𞤊𞤀𞥄𞤁𞤉 𞤉 𞤏𞤀𞤒𞤂𞤓𞤘𞤌𞤂 𞤋𞤐𞤍𞤉 𞤑𞤌𞤍𞤌𞥅𞤂𞤋 𞤊𞤓𞥅𞤚𞤀 𞤍𞤋𞤐

𞤃𞤮 𞤳𞤢𞤤𞤢 𞤧𞤭 𞤼𞤢𞤱𞤼𞤢𞤴𞤲𞤮 𞤥𞤮𞤶𞤮𞤦𞤫𞤪𞤫 𞤸𞤮𞤯𞤮 𞤥𞤵𞥅𞤯𞤵𞤲⹁ 𞤱𞤵𞤤𞥆𞤭𞤼𞤮𞥅 𞤼𞤮𞤲 𞤬𞤭𞥅 𞤣𞤢𞤪𞤼𞤢𞤺𞤮𞤤 𞤱𞤢𞤴𞤤𞤵𞤺𞤮𞤤 𞤭𞤲𞤯𞤫 𞤳𞤮𞤯𞤮𞥅𞤤𞤭 𞤥𞤫𞥅𞤯𞤫𞤲 𞤯𞤭𞤲⹁ 𞤯𞤵𞤥 𞤩𞤵𞤪𞤢𞤴𞤲𞤮 𞤥𞤮𞤰𞥆𞤢𞤲𞤣𞤫 𞤫𞤲.

𞤖𞤮𞤤 𞤳𞤮 𞤱𞤮𞤲𞤭 𞤲𞤢𞤬𞤮𞥅𞤪𞤫 𞤱𞤵𞤤𞥆𞤭𞤼𞤢𞤺𞤮𞤤 𞤳𞤢 𞤊𞤉𞤅𞤄𞤓𞤑 𞤯𞤮𞤮⹁ 𞤧𞤭 𞤱𞤮𞤲𞤢𞥄 𞤶𞤮𞤺𞤲𞤵𞤺𞤮𞤤 𞤱𞤮𞥅𞤬𞤵𞤩𞤫 𞤺𞤢𞤴𞤲𞤺𞤵 𞤩𞤫𞤲⹁ 𞤢𞥄𞤤𞤢𞥄𞤶𞤫 𞤯𞤫 𞤩𞤫 𞤸𞤢𞤩𞤭𞤪𞤢 𞤊𞤵𞤤𞤩𞤫 𞤩𞤫𞤲؟

𞤔𞤮𞥅𞤲𞤭 𞤴𞤮𞤺𞤢 𞤫 𞤱𞤭𞤴𞤢𞤴𞤩𞤫 𞤩𞤫𞤲 𞤱𞤮𞤲𞤣𞤫𞤥𞤢 𞤊𞤵𞤤𞤩𞤫 𞤩𞤫𞤲 𞤳𞤮 𞤸𞤮𞤩𞥆𞤫 𞤲𞤣𞤫𞤪 𞤊𞤵𞥅𞤼𞤢⹁ 𞤲𞤮 𞤤𞤢𞤥𞤭𞤼𞤮𞤪𞤣𞤫 𞤯𞤫𞥅 𞤱𞤵𞤤𞥆𞤭𞤼𞤢𞤲𞤯𞤫 𞤥𞤫𞥅𞤯𞤫𞤲 𞤳𞤢 𞤊𞤉𞤅𞤄𞤓𞤑. 𞤃𞤭𞤯𞤮 𞤲𞤢𞤲𞤵𞤣𞤫 𞤩𞤫 𞤱𞤭𞤴𞤢 𞤳𞤮 𞤭𞤲𞤯𞤫 𞤱𞤮𞤲𞤵𞤲𞤮𞥅𞤯𞤫 𞤯𞤫𞤲 𞤫 𞤸𞤢𞥄𞤤𞤢 𞤥𞤢𞤩𞥆𞤫 𞤳𞤢𞤲 𞤼𞤢𞤲 𞤱𞤮𞤲𞤢𞥄 𞤥𞤵𞤼𞤭𞤲𞤫𞥅𞤣𞤫⹁ 𞤤𞤮𞤲𞤼𞤭𞤲𞤭𞤪𞤫𞥅 𞤭𞤲𞤯𞤫 𞤀𞥄𞤪𞤢𞤦𞤵⹁ 𞤬𞤭𞥅 𞤥𞤫𞤸𞤵𞤺𞤮𞤤 𞤦𞤢𞤯𞤼𞤫 𞤫 𞤼𞤢𞥄𞤪𞤭𞥅𞤳𞤢 𞤶𞤫𞤴𞤢𞤤 𞤥𞤢𞤩𞥆𞤫 𞤊𞤵𞥅𞤼𞤢. 𞤚𞤮𞥅𞤣𞤫𞤲𞥆𞤢⹁ 𞤥𞤭 𞤴𞤭𞥅𞤴𞤭𞥅 𞤳𞤢 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤱𞤭𞤴𞤭 𞤴𞤮 𞤩𞤫 𞤴𞤢𞤸𞤵 𞤩𞤫 𞤱𞤵𞤤𞥆𞤭𞤼𞤮𞥅 𞤳𞤢 𞤤𞤢𞥄𞤥𞤵.

𞤉𞤲 𞤧𞤵𞤩𞤢𞤴⹁ 𞤫𞤲 𞤱𞤢𞤯𞤢𞤴 𞤣𞤮𞤴.

𞤄𞤵𞤴 𞤱𞤵𞤤𞥆𞤭𞤼𞤮𞤼𞤮 𞤱𞤭𞤴𞤢 𞤱𞤮𞤲𞤣𞤫𞤥𞤢 𞤳𞤮 𞤼𞤢𞤥𞤨𞤭𞤲𞤭 𞤫𞤲⹁ 𞤳𞤮 𞤤𞤢𞥄𞤩𞤭𞤲𞤳𞤭𞤲𞤢𞤺𞤮𞤤 𞤪𞤫𞥅𞤣𞤵 𞤬𞤫𞤰𞥆𞤵𞤼𞤵𞤲’𞤺𞤢𞤤. 𞤑𞤮 𞤲𞤺𞤢𞥄𞤤 𞤱𞤮𞤲𞤭 𞤧𞤢𞤦𞤵 𞤱𞤢𞥄𞤧𞤫𞥅𞤣𞤫 𞤥𞤫𞥅𞤯𞤫𞤲 𞤺𞤵𞤲𞤣𞤮𞥅𞤶𞤭. 𞤑𞤢𞤤𞤢 𞤳𞤮 𞤴𞤫𞤱𞤼𞤫𞤼𞤫𞤲 𞤸𞤮𞥅𞤪𞤫 𞤩𞤢𞤥𞤼𞤵𞤺𞤮𞤤 𞤥𞤢𞤤𞥆𞤢 𞤸𞤭𞤱𞤵𞤺𞤮𞤤 𞤪𞤫𞤲𞤣𞤮 𞤲𞤺𞤮𞤲⹁ 𞤫𞤲 𞤤𞤭𞤩𞤢𞤴 𞤳𞤢 𞤳𞤫𞤲𞤫.

𞤀𞤲𞤣𞤢 𞤤𞤫 𞤳𞤮 𞤳𞤢𞤤𞤢 𞤳𞤮 𞤧𞤵𞥅𞤯𞤭𞥅 𞤸𞤢𞥄 𞤱𞤢𞥄𞤱𞤭 𞤣𞤢𞤪𞤼𞤢𞤲𞤢𞥄𞤣𞤫 𞤸𞤮𞥅𞤪𞤫 𞤥𞤵𞥅𞤯𞤵𞤲⹁ 𞤣𞤢𞤯𞤢𞤼𞤢. 𞤍𞤫𞥅 𞤳𞤢𞤬𞤤𞤫 𞤥𞤢𞤤𞥆𞤢 𞤑𞤢𞤬𞤵𞥅𞤶𞤫 𞤥𞤢𞤱𞤯𞤫 𞤬𞤮𞤨 𞤱𞤢𞤲𞤮 𞤃𞤢𞤴𞤳𞤮𞤪𞤮𞤧𞤮𞤬𞤼⹁ 𞤘𞤵𞥅𞤺𞤮𞤤⹁ 𞤄𞤮𞤴𞤭𞤲𞤺⹁ 𞤀𞥄𞤨𞤮𞤤 𞤧𞤵𞥅𞤯𞤢𞤴 𞤳𞤮 𞤩𞤫 𞤱𞤮𞤲𞤭 𞤺𞤮𞤤𞥆𞤵𞤣𞤫 𞤸𞤮𞥅𞤪𞤫 𞤥𞤵𞥅𞤯𞤵𞤲 𞤸𞤢𞥄 𞤻𞤢𞤤𞤲𞤣𞤫 𞤩𞤫 𞤺𞤢𞤴𞤲𞤭⹁ 𞤩𞤫 𞤸𞤫𞤦𞤤𞤢𞤲𞤭𞥅 𞤴𞤢𞤤𞤼𞤭𞤲𞤺𞤮𞤤⹁ 𞤧𞤭 𞤩𞤫 𞤬𞤫𞥅𞤻𞥆𞤭𞤲𞤢𞤲𞤢 𞤯𞤵𞤥 𞤴𞤭𞤥𞤩𞤫 𞤩𞤫𞤲.

𞤖𞤢𞤴 𞤥𞤫𞤲𞤫𞤲 𞤯𞤮𞥅 𞤧𞤭 𞤥𞤫𞤯𞤫𞤲 𞤺𞤮𞤤𞥆𞤭𞤣𞤵𞤣𞤫 𞤫 𞤥𞤢𞤩𞥆𞤫 𞤸𞤮𞥅𞤪𞤫 𞤀𞤁𞤂𞤢𞤃⹁ 𞤩𞤫 𞤱𞤮𞥅𞤲𞤣𞤭𞤲𞤢𞤴 𞤥𞤫𞤲 𞤧𞤵𞥅𞤯𞤵𞤺𞤮𞤤 𞤸𞤢𞥄 𞤩𞤫 𞤸𞤫𞤦𞤭𞤤𞤮𞥅 𞤴𞤢𞤤𞤼𞤭𞤲𞤺𞤮𞤤 𞤫 𞤳𞤫𞤲𞤫.

𞤉𞤲𞤫𞤲 𞤳𞤢𞤣𞤭 𞤫𞤯𞤫𞤲 𞤸𞤢𞥄𞤲𞤭 𞤢𞤲𞤣𞤵𞤣𞤫 𞤱𞤮𞤲𞤣𞤫𞤥𞤢⹁ 𞤳𞤮 𞤥𞤮𞤰𞥆𞤭 𞤳𞤮𞤲 𞤲𞤮 𞤸𞤢𞥄𞤲𞤢𞥄 𞤸𞤭𞤱𞤫𞥅𞤣𞤫⹁ 𞤧𞤵𞥅𞤯𞤫𞥅 𞤸𞤢𞥄 𞤱𞤵𞥅𞤪𞤢⹁ 𞤻𞤭𞥅𞤩𞤢 𞤧𞤭 𞤬𞥆𞤫𞥅𞤻𞥆𞤭𞤲𞤫𞥅. 𞤏𞤵𞤪𞤭𞤲 𞤳𞤮 𞤨𞤫𞤸𞤫 𞤥𞤮𞤰𞥆𞤫 𞤯𞤫𞤲 𞤸𞤢𞥄𞤲𞤢𞥄 𞤸𞤭𞤱𞤫𞥅𞤣𞤫 𞤩𞤵𞤪𞤭 “𞤶𞤭𞥅𞤦𞤫”. 𞤑𞤮𞤲𞤮 𞤦𞤵𞤴 𞤫 𞤥𞤫𞥅𞤯𞤫𞤲 𞤲𞤮 𞤧𞤭𞤳𞥆𞤢 𞤳𞤮 𞤧𞤵𞥅𞤯𞤵𞤺𞤮𞤤 𞤳𞤮 𞤦𞤮𞤲𞤭 𞤼𞤢𞤲 𞤬𞤭𞥅 “𞤅𞤵𞤼𞤵𞤪𞤢” 𞤩𞤵𞤪𞤭 𞤥𞤮𞤰𞥆𞤵𞤣𞤫.

𞤅𞤭 𞤫𞤲 𞤱𞤫𞥅𞤩𞤭𞤼𞤭𞥅 𞤨𞤫𞤸𞤫 𞤥𞤫𞥅𞤯𞤫𞤲⹁ 𞤧𞤭 𞤢𞤴𞤩𞤫 𞤦𞤮𞤲𞥆𞤭𞤼𞤢𞥄𞤤𞤭 𞤯𞤫 𞤱𞤮𞥅⹁ 𞤲𞤶𞤮𞤬𞤮𞥅𞤩𞤫 𞤩𞤫𞤲 𞤫 𞤥𞤫𞥅𞤯𞤫𞤲 𞤨𞤮𞤪𞤯𞤭𞤲𞤢𞤴 𞤯𞤫⹁ 𞤸𞤢𞤪𞤢 𞤱𞤮𞤲𞤢𞥄 𞤸𞤢𞤴 𞤫 𞤧𞤢𞤺𞤮 𞤥𞤢𞤩𞥆𞤫.

𞤅𞤫𞤤𞤫𞤲 𞤸𞤢𞥄𞤤𞤢 𞤯𞤵𞥅𞤯𞤵𞤳𞤢⹁ 𞤺𞤮𞤤𞥆𞤫𞤲⹁ 𞤺𞤮𞤤𞥆𞤭𞤪𞤫𞤲 𞤲𞤺𞤫𞥅𞤼𞤵. 𞤅𞤫𞤤𞤫𞤲 𞤱𞤵𞤤𞥆𞤭𞤼𞤢𞤺𞤮𞤤 𞤯𞤵𞥅𞤯𞤵𞤲’𞤺𞤮𞤤. 𞤍𞤵𞤥 𞤳𞤮 𞤥𞤢𞥄𞤲𞤣𞤫 𞤶𞤢𞥄𞤧𞤫𞤪𞤫.

𞤃𞤮 𞤸𞤫𞤦𞥆𞤭𞤲𞤮𞤪𞤭𞥅 𞤱𞤵𞤤𞥆𞤭𞤼𞤢𞤺𞤮𞤤⹁ 𞤧𞤫𞥅𞤣𞤢𞤼𞤢𞥄 𞤫 𞤱𞤵𞤤𞥆𞤭𞤲𞤫𞥅𞤣𞤫.

𞤉𞤳𞥆𞤭𞤼𞤮𞤯𞤫𞤲 𞤳𞤢𞤣𞤭 𞤥𞤢𞤪𞤵𞤺𞤮𞤤 𞤺𞤵𞤲𞤣𞤮𞥅𞤶𞤭. 𞤑𞤮𞤲𞤮 𞤲𞤮 𞤼𞤢𞤥𞤨𞤭𞤲𞤭 𞤫𞤲 𞤲𞤣𞤫 𞤼𞤢𞤱𞤭 𞤥𞤮 𞤳𞤢𞤤𞤢 𞤲𞤮 𞤬𞤢𞥄𞤤𞤢 𞤸𞤭𞤼𞥆𞤵𞤣𞤫. 𞤃𞤮 𞤳𞤢𞤤𞤢 𞤤𞤫 𞤧𞤭 𞤬𞤢𞥄𞤤𞤢𞥄𞤥𞤢 𞤸𞤮𞤤𞥆𞤭𞤼𞤢𞥄𞤣𞤫⹁ 𞤴𞤫𞤶𞥆𞤭𞤼𞤢𞤴 𞤳𞤮 𞤳𞤢𞤬𞤵𞤯𞤫𞤲 𞤳𞤮𞤲. 𞤑𞤮 𞤸𞤢𞤬𞤢𞥄 𞤳𞤮𞤲 𞤲𞤮 𞤸𞤭𞤼𞥆𞤭 𞤤𞤫 𞤩𞤵𞤪𞤭 𞤳𞤮 𞤸𞤫𞥅𞤪𞤼𞤮𞤪𞤢𞥄 𞤳𞤮𞤲.

𞤑𞤮 𞤥𞤮 𞤼𞤭𞤨𞥆𞤭𞥅 𞤳𞤢 𞤼𞤭𞥅𞤯𞤭⹁ 𞤧𞤭 𞤣𞤵𞤻𞤢 𞤳𞤮 𞤼𞤭𞥅𞤯𞤭.

𞤑𞤮 𞤧𞤭 𞤪𞤫𞤲𞤣𞤮 𞤲𞤺𞤮𞤲 𞤼𞤫𞤣𞥆𞤭𞥅⹁ 𞤧𞤭 𞤴𞤭𞤥𞤩𞤫 𞤪𞤫𞤲𞤣𞤮 𞤲𞤺𞤮𞤲 𞤼𞤫𞤣𞥆𞤢. 𞤑𞤮𞤲𞤮 𞤧𞤭 𞤪𞤫𞤲𞤣𞤮 𞤲𞤺𞤮𞤲 𞤸𞤢𞤴𞤬𞤭𞤲𞤢𞥄𞤥𞤢⹁ 𞤳𞤮 𞤲𞤫𞤯𞥆𞤮 𞤺𞤮𞥅𞤼𞤮 𞤼𞤢𞤲 𞤼𞤫𞤣𞥆𞤢𞤼𞤢⹁ 𞤯𞤵𞤥 𞤲𞤢𞤬𞤢𞤼𞤢𞥄 𞤥𞤮.

𞤃𞤭 𞤢𞤣𞥆𞤢𞤲𞤢 𞤮𞤲 𞤯𞤮𞥅 𞤥𞤭𞤧𞤢𞤤.
𞤙𞤢𞤤𞤲𞤣𞤫 𞤘𞤮𞥅⹁ 𞤌𞤆𞤈𞤀 𞤏𞤋𞤐𞤊𞤈𞤋𞥅⹁ 𞤣𞤫𞤦𞥆𞤮 𞤶𞤫𞤴𞤢𞤯𞤮 𞤫 𞤩𞤵𞤪𞤵𞤩𞤫 𞤩𞤫𞤲 𞤢𞤤𞤯𞤵𞤣𞤫 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭⹁ 𞤴𞤢𞤸𞤵𞤲𞤮 𞤫 𞤬𞤮𞤲𞤺𞤮𞥅𞤪𞤵 𞤥𞤢𞤤𞥆𞤢 𞤴𞤫𞥅𞤴𞤭𞤪𞤣𞤫 𞤷𞤵𞤯𞤢𞥄𞤶𞤭 𞤧𞤢𞤯𞤼𞤵𞤯𞤭 𞤱𞤮𞤲𞤣𞤫 𞤅𞤓𞤏𞤋𞤅. 𞤒𞤫𞥅𞤴𞤮𞥅𞤱𞤮 𞤮𞤲 𞤧𞤢𞤤𞤭𞥅 𞤸𞤮𞤤𞥆𞤵𞤣𞤫 𞤥𞤮⹁ 𞤦𞤮𞥅𞤼𞤮𞤱𞤵𞤲 𞤧𞤢𞤯𞤼𞤵𞤳𞤵𞤲 𞤷𞤮𞤺𞥆𞤵. 𞤌𞤥𞤮 𞤧𞤭𞤳𞥆𞤭 𞤌𞤆𞤈𞤀 𞤸𞤫𞤩𞤢𞤼𞤢𞥄 𞤷𞤮𞤺𞥆𞤵 𞤥𞤢𞤳𞥆𞤵𞤲 𞤬𞤭𞥅 𞤳𞤮 𞤸𞤮 𞤩𞤢𞤤𞤫𞥅𞤶𞤮.

𞤌𞥅 𞤴𞤫𞥅𞤴𞤮𞥅𞤱𞤮 𞤢𞤲𞤣𞤢𞥄 𞤌𞤆𞤈𞤀 𞤲𞤮 𞤱𞤢𞥄𞤱𞤵𞤲𞤮𞥅 𞤧𞤮𞥅𞤣𞤵𞤣𞤫 𞤴𞤫𞥅𞤴𞤭𞤪𞤯𞤫 𞤥𞤢𞤩𞥆𞤫 𞤯𞤫𞤲 𞤬𞤮𞤨 𞤳𞤢𞤻𞤵𞤲 𞤫 𞤥𞤮𞤰𞥆𞤭𞤲𞤭𞤪𞤯𞤫 𞤥𞤢𞤩𞥆𞤫 𞤯𞤫𞤲 𞤬𞤮𞤨. 𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅⹁ 𞤫 𞤥𞤭𞥅𞤶𞤮 𞤮𞥅 𞤴𞤫𞥅𞤴𞤮𞥅𞤱𞤮 𞤱𞤢𞥄𞤧𞤢-𞤲𞤫𞥅𞤣𞤭𞥅𞤶𞤮 𞤩𞤢𞤤𞤫 𞤬𞤮𞤨 𞤲𞤮 𞤼𞤢𞤥𞤨𞤭⹁ 𞤸𞤢𞤴 𞤧𞤭 𞤩𞤢𞤤𞤫𞥅𞤶𞤮 𞤲𞤺𞤢𞤤𞤮 𞤣𞤢𞤪𞤭𞤳𞤫 𞤴𞤫𞥅𞤧𞤮 𞤥𞤢𞤳𞥆𞤮 𞤮 𞤢𞤲𞤣𞤢𞤼𞤢𞥄.

𞤏𞤮𞤲𞤢𞥄 𞤤𞤫 𞤳𞤢𞤲𞤳𞤮 𞤼𞤵𞤲 𞤥𞤢𞤪𞤭 𞤲𞤺𞤮𞥅 𞤥𞤭𞥅𞤶𞤮. 𞤍𞤵𞥅𞤯𞤵𞤩𞤫 𞤫 𞤪𞤢𞤲𞤫𞥅𞤩𞤫 𞤩𞤫𞤲 𞤳𞤢𞤻𞤵𞤲 𞤫 𞤀𞥄𞤧𞤭𞤴𞤢𞥄𞤩𞤫 𞤩𞤫𞤲 𞤱𞤭𞤳𞥆𞤮𞤼𞤮 𞤩𞤢𞤤𞤫𞥅𞤶𞤮. 𞤖𞤮𞤤 𞤳𞤮 𞤱𞤢𞤯𞤭 𞤯𞤵𞤲؟ 𞤑𞤮 𞤼𞤢𞤱𞤣𞤫 𞤯𞤵𞥅𞤯𞤵𞤯𞤫 𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲 𞤳𞤮 𞤼𞤢𞤥𞤨𞤫𞤪𞤫 𞤫 𞤷𞤢𞤯𞤫𞥅𞤤𞤫 𞤢𞤲𞤣𞤭𞤪𞤢𞥄 𞤸𞤢𞤴 𞤧𞤭 𞤼𞤢𞤱𞤭𞥅 𞤶𞤮𞤺𞤭𞥅𞤩𞤫 𞤶𞤢𞤱𞤤𞤫 𞤩𞤵𞤪𞤭 𞤨𞤮𞤪𞤼𞤮𞥅𞤩𞤫 𞤺𞤮𞥅 𞤲𞤮 𞤀𞤬𞤪𞤭𞤳.

𞤅𞤭 𞤈𞤫𞤲𞤣𞤮 𞤸𞤢𞤴𞤬𞤭𞥅⹁ 𞤴𞤭𞤥𞤩𞤫 𞤥𞤢𞤺𞥆𞤮 𞤬𞤮𞤨 𞤸𞤢𞤴𞤬𞤢𞤴 𞤸𞤢𞤴 𞤼𞤫𞤣𞥆𞤵𞤩𞤫 𞤩𞤫𞤲 𞤫 𞤥𞤢𞤺𞥆𞤮. 𞤀𞤲𞤣𞤭𞤲𞤮𞤯𞤫𞤲 𞤳𞤢𞤣𞤭 𞤀𞤁𞤂𞤢𞤃 𞤲𞤮 𞤱𞤭𞤲𞤣𞤭𞤪𞤫𞤲 𞤺𞤵𞤲𞤣𞤮𞥅𞤶𞤭 𞤥𞤫𞥅𞤯𞤫𞤲⹁ 𞤧𞤮 𞤼𞤢𞤱𞤭𞥅 𞤳𞤮 𞤦𞤫𞥅 𞤱𞤭𞤲𞤣𞤭𞤲’𞤣𞤭𞤪𞤢𞤲𞤫𞤲 𞤯𞤭.

𞤀. 𞤔 𞤄𞤀𞤈𞤋