𞤖𞤀𞤔𞥆𞤓 𞤐𞤘𞤓𞤐 𞤖𞤋𞤑𞥆𞤀

𞤑𞤮 𞤫 𞤪𞤫𞤬𞤦𞤭𞥅𞤪𞤫 𞤻𞤢𞤤𞤲𞤣𞤫 𞥑𞥘 𞤃𞤮𞤪𞤧𞤮 𞥒𞥐𞥒𞥑⹁ 𞤸𞤢𞤶𞥆𞤵 𞤲𞤺𞤵𞤲 𞤬𞤵𞤯𞥆𞤢𞤼𞤢 𞤼𞤮 𞤧𞤢𞤸𞤪𞤫 𞤃𞤢𞤳𞥆𞤢. 𞤔𞤵𞥅𞤤𞤣𞤫𞥅𞤪𞤫 𞤣𞤮𞤲𞤳𞤭𞤲 𞤲𞤣𞤫𞤲 𞤳𞤮 𞤻𞤢𞤤𞤲𞤣𞤫 𞥒𞥐 𞤃𞤮𞤪𞤧𞤮.

𞤖𞤢𞤶𞥆𞤵 𞤲𞤺𞤵𞤲 𞤳𞤮 𞤼𞤵𞤺𞤮𞤤𞤢𞤤 𞤺𞤮𞥅𞤼𞤢𞤤 𞤫 𞤼𞤵𞤺𞤢𞥄𞤤𞤫 𞤋𞤧𞤤𞤢𞥄𞤥𞤵 𞤯𞤫𞤲 𞤶𞤮𞤱𞤭. 𞤐𞤮 𞤱𞤢𞤯𞥆𞤭𞤲𞤢𞤲𞤢𞥄 𞤳𞤢𞤤𞤢 𞤶𞤵𞥅𞤤𞤯𞤮 𞤴𞤢𞤸𞤵𞤺𞤮𞤤 𞤃𞤢𞤳𞥆𞤢 𞤶𞤵𞥅𞤪𞤮𞥅 𞤧𞤵𞥅𞤣𞤵 𞤑𞤢𞥄𞤦𞤢 𞤲𞤣𞤵𞤲 𞤧𞤮 𞤼𞤢𞤱𞤭𞥅 𞤮𞤲𞤼𞤭𞤺𞤭 𞤲𞤮 𞤥𞤢𞤪𞤭 𞤲𞤦𞤢𞤱𞤳𞤭 𞤥𞤵𞤵𞤲. 𞤍𞤵𞤥 𞤳𞤮 𞤴𞤮 𞤼𞤢𞤱𞤵 𞤤𞤢𞥄𞤱𞤮𞤤 𞤲𞤮 𞤱𞤫𞥅𞤩𞤭⹁ 𞤮𞤲𞤼𞤭𞤺𞤭 𞤲𞤮 𞤥𞤢𞤪𞤭 𞤳𞤮 𞤢𞤷𞥆𞤢𞤲𞤢 𞤩𞤫𞤴𞤲𞤺𞤵𞥅𞤪𞤫 𞤥𞤵𞤵𞤲 𞤫 𞤲𞤶𞤮𞥅𞤩𞤢 𞤴𞤮𞤲𞤢𞤴𞤳𞤢⹁ 𞤸𞤢𞤪𞤢 𞤳𞤢𞤣𞤭 𞤮𞤲𞤼𞤭𞤺𞤭 𞤲𞤮 𞤼𞤭𞤥𞥆𞤭𞤲𞤭 𞤷𞤫𞤤𞥆𞤢𞤤.

𞤍𞤫𞤴𞤢 𞤼𞤵𞤺𞤢𞥄𞤤𞤫 𞤲𞤢𞤴𞤭 𞤳𞤮:

𞥑 – 𞤼𞤢𞤦𞤭𞤲𞤼𞤭𞤲𞤺𞤮𞤤 𞤱𞤮𞤲𞤣𞤫𞤥𞤢 𞤸𞤢𞥄𞤲𞤣𞤵𞤯𞤮 𞤫 𞤪𞤫𞤱𞤫𞤺𞤮𞤤 𞤢𞤤𞤢𞥄 𞤧𞤮 𞤱𞤮𞤲𞤢𞥄 𞤀𞤤𞤤𞤢⹁ 𞤫 𞤼𞤢𞤦𞤭𞤲𞤼𞤭𞤲𞤺𞤮𞤤 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤃𞤵𞤸𞤢𞤥𞥆𞤢𞤣𞤵 (𞤶𞤳𞤥) 𞤳𞤮 𞤲𞤵𞤤𞤢𞥄𞤯𞤮 𞤃𞤢𞤳𞥆𞤮.

𞥒 – 𞤙𞤭𞥅𞤩𞤲𞤵𞤺𞤮𞤤 𞤶𞤵𞥅𞤤𞤣𞤫 𞤲𞤣𞤫𞤲 𞤤𞤢𞥄𞤦𞤭 𞤶𞤮𞤱𞤭 𞤻𞤢𞤤𞤲𞤣𞤫 𞤳𞤢𞤤𞤢

𞥓 – 𞤋𞤼𞥆𞤵𞥅𞤺𞤮𞤤 𞤶𞤢𞤳𞥆𞤢 𞤫 𞤶𞤢𞤲𞤱𞤲𞤣𞤭 𞤲𞤣𞤭 𞤀𞤤𞤤𞤢 𞤴𞤫𞤯𞤭 𞤮𞤲𞤼𞤭𞤺𞤭

𞥔 – 𞤖𞤮𞥅𞤪𞤵𞤺𞤮𞤤 𞤫 𞤤𞤫𞤱𞤪𞤵 𞤳𞤮𞥅𞤪𞤳𞤢 (𞤧𞤵𞥅𞤥𞤢𞤴𞤫𞥅𞤪𞤵) 𞤲𞤣𞤵𞤲

𞤑𞤮 𞤸𞤢𞤶𞥆𞤵 𞤲𞤺𞤵𞤲 𞤱𞤮𞤲𞤭 𞤼𞤵𞤺𞤢𞤤𞤢𞤤 𞤶𞤮𞤱𞤢𞤩𞤢𞤤 𞤲𞤺𞤢𞤤.

𞤑𞤮 𞤱𞤮𞥅𞤱𞤭⹁ 𞤩𞤵𞤪𞤭 𞤴𞤭𞤥𞤩𞤫 𞤣𞤵𞤦𞤵𞤲𞤫 𞤯𞤭𞤯𞤮 𞤫 𞤬𞤫𞤷𞥆𞤫𞤪𞤫 (𞤥𞤭𞤤𞤭𞤴𞤮𞤲𞤶𞤭 𞤯𞤭𞤯𞤮 𞤫 𞤬𞤫𞤷𞥆𞤫𞤪𞤫) 𞤭𞤥𞥆𞤮𞤪𞤩𞤫 𞤫 𞤷𞤮𞤩𞥆𞤭 𞤤𞤫𞤴𞤣𞤭 𞤲𞤣𞤭𞤲 𞤬𞤮𞤨 𞤬𞤮𞤼𞥆𞤢𞤴𞤲𞤮 𞤃𞤢𞤳𞥆𞤢 𞤲𞤺𞤢𞤥 𞤻𞤭𞥅𞤩𞤲𞤵𞤺𞤮𞤤 𞤲𞤺𞤢𞤤 𞤼𞤵𞤺𞤢𞤤𞤢𞤤 𞤧𞤢𞤳𞥆𞤭𞤼𞤮𞤪𞤢𞤤 𞤋𞤧𞤤𞤢𞥄𞤥𞤵.

𞤑𞤮𞤲𞤮 𞤸𞤭𞤳𞥆𞤢 𞤳𞤢𞤣𞤭⹁ 𞤧𞤢𞤦𞤵 𞤲𞤺𞤵𞥅 𞤻𞤢𞤱𞤵 𞤑𞤮𞤾𞤭𞤣-𞥑𞥙⹁ 𞤶𞤢𞤲𞤢𞤲𞤮 𞤸𞤢𞤴 𞤺𞤮𞥅𞤼𞤮 𞤲𞤫𞤱𞤲𞤢𞤲𞤢𞥄𞤳𞤢 𞤴𞤢𞤸𞤵𞤺𞤮𞤤 𞤸𞤢𞤶𞥆𞤮𞤴𞤢. 𞤑𞤮 𞤵𞤶𞤵𞤲𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮 (𞥖𞥐 𞥐𞥐𞥐) 𞤺𞤫𞤲𞤣𞤭𞤴𞤢𞤲𞤳𞤮𞥅𞤩𞤫 𞤫 𞤶𞤮𞥅𞤯𞤭𞥅𞤩𞤫 𞤅𞤢𞤱𞤵𞤣𞤭𞥅⹁ 𞤸𞤢𞤪𞤢 𞤳𞤢𞤣𞤭 𞤳𞤮 𞤬𞤢𞤣𞥆𞤭𞤼𞤭𞥅𞤩𞤫 𞤬𞤭𞥅 𞤻𞤢𞤱𞤵 𞤑𞤮𞤾𞤭𞤣 𞤲𞤺𞤵𞤲⹁ 𞤤𞤢𞥄𞤥𞤩𞤫 𞤅𞤢𞤱𞤵𞤣𞤭𞥅 𞤩𞤫𞤲 𞤣𞤵𞤽𞤭𞤲𞤢𞤲𞤭 𞤸𞤢𞤶𞥆𞤵𞤺𞤮𞤤 𞤸𞤭𞤳𞥆𞤢. 𞤖𞤢𞤪𞤢 𞤳𞤢𞤣𞤭 𞤳𞤮 𞤥𞤢𞤪𞤵𞤩𞤫 𞤺𞤭𞤤𞤢 𞤣𞤵𞥅𞤩𞤭 𞥑𞥘 𞤬𞤢𞥄 𞤣𞤵𞥅𞤩𞤭 𞥖𞥕 𞤩𞤫 𞤱𞤮𞤲𞤣𞤢𞥄 𞤫 𞤻𞤢𞤱𞤵 𞤲𞤺𞤵𞤲. 𞤈𞤮𞤱𞤢𞤲𞤭 𞤫 𞥒𞥐𞥒𞥐⹁ 𞤳𞤮 𞤵𞤶𞤵𞤲𞤫 𞥑𞥐 𞤼𞤢𞤲 𞤲𞤫𞤱𞤲𞤢𞤲𞤮𞥅 𞤸𞤢𞤶𞥆𞤵𞤺𞤮𞤤.

𞤑𞤮 𞤫 𞤈𞤫𞤬𞤦𞤭𞤪𞥆𞤫 𞤻𞤢𞤤𞤲𞤣𞤫 𞥘 𞤁𞤮𞤲𞤳𞤭𞤲 ⹁ 𞤸𞤢𞤶𞥆𞤵 𞤲𞤺𞤵𞤲 𞤬𞤵𞤯𞥆𞤢𞤼𞤢𞥄. 𞤑𞤮 𞤱𞤢𞤲𞤺𞤢𞤺𞤮𞤤 𞤧𞤵𞥅𞤣𞤵 𞤑𞤢𞥄𞤦𞤢 𞤲𞤣𞤵𞤲 𞤤𞤢𞥄𞤦𞤭 𞤶𞤫𞥅𞤯𞤭𞤯𞤭 𞤫 𞤶𞤵𞥅𞤤𞤵𞤺𞤮𞤤 𞤣𞤢𞤪𞤯𞤫 𞤯𞤭𞤯𞤭 𞤲𞤺𞤵 𞤬𞤵𞤯𞥆𞤮𞤪𞤼𞤢. 𞤑𞤮 𞤲𞤭𞥅 𞤳𞤢𞤣𞤭 𞤸𞤢𞤶𞥆𞤵 𞤲𞤺𞤵𞤲 𞤼𞤭𞤥𞥆𞤭𞤲𞤭𞤪𞤼𞤫𞥅 𞤧𞤭 𞤮𞤲𞤼𞤭𞤺𞤭 𞤱𞤢𞤴𞤲𞤭𞤼𞤮𞥅 𞤃𞤢𞤳𞥆𞤢. 𞤑𞤮 𞤫 𞤻𞤢𞤤𞤢𞥄𞤲𞤣𞤫 𞤼𞤢𞤼𞤢𞤩𞤫𞤪𞤫 𞤸𞤢𞤶𞥆𞤵 𞤲𞤺𞤵𞤲⹁ 𞤸𞤢𞤶𞥆𞤭𞤴𞤢𞤲𞤳𞤮𞥅𞤩𞤫 𞤩𞤫𞤲 𞤸𞤫𞤼𞥆𞤢𞤼𞤢 𞤤𞤢𞤴𞥆𞤢. 𞤑𞤮 𞤲𞤣𞤫𞤲 𞤻𞤢𞤤𞤲𞤣𞤫 𞤱𞤮𞤲𞤭 𞤶𞤵𞥅𞤤𞤣𞤫 𞤣𞤮𞤲𞤳𞤭𞤲. 𞤍𞤵𞤥 𞤳𞤮 𞤫 𞤃𞤢𞤱𞤦𞤢𞥄𞤪𞤫⹁ 𞤻𞤢𞤤𞤲𞤣𞤫 𞤧𞤢𞤨𞥆𞤮 𞤁𞤮𞤲𞤳𞤭𞤲 𞤥𞤢𞤤𞥆𞤢 𞥒𞥐 𞤃𞤮𞤪𞤧𞤮.