𞤉 𞤒𞤉𞤏𞤚𞤉𞤈𞤉 𞤃𞤀𞤑𞥆𞤌 𞤑𞤀 𞤔𞤌𞥅𞤐𞤁𞤉 𞤘𞤉𞤐𞤍𞤋 𞤊𞤌𞤚𞥆𞤓𞤍𞤋⹁ 𞤄𞤓𞤖𞤀𞥄𞤈𞤋 𞤒𞤀𞤐𞤀𞤐𞤋 𞤂𞤀𞥄𞤃𞤇𞤉 𞤚𞤌𞤐𞤘𞤌𞤚𞤌𞥅𞤇𞤉 𞤂𞤀𞥄𞤃𞤓

𞤖𞤢𞤲𞤳𞤭 𞤫 𞤐𞤶𞤫𞤧𞤤𞤢𞥄𞤪𞤫 (𞤢𞤤𞤢𞤪𞤦𞤢)⹁ 𞤻𞤢𞤤𞤲𞤣𞤫 𞥒𞥑 𞤅𞤭𞤤𞤼𞤮⹁ 𞤃𞤵𞤸𞤢𞤥𞥆𞤣𞤵 𞤄𞤵𞤸𞤢𞥄𞤪𞤭 ⹁ 𞤸𞤮𞥅𞤪𞤫𞥅𞤶𞤮 𞤐𞤢𞤶𞤫𞤪𞤭𞤴𞤢 𞤮𞤲 𞤽𞤭𞤻𞤵𞤲𞤮 𞤬𞤮𞤼𞤢 𞤩𞤫𞥅 𞤸𞤮𞥅𞤪𞤫𞥅𞤩𞤫 𞤬𞤫𞤰𞥆𞤭𞤲𞤼𞤭𞤲𞤢𞤴𞤩𞤫 𞤸𞤢𞤨𞥆𞤵 𞤥𞤵𞤵𞤲 𞤬𞤭𞥅 𞤲𞤮 𞤩𞤫 𞤷𞤢𞤼𞤮𞤪𞤢 𞤫 𞤤𞤢𞥄𞤥𞤵. 𞤑𞤮 𞤫 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤫 𞤼𞤵𞤥𞤦𞤮𞤲’𞤣𞤭𞤪𞤢𞤤 𞤥𞤢𞤱𞤲𞤺𞤢𞤤 𞤸𞤭𞤼𞤢𞥄𞤲𞤣𞤫𞤴𞤢𞤲𞤳𞤮𞤱𞤢𞤤 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭⹁ 𞤳𞤢 𞤴𞤭𞥅𞤤𞤭𞤪𞤣𞤫 𞤐𞤭𞤱𞤴𞤮𞤪𞤳.

𞤌 𞤬𞤮𞤣𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢⹁ 𞤧𞤵𞤩𞤮 𞤱𞤢𞤯𞤢𞤴𞤲𞤺𞤮 𞤲𞤺𞤮𞤲 𞤫 𞤤𞤫𞤱𞤪𞤵 𞤕𞤮𞤤𞤼𞤮 𞤥𞤢𞤱𞤪𞤭⹁ 𞤬𞤭𞥅 𞤶𞤮𞤯𞥆𞤭𞤲𞤺𞤮𞤤 𞤤𞤮𞤲𞤼𞤮 𞤥𞤢𞤳𞥆𞤮⹁ 𞤤𞤢𞥄𞤼𞤮𞤪𞤼𞤮 𞤸𞤮𞥅𞤪𞤫 𞤤𞤢𞥄𞤩𞤢𞤤 𞤫 𞤬𞤮𞤼𞤢𞤤.

𞤄𞤵𞤸𞤢𞥄𞤪𞤭 𞤩𞤵𞤪𞤲𞤭𞥅 𞤣𞤵𞥅𞤩𞤭 𞥗𞥙 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭 𞤫 𞤶𞤫𞥅𞤲𞤢𞤴𞤭). 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥕 𞤮 𞤰𞤢𞤱𞤭 𞤸𞤮𞥅𞤪𞤫 𞤐𞤢𞤶𞤫𞤪𞤭𞤴𞤢 𞤩𞤢𞥄𞤱𞤮 𞤲𞤣𞤫 𞤮 𞤬𞤮𞥅𞤤𞤵𞤲𞤮𞥅 𞤘𞤵𞤣𞤤𞤮𞤳 𞤔𞤮𞤲𞤢𞤼𞤢𞤲 𞤫 𞤧𞤵𞤩𞤮 𞤱𞤢𞤯𞤵𞤲𞤮𞥅𞤲𞤺𞤮 𞥒𞥐𞥑𞥕. 𞤖𞤢𞤪𞤭 𞤤𞤫⹁ 𞤔𞤮𞤲𞤢𞤼𞤢𞤲 𞤘𞤵𞤣𞤤𞤮𞤳 𞤳𞤮 𞤸𞤢𞤨𞥆𞤵 𞤱𞤮𞥅𞤼𞤵 𞤨𞤫𞤼 𞤱𞤢𞤯𞤭 𞤫 𞤸𞤢𞤨𞥆𞤵𞥅𞤶𞤭 𞤯𞤭𞤯𞤭 𞤯𞤭 𞤣𞤮𞤧𞤼𞤫𞤪𞤫 𞤐𞤢𞤶𞤫𞤪𞤭𞤴𞤢 𞤲𞤣𞤫𞤲 𞤣𞤵𞤽𞤭𞤲𞤭.

𞤑𞤮 𞤫 𞤸𞤭𞤼𞤢𞥄𞤲𞤣𞤭 𞥑𞥙𞥙𞥙⹁ 𞤐𞤢𞤶𞤫𞤪𞤭𞤴𞤢 𞤧𞤫𞥅𞤣𞤭 𞤫 𞤤𞤢𞥄𞤥𞤵 𞤧𞤮𞥅𞤪𞤭. 𞤘𞤭𞤦𞤭 𞤮𞤲𞤼𞤵𞤥𞤢⹁ 𞤳𞤮 𞤧𞤵𞤩𞤮 𞤱𞤮𞤲𞤭 𞤳𞤮 𞤤𞤢𞥄𞤥𞤮𞤪𞤼𞤫𞥅 𞤐𞤢𞤶𞤫𞤪𞤭𞤴𞤢.

𞤍𞤵𞤥 𞤲𞤮 𞤧𞤫𞥅𞤣𞤭 𞤫 𞤤𞤢𞤴𞤯𞤫 𞤺𞤮𞥅 𞤲𞤣𞤫𞤪 𞤖𞤭𞤪𞤲𞤢 𞤀𞤬𞤪𞤭𞤳 𞤱𞤢𞤲𞤮 𞤘𞤭𞤲𞤫⹁ 𞤃𞤢𞤤𞤭 𞤫 𞤄𞤵𞤪𞤳𞤭𞤲𞤢⹁ 𞤫 𞤳𞤮 𞤱𞤢𞤴𞤭 𞤱𞤢 𞤯𞤫𞤫 𞤸𞤢𞥄 𞤕𞤢𞤣 𞤚𞤵𞤥𞤦𞤮 𞤀𞤬𞤪𞤭𞤳. 𞤉 𞤯𞤫𞥅 𞤤𞤫𞤴𞤯𞤫 𞤯𞤮𞥅 𞤬𞤮𞤨⹁ 𞤳𞤮 𞤧𞤮𞥅𞤪𞤭𞥅𞤩𞤫 𞤤𞤢𞥄𞤥𞤮𞤪𞤩𞤫 𞤬𞤮𞤤𞥆𞤵𞤪𞤵 𞤱𞤮𞤲𞤭 𞤸𞤮𞥅𞤪𞤫 𞤥𞤢𞤶𞥆𞤫.

𞤘𞤭𞤲𞤫 𞤳𞤢𞤲 ⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤺𞤫𞤪𞤣𞤢𞤲𞤮 𞤬𞤮𞤼𞤢 𞤬𞤭𞥅 𞤱𞤮𞤼𞤢 𞤮 𞤬𞤫𞤰𞥆𞤭𞤲 𞤸𞤢𞤨𞥆𞤵𞥅𞤶𞤭 𞤯𞤭𞤯𞤭 𞤯𞤭 𞤁𞤮𞤧𞤼𞤫𞤪𞤫 𞤲𞤣𞤫𞤲 𞤱𞤢𞤤𞥆𞤢 𞤅𞤢𞤪𞤵𞤴𞤢 𞤃𞤢𞤱𞤳𞤢 𞤳𞤢𞤲 𞤣𞤵𞤽𞤭𞤲𞤭⹁ 𞤮 𞤶𞤢𞤩𞤢𞥄𞤤𞤭. 𞤌 𞤷𞤢𞤼𞤭𞥅 𞤳𞤢 𞤸𞤮𞥅𞤪𞤢𞥄𞤺𞤵 𞤩𞤢𞥄𞤱𞤮 𞤮 𞤱𞤢𞤪𞤵𞤣𞤫 𞤷𞤢𞤨𞥆𞤢𞤲𞤯𞤫 𞤷𞤢𞤨𞥆𞤢𞤲𞤯𞤫 𞤴𞤭𞤥𞤩𞤫 𞤘𞤭𞤲𞤫. 𞤑𞤮𞤲𞤮 𞤯𞤵𞤥 𞤤𞤢𞤥𞥆𞤭𞤪𞤲𞤮 𞤥𞤮 𞤨𞤢𞤪. 𞤅𞤢𞤦𞤵𞤲𞤢⹁ 𞤩𞤢𞥄𞤴𞤼𞤭 𞤧𞤮𞥅𞤪𞤭𞥅𞤩𞤫⹁ 𞤩𞤫 𞤮 𞤸𞤮𞤤𞤮𞤪𞤲𞤮𞥅 𞤩𞤫𞤲 𞤬𞤮𞤤𞥆𞤭𞥅 𞤥𞤮⹁ 𞤩𞤫 𞤶𞤭𞤲𞤣𞤭𞤲𞥆𞤮 𞤥𞤮 𞤳𞤢 𞤤𞤢𞥄𞤥𞤭𞥅𞤣𞤫 𞤑𞤮𞤲𞤢𞥄𞤳𞤭𞤪𞤭 𞤮𞤥𞤮 𞤱𞤮𞥅𞤳𞤫𞥅. 𞤍𞤵𞤲𞤤𞤫 𞤸𞤢𞤴 𞤄𞤵𞤸𞤢𞥄𞤪𞤭⹁ 𞤱𞤢𞥄𞤶𞤭𞤲𞤮 𞤥𞤮⹁ 𞤶𞤫𞥅𞤶𞤭 𞤥𞤮⹁ 𞤳𞤮𞤲𞤮 𞤮 𞤲𞤢𞤲𞤢𞤲𞤢𞥄𞤲𞤮 𞤥𞤮.

𞤉 𞤴𞤫𞤱𞤼𞤫𞤪𞤫 𞤲𞤣𞤫 𞤄𞤵𞤸𞤢𞥄𞤪𞤭 𞤱𞤢𞤯𞤭 𞤲𞤣𞤫𞤲 𞤳𞤢 𞤶𞤮𞥅𞤲𞤣𞤫 𞤃𞤢𞤱𞤲𞤣𞤫 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭⹁ 𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 “𞤑𞤢𞤥𞤩𞤫 𞤩𞤫 𞤺𞤮𞤥𞤯𞤭𞤲𞤭𞥅 𞤧𞤫𞤲𞤢𞤴𞤫𞥅𞤴𞤢𞥄𞤺𞤢𞤤 𞤳𞤫𞥅𞤪𞤭𞤲𞤫𞥅𞤣𞤫 𞤸𞤢𞤨𞥆𞤵𞥅𞤶𞤭 𞤯𞤭𞤲. 𞤑𞤢𞤥𞤩𞤫 𞤲𞤢𞤶𞤫𞤪𞤭𞤴𞤢𞤲𞤳𞤮𞥅𞤩𞤫 𞤩𞤫𞤲⹁ 𞤩𞤫 𞤶𞤢𞤩𞤭𞥅 𞤯𞤵𞤥. 𞤃𞤫𞤲 𞤧𞤫𞥅𞤣𞤭𞤲𞤮 𞤦𞤢𞤯𞤼𞤢𞤲𞤫 𞤦𞤮𞤲𞤯𞤫 𞤦𞤢𞤯𞤼𞤭𞤲𞤯𞤫 𞤲𞤣𞤫 𞤸𞤮𞥅𞤪𞤫𞥅𞤩𞤫 𞤤𞤫𞤴𞤯𞤫 𞤺𞤮𞥅 𞤫𞤩𞥆𞤵𞤲𞤮𞥅 𞤱𞤢𞤴𞤤𞤵𞤺𞤮𞤤 𞤧𞤢𞤪𞤭𞤴𞤢𞥄𞤶𞤭 𞤤𞤫𞤴𞤣𞤭 𞤥𞤵𞤵𞤲 𞤬𞤭𞥅 𞤲𞤮 𞤩𞤫 𞤻𞤭𞥅𞤩𞤭𞤪𞤢 𞤫 𞤤𞤢𞥄𞤥𞤵.

𞤐𞤣𞤫 𞤱𞤮𞤲𞤵𞤲𞤮𞥅-𞤥𞤭 𞤂𞤢𞥄𞤥𞤯𞤮⹁ 𞤥𞤭𞤯𞤮 𞤸𞤵𞥅𞤤𞤢𞤲𞤭 𞤴𞤮 𞤲𞤣𞤮𞤲𞤣𞤭 𞤨𞤮𞥅𞤥𞤢𞥄𞤪𞤭 𞤲𞤣𞤭 𞤥𞤭 𞤢𞤲𞤣𞤭𞤼𞤭𞤪𞤮𞤴𞤼𞤫𞥅 𞤱𞤮𞤲𞤵 𞤻𞤭𞥅𞤩𞤭𞤲𞤺𞤮𞤤 𞤲𞤮 𞤧𞤵𞤩𞤮 𞤤𞤢𞥄𞤩𞤵𞤲’𞤺𞤮⹁ 𞤬𞤫𞤱𞤵𞤲’𞤺𞤮 𞤫 𞤸𞤮𞥅𞤤𞤢𞥄𞤲𞤺𞤮 𞤤𞤢𞥄𞤼𞤮𞤪𞤼𞤢 𞤐𞤢𞤶𞤫𞤪𞤭𞤴𞤢.

𞤒𞤭𞤥𞤩𞤫 𞤯𞤭𞤯𞤮 𞤴𞤢𞤱𞤼𞤭𞤲𞤩𞤫 𞤣𞤵𞥅𞤩𞤭 𞥗𞥐 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭) 𞤲𞤮 𞤲𞤢𞤲𞤺𞤮𞤲’𞤣𞤭𞤪𞤭 𞤲𞤺𞤢𞤥 𞤤𞤮𞤲𞤼𞤢𞤺𞤮𞤤 𞤥𞤮. 𞤊𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤳𞤢𞤲𞤳𞤮 𞤄𞤵𞤸𞤢𞥄𞤪𞤭𞥅 𞤢𞤲𞤣𞤭𞤪𞤢𞥄𞤲𞤣𞤫 APC⹁ 𞤢𞤪𞤣𞤭𞤲𞤭𞥅 𞤮𞥅 𞤱𞤭𞤴𞤫𞤼𞤫𞥅𞤯𞤮 𞤄𞤌𞤂𞤀 𞤀𞤖𞤃𞤉𞤁 𞤚𞤋𞤐𞤓𞤄𞤓. 𞤊𞤫𞤣𞥆𞤫 𞤤𞤵𞤲𞤣𞤭𞥅𞤲𞤣𞤫 𞤥𞤮 𞤲𞤣𞤫𞤲 (PDP) 𞤢𞤪𞤣𞤭𞤲𞤭𞥅 𞤀𞥄𞤚𞤋𞤗𞤓 𞤀𞤄𞤓𞥅𞤄𞤀𞤑𞤀𞤈.

𞤄𞤮𞤤𞤢 𞤀𞤸𞤥𞤫𞤣 𞤚𞤭𞤲𞤵𞤦𞤵 𞤳𞤮 𞤴𞤮𞥅𞤪𞤵𞤦𞤢𞥄𞤶𞤮 𞤶𞤭𞤦𞤭𞤲𞤢𞥄𞤯𞤮 𞤂𞤢𞤺𞤮𞤧. 𞤌 𞤸𞤫𞤩𞤭𞥅 𞤣𞤵𞥅𞤩𞤭 𞥗𞥐. 𞤌 𞤤𞤢𞥄𞤼𞤭𞤲𞤮 𞤺𞤮𞤦𞤭𞤲𞤢𞥄𞤶𞤮 𞤁𞤭𞥅𞤱𞤢𞤤 𞤂𞤢𞤺𞤮𞤧 𞤲𞤺𞤢𞤤 𞤺𞤭𞤤𞤢 𞥑𞥙𞥙𞥙 𞤬𞤢𞥄 𞥒𞥐𞥐𞥗. 𞤇𞤢𞥄𞤱𞤮 𞤮 𞤼𞤭𞤥𞥆𞤭𞤲𞤣𞤫 𞤶𞤢𞤲𞤺𞤣𞤫 𞤐𞤢𞤶𞤫𞤪𞤭𞤴𞤢⹁ 𞤮 𞤴𞤢𞤸𞤵𞤲𞤮 𞤀𞤥𞤫𞤪𞤭𞤳 𞤮 𞤶𞤢𞤲𞤺𞤭 𞤸𞤭𞥅𞤥𞤭𞤱𞤢𞤤 (accounting comptabilité).

𞤀𞥄𞤼𞤭𞤹𞤵 𞤀𞤦𞤵𞥅𞤦𞤢𞤳𞤢𞤪 𞤩𞤵𞤪𞤲𞤭𞥅 𞤣𞤵𞥅𞤩𞤭 𞥗𞥕 (𞤷𞤢𞤨𞥆𞤢𞤲𞤯𞤫 𞤶𞤫𞥅𞤯𞤭𞤯𞤭 𞤫 𞤶𞤮𞤱𞤭). 𞤑𞤮 𞤆𞤵𞤤𞥆𞤮 𞤶𞤭𞤦𞤭𞤲𞤢𞥄𞤯𞤮 𞤀𞥄𞤣𞤢𞤥𞤢𞥄𞤱𞤢 𞤻𞤢𞤤𞤲𞤣𞤫 𞥒𞥕 𞤔𞤮𞤤𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥔𞥖 𞤫 𞤸𞤮𞤯𞤮 𞤱𞤭𞤴𞤫𞤼𞤫𞥅𞤲𞤺𞤮 𞤔𞤢𞤣𞤢 𞤶𞤫𞤴𞤢𞤲𞤮𞥅𞤲𞤺𞤮 𞤬𞤫𞤱𞤲𞤣𞤮 𞤮𞤲𞤼𞤵𞤥𞤢 𞤫 𞤑𞤢𞤥𞤢𞤪𞤵𞤲. 𞤌 𞤤𞤢𞥄𞤼𞤭𞤲𞤮 𞤷𞤵𞤳𞥆𞤮 𞤸𞤮𞥅𞤪𞤫𞥅𞤶𞤮 𞤐𞤢𞤶𞤫𞤪𞤭𞤴𞤢 𞤬𞤫𞤱𞤲𞤣𞤮 𞤌𞤤𞤫𞤧𞤫𞤺𞤵𞤲 𞤌𞤦𞤢𞤧𞤢𞤲𞤶𞤮 𞤤𞤢𞥄𞤥𞤭𞤲𞤮𞥅. 𞤉 𞥑𞥙𞥙𞥘 𞤢𞤣𞤮 𞤮 𞤰𞤢𞤱𞤵𞤣𞤫 𞤳𞤢 𞤷𞤵𞤳𞥆𞤢𞥄𞤳𞤵⹁ 𞤮 𞤣𞤢𞤪𞤭𞤲𞤮 𞤬𞤭𞥅 𞤤𞤢𞥄𞤼𞤢𞤺𞤮𞤤 𞤘𞤮𞤦𞤭𞤲𞤢𞥄𞤶𞤮 𞤁𞤭𞥅𞤱𞤢𞤤 𞤀𞥄𞤣𞤢𞤥𞤢𞥄𞤱𞤢 𞤲𞤺𞤢𞤤. 𞤌 𞤬𞤮𞥅𞤤𞤭. 𞤑𞤮𞤲𞤮 𞤮 𞤶𞤮𞥅𞤯𞤢𞤲𞤮𞥅𞤳𞤭 𞤬𞤭 𞤱𞤮𞤲𞤵𞤺𞤮𞤤 𞤷𞤵𞤳𞥆𞤮 𞤸𞤮𞥅𞤪𞤫𞥅𞤶𞤮 𞤮𞤲. 𞤖𞤭𞤥𞤮 𞤥𞤢𞤪𞤭 𞤩𞤭𞤩𞥆𞤫 𞥒𞥘.

𞤐𞤮 𞤶𞤢𞤪𞤭 𞤢𞤲𞤣𞤭𞤲𞤼𞤭𞤲𞤣𞤫 𞤱𞤮𞤲𞤣𞤫𞤥𞤢 𞤐𞤢𞤶𞤫𞤪𞤭𞤴𞤢 𞤲𞤮 𞤩𞤵𞤪𞤭 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲 𞤬𞤮𞤨 𞤷𞤫𞤥𞤦𞤫 𞤳𞤢 𞤲𞤺𞤢𞤤𞤵 𞤫 𞤳𞤢 𞤯𞤵𞥅𞤯𞤢𞤤 𞤴𞤭𞤥𞤩𞤫. 𞤑𞤢𞤤𞤢 𞤳𞤮 𞤬𞤫𞤰𞥆𞤭 𞤫 𞤥𞤢𞤴𞤪𞤭⹁ 𞤦𞤢𞤯𞤼𞤭𞤲𞤢𞤴 𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤸𞤫𞤣𞥆𞤭𞥅𞤯𞤫 𞤯𞤫𞤲 𞤼𞤫𞤲𞤼𞤭𞤲𞤭𞥅 𞤫 𞤤𞤫𞤴𞤯𞤫 𞤸𞤭𞤪𞤲𞤢 𞤀𞤬𞤪𞤭𞤳 𞤯𞤫𞤲.