𞤙𞤀𞤂𞤀𞥄𞤐𞤁𞤉 𞤍𞤉𞤐𞤘𞤀𞤂 𞤃𞤓𞤒𞤐𞤀𞥄𞤐𞤘𞤀𞤂

𞤑𞤮 𞤸𞤢𞤲𞤣𞤫⹁ 𞤻𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮 𞤱𞤮𞤲𞤭 𞤳𞤮 𞤐𞤶𞤵𞤩𞥆𞤵𞤣𞤫 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 (ONU/UN) 𞤼𞤮𞤯𞥆𞤭𞥅 𞤳𞤮 𞤤𞤢𞥄𞤼𞤮𞥅 𞤻𞤢𞤤𞤢𞥄𞤲𞤣𞤫 𞤯𞤫𞤲𞤺𞤢𞤤 𞤥𞤵𞤴𞤲𞤢𞥄𞤲𞤺𞤢𞤤.

𞤑𞤮 𞤫 𞤔𞤮𞤤𞤮 𞥑𞥙𞥙𞥙⹁ 𞤲𞤣𞤭𞥅 𞤶𞤵𞤩𞥆𞤵𞤣𞤭 𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞥅𞤪𞤭 𞤩𞤢𞤲𞤺𞤭𞤲𞤭 𞤲𞤣𞤫𞥅 𞤬𞤫𞤱𞤶𞤮𞥅𞤪𞤫. 𞤊𞤢𞥄𞤲𞤣𞤢𞥄𞤪𞤫 𞤲𞤣𞤫𞤲 𞤲𞤣𞤫𞥅 𞤫𞤩𞥆𞤮𞥅𞤪𞤫⹁ 𞤳𞤮 𞤧𞤫𞤥𞤦𞤭𞤲𞤺𞤮𞤤 𞤨𞤮𞤼𞥆𞤢𞤤 𞤸𞤢𞤳𞥆𞤵𞤲𞥋𞤣𞤫 𞤴𞤭𞤥𞤩𞤫 𞤩𞤫𞤲⹁ 𞤫 𞤢𞤲𞤣𞤵𞤼𞤵𞤺𞤮𞤤 𞤱𞤮𞤲𞤣𞤫𞤥𞤢 𞤴𞤭𞤥𞤩𞤫 𞤩𞤫𞤲 𞤲𞤮 𞤧𞤫𞤪𞤼𞤭 𞤯𞤫𞤲𞤯𞤫 𞤫 𞤨𞤭𞤲𞤫⹁ 𞤳𞤢𞤻𞤵𞤲 𞤳𞤢𞤣𞤭 𞤫 𞤩𞤫𞤴𞤣𞤵𞤺𞤮𞤤 𞤲𞤢𞤲𞤮𞤲𞥋𞤣𞤭𞤪𞤢𞤤 𞤸𞤢𞤳𞥆𞤵𞤲𞥋𞤣𞤫 𞤴𞤭𞤥𞤩𞤫 𞤩𞤫𞤲. 𞤇𞤫 𞤹𞤭𞤪𞥆𞤭𞤼𞤭𞥅 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤯𞤫𞤲𞤺𞤢𞤤 𞤳𞤮 𞤼𞤵𞤺𞤢𞤤𞤢𞤤 𞤥𞤢𞤱𞤲𞤺𞤢𞤤 𞤫 𞤼𞤵𞤺𞤢𞥄𞤤𞤫 𞤩𞤢𞤲𞤼𞤢𞤤 𞤯𞤫𞤲.

𞤉𞤲𞤫𞤲 𞤳𞤢𞤣𞤭⹁ 𞤫𞤯𞤫𞤲 𞤸𞤢𞥄𞤲𞤭 𞤼𞤵𞥅𞤺𞤮𞤪𞤣𞤫 𞤲𞤣𞤫𞥅 𞤻𞤢𞤤𞤢𞥄𞤲𞤣𞤫 𞤢𞤲𞤣𞤭𞤲𞤼𞤭𞤲𞤫𞤲 𞤸𞤮𞥅𞤪𞤫 𞤥𞤫𞤲 𞤫 𞤴𞤭𞤥𞤩𞤫 𞤥𞤫𞤲 𞤩𞤫𞤲⹁ 𞤱𞤮𞤲𞤣𞤫𞤥𞤢 𞤳𞤮 𞤯𞤫𞤲𞤺𞤢𞤤 𞤱𞤮𞤲𞤭 𞤱𞤮𞤲𞤳𞤭𞥅 𞤤𞤫𞤻𞤮𞤤⹁ 𞤳𞤮 𞤳𞤢𞤲𞤺𞤢𞤤 𞤳𞤢𞤣𞤭 𞤱𞤮𞤲𞤭 𞤥𞤢𞤪𞤭𞤪𞤣𞤫 𞤲𞤺𞤢𞤤𞤵 𞤪𞤫𞤲𞤣𞤮 𞤫 𞤤𞤢𞥄𞤲𞤢 𞤨𞤭𞤲𞤫 𞤥𞤵𞤲. 𞤅𞤢𞤦𞤵 𞤳𞤮 𞤯𞤫𞤲𞤺𞤢𞤤⹁ 𞤩𞤭𞤯𞤩𞤫 𞤩𞤫𞤲 𞤶𞤢𞤲𞤺𞤮 𞤪𞤮𞤲𞤭𞤪𞤼𞤢 𞤨𞤭𞤲𞤫 𞤥𞤫𞤲 𞤯𞤫𞤲 𞤸𞤢𞤲𞤣𞤫.

𞤅𞤮 𞤯𞤫𞤲𞤺𞤢𞤤 𞤲𞤺𞤢𞤤 𞤥𞤢𞤶𞥆𞤭𞤪𞤭𞥅 𞤫𞤲⹁ 𞤸𞤢𞤪𞤢𞤴 𞤢𞤤𞤢𞥄 𞤲𞤮 𞤨𞤭𞤲𞤫 𞤥𞤫𞤲 𞤪𞤮𞤲𞤭𞤪𞤫𞥅. 𞤅𞤭 𞤨𞤭𞤲𞤫 𞤥𞤫𞤲 𞤯𞤫𞤲 𞤪𞤮𞤲𞤢𞥄𞤳𞤢⹁ 𞤯𞤫 𞤥𞤵𞤤𞤢𞤴. 𞤅𞤭 𞤯𞤫 𞤥𞤵𞤤𞤭𞥅⹁ 𞤸𞤢𞤪𞤢𞤴 𞤤𞤫 𞤬𞤭𞥅 𞤥𞤫𞤫𞤲 𞤥𞤵𞤤𞤭𞥅.

𞤑𞤢𞤤𞤢 𞤴𞤭𞤥𞤩𞤫 𞤸𞤢𞤱𞤳𞤵𞤩𞤫 𞤯𞤫𞤲𞤺𞤢𞤤 𞤥𞤵𞤵𞤲⹁ 𞤸𞤢𞤱𞤳𞤭𞥅 𞤨𞤭𞤲𞤫 𞤥𞤵𞤲. 𞤇𞤫 𞤱𞤢𞤴𞤤𞤮𞤼𞤮 𞤩𞤫 𞤱𞤮𞤲𞤼𞤢 𞤴𞤭𞤥𞤩𞤫 𞤩𞤫 𞤩𞤫 𞤪𞤫𞤧𞤭 𞤯𞤫𞤲𞤺𞤢𞤤 𞤥𞤵𞤲. 𞤊𞤵𞤤𞤩𞤫 𞤯𞤵𞥅𞤯𞤵𞤩𞤫 𞤲𞤮 𞤼𞤢𞤱𞤼𞤭 𞤤𞤫𞤰𞥆𞤭 𞤺𞤮𞥅 𞤸𞤢𞤲𞤣𞤫⹁ 𞤥𞤢𞤤𞥆𞤢 𞤱𞤢𞤴𞤤𞤭𞥅 𞤱𞤮𞤲𞤼𞤭 𞤤𞤫𞤰𞥆𞤭 𞤬𞤫𞥅𞤪𞤫𞥅𞤶𞤭 𞤧𞤢𞤦𞤵 𞤆𞤵𞤤𞤢𞤪 𞤲𞤺𞤢𞤤 𞤥𞤢𞤶𞥆𞤭𞤪𞤭𞥅 𞤩𞤫.

𞤃𞤮𞤲𞤮 𞤸𞤵𞤼𞤭𞥅 𞤣𞤮𞥅𞤤𞤫 𞤫 𞤷𞤫𞤥𞤦𞤫 𞤯𞤫𞤲𞤺𞤢𞤤⹁ 𞤴𞤮 𞤼𞤫𞤬𞤵 𞤢𞤲𞤣𞤢 𞤸𞤮𞤤 𞤳𞤮 𞤱𞤢𞤯𞤭 𞤊𞤢𞤪𞤢𞤲𞤧𞤭 𞤫 𞤉𞤲𞤺𞤫𞤤𞤫 𞤫 𞤕𞤢𞤴𞤲𞤢 𞤲𞤮 𞤵𞤳𞥆𞤢 𞤣𞤵𞤶𞤵𞤲𞤫 𞤣𞤢𞤤𞤢 𞤯𞤵𞥅𞤯𞤵𞤯𞤫 𞤫 𞤧𞤫𞤥𞤦𞤭𞤲𞤺𞤮𞤤 𞤯𞤫𞤲𞤯𞤫 𞤥𞤢𞤩𞥆𞤫 𞤯𞤫𞤲.

𞤖𞤮𞤤 𞤳𞤮 𞤱𞤮𞤲𞤭 𞤳𞤢𞤣𞤭 𞤬𞤢𞥄𞤲𞥋𞤣𞤢𞥄𞤪𞤫 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤱𞤭𞤫𞤼𞤫𞥅𞤲𞤣𞤫 𞤊𞤢𞤪𞤢𞤲𞤳𞤮𞤬𞤮𞤲𞤭𞥅؟

𞤃𞤮𞤲𞤮 𞤴𞤢𞤱𞤭𞤼𞤭𞥅 𞤣𞤮𞥅𞤤𞤫 𞤯𞤫𞤲𞤺𞤢𞤤⹁ 𞤴𞤮 𞤮 𞤼𞤢𞤧𞤳𞤮 𞤸𞤢𞤳𞥆𞤵𞤲𞥋𞤣𞤫 𞤊𞤢𞤪𞤢𞤲𞤧𞤭 𞤫 𞤔𞤫𞤪𞤥𞤢𞤲𞤭𞥅 (𞤀𞤤𞤥𞤢𞥄𞤻𞤭)؟ 𞤔𞤫𞤪𞤥𞤢𞤲𞤭𞥅 𞤲𞤮 𞤩𞤵𞤪𞤭𞥅 𞤊𞤢𞤪𞤢𞤲𞤧𞤭 𞤴𞤭𞤥𞤩𞤫⹁ 𞤲𞤮 𞤩𞤵𞤪𞤭 𞤲𞤣𞤭 𞤳𞤢𞤣𞤭 𞤶𞤮𞤺𞤢𞥄𞤣𞤫 𞤶𞤢𞤱𞤣𞤭⹁ 𞤫 𞤩𞤢𞤲𞤼𞤢𞥄𞤣𞤫⹁ 𞤳𞤮𞤲𞤮 𞤊𞤢𞤪𞤢𞤲𞤧𞤭 𞤲𞤮 𞤸𞤭𞤼𞥆𞤭 𞤫 𞤶𞤮𞤲𞤯𞤫 𞤢𞤣𞤵𞤲𞤢𞤴𞤢𞤲𞤳𞤮𞥅𞤶𞤫 𞤯𞤫𞤲 𞤩𞤵𞤪𞤭 𞤔𞤫𞤪𞤥𞤢𞤲𞤭𞥅. 𞤖𞤮𞤤 𞤳𞤮 𞤱𞤢𞤯𞤭 𞤯𞤵𞤥؟ 𞤑𞤮 𞤊𞤢𞤪𞤢𞤲𞤧𞤫𞥅𞤪𞤫 𞤲𞤣𞤫𞤲. 𞤑𞤮 𞤤𞤫𞤴𞤯𞤫 𞤯𞤫 𞤊𞤢𞤪𞤢𞤲𞤧𞤫𞥅𞤩𞤫 𞤩𞤫𞤲 𞤶𞤮𞤺𞤭𞤲𞤮𞥅 𞤫 𞤲𞤣𞤫𞤪 𞤀𞤬𞤪𞤭𞤳𞤢𞥄⹁ 𞤪𞤮𞤳𞥆𞤭𞤩𞤫 𞤣𞤮𞥅𞤤𞤫. 𞤅𞤢𞤦𞤵𞤲𞤢 𞤯𞤫𞤲 𞤤𞤫𞤴𞤯𞤫 𞤬𞤮𞤨 𞤲𞤮 𞤸𞤢𞤩𞥆𞤭𞥅 𞤫 𞤊𞤢𞤪𞤢𞤲𞤧𞤫𞥅𞤪𞤫 𞤲𞤣𞤫𞤲. 𞤉 𞤸𞤭𞤲𞤤𞤫 𞤯𞤵𞤥 𞤢𞤣𞥆𞤢𞤲𞤢𞥄𞤤𞤭 𞤩𞤫 𞤩𞤢𞤲𞤼𞤢𞤤. 𞤑𞤮𞤲𞤮 𞤳𞤢𞤤𞤢 𞤳𞤢 𞤪𞤫𞤲𞤣𞤢𞥄⹁ 𞤯𞤫𞥅 𞤤𞤫𞤴𞤯𞤫 𞤀𞤬𞤪𞤭𞤳𞤢𞥄 𞤸𞤢𞤤𞤮𞤪𞤯𞤫 𞤊𞤢𞤪𞤢𞤲𞤧𞤫𞥅𞤪𞤫 𞤲𞤣𞤫𞤲⹁ 𞤳𞤮 𞤊𞤢𞤪𞤢𞤲𞤧𞤭 𞤶𞤭𞤱𞤺𞤢𞤲𞤼𞤢⹁ 𞤳𞤮 𞤨𞤫𞤸𞤫 𞤊𞤢𞤪𞤢𞤲𞤧𞤭 𞤯𞤫𞤲⹁ 𞤯𞤫 𞤦𞤢𞤥𞤦𞤢𞤲𞤼𞤢. 𞤑𞤮 𞤯𞤫𞤲𞤺𞤢𞤤 𞤊𞤢𞤪𞤢𞤲𞤧𞤭 𞤲𞤺𞤢𞤤⹁ 𞤯𞤫 𞤸𞤢𞥄𞤤𞤢𞤼𞤢.

𞤉 𞤤𞤫𞤴𞤯𞤫 𞤯𞤫 𞤉𞤪𞤮𞤨 𞤶𞤮𞤺𞤭𞤲𞤮𞥅 𞤯𞤫𞤲 𞤬𞤮𞤨 𞤺𞤭𞤤𞤢 𞤀𞤬𞤪𞤭𞤳𞤢𞥄 𞤸𞤢𞥄 𞤀𞥄𞤧𞤭𞤴𞤢⹁ 𞤳𞤮 𞤯𞤫𞥅 𞤱𞤮𞤲𞤯𞤫 𞤫 𞤲𞤣𞤫𞤪 𞤀𞤬𞤪𞤭𞤳𞤢𞥄 𞤼𞤢𞤲 𞤶𞤮𞤳𞥆𞤭 𞤯𞤫𞤲𞤯𞤫 𞤉𞤪𞤮𞤨𞤲𞤢𞥄𞤩𞤫 𞤩𞤫𞤲. 𞤂𞤫𞤴𞤯𞤫 𞤯𞤫𞤲 𞤫 𞤯𞤵𞥅𞤯𞤵𞤣𞤫 𞤀𞥄𞤧𞤭𞤴𞤢⹁ 𞤤𞤫𞤴𞤣𞤭 𞤳𞤢𞤤𞤢 𞤲𞤮 𞤶𞤢𞤲𞤺𞤵𞤣𞤫 𞤫 𞤯𞤫𞤲𞤺𞤢𞤤 𞤥𞤵𞤵𞤲. 𞤑𞤮 𞤯𞤵𞥅𞤯𞤭 𞤫 𞤯𞤫𞤲 𞤤𞤫 𞤳𞤢𞤣𞤭⹁ 𞤳𞤮 𞤫 𞤦𞤭𞤲𞤣𞤭 𞤥𞤵𞤲 𞤱𞤮𞤲𞤭 𞤫 𞤶𞤢𞤲𞤺𞤵𞤣𞤫. 𞤏𞤵𞤪𞤭𞤲 𞤳𞤮 𞤱𞤮𞤲𞤯𞤫 𞤯𞤫𞤲 𞤸𞤵𞥅𞤱𞤼𞤮𞤪𞤣𞤫 𞤦𞤭𞤲𞤣𞤭 𞤥𞤵𞤲 𞤩𞤵𞤪𞤭 𞤩𞤢𞤲𞤼𞤢𞥄𞤲𞤣𞤫 𞤼𞤮𞤲⹁ 𞤱𞤢𞤲𞤮 𞤕𞤢𞤴𞤲𞤢⹁ 𞤑𞤮𞥅𞤪𞤫𞤴𞤢⹁ 𞤔𞤢𞤨𞤢𞤲⹁ 𞤫𞤳𞤲𞤯…

𞤖𞤢𞤲𞤣𞤫 𞤅𞤢𞤥𞤧𞤵𞤲 (Samsung) 𞤼𞤵𞤲 𞤲𞤮 𞤢𞤤𞤯𞤭 𞤩𞤵𞤪𞤭 𞤤𞤫𞤴𞤯𞤫 𞤳𞤢 𞤊𞤢𞤪𞤢𞤲 𞤅𞤫𞥅𞤬𞤢𞥄 𞤱𞤮𞤲𞤢𞥄 𞤸𞤵𞥅𞤱𞤼𞤮𞤪𞤫𞥅𞤣𞤫 𞤯𞤮𞤲 𞤬𞤮𞤬 𞤫 𞤲𞤣𞤫𞤪 𞤢𞤬𞤪𞤭𞤳𞤢𞥄. 𞤊𞤫𞤱𞤲𞤣𞤮 𞤑𞤮𞤼𞤣𞤭𞤾𞤢𞥄𞤪 𞤤𞤫 𞤸𞤫𞤩𞤼𞤢𞤼𞤢 𞤸𞤮𞥅𞤪𞤫 𞤥𞤵𞤲 𞤶𞤵𞥅𞤯𞤫 𞤊𞤢𞤪𞤢𞤲𞤧𞤭 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐⹁ 𞤸𞤢𞤪𞤭 𞤲𞤣𞤭 𞤩𞤵𞤪𞤭𞥅 𞤑𞤮𞤪𞤫𞤴𞤢 𞤩𞤢𞤲𞤼𞤢𞥄𞤣𞤫. 𞤑𞤮𞤲𞤮 𞤸𞤢𞤲𞤣𞤫 𞤉𞤂𞤅𞤉𞥅 (LG) 𞤼𞤵𞤲 𞤲𞤮 𞤩𞤵𞤪𞤭 𞤑𞤮𞤼𞤣𞤭𞤱𞤢𞥄𞤪 𞤢𞤤𞤯𞤵𞤣𞤫. 𞤉𞤸𞤮𞥅𞤪𞤫 𞤯𞤵𞤥⹁ 𞤧𞤭 𞤀𞤬𞤪𞤭𞤳𞤢𞤲𞤢𞥄𞤶𞤮 𞤲𞤮 𞤴𞤮𞤲𞤣𞤭𞤲𞤮𞤪𞤢 𞤳𞤮 𞤴𞤮𞤲𞤢𞥄 𞤵𞤶𞤵𞤲𞤫 𞤯𞤭𞤯𞤭 𞤣𞤢𞤤𞤢 ($ 𞥒𞥐𞥐𞥐) 𞤫 𞤲𞤣𞤫𞤪 𞤸𞤭𞤼𞤢𞥄𞤲𞤣𞤫 𞤲𞤣𞤫𞤲⹁ 𞤑𞤮𞥅𞤪𞤫𞤴𞤢𞥄𞤶𞤮 𞤙𞤢𞥄𞤥𞤲𞤢𞥄𞤲𞤺𞤫 𞤮𞤲 𞤲𞤮 𞤸𞤫𞤩𞤵𞤣𞤫 𞤳𞤮 𞤩𞤵𞤪𞤭 𞤵𞤶𞤵𞤲𞤫 𞤷𞤢𞤨𞥆𞤢𞤯𞤫 𞤼𞤢𞤼𞤭 𞤫 𞤯𞤭𞤯𞤭 𞤣𞤢𞤤𞤢 ($ 𞥓𞥒𞥐𞥐𞥐)⹁ 𞤫 𞤸𞤭𞤲𞤤𞤫 𞤑𞤮𞥅𞤪𞤫𞤴𞤢 𞤳𞤮 𞤫 𞤸𞤢𞥄𞤤𞤢 𞤥𞤵𞤲 𞤳𞤢𞤻𞤵𞤲 𞤫 𞤦𞤭𞤲𞤣𞤮𞤤 𞤥𞤵𞤲 𞤶𞤢𞤲𞤺𞤢𞤼𞤢.

𞤀𞤣𞤮 𞥑𞥙𞥔𞥕⹁ 𞤸𞤢𞤪𞤭 𞤤𞤫𞤴𞤣𞤭 𞤋𞤧𞤪𞤢𞥄𞤴𞤭𞥅𞤤𞤢 𞤲𞤣𞤭𞤲 𞤱𞤮𞥅𞤣𞤢𞥄𞤳𞤢. 𞤍𞤫𞤲𞤺𞤢𞤤 𞤥𞤢𞤩𞥆𞤫 𞤲𞤺𞤢𞤤 𞤫 𞤦𞤭𞤲𞤣𞤭 𞤥𞤢𞤩𞥆𞤫 𞤯𞤭𞤲 𞤬𞤵𞤯𞥆𞤭𞤳𞤫 𞤥𞤢𞥄𞤴𞤵𞤣𞤫. 𞤑𞤮𞤲𞤮 𞤸𞤢𞤲𞤣𞤫⹁ 𞤲𞤣𞤭𞤲 𞤤𞤫𞤴𞤣𞤭 𞤲𞤣𞤭 𞤬𞤮𞤼𞤢𞤼𞤢𞥄 𞤸𞤢𞤴 𞤫 𞤣𞤭𞥅𞤱𞤢𞤤 𞤂𞤢𞤦𞤫 𞤲𞤺𞤢𞤤 𞤴𞤢𞥄𞤶𞤵𞤣𞤫⹁ 𞤲𞤮 𞤶𞤫𞤴𞤢𞥄 𞤫 𞤤𞤫𞤴𞤯𞤫 𞤩𞤵𞤪𞤵𞤯𞤫 𞤢𞤤𞤯𞤵𞤣𞤫 𞤯𞤫𞤲 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭 𞤯𞤮𞥅 𞤸𞤢𞤲𞤣𞤫. 𞤑𞤢𞤥𞤩𞤫 𞤳𞤢𞤣𞤭 𞤤𞤫⹁ 𞤳𞤮 𞤫 𞤸𞤢𞥄𞤤𞤢 𞤥𞤢𞤩𞥆𞤫 𞤳𞤢𞤻𞤵𞤲 𞤫 𞤦𞤭𞤲𞤣𞤭 𞤥𞤢𞤩𞥆𞤫⹁ 𞤩𞤫 𞤱𞤮𞤲𞤭 𞤫 𞤶𞤢𞤲𞤺𞤵𞤣𞤫. 𞤑𞤮 𞤸𞤢𞤯𞤭 𞤫𞤲 𞤫𞤲𞤫𞤲 𞤳𞤢𞤣𞤭؟

𞤖𞤢𞤴 𞤉𞤪𞤮𞤨𞤲𞤢𞥄𞤩𞤫⹁ 𞤩𞤫 𞤱𞤮𞤲𞤵𞤯𞤫𞤲 𞤫 𞤻𞤫𞤥𞤦𞤵𞤣𞤫 𞤩𞤫𞤲⹁ 𞤤𞤫𞤴𞤣𞤭 𞤥𞤢𞤩𞥆𞤫 𞤳𞤢𞤤𞤢 𞤳𞤮 𞤫 𞤯𞤫𞤲𞤺𞤢𞤤 𞤥𞤵𞤵𞤲 𞤱𞤮𞤲𞤭 𞤫 𞤶𞤢𞤲𞤺𞤵𞤣𞤫. 𞤏𞤵𞤪𞤭𞤲 𞤫 𞤲𞤣𞤫𞤪 𞤤𞤫𞤴𞤯𞤫 𞤺𞤮𞥅⹁ 𞤳𞤮 𞤫 𞤯𞤫𞤲𞤯𞤫 𞤧𞤫𞤪𞤼𞤵𞤯𞤫 𞤩𞤫 𞤱𞤮𞤲𞤭 𞤫 𞤶𞤢𞤲𞤺𞤵𞤣𞤫 𞤧𞤢𞤦𞤵𞤲𞤢 𞤤𞤫𞤻𞤮𞤤 𞤳𞤢𞤤𞤢 𞤲𞤮 𞤸𞤢𞤩𞥆𞤭𞤼𞤭𞥅 𞤫 𞤯𞤫𞤲𞤺𞤢𞤤 𞤥𞤵𞤵𞤲⹁ 𞤱𞤢𞤲𞤮 𞤄𞤫𞤤𞤶𞤭𞤳 𞤫 𞤅𞤵𞤱𞤭𞤧. 𞤂𞤵𞤳𞤧𞤢𞤥𞤦𞤵𞥅𞤪 𞤫 𞤬𞤢𞤥𞤯𞤵𞤣𞤫⹁ 𞤳𞤮 𞤫 𞤯𞤫𞤲𞤯𞤫 𞤼𞤢𞤼𞤭 𞤩𞤫 𞤱𞤮𞤲𞤭 𞤫 𞤶𞤢𞤲𞤺𞤵𞤣𞤫.

𞤑𞤮 𞤸𞤢𞤯𞤭 𞤫𞤲 𞤫𞤲𞤫𞤲 𞤇𞤢𞤤𞤫؟

𞤑𞤢 𞤴𞤭𞥅𞤤𞤭𞤪𞤣𞤫 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 (ONU/UN)⹁ 𞤯𞤫𞤲𞤺𞤢𞤤 𞤀𞤊𞤪𞤭𞤳𞤢𞥄 𞤸𞤢𞤴 𞤺𞤮𞥅𞤼𞤢𞤤 𞤢𞤤𞤢𞥄 𞤳𞤢 𞤸𞤵𞥅𞤱𞤼𞤮𞤪𞤫𞥅𞤣𞤫. 𞤑𞤮𞤲𞤮 𞤬𞤫𞤤𞤮𞥅𞤪𞤫 𞤬𞤢𞤱𞤢𞥄𞤳𞤭 𞤩𞤫 𞤧𞤢𞤦𞤵𞤲𞤢 𞤸𞤢𞤴 𞤼𞤵𞤥𞤦𞤮𞤲𞥋𞤣𞤭𞤪𞤫 𞤯𞤫𞤲 𞤀𞤬𞤪𞤭𞤳𞤢𞥄 𞤯𞤮𞥅 𞤳𞤢𞤻𞤵𞤲 𞤫 𞤲𞤶𞤵𞤩𞥆𞤵𞤤𞤭 𞤀𞤬𞤪𞤭𞤳𞤢𞥄 𞤯𞤭𞤲⹁ 𞤸𞤢𞤴 𞤲𞤮𞤳𞥆𞤵 𞤢𞤤𞤢𞥄 𞤳𞤢 𞤯𞤫𞤲𞤯𞤫 𞤀𞤬𞤪𞤭𞤳𞤢𞥄 𞤱𞤮𞤲𞤢𞥄 𞤫 𞤸𞤵𞥅𞤱𞤼𞤮𞤪𞤫𞥅𞤣𞤫.

𞤉𞤲 𞤼𞤫𞤣𞥆𞤢𞤼𞤢𞥄 𞤤𞤫 𞤦𞤭𞤲𞥆𞤢𞤥𞤢𞥄 𞤫𞤲 𞤼𞤫𞤣𞥆𞤭𞤲𞤢𞥄𞤤𞤭 𞤸𞤮𞥅𞤪𞤫 𞤥𞤫𞤲. 𞤉𞤲 𞤼𞤫𞤣𞥆𞤭𞤪𞤭𞥅𞤤𞤫 𞤱𞤮𞥅⹁ 𞤼𞤫𞤣𞥆𞤭𞤲𞤭𞤪𞤺𞤮𞤤 𞤨𞤭𞤲𞤫 𞤥𞤫𞤲 𞤯𞤫𞤲𞤯𞤫𞤲 𞤥𞤫𞤲.

𞤀 𞤶 𞤄𞤢𞤪𞤭