𞤖𞤌𞤂 𞤑𞤌 𞤊𞤉𞤏𞤐𞤁𞤋𞥅 𞤅𞤉𞤐𞤉𞤘𞤀𞥄𞤂؟

𞤂𞤭𞤣𞥆𞤭𞥅𞤩𞤫 𞤃𞤢𞤳𞤭 𞤅𞤢𞥄𞤤 𞤩𞤫𞤲 𞤲𞤮𞤣𞥆𞤭𞤼𞤭𞥅 𞤧𞤫𞤲𞤫𞤺𞤢𞤤𞤲𞤢𞥄𞤩𞤫 𞤩𞤫𞤲 𞤴𞤢𞤤𞤼𞤵𞤺𞤮𞤤 𞤳𞤢 𞤤𞤢𞥄𞤱𞤭 𞤺𞤭𞤤𞤢 𞤶𞤢𞤲𞤺𞤮 𞤫 𞤢𞥄𞤩𞤵𞤲𞥋𞤣𞤫 𞤻𞤢𞤤𞤲𞤣𞤫 𞥘 𞤲𞤣𞤵𞥅 𞤤𞤫𞤱𞤪𞤵 𞤐𞤦𞤮𞥅𞤴𞤮 𞤸𞤢𞥄 𞤫 𞤲𞤶𞤫𞤧𞤤𞤢𞥄𞤪𞤫 𞤻𞤢𞤤𞤲𞤣𞤫 𞥑𞥐  𞤥𞤢𞤴𞤪𞤵⹁ 𞤬𞤭𞥅  𞤩𞤢𞤲𞤺𞤭𞤲𞤢𞤲𞤺𞤮𞤤 𞤃𞤢𞤳𞤭 𞤅𞤢𞤤 𞤼𞤭𞤳𞥆𞤫𞤪𞤫 𞤥𞤢𞤩𞥆𞤫 𞤲𞤣𞤫𞤲.

𞤘𞤭𞤤𞤢 𞤫 𞤲𞤶𞤫𞤧𞤤𞤢𞥄𞤪𞤫 𞤻𞤢𞤤𞤲𞤣𞤫 𞥓 𞤐𞤦𞤮𞥅𞤴𞤮 𞥒𞥐𞥒𞥑⹁ 𞤧𞤫𞤲𞤫𞤺𞤢𞤤𞤲𞤢𞥄𞤩𞤫 𞤩𞤫𞤲 𞤲𞤮 𞤭𞤥𞥆𞤢𞤲𞤭𞥅 𞤃𞤢𞤳𞤭 𞤅𞤢𞥄𞤤⹁ 𞤸𞤮𞥅𞤪𞤫𞥅𞤶𞤮 𞤅𞤫𞤲𞤫𞤺𞤢𞤤 𞤮𞤲⹁ 𞤦𞤢𞤯𞤼𞤢𞤲𞤫 𞤲𞤢𞤲𞤺𞤫𞤺𞤮𞤤 𞤓𞤧𞤥𞤢𞥄𞤲 𞤅𞤮𞤲𞤳𞤮.

𞤑𞤮 𞤓𞤧𞤥𞤢𞥄𞤲 𞤅𞤮𞤲𞤳𞤮 𞤱𞤮𞤲𞤭 𞤸𞤮𞥅𞤪𞤫𞥅𞤶𞤮 𞤬𞤫𞤣𞥆𞤫 𞤭𞤲𞥆𞤫𞤼𞤫𞥅𞤲𞤣𞤫 𞤆𞤢𞤧𞤼𞤫𞤬 (PASTEF) . 𞤌 𞤣𞤢𞤪𞤭𞤲𞤮 𞤬𞤭𞥅 𞤸𞤮𞥅𞤪𞤢𞥄𞤺𞤵 𞤧𞤫𞤲𞤫𞤺𞤢𞤤 𞤲𞤺𞤵𞤲 𞤫 𞤧𞤵𞤩𞤮 𞤱𞤢𞤯𞤵𞤲𞤮𞥅𞤲𞤺𞤮 𞤲𞤺𞤮𞤲 𞤫 𞥒𞥐𞥑𞥙. 𞤉 𞤲𞤺𞤮𞤲 𞤧𞤵𞤩𞤮⹁ 𞤮 𞤤𞤢𞥄𞤼𞤭𞤲𞤮 𞤼𞤢𞤼𞤢𞤩𞤮. 𞤔𞤮𞥅𞤲𞤭 𞤳𞤮 𞤮 𞤧𞤢𞤪𞤴𞤮𞥅𞤱𞤮 𞤳𞤢 𞤅𞤢𞤪𞤴𞤭𞤲𞤭𞤪𞤣𞤵 𞤅𞤫𞤲𞤫𞤺𞤢𞤤. 𞤀𞤣𞤮 𞤮 𞤤𞤢𞥄𞤼𞤢𞥄𞤣𞤫 𞤧𞤢𞤪𞤴𞤮𞥅𞤱𞤮⹁ 𞤸𞤢𞤪𞤭 𞤳𞤮 𞤮 𞤰𞤢𞤥𞤼𞤢𞤲𞤮𞥅𞤱𞤮 𞤶𞤢𞥄𞤺𞤮𞤪𞤢𞤤 𞤅𞤫𞤲𞤫𞤺𞤢𞤤 𞤲𞤺𞤢𞤤 𞤧𞤢𞤺𞤢𞤤𞥆𞤫. 𞤌𞤥𞤮 𞤥𞤢𞤪𞤭 𞤣𞤵𞥅𞤩𞤭 𞥔𞥖 (𞤷𞤢𞤨𞥆𞤢𞤲𞤯𞤫 𞤲𞤢𞤴𞤭 𞤫 𞤶𞤫𞥅𞤺𞤮𞤮). 𞤑𞤮 𞤱𞤮𞤲𞤭 𞤧𞤢𞤦𞤵 𞤫 𞤲𞤢𞤲𞤺𞤫𞥅𞤣𞤫⹁ 𞤳𞤮 𞤶𞤭𞤱𞤮 𞤩𞤮𞥅𞤧𞤮𞥅𞤸𞤮 𞤭𞤲𞥆𞤫𞥅𞤼𞤫𞥅𞤯𞤮 𞤀𞤶𞤭 𞤅𞤢𞥄𞤪 𞤱𞤮𞤲𞤭 𞤳𞤮 𞤬𞤢𞤱𞤭 𞤥𞤮 𞤰𞤫𞥅𞤩𞤮 𞤥𞤢𞤤𞥆𞤢 𞤼𞤫𞥅𞤼𞤮.

𞤑𞤮𞤲𞤮 𞤫 𞤳𞤵𞤯𞤮𞤤 𞤲𞤺𞤮𞤤 𞤮 𞤱𞤫𞤲𞤺𞤭 𞤳𞤢 𞤚𞤵𞤱𞤼𞤭𞤼𞤫𞤪 (Twitter)) 𞤻𞤢𞤤𞤲𞤣𞤫 𞥗 𞤕𞤮𞤤𞤼𞤮⹁ 𞤓𞤧𞤥𞤢𞥄𞤲 𞤅𞤮𞤲𞤳𞤮 𞤴𞤫𞤣𞥆𞤭𞥅 𞤴𞤢𞤲𞤵𞤺𞤮𞤤 𞤫 𞤮𞥅 𞤣𞤫𞤦𞥆𞤮 𞤳𞤮𞤲𞤮 𞤮 𞤽𞤭𞤪𞥆𞤭𞤼𞤭𞤳𞤫 𞤴𞤢𞤸𞤵𞤺𞤮𞤤 𞤳𞤢 𞤷𞤢𞥄𞤤𞤭𞥅𞤪𞤵 𞤸𞤢𞤳𞥆𞤮 𞤬𞤭𞥅 𞤩𞤮𞥅𞤧𞤫𞤺𞤮𞤤. 𞤉 𞤦𞤭𞤮𞤤 𞤥𞤢𞤳𞥆𞤮 𞤳𞤢𞤲𞤳𞤮 𞤅𞤮𞤲𞤳𞤮⹁ 𞤳𞤮 𞤃𞤢𞤳𞤭 𞤅𞤢𞤤  𞤫 𞤲𞤦𞤢𞤼𞤵𞤤𞤢𞥄𞤩𞤫 𞤥𞤵𞤲 𞤩𞤫𞤲 𞤬𞤫𞤬𞤭𞤲𞥋𞤣𞤭𞥅 𞤯𞤫𞥅 𞤼𞤵𞥅𞤥𞤫𞥅 𞤲𞤮 𞤩𞤫 𞤦𞤮𞤲𞥆𞤭𞤪𞤢 𞤭𞤲𞤣𞤫 𞤥𞤢𞤳𞥆𞤮.

𞤘𞤭𞤤𞤢 𞤴𞤭𞤥𞤩𞤫 𞤩𞤫𞤲 𞤬𞤵𞤯𞥆𞤭 𞤴𞤢𞤤𞤼𞤵𞤣𞤫⹁ 𞤲𞤶𞤮𞤱𞤮 𞤥𞤢𞥄𞤴𞤭𞥅 𞤥𞤢𞤤𞥆𞤢 𞤱𞤢𞤪𞤢𞥄𞤥𞤢 𞤫 𞤲𞤣𞤫𞤪 𞤤𞤫𞤴𞤣𞤭 𞤅𞤫𞤲𞤫𞤺𞤢𞤤 𞤲𞤣𞤭𞤲. 𞤆𞤭𞥅𞤶𞤭 𞤯𞤵𞥅𞤯𞤵𞤯𞤭 𞤴𞤫𞥅𞤦𞤢𞥄𞤥𞤢⹁ 𞤳𞤵𞤩𞤫𞥅𞤶𞤫 𞤫 𞤴𞤫𞥅𞤴𞤭𞤪𞤤𞤫 𞤴𞤭𞤪𞤦𞤭𞤲𞤢𞥄𞤥𞤢 𞤼𞤫𞤲𞤼𞤭𞤲𞤭𞥅 𞤴𞤫𞥅𞤴𞤭𞤪𞤤𞤫 𞤳𞤵𞤩𞥆𞤢𞤲 𞤚𞤮𞤼𞤢𞤤 𞤯𞤫𞤲.

𞤉 𞤥𞤭𞥅𞤶𞤮 𞤴𞤮𞤺𞤢 𞤫 𞤢𞤲𞤼𞤵𞤩𞤫 𞤩𞤫𞤲⹁ 𞤱𞤮𞤲𞤢𞥄 𞤬𞤭𞥅 𞤦𞤢𞤥𞤦𞤢𞤲𞤺𞤮𞤤 𞤅𞤮𞤲𞤳𞤮 𞤼𞤢𞤲 𞤱𞤮𞤲𞤭 𞤳𞤮 𞤥𞤵𞤪𞤼𞤭𞤲𞤭𞤪𞤭 𞤴𞤭𞤥𞤩𞤫 𞤩𞤫𞤲 𞤲𞤭𞥅. 𞤑𞤮 𞤷𞤢𞤯𞤫𞥅𞤤𞤫 𞤯𞤫 𞤧𞤵𞤳𞤢𞥄𞤩𞤫 𞤩𞤫𞤲 𞤱𞤮𞤲𞤣𞤭 𞤫 𞤥𞤵𞤵𞤲 𞤳𞤢 𞤦𞤢𞤲𞤽𞤫 𞤬𞤢𞤺𞥆𞤮 𞤫 𞤳𞤢 𞤺𞤮𞤤𞥆𞤫⹁ 𞤳𞤢𞤻𞤵𞤲 𞤫 𞤬𞤢𞥄𞤪𞤮𞤼𞤭𞤪𞤢𞤤 𞤸𞤢𞤳𞥆𞤵𞤲𞥋𞤣𞤫 𞤃𞤢𞤳𞤭 𞤅𞤢𞤤 𞤫 𞤊𞤢𞤪𞤢𞤲𞤧𞤭𞥅𞤩𞤫 𞤩𞤫𞤲 𞤱𞤮𞤲𞤭 𞤳𞤮 𞤩𞤵𞤪𞤭 𞤼𞤭𞤳𞥆𞤭𞤲𞤣𞤫 𞤧𞤵𞤳𞤢𞥄𞤩𞤫 𞤩𞤫𞤲.

𞤉 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤸𞤫𞥅𞤱𞤵𞤩𞤫 𞤲𞤮 𞤧𞤮𞤺𞤭𞤼𞤭𞥅 𞤱𞤮𞤲𞤣𞤫𞤥𞤢 𞤃𞤢𞤳𞤭 𞤅𞤢𞤤 𞤲𞤮 𞤬𞤢𞥄𞤤𞤢 𞤣𞤢𞤪𞤢𞥄𞤣𞤫 𞤼𞤢𞤼𞤢𞤩𞤵𞤲 𞤱𞤢𞤲𞤮 𞤲𞤮 𞤀𞤤𞤬𞤢 𞤑𞤮𞤲𞤣𞤫 𞤱𞤢𞤯𞤭𞤪𞤭 𞤲𞤮𞤲 𞤘𞤭𞤲𞤫 𞤥𞤢𞤤𞥆𞤢 𞤲𞤮 𞤀𞤤𞤢𞤧𞤢𞤲 𞤏𞤢𞤼𞤢𞤪𞤢 𞤱𞤢𞤯𞤭𞤪𞤭 𞤲𞤮𞤲 𞤑𞤮𞤼𞤣𞤭𞤾𞤢𞥄𞤪. 𞤑𞤮𞤲𞤮 𞤅𞤫𞤲𞤫𞤺𞤢𞤤 𞤲𞤮 𞤧𞤫𞥅𞤪𞤼𞤭 𞤫 𞤯𞤫𞤲 𞤤𞤫𞤴𞤯𞤫 𞤧𞤢𞤦𞤵𞤲𞤢 𞤣𞤫𞤥𞤮𞤳𞤢𞤪𞤢𞥄𞤳𞤵 𞤬𞤭𞥅 𞤳𞤢𞤤𞤢 𞤳𞤮 𞤯𞤫𞤱𞤤𞤵 𞤲𞤺𞤵⹁ 𞤲𞤮 𞤼𞤢𞤦𞤭𞤼𞤭 𞤼𞤮𞤲. 𞤖𞤢𞤴 𞤀𞤦𞤣𞤮𞤤𞥆𞤢𞥄𞤸𞤭 𞤏𞤢𞤣⹁ 𞤮𞥅 𞤥𞤮 𞤃𞤢𞤳𞤭 𞤅𞤢𞤤 𞤤𞤮𞤲𞤼𞤭𞥅⹁  𞤫𞤩𞥆𞤵𞤲𞤮 𞤶𞤮𞥅𞤯𞤭𞤼𞤢𞤺𞤮𞤤 𞤼𞤢𞤼𞤢𞤩𞤵𞤲⹁ 𞤳𞤮𞤲𞤮 𞤮 𞤱𞤢𞥄𞤱𞤢𞥄𞤲𞤮.

𞤖𞤢𞤲𞤣𞤫 𞤫 𞤪𞤫𞤬𞤦𞤭𞤪𞥆𞤫⹁ 𞤀𞤤𞤭𞤱𞥆𞤵 𞤄𞤢𞤣𞤢𞤪𞤢𞥄 𞤅𞤭𞥅𞤧𞤫⹁ 𞤸𞤢𞤤𞤬𞤭𞤲𞤢𞥄𞤯𞤮 𞤮𞤲 𞤬𞤭𞥅 𞤱𞤫𞤤𞤣𞤭𞤲𞤼𞤭𞤲𞤮 𞤲𞤺𞤮𞤲 𞤅𞤫𞤲𞤫𞤺𞤢𞤤⹁ 𞤼𞤮𞤪𞤭𞤲𞤮 𞤃𞤢𞤳𞤭 𞤅𞤢𞤤 𞤸𞤫𞤯𞤭𞤼𞤢𞤺𞤮𞤤 𞤧𞤵𞤳𞤢𞥄𞤩𞤫 𞤩𞤫𞤲. 𞤌 𞤼𞤮𞤪𞤭𞥅 𞤥𞤮 𞤳𞤢𞤣𞤭 𞤱𞤢𞤯𞤵𞤺𞤮𞤤 𞤴𞤫𞤱𞤼𞤫𞤪𞤫 𞤳𞤢 𞤰𞤫𞤱𞤤𞤵 𞤬𞤭𞥅 𞤻𞤭𞤨𞥆𞤵𞤺𞤮𞤤 𞤩𞤫𞤪𞤯𞤫 𞤴𞤭𞤥𞤩𞤫 𞤩𞤫𞤲. 𞤕𞤫𞤪𞤲𞤮𞥅𞤶𞤮 𞤥𞤢𞤱𞤯𞤮 𞤚𞤵𞥅𞤦𞤢𞥄 𞤮𞤲 𞤳𞤢𞤲 𞤼𞤮𞤽𞤭𞥅 𞤧𞤫𞤨𞥆𞤮 𞤫 𞤲𞤣𞤫𞤪 𞤼𞤵𞤬𞤵𞤲𞤣𞤫 𞤚𞤵𞥅𞤦𞤢𞥄 𞤲𞤣𞤫𞤲.

𞤊𞤫𞤱𞤲𞤣𞤮 𞤸𞤢𞤲𞤣𞤫⹁ 𞤤𞤫𞤴𞤯𞤫 𞤸𞤭𞤪𞤲𞤢 𞤀𞤬𞤪𞤭𞤳𞤢𞥄 𞤯𞤫𞤲 𞤲𞤮 𞤩𞤫𞤲𞤣𞤢𞤲𞤭 𞤥𞤵𞤪𞤼𞤮. 𞤅𞤵𞤳𞤢𞥄𞤩𞤫 𞤩𞤫𞤲 𞤸𞤢𞥄𞤩𞤭𞥅 𞤼𞤢𞤥𞤨𞤫𞤪𞤫 𞤲𞤣𞤫𞤲. 𞤇𞤫 𞤸𞤢𞥄𞤩𞤭𞥅 𞤱𞤭𞤫𞥅𞤣𞤫 𞤳𞤢𞤣𞤭 𞤴𞤮 𞤩𞤫 𞤥𞤵𞤻𞥆𞤮 𞤸𞤢𞤪𞤢 𞤤𞤫 𞤫𞤩𞤫 𞤧𞤵𞤼𞤭𞥅 𞤸𞤮𞥅𞤪𞤫𞥅𞤩𞤫 𞤤𞤫𞤴𞤯𞤫 𞤯𞤫𞤲 𞤲𞤮 𞤬𞤵𞤲𞤧𞤵𞤣𞤫 𞤶𞤢𞤱𞤤𞤫⹁ 𞤫 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭 𞤶𞤢𞤲𞤢𞤲𞤩𞤫 𞤩𞤫𞤲 𞤲𞤮 𞤭𞤱𞤵𞤣𞤫 𞤕𞤢𞤴𞤲𞤢 𞤥𞤢𞤤𞥆𞤢 𞤉𞤪𞤮𞤨 𞤢𞤪𞤢 𞤸𞤢𞤤𞤮𞤪𞤢 𞤶𞤢𞤱𞤤𞤫 𞤳𞤢𞤬𞤢𞥄𞤯𞤫 𞤯𞤫𞤲.

𞤐𞤣𞤫𞥅 𞤼𞤭𞤳𞥆𞤭𞤫𞤪𞤫 𞤧𞤮𞥅𞤥𞤭𞥅𞤲𞤣𞤫 𞤫 𞤧𞤵𞤳𞤢𞥄𞤩𞤫 𞤩𞤫𞤲 𞤲𞤮 𞤱𞤢𞤭 𞤱𞤢 𞤳𞤵𞤩𞥆𞤢𞤲⹁ 𞤳𞤮 𞤨𞤫𞤼𞥆𞤵𞤲 𞤼𞤢𞤲 𞤸𞤢𞤦𞥆𞤭 𞤬𞤭𞥅 𞤴𞤮 𞤬𞤫𞤼𞥆𞤵. 𞤅𞤵𞤳𞤢𞥄𞤩𞤫 𞤩𞤢𞤤𞤫𞥅𞤪𞤭 𞤲𞤣𞤭𞤲 𞤸𞤢𞥄𞤩𞤭𞥅 𞤸𞤮𞤴𞤲𞤫𞥅𞤣𞤫⹁ 𞤸𞤫𞤪𞤧𞤭𞤲𞤫𞥅𞤣𞤫 𞤫 𞤤𞤢𞥄𞤼𞤢𞤺𞤮𞤤 𞤶𞤢𞤤𞤲𞤮𞤪𞤭 𞤤𞤫𞤴𞤯𞤫 𞤢𞤣𞤵𞤲𞤢 𞤯𞤫𞤲. 𞤐𞤶𞤵𞤩𞥆𞤵𞤤𞤭 𞤶𞤮𞤳𞥆𞤮𞤲𞥋𞤣𞤭𞤪𞤫 𞤯𞤭𞤲 𞤱𞤫𞥅𞤩𞤭𞤼𞤢𞤲𞤭𞥅 𞤧𞤵𞤳𞤢𞥄𞤩𞤫 𞤀𞤬𞤪𞤭𞤳𞤢𞥄 𞤩𞤫𞤲 𞤳𞤮 𞤱𞤢𞥄𞤱𞤭 𞤺𞤢𞤧𞤵𞤣𞤫 𞤫 𞤤𞤫𞤴𞤣𞤭 𞤧𞤭 𞤲𞤣𞤭 𞤸𞤫𞤩𞤭𞥅 𞤤𞤢𞥄𞤥𞤩𞤫 𞤲𞤵𞤲𞤯𞤵𞤩𞤫 𞤫 𞤺𞤮𞤤𞥆𞤮𞥅𞤩𞤫. 𞤅𞤭 𞤱𞤮𞤲𞤢𞥄 𞤬𞤭𞥅 𞤤𞤫𞤰𞥆𞤭𞤤𞤢𞥄𞤳𞤵⹁ 𞤤𞤢𞥄𞤥𞤩𞤫 𞤯𞤵𞥅𞤯𞤵𞤩𞤫 𞤻𞤭𞥅𞤩𞤢𞤼𞤢𞥄𞤲𞤮 𞤳𞤢 𞤶𞤵𞤤𞥆𞤫𞤪𞤫 𞤤𞤢𞥄𞤥𞤵 𞤸𞤭𞤪𞤲𞤢 𞤀𞤬𞤪𞤭𞤳𞤢𞥄.

𞤅𞤭 𞤩𞤫𞥅 𞤸𞤮𞥅𞤪𞤫𞥅𞤩𞤫 𞤯𞤫𞥅 𞤤𞤫𞤴𞤯𞤫 𞤲𞤣𞤢𞥄𞤪𞤢𞥄𞤤𞤭 𞤲𞤮 𞤸𞤫𞤩𞥆𞤭𞤼𞤮𞤪𞤢 𞤬𞤢𞥄𞤤𞤫𞥅𞤶𞤭 𞤧𞤵𞤳𞤢𞥄𞤩𞤫 𞤩𞤫𞤲⹁ 𞤲𞤮 𞤸𞤢𞤧𞤭𞥅 𞤯𞤵𞤥 𞤳𞤢 𞤤𞤢𞤥𞥆𞤭𞤪𞤢 𞤯𞤵𞥅𞤯𞤵𞥅𞤯𞤩𞤫 𞤫 𞤥𞤢𞤩𞥆𞥆𞤫.