𞤕𞤀𞤍𞤉𞥅𞤂𞤉 𞤖𞤌𞥅𞤈𞤉 𞤊𞤓𞤂𞤇𞤉 𞤂𞤀𞤄𞤋𞤈𞤋𞤒𞤀

𞤃𞤓𞤖𞤀𞤃𞥆𞤉𞤁 𞤀𞤂𞤋𞥅 𞤄𞤀𞥄⹁ 𞤨𞤵𞤤𞥆𞤮 𞤂𞤢𞤦𞤭𞤪𞤭𞤴𞤢

𞤂𞤢𞤦𞤭𞤪𞤭𞤴𞤢 𞤳𞤮 𞤤𞤫𞤴𞤣𞤭 𞤶𞤫𞤴𞤢𞥄𞤣𞤭 𞤫 𞤸𞤭𞤪𞤲𞤢𞥄𞤺𞤫 𞤀𞤬𞤪𞤭𞤳.

𞤉 𞤲𞤣𞤫𞤪 𞤲𞤣𞤭𞥅 𞤤𞤫𞤴𞤣𞤭⹁ 𞤧𞤮 𞤼𞤢𞤱𞤭𞥅 𞤱𞤮𞤲𞤢𞥄 𞤢 𞤶𞤮𞤺𞤭𞥅𞤯𞤮 𞤳𞤢𞤴𞤣𞤭𞥅𞤪𞤭 𞤥𞤢𞤩𞥆𞤫 𞤲𞤣𞤭𞤲⹁ 𞤸𞤮𞤤𞥆𞤵𞤲’𞤣𞤭 𞤱𞤮𞤲𞤣𞤫𞤥𞤢 𞤳𞤮 𞤢 𞤩𞤭𞥅-𞤤𞤫𞤴𞤣𞤭𞥅𞤶𞤮⹁ 𞤸𞤢𞤴 𞤧𞤭 𞤳𞤮 𞤢 𞤶𞤭𞤦𞤭𞤲𞤢𞤲𞤣𞤫 𞤖𞤭𞤪𞤲𞤢 𞤀𞤬𞤪𞤭𞤳⹁ 𞤢 𞤯𞤢𞤩𞥆𞤢𞤴 𞤳𞤢𞤴𞤣𞤭 𞤬𞤭𞥅 𞤲𞤮 𞤺𞤮𞤤𞥆𞤭𞤪𞤢𞥄 𞤫 𞤲𞤮 𞤱𞤵𞥅𞤪𞤭𞤪𞤢𞥄 𞤼𞤮𞤲 𞤫 𞤩𞤵𞥅𞤩𞤼𞤵. 𞤑𞤮𞤲𞤮 𞤲𞤮𞤲⹁ 𞤸𞤫𞤲𞤣𞤢𞤺𞤮𞤤 𞤲𞤣𞤭𞤲 𞤳𞤢𞤴𞤣𞤭𞥅𞤪𞤭𞥅 (𞤨𞤫𞤪𞤥𞤭𞤼) 𞤲𞤮 𞤱𞤮𞤲𞤣𞤭 𞤫 𞤷𞤢𞤯𞤫𞥅𞤤𞤫 𞤯𞤵𞥅𞤯𞤵𞤯𞤫 𞤱𞤮𞤲𞤢𞤲𞤣𞤫 𞤆𞤵𞤤𞥆𞤮.

𞤩𞤢𞥄𞤱𞤮 𞤯𞤮𞥅 𞤲𞤵𞤲⹁ 𞤧𞤮 𞤼𞤢𞤱𞤭𞥅 𞤥𞤢𞤱𞤩𞤫 𞤥𞤢𞥄 𞤩𞤫𞤲 𞤳𞤮 𞤢𞤪𞤵𞤩𞤫 𞤂𞤢𞤦𞤭𞤪𞤭𞤴𞤢⹁ 𞤳𞤮𞤲𞤮 𞤢𞤲 𞤳𞤮 𞤯𞤮𞤲 𞤶𞤭𞤦𞤭𞤲𞤢𞤯𞤢𞥄⹁ 𞤢 𞤸𞤢𞤦𞥆𞤮𞤼𞤮𞤲𞤮 𞤸𞤢𞥄 𞤸𞤫𞤩𞤢𞥄 𞤣𞤵𞥅𞤩𞤭 𞥑𞥘 𞤧𞤭 𞤤𞤢𞤲𞤣𞤮𞤯𞤢𞥄 𞤳𞤢𞤴𞤣𞤭 𞤤𞤫𞤴𞤣𞤭 𞤲𞤣𞤭𞤲. 𞤔𞤮𞥅𞤲𞤭 𞤳𞤢𞤴⹁ 𞤫 𞤤𞤫𞤴 𞤧𞤢𞤪𞤭𞤴𞤢𞤱𞤮𞤤 𞤸𞤫𞤧𞤮𞤤 𞤲𞤺𞤮𞤤⹁ 𞤳𞤢𞤤𞤢 𞤩𞤭𞤯𞥆𞤮 𞤶𞤭𞤦𞤭𞤲𞤢𞥄𞤯𞤮 𞤲𞤣𞤫𞤪 𞤂𞤢𞤦𞤭𞤪𞤭𞤴𞤢 𞤳𞤮 𞤫 𞤩𞤭𞤩𞥆𞤫 𞤂𞤢𞤦𞤭𞤪𞤭𞤴𞤢 𞤮 𞤤𞤭𞤥𞤼𞤫𞤼𞤫𞥅. 𞤖𞤢𞤪𞤢𞤴 𞤮𞤲𞤼𞤭𞤺𞤭 𞤲𞤮 𞤲𞤫𞤱𞤭𞤲𞤢𞤲𞤢𞥄 𞤸𞤫𞤩𞤵𞤺𞤮𞤤 𞤳𞤢𞤴𞤣𞤭 𞤤𞤫𞤴𞤣𞤭 𞤲𞤣𞤭𞤲.

𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤲𞤮 𞤼𞤢𞤱𞤢𞥄 𞤫 𞤧𞤢𞤪𞤭𞤴𞤢𞥄𞤶𞤭 𞤁𞤫𞤐𞤘𞤂𞤢𞤖𞤀 (ECOWAS – CEDEAO)⹁ 𞤱𞤢𞤯𞥆𞤭𞤲𞤺𞤮𞤤 𞤣𞤮𞤱 𞤤𞤫𞤴𞤯𞤫 𞤸𞤭𞤪𞤲𞤢 𞤀𞤬𞤪𞤭𞤳 𞤯𞤫𞤲 𞤴𞤮 𞤯𞤫 𞤲𞤫𞤱𞤭𞤲𞤢𞤲 𞤳𞤢𞤤𞤢 𞤸𞤭𞤪𞤲𞤢-𞤢𞤬𞤪𞤭𞤳𞤲𞤢𞥄𞤶𞤮 𞤴𞤭𞥅𞤤𞤢𞤺𞤮𞤤 𞤥𞤢𞤤𞥆𞤢 𞤼𞤢𞤦𞤭𞤼𞤵𞤺𞤵𞤤 𞤲𞤮𞤳𞥆𞤵 𞤳𞤢𞤤𞤢 𞤳𞤢 𞤮 𞤴𞤭𞤯𞤭 𞤫 𞤲𞤣𞤫𞤪 𞤸𞤭𞤪𞤲𞤢 𞤀𞤬𞤪𞤭𞤳.

𞤐𞤮 𞤴𞤵𞤪𞤥𞤭𞤲𞤭 𞤲𞤣𞤫 𞤼𞤢𞤱𞤵𞤲𞤮𞥅 𞤯𞤭𞥅 𞤧𞤢𞤪𞤭𞤴𞤢𞥄𞤶𞤭 𞤢𞤤𞤢𞥄𞤳𞤢 𞤻𞤭𞥅𞤩𞤲𞤫𞥅𞤣𞤫. 𞤏𞤢𞥄𞤧𞤫𞥅𞤣𞤫 𞤻𞤭𞥅𞤩𞤲𞤫𞥅𞤣𞤫 𞤯𞤭𞥅 𞤧𞤢𞤪𞤭𞤴𞤢𞥄𞤶𞤭 𞤲𞤮 𞤢𞤣𞥆𞤢𞤲𞤭 𞤊𞤵𞤤𞤩𞤫 𞤩𞤫𞤲 𞤷𞤢𞤯𞤫𞥅𞤤𞤫 𞤯𞤵𞥅𞤯𞤵𞤯𞤫.

𞤐𞤮 𞤢𞤲𞤣𞤭𞤪𞤯𞤮𞤲 𞤲𞤮𞤲⹁ 𞤊𞤵𞤤𞤩𞤫 𞤲𞤮 𞤶𞤢𞥄𞤤𞤭𞥅 𞤫 𞤤𞤫𞤴𞤯𞤫 𞤯𞤵𞥅𞤯𞤵𞤯𞤫 𞤼𞤫𞤲𞤼𞤭𞤲𞤭𞥅 𞤫 𞤲𞤣𞤫𞤪 𞤖𞤭𞤪𞤲𞤢 𞤳𞤢𞤻𞤵𞤲 𞤫 𞤷𞤢𞤳𞤢 𞤀𞤊𞤪𞤭𞤳. 𞤂𞤢𞤦𞤭𞤪𞤭𞤴𞤢 𞤲𞤮 𞤼𞤢𞤱𞤢𞥄 𞤫 𞤤𞤫𞤴𞤯𞤫 𞤖𞤭𞤪𞤲𞤢 𞤀𞤬𞤪𞤭𞤳 𞤳𞤢 𞤊𞤵𞤤𞤩𞤫 𞤼𞤢𞤱𞤫𞤼𞤫𞥅 𞤺𞤭𞤦𞤭 𞤲𞤫𞥅𞤩𞤭𞥅.

𞤉 𞤨𞤫𞤰𞥆𞤮𞤤 𞤤𞤫𞤴𞤣𞤭 𞤂𞤢𞤦𞤭𞤪𞤭𞤴𞤢 𞤲𞤣𞤭𞤲⹁ 𞤲𞤮 𞤢𞤲𞤣𞤢𞥄 𞤱𞤮𞤲𞤣𞤫𞤥𞤢 𞤊𞤵𞤤𞤩𞤫 𞤲𞤮 𞤼𞤢𞤱𞤢𞥄 𞤫 𞤢𞤣𞤭𞥅𞤩𞤫 𞤢𞤪𞤵𞤣𞤫 𞤂𞤢𞤦𞤭𞤪𞤭𞤴𞤢 𞤬𞤭𞥅 𞤳𞤢𞤤𞤢 𞤱𞤮𞤲𞤢𞥄 𞤯𞤵𞤥 𞤱𞤮𞤲𞤢𞥄 𞤶𞤢𞤲𞤺𞤭𞤲𞤫𞥅𞤣𞤫 𞤳𞤢 𞤣𞤵𞤯𞤫. 𞤊𞤵𞤤𞤩𞤫 𞤤𞤭𞤥𞤼𞤢𞥄𞤳𞤢 𞤫 𞤤𞤫𞤰𞥆𞤭 𞤧𞤢𞤨𞥆𞤮𞤴-𞤫-𞤶𞤫𞥅𞤺𞤮𞤮 𞤤𞤢𞤧𞤤𞤭𞤴𞤢𞤲𞤳𞤮𞥅𞤶𞤭 𞤂𞤢𞤦𞤭𞤪𞤭𞤴𞤢 𞤯𞤭𞤲. 𞤉 𞤸𞤭𞤲𞤤𞤫⹁ 𞤊𞤵𞤤𞤩𞤫 𞤩𞤫𞤲 𞤲𞤮 𞤼𞤢𞤱𞤢𞥄 𞤫 𞤢𞤣𞤭𞥅𞤩𞤫 𞤩𞤫𞤲 𞤢𞤪𞤵𞤣𞤫 𞤂𞤢𞤦𞤫𞤪𞤭𞤴𞤢. 𞤖𞤢𞤴 𞤊𞤵𞤤𞤩𞤫 𞤲𞤮 𞤼𞤢𞤱𞤢𞤲𞤮𞥅 𞤳𞤢𞤣𞤭 𞤫 𞤩𞤢𞤤𞤫𞥅𞤩𞤫 𞤢𞤪𞤵𞤲𞤮𞥅𞤩𞤫 𞤱𞤢𞤤𞥆𞤢 𞤢𞤪𞤼𞤭𞤪𞤢𞤲𞤮𞥅𞤩𞤫 𞤩𞤫𞤲 𞤭𞤼𞥆𞤢𞥄 𞤀𞤥𞤫𞤪𞤭𞤳 𞤬𞤫𞤱𞤲𞤣𞤮 𞤂𞤢𞤦𞤫𞤪𞤭𞤴𞤢 𞤧𞤭𞤲𞤷𞤫𞤼𞤫𞥅. 𞤐𞤮 𞤼𞤢𞤱𞤢𞥄 𞤫 𞤩𞤫𞤲 𞤆𞤪𞤫𞤲𞤧 𞤢𞤦𞤣𞤵𞤪𞥆𞤢𞥄𞤸𞤢𞤥𞤢𞥄𞤲.

𞤑𞤮𞤲𞤮 𞤸𞤢𞤲𞤣𞤫 𞤊𞤵𞤤𞤩𞤫 𞤩𞤫𞤲 𞤲𞤮 𞤱𞤢𞤯𞤢𞥄 𞤶𞤢𞤲𞤢𞤲𞤩𞤫 𞤫 𞤲𞤣𞤫𞤪 𞤂𞤢𞤦𞤭𞤪𞤭𞤴𞤢. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤸𞤭𞤩𞤫 𞤼𞤢𞤥𞤨𞤭𞤲𞤫𞥅𞤣𞤫⹁ 𞤸𞤭𞤩𞤫 𞤼𞤮𞥅𞤻𞤫𞥅𞤣𞤫. 𞤑𞤮 𞤳𞤢𞤥𞤩𞤫 𞤼𞤵𞤲 𞤤𞤢𞤲𞤣𞤫𞤼𞤫𞥅 𞤴𞤮 𞤸𞤮𞤤𞥆𞤵 𞤳𞤢𞤴𞤣𞤭. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤸𞤢𞤴 𞤧𞤭 𞤬𞤵𞤤𞤩𞤫 𞤩𞤫𞤲 𞤸𞤮𞤤𞥆𞤭𞥅 𞤳𞤢𞤴𞤣𞤭⹁ 𞤯𞤵𞤥 𞤸𞤢𞤯𞤢𞤼𞤢𞥄 𞤩𞤫 𞤲𞤢𞤲𞤺𞤫𞥅𞤣𞤫 𞤫 𞤧𞤮𞤳𞤫𞥅𞤣𞤫. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤊𞤵𞤤𞤩𞤫 𞤩𞤫𞤲 𞤲𞤮 𞤱𞤭𞤳𞥆𞤢𞥄⹁ 𞤲𞤮 𞤴𞤢𞤱𞤢𞥄 𞤬𞤮𞤼𞤢. 𞤊𞤵𞤤𞤩𞤫 𞤬𞤮𞤨 𞤲𞤮 𞤱𞤢𞤯𞥆𞤭𞤲𞤢𞥄 𞤰𞤫𞤼𞥆𞤵𞤺𞤮𞤤 𞤳𞤢𞤴𞤣𞤭 𞤼𞤮𞥅𞤤𞤮𞤪𞤲𞤣𞤭 𞤱𞤢𞤤𞥆𞤢 𞤣𞤵𞤽𞤭𞤲𞤮𞤤 𞤦𞤫𞥅𞤪𞤮 (𞤧𞤫𞤧𞤵𞤪) 𞤸𞤢𞤴 𞤧𞤭 𞤼𞤢𞤱𞤭𞥅 𞤳𞤮 𞤂𞤢𞤦𞤭𞤪𞤭𞤴𞤢 𞤮𞤲𞤼𞤭𞤺𞤭 𞤶𞤭𞤦𞤭𞤲𞤢𞥄.

𞤑𞤮 𞤲𞤣𞤫 𞤮 𞤸𞤢𞥄𞤩𞤵𞤲𞤮𞥅 𞤯𞤫𞥅 𞤷𞤢𞤯𞤫𞥅𞤤𞤫 𞤫 𞤯𞤭𞥅 𞤥𞤫𞤼𞥆𞤫𞥅𞤲𞤣𞤫𞥅𞤶𞤭 𞤳𞤮 𞤊𞤵𞤤𞤩𞤫 𞤩𞤫𞤲 𞤪𞤮𞤲𞤣𞤢𞥄 𞤂𞤢𞤦𞤭𞤪𞤭𞤴𞤢 ⹁𞤧𞤵𞤳𞤢 𞤭𞤲𞥆𞤫𞤼𞤫𞥅𞤯𞤮 𞤃𞤵𞤸𞤢𞤥𞥆𞤫𞤣 𞤀𞤤𞤭𞥅 𞤄𞤢𞥄 𞤭𞤥𞥆𞤭𞥅 𞤧𞤭𞤲𞤷𞤭 𞤣𞤫𞤲𞤼𞤢𞤤 𞤣𞤢𞤼𞤢𞤲𞤼𞤮𞥅𞤲𞤺𞤢𞤤 𞤬𞤭𞥅 𞤸𞤢𞤹𞥆𞤫𞥅𞤶𞤭 𞤊𞤵𞤤𞤩𞤫 𞤩𞤫𞤲 𞤲𞤣𞤫𞤪 𞤂𞤭𞤦𞤫𞤪𞤭𞤴𞤢. 𞤌 𞤸𞤮𞤤𞥆𞤭 𞤤𞤢𞥄𞤥𞤵 𞤲𞤺𞤵𞤲 𞤫 𞤶𞤮𞥅𞤯𞤮𞤣𞤢𞤤 𞤲𞤺𞤢𞤤⹁ 𞤱𞤮𞤲𞤣𞤫𞤥𞤢 𞤱𞤮𞤲𞤢𞥄 𞤬𞤭𞥅 𞤮𞤲𞤼𞤭𞤺𞤭 𞤳𞤮 𞤆𞤵𞤤𞥆𞤮 𞤮 𞤱𞤢𞤯𞤭𞤪𞤼𞤫𞥅 𞤶𞤢𞤲𞤢𞤲𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤂𞤢𞤦𞤭𞤪𞤭𞤴𞤢 𞤲𞤣𞤭𞤲. 𞤌 𞤸𞤢𞥄𞤯𞤢𞥄𞤤𞤭 𞤫 𞤳𞤮𞤲𞤺𞤮𞤤 𞤼𞤵𞤲⹁ 𞤲𞤣𞤫 𞤆𞤵𞤤𞥆𞤮 𞤲𞤢𞤲𞤺𞤢𞥄 𞤱𞤮𞥅⹁ 𞤮 𞤣𞤢𞤪𞤮𞤼𞤮 𞤸𞤢𞥄 𞤮𞤲𞤼𞤭𞤺𞤭 𞤢𞤷𞥆𞤭𞤼𞤫𞥅⹁ 𞤬𞤮𞤼𞤭 𞤮𞤲𞤼𞤭𞤺𞤭 𞤳𞤮 𞤥𞤢𞤱𞤯𞤮 𞤥𞤢𞤤𞥆𞤢 𞤧𞤵𞤳𞤢⹁ 𞤬𞤮𞤼𞤭 𞤳𞤮 𞤺𞤮𞤪𞤳𞤮 𞤥𞤢𞥄 𞤳𞤮 𞤣𞤫𞤦𞥆𞤮.

𞤌 𞤱𞤢𞤯𞤼𞤭 𞤳𞤢𞤣𞤭 𞤴𞤢𞤤𞤼𞤭𞤲𞤺𞤮𞤤 𞤯𞤮𞤱𞤤𞤭 𞤳𞤢 𞤲𞤶𞤵𞤩𞥆𞤵𞤤𞤭 𞤶𞤮𞤳𞥆𞤮𞤣𞤭𞤪𞤫 𞤬𞤭𞥅 𞤬𞤭𞤲𞤣𞤭𞤲𞤺𞤮𞤤 𞤴𞤭𞤥𞤩𞤫 𞤩𞤫𞤲⹁ 𞤩𞤢𞤲𞤺𞤭𞤲𞤢 𞤼𞤮𞥅𞤻𞤫 𞤱𞤮𞤲𞤵𞤯𞤫 𞤸𞤮𞥅𞤪𞤫 𞤊𞤵𞤤𞤩𞤫 𞤩𞤫𞤲 𞤫 𞤲𞤣𞤫𞤪 𞤤𞤫𞤴𞤣𞤭 𞤂𞤢𞤦𞤭𞤪𞤭𞤴𞤢 𞤲𞤣𞤭𞤲. 𞤌 𞤲𞤮𞤣𞥆𞤢 𞤳𞤢𞤣𞤭 𞤳𞤢 𞤳𞤭𞤦𞤭𞤪𞤯𞤫 (𞤪𞤢𞤶𞤮𞥅𞤶𞤭) 𞤼𞤵𞤥𞤮 𞤳𞤢𞤤𞤢 𞤲𞤣𞤫 𞤆𞤵𞤤𞥆𞤮 𞤲𞤢𞤲𞤺𞤢𞥄 𞤸𞤢𞤪𞤢 𞤮𞤲𞤼𞤭𞤺𞤭 𞤦𞤮𞤲𞥆𞤢𞥄. 𞤍𞤵𞤥 𞤧𞤢𞤦𞤭𞤲𞤢 𞤮𞤲𞤼𞤭𞤺𞤭 𞤢𞤷𞥆𞤭𞤼𞤫𞥅𞤣𞤫.
𞤐𞤣𞤫𞤲 𞤼𞤵𞤥𞤢⹁ 𞤒𞤭𞥅𞤤𞤭𞤪𞤣𞤫 𞤖𞤢𞤤𞤬𞤭𞤲𞤢𞥄𞤣𞤫 𞤬𞤭𞥅 𞤲𞤢𞥄𞤼𞤮 𞤂𞤢𞤦𞤭𞤪𞤭𞤴𞤢 (𞤋𞤥𞤭𞤺𞤢𞤪𞤢𞤧𞤭𞤮𞤲) 𞤼𞤮𞤽𞤢𞤲𞤭 𞤥𞤮 𞤱𞤢𞤯𞤵𞤺𞤮𞤤 𞤯𞤮𞤱𞤤𞤭 𞤳𞤢 𞤸𞤢𞤳𞤼𞤭𞤧𞤵. 𞤑𞤮𞤲𞤮 𞤯𞤵𞤥 𞤸𞤢𞤯𞤢𞥄𞤤𞤭 𞤥𞤮 𞤣𞤵𞥅𞤥𞤢𞤺𞤮𞤤 𞤫 𞤺𞤮𞤤𞥆𞤫 𞤯𞤫 𞤮 𞤶𞤮𞤳𞥆𞤭 𞤯𞤫𞤲.

𞤇𞤢𞥄𞤴𞤼𞤭 𞤩𞤫 𞤢𞤲𞤣𞤭𞥅 𞤱𞤮𞤲𞤣𞤫𞤥𞤢 𞤃𞤵𞤸𞥆𞤢𞤥𞤫𞤣 𞤀𞤤𞤭𞥅 𞤄𞤢𞥄 𞤲𞤮 𞤬𞤭𞤲𞤣𞤭𞤲𞤣𞤫 𞤴𞤭𞤥𞤩𞤫 𞤩𞤫𞤲⹁ 𞤮𞤥𞤮 𞤣𞤢𞤪𞤭𞥅 𞤣𞤢𞤪𞤼𞤢𞤲𞤭𞥅 𞤊𞤵𞤤𞤩𞤫 𞤩𞤫𞤲⹁ 𞤩𞤫 𞤲𞤢𞤲𞤺𞤭 𞤥𞤮⹁ 𞤩𞤫 𞤲𞤢𞤩𞤭𞤪𞤭 𞤥𞤮 𞤅𞤢𞤪𞤤𞤮𞤲 𞤬𞤭𞥅 𞤳𞤢𞤤𞤢 𞤱𞤮𞤲𞤢𞥄 𞤼𞤮𞤲 𞤮 𞤶𞤫𞤴𞤭𞤪𞤢𞥄⹁ 𞤮 𞤢𞤲𞤣𞤢𞥄 𞤼𞤮𞤲 𞤳𞤢𞤣𞤭.

𞤐𞤣𞤫 𞤼𞤢𞤱𞤵𞤲𞤮𞥅 𞤮 𞤶𞤮𞤺𞤢𞥄𞤳𞤭 𞤳𞤢𞤴𞤣𞤭 𞤅𞤢𞤪𞤤𞤮𞤲 𞤸𞤢𞤴 𞤱𞤮𞥅𞤼𞤭𞤪𞤭⹁ 𞤮 𞤴𞤫𞥅𞤼𞤭𞥅 𞤳𞤵𞥅𞤩𞤲𞤮𞥅𞤩𞤫 𞤧𞤢𞤪𞤤𞤮𞤲𞤢𞥄𞤩𞤫 𞤩𞤫𞤲 𞤱𞤮𞤲𞤣𞤫𞤥𞤢 𞤳𞤮 𞤂𞤢𞤦𞤭𞤪𞤭𞤴𞤢 𞤮 𞤸𞤫𞤩𞤢𞥄 𞤮 𞤥𞤢𞤱𞤲𞤭⹁ 𞤳𞤮 𞤼𞤮𞤲 𞤳𞤢𞤣𞤭 𞤮 𞤶𞤢𞤲𞤺𞤭. 𞤌 𞤢𞤲𞤣𞤢𞥄 𞤸𞤢𞤴 𞤲𞤮𞤳𞥆𞤵 𞤧𞤭 𞤱𞤮𞤲𞤢𞥄 𞤂𞤢𞤦𞤭𞤪𞤭𞤴𞤢. 𞤐𞤣𞤫𞤲 𞤧𞤢𞤴⹁ 𞤮 𞤲𞤢𞤩𞤼𞤭𞤼𞤢𞥄 𞤂𞤢𞤦𞤭𞤪𞤭𞤴𞤢. 𞤊𞤭𞥅 𞤲𞤮𞤲 𞤮 𞤢𞤷𞥆𞤭𞤼𞤢𞥄𞤥𞤢⹁ 𞤸𞤢𞥄 𞤶𞤮𞥅𞤲𞤭 𞤻𞤢𞥄𞤱𞤮𞥅𞤪𞤫 𞤲𞤣𞤫 𞤮 𞤬𞤢𞤱𞤢𞥄 𞤲𞤣𞤫𞤲 𞤤𞤢𞤲𞥆𞤢𞥄𞤤𞤭.

𞤃𞤵𞤸𞤢𞤥𞥆𞤫𞤣 𞤀𞤤𞤭𞥅 𞤤𞤫 𞤦𞤮𞤲𞥆𞤢𞥄⹁ 𞤱𞤵𞤶𞥆𞤢𞥄⹁ 𞤮 𞤶𞤢𞤺𞥆𞤭𞤼𞤢𞥄 𞤧𞤢𞤪𞤭𞤴𞤢 𞤤𞤫𞤴𞤣𞤭 𞤂𞤢𞤦𞤪𞤭𞤴𞤢 𞤲𞤣𞤭𞤲. 𞤑𞤮 𞤩𞤫 𞤷𞤵𞤳𞥆𞤮𞤪𞤭 𞤥𞤮⹁ 𞤳𞤮 𞤬𞤭𞥅 𞤳𞤮 𞤮 𞤣𞤢𞤪𞤢𞤲𞤭𞥅 𞤳𞤮𞤲 𞤸𞤢𞤹𞥆𞤫𞥅𞤶𞤭 𞤊𞤵𞤤𞤩𞤫 𞤩𞤫𞤲⹁ 𞤬𞤭𞥅 𞤲𞤮 𞤼𞤮𞥅𞤻𞤫 𞤯𞤫𞤲 𞤢𞤷𞥆𞤭𞤪𞤢 𞤸𞤮𞥅𞤪𞤫 𞤥𞤢𞤩𞥆𞤫 𞤫 𞤲𞤮 𞤆𞤵𞤤𞥆𞤮 𞤳𞤢𞤤𞤢 𞤸𞤫𞤩𞤼𞤭𞤪𞤢 𞤸𞤮𞥅𞤪𞤫 𞤥𞤵𞤵𞤲 𞤲𞤣𞤫𞤪 𞤂𞤢𞤦𞤭𞤪𞤭𞤴𞤢.

𞤊𞤵𞤤𞤩𞤫 𞤩𞤫𞤲 𞤫 𞤳𞤢𞤤𞤢 𞤲𞤫𞤯𞥆𞤮 𞤢𞤻𞤵𞤯𞤮 𞤼𞤮𞥅𞤻𞤫 𞤫 𞤱𞤭𞤳𞥆𞤫𞥅𞤣𞤫⹁ 𞤼𞤮𞤪𞤢𞥄𞤥𞤢 𞤱𞤢𞤤𞥆𞤭𞤼𞤢𞤺𞤮𞤤 𞤃𞤮𞤸𞤢𞤥𞥆𞤫𞤣 𞤀𞤤𞤭𞥅 𞤫 𞤲𞤺𞤮𞥅 𞤶𞤭𞤨𞥆𞤭𞤪𞤮 𞤲𞤺𞤮 𞤮 𞤱𞤮𞤲𞤭 𞤫 𞤥𞤵𞤵𞤲. 𞤒𞤮 𞤀𞤤𞤤𞤢 𞤱𞤢𞤤𞥆𞤵 𞤥𞤮 𞤮 𞤬𞤮𞥅𞤤𞤢.

𞤍𞤫𞥅 𞤷𞤢𞤯𞤫𞥅𞤤𞤫 𞤯𞤫 𞤊𞤵𞤤𞤩𞤫 𞤩𞤫𞤲 𞤪𞤮𞤲𞤣𞤭𞥅 𞤂𞤢𞤦𞤭𞤪𞤭𞤴𞤢⹁ 𞤳𞤮 𞤱𞤢 𞤯𞤫𞤲 𞤩𞤫 𞤪𞤮𞤲𞤣𞤭𞥅 𞤫 𞤤𞤫𞤴𞤯𞤫 𞤯𞤵𞥅𞤯𞤵𞤯𞤫 𞤲𞤣𞤫𞤪 𞤖𞤭𞤪𞤲𞤢 𞤀𞤬𞤪𞤭𞤳. 𞤑𞤮 𞤱𞤢𞤲𞤭𞥅 𞤳𞤢𞤣𞤭 𞤩𞤫 𞤱𞤭𞤳𞥆𞤮𞤪𞤢𞥄 𞤫 𞤲𞤣𞤫𞤪 𞤳𞤫𞤴𞤣𞤭 𞤘𞤢𞤲𞤢. 𞤊𞤭𞥅 𞤳𞤢𞤤𞤢 𞤫𞤩𞤫 𞤶𞤮𞤺𞤭𞥅 𞤳𞤮𞤯𞤢𞤲𞤯𞤫 𞤯𞤫 𞤥𞤢𞥄𞤥𞤭𞤪𞤢𞥄𞤩𞤫 𞤥𞤢𞤩𞥆𞤫 𞤧𞤭𞤲𞤷𞤭 𞤢𞤣𞤮 𞤨𞤮𞤪𞤼𞤮 𞤉𞤲𞤺𞤫𞤤𞤫 𞤲𞤢𞥄𞤼𞤵𞤣𞤫 𞤘𞤢𞤲𞤢 𞤫 𞤢𞤣𞤮 𞤘𞤢𞤲𞤢 𞤧𞤭𞤲𞤷𞤫𞥅𞤣𞤫. 𞤖𞤢𞥄 𞤶𞤮𞥅𞤲𞤭 𞤸𞤫𞤩𞤵𞤺𞤮𞤤 𞤥𞤢𞤩𞥆𞤫 𞤳𞤢𞤴𞤣𞤭 𞤼𞤮𞤲 𞤲𞤮 𞤧𞤢𞤣𞤼𞤭 𞤬𞤮𞤼𞤢.

𞤘𞤢𞤥𞤦𞤭𞤴𞤢 𞤳𞤢𞤣𞤭⹁ 𞤤𞤫𞤴𞤣𞤭 𞤲𞤣𞤭 𞤥𞤢𞥄𞤥𞤭𞤪𞤢𞥄𞤩𞤫 𞤊𞤵𞤤𞤩𞤫 𞤤𞤢𞥄𞤥𞤭𞤲𞤮𞥅 𞤢𞤣𞤮 𞤉𞤲𞤺𞤫𞤤𞤫𞥅𞤩𞤫 𞤩𞤫𞤲 𞤲𞤢𞥄𞤼𞤵𞤣𞤫 𞤀𞤬𞤪𞤭𞤳⹁ 𞤆𞤵𞤤𞥆𞤮 𞤩𞤵𞥅𞤩𞤼𞤭𞤲𞤢𞥄 𞤼𞤮𞤲. 𞤑𞤮 𞤳𞤢𞤥𞤩𞤫 𞤼𞤢𞤲 𞤰𞤢𞤥𞤼𞤫𞤼𞤫𞥅 𞤼𞤮𞤲 𞤳𞤢𞤴𞤣𞤭𞥅𞤪𞤭 𞤱𞤭𞤴𞤫𞥅𞤼𞤫𞥅𞤲𞤣𞤭 “𞤀𞤤𞤭𞤴𞤢𞤲𞤧”.

𞤖𞤢𞤴 𞤘𞤭𞤲𞤫 𞤑𞤮𞤲𞤢𞥄𞤳𞤭𞤪𞤭⹁ 𞤤𞤫𞤴𞤣𞤭 𞤲𞤣𞤭 𞤊𞤵𞥅𞤼𞤢 𞤔𞤢𞤤𞤮𞥅 (𞤬𞤵𞤲𞤼𞤭𞤪𞤣𞤫 𞤊𞤵𞤤𞤩𞤫) 𞤼𞤢𞤱𞤢𞥄 𞤫 𞤥𞤵𞤵𞤲⹁ 𞤊𞤵𞤤𞤩𞤫 𞤩𞤫𞤲 𞤲𞤮 𞤱𞤭𞤳𞥆𞤢𞥄⹁ 𞤱𞤢𞤯𞤢𞥄 𞤶𞤢𞤲𞤢𞤲𞤩𞤫. 𞤍𞤵𞤲𞤤𞤫⹁ 𞤯𞤮𞥅 𞤳𞤢𞤣𞤭⹁ 𞤢𞤣𞤮 𞤆𞤮𞤪𞤼𞤮𞥅𞤩𞤫 𞤩𞤫𞤲 𞤲𞤢𞥄𞤼𞤵𞤣𞤫⹁ 𞤳𞤮 𞤊𞤵𞤤𞤩𞤫 𞤩𞤫𞤲 𞤤𞤢𞥄𞤥𞤭𞥅𞤲𞤮𞥅. 𞤘𞤭𞤤𞤢 𞤳𞤢 𞤣𞤮𞤱𞤪𞤭 𞤘𞤭𞤲𞤫 𞤸𞤢𞥄 𞤳𞤢 𞤬𞤮𞤲𞤺𞤮 𞤃𞤢𞥄𞤴𞤮 𞤃𞤢𞤱𞤲𞤺𞤮 𞤀𞤼𞤤𞤢𞤲𞤼𞤭𞤱𞤮𞤤⹁ 𞤳𞤮 𞤊𞤵𞥅𞤼𞤢 𞤔𞤢𞤤𞤮𞥅 𞤲𞤮𞥅𞤼𞤮𞤪𞤢𞤴𞤲𞤮𞥅⹁ 𞤶𞤮𞤥𞤢𞤴𞤲𞤮𞥅.

𞤍𞤵𞤥 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤊𞤵𞤤𞤩𞤫 𞤩𞤫𞤲 𞤲𞤮 𞤸𞤢𞥄𞤲𞤭 𞤶𞤮𞤺𞤲𞤭𞤲𞥋𞤣𞤪𞤭𞤲𞤣𞤫 𞤶𞤵𞥅𞤯𞤫 𞤭𞤥𞥆𞤮𞥅 𞤣𞤢𞤪𞤮𞥅 𞤰𞤢𞤥𞤼𞤢 𞤸𞤫𞤳𞥆𞤫𞥅𞤶𞤭 𞤥𞤵𞤵𞤲. 𞤑𞤮𞤲𞤮 𞤳𞤮 𞤢𞤣𞤭𞥅 𞤳𞤮𞤲⹁ 𞤊𞤵𞤤𞤩𞤫 𞤩𞤫𞤲 𞤲𞤮 𞤸𞤢𞥄𞤲𞤭 𞤩𞤫𞤴𞤣𞤵𞤣𞤫 𞤨𞤮𞤼𞥆𞤢𞤤 𞤫 𞤶𞤮𞤺𞤲𞤭𞤲𞥋𞤣𞤭𞤪𞤢𞤤 𞤶𞤵𞥅𞤯𞤫⹁ 𞤩𞤫 𞤢𞤷𞥆𞤢 𞤩𞤢𞥄𞤪𞤮𞤪𞤺𞤮𞤤 𞤭𞤱𞤣𞤭 𞤩𞤫 𞤧𞤫𞤲𞤣𞤢 𞤸𞤢𞤳𞥆𞤵𞤲𞥋𞤣𞤫𞥅𞤶𞤭 𞤥𞤢𞤩𞥆𞤫. 𞤆𞤵𞤤𞥆𞤮 𞤬𞤮𞤨 𞤳𞤮 𞤨𞤵𞤤𞥆𞤮 𞤬𞤮𞤼𞤭 𞤳𞤮 𞤚𞤭𞤥𞤦𞤮 𞤥𞤢𞥄𞤤𞥆𞤢 𞤳𞤮 𞤚𞤭𞤥𞤦𞤭 𞤮𞤲𞤼𞤭𞤺𞤭 𞤭𞤱𞤭⹁ 𞤬𞤮𞤼𞤭 𞤳𞤢 𞤂𞤢𞤦𞤫 𞤥𞤢𞤤𞥆𞤢 𞤳𞤮 𞤀𞥄𞤣𞤢𞤥𞤢𞤱𞤢𞥄 𞤥𞤢𞥄 𞤅𞤮𞤳𞥆𞤮𞤼𞤮.

𞤅𞤮 𞤊𞤵𞤤𞤩𞤫 𞤬𞤮𞤨 𞤶𞤮𞤺𞤲𞤭𞤲𞥋𞤣𞤭𞤪𞤭𞥅 𞤶𞤵𞥅𞤯𞤫⹁ 𞤸𞤢𞤴 𞤺𞤮𞥅𞤼𞤮 𞤧𞤵𞥅𞤧𞤢𞤼𞤢𞥄 𞤴𞤢𞤱𞤢𞥄𞤣𞤫 𞤩𞤫 𞤫 𞤲𞤣𞤫𞤪 𞤀𞤬𞤪𞤭𞤳. 𞤖𞤮𞥅𞤪𞤫 𞤳𞤮 𞤩𞤫 𞤯𞤵𞥅𞤯𞤭 𞤳𞤮𞤲 𞤫 𞤳𞤮 𞤩𞤫 𞤴𞤫𞤯𞤢𞥄 𞤳𞤮𞤲 𞤶𞤢𞤱𞤤𞤫⹁ 𞤸𞤢𞤲𞤣𞤫 𞤊𞤵𞤤𞤩𞤫 𞤩𞤫𞤲 𞤲𞤮 𞤤𞤢𞥄𞤥𞤭𞥅 𞤐𞤢𞤶𞤫𞤪𞤭𞤴𞤢⹁ 𞤤𞤫𞤴𞤣𞤭 𞤩𞤵𞤪𞤲𞤣𞤭 𞤤𞤫𞤴𞤯𞤫 𞤀𞤬𞤪𞤭𞤳 𞤬𞤮𞤨 𞤷𞤫𞤥𞤦𞤫 𞤫 𞤣𞤮𞥅𞤤𞤫. 𞤑𞤮 𞤊𞤵𞤤𞤩𞤫 𞤳𞤢𞤣𞤭 𞤤𞤢𞥄𞤥𞤭𞥅 𞤅𞤫𞤲𞤫𞤺𞤢𞤤⹁ 𞤘𞤢𞤥𞤦𞤭𞤴𞤢 𞤫 𞤘𞤭𞤲𞤫 𞤦𞤭𞤧𞤢𞤱𞤮𞥅. 𞤑𞤮 𞤆𞤵𞤤𞥆𞤮 𞤢𞤪𞤣𞤭𞤲𞤢𞥄 𞤸𞤮𞥅𞤪𞤫 𞤆𞤮𞤼𞥆𞤢𞤤 𞤀𞤬𞤪𞤭𞤳⹁ 𞤮𞤲 𞤳𞤮 𞤃𞤢𞤳𞤭 𞤅𞤢𞤤. 𞤑𞤮 𞤓𞤥𞤢𞤪𞤵 𞤐𞤦𞤢𞤤𞥆𞤮⹁ 𞤨𞤵𞤤𞥆𞤮 𞤳𞤢𞤣𞤭⹁ 𞤱𞤮𞤲𞤭 𞤸𞤮𞥅𞤪𞤫 𞤁𞤫𞤐𞤘𞤂𞤢𞤖𞤀. 𞤳𞤮𞤲𞤮 𞤯𞤵𞤥 𞤬𞤮𞤨 𞤢𞤤𞤢𞥄 𞤸𞤢𞤯𞤵𞤣𞤫 𞤼𞤮𞥅𞤻𞤫 𞤲𞤮 𞤫 𞤸𞤮𞥅𞤪𞤫 𞤊𞤵𞤤𞤩𞤫 𞤩𞤫𞤲 𞤧𞤢𞤦𞤵 𞤢𞤲𞤺𞤢𞤤 𞤨𞤮𞤼𞥆𞤢𞤤.

𞤅𞤮 𞤊𞤵𞤤𞤩𞤫 𞤩𞤫𞤲 𞤲𞤮 𞤬𞤢𞥄𞤤𞤢𞥄 𞤸𞤫𞤩𞤼𞤵𞤣𞤫 𞤸𞤮𞥅𞤪𞤫 𞤥𞤵𞤵𞤲⹁ 𞤸𞤫𞤩𞤼𞤭𞤼𞤢 𞤼𞤫𞤣𞥆𞤵𞤲𞥋𞤺𞤢𞤤 𞤲𞤺𞤢𞤤 𞤥𞤢𞤱𞤩𞤫 𞤥𞤢𞤩𞥆𞤫 𞤱𞤮𞤲𞤣𞤵𞤲𞤮𞥅 𞤫 𞤥𞤵𞤵𞤲⹁ 𞤫𞤩𞤫 𞤸𞤢𞥄𞤲𞤭 𞤶𞤮𞤺𞤮𞤲𞥋𞤣𞤭𞤪𞤣𞤫⹁ 𞤩𞤫 𞤶𞤮𞤺𞤭𞤼𞤮𞥅 𞤨𞤭𞤲𞤫 𞤥𞤢𞤩𞥆𞤫⹁ 𞤯𞤫𞤲𞤺𞤢𞤤 𞤥𞤢𞤩𞥆𞤫 𞤫 𞤦𞤭𞤲𞤣𞤮𞤤 𞤥𞤢𞤩𞥆𞤫.

𞤉𞤲 𞤴𞤭𞤭𞥅 𞤧𞤭 𞤳𞤮 𞤶𞤢𞤱𞤣𞤭 𞤼𞤵𞤲 𞤪𞤮𞤳𞥆𞤢𞤴𞤲𞤮𞥅 𞤼𞤫𞤣𞥆𞤵𞤲𞥋𞤺𞤢𞤤 𞤫 𞤸𞤫𞤩𞤼𞤢𞥄𞤪𞤫⹁ 𞤸𞤢𞤪𞤢𞤴𞤲𞤮 𞤱𞤢 𞤊𞤵𞤤𞤩𞤫 𞤩𞤫𞤲 𞤫 𞤼𞤫𞤣𞥆𞤭𞤲𞤫𞥅𞤣𞤫 𞤢𞤤𞤢𞥄 𞤖𞤭𞤪𞤲𞤢 𞤀𞤬𞤪𞤭𞤳. 𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤱𞤮𞤲𞤢𞥄 𞤶𞤢𞤱𞤣𞤭 𞤼𞤢𞤲 𞤼𞤫𞤣𞥆𞤵𞤲𞥋𞤺𞤢𞤤 𞤸𞤫𞤩𞤮𞤪𞤼𞤢⹁ 𞤳𞤮 𞤯𞤵𞤥 𞤱𞤢𞤯𞤭 𞤧𞤮 𞤊𞤵𞤤𞤩𞤫 𞤲𞤮 𞤴𞤢𞤱𞤮𞤣𞤢𞥄 𞤫 𞤶𞤢𞤱𞤤𞤫 𞤥𞤢𞤩𞥆𞤫. 𞤈𞤫𞤲𞤣𞤮 𞤩𞤢𞤲𞤼𞤮𞤼𞤢𞥄𞤳𞤮 𞤩𞤢𞥄𞤱𞤮 𞤯𞤫𞤲𞤺𞤢𞤤 𞤫 𞤦𞤭𞤲𞤣𞤮𞤤.

𞤐𞤣𞤫 𞤼𞤢𞤱𞤵𞤲𞤮𞥅 𞤨𞤮𞥅𞤤𞤺𞤢𞤤 𞤸𞤫𞤩𞤭𞤳𞤫 𞤱𞤮𞥅 𞤧𞤭 𞤨𞤮𞤼𞥆𞤢𞤤 𞤻𞤭𞥅𞤩𞤭𞥅⹁ 𞤲𞤺𞤢𞤤 𞤻𞤭𞥅𞤩𞤭𞥅 𞤤𞤫 𞤱𞤮𞥅 𞤧𞤭 𞤬𞤮𞤨 𞤬𞤮𞤼𞥆𞤭𞥅 𞤫 𞤳𞤮 𞤸𞤢𞤱𞤼𞤢𞥄 𞤳𞤮𞤲⹁ 𞤢𞤱𞤢 𞤊𞤵𞤤𞤩𞤫 𞤬𞤮𞤼𞥆𞤫𞥅 𞤫 𞤸𞤮𞥅𞤪𞤫 𞤯𞤫𞤲𞤺𞤢𞤤 𞤺𞤮𞥅𞤼𞤢𞤤 𞤫 𞤦𞤭𞤲𞤣𞤮𞤤 𞤺𞤮𞥅𞤼𞤮𞤤. 𞤐𞤮𞤳𞥆𞤵 𞤳𞤢𞤤𞤢 𞤳𞤢 𞤆𞤵𞤤𞥆𞤮 𞤥𞤫𞥅𞤥𞤭𞤪𞤢𞥄 𞤼𞤮𞥅𞤫⹁ 𞤴𞤮 𞤱𞤢𞤵 𞤱𞤢 𞤧𞤭 𞤳𞤮 𞤨𞤵𞤤𞥆𞤮 𞤳𞤢𞤤𞤢 𞤥𞤫𞥅𞤥𞤢𞥄.

𞤑𞤵𞤯𞤮𞤤 𞤀𞤴𞥃𞤢 𞤅𞤮𞥅.
𞤅𞤫𞥅𞤣𞤭𞤼𞤢𞤲𞤣𞤫 𞤀𞤦𞤣𞤵𞤤𞥆𞤢𞥄𞤸𞤭 𞤔𞤵𞤥𞤢 𞤆𞤢𞤲𞤶𞤢𞤪𞤢 𞤔𞤢𞤤𞥆𞤮