𞤔𞤋𞤄𞤋𞤈𞤋𞥅𞤂 𞤚𞤀𞤃𞤅𞤋𞥅𞤈 𞤙𞤀𞥄𞤐 𞤊𞤉𞤎𞥆𞤋𞤐𞤋𞥅
𞤔𞤭𞤦𞤭𞤪𞤭𞥅𞤤 𞤚𞤢𞤥𞤧𞤭𞥅𞤪 𞤙𞤢𞥄𞤲 𞤬𞤫𞤰𞥆𞤭𞤲𞤭𞥅 𞤸𞤢𞤲𞤣𞤫 𞤫 𞤀𞥄𞤩𞤵𞤲𞥋𞤣𞤫 𞤻𞤢𞤤𞤲𞤣𞤫 𞥘 𞤐𞤦𞤮𞥅𞤴𞤮. 𞤑𞤮 𞤁𞤢𞤳𞤢𞤪⹁ 𞤤𞤢𞥄𞤥𞤮𞤪𞤣𞤫 𞤅𞤫𞤲𞤫𞤺𞤢𞤤 𞤮 𞤬𞤫𞤰𞥆𞤭𞤲𞤭⹁ 𞤸𞤢𞤪𞤭 𞤮 𞤸𞤫𞤩𞤭𞥅 𞤣𞤵𞥅𞤩𞤭 𞥘𞥙. 𞤖𞤢𞤪𞤭 𞤳𞤮 𞤮 𞤱𞤭𞤲𞤣𞤮𞥅𞤱𞤮 𞤥𞤭𞤤𞥆𞤭 𞤫 𞤨𞤫𞤰𞥆𞤭.
𞤌𞤥𞤮 𞤱𞤢𞤤𞥆𞤭𞤬𞤭 𞤣𞤫𞤬𞤼𞤫 𞤯𞤵𞥅𞤯𞤵𞤯𞤫. 𞤑𞤮 𞤳𞤢𞤲𞤳𞤮 𞤤𞤮𞤤𞥆𞤭𞤲𞤭 𞤨𞤫𞤰𞥆𞤮𞤤 𞤅𞤵𞤲𞤶𞤢𞤼𞤢 𞤑𞤫𞤴𞤼𞤢 𞤲𞤺𞤮𞤤⹁ 𞤧𞤭𞤲𞤷𞤵𞤯𞤮 𞤮𞤲 𞤤𞤢𞥄𞤥𞤤𞤢𞥄𞤥𞥆𞤢𞤼𞤫𞥅𞤪𞤭 𞤃𞤢𞤤𞤭 𞤲𞤣𞤭𞤲.
𞤔𞤭𞤦𞤪𞤭𞥅𞤤 𞤚𞤢𞤥𞤧𞤭𞥅𞤪 𞤙𞤢𞥄𞤲 𞤳𞤮 𞤳𞤮𞤲𞤢𞥄𞤳𞤭𞤪𞤭 𞤶𞤭𞤦𞤭𞤲𞤢𞥄 𞤻𞤢𞤤𞤲𞤣𞤫 𞥙 𞤅𞤭𞥅𞤤𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥓𞥒. 𞤑𞤮 𞤁𞤢𞥄𞤱𞤵𞥅𞤣𞤢 𞤙𞤢𞥄𞤲 𞤫 𞤀𞤴𞤧𞤢𞤼𞤵 𞤅𞤢𞤥 𞤱𞤮𞤲𞤭 𞤥𞤢𞤱𞤩𞤫 𞤥𞤢𞤳𞥆𞤮 𞤩𞤫𞤲. 𞤄𞤫𞤲 𞤥𞤢𞤳𞥆𞤮 𞤳𞤮 𞤁𞤢𞤳𞤢𞥄𞤪 𞤭𞤱𞤭. 𞤑𞤮 𞤦𞤢𞤥𞥆𞤢 𞤥𞤢𞤳𞥆𞤮 (𞤦𞤫𞤲 𞤥𞤢𞤳𞥆𞤮 𞤥𞤢𞤱𞤯𞤮) 𞤮 𞤭𞤲𞥆𞤭𞤼𞤭𞤪𞤢𞥄. 𞤑𞤮 𞤮𞤲 𞤱𞤮𞤲𞤭 𞤧𞤢𞤦𞤵 𞤢𞤪𞤵𞤺𞤮𞤤 𞤦𞤫𞤲 𞤥𞤢𞤳𞥆𞤮 𞤘𞤭𞤲𞤫.
𞤑𞤮 𞤅𞤭𞤺𞤭𞤪𞤭 𞤫 𞤣𞤮𞤱𞤪𞤭 𞤘𞤭𞤲𞤫 𞤲𞤣𞤭𞤲⹁ 𞤳𞤢 𞤶𞤢𞥄𞤶𞤭𞤪𞤢𞥄𞤱𞤮 𞤥𞤢𞥄𞤳𞥆𞤮 𞤮𞤲 𞤱𞤭𞤫𞤼𞤫𞥅𞤯𞤮 𞤊𞤢𞥄𞤼𞤵 𞤙𞤢𞥄𞤲 𞤮 𞤬𞤵𞤯𞥆𞤭 𞤣𞤵𞤯𞤭𞤲𞤢𞥄𞤣𞤫. 𞤈𞤉𞤬𞤼𞤭 𞤩𞤫 𞤫𞤺𞥆𞤭 𞤩𞤫 𞤴𞤢𞤸𞤭 𞤫 𞤷𞤢𞤵𞤲 𞤱𞤭𞤫𞤼𞤫𞥅𞤳𞤵𞤲 𞤄𞤢𞥄𞤪𞤮𞥅⹁ 𞤶𞤫𞤴𞤢𞥄𞤳𞤵𞤲 𞤫 𞤼𞤵𞤬𞤵𞤲𞤣𞤫 𞤑𞤵𞤪𞤵𞤧𞤢 𞤲𞤣𞤫𞤲. 𞤑𞤮 𞤄𞤢𞥄𞤪𞤮𞥅 𞤔𞤭𞤦𞤭𞤪𞤭𞥅𞤤 𞤚𞤢𞤥𞤧𞤭𞥅𞤪 𞤱𞤢𞤯𞤭 𞤸𞤮𞤯𞤮 𞤲𞤮𞥅𞤼𞤮𞤪𞤺𞤮 𞤥𞤢𞤳𞥆𞤮 𞤲𞤺𞤮𞤲. 𞤐𞤺𞤮𞥅 𞤸𞤮𞤯𞤮 𞤲𞤮𞤭𞤲𞥆𞤭𞤼𞤭𞤪𞤭 𞤥𞤮 𞤣𞤵𞤯𞤢𞤤 𞤥𞤵𞤲 𞤸𞤢𞤳𞥆𞤵𞤲𞥋𞤣𞤫𞤱𞤢𞤤 𞤲𞤺𞤢𞤤.
𞤑𞤮 𞤲𞤣𞤫 𞤮 𞤼𞤭𞤥𞥆𞤭𞤲𞥆𞤮𞥅 𞤣𞤵𞥅𞤩𞤭 𞥑𞥔⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥔𞥖⹁ 𞤔𞤭𞤦𞤭𞤪𞤭𞥅𞤤 𞤚𞤢𞤥𞤧𞤭𞥅𞤪 𞤸𞤮𞥅𞤼𞤭 𞤑𞤮𞤲𞤢𞥄𞤳𞤭𞤪𞤭 𞤬𞤭𞥅 𞤺𞤢𞤲𞤴𞤲𞤭𞤼𞤢𞤺𞤮𞤤 𞤶𞤢𞤲𞤺𞤵𞤺𞤮𞤤. 𞤉 𞤸𞤭𞤼𞤢𞥄𞤲𞤣𞤫 𞥑𞥙𞥕𞥔⹁ 𞤲𞤣𞤫 𞤮 𞤩𞤢𞥄𞤪𞤵𞤲𞤮𞥅 𞤫 𞤣𞤵𞤯𞤢𞤤 𞤼𞤮𞥅𞤱𞤵𞤲𞥋𞤺𞤢𞤤 𞤲𞤺𞤢𞤤⹁ 𞤮 𞤴𞤢𞤸𞤭 𞤊𞤢𞤪𞤢𞤲𞤧𞤭⹁ 𞤳𞤢 𞤔𞤢𞥄𞤩𞤭 𞤸𞤢𞥄𞤯𞤼𞤭𞤪𞤲𞤣𞤫 𞤄𞤮𞤪𞤣𞤮𞥅. 𞤑𞤮 𞤬𞤫𞤱𞤲𞤣𞤮 𞤮 𞤶𞤢𞤲𞤺𞤢𞤴𞤲𞤮𞥅 𞤄𞤮𞤪𞤲𞤣𞤮𞥅⹁ 𞤮 𞤪𞤫𞤧𞤭 𞤣𞤫𞤦𞥆𞤮 𞤱𞤭𞤫𞤼𞤫𞥅𞤯𞤮 𞤀𞤴𞤧𞤢𞤼𞤵 𞤔𞤢𞤤𞥆𞤮 𞤻𞤢𞤤𞤲𞤣𞤫 𞥔 𞤴𞤢𞤪𞤳𞤮 𞥑𞥙𞥕𞥘⹁ 𞤦𞤢𞤤𞤯𞤫 𞤯𞤭𞤯𞤭 𞤩𞤢𞥄𞤱𞤮 𞤶𞤫𞤴𞤼𞤢𞥄𞤪𞤫 𞤘𞤭𞤲𞤫 𞤲𞤣𞤫𞤲.
𞤇𞤢𞤴𞤼𞤭 𞤮 𞤺𞤢𞤴𞤲𞤭𞥅 𞤶𞤢𞤲𞤺𞤵𞤣𞤫 𞤄𞤮𞤪𞤣𞤮𞥅⹁ 𞤳𞤢𞤲𞤳𞤮 𞤫 𞤩𞤫𞤴𞤲𞤺𞤵 𞤥𞤢𞤳𞥆𞤮⹁ 𞤩𞤫 𞤪𞤵𞤼𞥆𞤭𞥅 𞤘𞤭𞤲𞤫 𞤫 𞥑𞥙𞥕𞥙⹁ 𞤲𞤣𞤫𞤲𞤼𞤵𞤥𞤢⹁ 𞤔𞤭𞤦𞤭𞤪𞤭𞥅𞤤𞤢 𞤚𞤢𞤥𞤧𞤭𞥅𞤪 𞤬𞤵𞤯𞥆𞤭𞥅 𞤶𞤢𞤲𞤺𞤭𞤲𞤣𞤫 𞤫 𞤣𞤵𞤯𞤫 𞤑𞤮𞤲𞤢𞥄𞤳𞤭𞤪𞤭. 𞤉 𞤸𞤭𞤼𞤢𞥄𞤲𞤣𞤫 𞥑𞥙𞥖𞥑⹁ 𞤦𞤢𞤯𞤼𞤢𞤲𞤫 𞤣𞤭𞤤𞥆𞤢𞤲𞤣𞤫 𞤶𞤢𞤲𞤺𞤭𞤲𞤮𞥅𞤩𞤫 𞤘𞤭𞤲𞤫 𞤩𞤫𞤲⹁ 𞤅𞤫𞥅𞤳𞤵 𞤚𞤵𞥅𞤪𞤫 𞤲𞤢𞤲𞤺𞤭 𞤥𞤮 𞤧𞤮𞤳𞤭 𞤳𞤢 𞤁𞤢𞥄𞤳𞤢 𞤄𞤵𞤱𞤢𞤪𞤮𞥅. 𞤌 𞤢𞤷𞥆𞤭𞤼𞤫𞥅𞤣𞤫 𞤱𞤮𞥅 𞤫 𞥑𞥙𞥖𞥔.
𞤉 𞤸𞤭𞤼𞤢𞥄𞤲𞤣𞤫 𞥑𞥙𞥗𞥒⹁ 𞤅𞤫𞥅𞤳𞤵 𞤚𞤵𞥅𞤪𞤫 𞤲𞤫𞤱𞤲𞤢𞤲𞤭 𞤥𞤮 𞤴𞤢𞤸𞤵𞤺𞤮𞤤 𞤻𞤢𞤱𞤲𞤣𞤮𞥅 𞤈𞤮𞤥𞤢𞤲𞤭. 𞤑𞤮𞤲𞤮 𞤲𞤣𞤫 𞤮 𞤺𞤢𞤴𞤲𞤵𞤲𞤮𞥅 𞤻𞤢𞤱𞤲𞤣𞤢𞥄𞤣𞤫 𞤄𞤵𞤳𞤢𞥄𞤪𞤫𞤧 (𞤈𞤮𞤥𞤢𞤲𞤭)⹁ 𞤮 𞤶𞤢𞤩𞤢𞥄𞤤𞤭 𞤪𞤵𞤼𞥆𞤢𞥄𞤣𞤫 𞤘𞤭𞤲𞤫 𞤧𞤢𞤦𞤵 𞤮𞤲𞤼𞤵𞤥𞤢 𞤸𞤢𞤪𞤭 𞤅𞤫𞥅𞤳𞤵 𞤚𞤵𞥅𞤪𞤫 𞤲𞤮 𞤱𞤢𞤪𞤵𞤣𞤫 𞤯𞤵𞥅𞤯𞤵𞤩𞤫 𞤫 𞤶𞤢𞤲𞤺𞤵𞤩𞤫 𞤩𞤫𞤲. 𞤐𞤣𞤫𞤲 𞤔𞤭𞤦𞤭𞤪𞤭𞥅𞤤 𞤚𞤢𞤥𞤧𞤭𞥅𞤪 𞤲𞤵𞤤𞤢𞤲𞤭 𞤩𞤫𞤴𞤲𞤺𞤵 𞤥𞤢𞤳𞥆𞤮. 𞤖𞤮𞤲 𞤰𞤫𞤼𞥆𞤭 𞤩𞤭𞤯𞥆𞤮 𞤥𞤢𞤩𞥆𞤫 𞤮𞤲 𞤊𞤭𞤬𞤭 𞤥𞤮 𞤣𞤵𞥅𞤩𞤭 𞤶𞤫𞥅𞤯𞤭𞤯𞤭 𞤣𞤮𞤺𞤭𞤣𞤭 𞤫 𞤸𞤢𞤳𞥆𞤮 𞤴𞤢𞤤𞤼𞤭𞤪𞤭 𞤅𞤢𞤪𞤤𞤮𞤲.
𞤑𞤮 𞤻𞤢𞤤𞤲𞤣𞤫 𞥑 𞤅𞤭𞥅𞤤𞤮 𞥑𞥙𞥗𞥓 𞤔𞤭𞤦𞤭𞤪𞤭𞥅𞤤 𞤫 𞤩𞤫𞤴𞤲𞤺𞤵𞥅𞤪𞤫 𞤥𞤵𞤲 𞤲𞤣𞤫𞤲 𞤴𞤭𞤼𞤭𞤣𞤭 𞤁𞤢𞤳𞤢𞤪. 𞤂𞤫𞤱𞤮𞤨𞤮𞤤 𞤅𞤫𞤣𞤢𞤪 𞤅𞤫𞤲𞤺𞤮𞤪⹁ 𞤤𞤢𞥄𞤥𞤭𞤲𞤮𞥅𞤯𞤮 𞤅𞤫𞤲𞤫𞤺𞤢𞤤 𞤮𞤲 𞤮𞤲𞤼𞤵𞤥𞤢⹁ 𞤼𞤮𞥅𞤤𞤲𞤭 𞤩𞤫. 𞤌 𞤴𞤫𞤯𞤭 𞤩𞤫 𞤸𞤵𞤩𞤫𞥅𞤪𞤫 𞤳𞤢𞤻𞤵𞤲 𞤫 𞤺𞤮𞤤𞥆𞤫 𞤳𞤢 𞤶𞤢𞥄𞤺𞤮𞤪𞤢𞤤 𞤸𞤭𞤤𞤲𞤭𞥅𞤲𞤺𞤢𞤤 𞤬𞤭𞥅 𞤶𞤢𞤲𞤺𞤣𞤫.
𞤊𞤭𞥅 𞤳𞤢𞤤𞤢 𞤅𞤫𞥅𞤳𞤵 𞤚𞤵𞥅𞤪𞤫 𞤥𞤢𞥄𞤴𞤵𞤲𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥔⹁ 𞤔𞤭𞤦𞤭𞤪𞤭𞥅𞤤 𞤪𞤵𞤼𞥆𞤢𞥄𞤣𞤫 𞤘𞤭𞤲𞤫 𞤱𞤮𞥅 𞤫 𞥑𞥙𞥙𞥐 𞤳𞤢𞤲𞤳𞤮 𞤫 𞤩𞤫𞤴𞤲𞤺𞤵 𞤥𞤢𞤳𞥆𞤮 𞤫 𞤩𞤭𞤯𞤩𞤫 𞤥𞤢𞤩𞥆𞤫 𞤩𞤫𞤲 𞤲𞤶𞤮𞤱𞤮. 𞤊𞤭𞤬𞤭⹁ 𞤊𞤢𞥄𞤼𞤵⹁ 𞤁𞤢𞥄𞤱𞤵𞥅𞤣𞤢⹁ 𞤑𞤢𞤼𞤵𞥅𞥃𞤢 𞤫 𞤄𞤢𞤷𞥆𞤭. 𞤑𞤢𞤼𞤵𞥅𞥃𞤢 𞤳𞤢𞤲⹁ 𞤬𞤫𞤰𞥆𞤭𞤲𞤭𞥅𞤲𞤮 𞤺𞤭𞤤𞤢 𞥒𞥐𞥐𞥘. 𞤊𞤵𞤪𞤫𞥅 𞤸𞤢𞤳𞥆𞤮 𞤮𞤲 𞤳𞤮 𞤫 𞤷𞤢𞥄𞤲𞤺𞤮𞤤 𞤭𞤲𞥆𞤫𞤼𞤫𞥅𞤲𞤺𞤮𞤤 𞤅𞤫𞥅𞤲 𞤴𞤭𞥅𞤼𞤢𞥄. 𞤖𞤢𞤪𞤭 𞤳𞤮 𞤸𞤮𞥅𞤪𞤫 𞤥𞤢𞤺𞥆𞤮𞤤 𞤸𞤮 𞤸𞤮𞤯𞤭.
𞤇𞤢𞤴𞤼𞤭 𞤔𞤭𞤦𞤭𞤪𞤭𞥅𞤤 𞤪𞤵𞤼𞥆𞤭𞤳𞤫 𞤘𞤭𞤲𞤫⹁ 𞤮 𞤵𞤣𞥆𞤭𞤼𞤭 𞤣𞤫𞤬𞤼𞤫𞤪𞤣𞤵 (Librarie Rivières du Sud) 𞤳𞤢𞤻𞤵𞤲 𞤫 𞤥𞤵𞥅𞤤𞤭𞤪𞤣𞤫 𞤣𞤫𞤬𞤼𞤫 𞤱𞤭𞤫𞤼𞤫𞥅𞤲𞤣𞤫 (SAEC).
𞤃𞤢𞥄𞤥𞤢 𞤥𞤢𞤲𞤼𞤢𞤧𞤮𞤪𞤮 𞤔𞤭𞤦𞤭𞤪𞤭𞥅𞤤 𞤚𞤢𞤥𞤧𞤭𞥅𞤪 𞤮𞤲 𞤳𞤮 𞤑𞤢𞤣𞤭 𞤃𞤢𞤤𞤭 𞤭𞤲𞥆𞤫𞤼𞤫𞥅. 𞤑𞤮 𞤊𞤵𞥅𞤼𞤢 𞤚𞤮𞥅𞤪𞤮 𞤫 𞤲𞤣𞤫𞤪 𞤅𞤉𞤲𞤫𞤺𞤢𞤤 𞤱𞤮𞤲𞤭 𞤭𞤱𞤣𞤭 𞤥𞤢𞤳𞥆𞤮. 𞤌 𞤸𞤫𞤩𞤵𞤲𞤮 𞤩𞤭𞤯𞥆𞤮 𞤱𞤭𞤫𞤼𞤫𞥅𞤯𞤮 𞤀𞥄𞤥𞤢𞤣𞤵 𞤙𞤢𞥄𞤲. 𞤑𞤮 𞤮𞤲𞤯𞤮𞤲 𞤶𞤭𞤦𞤭𞤲𞤭 𞤃𞤢𞤥𞥆𞤢𞤣𞤵 𞤦𞤵𞥅𞤦𞤢𞤳𞤢𞤪⹁ 𞤥𞤢𞥄𞤥𞤢𞤧𞤮𞤪𞤮 𞤔𞤭𞤦𞤭𞤪𞤭𞥅𞤤 𞤮𞤲. 𞤌𞤲 𞤤𞤢𞥄𞤼𞤭𞤲𞤮 𞤷𞤫𞤪𞤲𞤮𞥅𞤶𞤮 𞤥𞤢𞤱𞤯𞤮 𞤲𞤣𞤫𞤪 𞤁𞤢𞤳𞤢𞤪. 𞤃𞤢𞥄𞤥𞤭𞤪𞤢𞥄𞤱𞤮 𞤲𞤫𞥅𞤲𞤫 𞤔𞤭𞤦𞤭𞤪𞤭𞥅𞤤 𞤮𞤲⹁ 𞤳𞤮 𞤀𞥄𞤥𞤢𞤣𞤵 𞤅𞤢𞤥 𞤱𞤭𞤫𞤼𞤫𞤲𞤮𞥅⹁ 𞤳𞤮 𞤅𞤫𞤺𞤵⹁ 𞤯𞤵𞤥 𞤳𞤮 𞤧𞤢𞥄𞤪𞤫 𞤶𞤫𞤴𞤢𞥄𞤲𞤣𞤫 𞤃𞤢𞤤𞤭⹁ 𞤱𞤮𞤲𞤭 𞤭𞤱𞤲𞤣𞤭 𞤥𞤢𞤳𞥆𞤮.
𞤑𞤮 𞤔𞤭𞤦𞤭𞤪𞤭𞥅𞤤 𞤧𞤢𞥄𞤼𞤭 𞤣𞤫𞤬𞤼𞤫𞤪𞤫 𞤋𞤲𞤫𞤧𞤳𞤮𞥅 𞤲𞤣𞤫𞤲 𞤭𞤲𞥆𞤫𞤼𞤫𞥅𞤲𞤣𞤫 𞤊𞤭𞤤𞥆𞤢𞤴𞤫𞥅 𞤆𞤫𞤰𞥆𞤮𞤤 𞤃𞤢𞤱𞤲𞤺𞤮𞤤 𞤀𞤬𞤪𞤭𞤳𞤢. 𞤌𞤥𞤮 𞤱𞤭𞤲𞤣𞤭 𞤳𞤢𞤣𞤭 𞤸𞤮𞥅𞤪𞤫 𞤑𞤮𞤤𞥆𞤭 𞤚𞤫𞤲𞤺𞤫𞤤𞤢⹁ 𞤧𞤭𞤲𞤷𞤵𞤲𞤮𞥅𞤯𞤮 𞤤𞤢𞥄𞤥𞤢𞤼𞤫𞥅𞤪𞤭 𞤘𞤭𞤤𞤢 𞤊𞤵𞤼𞤢 𞤔𞤢𞤤𞤮 𞤸𞤢𞥄 𞤊𞤵𞥅𞤼𞤢 𞤚𞤮𞥅𞤪𞤮. 𞤑𞤮𞤲𞤮 𞤳𞤮 𞤩𞤵𞤪𞤭 𞤫 𞤯𞤵𞥅𞤯𞤵𞤣𞤫 𞤳𞤮 𞤮 𞤱𞤭𞤲𞤣𞤭 𞤳𞤮𞤲 𞤳𞤮 𞤸𞤮𞥅𞤪𞤫 𞤨𞤫𞤰𞥆𞤭 𞤴𞤭𞤥𞤩𞤫 𞤣𞤮𞤱𞤪𞤭 𞤘𞤭𞤲𞤫 𞤲𞤣𞤭𞤲.
𞤔𞤭𞤦𞤪𞤭𞥅𞤤 𞤚𞤢𞤥𞤧𞤭𞥅𞤪 𞤲𞤮 𞤥𞤢𞤪𞤵𞤲𞤮𞥅 𞤷𞤭𞤱𞤼𞤮 𞤱𞤭𞤫𞤼𞤫𞥅𞤯𞤮 𞤒𞤢𞥄𞤴𞤫. 𞤌𞤲 𞤯𞤮𞤲 𞤳𞤢𞤣𞤭 𞤳𞤮 𞤸𞤢𞤲𞤣𞤫 𞤬𞤫𞤰𞥆𞤭𞤲𞤭. 𞤑𞤮𞤼𞤭𞤪𞤢𞥄𞤱𞤮 𞤥𞤢𞤳𞥆𞤮 𞤥𞤢𞤱𞤯𞤮 𞤮𞤲 𞤬𞤫𞤰𞥆𞤭𞤲𞤭𞥅𞤲𞤮 𞤲𞤫𞥅𞤩𞤭𞥅.
𞤒𞤮 𞤀𞤤𞤤𞤢 𞤴𞤵𞤪𞤥𞤫 𞤩𞤫 𞤬𞤮𞤱 𞤴𞤢𞥄𞤬𞤮𞥅.
𞤢𞥄𞤥𞤭𞥅𞤲⹁ 𞤫𞤲𞤫𞤲 𞤳𞤢𞤣𞤭 𞤴𞤮 𞤢𞤤𞤤𞤢𞥄𞤸𞤵 𞤮𞤲 𞤢𞤪𞤧𞤵𞤳𞤵 𞤫𞤲 𞤧𞤭𞤲𞤷𞤢𞤲𞤮𞥅𞤱𞤮 𞤫𞤲 𞤥𞤵𞥅𞤤𞤭𞤪𞤣𞤵 𞤣𞤫𞤬𞤼𞤫 𞤢𞤣𞤤𞤢𞤥 𞤬𞤵𞥅𞤼𞤢. 𞤮𞤲 𞤶𞤢𞥄𞤪𞤢𞥄𞤥𞤢.
𞤒𞤮 𞤀𞤂𞤂𞤀𞥄𞤖𞤓 𞤮𞤲 𞤴𞤵𞤪𞤥𞤫𞤩𞤫 𞤵𞤢𞥄𞤬𞤮𞤩𞤫 𞤮 𞤲𞤢𞥄𞤣𞤢𞤩𞤫 𞤳𞤢 𞤢𞤤𞤶𞤢𞤲𞥆𞤢 𞤥𞤢𞤱𞤯𞤮.
𞤒𞤮 𞤘𞤫𞤲𞤮 𞤅𞤫𞥅𞤲𞤭𞥅𞤯𞤮 𞤚𞤮𞥅𞤱𞤵𞤯𞤮 𞤌𞤲 𞤫 𞤐𞤫𞤤𞤢𞥄𞤯𞤮 𞤥𞤢𞤳𞥆𞤮 (𞤃𞤮 𞤶𞤢𞤥 𞤫 𞤳𞤭𞤧𞤢𞤤 𞤱𞤮𞤲𞤭 𞤫 𞤥𞤵𞤵𞤲)⹁ 𞤒𞤮 𞤴𞤵𞤪𞤥𞤫𞤩𞤫 𞤴𞤢𞥄𞤬𞤮𞥅𞤩𞤫⹁ 𞤱𞤢𞤼𞥆𞤭𞤣𞤢𞤩𞤫 𞤫 𞤴𞤢𞥄𞤬𞤢𞥄𞤩𞤫 !
𞤢𞤤𞤤𞤢𞥄𞤸𞤵 𞤥𞤢𞥄𞤥𞤭𞥅𞤲 !