𞤏𞤉𞤈𞤂𞤀𞤂 𞤖𞤌𞥅𞤈𞤉 𞤃𞤋𞤈𞥆𞤀 (𞤃𞤀𞤈𞤅)
𞤖𞤢𞤲𞤣𞤫 𞤫 𞤲𞤢𞥄𞤧𞤢𞥄𞤲𞤣𞤫 𞤻𞤢𞤤𞤲𞤣𞤫 𞥑𞥘 𞤕𞤮𞤤𞤼𞤮 𞥒𞥐𞥒𞥑⹁ 𞤱𞤫𞤪𞤤𞤢𞤤 𞤲𞤺𞤢𞤤 𞤐𞤀𞥄𞤅𞤀𞥄 (NASA) 𞤭𞤥𞥆𞤭𞤲𞤭⹁ 𞤴𞤢𞥄𞤩𞤭𞥅 𞤲𞤣𞤫𞤤𞤮 𞤼𞤵𞤤𞤩𞤫𞤪𞤫 𞤥𞤢𞤤𞥆𞤢 𞤣𞤢𞤪𞤭𞥅𞤪𞤫 𞤃𞤭𞤪𞥆𞤢 (𞤃𞤢𞤪𞤧) 𞤲𞤣𞤫𞤲. 𞤐𞤀𞥄𞤅𞤀𞥄 𞤳𞤮 𞤺𞤮𞥅𞤥𞤵 𞤤𞤢𞥄𞤥𞤵 𞤀𞤥𞤫𞤪𞤭𞤳𞤢𞥄 𞤸𞤭𞤤𞤲𞤭𞥅𞤲𞤺𞤵 𞤬𞤭𞥅 𞤱𞤫𞥅𞤴𞤮 𞤲𞤺𞤮𞤲.
𞤘𞤭𞤤𞤢 𞤳𞤢 𞤤𞤢𞥄𞤤𞤢𞤺𞤢𞤤 𞤤𞤫𞤴𞤣𞤭 𞤯𞤮𞥅 𞤸𞤫𞤩𞤭 𞤼𞤵𞤤𞤩𞤫𞤪𞤫 𞤃𞤭𞤪𞥆𞤢 𞤲𞤣𞤫𞤲⹁ 𞤲𞤮 𞤱𞤮𞤯𞥆𞤭𞤪𞤭 𞤳𞤮 𞤴𞤮𞤲𞤭 𞤸𞤢𞤳𞥆𞤵𞤲𞥋𞤣𞤫 𞤳𞤭𞤤𞤮𞤥𞤫𞥅𞤼𞤭 𞤣𞤵𞤦𞤵𞤲𞤫 𞥕𞥕 𞤫 𞤣𞤵𞤦𞤵𞤲𞤫 𞥔𞥐𞥑. 𞤑𞤮 𞤱𞤢𞤯𞤭 𞤲𞤮𞤲 𞤺𞤮𞤯𞥆𞤢𞤤 𞤲𞤺𞤢𞤤 𞤼𞤢𞤦𞤭𞤼𞤢𞥄 𞤫 𞤫𞤥𞤦𞤫𞤪𞤫 𞤱𞤮𞥅𞤼𞤫𞤪𞤫⹁ 𞤳𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤂𞤫𞤴𞤣𞤭 𞤲𞤣𞤭𞤲 𞤫 𞤃𞤭𞤪𞥆𞤢 𞤲𞤮 𞤼𞤢𞥄𞤪𞤢𞥄𞤣𞤫 𞤲𞤢𞥄𞤲𞤺𞤫 𞤲𞤺𞤫𞤲. 𞤅𞤭 𞤯𞤭 𞤢𞤪𞤭𞥅 𞤬𞤢𞥄 𞤯𞤭 𞤱𞤮𞤲𞤼𞤭𞤪𞤭 𞤧𞤫𞤲𞤺𞤮 𞤱𞤮𞥅𞤼𞤮⹁ 𞤸𞤢𞤳𞥆𞤵𞤲𞥋𞤣𞤫 𞤥𞤢𞤶𞥆𞤭 𞤪𞤢𞤩𞥆𞤭𞤯𞤢𞤴. 𞤑𞤮𞤲𞤮 𞤧𞤭 𞤯𞤭 𞤨𞤮𞥅𞤯𞤼𞤮𞤲𞥋𞤣𞤭𞤪𞤭𞥅 𞤸𞤢𞥄 𞤳𞤢𞤤𞤢 𞤫 𞤥𞤢𞤶𞥆𞤭 𞤸𞤭𞤳𞥆𞤮𞤪𞤭 𞤧𞤫𞤲𞤺𞤮 𞤲𞤢𞤲𞤺𞤫𞥅 𞤲𞤺𞤫𞤲 𞤺𞤮𞥅⹁ 𞤸𞤢𞤳𞥆𞤵𞤲𞥋𞤣𞤫 𞤥𞤢𞤶𞥆𞤭 𞤩𞤵𞤪𞤼𞤢𞤴 𞤱𞤮𞤯𞥆𞤵𞤣𞤫.
𞤐𞤺𞤢𞤤 𞤱𞤫𞤪𞤤𞤢𞤤 𞤭𞤲𞥆𞤢𞥄𞤲𞤺𞤢𞤤 (Perseverence) 𞤥𞤢𞤤𞥆𞤢 𞤁𞤵𞥅𞤥𞤢𞥄𞤪𞤫⹁ 𞤳𞤮 𞤪𞤮𞤱𞤢𞤲𞤭 𞤫 𞤃𞤮𞤪𞤧𞤮 𞥒𞥐𞥒𞥐⹁ 𞤐𞤀𞥄𞤅𞤀𞥄 𞤬𞤫𞤪𞤭𞥅 𞤲𞤺𞤢𞤤 𞤳𞤢 𞤱𞤫𞥅𞤴𞤮. 𞤯𞤵𞤥 𞤩𞤢𞤣𞤭𞤳𞤫 𞤤𞤫𞤦𞥆𞤭 𞤶𞤫𞥅𞤯𞤭𞤯𞤭. 𞤑𞤮 𞤳𞤢𞤲𞤺𞤢𞤤 𞤼𞤭𞤥𞥆𞤭𞤲𞤭 𞤶𞤮𞤱𞤭 𞤱𞤫𞤪𞤤𞤫 𞤯𞤫 𞤐𞤀𞥄𞤅𞤀𞥄 𞤼𞤫𞤤𞥆𞤭𞤲𞤭 𞤸𞤮𞥅𞤪𞤫 𞤃𞤭𞤪𞥆𞤢⹁ 𞤳𞤮𞤲𞤮 𞤳𞤮 𞤁𞤵𞥅𞤥𞤢𞥄𞤪𞤫 𞤩𞤵𞤪𞤭 𞤥𞤵𞥅𞤼𞤢𞥄𞤣𞤫 𞤫 𞤻𞤫𞥅𞤻𞤮⹁ 𞤩𞤵𞤪𞤭 𞤳𞤢𞤣𞤭 𞤱𞤮𞤲𞤣𞤵𞤣𞤫 𞤫 𞤢𞥄𞤤𞤢𞥄𞤶𞤭 𞤱𞤭𞤯𞤼𞤮𞤪𞤯𞤭.
𞤊𞤢𞥄𞤲𞤣𞤢𞥄𞤪𞤫 𞤲𞤺𞤢𞤤 𞤱𞤫𞤪𞤤𞤢𞤤 𞤸𞤮𞥅𞤪𞤫 𞤃𞤭𞤪𞥆𞤢⹁ 𞤳𞤮 𞤶𞤢𞥄𞤦𞤢𞤺𞤮𞤤 𞤤𞤢𞤲𞤣𞤫 𞤴𞤮𞤱𞤭𞤼𞤭𞥅𞤯𞤫 𞤫 𞤨𞤫𞤰𞥆𞤮𞤤 𞤚𞤵𞤤𞤩𞤫𞤪𞤫 𞤃𞤭𞤪𞥆𞤢 𞤲𞤣𞤫𞤲⹁ 𞤫 𞤲𞤣𞤢𞥄𞤪𞤵𞤺𞤮𞤤 𞤧𞤭 𞤼𞤢𞤱𞤭𞥅 𞤳𞤮 𞤱𞤵𞥅𞤪𞤭𞥅 𞤪𞤫𞤱𞤭𞥅𞤲𞤮 𞤸𞤮𞥅𞤪𞤫 𞤥𞤢𞤴𞤪𞤫. 𞤑𞤮 𞤩𞤫𞤴𞤣𞤭𞥅 𞤫 𞤯𞤵𞤥⹁ 𞤳𞤮 𞤲𞤣𞤢𞥄𞤪𞤵𞤺𞤮𞤤 𞤳𞤢𞤣𞤭 𞤲𞤮 𞤴𞤭𞤥𞤩𞤫 𞤲𞤢𞤩𞤭𞤪𞤫𞥅 𞤼𞤮𞤲 𞤳𞤮 𞤴𞤵𞤪𞤲𞤭𞤼𞤮𞥅 𞤲𞤣𞤫.
𞤑𞤮 𞤫 𞤢𞤴𞤲𞤣𞤫 𞤱𞤭𞤫𞤼𞤫𞥅𞤲𞤣𞤫 𞤔𞤫𞥅𞤧𞤫𞤪𞤮𞥅⹁ 𞤸𞤭𞤳𞥆𞤮𞤪𞤲𞤣𞤫 𞤻𞤢𞥄𞤥𞤲𞤢𞥄𞤲𞤺𞤫 𞤃𞤭𞤪𞥆𞤢⹁ 𞤲𞤣𞤫 𞤴𞤢𞥄𞤲𞤶𞤫𞥅𞤲𞤣𞤭 𞤥𞤵𞤲 𞤱𞤮𞤲𞤭 𞤳𞤭𞤤𞤮𞤥𞤫𞥅𞤼𞤭 𞥔𞥕⹁ 𞤱𞤫𞤪𞤤𞤢𞤤 𞤁𞤵𞥅𞤥𞤢𞥄𞤪𞤫 𞤼𞤫𞤤𞥆𞤭𞥅. 𞤏𞤭𞤯𞤼𞤮𞥅𞤩𞤫 𞤩𞤫𞤲 𞤲𞤮 𞤱𞤭𞤭 𞤥𞤢𞥄𞤲𞤣𞤫𞥅𞤶𞤭 𞤲𞤮 𞤱𞤮𞥅𞤣𞤭 𞤺𞤮𞥅𞤲𞤺𞤭𞤲𞤯𞤭 𞤱𞤮𞤲𞤣𞤫𞤥𞤢 𞤢𞤣𞤮 𞤸𞤢𞤲𞤣𞤫⹁ 𞤸𞤢𞤪𞤭 𞤳𞤮 𞤷𞤢𞥄𞤲𞤺𞤮𞤤 𞤭𞤤𞤢𞤴𞤲𞤮𞥅 𞤫 𞤳𞤢𞤲 𞤲𞤺𞤢𞤴𞤳𞤢. 𞤑𞤮 𞤫 𞤲𞤣𞤫𞤲 𞤢𞤴𞤲𞤣𞤫 𞤯𞤮𞤲 𞤥𞤢𞤤𞥆𞤢 𞤲𞤺𞤢𞤴𞤳𞤢⹁ 𞤁𞤵𞥅𞤥𞤢𞥄𞤪𞤫 𞤸𞤮𞤷𞥆𞤢𞤼𞤢 𞤳𞤢𞥄𞤰𞤫⹁ 𞤼𞤵𞤬𞤢 𞤯𞤫 𞤬𞤭𞥅 𞤼𞤢𞤧𞤳𞤢𞤺𞤮𞤤 𞤲𞤣𞤢𞥄𞤪𞤢𞥄 𞤧𞤭 𞤴𞤭𞤢𞤴 𞤦𞤢𞤯𞤼𞤫 𞤲𞤺𞤵𞥅𞤪𞤲𞤣𞤢𞤥 𞤫 𞤲𞤣𞤭𞤴𞤢𞤥 𞤸𞤮𞥅𞤪𞤫 𞤃𞤭𞤪𞥆𞤢. 𞤏𞤫𞤪𞤤𞤢𞤤 𞤲𞤺𞤢𞤤 𞤰𞤫𞤼𞥆𞤢𞤴 𞤳𞤢𞤣𞤭 𞤲𞤢𞤼𞤫 𞤯𞤵𞥅𞤯𞤵𞤯𞤫 𞤲𞤫𞤤𞤣𞤢 𞤤𞤫𞤴𞤣𞤭 𞤲𞤣𞤭𞤲 𞤳𞤮 𞤺𞤮𞤤𞥆𞤮𞥅𞤩𞤫 𞤐𞤀𞥄𞤅𞤀𞥄 𞤩𞤫𞤲 𞤼𞤢𞤧𞤳𞤮𞥅 𞤬𞤭𞥅 𞤩𞤫𞤴𞤣𞤢𞤺𞤮𞤤 𞤫 𞤢𞤲𞤣𞤵𞤺𞤮𞤤 𞤃𞤭𞤪𞥆𞤢. 𞤏𞤫𞤪𞤤𞤢𞤤 𞤲𞤺𞤢𞤤 𞤰𞤫𞤼𞥆𞤢𞤴 𞤳𞤢𞤣𞤭 𞤸𞤭𞤼𞤮𞥅𞤶𞤭 𞤯𞤭 𞤲𞤺𞤢𞤤 𞤲𞤢𞤲𞤢𞤼𞤢 𞤸𞤮𞥅𞤪𞤫 𞤃𞤭𞤪𞥆𞤢 𞤲𞤫𞤤𞤣𞤢𞤲𞤢 𞤤𞤫𞤴𞤣𞤭 𞤲𞤣𞤭𞤲.
𞤐𞤺𞤢𞤤 𞤱𞤫𞤪𞤤𞤢𞤤 𞤲𞤮 𞤱𞤮𞤲𞤣𞤭 𞤳𞤢𞤣𞤭 𞤫 𞤏𞤮𞤥𞤦𞤮𞥅𞤱𞤫𞤤 𞤱𞤭𞥅𞤪𞤢𞤴𞤲𞤺𞤫𞤤 𞤭𞤲𞥆𞤢𞥄𞤲𞤺𞤫𞤤 (Ingeniuty) 𞤥𞤢𞤤𞥆𞤢 𞤙𞤫𞥅𞤻𞤢𞤤. 𞤐𞤣𞤫 𞤼𞤢𞤱𞤵𞤲𞤮𞥅 𞤱𞤫𞤪𞤤𞤢𞤤 𞤲𞤺𞤢𞤤 𞤲𞤮 𞤻𞤫𞥅𞤺𞤭 𞤧𞤢𞤦𞤵 𞤳𞤮 𞤃𞤫𞥅𞤼𞤭 (𞤥𞤫𞥅𞤼𞤫𞤪𞤢𞥄𞤶𞤭) 𞤼𞤫𞥅𞤥𞤫𞤯𞥆𞤫 𞤼𞤵𞤲 𞤲𞤺𞤢𞤤 𞤣𞤮𞤺𞤢𞤼𞤢 𞤫 𞤻𞤢𞤤𞥆𞤢𞤤⹁ 𞤱𞤮𞤥𞤦𞤮𞥅𞤱𞤢𞤤 𞤲𞤺𞤢𞤤 𞤳𞤢𞤲 𞤲𞤮 𞤱𞤢𞥄𞤱𞤭 𞤱𞤢𞤯𞤵𞤣𞤫 𞤩𞤵𞤪𞤭 𞤯𞤵𞤥 𞤲𞤮 𞤴𞤢𞥄𞤱𞤭𞤪𞤭.
𞤉 𞤸𞤭𞤼𞤢𞥄𞤲𞤣𞤫 𞥒𞥐𞥑𞥒⹁ 𞤐𞤀𞥄𞤅𞤀𞥄 𞤲𞤢𞤩𞤵𞤲𞤮 𞤱𞤫𞤪𞤤𞤢𞤤 𞤺𞤮𞥅 𞤱𞤭𞤫𞤼𞤫𞥅 𞤲𞤺𞤢𞤤 𞤑𞤵𞤥𞤨𞤢 (Curiosity). 𞤑𞤮𞤲𞤮 𞤳𞤮 𞤁𞤵𞥅𞤥𞤢𞥄𞤪𞤫 𞤩𞤵𞤪𞤭 𞤥𞤢𞤱𞤲𞤵𞤣𞤫. 𞤑𞤮 𞤣𞤵𞤶𞤵𞤲𞤫 𞤼𞤢𞤼𞤭 𞤣𞤢𞤤𞤢 (𞤥𞤭𞤤𞤭𞤴𞤢𞤪 𞤼𞤢𞤼𞤭$) 𞤲𞤺𞤢𞤤 𞤭𞤥𞥆𞤭𞤲𞤢𞤤 𞤁𞤵𞥅𞤥𞤢𞥄𞤪𞤫 𞤶𞤢𞤪𞤢𞤼𞤢. 𞤐𞤦𞤵𞤤𞥆𞤢𞥄𞤪𞤭 𞤫 𞤳𞤮𞤷𞥆𞤵𞥅𞤪𞤭 𞤳𞤮 𞤲𞤺𞤢𞤤 𞤥𞤮𞥅𞤩𞤢𞤼𞤢 𞤸𞤮𞥅𞤪𞤫 𞤃𞤭𞤪𞥆𞤢 𞤸𞤫𞤱𞤼𞤭𞤼𞤭𞥅 𞤳𞤢 𞤤𞤫𞤴𞤣𞤭 𞤥𞤫𞤫𞤲 𞤱𞤮𞥅 𞤸𞤫𞤣𞥆𞤫 𞤸𞤭𞤼𞤢𞥄𞤲𞤣𞤫 𞥒𞥐𞥓𞥐.
𞤑𞤮 𞤸𞤭𞤳𞥆𞤢 𞤯𞤮𞥅 𞤳𞤢𞤣𞤭 𞤼𞤭𞤥𞥆𞤢𞤼𞤢 𞤣𞤵𞥅𞤩𞤭 𞥕𞥒⹁ 𞤺𞤭𞤤𞤢 𞤐𞤭𞥅𞤤 𞤀𞤥𞤧𞤼𞤪𞤮𞤲𞤺 𞤴𞤢𞥄𞤩𞤭𞤪𞤭 𞤼𞤫𞤨𞥆𞤫𞤪𞤫 𞤥𞤵𞤵𞤲 𞤸𞤮𞥅𞤪𞤫 𞤤𞤫𞤱𞤪𞤵 𞤲𞤣𞤵𞤲. 𞤍𞤵𞤥 𞤳𞤮 𞤻𞤢𞤤𞤲𞤣𞤫 𞥒𞥐 𞤃𞤮𞤪𞤧𞤮 𞥑𞥙𞥖𞥙 𞤱𞤢𞤯𞤵𞤲𞤮𞥅.
𞤘𞤢𞤲𞤣𞤢𞤤 𞤳𞤮 𞤲𞤢𞤩𞤢𞤼𞤢 𞤯𞤮𞤲 𞤲𞤫𞤯𞥆𞤮 𞤳𞤮 𞤢𞤤𞤤𞤢𞥄𞤸𞤵 𞤮𞤲 𞤼𞤵𞤲 𞤢𞤲𞤣𞤭 𞤭𞤼𞥆𞤭𞤪𞤭 𞤥𞤵𞤲⹁ 𞤳𞤮 𞤯𞤵𞤲 𞤲𞤦𞤢𞤯𞤭 𞤥𞤭𞤯𞤮 𞤲𞤦𞤭𞤢 𞤫𞤲 𞤴𞤮 𞤫𞤲 𞤩𞤵𞤪𞤼𞤵 𞤱𞤢𞤳𞥆𞤭𞤤𞤢𞥄𞤣𞤫 𞤬𞤭𞥅 𞤴𞤮 𞤫𞤲 𞤴𞤢𞥄𞤣𞤵 𞤫 𞤢𞤣𞤵𞤲𞤢 𞤥𞤮 𞤸𞤫𞤩𞤼𞤢𞥄𞤪𞤫 𞤫 𞤩𞤢𞤲𞤼𞤢𞤤 𞤱𞤢𞥄𞤱𞤢𞥄 𞤱𞤮𞤲𞤣𞤫 𞤩𞤢𞥄𞤱𞤮 𞤺𞤢𞤲𞤣𞤢𞤤. 𞤮𞤲 𞤶𞤢𞥄𞤪𞤢𞥄𞤥𞤢 𞤮𞤲 𞤲𞤦𞤫𞤤𞤼𞤢𞤲𞤢𞥄𞤥𞤢 𞤱𞤭𞤲𞤣𞤢𞤲𞤣𞤫 𞤲𞤣𞤫𞤲 𞤲𞤮 𞤱𞤭𞤲𞤣𞤭𞥅 𞤬𞤫𞤱.
𞤑𞤢𞤤𞤢 𞤥𞤫𞤲 𞤼𞤭𞥅𞤯𞤲𞤮 𞤲𞤺𞤢𞤩𞥆𞤭𞤲’𞤣𞤮𞥅.
𞤏𞤢𞤳𞥆𞤭𞤤𞤢𞥄𞤪𞤫 𞤳𞤮 𞤳𞤢𞥄𞤬𞤢 𞤀𞤤𞤤𞤢 𞤳𞤢 𞤥𞤫𞤼𞥆𞤢𞤼𞤢𞥄
HAMIDOU Dicko