𞥒𞥑 𞤕𞤌𞤂𞤚𞤌 𞤙𞤀𞤂𞤀𞥄𞤐𞤁𞤉 𞤐𞤁𞤉 𞤏𞤌𞥅𞤏𞤀𞥄

 𞤙𞤢𞤤𞤲𞤣𞤫 𞥒𞥑 𞤷𞤮𞤤𞤼𞤮⹁ 𞤳𞤮 𞤻𞤢𞤤𞤢𞥄𞤲𞤣𞤫 𞤀𞤣𞤵𞤲𞤢𞤴𞤢𞤲𞤳𞤮𞥅𞤪𞤫 𞤍𞤫𞤲𞤺𞤢𞤤 𞤥𞤵𞤴𞤲𞤢𞥄𞤲𞤺𞤢𞤤 𞤱𞤮𞥅𞤱𞤢𞥄𞤲𞤣𞤫 𞤱𞤵𞤪𞤲𞤭𞤼𞤫𞥅𞤣𞤫 𞤫 𞤤𞤫𞤴𞤯𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲 𞤬𞤮𞤱. 𞤍𞤵𞤥 𞤲𞤮𞤲 𞤳𞤮 𞤱𞤮𞤲𞤢𞤲𞤣𞤫 𞤩𞤫𞤲 𞤬𞤭𞤲𞤵𞤩𞤫 𞤢𞤲𞤣𞤭 𞤲𞤢𞤬𞤮𞥅𞤪𞤫 𞤯𞤫𞤲𞤺𞤢𞤤 𞤲𞤸𞤢𞤤 𞤦𞤫 𞤥𞤵𞤴𞤲𞤭. 𞤖𞤭𞤳𞥆𞤢 𞤳𞤢𞤣𞤭⹁ 𞤲𞤣𞤫𞥅 𞤻𞤢𞤤𞤢𞥄𞤲𞤣𞤫 𞤱𞤵𞤪𞤲𞤭𞤼𞤭𞤪𞤢𞤲𞤮 𞤸𞤫𞤴𞤯𞤭𞤲𞤼𞤭𞤲𞤺𞤮𞤤 𞤲𞤣𞤫 𞤲𞤮 𞤋𞤲𞤫𞤧𞤳𞤮 𞤬𞤢𞥄𞤲𞤣𞤮𞤪𞤭 𞤲𞤮𞤲.

𞤑𞤮𞤲𞤮 𞤳𞤮 𞤴𞤮𞤱𞤮𞤲𞤣𞤭𞤪𞤭 𞤫 𞤬𞤭𞥅 𞤯𞤫𞤲𞤺𞤢𞤤 𞤆𞤵𞤤𞤢𞤪 𞤲𞤺𞤢𞤤 𞤫 𞤲𞤣𞤫𞥅 𞤸𞤭𞤼𞤢𞥄𞤲𞤣𞤫 𞥒𞥐𞥒𞥒 𞤯𞤮𞤮⹁ 𞤳𞤮 𞤥𞤢𞤱𞤲𞤭 𞤱𞤢𞤯𞤵𞤲𞤮. 𞤑𞤮 𞤱𞤮𞤲𞤭 𞤲𞤮𞤲 𞤧𞤢𞤦𞤢𞥄𞤦𞤵 𞤯𞤵𞤲⹁ 𞤳𞤮 𞤯𞤫𞥅 𞤸𞤭𞤥𞥆𞤫 𞤱𞤮𞤲𞤵𞤯𞤫 𞤫 𞤣𞤢𞥄𞤯𞤫 𞤣𞤢𞤪𞤢𞤲𞤭𞥅𞤩𞤫 𞤲𞤺𞤮𞤤 𞤦𞤭𞤲𞤣𞤮𞤤 𞤀𞤁𞤂𞤀𞤃 𞤨𞤵𞤤𞤢𞤪. 𞤆𞤫𞤤𞥆𞤫𞤼 𞤸𞤢𞤪𞤭 𞤢𞤣𞤮 𞤸𞤢𞤲𞤣𞤫⹁ 𞤸𞤢𞤴 𞤫 𞤺𞤮𞥅𞤼𞤮 𞤫 𞤩𞤭𞤲𞤺𞤫𞤤 𞤢𞥄𞤣𞤢𞥄𞤥𞤢 𞤴𞤢𞤲𞤺𞤮𞤪𞤢𞤲𞤢𞥄𞤤𞤭 𞤲𞤭𞥅 𞤆𞤵𞤤𞤢𞥄𞤳𞤵 𞤳𞤢 𞤧𞤮𞥅𞤦𞤫𞥅.

𞤀𞤣𞤮 𞤻𞤢𞤤𞥆𞤢𞤤 𞤲𞤺𞤢𞤤 𞤸𞤫𞤱𞤼𞤵𞤣𞤫 𞤼𞤢𞤸𞤮⹁ 𞤸𞤢𞤪𞤭 𞤥𞤮 𞤳𞤢𞤤𞤢 𞤬𞤵𞤯𞥆𞤭𞤳𞤫 𞤱𞤫𞥅𞤩𞤵𞤼𞤵𞤣𞤫 𞤳𞤮 𞤧𞤢𞥄𞤼𞤭𞤲𞤭 𞤱𞤢𞤯𞤵𞤺𞤮𞤤 𞤳𞤮𞤲 𞤫 𞤲𞤺𞤢𞤢𞤤 𞤻𞤢𞤤𞥆𞤢𞤤. 𞤏𞤵𞤪𞤭𞤲 𞤱𞤮𞥅𞤼𞤩𞤫 𞤱𞤭𞤵𞤲𞤮 𞤱𞤮𞤲𞤣𞤫𞤥𞤢 𞤲𞤣𞤫𞤲 𞤻𞤢𞤤𞤲𞤣𞤫⹁ 𞤳𞤮 𞤆𞤵𞤤𞤢𞤪 𞤼𞤵𞤲 𞤩𞤫 𞤱𞤭𞤲𞤣𞤢𞤼𞤢 𞤳𞤢 𞤸𞤫𞤤𞥆𞤮 𞤥𞤢𞤩𞥆𞤮. 𞤑𞤮 𞤱𞤢𞤲𞤮 𞤲𞤭𞥅 𞤳𞤢𞤣𞤭⹁ 𞤥𞤮 𞤳𞤢𞤤𞤢 𞤬𞤮𞤣𞤭𞤪𞤭 𞤺𞤮𞥅𞤼𞤯𞤵𞤲 𞤳𞤮 𞤴𞤮𞤱𞤭𞤼𞤭𞥅 𞤫 𞤬𞤭𞥅 𞤱𞤵𞤪𞤲𞤵𞤺𞤮𞤤 𞤆𞤵𞤤𞤢𞤪.

𞤳𞤮𞤲𞤮 𞤸𞤢𞤳𞥆𞤫𞤪𞤫𞤲 𞤴𞤭𞤥𞤩𞤫 𞤩𞤫𞤲 𞤲𞤮 𞤸𞤭𞤥𞥆𞤢𞤲𞤭 𞤩𞤢𞤽𞤼𞤵𞤺𞤮𞤤𞤤 𞤲𞤺𞤢𞤢𞤤 𞤯𞤫𞤲𞤺𞤢𞤤 𞤥𞤫𞤫𞤲⹁ 𞤥𞤮 𞤳𞤢𞤤𞤢 𞤱𞤢𞤳𞥆𞤭𞤤𞤮𞤪𞤭 𞤳𞤢 𞤱𞤮𞤲𞤭𞤪𞤭. 𞤊𞤭𞥅 𞤳𞤢𞤤𞤢 𞤸𞤢𞥄𞤤𞤣𞤢𞥄𞤳𞤢 𞤬𞤮𞤼𞥆𞤭𞤣𞤢𞥄 𞤫 𞤸𞤮𞥅𞤪𞤫 𞤫𞤩𞥆𞤮𞥅𞤶𞤫 𞤺𞤮𞥅𞤼𞤫⹁ 𞤥𞤮 𞤳𞤢𞤤𞤢 𞤸𞤫𞤩𞤭𞤤𞤭𞥅 𞤳𞤢 𞤱𞤮𞤲𞤭𞤪𞤭 𞤧𞤢𞤦𞤵𞤲𞤢 𞤮𞤲𞤼𞤭𞤺𞤭 𞤲𞤮 𞤱𞤢𞤯𞤭 𞤳𞤢 𞤲𞤺𞤫𞥅𞤼𞤵 𞤥𞤵𞤵𞤲 𞤧𞤭 𞤥𞤭 𞤣𞤢𞤪𞤢𞤲𞤢𞥄𞤳𞤭⹁ 𞤸𞤢𞤴 𞤺𞤮𞥅𞤼𞤮 𞤣𞤢𞤪𞤢𞤲𞤼𞤢𞥄𞤳𞤮. 𞤖𞤮𞥅𞤪𞤫 𞤲𞤺𞤮𞤲 𞤥𞤭𞥅𞤶𞤮⹁ 𞤶𞤢𞤥𞤢𞥄𞤶𞤭 𞤯𞤭𞤲 𞤭𞤥𞥆𞤭𞥅 𞤱𞤢𞤯𞤭 𞤨𞤭𞥅𞤶𞤭 𞤫 𞤼𞤵𞤥𞤦𞤮𞤲’𞤣𞤭𞤪𞤫 𞤸𞤢𞥄𞤱𞤲𞤭𞥅𞤯𞤫.

𞤊𞤵𞤯𞥆𞤮𞤪𞤭 𞤤𞤫𞤴𞤣𞤭 𞤺𞤭𞤲𞤫 𞤲𞤣𞤭𞤲 𞤱𞤮𞤲𞤣𞤵𞤣𞤫 𞤫 𞤅𞤋𞤐𞤕𞤓𞤇𞤉 𞤀𞤁𞤂𞤀𞤃 𞤩𞤫𞤲⹁ 𞤯𞤵𞤲 𞤳𞤮 𞤷𞤫𞤪𞤲𞤮 𞤀𞤦𞤣𞤵𞤤𞥆𞤢𞥄𞤸𞤭 𞤄𞤀𞤈𞤋⹁ 𞤱𞤢𞤼𞥆𞤮𞤣𞤢𞥄𞤣𞤫 𞤫 𞤶𞤢𞤥𞤢𞥄 𞤮𞤲⹁ 𞤩𞤫 𞤶𞤭𞤲𞤣𞤭 𞤫 𞤣𞤵𞤯𞤫 𞤸𞤫𞥅𞤱𞤵𞤯𞤫 𞤳𞤢 𞤤𞤢𞥄𞤥𞤮𞤪𞤣𞤫 𞤑𞤮𞤲𞤢𞥄𞤳𞤭𞤪𞤭. 𞤖𞤢𞥄𞤯𞤼𞤢𞥄𞤤𞤭 𞤯𞤮𞤲⹁ 𞤫 𞤲𞤣𞤫𞤪 𞤷𞤢𞤫 𞤤𞤫𞤴𞤣𞤭 𞤲𞤣𞤭𞤲 𞤳𞤢𞤣𞤭⹁ 𞤱𞤢𞤲𞤮 𞤑𞤭𞤲𞤣𞤭𞤴𞤢⹁ 𞤃𞤢𞥄𞤥𞤵𞤲⹁ 𞤑𞤵𞤪𞤵𞤧𞤢⹁ 𞤅𞤫𞤪𞤫𞤳𞤮𞤪𞤫⹁ 𞤫 𞤳𞤲𞤯… 𞤖𞤢𞤴 𞤳𞤢 𞤺𞤢𞤯𞤢 𞤳𞤫𞥅𞤪𞤭 𞤘𞤭𞤲𞤫 𞤱𞤢𞤲𞤮 𞤑𞤮𞤼𞤣𞤭𞤱𞤢𞥄𞤪⹁ 𞤂𞤢𞤦𞤭𞤪𞤭𞤴𞤢⹁ 𞤑𞤢𞤥𞤢𞤪𞤵𞤲⹁ 𞤕𞤢𞤣𞥆𞤭⹁ 𞤐𞤢𞤶𞤭𞤪𞤭𞤴𞤢 𞤫 𞤤𞤫𞤴𞤯𞤫 𞤸𞤫𞥅𞤱𞤵𞤯𞤫⹁ 𞤯𞤫𞥅 𞤬𞤮𞤱 𞤣𞤢𞤪𞤭𞥅 𞤫 𞤸𞤮𞥅𞤪𞤫 𞤧𞤮𞥅𞤦𞤫𞥅 𞤬𞤭𞥅 𞤱𞤢𞤯𞤵𞤺𞤮𞤤 𞤦𞤢𞤯𞤼𞤫 𞤫 𞤲𞤺𞤢𞤢𞤤 𞤻𞤢𞤤𞥆𞤢𞤤.

𞤑𞤮 𞤸𞤢𞥄𞤱𞤲𞤭𞥅 𞤳𞤮𞤲⹁ 𞤳𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤺𞤮𞤤𞥆𞤫 𞤯𞤫𞤲 𞤣𞤢𞤪𞤢𞤲𞤢 𞤸𞤮𞥅𞤪𞤫 𞤺𞤭𞤯𞤺𞤮𞤤 𞤶𞤫𞤴𞤢𞤤. 𞤖𞤢𞤴 𞤺𞤮𞥅𞤼𞤫𞤤 𞤫 𞤯𞤫𞤫 𞤤𞤫𞤴𞤯𞤫 𞤥𞤢𞥄 𞤯𞤫𞤫 𞤷𞤢𞤫 𞤤𞤭𞤥𞤼𞤢𞥄𞤯𞤫 𞤯𞤮𞤮 𞤶𞤮𞤺𞤲𞤢𞥄𞤳𞤢 𞤷𞤫𞥅𞤣𞤫 𞤭𞤱𞤪𞤵𞤯𞤫 𞤳𞤢 𞤋𞤲𞤫𞤧𞤳𞤮𞥅 𞤥𞤢𞥄 𞤳𞤢 𞤆𞤮𞤼𞥆𞤢𞤤 𞤘𞤫𞤲𞤯𞤭 𞤬𞤭𞥅 𞤲𞤮 𞤱𞤢𞤯𞤭𞤪𞤢 𞤯𞤫𞤫 𞤺𞤮𞤤𞥆𞤫.

𞤸𞤢𞤪𞤢𞤴 𞤳𞤮 𞤯𞤵𞤲 𞤯𞤮𞤮 𞤼𞤭𞤺𞤭 𞤱𞤮𞤲𞤭 𞤺𞤭𞤯𞤺𞤮𞤤 𞤶𞤫𞤴𞤢𞤤. 𞤃𞤮 𞤴𞤭𞤯𞤭𞥅 𞤦𞤮𞥅⹁ 𞤮𞤲𞤼𞤭𞤺𞤭 𞤴𞤢𞤲𞤺𞤢𞤲𞤼𞤮 𞤸𞤢𞤪𞤢 𞤼𞤭𞤶𞥆𞤮𞤪𞤢𞥄 𞤯𞤵𞤥 𞤺𞤮𞤲𞤺𞤫𞤤.  𞤑𞤮 𞤯𞤵𞤲 𞤱𞤮𞤲𞤭 𞤲𞤣𞤭𞤥𞤵 𞤲𞤺𞤵 𞤆𞤵𞤤𞥆𞤮 𞤢𞤲𞤣𞤭𞤪𞤢𞥄.

 𞤑𞤢𞤤𞤢 𞤫 𞤥𞤫𞤫𞤲 𞤶𞤢𞥄𞤪𞤲𞤢𞥄𞤥𞤢 𞤧𞤢𞤲𞥆𞤫 𞤧𞤢𞤲𞥆𞤫. 𞤑𞤮 𞤲𞤭𞥅 𞤸𞤢𞥄𞤲𞤭𞤪𞤭. 𞤖𞤢𞤴 𞤧𞤭 𞤼𞤢𞤱𞤭𞥅 𞤴𞤫𞤱𞤼𞤭𞤣𞤢𞥄𞤳𞤢 𞤳𞤮𞤲𞤮 𞤫𞤲 𞤬𞤮𞤱 𞤸𞤭𞤯𞤫𞤲 𞤢𞤲𞤣𞤭 𞤳𞤮 𞤸𞤢𞥄𞤲𞤵𞤯𞤫𞤲 𞤱𞤢𞤯𞤵𞤣𞤫 𞤳𞤮𞤲. 𞤖𞤢𞤪𞤢𞤴 𞤳𞤮 𞤴𞤮 𞤫𞤲 𞤩𞤫𞤴𞤣𞤵 𞤬𞤮𞤼𞤢 𞤬𞤮𞤼𞤢. 𞤑𞤮 𞤲𞤭𞥅 𞤴𞤢𞤸𞤭𞤪𞤼𞤫𞤲 𞤸𞤢𞥄 𞤩𞤢𞤽𞤼𞤢𞤤 𞤲𞤺𞤢𞤤 𞤸𞤫𞤱𞤼𞤮𞥅 𞤫𞤲.

𞤑𞤢𞤤𞤢 𞤳𞤮 𞤱𞤢𞤯𞤢𞥄 𞤯𞤮𞤮 𞤫 𞤲𞤺𞤢𞤤 𞤻𞤢𞤤𞥆𞤢𞤤⹁ 𞤱𞤭𞤲𞤣𞤫𞥅 𞤯𞤵𞤲 𞤴𞤮𞤼𞥆𞤭𞤲𞤮𞤲 𞤸𞤢𞥄 𞤫 𞤧𞤢𞤤𞤲𞤣𞤵 𞤋𞤲𞤫𞤧𞤳𞤮𞥅 𞤲𞤣𞤵𞤲 𞤳𞤢 𞤤𞤫𞤴𞤣𞤭 𞤥𞤮𞤮𞤲⹁ 𞤬𞤭𞥅 𞤴𞤮 𞤩𞤫 𞤢𞤲𞤣𞤵 𞤱𞤮𞤲𞤣𞤫𞤥𞤢 𞤫𞤯𞤫𞤲 𞤣𞤢𞤪𞤢𞤲𞤭𞥅 𞤱𞤵𞤪𞤲𞤵𞤺𞤮𞤤 𞤫 𞤩𞤢𞤽𞤼𞤵𞤺𞤮𞤤 𞤯𞤫𞤲𞤺𞤢𞤤 𞤥𞤫𞥅𞤯𞤫𞤲 𞤲𞤺𞤢𞤤. 𞤅𞤭 𞤫𞤲 𞤱𞤢𞤯𞤭𞥅 𞤯𞤵𞤥⹁ 𞤱𞤢𞤤𞥆𞤭𞤼𞤮𞤼𞤮 𞤫𞤲 𞤬𞤮𞤼𞤢 𞤳𞤮 𞤱𞤮𞤲𞤢𞥄 𞤧𞤫𞥅𞤯𞤢.

𞤉𞤯𞤫𞤲 𞤸𞤢𞤼𞤮𞤲𞤶𞤭𞤲𞤭 𞤫 𞤦𞤢𞤤𞥆𞤫 𞤦𞤵𞤴. 𞤑𞤮 𞤴𞤮 𞤫𞤲 𞤸𞤮𞤤𞥆𞤵 𞤩𞤫 𞤱𞤮𞤲𞤣𞤫 𞤸𞤭𞤯𞤫𞤲 𞤱𞤢𞥄𞤱𞤭 𞤺𞤮𞤤𞥆𞤢𞤲𞤣𞤫 𞤸𞤮𞥅𞤪𞤫 𞤥𞤫𞤫𞤲 𞤸𞤢𞤪𞤢 𞤫𞤲 𞤸𞤢𞤦𞥆𞤢𞥄𞤳𞤭 𞤱𞤢𞤤𞥆𞤫𞥅𞤣𞤫. 𞤑𞤮 𞤺𞤭𞤤𞤢 𞤯𞤮𞤲 𞤲𞤮𞤲 𞤱𞤮𞤲𞤭 𞤳𞤮 𞤩𞤫 𞤱𞤢𞤯𞤼𞤢𞤲𞤼𞤢 𞤴𞤭𞥅𞤤𞥆𞤢 𞤫 𞤥𞤫𞤫𞤲.

𞤑𞤢 𞤢𞤧𞤶𞤵𞥅𞤼𞤲𞤵𞤺𞤮𞤤⹁ 𞤫𞤲 𞤱𞤫𞤤𞤼𞤢𞤲𞤼𞤮 𞤬𞤮𞤼𞤢 𞤳𞤢𞤲𞤳𞤮 𞤷𞤫𞤪𞤲𞤮 𞤢𞤦𞤣𞤵𞤤𞥆𞤢𞥄𞤸𞤭 𞤄𞤢𞤪𞤭⹁ 𞤳𞤢𞤻𞤵𞤲 𞤫 𞤴𞤭𞥅𞤤𞤭𞤪𞤣𞤫 𞤅𞤵𞤳𞤢𞥄𞤩𞤫 𞤀𞤁𞤂𞤀𞤃 𞤺𞤭𞤲𞤫⹁ 𞤀𞤦𞤣𞥆𞤵𞤤𞥆𞤢𞥄𞤸𞤭 𞤀𞤤𞤸𞤢𞤧𞤢𞤲𞤢⹁ 𞤤 𞤂𞤢𞤥𞤢𞤪𞤢𞥄𞤲𞤢 𞤨𞤵𞤤𞥆𞤮⹁ 𞤋𞤦𞤪𞤢𞥄𞤸𞤭𞥅𞤥𞤢 𞤶𞤮𞤺𞤮 𞤐𞤦𞤢𞤤𞤣𞤫⹁ 𞤕𞤫𞤪𞤲𞤮𞥅𞤩𞤫 𞤥𞤫𞤫𞤲 𞤩𞤫 𞤑𞤢𞤥𞤢𞤪𞤵𞤲 𞤫 𞤣𞤫𞤲𞤣𞤢𞥄𞤲𞤺𞤢𞤤 𞤱𞤢𞤳𞥆𞤭𞤤𞤭𞥅𞤩𞤫 𞤱𞤢𞤯𞤭 𞤦𞤢𞤯𞤼𞤫 𞤫 𞤲𞤣𞤫𞤫 𞤻𞤢𞤤𞤢𞥄𞤲𞤣𞤫. 𞤊𞤮𞤼𞤭 𞤮𞤲𞤼𞤭𞤺𞤭 𞤤𞤭𞤥𞤼𞤢𞥄 𞤥𞤢𞥄 𞤤𞤭𞤥𞤼𞤢𞥄𞤳𞤢. 𞤉𞤲 𞤴𞤢𞤥𞤮𞤲’𞤣𞤭𞤪𞤭𞥅 𞤬𞤢𞥄𞤸𞤭𞤲 𞤩𞤫𞤴𞤣𞤵𞤺𞤮𞤤 𞤼𞤭𞥅𞤯𞤲𞤢𞥄𞤪𞤫 𞤲𞤣𞤫𞤲 𞤫 𞤧𞤮𞥅𞤦𞤭𞤲𞤢𞥄𞤣𞤫 𞤳𞤢 𞤺𞤮𞤤𞥆𞤫⹁ 𞤯𞤵𞤴𞤼𞤫𞤲 𞤸𞤢𞥄𞤤𞤢.

𞤑𞤵𞤯𞤮𞤤 𞤕𞤉𞤈𞤐𞤌 𞤀𞤄𞤁𞤓𞤂 𞤖𞤀𞤗𞥆𞤋 𞤔𞤀𞤂𞥆𞤌

𞤅𞤓𞤑𞤀𞥄𞤇𞤉 𞤏𞤋𞤐𞤁𞤉𞤐 𞤔𞤀𞤐𞤘𞤉𞤐 𞤀𞤁𞤂𞤀𞤃

𞤑𞤌𞤐𞤀𞥄𞤑𞤋𞤈𞤋⹁ 𞤘𞤋𞤐𞤉