𞤁𞤀𞤃𞤋𞤄𞤀 𞤁𞤌𞤘𞤋𞥅 𞤂𞤀𞤃𞤍𞤌 𞤑𞤉𞤅𞤌 𞤔𞤌𞥅𞤍𞤋𞤑𞤉 𞤄𞤓𞤈𞤑𞤋𞤐𞤀

𞤂𞤫𞤧-𞤚𞤵𞥅𞤺𞤢𞤤𞥆𞤮 (lieutenant colonel) 𞤆𞤮𞤤 𞤖𞤢𞤲𞤪𞤭 𞤁𞤢𞤥𞤭𞤦𞤢⹁ 𞤤𞤢𞥄𞤥𞤭𞤲𞤮𞥅𞤯𞤮 𞤮𞤲 𞤄𞤵𞤪𞤳𞤭𞤲𞤢⹁ 𞤴𞤢𞤤𞤼𞤭𞥅 𞤤𞤫𞤴𞤣𞤭 𞤲𞤣𞤭𞤲 𞤩𞤢𞥄𞤱𞤮 𞤮 𞤶𞤮𞤺𞤲𞤵𞤼𞤵𞤣𞤫 𞤤𞤢𞥄𞤥𞤵 𞤲𞤺𞤵𞤲.

𞤑𞤮 𞤸𞤢𞤲𞤳𞤭 𞤫 𞤸𞤮𞤪𞤦𞤭𞤪𞥆𞤫 (𞤢𞤤𞤢𞤼)⹁ 𞤻𞤢𞤤𞤲𞤣𞤫 𞥒 𞤒𞤢𞤪𞤳𞤮 𞥒𞥐𞥒𞥒 𞤮 𞤧𞤮𞤪𞤼𞤭𞥅 𞤏𞤢𞤺𞤢𞤣𞤵𞤺𞤵 𞤮 𞤴𞤢𞤸𞤪𞤭 𞤤𞤫𞤴𞤣𞤭 𞤚𞤮𞤺𞤮.
𞤍𞤵𞤥 𞤺𞤢𞤧𞤵𞤣𞤫 𞤱𞤮𞥅 𞤲𞤣𞤫 𞤳𞤮𞥅𞤸𞤮𞥅𞤩𞤫 𞤄𞤵𞤪𞤳𞤭𞤲𞤢 𞤩𞤫𞤲 𞤳𞤢 𞤣𞤫𞤱𞤫 (𞤣𞤭𞥅𞤲𞤢) 𞤵𞤳𞥆𞤭𞤼𞤭𞤲𞤮𞥅 𞤲𞤺𞤢𞤥 𞤴𞤫𞤱𞤼𞤵𞤺𞤮𞤤 𞤸𞤢𞤳𞥆𞤵𞤲𞥋𞤣𞤫 𞤆𞤮𞤤 𞤖𞤢𞤲𞤪𞤭 𞤁𞤢𞤥𞤭𞤦𞤢 𞤫 𞤬𞤮𞤤𞥆𞤵𞤯𞤮 𞤥𞤮 𞤮𞤲⹁ 𞤋𞤦𞤪𞤢𞥄𞤸𞤭𞥅𞤥𞤢 𞤚𞤢𞤪𞤢𞤱𞤮𞤪𞤫.

𞤑𞤮 𞤫 𞤥𞤢𞤱𞤲𞤣𞤫 𞤬𞤫𞤰𞥆𞤵𞤲𞥋𞤣𞤫 𞤯𞤮𞥅⹁ 𞤻𞤢𞤤𞤲𞤣𞤫 𞥓𞥐 𞤅𞤭𞥅𞤤𞤼𞤮 𞥒𞥐𞥒𞥒⹁ 𞤋𞤦𞤪𞤢𞥄𞤸𞤭𞥅𞤥𞤢 𞤚𞤢𞤪𞤢𞤱𞤮𞤪𞤫 𞤫 𞤳𞤮𞤲𞤵 𞤥𞤵𞥅𞤯𞤵𞤲 𞤥𞤵𞤪𞤼𞤭. 𞤇𞤫 𞤴𞤢𞤸𞤭⹁ 𞤩𞤫 𞤲𞤢𞤲𞤺𞤮𞤴𞤭 𞤳𞤭𞤦𞤭𞤪𞤢𞤣𞤵 𞤺𞤫𞤲𞤣𞤭𞤴𞤢𞤲𞤳𞤮𞥅𞤪𞤵 𞤄𞤵𞤪𞤳𞤭𞤲𞤢 𞤲𞤣𞤵𞤲. 𞤇𞤫 𞤸𞤮𞤤𞥆𞤭𞤼𞤭 𞤱𞤮𞤲𞤣𞤫𞤥𞤢 𞤩𞤫 𞤶𞤢𞤩𞤼𞤭𞥅 𞤤𞤢𞥄𞤥𞤵 𞤲𞤺𞤵𞤲 𞤶𞤵𞥅𞤯𞤫 𞤁𞤢𞤥𞤭𞤦𞤢. 𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤩𞤫 𞤱𞤢𞥄𞤱𞤢𞥄𞤤𞤭 𞤸𞤫𞤲𞤣𞤢𞥄𞤣𞤫 𞤸𞤵𞤩𞤫𞥅𞤪𞤫 𞤤𞤢𞥄𞤥𞤮𞤪𞤣𞤫 𞤲𞤣𞤫𞤲⁏ 𞤫 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭 𞤼𞤢𞤱𞤭 𞤩𞤫 𞤲𞤢𞤲𞤺𞤢𞥄𞤤𞤭 𞤁𞤢𞤥𞤭𞤦𞤢⹁ 𞤲𞤮 𞤸𞤵𞤤𞤢𞤲𞤮𞥅 𞤬𞤮𞤼𞤢⹁ 𞤱𞤮𞤼𞤢 𞤸𞤢𞤪𞤫 𞤱𞤢𞤯𞤵 𞤲𞤣𞤫𞤪 𞤏𞤢𞤺𞤢𞤣𞤵𞤺𞤵 𞤸𞤢𞤳𞥆𞤵𞤲𞥋𞤣𞤫 𞤧𞤮𞤪𞤭𞥅𞤩𞤫 𞤱𞤮𞤲𞤢𞤲𞤩𞤫 𞤆𞤮𞤤 𞤖𞤢𞤲𞤪𞤭 𞤁𞤢𞤥𞤭𞤦𞤢 𞤩𞤫𞤲 𞤫 𞤩𞤫𞥅 𞤱𞤮𞤲𞤢𞤲𞤩𞤫 𞤋𞤦𞤪𞤢𞥄𞤸𞤭𞥅𞤥𞤢 𞤚𞤢𞤪𞤢𞤱𞤮𞤪𞤫 𞤩𞤫𞤲.

𞤆𞤮𞤤 𞤖𞤢𞤲𞤪𞤭 𞤁𞤢𞤥𞤭𞤦𞤢 𞤳𞤮 𞤫 𞤅𞤭𞥅𞤤𞤮 𞥒𞥐𞥒𞥒 𞤮 𞤰𞤢𞤱𞤭 𞤳𞤢 𞤤𞤢𞥄𞤥𞤵 𞤩𞤢𞥄𞤱𞤮 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤬𞤮𞤤𞥆𞤵𞤣𞤫 𞤈𞤮𞤳 𞤑𞤪𞤭𞤧𞤼𞤭𞤴𞤢𞤲 𞤑𞤢𞤦𞤮𞥅𞤪𞤫⹁ 𞤤𞤢𞥄𞤥𞤮𞤪𞤲𞤮𞥅𞤯𞤮 𞤮𞤲 𞤧𞤵𞤩𞤮.
𞤌𞤲𞤼𞤵𞤥𞤢⹁ 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤸𞤮𞤤𞥆𞤵𞤲𞤮 𞤱𞤮𞤲𞤣𞤫𞤥𞤢 𞤳𞤮 𞤩𞤫 𞤬𞤮𞤤𞥆𞤭𞤪𞤢𞤲𞤭 𞤑𞤢𞤦𞤮𞥅𞤪𞤫 𞤩𞤫 𞤰𞤫𞤼𞥆𞤭 𞤤𞤢𞥄𞤥𞤵 𞤲𞤺𞤵𞤲⹁ 𞤳𞤮 𞤼𞤢𞤱𞤵𞤣𞤫 𞤮 𞤢𞤤𞤢𞥄 𞤱𞤢𞥄𞤱𞤵𞤣𞤫 𞤸𞤭𞤱𞤵𞤣𞤫 𞤤𞤫𞤴𞤣𞤭 𞤲𞤣𞤭𞤲⹁ 𞤮 𞤣𞤢𞤯𞤭𞤲𞤢 𞤲𞤣𞤭 𞤦𞤮𞤲𞤫𞥅𞤶𞤭 𞤸𞤵𞤤𞤦𞤮𞥅𞤩𞤫 𞤩𞤫𞤲 (terroristes).

𞤑𞤮 𞤲𞤺𞤵𞥅 𞤣𞤢𞤤𞤭𞥅𞤤𞤵 𞤯𞤮𞥅 𞤼𞤭𞤺𞤭 𞤋𞤦𞤪𞤢𞥄𞤸𞤭𞥅𞤥𞤢 𞤚𞤢𞤪𞤢𞤱𞤮𞤪𞤫 𞤫 𞤬𞤫𞤣𞥆𞤫 𞤥𞤵𞥅𞤲 𞤲𞤣𞤫𞤲 𞤤𞤢𞤥𞤭𞤼𞤮𞤪𞤭 𞤲𞤮 𞤩𞤫 𞤶𞤢𞤩𞤼𞤭𞤪𞤢 𞤸𞤮𞥅𞤪𞤢𞥄𞤳𞤵 𞤲𞤺𞤵𞤲 𞤄𞤵𞤪𞤳𞤭𞤲𞤢. 𞤘𞤭𞤤𞤢 𞤤𞤫 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤶𞤮𞥅𞤯𞤭 𞤸𞤮𞥅𞤪𞤫 𞤄𞤵𞤪𞤳𞤭𞤲𞤢⹁ 𞤲𞤮𞤳𞥆𞤵𞥅𞤤𞤭 𞤯𞤭 𞤶𞤭𞤸𞤢𞥄𞤣𞤮𞥅𞤩𞤫 𞤩𞤫𞤲 𞤶𞤮𞤺𞤭𞥅 𞤯𞤭𞤲 𞤩𞤫𞤴𞤣𞤭𞤳𞤫. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭 𞤲𞤦𞤢𞤪𞤤𞤫 𞤯𞤫𞤲 𞤫 𞤥𞤢𞤧𞤭𞥅𞤦𞤮𞥅𞤶𞤭 𞤯𞤭𞤲 𞤩𞤵𞤪𞤼𞤵 𞤩𞤫𞤴𞤣𞤢𞥄𞤣𞤫.
𞤏𞤵𞤪𞤭𞤲⹁ 𞤫 𞤢𞥄𞤩𞤵𞤲’𞤣𞤫 𞤬𞤫𞤰𞥆𞤵𞤲𞥋𞤣𞤫 𞤯𞤮𞥅⹁ 𞤻𞤢𞤤𞤲𞤣𞤫 𞥒𞥖 𞤅𞤭𞥅𞤤𞤼𞤮⹁ 𞤳𞤮 𞤼𞤭𞤥𞥆𞤢𞤼𞤢 𞤧𞤮𞥅𞤪𞤭𞥅𞤩𞤫 𞤷𞤢𞤨𞥆𞤢𞤲𞤯𞤫 𞤱𞤢𞤪𞤢𞤲𞤮 𞤫 𞤥𞤭𞤧𞤭𞥅𞤣𞤫 𞤭𞤲𞥆𞤫𞤼𞤫𞥅𞤲𞤣𞤫 𞤘𞤢𞤧𞤳𞤭𞤲𞤣𞤫 𞤳𞤢 𞤬𞤵𞤯𞤲𞤢𞥄𞤲𞤺𞤫 𞤐𞤢𞤲𞤮 𞤄𞤵𞤪𞤳𞤭𞤲𞤢 .

𞤍𞤵𞥅𞤯𞤵𞤩𞤫 𞤲𞤮 𞤢𞥄𞤲𞤭 𞤱𞤮𞤼𞤢 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤸𞤭𞤤𞤲𞤮 𞤶𞤭𞤨𞥆𞤭𞤪𞤺𞤮𞤤 𞤬𞤭𞥅 𞤤𞤢𞥄𞤥𞤵⹁ 𞤩𞤫 𞤱𞤫𞤤𞤧𞤭𞤲𞥋𞤣𞤮𞥅 𞤸𞤢𞥄 𞤸𞤵𞤤𞤦𞤮𞥅𞤩𞤫 𞤩𞤫𞤲 (terroristes) 𞤺𞤢𞤴𞤲𞤢 𞤲𞤢𞤲𞤺𞤵𞤣𞤫 𞤤𞤫𞤴𞤣𞤭 𞤲𞤣𞤭𞤲 𞤬𞤮𞤨.

𞤘𞤭𞤤𞤢 𞥒𞥐𞥑𞥔 𞤬𞤫𞤱𞤲𞤣𞤮 𞤑𞤮𞤥𞤨𞤢𞤱𞤮𞤪𞤫 𞤪𞤢𞤯𞤢𞥄 𞤳𞤢 𞤤𞤢𞥄𞤥𞤵⹁ 𞤳𞤮 𞤤𞤢𞥄𞤱𞤮𞤤 𞤼𞤢𞤼𞤢𞤩𞤮𞤤 𞤲𞤺𞤮𞤤 𞤲𞤭𞥅⹁ 𞤧𞤮𞥅𞤪𞤭𞥅𞤩𞤫 𞤲𞤮 𞤭𞤥𞥆𞤭𞥅 𞤬𞤭𞥅 𞤤𞤢𞥄𞤥𞤵 𞤲𞤣𞤫𞤪 𞤄𞤵𞤪𞤳𞤭𞤲𞤢. 𞤚𞤭𞤥𞥆𞤭𞥅 𞤲𞤮𞤲 𞤤𞤢𞥄𞤦𞤭 𞤶𞤫𞥅𞤼𞤢𞤼𞤭⹁ 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤮 𞤬𞤮𞤤𞥆𞤫𞥅𞤣𞤫 𞤄𞤵𞤪𞤳𞤭𞤲𞤢 𞤺𞤭𞤦𞤭 𞤤𞤫𞤴𞤣𞤭 𞤲𞤣𞤭𞤲 𞤸𞤫𞤩𞤼𞤭 𞤸𞤮𞥅𞤪𞤫 𞤥𞤢𞤴𞤪𞤭.

𞤀𞤣𞤮 𞤁𞤀𞤥𞤭𞤦𞤢 𞤶𞤮𞤺𞤲𞤵𞤼𞤵𞤣𞤫 𞤤𞤢𞥄𞤥𞤵 𞤲𞤺𞤵𞤲⹁ 𞤮 𞤱𞤢𞤯𞤢𞤲𞥆𞤮 𞤋𞤦𞤪𞤢𞥄𞤸𞤭𞥅𞤥𞤢 𞤚𞤢𞤪𞤢𞤱𞤮𞤪𞤫 𞤧𞤢𞤪𞤼𞤭𞥅𞤶𞤭. 𞤐𞤮 𞤼𞤢𞤱𞤢𞥄 𞤫 𞤯𞤭𞤲: 𞤳𞤭𞤧𞤢𞤤 𞤥𞤢𞤳𞥆𞤮 𞤫 𞤴𞤭𞤥𞤩𞤫 𞤥𞤢𞤳𞥆𞤮 𞤩𞤫𞤲⹁ 𞤸𞤵𞥅𞤩𞤲𞤵𞤺𞤮𞤤 𞤬𞤮𞤣𞤮𞥅𞤶𞤫 𞤯𞤫 𞤩𞤫 𞤬𞤮𞤣𞤭 𞤁𞤫𞤐𞤘𞤖𞤀 𞤯𞤫𞤲 (ECOWAS – CEDEAO) 𞤱𞤢𞤲𞤮 𞤼𞤢𞤦𞤭𞤲𞤼𞤭𞤲𞤺𞤮𞤤 𞤧𞤵𞤩𞤮 𞤲𞤺𞤮𞤲 𞤫 𞥒𞥐𞥒𞥔 𞤬𞤭𞥅 𞤶𞤮𞥅𞤯𞥆𞤭𞤲𞤺𞤮𞤤 𞤸𞤮𞥅𞤪𞤫𞥅𞤶𞤮 𞤳𞤫𞤧𞤮 𞤥𞤮 𞤱𞤮𞤲𞤢𞥄 𞤧𞤮𞥅𞤪𞤭𞥅𞤶𞤮.

𞤋𞤦𞤪𞤢𞥄𞤸𞤭𞥅𞤥𞤢 𞤚𞤢𞤪𞤢𞤱𞤮𞤪𞤫⹁ 𞤸𞤮𞥅𞤪𞤫𞥅𞤶𞤮 𞤳𞤫𞤧𞤮 𞤤𞤫𞤴𞤣𞤭 𞤲𞤣𞤭𞤲⹁ 𞤲𞤮 𞤥𞤢𞤪𞤭 𞤣𞤵𞥅𞤩𞤭 𞥓𞥔. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥘 𞤮 𞤶𞤭𞤦𞤭𞤲𞤢𞥄. 𞤑𞤮 𞤫 𞥒𞥐𞥑𞥐 𞤮 𞤲𞤢𞥄𞤼𞤭 𞤫 𞤳𞤮𞤲𞤵 𞤄𞤵𞤪𞤳𞤭𞤲𞤢 𞤲𞤺𞤵𞤲 𞤸𞤢𞤪𞤭 𞤳𞤮 𞤥𞤮 𞤮 𞤣𞤵𞥅𞤩𞤭 𞥒𞥒. 𞤑𞤮 𞤳𞤢𞤲𞤳𞤮 𞤱𞤮𞤲𞤭 𞤶𞤵𞥅𞤤𞤯𞤮 𞤢𞤣𞤭𞥅𞤯𞤮 𞤤𞤢𞥄𞤥𞤢𞥄𞤣𞤫 𞤄𞤵𞤪𞤳𞤭𞤲𞤢. 𞤘𞤭𞤤𞤢 𞤄𞤵𞤪𞤳𞤭𞤲𞤢 𞤸𞤫𞤩𞤼𞤭 𞤸𞤮𞥅𞤪𞤫 𞤥𞤵𞤵𞤲 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐⹁ 𞤳𞤮 𞤲𞤢𞤧𞤢𞥄𞤪𞤢𞥄𞤩𞤫 𞤼𞤢𞤲 𞤱𞤮𞤲𞤵𞤲𞤮𞥅 𞤤𞤢𞥄𞤥𞤢𞥄𞤣𞤫 𞤤𞤫𞤴𞤣𞤭 𞤲𞤣𞤭𞤲.