𞤂𞤢𞤲𞤣𞤫 𞤩𞤵𞤪𞤢𞥄𞤯𞤫 𞤤𞤢𞤲𞤣𞤫𞥅𞤣𞤫 𞤸𞤮𞥅𞤪𞤫 𞤫𞤦𞤮𞤤𞤢𞥄
𞤸𞤮𞤤 𞤳𞤮 𞤱𞤮𞤲𞤭 𞤲𞤺𞤭𞤤𞤳𞤵 𞤉𞤦𞤮𞤤𞤢𞥄؟
𞤙𞤢𞤱𞤵 𞤉𞤦𞤮𞤤𞤢𞥄 𞤲𞤺𞤵𞤲 𞤳𞤮 𞤻𞤢𞤱𞤵 𞤼𞤭𞥅𞤯𞤵𞤲𞥋𞤺𞤵 𞤪𞤢𞥄𞤩𞤢𞤴𞤲𞤺𞤵 𞤴𞤭𞤥𞤩𞤫 𞤫 𞤳𞤵𞤤𞥆𞤫 (𞤦𞤢𞥄𞤯𞤭) 𞤸𞤫𞤩𞤮𞤪𞤢𞤴𞤲𞤺𞤵 𞤲𞤺𞤭𞤤𞤳𞤵 𞤉𞤦𞤮𞤤𞤢𞥄. 𞤐𞤺𞤵𞥅 𞤻𞤢𞤱𞤵 𞤪𞤢𞥄𞤩𞤢𞤴 𞤲𞤮 𞤴𞤢𞥄𞤱𞤭𞤪𞤭⹁ 𞤲𞤺𞤵 𞤱𞤢𞤪𞤢𞤴 𞤳𞤢𞤣𞤭 𞤲𞤮 𞤴𞤢𞥄𞤱𞤭𞤪𞤭 𞤑𞤌𞤐𞤌 𞤲𞤺𞤵 𞤱𞤢𞥄𞤱𞤫𞤼𞤫 𞤬𞤢𞤣𞥆𞤫𞥅𞤣𞤫.
𞤖𞤮𞤤 𞤲𞤮 𞤲𞤺𞤵 𞤶𞤢𞥄𞤤𞤮𞤪𞤼𞤢؟
𞤌𞥅𞤺𞤭𞤪𞤣𞤫 𞤲𞤺𞤭𞤤𞤳𞤵 𞤲𞤺𞤵𞤲 𞤢𞤲𞤣𞤢𞥄𞤳𞤢⹁ 𞤲𞤮 𞤲𞤺𞤵 𞤬𞤫𞥅𞤻𞤭𞤪𞤭 𞤫 𞤴𞤭𞤥𞤩𞤫 𞤩𞤫𞤲 𞤳𞤢 𞤢𞤪𞤢𞤲𞤣𞤫⹁ 𞤢𞤲𞤣𞤢𞥄𞤳𞤢 𞤳𞤢𞤣𞤭. 𞤑𞤮 𞤸𞤢𞤧𞤭𞥅 𞤳𞤮𞤲⹁ 𞤲𞤫𞤯𞥆𞤮 𞤥𞤮 𞤲𞤺𞤵 𞤢𞤣𞤮𞤼𞤮𞥅 𞤮𞤲 𞤪𞤢𞥄𞤩𞤵𞤣𞤫⹁ 𞤸𞤢𞤪𞤢𞤴 𞤼𞤢𞤳𞥆𞤮𞤲’𞤣𞤭𞤪 𞤫 𞤳𞤵𞤤𞥆𞤫 𞤻𞤢𞤱𞤵𞤯𞤫.
𞤒𞤭𞤥𞤩𞤫 𞤲𞤮 𞤪𞤢𞥄𞤩𞤭𞤪𞤢 𞤲𞤺𞤵𞥅 𞤻𞤢𞤱𞤵 𞤧𞤮 𞤩𞤫 𞤼𞤢𞤳𞥆𞤮𞤲𞥋𞤣𞤭𞤪𞤭𞥅 𞤫 𞤧𞤫𞤤𞤦𞤢𞤲 𞤴𞤵𞤨𞥆𞤮𞤼𞤮𞥅𞤯𞤢𞤲 𞤫 𞤩𞤢𞤤𞤲𞤣𞤵 𞤻𞤢𞤱𞤵𞤯𞤮⹁ 𞤱𞤢𞤲𞤮 𞤰𞤭𞥅𞤰𞤢𞤲⹁ 𞤼𞤵𞥅𞤼𞤢⹁ 𞤦𞤵𞤼𞥆𞤭⹁ 𞤷𞤮𞥅𞤬𞤫⹁ 𞤤𞤢𞤳𞥆𞤫𞤪𞤫⹁ 𞤫𞤳𞤲𞤯.
𞤐𞤺𞤵𞥅 𞤻𞤢𞤱𞤵 𞤲𞤮 𞤶𞤢𞥄𞤤𞤮𞤪𞤢 𞤥𞤫𞥅𞤥𞤵𞤺𞤮𞤤 𞤨𞤭𞥅𞤶𞤭 𞤱𞤢𞤲𞤮 𞤥𞤫𞤧𞤫𞤤𞥆𞤫⹁ 𞤯𞤭 𞤼𞤢𞤱𞤢𞤼𞤢 𞤲𞤮 𞤥𞤮𞤣𞥆𞤭𞤪𞤭 𞤴𞤵𞤨𞥆𞤮𞤼𞤮𞥅𞤯𞤢𞤲 𞤪𞤢𞥄𞤩𞤢𞥄𞤯𞤢𞤲.
𞤑𞤮 𞤸𞤢𞤳𞥆𞤵𞤲’𞤣𞤫 𞤦𞤢𞤤𞤯𞤫 𞥒 𞤫 𞤦𞤢𞤤𞤯𞤫 𞥑𞥒 𞤲𞤺𞤵 𞤱𞤮𞥅𞤬𞤮𞤼𞤮𞥅.
𞤖𞤮𞤤 𞤳𞤮 𞤱𞤮𞤲𞤭 𞤥𞤢𞥄𞤲𞤣𞤫𞥅𞤶𞤭 𞤫 𞤧𞤭𞤬𞥆𞤢𞥄𞤶𞤭 𞤥𞤢𞤺𞥆𞤵؟
- 𞤔𞤮𞤲𞤼𞤫
- 𞤼𞤵𞥅𞤪𞤫
- 𞤷𞤢𞤪𞤼𞤮𞤤 𞤥𞤢𞥄 𞤣𞤮𞤺𞤵 𞤪𞤫𞥅𞤣𞤵
- 𞤻𞤢𞥄𞤯𞤵𞤺𞤮𞤤 𞤳𞤮𞤲𞤮𞤲𞥋𞤣𞤮𞤤
- 𞤥𞤵𞥅𞤧𞤵 𞤶𞤮𞤳𞥆𞤵𞤤𞤫
- 𞤥𞤵𞥅𞤧𞤵 𞤪𞤫𞥅𞤣𞤵
- 𞤥𞤵𞥅𞤧𞤵 𞤸𞤮𞥅𞤪𞤫
- 𞤬𞤫𞤯𞥆𞤭𞤪𞤫𞥅𞤣𞤫 𞤱𞤢 𞤬𞤫𞤼𞤢𞥄𞤯𞤮
- 𞤑𞤫𞤲𞤫𞤲⹁ 𞤲𞤮 𞤴𞤭𞤫𞥅 𞤫 𞤴𞤮𞤺𞤢𞥄 𞤫 𞤲𞤢𞤱𞤲𞤵𞤩𞤫 𞤩𞤫𞤲: 𞤊𞤵𞤻𞥆𞤵𞤺𞤮𞤤⹁ 𞤱𞤮𞤶𞥆𞤵𞤺𞤮𞤤 𞤺𞤭𞤼𞤫⹁ 𞤤𞤭𞤰𞥆𞤫𞤪𞤫 𞤫 𞤼𞤵𞤰𞥆𞤭𞤪𞤺𞤮𞤤 𞤦𞤵𞤣𞥆𞤫 𞤩𞤢𞤤𞤲𞤣𞤵 𞤲𞤣𞤵𞤲.
𞤖𞤮𞤤 𞤲𞤮 𞤲𞤺𞤵 𞤬𞤢𞤣𞥆𞤮𞤪𞤼𞤫𞥅؟
- 𞤑𞤮 𞤩𞤮𞤪𞤲𞤢𞤺𞤮𞤤 𞤤𞤮𞥅𞤧𞤮𞤤⹁ 𞤫 𞤺𞤭𞥅𞤪𞤯𞤫⹁ 𞤫 𞤹𞤵𞤬𞥆𞤮𞤤 𞤬𞤭𞥅 𞤲𞤮 𞤱𞤮𞤯𞤮𞤪𞤢 𞤼𞤢𞤳𞥆𞤮𞤲𞥋𞤣𞤭𞤪𞤺𞤮𞤤 𞤫 𞤧𞤫𞤤𞤦𞤢𞤲 𞤩𞤢𞤤𞤲𞤣𞤵 𞤻𞤢𞤱𞤵𞤯𞤮 𞤉𞤦𞤮𞤤𞤢𞥄 𞤥𞤢𞥄 𞤥𞤢𞥄𞤴𞤭𞤪𞤯𞤮 𞤉𞤦𞤮𞤤𞤢𞥄.
- 𞤑𞤢𞤤𞤢 𞤧𞤮𞤺𞤭𞤼𞤢𞥄𞤯𞤮 𞤲𞤮 𞤱𞤮𞤲𞤣𞤭 𞤫 𞤉𞤦𞤮𞤤𞤢𞥄⹁ 𞤲𞤮 𞤸𞤢𞥄𞤲𞤢𞥄 𞤲𞤢𞤩𞤫𞥅𞤣𞤫 𞤳𞤭𞤧𞤢𞤲 𞤳𞤢 𞤻𞤢𞤱𞤲𞤣𞤭𞤪𞤣𞤵 𞤩𞤵𞤪𞤲𞤣𞤵 𞤩𞤢𞤣𞤢𞥄𞤣𞤫 𞤬𞤭𞥅 𞤲𞤮 𞤮 𞤼𞤮𞤨𞥆𞤭𞤼𞤮𞤪𞤫𞥅 𞤳𞤢 𞤻𞤢𞤱𞤲𞤣𞤭𞥅𞤺𞤵. 𞤒𞤭𞤥𞤩𞤫 𞤶𞤭𞤤𞥆𞤮𞤲𞤣𞤭𞤪𞤩𞤫 𞤫 𞤻𞤢𞤱𞤵𞤯𞤮 𞤮𞤲 𞤲𞤮 𞤸𞤢𞥄𞤲𞤢𞥄 𞤯𞤢𞤩𞥆𞤭𞤼𞤫𞥅𞤣𞤫⹁ 𞤰𞤫𞥅𞤱𞤼𞤫𞥅⹁ 𞤪𞤫𞤬𞤼𞤭 𞤩𞤫 𞤢𞤴𞤲𞤭𞤼𞤫𞥅 𞤲𞤮 𞤼𞤫𞤲𞤼𞤭𞤪𞤭.
- 𞤒𞤭𞤥𞤩𞤫 𞤥𞤢𞥄𞤴𞤭𞤪𞤩𞤫 𞤻𞤢𞤱𞤵 𞤉𞤦𞤮𞤤𞤢𞥄 𞤲𞤺𞤵𞤲 𞤸𞤢𞥄𞤲𞤢𞥄𞤳𞤢 𞤥𞤫𞥅𞤥𞤫𞥅𞤣𞤫 𞤧𞤭 𞤱𞤮𞤲𞤢𞥄 𞤱𞤮𞤲𞤣𞤵𞤣𞤫 𞤫 𞤩𞤮𞤪𞤲𞤢𞤼𞤫𞥅𞤶𞤭 𞤣𞤢𞤯𞤭𞤼𞤮𞤪𞤯𞤭 𞤴𞤫𞤯𞥆𞤵𞤯𞤭⹁ 𞤩𞤫 𞤵𞤦𞥆𞤫𞥅 𞤳𞤢𞤣𞤭 𞤲𞤮 𞤴𞤢𞥄𞤱𞤭𞤪𞤭.
- 𞤅𞤢𞤬𞤪𞤮𞤪𞤣𞤫 𞤩𞤵𞤪𞤲𞤣𞤫 𞤩𞤢𞤣𞤢𞥄𞤣𞤫 𞤲𞤣𞤫𞤲 𞤲𞤮 𞤸𞤢𞥄𞤲𞤢𞥄 𞤢𞤲𞤣𞤭𞤲𞤫𞥅𞤣𞤫 𞤬𞤭𞥅 𞤩𞤫𞤲 𞤧𞤮𞤺𞤭𞤼𞤢𞥄𞤩𞤫 𞤲𞤮 𞤱𞤮𞤲𞤣𞤭 𞤫 𞤉𞤦𞤮𞤤𞤢𞥄.
- 𞤅𞤮𞤺𞤭𞤼𞤢𞥄𞤩𞤫 𞤲𞤮 𞤱𞤮𞤲𞤣𞤭 𞤫 𞤉𞤦𞤮𞤤𞤢𞥄 𞤲𞤮 𞤸𞤢𞥄𞤲𞤢𞥄 𞤼𞤫𞤤𞤲𞤫𞥅𞤣𞤫 𞤱𞤢𞤤𞥆𞤢 𞤱𞤮𞤯𞥆𞤭𞤲𞤫𞥅 𞤫 𞤩𞤫𞤴𞤢 𞤻𞤢𞤱𞤵𞤩𞤫⹁ 𞤩𞤫 𞤼𞤮𞤨𞥆𞤭𞤼𞤫𞥅 𞤫 𞤩𞤢𞥄𞤱𞤮 𞤸𞤫𞥅𞤣𞤮.
- 𞤘𞤮𞤤𞥆𞤢𞤴𞤩𞤫 𞤫 𞤻𞤢𞤱𞤲𞤣𞤮𞤪𞤯𞤫 𞤯𞤫𞤲 𞤬𞤮𞤬⹁ 𞤲𞤮 𞤸𞤢𞥄𞤲𞤢𞥄 𞤢𞤲𞤣𞤭𞤲𞤫𞥅𞤣𞤫 𞤧𞤭𞤬𞤢𞥄𞤶𞤭 𞤲𞤺𞤵𞥅 𞤻𞤢𞤱𞤵 𞤫 𞤦𞤮𞤤𞤭 𞤶𞤢𞥄𞤤𞤮𞤪𞤯𞤭 𞤥𞤢𞤺𞥆𞤵. 𞤉𞤩𞤫 𞤸𞤢𞥄𞤲𞤢𞥄 𞤼𞤫𞤲𞤼𞤭𞤲𞤢𞤲𞤫𞥅𞤣𞤫 𞤪𞤫𞥅𞤲𞤢𞤺𞤮𞤤 𞤬𞤫𞤱𞤲𞤣𞤮 𞤳𞤵𞥅𞤯𞤫 𞤪𞤵𞤺𞥆𞤭𞥅𞤯𞤫 𞤱𞤢𞤲𞤮 𞤷𞤵𞤳𞥆𞤵𞤺𞤮𞤤⹁ 𞤥𞤢𞥄 𞤯𞤵𞤲 𞤶𞤭𞥅𞤩𞤵𞤺𞤮𞤤 𞤰𞤭𞥅𞤰𞤢𞤲 𞤥𞤢𞤤𞥆𞤢 𞤳𞤮 𞤴𞤵𞤨𞥆𞤮𞤼𞤮𞥅 𞤫 𞤩𞤢𞤤𞤲𞤣𞤵 𞤲𞤫𞤯𞥆𞤮 𞤮𞤲⹁ 𞤱𞤢𞤤𞥆𞤢 𞤼𞤵𞤥𞤨𞤢𞥄𞤪𞤵 𞤷𞤮𞥅𞤬𞤫 𞤫 𞤢𞥄𞤤𞤢𞤸𞤮𞤴 𞤧𞤭𞥅𞤩𞤮𞤪𞤳𞤮𞤴. 𞤑𞤢𞤤𞤢 𞤺𞤮𞤤𞥆𞤢𞤴𞤯𞤮 𞤫 𞤻𞤢𞤱𞤲𞤣𞤮𞤪𞤯𞤫⹁ 𞤲𞤮 𞤸𞤢𞥄𞤲𞤭𞤣𞤭 𞤫 𞤤𞤮𞥅𞤧𞤮𞤤⹁ 𞤫 𞤹𞤵𞤬𞥆𞤮𞤤 𞤫 𞤤𞤫𞤥𞤦𞤵 𞤳𞤢𞤻𞤵𞤲 𞤫 𞤺𞤭𞥅𞤪𞤯𞤫. 𞤀𞥄𞤤𞤢𞥄𞤶𞤭 𞤣𞤢𞤯𞤭𞤼𞤮𞤪𞤯𞤭⹁ 𞤯𞤭 𞤸𞤢𞤱𞤳𞤫𞤼𞤢𞥄𞤳𞤫 𞤯𞤭𞤲 𞤲𞤮 𞤸𞤢𞥄𞤲𞤢𞥄 𞤤𞤢𞤩𞥆𞤭𞤲𞤫𞥅𞤣𞤫 𞤬𞤮𞤼𞤢 𞤧𞤭 𞤯𞤭 𞤸𞤵𞥅𞤱𞤼𞤮𞤪𞤫𞥅 𞤳𞤢𞤣𞤭.
- 𞤐𞤺𞤵𞥅 𞤻𞤢𞤱𞤵 𞤲𞤮 𞤶𞤢𞥄𞤤𞤮𞤪𞤢 𞤳𞤢𞤣𞤭 𞤥𞤫𞥅𞤥𞤵𞤺𞤮𞤤 𞤳𞤮 𞤥𞤮𞤣𞥆𞤭 𞤫 𞤤𞤭𞤲𞤷𞤫 𞤥𞤢𞤤𞥆𞤢 𞤫 𞤲𞤣𞤢𞤯𞥆𞤵𞤤𞤭 𞤣𞤢𞤲𞤳𞤭 𞤻𞤢𞤱𞤵𞤯𞤮 𞤮𞤲. 𞤍𞤭𞤲 𞤲𞤮 𞤸𞤢𞥄𞤲𞤢𞥄 𞤤𞤢𞤩𞥆𞤭𞤲𞤫𞥅𞤣𞤫 𞤧𞤭 𞤯𞤭 𞤸𞤵𞥅𞤱𞤼𞤮𞤪𞤫𞥅 𞤳𞤢𞤣𞤭.
- 𞤐𞤮 𞤱𞤢𞤯𞥆𞤭𞥅 𞤳𞤮𞤯𞤮𞥅𞤤𞤭⹁ 𞤯𞤭 𞤻𞤢𞤱𞤵 𞤉𞤦𞤮𞤤𞤢𞥄 𞤲𞤢𞥄𞤼𞤭 𞤫 𞤥𞤵𞤵𞤲⹁ 𞤢𞤲𞤣𞤭𞤲𞤺𞤮𞤤 𞤴𞤭𞤥𞤩𞤫 𞤩𞤫𞤲 𞤧𞤭𞤬𞤢𞥄𞤶𞤭 𞤥𞤢𞤺𞥆𞤵 𞤫 𞤫𞤩𞥆𞤮𞥅𞤶𞤫 𞤸𞤫𞤻𞥆𞤭𞤪𞤯𞤫 𞤲𞤺𞤵⹁ 𞤱𞤢𞤲𞤮 𞤲𞤮 𞤥𞤢𞥄𞤴𞤩𞤫 𞤩𞤫𞤲 𞤵𞤦𞥆𞤭𞤪𞤼𞤫𞥅 𞤲𞤮𞤲. 𞤃𞤢𞥄𞤴𞤭𞤪𞤩𞤫 𞤉𞤦𞤮𞤤𞤢𞥄 𞤲𞤮 𞤸𞤢𞥄𞤲𞤢𞥄 𞤵𞤦𞥆𞤫𞥅𞤣𞤫 𞤲𞤮 𞤴𞤢𞥄𞤱𞤭𞤪𞤭 𞤫 𞤸𞤮𞥅𞤪𞤫 𞤳𞤭𞤧𞤢𞤤.
𞤚𞤢𞤳𞥆𞤮𞤲‘𞤣𞤭𞤪𞤩𞤫 𞤩𞤫𞤲
- 𞤐𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤥𞤫𞥅𞤥𞤵𞤺𞤮𞤤 𞤰𞤭𞥅𞤰𞤢𞤲 𞤥𞤢𞥄𞤯𞤵𞤲 𞤳𞤮 𞤴𞤵𞤨𞥆𞤮𞤼𞤮𞥅 𞤫 𞤩𞤢𞤤𞤲𞤣𞤵 𞤻𞤢𞤱𞤵𞤯𞤮 𞤱𞤮𞤲𞤭 𞤢𞤪𞤢𞤲𞤣𞤫 𞤫 𞤳𞤮 𞤪𞤢𞥄𞤩𞤭𞤲𞤼𞤢 𞤲𞤺𞤵𞥅 𞤻𞤢𞤱𞤵⹁ 𞤲𞤮 𞤱𞤢𞤯𞥆𞤭 𞤪𞤫𞥅𞤲𞤵𞤺𞤮𞤤 𞤴𞤭𞤥𞤩𞤫 𞤧𞤮𞤷𞥆𞤮𞤲𞥋𞤣𞤭𞤪𞤩𞤫 𞤫 𞤻𞤢𞤱𞤵𞤯𞤮 𞤉𞤦𞤮𞤤𞤢𞥄. 𞤐𞤺𞤵𞤤𞤫𞥅𞤳𞤭 𞤩𞤢𞤤𞥆𞤭 𞤥𞤢𞤩𞥆𞤫 𞤯𞤭𞤲 𞤰𞤫𞥅𞤱𞤼𞤫𞥅 𞤤𞤢𞥄𞤦𞤭 𞤯𞤭𞤯𞤭 𞤫 𞤲𞤣𞤫𞤪 𞤻𞤢𞤤𞥆𞤢𞤤 𞤲𞤺𞤢𞤤. 𞤐𞤣𞤫 𞤶𞤮𞤲𞤼𞤫 𞤬𞤫𞥅𞤻𞤭𞤪𞤭 𞤫 𞤥𞤢𞤩𞥆𞤫⹁ 𞤫𞤩𞤫 𞤸𞤢𞥄𞤲𞤢𞥄 𞤱𞤢𞤤𞥆𞤭𞤲𞤫𞥅𞤣𞤫 𞤼𞤫𞤤𞤲𞤫𞥅 𞤳𞤢 𞤤𞤢𞤦𞤼𞤢𞥄𞤲𞤭 𞤳𞤭𞤧𞤢𞤲.
https://windenjangen.org/Ebola
𞤢𞤱𞤢 𞤲𞤺𞤵𞥅 𞤯𞤮𞥅 𞤳𞤢𞤣𞤭 𞤬𞤭𞥅 𞤥𞤢𞤺𞥆𞤵 𞤬𞤢𞤲𞤯𞤢𞥄 𞤲𞤢𞤲𞤭⹁ 𞤳𞤮 𞤥𞤭𞤻𞤢𞤲 𞤳𞤮𞤪𞤮𞤲𞤢𞥄 𞤲𞤮𞥅 𞤶𞤢𞤳𞤢.