𞤔𞤉𞥅𞤚𞤀𞤚𞤀𞤇𞤀𞤂 𞤊𞤌𞥅𞤂𞤌𞤚𞤋𞤈𞤌 𞤐𞤘𞤌𞤐 𞤑𞤀𞤃𞤀𞤈𞤓𞤐 𞤊𞤓𞤍𞥆𞤋𞤑𞤉

𞤑𞤮 𞤫 𞤪𞤫𞤬𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥒𞥓 𞤅𞤭𞥅𞤤𞤮⹁ 𞤬𞤵𞤯𞥆𞤭 𞤶𞤫𞥅𞤼𞤢𞤼𞤢𞤩𞤢𞤤 𞤲𞤺𞤢𞤤 𞤳𞤢 𞤬𞤮𞥅𞤤𞤮𞤼𞤭𞤪𞤮 𞤤𞤢𞤼𞤮 𞤥𞤵𞤤𞥆𞤫𞤼𞤫 𞤺𞤫𞤲𞤯𞤭 𞤀𞤬𞤪𞤭𞤳.

𞤉 𞤼𞤭𞤨𞥆𞤭𞤪𞤮 𞤢𞤪𞤢𞤲𞤮 𞤲𞤺𞤮𞤲 𞤳𞤮 𞤄𞤵𞤪𞤳𞤭𞤲𞤢 𞤫 𞤘𞤢𞤦𞤮𞤲 𞤬𞤮𞤼𞥆𞤭. 𞤑𞤢 𞤸𞤮𞤶𞤮𞤥𞤢𞥄𞤪𞤫 𞥒𞥘𞤩𞤫𞤪𞤫⹁ 𞤄𞤵𞤪𞤳𞤭𞤲𞤢 𞤱𞤢𞤯𞤭 𞤘𞤢𞤦𞤮𞤲 𞤳𞤵𞥅𞤤𞤢𞤤. 𞤑𞤮𞤲𞤮 𞤳𞤢 𞤸𞤢𞤨𞥆𞤵 𞤲𞤺𞤵𞤲 𞤼𞤭𞤥𞥆𞤢𞤼𞤢 𞤯𞤮𞤲⹁ 𞤘𞤢𞤦𞤮𞤲 𞤭𞤼𞥆𞤭 𞤲𞤺𞤢𞤤. 𞤚𞤢𞤱𞤭 𞤳𞤮 𞤦𞤫𞥅 𞤩𞤫 𞤩𞤫𞤴𞤣𞤢 𞤳𞤮𞤶𞤮𞤥𞤢𞥄𞤶𞤫 𞥓𞥐 𞤳𞤢𞤣𞤭. 𞤑𞤮𞤲𞤮 𞤲𞤣𞤫 𞤯𞤫𞤲 𞤲𞤮 𞤼𞤭𞤥𞥆𞤢⹁ 𞤼𞤢𞤱𞤭 𞤸𞤢𞤴 𞤺𞤮𞥅𞤼𞤮 𞤱𞤢𞥄𞤱𞤢𞥄𞤤𞤭 𞤮𞤴𞤢. 𞤑𞤮 𞤤𞤢𞤼𞤢𞤲𞤯𞤫 𞤳𞤵𞥅𞤤𞤫 𞤧𞤫𞤲𞤣𞤭𞤲’𞤣𞤭𞤪𞤭 𞤩𞤫. 𞤄𞤵𞤪𞤳𞤭𞤲𞤢 𞤲𞤢𞥄𞤣𞤭 𞤯𞤫 𞥗⹁ 𞤺𞤢𞤦𞤮𞤲 𞤱𞤮𞥅𞤨𞤭 𞤼𞤢𞤼𞤭 𞤲𞤢𞥄𞤣𞤭 𞥖. 𞤄𞤵𞤪𞤳𞤭𞤲𞤢 𞤤𞤵𞤥𞤦𞤭. 𞤇𞤫 𞤼𞤢𞤱𞤫𞤼𞤫 𞤳𞤢 𞤲𞤢𞤴𞤩𞤢𞤤. 𞤘𞤢𞤦𞤮𞤲 𞤳𞤢 𞤴𞤢𞤤𞤼𞤭𞥅.

𞤉 𞤬𞤭𞤶𞤢𞤲𞤣𞤫 𞤯𞤭𞤯𞤢𞤩𞤫𞤪𞤫 𞤲𞤣𞤫𞤲⹁ 𞤽𞤢𞤤𞤢𞤱𞤵 𞤥𞤢𞤱𞤲𞤺𞤵 𞤱𞤢𞤯𞤭 𞤧𞤢𞤦𞤵𞤲𞤢 𞤯𞤵𞥅𞤯𞤵𞤩𞤫 𞤲𞤮 𞤼𞤭𞤶𞥆𞤭𞤲𞤮𞥅 𞤳𞤢 𞤐𞤢𞤶𞤫𞤪𞤭𞤴𞤢 𞤴𞤢𞤤𞤼𞤭𞤲𞤭 𞤚𞤵𞤲𞤭𞥅𞤧𞤢. 𞤑𞤮𞤲𞤮 𞤲𞤣𞤫 𞤩𞤫 𞤪𞤵𞤼𞥆𞤭𞤲𞤮𞥅 𞤩𞤢𞥄𞤱𞤮 𞤬𞤮𞤱𞤼𞤫𞤪𞤫 𞤲𞤣𞤫𞤲 𞤳𞤢 𞤬𞤫𞤷𞥆𞤫𞤪𞤫 𞤸𞤢𞤨𞥆𞤵⹁ 𞤚𞤵𞤲𞤭𞥅𞤧𞤢 𞤱𞤢𞤯𞤭 𞤐𞤢𞤶𞤫𞤪𞤭𞤴𞤢 𞤳𞤵𞥅𞤤𞤢𞤤 𞤺𞤮𞥅𞤼𞤢𞤤. 𞤐𞤢𞤶𞤫𞤪𞤭𞤴𞤢 𞤫𞤼𞤭𞥅 𞤲𞤮 𞤭𞤼𞥆𞤭𞤪𞤢 𞤲𞤺𞤢𞤤⹁ 𞤩𞤫 𞤪𞤮𞤲𞤳𞤭 𞤬𞤫𞤧. 𞤍𞤵𞥅𞤯𞤵𞤩𞤫 𞤤𞤫 𞤲𞤮 𞤴𞤮𞤱𞤵𞤲𞤮𞥅 𞤶𞤭𞤳𞥆𞤫 𞤫 𞤐𞤢𞤶𞤫𞤪𞤭𞤴𞤢. 𞤐𞤮 𞤼𞤭𞤶𞥆𞤢𞤲𞤮𞥅 𞤳𞤢 𞤩𞤫 𞤩𞤢𞤽𞤼𞤭 𞤬𞤫𞤤𞤲𞤺𞤮 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲. 𞤑𞤮𞤲𞤮 𞤩𞤢𞥄𞤴𞤼𞤭 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤧𞤫𞥅𞤣𞤢𞤼𞤢𞥄 𞤫 𞤽𞤢𞤤𞤢𞤱𞤵⹁ 𞤤𞤵𞤼𞥆𞤭𞥅 𞤳𞤮 𞤢𞤪𞤢𞤼𞤢.

𞤑𞤢 𞤻𞤢𞤤𞤢𞥄𞤲𞤣𞤫 𞤯𞤭𞤯𞤢𞤩𞤫𞤪𞤫 𞤶𞤫𞥅𞤼𞤢𞤼𞤢𞤩𞤢𞤤⹁ 𞤯𞤵𞤲 𞤳𞤮 𞤸𞤢𞤲𞤳𞤭 𞤫 𞤢𞥄𞤩𞤵𞤲’𞤣𞤫⹁ 𞤘𞤥𞤦𞤭𞤴𞤢 𞤶𞤵𞤸𞤭 𞤘𞤭𞤲𞤫⹁ 𞤴𞤢𞤤𞤼𞤭𞤲𞤭𞤪𞤭 𞤩𞤫 𞤳𞤵𞥅𞤤𞤢𞤤. 𞤍𞤮𞥅 𞤳𞤢𞤣𞤭⹁ 𞤦𞤵𞤴 𞤲𞤮 𞤼𞤭𞤶𞥆𞤭𞤲𞤮𞥅 𞤳𞤢 𞤘𞤭𞤲𞤫 𞤬𞤮𞥅𞤤𞤭 𞤘𞤢𞤥𞤦𞤭𞤴𞤢. 𞤑𞤮𞤲𞤮 𞤘𞤭𞤲𞤫𞤲𞤢𞥄𞤩𞤫 𞤩𞤫𞤲 𞤬𞤭𞤶𞤭𞤪𞤢𞥄𞤤𞤭 𞤩𞤫𞤪𞤲𞤣𞤫⹁ 𞤥𞤢𞤤𞥆𞤢 𞤱𞤢 𞤬𞤢𞥄𞤤𞤢𞥄𞤩𞤫 𞤬𞤮𞥅𞤤𞤵𞤣𞤫 𞤧𞤭 𞤱𞤮𞤲𞤢𞥄 𞤳𞤢 𞤳𞤮𞤶𞤮𞤥𞤢𞥄𞤶𞤫 𞥑𞥕 𞤧𞤢𞤳𞥆𞤭𞤼𞤭𞥅𞤯𞤫. 𞤑𞤮𞤲𞤮 𞤸𞤢𞤪𞤭 𞤤𞤢𞥄𞤱𞤭𞤳𞤫. 𞤊𞤭𞥅 𞤳𞤢𞤤𞤢 𞤤𞤢𞤼𞤮𞥅𞤱𞤮 𞤘𞤢𞤥𞤦𞤭𞤴𞤢 𞤸𞤮𞤤𞥆𞤢𞤲𞤮 𞤦𞤮𞤯𞤫𞤱𞤢𞤤 𞤮 𞤴𞤢𞤤𞤼𞤭𞤲𞤢𞥄⹁ 𞤘𞤭𞤲𞤫 𞤱𞤢𞥄𞤱𞤢𞥄𞤲𞤮 𞤭𞤼𞥆𞤵𞤣𞤫 𞤳𞤵𞥅𞤤𞤢𞤤 𞤲𞤺𞤢𞤤.

𞤉 𞤬𞤭𞤶𞤢𞤲𞤣𞤫 𞤯𞤭𞤯𞤢𞤩𞤫𞤪𞤫 𞤲𞤣𞤫𞤲 𞤸𞤢𞤲𞤳𞤭⹁ 𞤼𞤮𞥅𞤤𞤲𞤵𞤩𞤫 𞤩𞤫𞤲 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲 𞤧𞤮𞤪𞤼𞤭𞥅 𞤫 𞤤𞤫𞤴 𞤤𞤢𞤩𞤵𞤲. 𞤅𞤢𞤦𞤵𞤲𞤢 𞤳𞤮 𞤳𞤢𞤪𞤢𞤸𞤢𞤲 𞤤𞤢𞤼𞤮𞥅𞤩𞤫 𞥑𞥑 𞤑𞤢𞤥𞤢𞤪𞤵𞤲 𞤩𞤫𞤲 𞤨𞤭𞤴𞤭𞤪𞤭 𞤤𞤢𞤼𞤮𞥅𞤩𞤫 𞥑𞥐 𞤑𞤮𞤥𞤮𞤪.

𞤑𞤢 𞤸𞤮𞤶𞤮𞤥𞤢𞥄𞤪𞤫 𞤶𞤫𞥅𞤯𞤭𞤯𞤢𞤩𞤫𞤪𞤫⹁ 𞤤𞤢𞤼𞤮𞥅𞤱𞤮 𞤑𞤮𞤥𞤮𞤪𞤲𞤢𞥄𞤶𞤮 𞤸𞤮𞤤𞥆𞤢𞤲𞤮 𞤦𞤮𞤯𞤫𞤱𞤢𞤤. 𞤇𞤢𞥄𞤱𞤼𞤭 𞤯𞤵𞤥⹁ 𞤑𞤢𞤥𞤢𞤪𞤵𞤲 𞤲𞤢𞥄𞤣𞤭 𞤳𞤵𞥅𞤤𞤫 𞤯𞤭𞤯𞤭⹁ 𞤳𞤮𞤲𞤮 𞤑𞤮𞤥𞤮𞤪 𞤱𞤵𞤪𞤼𞤭𞤲𞤭 𞤺𞤮𞥅𞤼𞤢𞤤.

𞤖𞤢𞤲𞤣𞤫 𞤳𞤮 𞤅𞤫𞤲𞤫𞤺𞤢𞥄𞤤 𞤫 𞤑𞤢𞤨𞤱𞤫𞤪 𞤬𞤭𞤶𞤢𞤼𞤢. 𞤖𞤭𞤳𞥆𞤮𞥅 𞤯𞤮𞤲 𞤃𞤢𞤪𞤮𞤳 𞤫 𞤃𞤢𞤤𞤢𞤱𞤭. 𞤅𞤮 𞤱𞤮𞤲𞤢𞥄 𞤬𞤭𞥅 𞤽𞤢𞤤𞤢𞤱𞤵 𞤤𞤢𞤲𞥆𞤢𞤼𞤢𞥄 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫⹁ 𞤲𞤮 𞤼𞤭𞤶𞥆𞤢𞥄 𞤳𞤢 𞤅𞤫𞤲𞤫𞤺𞤢𞥄𞤤 𞤫 𞤃𞤢𞤪𞤮𞤳 𞤬𞤫𞤰𞥆𞤭. 𞤑𞤮𞤲𞤮 𞤫𞤩𞤫 𞤸𞤫𞤯𞤢𞥄.