𞤄𞤀𞥄 𞤏𞤓𞥅𞤈𞤋 𞤚𞤌𞤍𞥆𞤀𞥄𞤃𞤀 𞤑𞤌 𞤀𞤈𞤁𞤌𞥅 𞤔𞤀𞥄𞤘𞤌𞤈𞤀𞤂 𞤐𞤘𞤀𞤂
𞤀𞤖𞤃𞤀𞤁𞤓 𞤏𞤓𞥅𞤈𞤋 𞤄𞤀𞥄⹁ 𞤤𞤮𞤤𞥆𞤭𞤪𞤯𞤮 𞤄𞤀𞥄 𞤏𞤓𞥅𞤈𞤋 𞤼𞤮𞤯𞥆𞤢𞥄𞤥𞤢 𞤸𞤢𞤲𞤣𞤫 𞤫 𞤃𞤢𞤱𞤦𞤢𞥄𞤪𞤫⹁ 𞤻𞤢𞤤𞤲𞤣𞤫 𞥒𞥗 𞤕𞤮𞤤𞤼𞤮 𞥒𞥐𞥒𞥔⹁ 𞤬𞤭𞥅 𞤢𞤪𞤣𞤢𞤺𞤮𞤤 𞤶𞤢𞥄𞤺𞤮𞤪𞤢𞤤 𞤳𞤫𞤧𞤢𞤤 𞤤𞤫𞤴𞤣𞤭 𞤘𞤭𞤲𞤫 𞤲𞤺𞤢𞤤. 𞤍𞤵𞤥 𞤳𞤮 𞤩𞤢𞥄𞤱𞤮 𞤔𞤵𞤲𞥆𞤭𞤼𞤢𞤤 CNRD 𞤲𞤺𞤢𞤤 𞤧𞤢𞥄𞤴𞤲𞤵𞤣𞤫 𞤶𞤢𞥄𞤺𞤮𞤪𞤢𞤤 𞤄𞤉𞤈𞤐𞤀𞥄𞤈 𞤘𞤓𞥅𞤃𞤓 𞤲𞤺𞤢𞤤.
𞤑𞤮 𞤳𞤵𞥅𞤩𞤢𞤤𞤶𞤮 𞤀𞤃𞤀𞤈𞤀 𞤑𞤀𞤃𞤀𞤈𞤀 𞤶𞤢𞤲𞤺𞤭 𞤳𞤭𞥅𞤼𞤮𞤤 𞤸𞤮𞥅𞤪𞤫𞤲𞤳𞤫𞤱𞤮𞤤 𞤲𞤺𞤮𞤤 𞤳𞤢 𞤰𞤫𞥅𞤱𞤤𞤵 𞤘𞤭𞤲𞤫. 𞤄𞤀𞥄 𞤏𞤓𞥅𞤈𞤋 𞤱𞤮𞥅𞤲𞤣𞤭𞤲𞤢𞤲𞤮𞥅𞤥𞤢.
𞤑𞤮 𞤸𞤮𞤥𞤦𞤮 𞤱𞤮𞤲𞤭 𞤄𞤢𞥄 𞤏𞤵𞥅𞤪𞤭؟
𞤄𞤢𞥄 𞤏𞤵𞥅𞤪𞤭 𞤳𞤮 𞤆𞤭𞤼𞤢 𞤲𞤣𞤫𞤪 𞤊𞤵𞥅𞤼𞤢 𞤔𞤢𞤤𞤮𞥅 𞤶𞤭𞤦𞤭𞤲𞤢𞥄⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥕𞥘. 𞤐𞤣𞤫 𞤮 𞤼𞤭𞤥𞥆𞤭𞤲𞥆𞤮𞥅 𞤣𞤵𞥅𞤩𞤭 𞤶𞤫𞥅𞤺𞤮𞤮⹁ 𞤮 𞤴𞤢𞤸𞤭𞤣𞤭 𞤫 𞤦𞤢𞥄𞤦𞤢 𞤥𞤢𞤳𞥆𞤮 𞤁𞤢𞤳𞤢𞥄𞤪⹁ 𞤳𞤢 𞤤𞤢𞥄𞤥𞤮𞤪𞤣𞤫 𞤤𞤫𞤧𞤣𞤭 𞤅𞤫𞤲𞤫𞤺𞤢𞤤.
𞤑𞤮 𞤯𞤮𞤲 𞤮 𞤬𞤵𞤯𞥆𞤭𞥅 𞤶𞤢𞤲𞤺𞤣𞤫 𞤸𞤢𞥄 𞤮 𞤼𞤭𞤥𞥆𞤭𞤲𞤭 𞤣𞤵𞤯𞤢𞤤 𞤼𞤮𞥅𞤱𞤵𞤲’𞤺𞤢𞤤 𞤲𞤺𞤢𞤤 (𞤤𞤭𞥅𞤧𞤫𞥅). 𞤇𞤢𞥄𞤱𞤮 𞤯𞤵𞤥⹁ 𞤮 𞤴𞤢𞤸𞤭 𞤶𞤢𞤲𞤺𞤵𞤺𞤮𞤤 𞤸𞤭𞥅𞤧𞤮 𞤫 𞤶𞤢𞥄𞤩𞤭-𞤸𞤢𞤼𞥆𞤭𞤪𞤣𞤫 𞤊𞤢𞤪𞤢𞤲𞤧𞤭. 𞤇𞤢𞤴𞤼𞤭 𞤮 𞤩𞤢𞥄𞤪𞤭𞥅 𞤯𞤮𞤲⹁ 𞤮 𞤱𞤮𞤲𞤭 𞤶𞤢𞤲𞤺𞤲𞤮𞥅𞤱𞤮 𞤲𞤣𞤫𞤪 𞤊𞤢𞤪𞤢𞤲𞤧𞤭 𞤣𞤵𞥅𞤩𞤭 𞤧𞤫𞥅𞤯𞤢 𞤧𞤮 𞤮 𞤴𞤭𞤤𞤼𞤭𞥅 𞤘𞤭𞤲𞤫 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫 𞤅𞤫𞥅𞤳𞤵 𞤚𞤵𞥅𞤪𞤫 𞤫 𞤸𞤭𞤼𞥆𞤢𞥄𞤲𞤣𞤫 𞥑𞥙𞥘𞥔.
𞤉 𞤸𞤭𞤼𞤢𞥄𞤲𞤣𞤫 𞥑𞥙𞥙𞥑⹁ 𞤳𞤢𞤲𞤳𞤮 𞤫 𞤄𞤀𞤑𞤀𞤈𞤋 𞤔𞤀𞤑𞤋𞤚𞤉𞥅⹁ 𞤫 𞤄𞤓𞥅𞤄𞤀𞤑𞤀𞤈 𞤔𞤀𞤂𞥆𞤌 𞤳𞤢𞤻𞤵𞤲 𞤫 𞤃𞤀𞤃𞥆𞤀𞤁𞤓 𞤄𞤀𞥄𞤁𞤋𞤑𞥆𞤌 𞤄𞤀𞥄⹁ 𞤩𞤫 𞤧𞤭𞤲𞤷𞤭𞤣𞤭 𞤬𞤫𞤣𞥆𞤫 𞤭𞤲𞥆𞤫𞤼𞤫𞥅𞤲𞤣𞤫 UFD (𞤆𞤮𞤼𞥆𞤢𞤤 𞤕𞤫𞤥𞤦𞤫 𞤁𞤫𞤥𞤮𞤳𞤢𞤪𞤢𞥄𞤶𞤫). 𞤉 𞤸𞤭𞤼𞤢𞥄𞤲𞤣𞤫 𞥑𞥙𞥙𞥗⹁ 𞤦𞤢𞤯𞤼𞤢𞤲𞤫 𞤤𞤵𞤪𞥆𞤢𞤤 𞤸𞤢𞤳𞥆𞤵𞤲𞥋𞤣𞤫 𞤩𞤫𞥅 𞤧𞤭𞤲𞤷𞤵𞤩𞤫 𞤩𞤫𞤲⹁ 𞤬𞤫𞤣𞥆𞤫 𞤲𞤣𞤫𞤲 𞤱𞤢𞤴𞤤𞤭𞥅 𞤱𞤮𞤲𞤼𞤭 UFDG 𞤫 𞤤𞤫𞤴 𞤴𞤭𞥅𞤤𞤮 𞤄𞤀𞥄 𞤏𞤓𞥅𞤈𞤋. 𞤉 𞥒𞥐𞥐𞥒⹁ UFDG 𞤼𞤮𞥅𞤤𞤲𞤭 𞤄𞤀𞥄 𞤃𞤀𞤃𞥆𞤀𞤁𞤓⹁ 𞤱𞤢𞤯𞤭 𞤥𞤮 𞤸𞤮𞥅𞤪𞤫𞥅 𞤬𞤫𞤣𞥆𞤫 𞤲𞤣𞤫𞤲⹁ 𞤄𞤀𞥄 𞤏𞤓𞥅𞤈𞤋𞥅 𞤱𞤮𞤲𞤭 𞤄𞤭𞤲𞤣𞤮 𞤥𞤢𞤱𞤯𞤮 𞤮𞤲.
𞤑𞤮 𞤫 𞤔𞤮𞤤𞤮 𞥒𞥐𞥐𞥗⹁ 𞤀𞤂𞤖𞤀𞤔𞥆𞤋 𞤅𞤉𞤂𞥆𞤓 𞤁𞤢𞤤𞤫𞤲 𞤔𞤀𞤂𞥆𞤌 𞤼𞤢𞤱𞤼𞤭 UFDG. 𞤌 𞤤𞤮𞤲𞤼𞤭𞥅 𞤄𞤢𞥄 𞤃𞤀𞤃𞥆𞤀𞤁𞤓 𞤸𞤮𞥅𞤪𞤫 𞤬𞤫𞤣𞥆𞤫 𞤲𞤣𞤫𞤲. 𞤄𞤢𞥄 𞤏𞤵𞥅𞤪𞤭 𞤱𞤢𞤯𞤢𞥄 𞤷𞤵𞤳𞥆𞤮 𞤥𞤢𞤳𞥆𞤮.
𞤀𞤪𞤣𞤵 𞤅𞤉𞤂𞥆𞤓 𞤁𞤢𞤤𞤫𞤲 𞤲𞤣𞤵𞤲 𞤩𞤫𞤴𞤣𞤢𞤲𞤭 𞤬𞤫𞤣𞥆𞤫 𞤲𞤣𞤫𞤲 𞤴𞤭𞤥𞤩𞤫 𞤫 𞤣𞤢𞤪𞤲𞤣𞤫.
𞤉 𞥒𞥐𞥐𞥘⹁ 𞤩𞤢𞥄𞤱𞤮 𞤀𞤸𞤥𞤢𞤣𞤵 𞤚𞤭𞤶𞥆𞤢𞥄𞤲 𞤅𞤵𞤱𞤢𞥄𞤪𞤫𞥅 𞤱𞤢𞤯𞤫𞥅𞤣𞤫 𞤢𞤪𞤣𞤮 𞤺𞤮𞤥𞤲𞤢𞤼𞤫𞥅𞤪𞤭 𞤘𞤭𞤲𞤫 𞤲𞤣𞤭𞤲⹁ 𞤄𞤢𞥄 𞤏𞤵𞥅𞤪𞤭 𞤼𞤮𞤯𞥆𞤢𞥄 𞤴𞤮 𞤱𞤮𞤲𞤵 𞤶𞤢𞥄𞤺𞤮𞤪𞤯𞤮 𞤥𞤢𞤤𞥆𞤢 𞤧𞤢𞤤𞤢𞤤𞤮 𞤲𞤣𞤫𞤱𞤪𞤭𞤼𞤢𞤤 (𞤥𞤮𞤰𞥆𞤭𞤲𞤼𞤭𞤲𞤮) 𞤺𞤫𞤲𞤣𞤭𞤲𞤳𞤮𞤱𞤢𞤤 𞤸𞤭𞤤𞤲𞤭𞥅𞤯𞤮 𞤬𞤭𞥅 𞤱𞤫𞤤𞤣𞤭𞤲𞤼𞤭𞤲𞤺𞤮𞤤 𞤸𞤢𞤳𞥆𞤵𞤲𞥋𞤣𞤫 𞤩𞤭𞤩𞥆𞤫 𞤤𞤫𞤴𞤣𞤭 𞤲𞤣𞤭𞤲.
𞤉 𞥒𞥐𞥑𞥑⹁ 𞤲𞤣𞤫 𞤀𞤂𞤊𞤀𞥄 𞤑𞤌𞤐𞤁𞤉 𞤼𞤵𞥅𞤥𞤵𞤲𞤮𞥅 𞤥𞤮 𞤼𞤢𞤱𞤫𞤺𞤮𞤤 𞤫 𞤬𞤢𞥄𞤤𞤢𞥄𞤩𞤫 𞤱𞤢𞤴𞤤𞤭𞤼𞤵𞤣𞤫 𞤤𞤢𞥄𞤥𞤵 𞤥𞤢𞤳𞥆𞤮 𞤲𞤺𞤵𞤲⹁ 𞤄𞤀𞥄 𞤏𞤓𞥅𞤈𞤋 𞤴𞤢𞤸𞤭 𞤬𞤢𞥄𞤦𞤼𞤭𞤲𞤮𞤴𞤭𞥅 𞤊𞤢𞤪𞤢𞤲𞤧𞤭. 𞤑𞤮 𞤼𞤮𞤲 𞤮 𞤱𞤮𞤲𞤭 𞤸𞤢𞥄 𞥒𞥐𞥑𞥕 𞤲𞤣𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤴𞤢𞥄𞤬𞤭𞤲𞤮𞥅 𞤥𞤮⹁ 𞤲𞤫𞤱𞤲𞤢𞤲𞤭 𞤥𞤮 𞤪𞤵𞤼𞥆𞤢𞤺𞤮𞤤 𞤘𞤭𞤲𞤫.
𞤐𞤣𞤫 𞤮 𞤢𞤪𞤼𞤵𞤲𞤮𞥅 𞤘𞤭𞤲𞤫⹁ 𞤤𞤵𞤪𞥆𞤢𞤤 𞤲𞤺𞤢𞤤 𞤸𞤢𞤳𞥆𞤵𞤲𞥋𞤣𞤫 𞤥𞤢𞤳𞥆𞤮 𞤫 𞤸𞤮𞥅𞤪𞤫𞥅𞤩𞤫 UFDG 𞤩𞤫𞤲 𞤩𞤫𞤴𞤣𞤭𞥅 𞤬𞤮𞤼𞤢. 𞤉 𞤥𞤭𞥅𞤶𞤮 𞤸𞤫𞥅𞤱𞤵𞤩𞤫 𞤫 𞤸𞤮𞥅𞤪𞤫𞥅𞤩𞤫 UFDG 𞤩𞤫𞤲⹁ 𞤄𞤀𞥄 𞤏𞤓𞥅𞤈𞤋 𞤲𞤮 𞤲𞤢𞤲𞤮𞤲𞥋𞤣𞤭𞤪𞤲𞤮𞥅 𞤫 𞤀𞤂𞤊𞤀𞥄 𞤑𞤌𞤐𞤁𞤉 𞤲𞤺𞤢𞤥 𞤤𞤮𞤭𞤲𞤺𞤮𞤤 𞤀𞤤𞤸𞤢𞤶𞥆𞤭 𞤅𞤉𞤂𞥆𞤓 𞤁𞤀𞤂𞤉𞤐 𞤳𞤢𞤻𞤵𞤲 𞤫 UFDG. 𞤙𞤢𞤤𞤲𞤣𞤫 𞥕 𞤕𞤮𞤤𞤼𞤮 𞥒𞥐𞥑𞥖⹁ 𞤸𞤮𞥅𞤪𞤫𞥅𞤩𞤫 UFDG 𞤩𞤫𞤲 𞤻𞤢𞥄𞤱𞤭 𞤸𞤢𞥄𞤤𞤣𞤭 𞤴𞤢𞤤𞤼𞤭𞤲𞤺𞤮𞤤 𞤥𞤮 𞤫 𞤬𞤫𞤣𞥆𞤫 𞤲𞤣𞤫𞤲.
𞤉 𞤅𞤭𞤤𞤼𞤮 𞥒𞥐𞥑𞥙⹁ 𞤄𞤢𞥄 𞤏𞤓𞥅𞤈𞤋 𞤢𞤪𞤣𞤭𞤲𞤢𞥄 𞤸𞤮𞥅𞤪𞤫 𞤬𞤫𞤣𞥆𞤫 UDD⹁ 𞤲𞤣𞤫 𞤟𞤀𞤐 𞤄𞤋𞤒𞤉𞤐𞤉𞤃𞤓 𞤖𞤀𞤄𞤀 𞤧𞤭𞤲𞤷𞤵𞤲𞤮𞥅. 𞤑𞤮𞤲𞤮 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤥𞤢𞤩𞥆𞤫 𞤩𞤮𞥅𞤴𞤢𞥄𞤲𞤮 𞤧𞤢𞤦𞤵𞤲𞤢 𞤸𞤢𞤴 𞤼𞤭𞤥𞥆𞤢𞥄𞤤𞤭 𞤸𞤭𞤼𞤢𞤲𞥋𞤣𞤫 𞤸𞤢𞤪𞤭 𞤩𞤫 𞤤𞤢𞤲𞤷𞤭𞥅. 𞤉 𞤢𞥄𞤩𞤵𞤲’𞤣𞤫⹁ 𞤻𞤢𞤤𞤲𞤣𞤫 𞥑𞥑 𞤁𞤵𞥅𞤶𞤮 𞥒𞥐𞥒𞥐⹁ 𞤄𞤀𞥄 𞤏𞤓𞥅𞤈𞤋 𞤸𞤮𞤤𞥆𞤭𞤼𞤭 𞤳𞤢 𞤼𞤮𞤲𞤺𞤮𞥅𞤣𞤫 Twitter 𞤥𞤢𞤳𞥆𞤮⹁ 𞤱𞤮𞤲𞤣𞤫𞤥𞤢 𞤮 𞤶𞤮𞤺𞤲𞤭𞤼𞤭𞥅 𞤄𞤋𞤒𞤉𞤐𞤉𞤃𞤓𞥅 𞤖𞤀𞤄𞤀 𞤭𞤲𞤣𞤫 𞤫 𞤥𞤢𞥄𞤲𞤣𞤫 𞤬𞤫𞤣𞥆𞤫 𞤥𞤵𞥅𞤲 𞤲𞤣𞤫𞤲.
𞤄𞤀𞥄 𞤏𞤓𞥅𞤈𞤋 𞤲𞤮 𞤼𞤢𞤱𞤢𞤲𞤮𞥅 𞤫 𞤩𞤵𞤪𞤵𞤩𞤫 𞤤𞤭𞤣𞥆𞤢𞥄𞤣𞤫 𞤫 𞤣𞤢𞤪𞤼𞤢𞥄𞤣𞤫 𞤤𞤢𞥄𞤥𞤵 𞤀𞤂𞤊𞤀𞥄 𞤑𞤌𞤐𞤁𞤉 𞤲𞤺𞤵𞤲. 𞤌 𞤣𞤢𞤪𞤼𞤭𞤲𞤮 𞤱𞤢𞤴𞤤𞤵𞤺𞤮𞤤 𞤁𞤮𞤧𞤼𞤫𞤪𞤫 𞤤𞤫𞤴𞤣𞤭 𞤲𞤣𞤫𞤲. 𞤅𞤢𞤺𞤮 𞤥𞤢𞤳𞥆𞤮⹁ 𞤀𞤂𞤊𞤀𞥄 𞤑𞤌𞤐𞤁𞤉 𞤻𞤭𞥅𞤩𞤲𞤢𞤴𞤲𞤮 𞤧𞤢𞤪𞤭𞤴𞤢 𞤳𞤢𞤲 𞤸𞤢𞤪𞤢 𞤮 𞤯𞤢𞤩𞥆𞤢𞥄𞤤𞤭 𞤶𞤮𞥅𞤯𞤭𞤼𞤢𞤺𞤮𞤤 𞤳𞤢 𞤶𞤵𞤤𞥆𞤫𞤪𞤫 𞤩𞤢𞥄𞤱𞤮 𞤮 𞤱𞤢𞤯𞤵𞤣𞤫 𞤣𞤵𞥅𞤩𞤭 𞤧𞤢𞤨𞥆𞤮 𞤸𞤮𞥅𞤪𞤫 𞤘𞤭𞤲𞤫.
𞤄𞤀𞥄 𞤏𞤓𞥅𞤈𞤋 𞤸𞤫𞤩𞤭𞥅 𞤳𞤮 𞤦𞤵𞤴 𞤧𞤭𞤳𞥆𞤭 𞤮𞤥𞤮 𞤯𞤢𞤩𞥆𞤵𞤣𞤫 𞤲𞤵𞤲 𞤺𞤭𞤦𞤭 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤢𞤪𞤭 𞤳𞤢 𞤤𞤢𞥄𞤥𞤵. 𞤑𞤮 𞤯𞤵𞤲 𞤱𞤢𞤯𞤭 𞤸𞤢𞤪𞤭 𞤮 𞤢𞤤𞤢𞥄 𞤽𞤭𞤻𞤭𞤪𞤣𞤫 𞤩𞤫 𞤲𞤮 𞤮 𞤢𞤲𞤣𞤭𞤪𞤢𞥄 𞤲𞤮𞤲.
𞤐𞤣𞤫 𞤼𞤢𞤱𞤵𞤲𞤮𞥅 𞤲𞤮𞤲 𞤳𞤮 𞤺𞤢𞤲𞤣𞤮⹁ 𞤴𞤭𞤯𞤢𞤲𞤯𞤮 𞤤𞤫𞤴𞤣𞤭 𞤣𞤫𞤥𞤮𞤳𞤢𞤪𞤢𞥄𞤳𞤵⹁ 𞤲𞤮 𞤸𞤢𞤧𞤭𞥅 𞤳𞤢 𞤳𞤢𞤲𞤳𞤮 𞤫 𞤧𞤮𞥅𞤪𞤭𞥅𞤩𞤫 CNRD 𞤩𞤫𞤲 𞤺𞤢𞤤𞤣𞤢 𞤳𞤢 𞤲𞤫𞥅𞤩𞤢𞥄 𞤼𞤢𞤱𞤵𞤣𞤫 𞤩𞤫𞤲 𞤱𞤮𞤲𞤭𞤪𞤢𞥄 𞤭𞤱𞤵𞤣𞤫 𞤳𞤢 𞤤𞤢𞥄𞤥𞤵 𞤲𞤮 𞤴𞤢𞥄𞤱𞤭𞤪𞤭. 𞤖𞤮𞥅𞤪𞤫 𞤯𞤵𞤲 𞤳𞤢𞤣𞤭⹁ 𞤮𞤥𞤮 𞤸𞤢𞥄𞤲𞤭 𞤪𞤫𞥅𞤲𞤼𞤢𞥄𞤣𞤫 𞤧𞤢𞤦𞤵𞤲𞤢⹁ 𞤂𞤢𞥄𞤥𞤵 𞤘𞤭𞤲𞤫 𞤲𞤣𞤫 𞤬𞤢𞥄𞤤𞤢𞥄 𞤱𞤮𞥅 𞤤𞤮𞤭𞤲𞤣𞤫 𞤲𞤫𞤯𞥆𞤮⹁ 𞤩𞤫 𞤩𞤢𞤣𞤲𞤭𞤼𞤢𞤴 𞤮𞤲𞤼𞤭𞤺𞤭.
𞤐𞤮 𞤮 𞤸𞤫𞤩𞥆𞤭𞤼𞤮𞤪𞤼𞤢 𞤥𞤵𞤪𞤼𞤢𞤤 𞤺𞤮𞤤𞥆𞤮𞥅𞤩𞤫 𞤘𞤭𞤲𞤫 𞤫 𞤲𞤮 𞤮 𞤥𞤮𞥅𞤩𞤼𞤭𞤲’𞤣𞤭𞤪𞤼𞤢 𞤶𞤢𞥄𞤺𞤮𞤪𞤢𞤤 𞤳𞤫𞤧𞤢𞤤 𞤲𞤺𞤢𞤤 𞤳𞤢𞤻𞤵𞤲𞤫 𞤨𞤫𞤸𞤫 𞤯𞤫 𞤮 𞤰𞤫𞤼𞥆𞤢𞤼𞤢 𞤬𞤢𞥄𞤣𞤫 𞤫 𞤤𞤢𞤲𞥆𞤭𞤲𞤺𞤮𞤤 𞤤𞤵𞤥𞤦𞤭𞤲𞤢𞤤 𞤲𞤺𞤢𞤤⹁ 𞤢𞤲𞤣𞤭𞤲𞤢𞤴 𞤴𞤭𞤥𞤩𞤫 𞤘𞤭𞤲𞤫 𞤩𞤫𞤲 𞤳𞤢 𞤮 𞤬𞤫𞤱𞤼𞤭.
𞤒𞤮 𞤀𞤤𞤤𞤢 𞤱𞤢𞤱𞤲𞤵𞤥𞤮 𞤢𞤪𞤣𞤢𞤺𞤮𞤤 𞤧𞤢𞤦𞤵 𞤺𞤮𞤤𞥆𞤭𞤣𞤵𞤺𞤮𞤤 𞤫 𞤤𞤢𞥄𞤥𞤵 𞤪𞤫𞤱𞤢 𞤬𞤫𞤰𞥆𞤢 𞤱𞤫𞤤𞤢 𞤬𞤭𞥅.
𞤒𞤮 𞤘𞤫𞤲𞤮 𞤱𞤮𞤲𞤢 𞤦𞤢𞤤𞥆𞤮 𞤥𞤢𞤳𞥆𞤮⹁𞤮 𞤱𞤮𞤲𞤢 𞤹𞤢𞥄𞤥𞤯𞤮 𞤳𞤫𞤤𞤯𞤵𞤯𞤮 𞤲𞤢𞤬𞤢𞤴𞤯𞤫 𞤤𞤫𞤧𞤣𞤭 𞤺𞤭𞤲𞤫 𞤫 𞤢𞤬𞤪𞤭𞤳𞤭 𞤬𞤮𞤱 𞤼𞤫𞤲𞤼𞤭𞤲𞤭𞥅 𞤊𞤵𞤤𞤩𞤫 𞤇𞤫𞤲.
𞤀𞤱𞤢 ⹁ 𞤥𞤭𞤲 𞤳𞤮 𞤳𞤢 𞤤𞤮𞤭𞤲𞤺𞤮𞤤 𞤥𞤮 𞤥𞤭 𞤧𞤢𞤦𞥆𞤭𞥅 𞤩𞤫 𞤥𞤢𞤩𞤭𞤪𞤢𞤴 𞤥𞤮 𞤧𞤢𞤦𞤵 𞤩𞤫 𞤭𞤱𞤢𞤼𞤢𞥄 𞤤𞤢𞥄𞤥𞤵 𞤲𞤮 𞤴𞤢𞥄𞤱𞤭𞤪𞤭.
𞤃𞤭𞥅𞤶𞤮 𞤢𞤲.
𞤱𞤭𞤲𞤣𞤫𞤲 𞤶𞤢𞤲𞤺𞤫 𞤢𞤣𞤤𞤢𞤥 𞤳𞤮 𞤦𞤭𞤲𞤣𞤮𞤤 𞤧𞤭𞤲𞤷𞤢𞥄𞤲𞤺𞤮𞤤 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥙⹁ 𞤥𞤮𞤰𞥆𞤫𞤪𞤫 𞤥𞤢𞤺𞥆𞤮𞤤 𞤴𞤢𞥄𞤶𞤭𞥅 𞤸𞤢𞥄 𞤼𞤢𞤱𞤢𞤼𞤢 𞤶𞤮𞥅𞤲𞤭 𞤢 𞤱𞤭𞤲𞤣𞤭𞤪𞤢𞤴𞤲𞤺𞤮𞤤 𞤳𞤮 𞤬𞤢𞥄𞤤𞤢𞤯𞤢𞥄 𞤱𞤮𞥅⹁ 𞤢 𞤸𞤵𞤱𞤼𞤮𞤪𞤢𞤴𞤲𞤺𞤮𞤤 𞤳𞤮 𞤴𞤫𞤤𞤭𞤯𞤢𞥄 𞤱𞤮𞥅⁏ 𞤲𞤺𞤮𞤤 𞤱𞤮𞤲𞤭𞥅 𞤼𞤫𞤣𞥆𞤵𞤲𞥋𞤺𞤢𞤤 𞤥𞤮𞥅𞤤𞤢𞤲𞤢𞥄𞤲𞤺𞤢𞤤 𞤱𞤮𞤲𞤢𞤲𞤣𞤫 𞤤𞤫𞤻𞤮𞤤 𞤬𞤵𞤤𞤩𞤫 𞤩𞤫𞤲 𞤫 𞤪𞤫𞤲𞤣𞤮 𞤢𞤬𞤪𞤭𞤳 𞤲𞤺𞤮𞤲 𞤳𞤢𞤻𞤵𞤲 𞤫 𞤳𞤢𞤤𞤢 𞤲𞤫𞤯𞥆𞤢𞤲𞤳𞤫⁏ 𞤳𞤮 𞤥𞤢𞤤𞤮𞥅𞤪𞤫⹁ 𞤨𞤮𞥅𞤤𞤺𞤢𞤤⹁ 𞤩𞤢𞤽𞤼𞤢𞤤⹁ 𞤩𞤢𞤥𞤼𞤢𞤤 𞤱𞤮𞤲𞤭 𞤬𞤭𞥅 𞤢𞤣𞤤𞤢𞤥 𞤸𞤢𞥄 𞤨𞤮𞥅𞤥𞤢𞥄.
𞤳𞤢𞤤𞤢 𞤲𞤫𞤯𞥆𞤮 𞤫 𞤲𞤣𞤫𞤪 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤲𞤮 𞤼𞤮𞤪𞤢𞥄 𞤱𞤢𞤤𞥆𞤭𞤼𞤢𞤺𞤮𞤤 𞤬𞤭𞥅 𞤲𞤮 𞤦𞤭𞤲𞤣𞤮𞤤 𞤢𞤣𞤤𞤢𞤥 𞤲𞤺𞤮𞤤 𞤱𞤵𞥅𞤪𞤭𞤪𞤢⹁ 𞤧𞤢𞤦𞤵 𞤱𞤵𞥅𞤪𞤵𞤺𞤮𞤤 𞤥𞤢𞤺𞥆𞤮𞤤 𞤳𞤮 𞤩𞤢𞤥𞤼𞤢𞤤 𞤱𞤮𞤲𞤢𞤲𞤣𞤫 𞤳𞤢𞤤𞤢 𞤲𞤫𞤯𞥆𞤢𞤲𞤳𞤫 𞤯𞤵𞤲 𞤧𞤭𞤳𞥆𞤫 𞤱𞤮𞥅 𞤱𞤢𞤤𞤢𞥄 𞤫 𞤥𞤵𞤲…