𞤑𞤌𞤜𞤋𞤁-𞥑𞥙 𞤈𞤀𞥄𞤇𞤋𞥅 𞤚𞤈𞤌𞤃𞤆

𞤁𞤮𞤲𞤢𞤤 𞤚𞤪𞤮𞤥𞤨⹁ 𞤸𞤮𞥅𞤪𞤫𞥅𞤶𞤮 𞤢𞤥𞤫𞤪𞤭𞤳𞤢𞥄 𞤮𞤲⹁ 𞤸𞤮𞤤𞥆𞤭𞤼𞤭𞥅 𞤫 𞤩𞤢𞤼𞤢𞥄𞤳𞤫𞤱𞤮𞤤 𞤲𞤺𞤮𞤤 𞤱𞤫𞤲𞤺𞤭 𞤳𞤢 𞤚𞤱𞤭𞤼𞤫𞤪 (Twitter) 𞤱𞤮𞤲𞤣𞤫𞤥𞤢 𞤻𞤢𞤱𞤵 𞤑𞤮𞤪𞤮𞤲𞤢𞤾𞤭𞤪𞤭𞥅𞤧 𞤲𞤺𞤵𞤲 𞤪𞤢𞥄𞤩𞤭𞥅 𞤥𞤮 𞤳𞤢𞤲𞤳𞤮 𞤫 𞤣𞤫𞤦𞥆𞤮 𞤥𞤢𞤳𞥆𞤮 𞤮𞤲 𞤃𞤫𞤤𞤢𞥄𞤲𞤭𞤴𞤢 𞤚𞤪𞤮𞤥𞤨. 𞤑𞤮 𞤸𞤢𞤲𞤣𞤫 𞤲𞤮 𞤱𞤫𞥅𞤼𞤵𞤣𞤫 𞤥𞤢𞤱𞤲𞤣𞤫 𞤻𞤢𞤤𞤲𞤣𞤫 𞥒 𞤒𞤢𞤪𞤳𞤮 𞤮 𞤸𞤮𞤤𞥆𞤭𞤼𞤭 𞤯𞤵𞤥.

𞤁𞤮𞤲𞤢𞤤𞤣 𞤚𞤪𞤮𞤥𞤨 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥗𞥔 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭 𞤫 𞤲𞤢𞤴𞤭)⹁ 𞤫 𞤸𞤮𞥅𞤪𞤫 𞤯𞤵𞤥⹁ 𞤳𞤮 𞤮 𞤲𞤶𞤢𞤲𞤮 𞤩𞤫𞤤𞥆𞤭𞤲𞤯𞤮. 𞤍𞤭𞥅 𞤬𞤮𞤨 𞤳𞤮 𞤼𞤭𞥅𞤯𞤭𞤲𞤢𞤴𞤯𞤭 𞤻𞤢𞤱𞤵 𞤳𞤮𞤾𞤭𞤣 𞤲𞤺𞤵𞤲.

𞤉 𞤳𞤵𞤯𞤮𞤤 𞤲𞤺𞤮𞤤 𞤮 𞤴𞤢𞤤𞤼𞤭𞤲𞤭 𞤫 𞤲𞤢𞥄𞤧𞤢𞥄𞤲𞤣𞤫 𞤶𞤫𞤥𞥆𞤢⹁ 𞤻𞤢𞤱𞤲𞤣𞤮𞥅𞤱𞤮 𞤚𞤪𞤮𞤥𞤨 𞤮𞤲 𞤼𞤢𞤦𞤭𞤲𞤼𞤭𞤲𞤭𞥅 𞤱𞤮𞤲𞤣𞤫 𞤳𞤮𞤾𞤭𞤣-𞥑𞥙 𞤪𞤢𞥄𞤩𞤭𞥅 𞤚𞤪𞤮𞤥𞤨. 𞤌 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫 𞤚𞤪𞤮𞤥𞤨 𞤵𞤬𞤭𞤲𞤮𞤼𞤮 𞤳𞤢 𞤧𞤵𞥅𞤣𞤵 𞤪𞤢𞤲𞤫𞥅𞤪𞤵 𞤸𞤢𞥄 𞤮 𞤧𞤫𞤤𞥆𞤢.

𞤐𞤺𞤵𞥅 𞤻𞤢𞤱𞤵 𞤯𞤮𞥅 𞤩𞤫𞤴𞤣𞤢𞤲𞤭𞥅 𞤚𞤪𞤮𞤥𞤨 𞤩𞤭𞤯𞤼𞤫𞥅𞤣𞤫 𞤫 𞤷𞤢𞤯𞤫𞥅𞤤𞤫 𞤫 𞤦𞤢𞤲𞤽𞤫 𞤲𞤺𞤮𞥅 𞤧𞤵𞤩𞤮 𞤧𞤢𞥄𞤼𞤭𞥅𞤲𞤺𞤮 𞤻𞤢𞤤𞤲𞤣𞤫 𞥓 𞤤𞤫𞤱𞤪𞤵 𞤔𞤮𞤤𞤮 𞤧𞤢𞤦𞤵 𞤼𞤭𞥅𞤥𞤭 𞤯𞤭𞤲 𞤬𞤮𞤨 𞤲𞤮 𞤸𞤮𞤤𞥆𞤭 𞤱𞤮𞤲𞤣𞤫 𞤄𞤢𞤴𞤣𞤫𞤲 𞤬𞤮𞥅𞤤𞤢𞤴 𞤥𞤮. 𞤔𞤮𞥅𞤲𞤭 𞤫 𞤸𞤮𞥅𞤪𞤫 𞤯𞤵𞤥⹁ 𞤧𞤭 𞤮 𞤢𞤤𞤢𞥄 𞤲𞤮 𞤮 𞤴𞤢𞤤𞤼𞤭𞤪𞤢 𞤲𞤺𞤢𞤥 𞤲𞤮 𞤫 𞤸𞤫𞤩𞤭𞤪𞤢 𞤴𞤭𞤥𞤩𞤫⹁ 𞤳𞤮 𞤳𞤢𞤪𞤢 𞤸𞤢𞤲 𞤮 𞤬𞤫𞤰𞥆𞤭𞤼𞤮𞤪𞤼𞤢 𞤄𞤢𞤴𞤣𞤫𞤲.

𞤘𞤭𞤤𞤢 𞤲𞤺𞤵𞥅 𞤻𞤢𞤱𞤵 𞤬𞤮𞤯𞥆𞤭⹁ 𞤚𞤪𞤮𞤥𞤨 𞤼𞤭𞥅𞤯𞤭𞤲𞤢𞥄𞤤𞤭  𞤬𞤭𞥅 𞤥𞤢𞤺𞥆𞤵. 𞤆𞤫𞤸𞤫 𞤥𞤢𞤤𞥆𞤢 𞤫𞤩𞥆𞤮𞥅𞤶𞤫 𞤣𞤢𞤯𞤭𞤼𞤮𞤪𞤯𞤫 𞤯𞤫𞤲 𞤬𞤮𞤨 𞤮 𞤬𞤮𞤴𞤺𞤭𞤼𞤭 𞤥𞤢𞤤𞥆𞤢 𞤮 𞤶𞤢𞤤𞤳𞤭𞤼𞤭. 𞤑𞤮 𞤯𞤵𞤥 𞤱𞤮𞤲𞤭 𞤧𞤢𞤦𞤵 𞤯𞤵𞥅𞤯𞤵𞤩𞤫 𞤫 𞤩𞤫𞥅 𞤴𞤭𞤥𞤩𞤫 𞤱𞤮𞤲𞤢𞤲𞤩𞤫 𞤥𞤮⹁ 𞤼𞤭𞥅𞤯𞤭𞤲𞤢𞥄 𞤬𞤭𞥅 𞤲𞤺𞤵𞥅 𞤻𞤢𞤱𞤵. 𞤍𞤵𞤥 𞤲𞤮 𞤼𞤢𞤱𞤢𞥄 𞤳𞤮 𞤱𞤮𞤲𞤭 𞤧𞤢𞤦𞤵 𞤻𞤢𞤱𞤵 𞤲𞤺𞤵𞤲 𞤶𞤢𞥄𞤤𞤢𞥄𞤣𞤫 𞤀𞤥𞤫𞤪𞤭𞤳𞤢𞥄 𞤩𞤵𞤪𞤢 𞤤𞤫𞤴𞤯𞤫𞥅𞤤𞤫 𞤸𞤫𞤣𞥆𞤭𞤯𞥆𞤫 𞤯𞤫𞤲 𞤬𞤮𞤨.

𞤘𞤭𞤤𞤢 𞤳𞤮𞤾𞤭𞤣-𞥑𞥙 𞤬𞤫𞥅𞤻𞤭⹁ 𞤲𞤺𞤵 𞤱𞤢𞤪𞤭𞥅 𞤳𞤮 𞤴𞤢𞤱𞤼𞤭 𞤣𞤵𞤦𞤵𞤲𞤫𞤪𞤫 (𞤥𞤭𞤤𞤭𞤴𞤮𞤲) 𞤱𞤮𞥅𞤼𞤫𞤪𞤫 𞤴𞤭𞤥𞤩𞤫⹁ 𞤳𞤮𞤲𞤮 𞤫 𞤲𞤣𞤫𞤪 𞤩𞤫𞤲⹁ 𞤳𞤮 𞤩𞤢𞤣𞤭𞥅 𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤯𞤭𞤯𞤭 𞤫 𞤧𞤢𞤨𞥆𞤮⹁ 𞤳𞤮 𞤀𞤥𞤫𞤪𞤭𞤳𞤢𞥄 𞤶𞤫𞤴𞤢𞥄.

𞤐𞤺𞤵𞥅 𞤻𞤢𞤱𞤵 𞤸𞤮𞤤𞥆𞤭𞥅 𞤱𞤮𞤲𞤣𞤫 𞤲𞤺𞤵 𞤢𞤷𞥆𞤭𞤪𞤼𞤢𞥄 𞤺𞤮𞥅𞤼𞤮 𞤧𞤢𞤦𞤵 𞤣𞤢𞤪𞤲𞤣𞤫 𞤮𞤲𞤼𞤭𞤺𞤭⹁ 𞤥𞤢𞥄 𞤶𞤢𞤱𞤣𞤭 𞤮𞤲𞤼𞤭𞤺𞤭. 𞤐𞤺𞤵 𞤢𞤤𞤢𞥄 𞤤𞤫 𞤳𞤢𞤣𞤭 𞤤𞤫𞤳𞥆𞤭. 𞤃𞤮 𞤳𞤢𞤤𞤢 𞤲𞤮 𞤸𞤢𞥄𞤲𞤭 𞤪𞤫𞥅𞤲𞤼𞤢𞥄𞤣𞤫. 𞤌𞤲𞤼𞤭𞤺𞤭 𞤲𞤮 𞤸𞤢𞥄𞤲𞤭 𞤻𞤫𞤥𞤼𞤭𞤲𞤣𞤫 𞤴𞤢𞤥𞤭𞤪𞤮𞥅𞤶𞤮 𞤣𞤢𞤯𞤲𞤭𞤼𞤮𞤪𞤯𞤫 𞤯𞤫𞤲. 𞤍𞤫𞤲 𞤳𞤮:
𞥑 – 𞤔𞤓𞥅𞤍𞤉 𞤍𞤉𞤐, 𞤤𞤮𞥅𞤼𞤢 𞤯𞤫 𞤧𞤮𞥅𞤲𞤮 𞤳𞤢𞤤𞤢. 𞤌𞤲𞤼𞤭𞤺𞤭 𞤧𞤮𞥅𞤯𞤮𞤪𞤢 𞤧𞤢𞥄𞤦𞤵𞤲𞤣𞤫 𞤫 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲
𞥒 – 𞤅𞤌𞤇𞥆𞤓𞤐𞥋𞤁𞤓 𞤐𞤁𞤓𞤐⹁ 𞤯𞤮𞤶𞥆𞤢 𞤥𞤢𞥄 𞤭𞥅𞤤𞤢 𞤫 𞤲𞤣𞤫𞤪 𞤥𞤢𞤴𞤪𞤵.
𞥓 – 𞤒𞤉𞥅𞤅𞤌 𞤐𞤘𞤌𞤐⹁ 𞤱𞤮𞤼𞤢 𞤮𞤲𞤼𞤭𞤺𞤭 𞤥𞤫𞥅𞤥𞤵 𞤲𞤺𞤮⹁ 𞤼𞤫𞤲𞤼𞤭𞤲𞤭𞥅 𞤧𞤮 𞤶𞤵𞥅𞤯𞤫 𞤯𞤫𞤲 𞤤𞤢𞥄𞤩𞤢𞥄.
𞥔 – 𞤚𞤉𞤆𞥆𞤉 𞤚𞤀𞤚𞤋⹁ 𞤴𞤮 𞤯𞤵𞤥 𞤱𞤮𞤲𞤵 𞤸𞤢𞤳𞥆𞤵𞤲’𞤣𞤫 𞤮𞤲𞤼𞤭𞤺𞤭 𞤫 𞤴𞤭𞤥𞤩𞤫 𞤩𞤫𞤲.
𞥕 – 𞤃𞤌 𞤅𞤌𞤋𞥅 𞤲𞤢𞤱𞤲𞤵𞤣𞤫⹁ 𞤴𞤮 𞤤𞤵𞤼𞥆𞤫𞥅 𞤳𞤢 𞤧𞤵𞥅𞤣𞤵 𞤥𞤵𞤲.
𞥖 – 𞤅𞤓𞥅𞤃𞤀 𞤳𞤭𞤲𞤢𞤤 𞤲𞤺𞤢𞤤 𞤫 𞤸𞤵𞤲𞤣𞤵𞤳𞤮 𞤳𞤮𞤲 𞤧𞤮 𞤼𞤢𞤱𞤭𞥅 𞤮𞤲𞤼𞤭𞤺𞤭 𞤴𞤢𞤤𞤼𞤢𞤴.