𞤃𞤀𞤑𞤈𞤌𞤐 𞤗𞤋𞤈𞥆𞤋𞤚𞤋𞤑𞤉 𞤊𞤀𞤈𞤀𞤐𞤅𞤋 𞤐𞤌 𞤊𞤉𞤂𞤐𞤋𞥅 𞤉 𞤏𞤀𞤈𞤏𞤀𞤈𞤌 𞤐𞤘𞤌𞤐 𞤈𞤓𞤏𞤀𞤐𞤁𞤀

𞤉𞤥𞤢𞤲𞤵𞤴𞤫𞤤 𞤃𞤢𞤳𞤪𞤮𞤲⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤊𞤢𞤪𞤢𞤲𞤧𞤭 𞤲𞤣𞤭𞤲⹁ 𞤹𞤭𞤪𞥆𞤭𞤼𞤭𞤳𞤫 𞤱𞤮𞤲𞤣𞤫𞤥𞤢 𞤤𞤫𞤴𞤣𞤭 𞤥𞤢𞤳𞥆𞤮 𞤲𞤣𞤭𞤲 𞤲𞤮 𞤶𞤮𞤺𞤭𞥅 𞤬𞤫𞤤𞤮𞥅𞤪𞤫 𞤫 𞤲𞤦𞤢𞤪𞤤𞤫 (𞤶𞤫𞤲𞤮𞤧𞤭𞤣) 𞤱𞤢𞤯𞤵𞤯𞤫 𞤈𞤵𞤱𞤢𞤲𞤣𞤢 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥔. 𞤊𞤭𞥅 𞤳𞤢𞤤𞤢 𞤮 𞤼𞤮𞤪𞤭𞤳𞤫 𞤴𞤢𞥄𞤬𞤫𞥅𞤣𞤫⹁ 𞤳𞤮𞤲𞤮 𞤮 𞤶𞤢𞤩𞤢𞥄𞤤𞤭 𞤶𞤫𞥅𞤶𞤵𞤣𞤫 𞤫 𞤴𞤢𞥄𞤬𞤭𞤲𞤢𞥄𞤣𞤫 𞤫 𞤭𞤲𞤣𞤫 𞤤𞤫𞤴𞤣𞤭 𞤊𞤢𞤪𞤢𞤲𞤧𞤭 𞤲𞤣𞤭𞤲.
𞤑𞤮 𞤫 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤳𞤢 𞤃𞤢𞥄𞤲𞤣𞤭𞤼𞤮𞤪𞤣𞤫 𞤐𞤦𞤢𞤪𞤤𞤫 𞤑𞤭𞤺𞤢𞤤𞤭⹁ 𞤳𞤢 𞤴𞤭𞤥𞤩𞤫 𞥒𞥕𞥐 𞥐𞥐𞥐 𞤵𞤦𞥆𞤢𞥄. 𞤑𞤮 𞤩𞤵𞤪𞤭 𞤴𞤭𞤥𞤩𞤫 𞤵𞤶𞤵𞤲𞤫 𞤼𞤫𞥅𞤥𞤫𞤯𞤫 𞤲𞤶𞤫𞥅𞤼𞤢𞤼𞤮 (𞥘𞥐𞥐 𞥐𞥐𞥐) 𞤶𞤫𞤴𞤢𞥄𞤩𞤫 𞤫 𞤤𞤫𞤻𞤮𞤤 𞤚𞤵𞤼𞤧𞤭𞥅 𞤲𞤺𞤮𞤤 𞤱𞤮𞤲𞤭 𞤳𞤮 𞤥𞤵𞤪𞤼𞤵𞤩𞤫 𞤶𞤫𞤴𞤢𞥄𞤩𞤫 𞤫 𞤤𞤫𞤻𞤮𞤤 𞤖𞤵𞤼𞤵 𞤲𞤺𞤮𞤤 𞤱𞤢𞤪𞤵𞤲𞤮𞥅 𞤫 𞤲𞤣𞤫𞤪 𞤦𞤢𞤤𞤯𞤫 𞤼𞤫𞥅𞤥𞤫𞤣𞤫𞤪𞤫 𞤨𞤫𞤼.
𞤐𞤦𞤢𞤪𞤤𞤫 𞤯𞤫𞤲 𞤳𞤮 𞤻𞤢𞤤𞤲𞤣𞤫 𞥗 𞤅𞤫𞥅𞤯𞤼𞤮 𞥑𞥙𞥙𞥔 𞤬𞤵𞤯𞥆𞤭𞤲𞤮𞥅 𞤦𞤭𞤥𞤦𞤭 𞤻𞤢𞤤𞤲𞤣𞤫 𞤔𞤵𞤾𞤫𞤲𞤢𞤤 𞤖𞤢𞤦𞤭𞤴𞤢𞤪𞤢𞤥𞤢 𞤱𞤢𞤪𞤢𞤲𞤮𞥅. 𞤑𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤸𞤮𞥅𞤪𞤫𞥅𞤶𞤮 𞤈𞤵𞤱𞤢𞤲𞤣𞤢 𞤮𞤲 𞤮𞤲𞤼𞤵𞤥𞤢⹁ 𞤳𞤮 𞤫 𞤤𞤫𞤻𞤮𞤤 𞤖𞤵𞤼𞤵 𞤲𞤺𞤮𞤤 𞤮 𞤶𞤫𞤴𞤢𞤲𞤮𞥅. 𞤑𞤮 𞤴𞤭𞤥𞤩𞤫 𞤲𞤺𞤮𞤤 𞤤𞤫𞤻𞤮𞤤 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤈𞤵𞤱𞤢𞤲𞤣𞤢. 𞤑𞤮 𞤫 𞤥𞤢𞤺𞥆𞤮𞤤 𞤳𞤢𞤣𞤭 𞤼𞤵𞤪𞤼𞤵𞤩𞤫 𞤱𞤢𞤪𞤮𞥅𞤩𞤫 𞤩𞤫𞤲 𞤶𞤫𞤴𞤢𞤲𞤮𞥅. 𞤐𞤦𞤢𞤪𞤤𞤫 𞤯𞤫𞤲 𞤢𞤷𞥆𞤵𞤣𞤫 𞤱𞤮𞥅 𞤻𞤢𞤤𞤲𞤣𞤫 𞥑𞥕 𞤃𞤮𞤪𞤧𞤮 𞥑𞥙𞥙𞥔⹁ 𞤲𞤣𞤫 𞤚𞤵𞤼𞤧𞤭𞥅𞤩𞤫 𞤩𞤫𞤲 𞤶𞤫𞤴𞤢𞥄𞤩𞤫 𞤫 𞤬𞤫𞤣𞥆𞤫 𞤆𞤮𞤤 𞤑𞤢𞤺𞤢𞤥𞤫 𞤶𞤢𞤩𞤼𞤵𞤲𞤮𞥅 𞤤𞤫𞤴𞤣𞤭 𞤲𞤣𞤭𞤲 𞤬𞤮𞤨.
𞤊𞤫𞤱𞤲𞤣𞤮 𞤯𞤫𞥅 𞤲𞤦𞤢𞤪𞤤𞤫 𞤱𞤢𞤯𞤢𞤴𞤲𞤮𞥅 𞤈𞤵𞤱𞤢𞤲𞤣𞤢⹁ 𞤸𞤢𞤪𞤭 𞤸𞤮𞤲𞤮𞥅𞤩𞤫 (𞤧𞤮𞥅𞤪𞤭𞥅𞤩𞤫) 𞤊𞤢𞤪𞤢𞤲𞤧𞤭 𞤩𞤫𞤲 𞤲𞤮 𞤣𞤢𞥄𞤳𞤭𞥅 𞤈𞤵𞤱𞤢𞤲𞤣𞤢⹁ 𞤳𞤮𞤲𞤮 𞤩𞤫 𞤸𞤢𞤯𞤢𞥄𞤲𞤮 𞤥𞤵𞤪𞤼𞤵𞤩𞤫 𞤸𞤵𞤼𞤵𞥅𞤩𞤫 𞤩𞤫𞤲 𞤫 𞤱𞤢𞤪𞤱𞤢𞤪𞤮 𞤲𞤺𞤮𞤲. 𞤑𞤮 𞤴𞤢𞤤𞤼𞤭𞤲𞤺𞤮𞤤 𞤴𞤭𞤥𞤩𞤫 𞤥𞤢𞤩𞥆𞤫 𞤩𞤫𞤲 𞤲𞤣𞤫𞤪 𞤈𞤵𞤱𞤢𞤲𞤣𞤢⹁ 𞤩𞤫 𞤸𞤭𞤤𞤲𞤭𞤲𞤮𞥅. 𞤑𞤮 𞤲𞤢𞤩𞤵𞤲𞤮𞥅 𞤩𞤫𞤲 𞤊𞤢𞤪𞤢𞤧𞤭𞥅𞤩𞤫 𞤼𞤮𞤲⹁ 𞤳𞤮 𞤱𞤢𞤤𞥆𞤭𞤼𞤢𞤺𞤮𞤤 𞤤𞤢𞥄𞤥𞤵 𞤖𞤢𞤦𞤭𞤴𞤢𞤪𞤢𞤥𞤢 𞤲𞤺𞤵𞤲 𞤣𞤢𞤪𞤼𞤢𞤺𞤮𞤤 𞤬𞤫𞤣𞥆𞤫 𞤑𞤢𞤺𞤢𞤥𞤫 𞤲𞤣𞤫𞤲 𞤬𞤭𞥅 𞤱𞤮𞤼𞤢 𞤫𞤲𞤺𞤫𞤤𞤫 𞤸𞤫𞤩𞤵 𞤣𞤮𞥅𞤤𞤫 𞤈𞤵𞤱𞤢𞤲𞤣𞤢 𞤫 𞤣𞤮𞤱 𞤊𞤢𞤪𞤢𞤲𞤧𞤭. 𞤅𞤢𞤦𞤵 𞤸𞤢𞤩𞤮𞥅𞤩𞤫 𞤆𞤮𞤤 𞤑𞤢𞤺𞤢𞤥𞤫𞥅 𞤩𞤫𞤲 𞤳𞤮 𞤓𞤺𞤢𞤲𞤣𞤢𞥄 𞤭𞤱𞤪𞤵𞤲𞤮𞥅. 𞤐𞤣𞤭𞤲 𞤤𞤫𞤴𞤣𞤭 𞤤𞤫⹁ 𞤳𞤮 𞤱𞤮𞤲𞤵𞤲𞤮𞥅𞤲𞤣𞤭 𞤫 𞤤𞤫𞤴 𞤳𞤢𞤪𞤢𞤸𞤢𞤲𞤳𞤢𞥄𞤳𞤵 𞤉𞤲𞤺𞤫𞤤𞤫.
𞤃𞤢𞤳𞤪𞤮𞤲⹁ 𞤫 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢⹁ 𞤊𞤢𞤪𞤢𞤲𞤧𞤭 𞤲𞤢𞤲𞤢𞤲𞤢𞥄𞤲𞤮 𞤲𞤶𞤫𞤪𞤼𞤭𞤲𞤮𞥅𞤩𞤫 𞤩𞤫𞤲 𞤬𞤢𞥄𞤣𞤫 𞤫 𞤲𞤦𞤢𞤪𞤤𞤫 𞤧𞤢𞥄𞤼𞤭𞤲𞤢𞤲𞤢𞤲𞤮𞥅𞤯𞤫 𞤚𞤵𞤼𞤧𞤭𞥅𞤩𞤫 𞤩𞤫𞤲. 𞤑𞤮𞤲𞤮 𞤮 𞤱𞤭𞤭⹁ 𞤊𞤢𞤪𞤢𞤲𞤧𞤭 𞤼𞤢𞤱𞤢𞤲𞤮𞥅𞤳𞤢 𞤫 𞤲𞤦𞤢𞤪𞤤𞤫 𞤯𞤫𞤲.
𞤆𞤮𞤤 𞤑𞤢𞤺𞤢𞤥𞤫 𞤫 𞤶𞤢𞥄𞤦𞤢𞤱𞤮𞤤 𞤥𞤢𞤳𞥆𞤮⹁ 𞤸𞤮𞤤𞥆𞤭 𞤮𞤥𞤮 𞤱𞤫𞤤𞤼𞤮𞤪𞤭 𞤸𞤢𞥄𞤤𞤢 𞤃𞤢𞤳𞤪𞤮𞤲 𞤳𞤢𞤲⹁ 𞤧𞤢𞤦𞤵 “𞤳𞤮𞤲𞤺𞤵𞤯𞤭 𞤥𞤢𞤳𞥆𞤮 𞤯𞤭𞤲 𞤲𞤮 𞤩𞤵𞤪𞤭 𞤴𞤢𞥄𞤬𞤭𞤲𞤢𞤺𞤮𞤤 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤯𞤭 𞤺𞤮𞥅𞤲𞤺𞤢.”
𞤊𞤭𞥅 𞤳𞤢𞤤𞤢 𞤃𞤢𞤳𞤪𞤮𞤲 𞤱𞤢𞤯𞤭𞥅 𞤳𞤮 𞤸𞤮𞥅𞤪𞤫𞥅𞤶𞤮 𞤊𞤢𞤪𞤢𞤲𞤧𞤭 𞤱𞤢𞤯𞤢𞥄𞤤𞤭 𞤸𞤢𞥄 𞤸𞤢𞤲𞤣𞤫⹁ 𞤣𞤫𞤲𞤼𞤫 𞤦𞤢𞤺𞤢𞤲𞤮𞥅𞤩𞤫 𞤩𞤫𞤲 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤩𞤫 𞤱𞤫𞤤𞤼𞤮𞤪𞤢𞥄𞤤𞤭 𞤢𞤲𞤺𞤢𞤤 𞤴𞤢𞥄𞤬𞤭𞤲𞤢𞤺𞤮𞤤 𞤤𞤢𞥄𞤩𞤵𞤲𞥋𞤺𞤮𞤤 𞤫 𞤭𞤲𞤣𞤫 𞤊𞤢𞤪𞤢𞤲𞤧𞤭.
𞤑𞤮 𞤸𞤢𞤲𞤳𞤭 𞤫 𞤲𞤢𞥄𞤧𞤢𞥄𞤲𞤣𞤫⹁ 𞤻𞤢𞤤𞤲𞤣𞤫 𞥒𞥗 𞤁𞤵𞥅𞤶𞤮 𞥒𞥐𞥒𞥑⹁ 𞤃𞤢𞤳𞤪𞤮𞤲 𞤢𞤪𞤭 𞤈𞤵𞤱𞤢𞤲𞤣𞤢. 𞤑𞤮𞤲𞤮 𞤢𞤪𞤣𞤵 𞤥𞤢𞤳𞥆𞤮 𞤶𞤭𞤻𞤭𞤲𞤢𞥄𞤤𞤭 𞤳𞤢 𞤤𞤢𞥄𞤥𞤮𞤪𞤣𞤫 𞤑𞤭𞤺𞤢𞤤𞤭. 𞤖𞤢𞤴 𞤤𞤭𞥅𞤤𞤭𞤱𞤢𞤤 (𞤪𞤢𞥄𞤴𞤢) 𞤊𞤢𞤪𞤢𞤲𞤧𞤭 𞤲𞤺𞤢𞤤 𞤱𞤫𞥅𞤩𞤭𞤼𞤢𞥄𞤳𞤢 𞤲𞤮 𞤤𞤭𞥅𞤤𞤭𞥅𞤶𞤫 𞤱𞤮𞥅𞤱𞤭𞤪𞤭 𞤱𞤫𞥅𞤩𞤭𞤼𞤭𞤪𞤫𞥅𞤣𞤫 𞤧𞤭 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤶𞤢𞤲𞤢𞤲𞤭𞤪𞤭 𞤲𞤮 𞤶𞤵𞥅𞤪𞤢𞥄𞤣𞤫 𞤑𞤭𞤺𞤢𞤤𞤭.
𞤍𞤵𞥅𞤯𞤵𞤩𞤫 𞤫 𞤈𞤵𞤱𞤢𞤲𞤣𞤢𞥄𞤩𞤫 𞤩𞤫𞤲⹁ 𞤼𞤫𞤲𞤼𞤭𞤲𞤭𞥅 𞤚𞤵𞤼𞤧𞤭𞥅𞤩𞤫 𞤩𞤫𞤲 𞤲𞤮 𞤼𞤭𞤳𞥆𞤢𞤲𞤭 𞤊𞤢𞤪𞤢𞤲𞤧𞤭. 𞤖𞤭𞤩𞤫 𞤼𞤵𞥅𞤥𞤭 𞤊𞤢𞤪𞤢𞤲𞤧𞤭 𞤼𞤢𞤱𞤫𞤺𞤮𞤤 𞤫 𞤲𞤦𞤢𞤪𞤤𞤫 𞤯𞤫𞤲 𞤳𞤢𞤻𞤵𞤲 𞤫 𞤼𞤮𞥅𞤤𞤲𞤵𞤺𞤮𞤤 𞤼𞤢𞤱𞤢𞤲𞤮𞥅𞤩𞤫 𞤫 𞤯𞤫𞤲 𞤲𞤦𞤢𞤪𞤤𞤫⹁ 𞤣𞤮𞤺𞤵𞤩𞤫 𞤬𞤢𞥄𞤦𞤼𞤭𞤲𞤮𞤴𞤭𞥅 𞤊𞤢𞤪𞤢𞤲𞤧𞤭. 𞤑𞤮 𞤯𞤵𞤥 𞤱𞤢𞤯𞤭 𞤦𞤵𞤴 𞤲𞤮 𞤸𞤢𞤦𞥆𞤮𞤪𞤲𞤮𞥅 𞤃𞤢𞤳𞤪𞤮𞤲 𞤶𞤫𞥅𞤶𞤵𞤺𞤮𞤤 𞤫 𞤴𞤢𞥄𞤬𞤭𞤲𞤢𞤺𞤮𞤤 𞤫 𞤭𞤲𞤣𞤫 𞤊𞤢𞤪𞤢𞤲𞤧𞤭 𞤧𞤢𞤦𞤵 𞤳𞤮 𞤬𞤢𞤪𞤢𞤲𞤧𞤭 𞤸𞤵𞥅𞤱𞤵𞤲𞤮𞥅 𞤳𞤮𞤲 𞤈𞤵𞤱𞤢𞤲𞤣𞤢.
𞤊𞤭𞥅 𞤳𞤢𞤤𞤢 𞤈𞤵𞤱𞤢𞤲𞤣𞤢 𞤳𞤮 𞤤𞤫𞤴𞤣𞤭 𞤬𞤢𞤥𞤯𞤵𞤲𞥋𞤣𞤭 𞤶𞤫𞤴𞤢𞤲𞤮𞥅𞤲𞤣𞤭 𞤫 𞤤𞤫𞤴𞤯𞤫 𞤩𞤵𞤪𞤵𞤯𞤫 𞤱𞤢𞥄𞤧𞤵𞤣𞤫 𞤫 𞤼𞤢𞤥𞤨𞤵𞤣𞤫 𞤀𞤬𞤪𞤭𞤳𞤢𞥄⹁ 𞤳𞤮 𞤳𞤢𞤴𞤪𞤭 𞤱𞤮𞤲𞤵𞤲𞤮𞥅 𞤼𞤢𞤼𞤢𞤩𞤭𞤪𞤭 𞤫 𞤧𞤮𞥅𞤣𞤵𞤺𞤮𞤤 𞤶𞤮𞤺𞤫 𞤱𞤢𞤤𞥆𞤢 𞤢𞥄𞤤𞤢𞥄𞤶𞤭 𞤫 𞤲𞤣𞤫𞤪 𞤀𞤬𞤪𞤭𞤳𞤢𞥄 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥔. 𞤑𞤮 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤫 𞤯𞤫𞤲 𞤶𞤮𞤺𞤫⹁ 𞤳𞤮 𞤊𞤢𞤪𞤢𞤲𞤧𞤭 𞤭𞤱𞤪𞤢𞤴𞤲𞤮𞥅. 𞤑𞤮 𞤊𞤢𞤪𞤢𞤲𞤧𞤭 𞤱𞤮𞤲𞤵𞤲𞤮𞥅 𞤳𞤢𞤭 𞤱𞤢𞤤𞥆𞤭𞤼𞤢𞥄𞤣𞤫 𞤤𞤢𞥄𞤥𞤵 𞤖𞤢𞤦𞤭𞤴𞤢𞤪𞤢𞤥𞤢𞥄 𞤲𞤺𞤵𞤲 𞤸𞤢𞤩𞤵𞤺𞤮𞤤 𞤚𞤵𞤼𞤧𞤭𞥅𞤩𞤫 𞤩𞤫𞤲.
𞤐𞤣𞤫 𞤩𞤫 𞤧𞤮𞤵𞤲𞤮𞥅 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤖𞤵𞤼𞤵𞥅𞤩𞤫 𞤩𞤫𞤲 𞤲𞤮 𞤫𞤩𞥆𞤭 𞤥𞤵𞤤𞤵𞤺𞤮𞤤 𞤚𞤵𞤼𞤧𞤭𞥅𞤩𞤫 𞤩𞤫𞤲⹁ 𞤩𞤫 𞤲𞤶𞤫𞤪𞤼𞤭𞤲𞤢𞥄𞤤𞤭⹁ 𞤩𞤫 𞤸𞤢𞤯𞤢𞥄𞤤𞤭. 𞤖𞤢𞤴 𞤀𞤥𞤫𞤪𞤭𞤳𞤢𞥄 𞤲𞤮 𞤸𞤵𞤥𞤨𞤭𞤼𞤭𞤲𞤮𞥅 𞤬𞤭𞥅 𞤱𞤢𞤪𞤱𞤢𞤪𞤮 𞤲𞤺𞤮 𞤖𞤵𞤼𞤵𞥅𞤩𞤫 𞤩𞤫𞤲 𞤫𞤩𞥆𞤵𞤲𞤮𞥅⹁ 𞤳𞤮𞤲𞤮 𞤩𞤫 𞤸𞤵𞤤𞤭 𞤵𞤳𞥆𞤭𞤼𞤢𞥄𞤣𞤫 𞤧𞤢𞤦𞤵 𞤄𞤭𞤤 𞤑𞤭𞤤𞤭𞤲𞤼𞤮𞤲 𞤲𞤮 𞤸𞤵𞤤𞤵𞤲𞤮𞥅 𞤱𞤮𞤼𞤢 𞤸𞤫𞤩𞤵 𞤳𞤮𞤲𞤵 𞤀𞤥𞤫𞤪𞤭𞤳𞤢𞥄 𞤲𞤺𞤵𞤲 𞤳𞤮 𞤸𞤫𞤩𞤵𞤲𞤮𞥅 𞤲𞤺𞤵 𞤳𞤮𞤲 𞤃𞤵𞤹𞤢𞤣𞤭𞤧𞤮⹁ 𞤅𞤮𞤥𞤢𞤤𞤭𞤴𞤢𞥄. 𞤑𞤢𞤥𞤩𞤫 𞤳𞤢𞤣𞤭 𞤢𞥄𞤲𞤣𞤫 𞤥𞤢𞤩𞥆𞤫 𞤬𞤮𞤨 𞤮𞤲𞤼𞤵𞤥𞤢 𞤳𞤮 𞤲𞤮 𞤩𞤫 𞤴𞤢𞤤𞤼𞤭𞤲𞤭𞤪𞤢 𞤴𞤭𞤥𞤩𞤫 𞤥𞤢𞤩𞥆𞤫 𞤩𞤫𞤲 𞤲𞤣𞤫𞤪 𞤈𞤵𞤱𞤢𞤲𞤣𞤢. 𞤑𞤮𞤲𞤮 𞤤𞤭𞤣𞥆𞤵 𞤊𞤢𞤪𞤢𞤲𞤧𞤭⹁ 𞤄𞤭𞤤 𞤑𞤤𞤭𞤲𞤼𞤮𞤲 𞤸𞤮𞤤𞥆𞤵𞤲𞤮 𞤲𞤭𞤥𞤧𞤫 𞤦𞤢𞤯𞤼𞤢𞤲𞤫 𞤱𞤢𞤪𞤱𞤢𞤪𞤮 𞤲𞤺𞤮𞤲⹁ 𞤮 𞤽𞤭𞤪𞥆𞤭𞤼𞤭𞥅 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤀𞤥𞤫𞤪𞤭𞤳𞤢𞥄 𞤲𞤮 𞤱𞤢𞥄𞤱𞤵𞤲𞤮𞥅 𞤱𞤢𞤯𞤵𞤣𞤫 𞤳𞤮 𞤯𞤵𞥅𞤯𞤭 𞤬𞤭𞥅 𞤬𞤢𞥄𞤦𞤢𞤺𞤮𞤤 𞤴𞤭𞤥𞤩𞤫 𞤩𞤫𞤲.
𞤘𞤭𞤤𞤢 𞥒𞥐𞥑𞥐⹁ 𞤸𞤢𞤪𞤭 𞤸𞤮𞥅𞤪𞤫𞥅𞤶𞤮 𞤊𞤢𞤪𞤢𞤲𞤧𞤭 𞤴𞤢𞤸𞤢𞥄𞤤𞤭 𞤈𞤵𞤱𞤢𞤲𞤣𞤢. 𞤘𞤭𞤤𞤢 𞤲𞤦𞤢𞤪𞤤𞤫 𞤯𞤫𞤲 𞤱𞤢𞤯𞤵𞤲𞤮𞥅 𞤫 𞥑𞥙𞥙𞥔⹁ 𞤳𞤮 𞤫 𞥒𞥐𞥑𞥐 𞤲𞤣𞤫 𞤅𞤢𞤪𞤳𞤮𞥅𞥁𞤭 𞤴𞤢𞤸𞤵𞤲𞤮𞥅 𞤼𞤮𞤲⹁ 𞤱𞤮𞤲𞤭 𞤢𞤪𞤢𞤲𞤵𞤲 𞤴𞤮 𞤸𞤮𞥅𞤪𞤫𞥅𞤶𞤮 𞤊𞤢𞤪𞤢𞤲𞤧𞤭𞤫𞤲 𞤴𞤢𞤸𞤵 𞤈𞤵𞤱𞤢𞤲𞤣𞤢 𞤫 𞤤𞤢𞥄𞤥𞤵 𞤑𞤢𞤺𞤢𞤥𞤫.
𞤘𞤭𞤤𞤢 𞤑𞤢𞤺𞤢𞤥𞤫 𞤶𞤮𞥅𞤯𞤭𞥅 𞤳𞤢 𞤤𞤢𞥄𞤥𞤵⹁ 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤲𞤺𞤢𞤤 𞤵𞤴𞤼𞤭𞥅 𞤬𞤮𞤼𞤢 𞤸𞤢𞤳𞥆𞤵𞤲𞥋𞤣𞤫 𞤊𞤢𞤪𞤢𞤲𞤧𞤭 𞤫 𞤈𞤵𞤱𞤢𞤲𞤣𞤢. 𞤖𞤢𞤴 𞤯𞤫𞤲𞤺𞤢𞤤 𞤊𞤢𞤪𞤢𞤲𞤧𞤭 𞤢𞤷𞥆𞤭𞤼𞤢𞥄 𞤸𞤵𞥅𞤱𞤼𞤮𞤪𞤮𞥅𞤣𞤫 𞤳𞤢 𞤤𞤢𞥄𞤥𞤵. 𞤉 𞤸𞤭𞤼𞤢𞥄𞤲𞤣𞤫 𞥒𞥐𞥐𞥘⹁ 𞤈𞤵𞤱𞤢𞤲𞤣𞤢 𞤭𞤼𞥆𞤭 𞤸𞤢𞤴 𞤶𞤢𞤲𞤺𞤵𞤺𞤮𞤤 𞤊𞤢𞤪𞤢𞤲𞤧𞤭 𞤳𞤢 𞤣𞤵𞤯𞤫. 𞤑𞤮 𞤫 𞥒𞥐𞥑𞥘 𞤸𞤢𞥄𞤤𞤢 𞤊𞤢𞤪𞤢𞤲𞤧𞤭 𞤳𞤢𞤲 𞤢𞤪𞤼𞤭𞤪𞤢𞥄 𞤫 𞤣𞤵𞤯𞤫 𞤯𞤫𞤲⹁ 𞤳𞤢 𞤱𞤢𞤯𞤢𞥄 𞤱𞤮𞥅𞤼𞤢 𞤫 𞤯𞤫𞤥𞤯𞤫 𞤶𞤢𞤲𞤺𞤫𞤼𞤫𞥅𞤯𞤫 𞤯𞤫𞤲 𞤳𞤮𞤲𞤮 𞤱𞤮𞤲𞤢𞥄 𞤳𞤢 𞤶𞤢𞤲𞤺𞤭𞤪𞤼𞤫𞥅𞤳𞤢 𞤸𞤢𞤲𞤣𞤫 𞤳𞤢𞤣𞤭. 𞤔𞤮𞥅𞤲𞤭 𞤳𞤮 𞤫 𞤉𞤲𞤺𞤫𞤤𞤫⹁ 𞤳𞤢𞤻𞤵𞤲 𞤫 𞤑𞤭𞤲-𞤴𞤢𞤪𞤱𞤢𞤲𞤣𞤢 𞤧𞤵𞤳𞤢𞥄𞤩𞤫 𞤩𞤫𞤲 𞤶𞤢𞤲𞤺𞤭𞤲𞤼𞤫𞥅 𞤫 𞤥𞤵𞤵𞤲. 𞤔𞤮𞥅𞤲𞤭⹁ 𞤳𞤮 𞤳𞤭𞤲-𞤴𞤢𞤪𞤱𞤢𞤲𞤣𞤢 𞤱𞤮𞤲𞤭 𞤸𞤢𞥄𞤤𞤢 𞤲𞤺𞤫𞤲𞤣𞤭𞤴𞤢𞤲𞤳𞤮𞤱𞤢 𞤳𞤢𞤲 𞤈𞤵𞤱𞤢𞤲𞤣𞤢.