𞤘𞤋𞤐𞤉 𞥑 – 𞥑 𞤑𞤀𞤃𞤀𞤈𞤓𞤐

𞤉 𞤸𞤢𞤪𞤮 𞤯𞤭𞤯𞤢𞤩𞤮 𞤻𞤢𞤤𞥆𞤢𞤤 𞤼𞤢𞤼𞤢𞤩𞤢𞤤 𞤬𞤮𞥅𞤤𞤮𞤼𞤭𞤪𞤮 𞤬𞤭𞥅 𞤊𞤫𞤤𞤲𞤺𞤮 𞤀𞤬𞤪𞤭𞤳 𞤲𞤺𞤮𞤲⹁ 𞤳𞤮 𞤃𞤢𞤱𞤦𞤢 𞤘𞤭𞤲𞤫 𞤲𞤦𞤢𞤲 𞤫 𞤐𞤺𞤢𞤴𞤵𞥅𞤶𞤭 𞤯𞤭 𞤑𞤢𞤥𞤢𞤪𞤵𞤲 𞤯𞤭𞤲 𞤼𞤫𞤩𞥆𞤮𞤲𞤣𞤭𞤪𞤲𞤮𞥅.

𞤕𞤭𞤨𞥆𞤭𞤪𞤮 𞤲𞤺𞤮𞤲 𞤱𞤢𞤯𞤭 𞤳𞤢 𞤤𞤢𞥄𞤥𞤮𞤪𞤣𞤫 𞤒𞤢𞥄𞤥𞤵𞤧𞤮𞤳𞤮𞤪𞤮 𞤷𞤢𞤺𞥆𞤢𞤤 𞤅𞤫𞤲𞤫𞤺𞤢𞤤 𞤪𞤫𞤱𞤵𞤣𞤫 𞤸𞤮𞥅𞤪𞤫 𞤶𞤢𞤸𞤫 𞤘𞤢𞤥𞤦𞤭𞤴𞤢 𞤯𞤫𞤲.

𞤘𞤭𞤲𞤫𞤲𞤢𞥄𞤩𞤫 𞤯𞤵𞥅𞤯𞤵𞤩𞤫 𞤧𞤫𞤼𞤭𞤲𞤮 𞤭𞤥𞥆𞤮𞤪𞤣𞤫 𞤫 𞤷𞤢𞤸𞤫 𞤑𞤮𞤼𞤣𞤭𞤱𞤢𞤪 𞤯𞤫𞤲 𞤲𞤺𞤢𞤥 𞤼𞤢𞤱𞤫𞤺𞤮𞤤 𞤬𞤭𞤶𞤮 𞤸𞤢𞤳𞥆𞤵𞤲’𞤣𞤫 𞤘𞤭𞤲𞤫 𞤫 𞤑𞤢𞤥𞤢𞤪𞤵𞤲. 𞤖𞤢𞤪𞤭 𞤼𞤭𞤥𞥆𞤭𞥅 𞤣𞤵𞥅𞤩𞤭 𞤶𞤫𞥅𞤼𞤢𞤼𞤭 𞤺𞤭𞤦𞤭 𞤯𞤫𞥅 𞤤𞤫𞤴𞤯𞤫 𞤯𞤭𞤯𞤭 𞤬𞤮𞤼𞥆𞤭 𞤳𞤢 𞤀𞤬𞤳𞤮𞤲. 𞤍𞤵𞤲 𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥕 𞤱𞤢𞤴𞤪𞤭.

𞤑𞤮 𞤘𞤭𞤲𞤫 𞤢𞤣𞤭𞥅 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞤧𞤢𞤨𞥆𞤢𞤩𞤫𞤪𞤫. 𞤑𞤮 𞤃𞤮𞤸𞤢𞤥𞥆𞤫𞤣 𞤄𞤢𞥄𞤴𞤮 𞤲𞤢𞥄𞤣𞤢𞤲𞤭 𞤘𞤭𞤲𞤫 𞤳𞤵𞥅𞤤𞤢𞤤 𞤲𞤺𞤢𞤤 𞤩𞤢𞥄𞤱𞤮 𞤤𞤢𞤼𞤢𞤲𞤣𞤫 𞤃𞤮𞤪𞤭𞤦𞤢 𞤲𞤣𞤫𞤲 𞤦𞤵𞤺𞤭𞤼𞤫𞥅𞤣𞤫.

𞤇𞤢𞥄𞤱𞤼𞤭 𞤯𞤵𞤥⹁ 𞤑𞤢𞤥𞤢𞤪𞤵𞤲 𞤫𞤼𞤭𞤲𞤮 𞤲𞤮 𞤩𞤫 𞤭𞤼𞥆𞤭𞤪𞤢 𞤲𞤺𞤢𞤤. 𞤇𞤫 𞤱𞤮𞥅𞤨𞤭 𞤳𞤮 𞤯𞤵𞥅𞤯𞤭.

𞤑𞤮𞤲𞤮 𞤳𞤢 𞤬𞤫𞤷𞥆𞤮 𞤢𞤪𞤢𞤲𞤮 𞤲𞤺𞤮𞤲 𞤼𞤭𞤥𞥆𞤢𞤼𞤢 𞤯𞤮𞤲⹁ 𞤸𞤮𞥅𞤪𞤲𞤢𞤤𞥆𞤮 𞤅𞤭𞤤𞤭𞥅 𞤘𞤭𞤲𞤫 𞤮𞤲⹁ 𞤊𞤢𞤪𞤢𞤲𞤧𞤵𞤱𞤢 𞤑𞤢𞤥𞤢𞤲𞤮𞥅 𞤸𞤮𞤤𞥆𞤢𞥄 𞤳𞤫𞤩𞥆𞤢𞤤 𞤦𞤮𞤯𞤫𞤱𞤢𞤤. 𞤘𞤭𞤲𞤫 𞤸𞤫𞤣𞥆𞤮𞤣𞤭 𞤫 𞤬𞤭𞤶𞤮𞥅𞤩𞤫 𞥑𞥐.

𞤊𞤭𞥅 𞤳𞤢𞤤𞤢 𞤑𞤢𞤥𞤢𞤪𞤵𞤲 𞤫𞤼𞤭𞤲𞤮⹁ 𞤳𞤮 𞤸𞤮𞥅𞤪𞤫 𞥑-𞥐 𞤩𞤫 𞤼𞤭𞤥𞥆𞤭𞤲𞤭𞤪𞤭 𞤬𞤫𞤷𞥆𞤫𞤪𞤫 𞤢𞤪𞤢𞤲𞤫𞤪𞤫 𞤲𞤣𞤫𞤲.

𞤖𞤮𞤶𞤮𞤥𞤢𞥄𞤶𞤫 𞤧𞤢𞤨𞥆𞤮 𞤩𞤢𞥄𞤱𞤮 𞤩𞤫 𞤪𞤵𞤼𞥆𞤢𞥄𞤣𞤫⹁ 𞤑𞤢𞤥𞤢𞤪𞤵𞤲 𞤱𞤵𞤪𞤼𞤭 𞤳𞤵𞥅𞤤𞤢𞤤 𞤲𞤺𞤢𞤤. 𞤑𞤮 𞤊𞤪𞤢𞤲𞤳 𞤃𞤢𞤺𞤪𞤭 𞤱𞤮𞤲𞤭 𞤳𞤮 𞤴𞤮𞤩𞤭𞤼𞤭𞤪𞤭 𞤲𞤺𞤢𞤤 𞤦𞤮𞥅𞤼𞤫𞤪𞤫.

𞤘𞤭𞤦𞤭 𞤮𞤲𞤼𞤵𞤥𞤢⹁ 𞤸𞤢𞤪𞤭 𞤳𞤮 𞤑𞤢𞤥𞤢𞤪𞤵𞤲 𞤱𞤮𞤲𞤭 𞤬𞤫𞤱𞤶𞤵𞤣𞤫 𞤬𞤭𞤶𞤮 𞤲𞤺𞤮𞤲. 𞤐𞤣𞤫 𞤼𞤢𞤱𞤵𞤲𞤮𞥅 𞤳𞤫 𞤩𞤫 𞤧𞤢𞤨𞥆𞤮 𞤼𞤵𞤲⹁ 𞤺𞤭𞤲𞤫 𞤳𞤮 𞤲𞤮 𞤣𞤢𞤯𞤭𞤪𞤢 𞤱𞤮𞤲𞤵𞤲𞤮𞥅 𞤬𞤭𞤶𞤭𞤪𞤣𞤫.

𞤑𞤮 𞤸𞤮𞥅𞤪𞤫 𞥑 – 𞥑 𞤩𞤫 𞤧𞤫𞥅𞤣𞤭𞤪𞤭 𞤲𞤮 𞤩𞤫 𞤧𞤫𞥅𞤣𞤭𞤪𞤲𞤮𞥅 𞤲𞤮𞤲 𞤳𞤢𞤣𞤭 𞤳𞤢 𞤀𞤬𞤳𞤮𞤲 𞥑𞥕 𞤬𞤭𞤶𞤢𞤲𞤮𞥅𞤯𞤮 𞤘𞤭𞤲𞤫 𞤉𞤳𞤱𞤢𞤼𞤫𞥅𞤪𞤭 𞤫 𞤧𞤭𞥅𞤤𞤮⹁ 𞤸𞤭𞤼𞤢𞥄𞤲𞤣𞤫 𞥒𞥐𞥑𞥕.

𞤐𞤮 𞤶𞤢𞤪𞤭 𞤢𞤲𞤣𞤭𞤲𞤼𞤭𞤲𞤣𞤫 𞤱𞤮𞤲𞤣𞤫𞤥𞤢 𞤜𞤫𞤲𞤧𞤢𞤲 𞤀𞤦𞤵𞥅𞤦𞤢𞤳𞤢𞤪⹁ 𞤲𞤺𞤢𞤴𞤵𞥅𞤪𞤭 𞤥𞤢𞤱𞤲𞤣𞤭 𞤑𞤢𞤥𞤢𞤪𞤵𞤲 𞤲𞤣𞤭𞤲 𞤬𞤭𞤶𞤢𞥄𞤲𞤮. 𞤑𞤮 𞤱𞤢𞤲𞤮𞤲𞤮𞤲 𞤳𞤢𞤣𞤭⹁ 𞤐𞤢𞤦𞤭𞥅 𞤑𞤫𞤴𞤼𞤢 𞤸𞤮𞥅𞤪𞤲𞤢𞤤𞥆𞤮 𞤱𞤮𞥅𞤱𞤵𞤯𞤮 𞤘𞤭𞤲𞤫 𞤮𞤲 𞤳𞤢𞤻𞤵𞤲 𞤫 𞤅𞤫𞤸𞤵 𞤘𞤭𞤪𞤢𞥄𞤧𞤭⹁ 𞤯𞤵𞥅𞤯𞤢 𞤳𞤵𞥅𞤤𞤫𞥅𞤶𞤮 𞤺𞤭𞤲𞤫 𞤮𞤲 𞤬𞤭𞤶𞤢𞥄𞤲𞤮.

𞤒𞤮𞤼𞥆𞤭𞤲𞤢𞤲𞤣𞤫 𞤀𞤴𞥃𞤢 𞤅𞤮𞥅