𞤫𞤲 𞤯𞤭𞤯𞤮. 𞤉 𞤄𞤮𞤱𞤼𞤮 𞥒𞥐𞥑𞥙⹁ 𞤮 𞤧𞤭𞤲𞤷𞤭 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤮 𞤭𞤲𞥆𞤭 𞤲𞤣𞤫 𞤉𞤲𞤆𞤭𞤆𞤭 (NPP) 𞤬𞤭𞥅 𞤲𞤮 𞤣𞤢𞤪𞤮𞤪𞤢 𞤫 𞤧𞤵𞤩𞤮 𞤲𞤺𞤮𞤲 𞤸𞤭𞤳𞥆𞤢 𞥒𞥐𞥒𞥑.
𞤄𞤵𞤴 𞤲𞤮 𞤼𞤭𞤶𞥆𞤭𞤲𞤮𞥅 𞤱𞤮𞤲𞤣𞤫𞤥𞤢 𞤬𞤮𞥅𞤤𞤭𞤼𞤮𞤪𞤮 𞤲𞤺𞤮𞤲 𞤽𞤫𞥅𞤪𞤢𞤴𞤲𞤮. 𞤉 𞤥𞤭𞥅𞤶𞤮 𞤯𞤵𞥅𞤯𞤵𞤩𞤫⹁ 𞤬𞤮𞥅𞤤𞤵𞤲𞤮𞥅𞤯𞤮 𞤱𞤮𞥅 𞤸𞤢𞤳𞥆𞤵𞤲𞥋𞤣𞤫 𞤄𞤢𞤪𞤮 𞤫 𞤁𞤢𞥄𞤦𞤮 𞤳𞤮 𞤧𞤫𞥅𞤯𞤢 𞤬𞤮𞥅𞤤𞤭𞤪𞤢𞤴𞤲𞤮𞥅. 𞤑𞤮𞤲𞤮 𞤦𞤮𞤼𞤫 𞤯𞤫𞤲 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤀𞥄𞤣𞤢𞤥𞤢 𞤄𞤢𞤪𞤮 𞤪𞤵𞤳𞤵𞤲𞤮 𞤣𞤢𞤪𞤼𞤭𞥅𞤩𞤫 𞤥𞤮 𞤩𞤫𞤲 𞤧𞤢𞤦𞤵𞤲𞤢 𞤮 𞤨𞤭𞤴𞤭𞤪𞤭𞥅𞤩𞤫 𞤲𞤮 𞤬𞤢𞤲𞤼𞤭𞤪𞤭.
𞤀𞥄𞤣𞤢𞤥𞤢 𞤄𞤢𞤪𞤮 𞤳𞤮 𞤫 𞤸𞤮𞤯𞤮 𞤱𞤭𞤫𞤼𞤫𞥅𞤲𞤺𞤮 𞤃𞤢𞤲𞤳𞤢𞤥𞤢𞤲 𞤑𞤵𞤲𞤣𞤢 𞤫 𞤲𞤣𞤫𞤪 𞤣𞤭𞥅𞤱𞤢𞤤 𞤄𞤢𞤧𞤫 𞤲𞤺𞤢𞤤 𞤮 𞤶𞤭𞤦𞤭𞤲𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥕. 𞤑𞤢𞤲𞤳𞤮 𞤫 𞤖𞤢𞤥𞤢𞤼 𞤄𞤢𞥄 𞤫 𞤃𞤢𞤥𞥆𞤢 𞤳𞤢𞤲𞤣𞤫⹁ 𞤳𞤮 𞤫 𞤬𞤫𞤣𞥆𞤫 𞤱𞤮𞥅𞤼𞤫𞤪𞤫 𞤩𞤫 𞤼𞤢𞤱𞤢𞤲𞤮𞥅. 𞤐𞤣𞤫𞤲 𞤬𞤫𞤣𞥆𞤫 𞤳𞤮 𞤉𞤲 𞤀𞤪 𞤆𞤭 (NRP). 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥗 𞤮 𞤴𞤢𞤤𞤼𞤭 𞤮 𞤼𞤢𞤱𞤼𞤮𞤴𞤭 𞤒𞤵 𞤁𞤭 𞤆𞤭 (UDP).
𞤀𞥄𞤣𞤢𞤥𞤢 𞤄𞤢𞤪𞤮 𞤲𞤮 𞤼𞤭𞤺𞥆𞤭 𞤪𞤫𞤱𞤩𞤫 𞤯𞤭𞤯𞤮: 𞤊𞤢𞥄𞤼𞤵𞤥𞤢𞤼𞤢 𞤄𞤢𞥄 𞤫 𞤅𞤢𞥄𞤶𞤮 𞤐𞤦𞤢𞤤𞥆𞤮. 𞤌𞤥𞤮 𞤸𞤫𞤩𞤭𞤣𞤭 𞤫 𞤥𞤢𞤩𞥆𞤫 𞤩𞤭𞤯𞤩𞤫 𞤲𞤢𞤴𞤮.
𞤌𞤲 𞤶𞤢𞥄𞤪𞤢𞥄𞤥𞤢 𞤬𞤮𞤼𞤢. 𞤇𞤫𞤴𞤣𞤢𞥄𞤪𞤭 𞤱𞤢𞤯𞤭𞥅 𞤧𞤢𞤦𞤵 𞤢𞤪𞤮𞤲𞤮 𞤫 𞤸𞤢𞤨𞥆𞤵 𞤦𞤵𞤴 𞤧𞤭𞤳𞥆𞤵𞤲𞤮 𞤲𞤺𞤫 𞤸𞤵𞤩𞥆𞤢𞤴 𞤘𞤢𞤥𞤦𞤭𞥅… 𞤒𞤮 𞤀𞤤𞤤𞤢𞤸 𞤩𞤵𞤪𞤼𞤵 𞤱𞤢𞤤𞥆𞤵𞤣𞤫. 𞤌𞤲 𞤱𞤫𞤤𞤼𞤢𞤲𞤢𞥄𞤥𞤢 𞤬𞤮𞤼𞤢.