𞤔𞤀𞤆𞤀𞤐 𞤔𞤋𞥅𞤇𞤋𞥅 𞤉𞤈𞤌𞤆

𞤖𞤢𞤲𞤳𞤭 𞤳𞤭𞥅𞤳𞤭𞥅𞤯𞤫 𞤫 𞤲𞤢𞥄𞤧𞤢𞥄𞤲𞤣𞤫⹁ 𞤻𞤢𞤤𞤲𞤣𞤫 𞥑 𞤄𞤮𞤱𞤼𞤮⹁ 𞤳𞤮 𞤱𞤵𞤤𞤭 𞤫 𞤳𞤮 𞤽𞤢𞤤𞤯𞤭𞤲𞤭 𞤬𞤫𞤰𞥆𞤭𞥅 𞤑𞤀𞤚𞤀𞤈 𞤸𞤢𞤳𞥆𞤵𞤲’𞤣𞤫 𞤤𞤫𞤴𞤯𞤫 𞤣𞤫𞤲𞤼𞤢𞤤 𞤶𞤮𞤱𞤢𞤩𞤢𞤤 𞤲𞤺𞤢𞤤.
𞤑𞤮 𞤱𞤵𞤤𞤲𞤭 𞤲𞤺𞤢𞤤 𞤣𞤫𞤲𞤼𞤢𞤤⹁ 𞤳𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤭𞤨𞥆𞤵 𞤳𞤢𞤤𞤢 𞤫 𞤳𞤭𞤨𞥆𞤭 𞤯𞤭𞤲 𞤲𞤢𞤴𞤭 𞤲𞤮 𞤱𞤢𞥄𞤱𞤵𞤲𞤮 𞤤𞤵𞤥𞤦𞤵𞤣𞤫. 𞤑𞤮𞤲𞤮 𞤳𞤮 𞤁𞤌𞤒𞤅𞤂𞤉𞤒𞤁𞤋 (𞤀𞤂𞤃𞤀𞤐) 𞤲𞤣𞤢𞤲𞤺𞤵 𞤩𞤵𞤪𞤵𞤲𞤮𞥅 𞤱𞤫𞤲𞤺𞤭𞤤𞤢𞤲𞤢𞥄𞤣𞤫. 𞤅𞤢𞤦𞤵𞤲𞤢 𞤸𞤭𞤩𞤫 𞤸𞤢𞤼𞤮𞤲𞤶𞤭𞤲𞤮 𞤫 𞤨𞤭𞤴𞤵𞤺𞤮𞤤 𞤑𞤌𞤅𞤚𞤀 𞤈𞤋𞤑𞤀⹁ 𞤫 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤳𞤮 𞤴𞤮 𞤉𞤅𞤆𞤀𞤙𞤀 𞤨𞤭𞤴𞤵 𞤲𞤵𞤲 𞤔𞤀𞤆𞤀𞤐. 𞤑𞤮 𞤯𞤮𞤲 𞤩𞤫 𞤦𞤮𞤲𞤪𞤢𞥄.

𞤀𞤂𞤃𞤀𞤐 🇩🇪 𞥔 – 𞥒 🇨🇷 𞤑𞤌𞤅𞤚𞤀 𞤈𞤋𞤑𞤀

𞤀𞤂𞤃𞤀𞤐 𞤱𞤢𞤳𞥆𞤭𞤤𞤭𞤲𞤮 𞤸𞤢𞥄 𞤨𞤭𞤴𞤭 𞤑𞤌𞤅𞤚𞤀 𞤈𞤋𞤑𞤀 𞤳𞤮𞤲𞤮 𞤯𞤵𞤥 𞤲𞤢𞤬𞤢𞥄𞤤𞤭 𞤩𞤫 𞤧𞤢𞤦𞤵𞤲𞤢 𞤩𞤫 𞤯𞤭𞤯𞤮 𞤳𞤢𞤤𞤢 𞤩𞤫 𞤴𞤢𞤤𞤼𞤭𞥅.

𞤑𞤮 𞤳𞤢𞤪𞤢𞤸𞤢𞤲 𞤩𞤫 𞤨𞤭𞤴𞤭𞤪𞤭 𞤩𞤫. 𞤑𞤮 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥑𞥐⹁ 𞤩𞤫 𞤲𞤢𞥄𞤣𞤭 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤. 𞤑𞤮𞤲𞤮 𞤩𞤢𞤴𞤼𞤭 𞤩𞤫 𞤪𞤵𞤼𞥆𞤭𞤳𞤫 𞤬𞤭 𞤬𞤫𞤷𞥆𞤫𞤪𞤫 𞤯𞤭𞤯𞤢𞤩𞤫𞤪𞤫 𞤲𞤣𞤫𞤲⹁ 𞤑𞤌𞤅𞤚𞤀𞤈𞤋𞤑𞤀 𞤭𞤼𞥆𞤭 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥘. 𞤇𞤢𞥄𞤱𞤮 𞤯𞤵𞤥⹁ 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥗𞥐⹁ 𞤃𞤀𞤐𞤓𞤏𞤉𞤂 𞤐𞤓𞤏𞤉𞤈⹁ 𞤸𞤭𞤱𞤮𞥅𞤱𞤮 𞤣𞤮𞤴𞤧𞤩𞤫 𞤩𞤫𞤲 𞤱𞤮𞥅𞤨𞤵𞤲𞤮 𞤴𞤢𞤤𞤼𞤢𞤤 𞤥𞤢𞤳𞥆𞤮 𞤲𞤺𞤢𞤤⹁ 𞤮 𞤲𞤢𞥄𞤣𞤭𞤼𞤭𞥅 𞤳𞤵𞥅𞤤𞤢𞤤.

𞤅𞤭 𞤤𞤵𞤼𞥆𞤭𞤪𞤲𞤮 𞤲𞤮𞤲⹁ 𞤳𞤮 𞤑𞤌𞤅𞤚𞤀 𞤈𞤋𞤑𞤀 𞤬𞤫𞤰𞥆𞤢𞤴𞤲𞤮𞥅. 𞤑𞤮𞤲𞤮 𞤀𞤤𞤥𞤢𞤲𞤩𞤫 𞤩𞤫𞤲 𞤱𞤢𞤳𞥆𞤭𞤤𞤭𞥅 𞤸𞤢𞥄 𞤑𞤀𞤒 𞤖𞤀𞤜𞤉𞤈𞤅 𞤭𞤼𞥆𞤢𞤲𞤭 𞤩𞤫 𞤲𞤺𞤢𞤤 𞤩𞤢𞥄𞤱𞤮 𞤸𞤮𞤶𞤮𞤥𞤢𞥄𞤶𞤫 𞤼𞤢𞤼𞤭⹁ 𞤪𞤫𞤬𞤼𞤭 𞤮 𞤩𞤫𞤴𞤣𞤭𞤼𞤢𞤲𞤭 𞤩𞤫 𞤺𞤮𞥅𞤼𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥘𞥓. 𞤑𞤮 𞤐𞤋𞤑𞤌𞤂𞤀𞤅 𞤊𞤓𞤂𞤑𞤈𞤓𞤘 𞤲𞤢𞥄𞤣𞤭 𞤲𞤢𞤴𞤢𞤩𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥘𞥙. 𞤑𞤮𞤲𞤮 𞤯𞤵𞤥 𞤴𞤮𞤲𞤢𞥄𞤤𞤭 𞤳𞤮 𞤤𞤵𞤥𞤦𞤭𞤲𞤢 𞤩𞤫 𞤧𞤢𞤦𞤵 𞤳𞤮 𞤬𞤫𞤰𞥆𞤭 𞤳𞤮𞤲 𞤸𞤢𞤳𞥆𞤵𞤲’𞤣𞤫 𞤔𞤀𞤆𞤀𞤐 𞤫 𞤉𞤅𞤆𞤀𞤙.
𞤉 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞥒𞥐𞥑𞥘⹁ 𞤳𞤮 𞤬𞤫𞤱𞤲𞤣𞤮 𞤯𞤮𞤮 𞤀𞤤𞤥𞤢𞤲𞤩𞤫 𞤩𞤫𞤲 𞤴𞤭𞤤𞤼𞤭𞤲𞤢𞤲𞤮𞥅 𞤳𞤢𞤣𞤭.

𞤔𞤀𞤆𞤀𞤐🇯🇵 𞥒 – 𞥑 🇪🇸 𞤉𞤅𞤆𞤀𞤙

𞤔𞤀𞤆𞤀𞤐 𞤸𞤮𞤤𞥆𞤵𞤲𞤮 𞤸𞤢𞤲𞤳𞤭 𞤱𞤮𞤲𞤣𞤫𞤥𞤢 𞤥𞤮𞤲𞤮 𞤱𞤵𞥅𞤪𞤭 𞤩𞤫𞤪𞤲𞤣𞤫⹁ 𞤬𞤢𞤯𞤢𞤼𞤢𞥄 𞤳𞤮 𞤬𞤢𞥄𞤤𞤢𞥄. 𞤖𞤭𞤩𞤫 𞤢𞤲𞤣𞤵𞤲𞤮𞥅 𞤱𞤮𞤲𞤣𞤫𞤥𞤢 𞤧𞤭 𞤩𞤫 𞤤𞤵𞤥𞤦𞤢𞤴⹁ 𞤩𞤫 𞤱𞤢𞤳𞥆𞤭𞤤𞤮𞤼𞤮 𞤸𞤢𞥄 𞤩𞤫 𞤨𞤭𞤴𞤢 𞤳𞤢𞥄𞤳𞤢𞤪𞤢𞥄𞤶𞤭 𞤉𞤅𞤆𞤀𞤙 𞤯𞤭𞤲. 𞤑𞤮 𞤯𞤵𞤥 𞤤𞤫 𞤩𞤫 𞤱𞤢𞤳𞥆𞤭𞤤𞤭𞥅 𞤸𞤢𞥄 𞤩𞤫 𞤱𞤢𞤯𞤭. 𞤊𞤭𞥅 𞤳𞤢𞤤𞤢 𞤀𞤂𞤜𞤀𞤈𞤌 𞤃𞤌𞤈𞤀𞤚𞤀 𞤲𞤢𞥄𞤣𞤢𞤲𞥆𞤮 𞤀𞤅𞤆𞤀𞤙 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥑𞥑⹁ 𞤯𞤵𞤥 𞤼𞤢𞤰𞤭𞤲𞤢𞥄𞤤𞤭 𞤩𞤫𞤪𞤯𞤫 𞤶𞤢𞤨𞤢𞤲𞤢𞥄𞤩𞤫 𞤩𞤫𞤲.

𞤖𞤮𞤶𞤮𞤥𞤢𞥄𞤶𞤫 𞤼𞤢𞤼𞤭 𞤩𞤢𞥄𞤱𞤮 𞤊𞤭𞤶𞤮 𞤲𞤺𞤮𞤲 𞤬𞤵𞤯𞥆𞤭𞤼𞤫𞥅𞤣𞤫⹁ 𞤈𞤋𞤚𞤅𞤓 𞤁𞤌𞤏𞤀𞤐 𞤭𞤼𞥆𞤢𞤲𞤭 𞤔𞤀𞤆𞤀𞤐 𞤳𞤵𞥅𞤤𞤢𞤤 𞤲𞤺𞤢𞤤. 𞤖𞤮𞤶𞤮𞤥𞤢𞥄𞤶𞤫 𞤼𞤢𞤼𞤭 𞤩𞤢𞥄𞤱𞤮 𞤯𞤵𞤥⹁ 𞤚𞤀𞤐𞤀𞤑𞤀 𞤩𞤫𞤴𞤣𞤭𞤼𞤭 𞤺𞤮𞥅𞤼𞤢𞤤. 𞤏𞤮𞤲𞤭 𞤔𞤀𞤆𞤀𞤐 𞥒⹁ 𞤀𞤉𞤅𞤆𞤀𞤙 𞥑. 𞤑𞤮𞤲𞤮 𞤩𞤫 𞤯𞤭𞤯𞤮 𞤳𞤢𞤤𞤢 𞤩𞤫 𞤤𞤵𞤥𞤦𞤭𞥅.

𞤑𞤢 𞤶𞤫𞥅𞤼𞤢𞤼𞤢𞤩𞤢𞤤⹁ 𞤳𞤮 𞤉𞤅𞤆𞤀𞤙 𞤫 𞤃𞤀𞤈𞤌𞤑 𞤬𞤭𞤶𞤢𞤼𞤢⹁ 𞤔𞤀𞤆𞤀𞤐 𞤫 𞤑𞤌𞤈𞤌𞤏𞤀𞤅𞤋 𞤬𞤮𞤼𞥆𞤢.
𞤒𞤮 𞤑𞤌𞤈𞤌𞤏𞤀𞤅𞤋 𞤸𞤫𞤦𞤤𞤮 𞤬𞤮𞤼𞤢 𞤧𞤢𞤦𞤵𞤲𞤢 𞤔𞤀𞤆𞤀𞤐 𞤥𞤮𞤰𞥆𞤢𞤲𞤢𞥄 𞤳𞤭𞤨𞥆𞤭 𞤉𞤪𞤮𞤨 𞤯𞤭𞤲 𞤸𞤭𞤳𞥆𞤢. 𞤇𞤫 𞤨𞤭𞤴𞤭𞥅 𞤉𞤅𞤆𞤀𞤙 𞤫 𞤀𞤂𞤃𞤀𞤐 𞤫 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞤸𞤭𞤳𞥆𞤢. 𞤍𞤫𞥅 𞤤𞤫𞤴𞤯𞤫 𞤯𞤭𞤯𞤭 𞤤𞤫⹁ 𞤳𞤮 𞤸𞤮𞥅𞤤𞤮𞤪𞤢𞥄𞤯𞤫 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪.