𞤘𞤋𞤐𞤉: 𞤑𞤀𞥄𞤅𞤌𞤈𞤋 𞤊𞤌𞥅𞤊𞤀𞤐𞤀𞥄⹁ 𞤀𞤈𞤁𞤌 𞤑𞤋𞤍𞥆𞤌 𞤔𞤀𞥄𞤘𞤌𞤈𞤀𞤂 𞤐𞤘𞤀𞤂 𞤊𞤉𞤏𞤐𞤁𞤌 𞤂𞤀𞥄𞤃𞤓 𞤀𞤂𞤊𞤀𞥄 𞤑𞤌𞤐𞤁𞤉 𞤐𞤘𞤓𞤐 𞤊𞤀𞤏𞤀𞥄𞤃𞤀 𞤅𞤌𞤑𞤉𞥅𞤁𞤉
𞤖𞤢𞤲𞤳𞤭 𞤫 𞤐𞤢𞥄𞤧𞤢𞥄𞤲𞤣𞤫⹁ 𞥒𞥗 𞤕𞤮𞤤𞤼𞤮 𞥒𞥐𞥒𞥕⹁ 𞤑𞤈𞤋𞤒𞤉𞤊⹁ 𞤯𞤵𞤥 𞤳𞤮 𞤙𞤢𞥄𞤱𞤭𞤪𞤣𞤵 𞤤𞤫𞤼𞥆𞤭𞤪𞤲𞤣𞤵 𞤦𞤮𞤲𞥆𞤫 𞤊𞤢𞤺𞥆𞤵𞤣𞤵 𞤫 𞤐𞤺𞤢𞤤𞤵⹁ 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤑𞤀𞥄𞤅𞤌𞤈𞤋 𞤊𞤌𞥅𞤊𞤀𞤐𞤀𞥄 𞤲𞤮 𞤬𞤢𞤺𞥆𞤭𞤼𞤭𞥅 𞤱𞤵𞤶𞥆𞤵𞤺𞤮𞤤 𞤶𞤢𞤱𞤤𞤫 𞤸𞤢𞤱𞤼𞤢𞥄𞤯𞤫⹁ 𞤫 𞤢𞤤𞤯𞤭𞤲𞤮𞤪𞤺𞤮𞤤 𞤲𞤮 𞤸𞤢𞤪𞤥𞤭𞤪𞤭 𞤳𞤢𞤻𞤵𞤲 𞤫 𞤥𞤫𞤸𞤵𞤺𞤮𞤤 𞤭𞤱𞤣𞤭 𞤶𞤢𞤱𞤤𞤫. 𞤙𞤢𞥄𞤱𞤮𞥅𞤪𞤫 𞤲𞤣𞤫𞤲 𞤼𞤢𞤰𞤢𞥄𞤥𞤢 𞤸𞤮𞥅𞤪𞤫 𞤼𞤵𞤤𞤼𞤢𞤤 𞤳𞤢𞤲𞤳𞤮 𞤬𞤢𞤱𞤢𞥄𞤯𞤮 𞤮𞤲 𞤼𞤢𞤱𞤣𞤫 𞤮𞤥𞤮 𞤱𞤵𞤤𞥆𞤭𞤼𞤭𞥅 «𞤻𞤢𞥄𞤱𞤮𞥅𞤪𞤫 𞤣𞤢𞤱𞤪𞤭𞤲𞤢𞥄𞤲𞤣𞤫»
𞤑𞤮 𞤩𞤢𞤣𞤲𞤭 𞤣𞤵𞥅𞤩𞤭 𞤯𞤭𞤯𞤭⹁ 𞤺𞤭𞤦𞤭 𞤻𞤢𞥄𞤱𞤮𞥅𞤪𞤫 𞤲𞤣𞤫𞤲 𞤬𞤵𞤯𞥆𞤢𞥄 𞤻𞤢𞤤𞤲𞤣𞤫 𞥑𞥕 𞤐𞤄𞤮𞥅𞤴𞤮 𞥒𞥐𞥒𞥓⹁ 𞤋𞤄𞤈𞤀𞥄𞤖𞤋𞥅𞤃𞤀 𞤑𞤀𞥄𞤅𞤌𞤈𞤋 𞤊𞤌𞥅𞤊𞤀𞤐𞤀𞥄 𞤼𞤭𞤨𞥆𞤢𞥄𞤤𞤭 𞤳𞤢 𞤻𞤢𞥄𞤱𞤭𞤪𞤣𞤫. 𞤖𞤭𞤲𞤮 𞤤𞤫⹁ 𞤮𞥅 𞤀𞤪𞤣𞤭𞤲𞤮𞥅𞤯𞤮 𞤶𞤢𞥄𞤺𞤮𞤪𞤢𞤤 𞤧𞤢𞤳𞥆𞤭𞤼𞤮𞤪𞤢𞤤 𞤀𞤂𞤊𞤀𞥄 𞤑𞤌𞤐𞤁𞤉 𞤲𞤺𞤢𞤤 𞤸𞤢𞤳𞥆𞤵𞤲’𞤣𞤫 𞤁𞤵𞥅𞤶𞤮 𞥒𞥐𞥑𞥘 𞤫 𞤅𞤭𞤤𞤼𞤮 𞥒𞥐𞥒𞥑⹁ 𞤲𞤮 𞤬𞤢𞤱𞤢𞤲𞤮𞥅 𞤳𞤮 𞤼𞤭𞥅𞤯𞤭: 𞤺𞤵𞤴𞤢𞥄𞤤𞤫⹁ 𞤢𞤤𞤯𞤭𞤲𞤮𞤪𞤺𞤮𞤤 𞤲𞤮 𞤸𞤢𞤪𞤥𞤭𞤪𞤭 𞤫 𞤥𞤮𞤲𞤼𞤵𞤺𞤮𞤤 𞤭𞤱𞤣𞤭 𞤲𞤦𞤵𞥅𞤯𞤭.
𞤑𞤈𞤋𞤒𞤉𞤊 𞤸𞤢𞤨𞥆𞤢𞤲𞤭𞥅 𞤥𞤮 𞤧𞤮𞤳𞤫𞥅𞤣𞤫 𞤣𞤵𞥅𞤩𞤭 𞤶𞤮𞤱𞤭 𞤳𞤢𞤻𞤵𞤲 𞤫𞤶𞤵𞤳𞥆𞤫𞤪𞤫 𞤴𞤮𞤩𞤵𞤺𞤮𞤤 𞤣𞤵𞤶𞤵𞤲𞤫 𞥒 𞤊𞤢𞤪𞤢𞤲 𞤘𞤭𞤲𞤫. 𞤑𞤮 𞤤𞤢𞥄𞤩𞤭 𞤳𞤮𞤲⹁ 𞤮𞤥𞤮 𞤲𞤢𞤲𞤺𞤭𞤪𞤢𞥄 𞤱𞤵𞤶𞥆𞤵𞤺𞤮𞤤 𞤳𞤮 𞤬𞤮𞤼𞤭 𞤣𞤵𞤶𞤵𞤲𞤫 𞥑𞥕 𞤊𞤢𞤪𞤢𞤲 𞤘𞤭𞤲𞤫 𞤳𞤢𞤻𞤵𞤲 𞤫 𞤢𞤤𞤯𞤭𞤪𞤲𞤮𞤪𞤺𞤮𞤤 𞤲𞤮 𞤸𞤢𞤪𞤥𞤭𞤪𞤭 𞤫𞤥𞤦𞤫𞤪𞤫 𞤣𞤵𞤶𞤵𞤲𞤫 𞥑𞥕 𞤊𞤢𞤪𞤢𞤲 𞤘𞤭𞤲𞤫. 𞤀𞤂𞤋𞥅 𞤚𞤓𞥅𞤈𞤉⹁ 𞤮𞥅𞤲 𞤳𞤮 𞤻𞤢𞥄𞤱𞤭𞤲’𞤣𞤮𞤼𞤮𞥅𞤯𞤮 𞤸𞤫𞥅𞤪𞤼𞤭𞥅𞤯𞤮 𞤑𞤈𞤋𞤒𞤉𞤊 𞤮𞤲⹁ 𞤤𞤢𞤲𞤣𞤭𞤲𞤮𞤳𞤫 𞤺𞤭𞤦𞤭 𞥒𞥕 𞤅𞤭𞥅𞤤𞤮 𞥒𞥐𞥒𞥕⹁ 𞤧𞤮𞤳𞤵𞤺𞤮𞤤 𞤑𞤀𞥄𞤅𞤌𞤈𞤋 𞤣𞤵𞥅𞤩𞤭 𞤶𞤮𞤱𞤭 𞤼𞤭𞤥𞥆𞤵𞤯𞤭 𞤼𞤭𞤧 𞤳𞤢𞤻𞤵𞤲 𞤫 𞤶𞤵𞤳𞥆𞤫𞤪𞤫 𞤴𞤮𞤩𞤭𞤲𞤺𞤮𞤤 𞤥𞤮 𞤣𞤵𞤶𞤵𞤲𞤫 𞥕 𞤊𞤢𞤪𞤢𞤲⹁ 𞤼𞤢𞤱𞤼𞤭 𞤶𞤢𞤩𞤭𞤼𞤵𞤺𞤮𞤤 𞤶𞤫𞤴𞤫 𞤥𞤢𞤳𞥆𞤮 𞤯𞤫𞤲 𞤬𞤮𞤨⹁ 𞤲𞤮 𞤼𞤢𞤱𞤢𞥄 𞤫 𞤯𞤫𞥅𞤲 𞤥𞤢𞤲𞤳𞤭𞥅𞤶𞤫 𞤥𞤢𞤳𞥆𞤮 𞤼𞤢𞤼𞤭.
𞤑𞤮 𞤻𞤢𞤤𞤲𞤣𞤫 𞥖 𞤅𞤫𞥅𞤯𞤼𞤮 𞥒𞥐𞥒𞥒 𞤑𞤀𞥄𞤅𞤌𞤈𞤋 𞤊𞤌𞥅𞤊𞤀𞤐𞤀𞥄 𞤲𞤢𞤲𞤺𞤢𞥄 𞤸𞤢𞤪𞤭 𞤮𞤥𞤮 𞤼𞤮𞤯𞥆𞤭𞤼𞤭𞥅 𞤼𞤵𞤲 𞤱𞤮𞤲𞤵𞤺𞤮𞤤 𞤸𞤮𞥅𞤪𞤫𞥅𞤶𞤮 𞤊𞤫𞤣𞥆𞤫 𞤤𞤢𞥄𞤥𞤭𞤲𞤮𞥅𞤲𞤣𞤫 𞤲𞤣𞤫𞤲⹁ 𞤩𞤢𞥄𞤱𞤮 𞤀𞤂𞤊𞤀𞥄 𞤑𞤌𞤐𞤁𞤉 𞤼𞤵𞤽𞤭𞤲𞤢𞥄𞤣𞤫 𞤚𞤵𞤪𞤳𞤭𞤴𞤢. 𞤑𞤢𞤲𞤳𞤮 𞤫 𞤴𞤭𞤥𞤩𞤫 𞤥𞤢𞤳𞥆𞤮 𞤩𞤫𞤲⹁ 𞤩𞤫 𞤬𞤫𞤤𞥆𞤭𞤼𞤭 𞤱𞤮𞤲𞤣𞤫𞤥𞤢 𞤔𞤵𞤲𞥆𞤭𞤼𞤢𞤤 𞤅𞤮𞥅𞤪𞤭 𞤲𞤺𞤢𞤤 𞤤𞤫𞤼𞥆𞤭𞤪𞤢𞤴 𞤥𞤮 𞤱𞤮𞤲𞤭 𞤧𞤢𞤦𞤵 𞤬𞤢𞥄𞤤𞤫 𞤥𞤢𞤳𞥆𞤮 𞤣𞤢𞤱𞤪𞤵𞤺𞤮𞤤.
𞤉 𞤻𞤢𞤤𞤢𞥄𞤲𞤣𞤫 𞤢𞤪𞤢𞤲𞤫𞤪𞤫 𞤻𞤢𞥄𞤱𞤮𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤮 𞤴𞤢𞤤𞤼𞤭𞤲𞥆𞤮 𞤩𞤢𞤼𞤢𞥄𞤳𞤵𞤪𞤵 𞤳𞤢 𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤮 𞤼𞤢𞤱𞤣𞤫𞤼𞤢𞥄𞤳𞤫 𞤫 𞤻𞤢𞥄𞤱𞤮𞥅𞤪𞤫 𞤥𞤢𞤳𞥆𞤮 𞤬𞤢𞤲𞥆𞤭𞥅 𞤸𞤢𞤳𞥆𞤫𞥅𞤶𞤭 𞤥𞤢𞤳𞥆𞤮 𞤯𞤭𞤲 𞤼𞤮𞤼𞥆𞤢𞥄𞤳𞤢. 𞤍𞤭𞥅𞤲 𞤲𞤮 𞤴𞤮𞤱𞤭𞤼𞤭𞥅 𞤫 𞤸𞤫𞤩𞤼𞤢𞥄𞤪𞤫 𞤳𞤫𞤲𞤫𞤲𞤼𞤭𞥅𞤪𞤫 𞤲𞤣𞤫 𞤻𞤢𞥄𞤱𞤮𞥅𞤩𞤫 𞤩𞤫𞤲 𞤸𞤫𞤩𞤼𞤢𞤲𞤭 𞤥𞤮⹁ 𞤻𞤢𞥄𞤱𞤮𞥅𞤪𞤫 𞤲𞤣𞤫 𞤴𞤭𞥅𞤤𞤭𞤪𞤣𞤫 𞤻𞤢𞥄𞤱𞤭𞤲𞥋𞤣𞤮𞤼𞤮𞥅𞤩𞤫 𞤩𞤫𞤲 𞤧𞤢𞤤𞤭𞥅 𞤸𞤵𞥅𞤩𞤲𞤵𞤣𞤫. 𞤘𞤭𞤦𞤭 𞤲𞤣𞤫𞥅𞤲⹁ 𞤑𞤢𞥄𞤧𞤮𞤪𞤭 𞤸𞤫𞤩𞤭𞥅 𞤨𞤮𞥅𞤤𞤮𞤴 𞤺𞤭𞤤𞤢 𞤳𞤢 𞤙𞤢𞥄𞤱𞤭𞤪𞤲𞤣𞤵 𞤎𞤫𞤤𞥆𞤭𞤼𞤭𞥅𞤲𞤣𞤵 𞤘𞤭𞤲𞤫 𞤲𞤣𞤵𞤲 𞤸𞤢𞥄 𞤸𞤫𞤱𞤼𞤭 𞤳𞤢 𞤙𞤢𞥄𞤱𞤭𞤪𞤣𞤵 𞤁𞤉𞤐𞤘𞤖𞤀. 𞤍𞤵𞤥 𞤳𞤮 𞤻𞤢𞥄𞤱𞤭𞤪𞤯𞤫 𞤯𞤵𞥅𞤯𞤵𞤯𞤫 𞤼𞤢𞤦𞤭𞤲𞤼𞤭𞤲𞤯𞤫 𞤱𞤮𞤲𞤣𞤫𞤥𞤢 𞤶𞤮𞤺𞤫𞥅𞤣𞤫 𞤥𞤢𞤳𞥆𞤮 𞤱𞤮𞤲𞤢𞥄 𞤸𞤢𞥄𞤲𞤵𞤯𞤵𞤲⹁ 𞤳𞤮𞤲𞤮 𞤦𞤢𞤯𞤼𞤭𞤲𞤢𞥄𞤤𞤭.
𞤙𞤢𞤤𞤲𞤣𞤫 𞥑𞥐 𞤄𞤮𞤱𞤼𞤮 𞤧𞤢𞥄𞤤𞤭𞥅𞤲𞤣𞤵⹁ 𞤻𞤢𞥄𞤱𞤮𞥅𞤱𞤮 𞤺𞤮𞥅𞤼𞤮 𞤣𞤵𞤽𞤭𞤲𞤭 𞤰𞤢𞤥𞤢𞤤 𞤥𞤢𞤳𞥆𞤮 𞤬𞤭𞥅 𞤻𞤢𞤱𞤲𞤣𞤮𞤴𞤢𞤺𞤮𞤤 𞤳𞤢 𞤅𞤢𞤬𞤪𞤮𞤪𞤣𞤫 𞤀𞤥𞤫𞤪𞤭𞤳𞤲𞤢𞥄𞤪𞤫 𞤆𞤢𞤪𞤭⹁ 𞤩𞤢𞥄𞤱𞤮 𞤮 𞤤𞤢𞤦𞤼𞤭𞤲𞤢𞥄𞤥𞤢 𞤳𞤮 𞤴𞤢𞤱𞤼𞤭 𞤸𞤭𞤼𞤢𞥄𞤲𞤣𞤫 𞤫 𞤸𞤵𞤪𞤺𞤮𞤪𞤣𞤫 𞤑𞤌𞤐𞤀𞥄𞤑𞤋𞤈𞤋⹁ 𞤤𞤢𞥄𞤥𞤮𞤪𞤣𞤫 𞤘𞤋𞤐𞤉. 𞤑𞤮𞤲𞤮 𞤀𞤂𞤋𞥅 𞤚𞤓𞥅𞤈𞤉⹁ 𞤙𞤢𞥄𞤱𞤭𞤲𞥋𞤣𞤮𞤼𞤮𞥅𞤯𞤮 𞤮𞤲 𞤧𞤢𞤤𞤭𞥅 𞤳𞤢𞤣𞤭. 𞤈𞤫𞤬𞤼𞤭 𞤻𞤢𞥄𞤱𞤮𞥅𞤱𞤮 𞤴𞤢𞥄𞤲𞤵𞤲𞤮𞥅𞤯𞤮 𞤮𞤲 𞤧𞤢𞥄𞤴𞤲𞤢𞥄⹁ 𞤳𞤮 𞤸𞤫𞤣𞥆𞤭𞥅 𞤫 𞤥𞤵𞤪𞤢𞥄𞤣𞤵 𞤲𞤣𞤵𞤲 𞤸𞤢𞤤𞤬𞤭𞤲𞤢𞥄 𞤻𞤢𞥄𞤱𞤮𞥅𞤱𞤮 𞤺𞤮𞥅𞤼𞤯𞤮 𞤺𞤮𞥅.
𞤚𞤵𞤤𞤼𞤵𞤺𞤮𞤤 𞤑𞤀𞥄𞤅𞤌𞤈𞤋 𞤊𞤌𞥅𞤊𞤀𞤐𞤀𞥄 𞤫 𞤻𞤢𞥄𞤱𞤮𞥅𞤪𞤫 𞤥𞤵𞥅𞤯𞤵𞤲 𞤲𞤣𞤫𞤲 𞤸𞤢𞤯𞤢𞥄𞤤𞤭 𞤥𞤮 𞤥𞤮𞥅𞤩𞤼𞤭𞤲𞥋𞤣𞤭𞤪𞤣𞤫 𞤳𞤭𞤨𞥆𞤮𞤤 𞤴𞤫𞤯𞥆𞤵𞤲𞥋𞤺𞤮𞤤 𞤼𞤫𞤬𞤮𞥅𞤩𞤫 𞤘𞤭𞤲𞤫𞤲𞤢𞥄𞤩𞤫 𞤫 𞤶𞤢𞤲𞤢𞤲𞤩𞤫 𞤬𞤭𞥅 𞤸𞤵𞥅𞤩𞤲𞤵𞤺𞤮𞤤 𞤣𞤢𞤪𞤼𞤮 𞤥𞤢𞤳𞥆𞤮 𞤲𞤺𞤮𞤲. 𞤳𞤮𞤲𞤮 𞤼𞤫𞤬𞤭𞤲’𞤣𞤮𞤼𞤮𞥅𞤩𞤫 𞤥𞤢𞤳𞥆𞤮 𞤩𞤫𞤲⹁ 𞤳𞤢𞤥𞤩𞤫 𞤳𞤢𞤣𞤭⹁ 𞤩𞤫 𞤯𞤵𞥅𞤪𞤭𞥅 𞤼𞤫𞤬𞤭𞤲𞥋𞤣𞤮𞥅𞤶𞤫 𞤯𞤫𞤲 𞤫 𞤸𞤢𞥄𞤲𞤣𞤭𞤲𞤮𞥅𞤶𞤫 𞤧𞤢𞤪𞤭𞤴𞤢 𞤯𞤫𞤲.
𞤐𞤶𞤢𞤥𞤤𞤫 𞤷𞤢𞤨𞥆𞤢𞤲𞤯𞤫 𞤲𞤢𞤴𞤭 𞤫 𞤶𞤫𞥅𞤼𞤢𞤼𞤭 𞤢𞤣𞤮 𞤸𞤢𞤧𞤦𞤮𞥅𞤪𞤫 𞤧𞤢𞥄𞤼𞤭𞤲𞤢𞤲𞤮𞥅𞤲𞤣𞤫 𞤳𞤢 𞤢𞤪𞤢𞤲𞤵𞤲 𞤻𞤢𞤤𞤲𞤣𞤫 𞥑𞥓 𞤕𞤮𞤤𞤼𞤮⹁ 𞤣𞤭𞤪𞤼𞤭𞤪𞤢𞥄𞤲𞤣𞤫 𞤶𞤮𞤲𞤼𞤫 𞤯𞤭𞤯𞤭 𞤧𞤢𞤦𞤵 𞤷𞤢𞤯𞤫𞥅𞤤𞤫 𞤼𞤢𞤰𞤵𞤺𞤮𞤤 𞤻𞤢𞤤𞤢𞥄𞤲𞤣𞤫⹁ 𞤣𞤫𞤲𞤼𞤢𞤤 𞤼𞤫𞤬𞤭𞤲𞥋𞤣𞤮𞤼𞤮𞥅𞤩𞤫 𞤩𞤫𞤲 𞤴𞤢𞤤𞤼𞤭𞤲𞤭 𞤶𞤫𞤴𞤲𞤺𞤮𞤤 𞤬𞤭𞥅 𞤽𞤭𞤻𞤵𞤺𞤮𞤤 𞤻𞤢𞥄𞤱𞤮𞥅𞤪𞤫 𞤧𞤫𞤲𞤺𞤮𞥅𞤪𞤫⹁ 𞤸𞤫𞤻𞤭𞤲𞤢𞥄𞤲𞤣𞤫 𞤩𞤢𞥄𞤪𞤭𞥅𞤲𞤣𞤫 𞤫 𞤣𞤢𞤱𞤪𞤮”⹁ 𞤢𞤣𞤮 𞤩𞤫 𞤼𞤮𞤪𞤢𞥄𞤣𞤫 𞤤𞤢𞥄𞤥𞤩𞤫 𞤩𞤫𞤲 𞤼𞤢𞤦𞤭𞤼𞤭𞤲𞤢𞤲𞤺𞤮𞤤 𞤻𞤢𞥄𞤱𞤫𞤼𞤫𞥅𞤩𞤫 𞤩𞤫𞤲 𞤻𞤢𞥄𞤱𞤮𞥅𞤪𞤫 𞤲𞤵𞤲𞤯𞤵𞤲𞥋𞤣𞤫 𞤼𞤫𞤣𞥆𞤭𞤲𞤣𞤫 𞤧𞤢𞤪𞤼𞤭𞥅𞤶𞤭 𞤼𞤵𞥅𞤺𞤭𞤲𞤮𞤪𞤯𞤭 𞤶𞤢𞤩𞤢𞥄𞤯𞤭 𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲.” 𞤚𞤫𞤬𞤢𞤲𞤮𞥅𞤩𞤫 𞤤𞤢𞥄𞤥𞤵 𞤲𞤺𞤵𞤲 𞤴𞤭𞤴𞤪𞤭 𞤯𞤵𞤥 𞤱𞤢 𞤥𞤵𞤤𞤼𞤭𞤪𞤯𞤵𞤲 𞤻𞤢𞥄𞤱𞤮𞥅𞤪𞤫 𞤲𞤣𞤫𞤲.
𞤀𞤱𞤢 𞤧𞤢𞤯𞤭 𞤥𞤢𞤩𞥆𞤫 𞤬𞤮𞤼𞤢
𞤍𞤵𞤲 𞤯𞤮𞤮 𞤬𞤮𞤱 𞤳𞤮 𞤥𞤵𞤦𞥆𞤵𞤪𞤵 𞤫 𞤸𞤮𞥅𞤪𞤫 𞤼𞤫𞤲𞤯𞤭 𞤱𞤮𞤲𞤢𞥄. 𞤑𞤮 𞤤𞤢𞥄𞤥𞤭𞥅𞤩𞤫 𞤦𞤮𞤥𞤩𞤫 𞤬𞤫𞤲𞤮𞥅𞤩𞤫 𞤱𞤮𞤲𞤭 𞤫 𞤻𞤢𞥄𞤱𞤵𞤺𞤮𞤤 𞤤𞤢𞥄𞤥𞤭𞤲𞤮𞥅𞤩𞤫 𞤦𞤮𞤥𞤩𞤫 𞤬𞤫𞤲𞤮𞥅𞤩𞤫.
𞤏𞤮𞤲𞤩𞤫 𞤻𞤢𞥄𞤱𞤵𞤺𞤮𞤤 𞤩𞤫𞤲 𞤫 𞤱𞤮𞤲𞤢𞥄𞤩𞤫 𞤻𞤢𞥄𞤱𞤫𞥅𞤣𞤫 𞤩𞤫𞤲 𞤬𞤮𞤱 𞤳𞤮 𞤳𞤮 𞤸𞤢𞥄𞤲𞤢𞥄 𞤲𞤢𞤲𞤺𞤫𞥅𞤣𞤫 𞤸𞤢𞤱𞤼𞤭𞤲’𞤣𞤭𞤪𞤫𞥅 𞤻𞤢𞥄𞤱𞤫𞥅⹁ 𞤳𞤮 𞤱𞤢𞤪𞤫𞤼𞤫𞥅 𞤳𞤮𞤲 𞤱𞤢𞤪𞤫𞥅 𞤳𞤮 𞤧𞤮𞤳𞤫𞤼𞤫𞥅 𞤳𞤮𞤲 𞤧𞤮𞤳𞤫𞥅.