𞤒𞤋𞤃𞤇𞤉 𞤄𞤓𞤒 𞤐𞤌 𞤃𞤀𞥄𞤒𞤋 𞤑𞤓𞤐𞤅𞤋𞤚𞤉𞤂

𞤑𞤮 𞤩𞤢𞤣𞤲𞤭 𞤒𞤭𞤥𞤩𞤫 𞤲𞤮𞥅𞤺𞤢𞤴𞤮 𞤲𞤮 𞤥𞤢𞥄𞤴𞤭 𞤫 𞤢𞤧𞤭𞤪𞤤𞤫 𞤳𞤢𞤽𞥆𞤫 𞤑𞤵𞤲𞤧𞤭𞤼𞤫𞤤.

𞤑𞤮 𞤸𞤢𞤲𞤳𞤭 𞤫 𞤐𞤔𞤫𞤧𞤤𞤢𞥄𞤪𞤫 𞤻𞤢𞤤𞤲𞤣𞤫 𞥒 𞤐𞤦𞤮𞥅𞤴𞤮 𞥒𞥐𞥒𞥒 𞤲𞤺𞤮𞥅 𞤥𞤢𞤧𞤭𞥅𞤦𞤮 𞤱𞤢𞤯𞤭 𞤲𞤣𞤫 𞤤𞤫𞤴𞤣𞤭 𞤲𞤣𞤭𞤲 𞤣𞤢𞤩𞥆𞤭𞤼𞤭𞤲𞤮𞥅 𞤸𞤮𞥅𞤪𞤫 𞤱𞤮𞤲𞤵𞤲𞤮𞥅𞤩𞤫 𞤢𞤧𞤵𞤣𞤫 𞤩𞤫𞤲 𞤳𞤢𞤽𞥆𞤫. 𞤍𞤵𞥅𞤯𞤵𞤩𞤫 𞤦𞤢𞤪𞤥𞤭 𞤳𞤢𞤣𞤭.

𞤊𞤭𞥅 𞤳𞤢𞤤𞤢 𞤲𞤣𞤫𞥅 𞤮𞥅𞤺𞤭𞤪𞤣𞤫 𞤑𞤵𞤲𞤧𞤭𞤼𞤫𞤤 𞤧𞤮𞤳𞤢𞤲𞤮𞥅𞤥𞤢⹁ 𞤢𞤧𞤵𞤺𞤮𞤤 𞤳𞤢𞤽𞥆𞤫 𞤼𞤮𞤽𞤢𞥄 𞤫 𞤥𞤢𞤴𞤪𞤫⹁ 𞤯𞤵𞤥 𞤸𞤢𞤯𞤢𞥄𞤤𞤭 𞤴𞤭𞤥𞤩𞤫 𞤩𞤫𞤲 𞤣𞤵𞥅𞤥𞤢𞥄𞤣𞤫 𞤫 𞤥𞤵𞤵𞤲.

𞤑𞤵𞤲𞤧𞤭𞤼𞤫𞤤 𞤳𞤮 𞤫 𞤲𞤣𞤫𞤪 𞤼𞤵𞤬𞤵𞤲𞤣𞤫 𞤘𞤢𞥄𞤱𞤢𞤤 𞤲𞤣𞤫𞤲 𞤫 𞤣𞤭𞥅𞤱𞤢𞤤 𞤄𞤮𞤳𞤫 𞤲𞤺𞤢𞤤 𞤶𞤫𞤴𞤢𞥄. 𞤑𞤮 𞤳𞤢 𞤸𞤭𞤪𞤲𞤢𞥄𞤲𞤺𞤫 𞤐𞤢𞤲𞤮 𞤘𞤭𞤲𞤫⹁ 𞤲𞤣𞤫𞥅 𞤤𞤫𞤧𞤯𞤢𞤤𞤭𞥅𞤪𞤫 𞤑𞤵𞤲𞤧𞤭𞤼𞤫𞤤 𞤸𞤭𞤳𞥆𞤮𞤪𞤭. 𞤑𞤮 𞤳𞤭𞤤𞤮𞤥𞤫𞥅𞤼𞤭 𞥑𞥐𞥐 𞤱𞤮𞤲𞤭 𞤸𞤢𞤳𞥆𞤵𞤲’𞤣𞤫 𞤥𞤢𞤴𞤪𞤭 𞤫 𞤂𞤢𞤦𞤫⹁ 𞤧𞤢𞥄𞤪𞤫 𞤥𞤢𞤱𞤲𞤣𞤫 𞤊𞤵𞥅𞤼𞤢 𞤔𞤢𞤤𞤮𞥅 𞤲𞤣𞤫𞤲.

𞤑𞤮 𞤪𞤮𞤱𞤢𞤲𞤭 𞤫 𞤁𞤵𞥅𞤶𞤮 𞥒𞥐𞥒𞥑⹁ 𞤳𞤵𞤥𞤨𞤭𞤼𞤢𞤤 𞤲𞤺𞤢𞤤 𞤶𞤢𞥄𞤤𞤭𞥅 𞤘𞤭𞤲𞤫 𞤱𞤮𞤲𞤣𞤫𞤥𞤢 𞤳𞤢𞤽𞥆𞤫 𞤴𞤭𞤢𞥄𞤥𞤢 𞤫 𞤸𞤮𞤯𞤮 𞤶𞤫𞤴𞤢𞥄𞤲𞤺𞤮 𞤫 𞤑𞤵𞤲𞤧𞤭𞤼𞤫𞤤 𞤱𞤭𞤫𞤼𞤫𞥅𞤲𞤺𞤮 𞤊𞤫𞤤𞥆𞤮 𞤑𞤢𞤧𞤫𞤲𞤺𞤢. 𞤌𞤲𞤼𞤵𞤥𞤢 𞤴𞤭𞤥𞤩𞤫 𞤭𞤱𞤪𞤭 𞤷𞤫𞤲𞤯𞤫 𞤯𞤫𞤲 𞤬𞤮𞤱 𞤘𞤭𞤲𞤫 𞤼𞤫𞤲𞤼𞤭𞤲𞤭𞥅 𞤳𞤢 𞤁𞤮𞤱𞤪𞤭 𞤘𞤭𞤲𞤫 (𞤱𞤢𞤲𞤮 𞤃𞤢𞤲𞤶𞤢𞥄𞤲𞤢⹁ 𞤅𞤭𞤺𞤭𞤪𞤭⹁ 𞤑𞤵𞤪𞤵𞤧𞤢⹁ 𞤑𞤢𞤲𞤳𞤢𞤲)⹁ 𞤩𞤫 𞤸𞤢𞤥𞥆𞤭𞤪𞤭 𞤘𞤢𞥄𞤱𞤢𞤤. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤷𞤮𞤺𞥆𞤵 𞤨𞤭𞥅𞤶𞤭 𞤬𞤮𞤨 𞤴𞤮 𞤩𞤫𞤴𞤣𞤮 𞤼𞤫𞤲𞤼𞤭𞤲𞤭𞥅 𞤳𞤮𞤯𞤢𞤲𞤯𞤫 𞤯𞤫𞤲. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤸𞤵𞤲𞤣𞤢𞥄𞤪𞤭 𞤲𞤣𞤭𞤲 𞤬𞤵𞤯𞥆𞤭 𞤴𞤫𞥅𞤦𞤢𞥄𞤣𞤫 𞤬𞤮𞤼𞤢 𞤧𞤢𞤦𞤵 𞤧𞤮𞤨𞥆𞤮 𞤤𞤫𞤯𞥆𞤫 𞤫 𞤢𞤧𞤮 𞤺𞤢𞤴𞤯𞤫.

𞤐𞤣𞤫 𞤴𞤭𞤥𞤩𞤫 𞤑𞤵𞤲𞤧𞤭𞤼𞤫𞤤 𞤩𞤫𞤲 𞤱𞤵𞤤𞥆𞤭𞤼𞤭𞤲𞤮𞥅⹁ 𞤤𞤢𞥄𞤥𞤵 𞤀𞤤𞤬𞤢𞥄 𞤑𞤮𞤲𞤣𞤫 𞤲𞤺𞤵𞤲 𞤬𞤵𞤯𞥆𞤮𞤪𞤭 𞤼𞤮𞤽𞤵𞤣𞤫 𞤢𞤧𞤭𞤪𞤺𞤮𞤤 𞤶𞤫𞤥𞥆𞤢. 𞤇𞤢𞥄𞤱𞤼𞤭 𞤯𞤵𞤲 𞤩𞤫 𞤼𞤮𞤽𞤭 𞤬𞤫𞤧⹁ 𞤮𞤲𞤼𞤵𞤥𞤢 𞤩𞤫 𞤭𞤥𞥆𞤭𞤲𞤭 𞤧𞤮𞥅𞤪𞤭 𞤳𞤮 𞤢𞤴𞤲𞤢 𞤮𞥅𞤺𞤭𞤪𞤤𞤫 𞤯𞤫𞤲. 𞤑𞤮𞤲𞤮 𞤯𞤵𞤥 𞤸𞤢𞤯𞤢𞥄𞤤𞤭 𞤴𞤮 𞤢𞤧𞤮𞥅𞤩𞤫 𞤫 𞤺𞤢𞤴𞤯𞤫 𞤩𞤫𞤴𞤣𞤮. 𞤖𞤢𞤴 𞤶𞤫𞤥𞥆𞤢 𞤩𞤫 𞤱𞤢𞤯𞤼𞤭 𞤢𞤧𞤭𞤪𞤣𞤫.

𞤅𞤮 𞤼𞤢𞤱𞤭𞥅 𞤤𞤢𞤱𞤵 𞤲𞤵𞤲 𞤳𞤮 𞤲𞤮𞤳𞥆𞤫𞥅𞤤𞤭 𞤯𞤭𞤯𞤭 𞤱𞤮𞤲𞤢𞤲𞤮𞥅 𞤢𞤧𞤫𞥅𞤣𞤫⹁ 𞤲𞤣𞤫 𞤲𞤮 𞤼𞤭𞤥𞥆𞤢𞤴𞤲𞤮𞥅 𞤤𞤫𞤦𞥆𞤭 𞤯𞤭𞤯𞤭⹁ 𞤸𞤢𞤪𞤭 𞤱𞤢𞤯𞤼𞤢𞥄𞤥𞤢 𞤢𞤧𞤫𞥅𞤣𞤫 𞤫 𞤲𞤮𞤳𞥆𞤵𞥅𞤶𞤫 𞤷𞤢𞤨𞥆𞤢𞤲𞤯𞤫 𞤼𞤢𞤼𞤭. 𞤍𞤵𞤥 𞤱𞤮𞤲𞤭 𞤧𞤢𞤦𞤵 𞤧𞤵𞤳𞤢𞥄𞤩𞤫 𞤑𞤵𞤲𞤧𞤭𞤼𞤫𞤤 𞤩𞤫𞤲 𞤴𞤮 𞤥𞤵𞤪𞤼𞤢𞤲 𞤢𞤧𞤮𞥅𞤩𞤫 𞤩𞤫𞤲. 𞤉 𞤶𞤵𞤳𞤮 𞥒𞥐𞥒𞥑⹁ 𞤨𞤭𞤴𞤪𞤮 𞤥𞤢𞤱𞤲𞤺𞤮 𞤱𞤢𞤯𞤭 𞤑𞤵𞤲𞤧𞤭𞤼𞤫𞤤. 𞤍𞤵𞤥 𞤬𞤮𞤨 𞤣𞤢𞤪𞤼𞤭𞤲𞤢𞥄𞤤𞤭 𞤢𞤧𞤵𞤺𞤮𞤤 𞤲𞤺𞤮𞤤 𞤸𞤢𞥄 𞤲𞤣𞤫 𞤲𞤺𞤮𞥅 𞤥𞤢𞤧𞤭𞥅𞤦𞤮 𞤱𞤢𞤯𞤭𞤪𞤭 𞤲𞤭𞥅.

𞤒𞤫𞤪𞤵 𞤲𞤺𞤮𞥅 𞤥𞤢𞤧𞤭𞥅𞤦𞤮 𞤱𞤢𞤯𞤵𞤲’𞤺𞤮 𞤧𞤢𞤯𞤢𞥄 𞤫 𞤢𞤧𞤭𞤪𞤤𞤫 𞤳𞤢𞤽𞥆𞤫 𞤯𞤫𞤲 𞤧𞤢𞤦𞤵 𞤲𞤮 𞤱𞤮𞤲𞤢𞥄 𞤢𞤧𞤭𞤪𞤫𞥅𞤣𞤫 𞤲𞤮𞤲. 𞤈𞤮𞤱𞤢𞤲𞤭 𞤫 𞤁𞤵𞥅𞤶𞤮 𞥒𞥐𞥒𞥑⹁ 𞤤𞤫𞤴𞤣𞤭 𞤣𞤢𞤩𞥆𞤭𞤼𞤭𞤲𞤮 𞤳𞤢𞤣𞤭 𞤫 𞤲𞤺𞤢𞤴𞤳𞤢 𞤱𞤢𞤪𞤭 𞤴𞤭𞤥𞤩𞤫 𞥑𞥕 𞤅𞤭𞤺𞤭𞤪𞤭⹁ 𞤳𞤢 𞤣𞤮𞤱𞤪𞤭 𞤘𞤭𞤲𞤫.