𞤏𞤀𞤚𞤀𞤈𞤀 𞤚𞤌𞤍𞥆𞤋𞤑𞤉 𞤑𞤉𞤐𞤉 𞤀𞤈𞤁𞤌 𞤑𞤉𞤅𞤌

𞤸𞤢𞤲𞤳𞤭 𞤫 𞤢𞥄𞤩𞤵𞤲𞤣𞤫 𞤻𞤢𞤤𞤲𞤣𞤫 𞥘 𞤅𞤭𞥅𞤤𞤮 𞥒𞥐𞥒𞥑⹁  𞤀𞤤𞤢𞤧𞤢𞤲 𞤏𞤢𞤼𞤢𞤪𞤢⹁ 𞤸𞤮𞥅𞤪𞤫𞥅𞤶𞤮 𞤑𞤮𞤼𞤣𞤭𞤾𞤢𞥄𞤪 𞤮𞤲⹁ 𞤼𞤮𞤯𞥆𞤭𞤳𞤫 𞤆𞤢𞤼𞤪𞤭𞤳 𞤀𞥃𞤭⹁ 𞤳𞤮 𞤢𞤪𞤣𞤮𞥅 𞤳𞤫𞤲𞤫 𞤶𞤢𞥄𞤺𞤮𞤪𞤢𞤤 𞤤𞤫𞤴𞤣𞤭 𞤲𞤣𞤭𞤲 𞤸𞤢𞥄 𞤀𞤸𞤥𞤫𞤣 𞤄𞤢𞤳𞤢𞤴𞤮𞤳𞤮 𞤪𞤵𞤼𞤮𞥅.

𞤉 𞤸𞤮𞤪𞤫𞥅 𞤯𞤵𞤥⹁ 𞤮 𞤼𞤮𞤯𞥆𞤭𞤳𞤫 𞤳𞤢𞤣𞤭 𞤚𞤫𞤲𞤫 𞤄𞤵𞤪𞤢𞥄𞤸𞤭𞥅𞤥𞤢 𞤏𞤢𞤼𞤢𞤪𞤢⹁ 𞤥𞤭𞤻𞥆𞤭𞤪𞤢𞥄𞤱𞤮 𞤥𞤢𞤳𞥆𞤮 𞤮𞤲⹁ 𞤳𞤮 𞤤𞤢𞥄𞤼𞤮𞥅 𞤳𞤫𞤲𞤫 𞤶𞤢𞥄𞤺𞤮𞤪𞤢𞥄𞤯𞤮 𞤮𞤲 𞤬𞤭𞥅 𞤳𞤢 𞤸𞤭𞤱𞤮. 𞤑𞤮 𞤀𞤸𞤥𞤫𞤣 𞤄𞤢𞤳𞤢𞤴𞤮𞤳𞤮 𞤸𞤢𞤤𞤬𞤭𞤲𞤢𞤲𞤮𞥅 𞤲𞤣𞤵𞥅 𞤧𞤢𞤤𞤲𞤣𞤵 𞤯𞤮𞥅 𞤳𞤢𞤣𞤭.

𞤘𞤭𞤤𞤢 𞥑𞥘 𞤤𞤫𞤱𞤪𞤵 𞤕𞤮𞤤𞤼𞤮⹁ 𞤀𞤸𞤥𞤫𞤣 𞤄𞤢𞤳𞤢𞤴𞤮𞤳𞤮 𞤴𞤢𞤸𞤵𞤲𞤮 𞤊𞤢𞤪𞤢𞤲𞤧𞤭 𞤯𞤢𞤩𞥆𞤫𞤪𞤫 𞤤𞤫𞤳𞥆𞤭. 𞤑𞤮𞤲𞤮 𞤫 𞤬𞤭𞤤𞥆𞤢𞤴𞤫𞥅 𞤳𞤭𞤦𞤭𞤪𞤺𞤢𞤤 𞤁𞤮𞤷𞥆𞤵𞤜𞤫𞤤𞤫𞥅 𞤲𞤺𞤢𞤤⹁  𞤺𞤭𞤤𞤢 𞤫 𞤸𞤮𞤪𞤦𞤭𞤪𞥆𞤫 (𞤢𞤧𞤫𞤱𞤫)⹁ 𞤻𞤢𞤤𞤲𞤣𞤫 𞥖 𞤐𞤦𞤮𞥅𞤴𞤮⹁ 𞤄𞤢𞤳𞤢𞤴𞤮𞤳𞤮 𞤲𞤢𞤩𞤭𞤪𞤢𞥄𞤥𞤢 𞤔𞤫𞤪𞤥𞤢𞤲𞤭𞥅 𞤬𞤭𞥅 𞤻𞤢𞤱𞤲𞤣𞤵𞤺𞤮𞤤 𞤳𞤢𞤲𞤧𞤫𞤪 𞤳𞤮 𞤮 𞤱𞤮𞤲𞤣𞤭 𞤫 𞤥𞤵𞤲. 𞤑𞤭𞤦𞤭𞤪𞤺𞤢𞤤 𞤲𞤺𞤢𞤤 𞤸𞤮𞤤𞥆𞤭𞥅 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤄𞤢𞤳𞤢𞤴𞤮𞤳𞤮 𞤲𞤮 𞤲𞤢𞤱𞤲𞤭 𞤳𞤮 𞤼𞤭𞥅𞤯𞤭 𞤬𞤮𞤼𞤢.

𞤈𞤮𞤱𞤢𞤲𞤭 𞤳𞤢𞤣𞤭 𞤫 𞤅𞤫𞥅𞤯𞤼𞤮 𞥒𞥐𞥒𞥑⹁ 𞤮 𞤸𞤮𞤤𞥆𞤵𞤲𞤮 𞤱𞤮𞤲𞤣𞤫𞤥𞤢 𞤻𞤢𞤱𞤵 𞤑𞤮𞤾𞤭𞤣-𞥑𞥙 𞤪𞤢𞥄𞤩𞤭𞥅 𞤥𞤮⹁ 𞤳𞤮𞤲𞤮 𞤫 𞤲𞤣𞤫𞤪 𞤦𞤢𞥄𞤤𞤯𞤫 𞤧𞤢𞤨𞥆𞤮 𞤸𞤢𞤪𞤭 𞤮 𞤲𞤣𞤭𞤳𞥆𞤭𞥅.

 𞤑𞤮 𞤫 𞤃𞤮𞤪𞤧𞤮 𞥒𞥐𞥒𞥐⹁ 𞤮 𞤤𞤮𞤲𞤼𞤭𞤲𞤢𞥄 𞤳𞤢 𞤢𞤪𞤣𞤢𞥄𞤳𞤵 𞤶𞤢𞥄𞤺𞤮𞤪𞤢𞤤 𞤑𞤮𞤼𞤣𞤭𞤾𞤢𞤪 𞤲𞤺𞤢𞤤 𞤩𞤢𞥄𞤱𞤮 𞤀𞤸𞤥𞤢𞤣𞤵 𞤘𞤮𞤲 𞤑𞤵𞤤𞤭𞤦𞤢𞤤𞤭 𞤥𞤢𞥄𞤴𞤵𞤣𞤫. 𞤙𞤢𞤱𞤵 𞤩𞤫𞤪𞤲𞤣𞤫 𞤥𞤢𞤳𞥆𞤮 𞤲𞤺𞤵𞤲 𞤭𞥅𞤪𞤭𞤼𞤭𞤲𞤮⹁ 𞤮 𞤴𞤢𞤸𞤭 𞤊𞤢𞤪𞤢𞤲𞤧𞤭 𞤻𞤢𞤱𞤲𞤣𞤢𞤺𞤮𞤤. 𞤌 𞤱𞤮𞤲𞤭 𞤼𞤮𞤲 𞤤𞤫𞤦𞥆𞤭 𞤯𞤭𞤯𞤭. 𞤑𞤮𞤲𞤮 𞤮 𞤪𞤵𞤼𞥆𞤭𞥅 𞤼𞤵𞤲 𞤑𞤮𞤼𞤣𞤭𞤾𞤢𞤪⹁ 𞤮 𞤥𞤢𞥄𞤴𞤭. 𞤖𞤢𞤪𞤭 𞤤𞤫 𞤳𞤮 𞤳𞤢𞤲𞤳𞤮 𞤏𞤢𞤼𞤢𞤪𞤢 𞤧𞤵𞤩𞤭𞤲𞤮𞥅 𞤳𞤮 𞤣𞤢𞤪𞤮𞥅 𞤫 𞤭𞤲𞤣𞤫 𞤬𞤫𞤣𞥆𞤫 𞤥𞤢𞤩𞥆𞤫 𞤲𞤣𞤫𞤲 𞤳𞤢 𞤧𞤵𞤩𞤮 𞥒𞥐𞥒𞥐. 𞤑𞤮𞤲𞤮 𞤩𞤢𞤴𞤼𞤭 𞤮 𞤥𞤢𞥄𞤴𞤭𞥅⹁ 𞤏𞤢𞤼𞤢𞤪𞤢 𞤬𞤭𞤪𞤼𞤭 𞤬𞤮𞤣𞤮𞥅𞤪𞤫 𞤥𞤵𞤲 𞤲𞤣𞤫𞤲⹁ 𞤮 𞤶𞤮𞥅𞤯𞤭𞤼𞤭 𞤳𞤢 𞤤𞤢𞥄𞤥𞤵. 𞤑𞤮 𞤩𞤵𞤪𞤭 𞤴𞤭𞤥𞤩𞤫 𞥘𞥐 (𞤷𞤢𞤨𞥆𞤢𞤲𞤯𞤫 𞤲𞤶𞤫𞥅𞤼𞤢𞤼𞤮) 𞤥𞤢𞥄𞤴𞤵𞤲𞤮 𞤦𞤢𞤯𞤼𞤢𞤲𞤫 𞤲𞤺𞤮𞤲 𞤧𞤵𞤩𞤮.

𞤑𞤮 𞤫 𞤈𞤫𞤬𞤦𞤭𞤪𞥆𞤫 𞤬𞤫𞤰𞥆𞤵𞤲𞥋𞤣𞤫 𞤯𞤮𞥅⹁ 𞤻𞤢𞤤𞤲𞤣𞤫 𞥖 (𞤶𞤫𞥅𞤺𞤮𞤮) 𞤐𞤦𞤮𞥅𞤴𞤮⹁ 𞤑𞤮𞤼𞤣𞤭𞤾𞤢𞤪 𞤱𞤢𞤯𞤭 𞤧𞤵𞤩𞤮 𞤬𞤭𞥅 𞤶𞤮𞤯𞥆𞤭𞤲𞤺𞤮𞤤 𞤧𞤢𞤪𞤴𞤮𞥅𞤩𞤫 𞤩𞤫𞤲. 𞤇𞤵𞤪𞤭 𞤴𞤭𞤥𞤩𞤫 𞥑𞥕𞥐𞥐 𞤣𞤢𞤪𞤭𞤲𞤮 𞤬𞤭𞥅 𞤶𞤮𞤲𞤯𞤫 𞥒𞥕𞥕. 𞤂𞤭𞤣𞥆𞤵 𞤳𞤮 𞤬𞤫𞤰𞥆𞤭 𞤳𞤮𞤲 𞤪𞤮𞤱𞤢𞤲𞤭 𞤳𞤢 𞤧𞤵𞤩𞤮 𞤬𞤭𞥅 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲⁏ 𞤫 𞤲𞤺𞤮𞥅 𞤧𞤵𞤩𞤮 𞤯𞤮𞥅⹁ 𞤨𞤫𞤣𞤤𞤫 𞤤𞤭𞤣𞥆𞤭𞥅𞤯𞤫 𞤯𞤫𞤲 𞤏𞤢𞤼𞤢𞤪𞤢 𞤴𞤢𞤥𞤭𞤪𞤢𞥄𞤤𞤭 𞤴𞤭𞤥𞤩𞤫 𞤩𞤫𞤲 𞤯𞤵𞥅𞤪𞤢𞤺𞤮𞤤 𞤱𞤮𞤼𞤫 𞤯𞤫𞤲. 𞤐𞤮 𞤼𞤭𞤶𞥆𞤢𞥄 𞤳𞤢 𞤬𞤫𞤣𞥆𞤫 𞤏𞤢𞤼𞤢𞤪𞤢 𞤲𞤣𞤫𞤲 𞤸𞤫𞤩𞤭 𞤩𞤵𞤪𞤭 𞤬𞤫𞤷𞥆𞤫𞤪𞤫 𞤶𞤵𞤤𞥆𞤫 𞤯𞤫𞤲 𞤳𞤢 𞤅𞤵𞥅𞤣𞤵 𞤧𞤢𞤪𞤴𞤭𞤲𞤭𞤪𞤣𞤵.