𞤁𞤀𞤁𞤋𞤅 𞤀𞤈𞤚𞤋𞥅 𞤘𞤋𞤐𞤉 𞤊𞤋𞥅 𞤙𞤀𞥄𞤏𞤌𞥅𞤈𞤉
𞤁𞤵𞥅𞤩𞤭 𞥑𞥓 𞤩𞤢𞥄𞤱𞤮 𞤮 𞤬𞤫𞤤𞥆𞤫𞥅𞤣𞤫 𞤳𞤢 𞤸𞤮𞥅𞤪𞤫 𞤮 𞤴𞤢𞤤𞤼𞤭𞤲𞤫𞥅 𞤘𞤭𞤲𞤫⹁ 𞤃𞤵𞥅𞤧𞤢𞥄 𞤁𞤢𞤣𞤭𞤧 𞤑𞤢𞤥𞤢𞤪𞤢𞥄 𞤪𞤵𞤼𞥆𞤭𞤳𞤫 𞤘𞤭𞤲𞤫 𞤸𞤢𞤲𞤳𞤭 𞤫 𞤈𞤫𞤬𞤦𞤭𞤪𞥆𞤫 𞤻𞤢𞤤𞤲𞤣𞤫 𞥒𞥕 𞤅𞤭𞥅𞤤𞤼𞤮 𞥒𞥐𞥒𞥒.
𞤙𞤢𞥄𞤱𞤮𞥅𞤪𞤫 𞤥𞤢𞤳𞥆𞤮⹁ 𞤳𞤢𞤲𞤳𞤮 𞤫 𞤩𞤫 𞤮 𞤬𞤢𞤱𞤭𞤣𞤢𞥄 𞤲𞤦𞤢𞤪𞤤𞤫 𞤱𞤢𞤯𞤵𞤯𞤫𞤲 𞤻𞤢𞤤𞤲𞤣𞤫 𞥒𞥘 𞤅𞤭𞥅𞤤𞤼𞤮 𞥒𞥐𞥐𞥙⹁ 𞤲𞤮 𞤧𞤢𞥄𞤼𞤭𞤲𞤢𞥄 𞤬𞤢𞤩𞥆𞤭 𞤶𞤢𞤲𞤺𞤮⹁ 𞤫 𞤲𞤶𞤫𞤧𞤤𞤢𞥄𞤪𞤫⹁ 𞤻𞤢𞤤𞤲𞤣𞤫 𞥒𞥘 𞤅𞤭𞥅𞤤𞤼𞤮 𞥒𞥐𞥒𞥒.
𞤘𞤭𞤤𞤢 𞤃𞤵𞥅𞤧𞤢𞥄 𞤁𞤢𞤣𞤭𞤧 𞤊𞤫𞤤𞥆𞤢𞤲𞤮𞥅 𞤫 𞤄𞤮𞤱𞤼𞤮 𞥒𞥐𞥐𞥙⹁ 𞤮 𞤴𞤤𞤼𞤭 𞤘𞤭𞤲𞤫⹁ 𞤸𞤢𞤪𞤭 𞤤𞤢𞥄𞤥𞤩𞤫 𞤩𞤫𞤲 𞤩𞤫𞤲 𞤣𞤵𞤽𞤭𞤲𞤢𞤲𞤢𞥄𞤤𞤭 𞤥𞤮 𞤢𞤪𞤼𞤵𞤺𞤮𞤤 𞤼𞤢𞤦𞤭𞤼𞤢 𞤘𞤭𞤲𞤫. 𞤑𞤢𞤲𞤳𞤮 𞤲𞤮𞤲⹁ 𞤸𞤢𞤪𞤭 𞤮 𞤬𞤢𞥄𞤤𞤢𞤲𞤮𞥅𞤥𞤢 𞤢𞤪𞤼𞤵𞤣𞤫 𞤺𞤭𞤦𞤭 𞤮 𞤲𞤣𞤭𞤳𞥆𞤭. 𞤏𞤢𞤯𞤭𞥅 𞤣𞤵𞥅𞤩𞤭 𞤶𞤫𞥅𞤯𞤭𞤯𞤭⹁ 𞤮𞤥𞤮 𞤸𞤢𞤦𞥆𞤭𞥅 𞤻𞤢𞥄𞤱𞤫𞥅𞤣𞤫 𞤬𞤭𞥅 𞤲𞤦𞤢𞤪𞤤𞤫 𞤫 𞤰𞤫𞥅𞤩𞤤𞤫 (𞤴𞤢𞤲𞤵𞤺𞤮𞤤 𞤫 𞤪𞤫𞤱𞤩𞤫) 𞤳𞤢𞤻𞤵𞤲 𞤫 𞤥𞤵𞤼𞤭𞤲𞤺𞤮𞤤 𞤴𞤭𞤥𞤩𞤫.
𞤉 𞤐𞤶𞤫𞤧𞤤𞤢𞥄𞤪𞤫⹁ 𞤳𞤢𞤲𞤳𞤮 𞤫 𞤧𞤢𞤨𞥆𞤮𞥅𞤩𞤫 𞤩𞤫 𞤮 𞤬𞤢𞤱𞤭𞤣𞤢𞥄 𞤩𞤫𞤲⹁ 𞤩𞤫 𞤤𞤢𞤲𞤣𞤭𞤼𞤫𞤼𞤫 𞤬𞤭𞥅 𞤨𞤢𞤲𞤳𞤢𞤪𞤫 𞤱𞤢𞤯𞤵𞤯𞤫 𞤻𞤢𞤤𞤲𞤣𞤫 𞥒𞥘 𞤅𞤭𞤤𞤼𞤮 𞥒𞥐𞥐𞥙. 𞤐𞤣𞤫𞤲 𞤻𞤢𞤤𞤲𞤣𞤫⹁ 𞤧𞤮𞥅𞤪𞤭𞥅𞤩𞤫 𞤥𞤢𞤳𞥆𞤮 𞤩𞤫𞤲 𞤬𞤫𞤼𞥆𞤭𞤲𞥆𞤮 𞤤𞤮𞥅𞤱𞤢𞤲𞤯𞤫 𞤯𞤵𞥅𞤯𞤵𞤯𞤫 𞤫 𞤴𞤭𞤥𞤩𞤫 𞤥𞤮𞥅𞤩𞤭𞤲𞤮𞥅𞤩𞤫 𞤳𞤢 𞤊𞤭𞤶𞤭𞤪𞤣𞤫 𞤃𞤵𞤤𞥆𞤫𞤪𞤫 𞤁𞤭𞤳𞤧𞤭𞤲 – 𞤑𞤮𞤲𞤢𞥄𞤳𞤭𞤪𞤭 𞤲𞤺𞤢𞤥 𞤩𞤢𞤲𞤺𞤭𞤲𞤢𞤲𞤺𞤮𞤤 𞤥𞤮 𞤱𞤮𞤲𞤣𞤫𞤥𞤢 𞤩𞤫 𞤴𞤭𞤯𞤢𞥄 𞤴𞤮 𞤮 𞤣𞤢𞤪𞤮 𞤬𞤭𞥅 𞤤𞤢𞥄𞤥𞤵 𞤘𞤭𞤲𞤫. 𞤳𞤮 𞤩𞤢𞤣𞤲𞤭 𞤴𞤭𞤥𞤩𞤫 𞥒𞥐𞥐 𞤱𞤢𞤪𞤢𞤲𞤮 𞤲𞤣𞤫𞤲 𞤻𞤢𞤤𞤲𞤣𞤫.
𞤘𞤭𞤤𞤢 𞤯𞤫𞤲 𞤨𞤢𞤲𞤳𞤢𞤪𞤫 𞤱𞤢𞤯𞤭⹁ 𞤁𞤢𞤣𞤭𞤧 𞤶𞤢𞤩𞤢𞥄𞤤𞤭 𞤹𞤭𞤪𞥆𞤢𞥄𞤣𞤫 𞤱𞤮𞤲𞤣𞤫𞤥𞤢 𞤳𞤮 𞤫 𞤬𞤫𞤱𞤶𞤮𞥅𞤪𞤫 𞤥𞤢𞤳𞥆𞤮 𞤱𞤢𞤤𞥆𞤢 𞤴𞤢𞤥𞤭𞤪𞤮𞥅𞤪𞤫 𞤥𞤢𞤳𞥆𞤮 𞤴𞤭𞤥𞤩𞤫 𞤩𞤫𞤲 𞤱𞤢𞤪𞤭𞤪𞤢𞥄. 𞤌 𞤱𞤭𞤴𞤭𞥅𞤲𞤮 𞤧𞤢𞤺𞤮 𞤥𞤢𞤳𞥆𞤮 𞤻𞤢𞥄𞤱𞤮𞥅𞤪𞤫 𞤲𞤣𞤫𞤲 𞤱𞤢𞤯𞤢𞤴𞤲𞤮 𞤺𞤭𞤦𞤭 𞤤𞤢𞤱⹁ 𞤬𞤭𞥅 𞤲𞤮 𞤼𞤵𞥅𞤥𞤫 𞤯𞤫𞤲 𞤭𞤱𞤭𞤪𞤢 𞤸𞤮𞥅𞤪𞤫 𞤥𞤢𞤳𞥆𞤮 𞤸𞤫𞤩𞤢 𞤲𞤮 𞤮 𞤪𞤵𞤼𞥆𞤮𞤪𞤢 𞤘𞤭𞤲𞤫.
𞤊𞤭𞥅 𞤳𞤢𞤤𞤢 𞤬𞤫𞤱𞤲𞤣𞤮 𞤮 𞤯𞤢𞤩𞥆𞤢𞤴𞤲𞤮 𞤤𞤢𞥄𞤥𞤵⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤬𞤮𞤣𞤵𞤲𞤮 𞤤𞤫𞤼𞥆𞤵𞤺𞤮𞤤 𞤬𞤢𞤺𞥆𞤭𞤼𞤭𞤲𞤮𞥅𞤩𞤫 𞤨𞤢𞤲𞤳𞤢𞤪𞤫 𞤯𞤫𞤲 𞤻𞤢𞤤𞤲𞤣 𞥒𞥘 𞤅𞤭𞥅𞤤𞤼𞤮 𞥒𞥐𞥐𞥙⹁ 𞤩𞤢𞤴 𞤮 𞤤𞤢𞥄𞤥𞤭𞤳𞤫⹁ 𞤮 𞤶𞤢𞤩𞤢𞥄𞤤𞤭 𞤻𞤢𞥄𞤱𞤮𞥅𞤪𞤫 𞤲𞤣𞤫𞤲 𞤤𞤢𞥄𞤼𞤮𞥅. 𞤌 𞤱𞤮𞤲𞤭 𞤫 𞤸𞤵𞥅𞤱𞤼𞤮𞤪𞤺𞤮𞤤 𞤁𞤢𞤣𞤭𞤧 𞤬𞤭𞥅 𞤲𞤮 𞤮 𞤥𞤵𞤤𞤼𞤭𞤪𞤢 𞤴𞤭𞤥𞤩𞤫 𞤮𞤲 𞤯𞤮𞤲 𞤩𞤫𞤲.
𞤀𞤲𞤺𞤢𞤤 𞤬𞤢𞥄𞤤𞤫 𞤴𞤮 𞤲𞤣𞤫𞥅 𞤻𞤢𞥄𞤱𞤮𞥅𞤪𞤫 𞤱𞤢𞤯𞤵 𞤱𞤮𞤲𞤭𞥅 𞤧𞤢𞤦𞤵 𞤸𞤢𞥄 𞤯𞤵𞤯𞤵𞤩𞤫 𞤲𞤮 𞤤𞤢𞤲𞤣𞤮𞤲𞥋𞤣𞤭𞤪𞤣𞤫 𞤧𞤮 𞤼𞤢𞤱𞤭𞥅 𞤱𞤮𞤲𞤢𞥄 𞤀𞤤𞤬𞤢𞥄 𞤑𞤮𞤲𞤣𞤫 𞤱𞤮𞤲𞤵𞤲𞤮𞥅 𞤩𞤢𞥄𞤱𞤮 𞤫 𞤴𞤫𞥅𞤧𞤮 𞤥𞤢𞤧𞤭𞥅𞤦𞤮 𞤲𞤺𞤮𞤲 𞤳𞤢 𞤬𞤭𞤶𞤭𞤪𞤣𞤫 𞤬𞤭𞥅 𞤲𞤮 𞤁𞤢𞤣𞤭𞤧 𞤭𞤱𞤭𞤪𞤢 𞤳𞤢 𞤤𞤢𞥄𞤥𞤵.
𞤐𞤮 𞤢𞤲𞤣𞤢𞤲𞤮𞥅 𞤱𞤮𞤲𞤣𞤫𞤥𞤢 𞤧𞤭 𞤳𞤮 𞤁𞤢𞤣𞤭𞤧 𞤬𞤫𞤱𞤶𞤵𞤲𞤮𞥅 𞤬𞤭𞥅 𞤅𞤵𞤩𞤮 𞤲𞤺𞤮𞤲 𞥒𞥐𞥑𞥐⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤤𞤢𞥄𞤥𞤮𞤼𞤢𞤲𞤮𞥅𞤳𞤮 𞤘𞤭𞤲𞤫.
𞤐𞤮 𞤱𞤮𞤲𞤭𞤪𞤭 𞤱𞤮𞥅⹁ 𞤢𞤪𞤥𞤢 𞤲𞤣𞤫 𞤺𞤮𞥅𞤲𞤺𞤢 𞤳𞤢𞤲 𞤬𞤫𞥅𞤻𞤭 𞤫 𞤲𞤣𞤫𞥅 𞤻𞤢𞥄𞤱𞤮𞥅𞤪𞤫 𞤯𞤮𞤮 𞤧𞤭 𞤱𞤮𞤲𞤢𞥄 𞤸𞤢𞤪𞤢 𞤩𞤫𞥅 𞤤𞤢𞥄𞤥𞤭𞥅𞤩𞤫 𞤯𞤮𞥅 𞤳𞤢𞤣𞤭 𞤲𞤮 𞤬𞤢𞥄𞤤𞤢𞥄 𞤩𞤢𞥄𞤪𞤮𞤣𞤫 𞤁𞤢𞤣𞤭𞤧 𞤲𞤮 𞤩𞤫 𞤸𞤫𞤩𞤼𞤭𞤪𞤢 𞤴𞤭𞤥𞤩𞤫 𞤤𞤫𞤴-𞤬𞤭𞤼𞤢𞥄𞤪𞤫 𞤘𞤭𞤲𞤫 𞤩𞤫𞤲. 𞤅𞤢𞤦𞤵𞤲𞤢 𞤤𞤢𞤥𞥆𞤭𞥅 𞤸𞤢𞤳𞥆𞤵𞤲𞥋𞤣𞤫 𞤥𞤢𞤩𞥆𞤫 𞤫 𞤴𞤭𞤥𞤩𞤫 𞤘𞤭𞤲𞤫 𞤩𞤫𞤲.
𞤑𞤮𞤲𞤮 𞤲𞤮 𞤸𞤫𞤯𞤮𞤲𞥋𞤣𞤭𞤪𞤢𞥄.
𞤌𞤲 𞤔𞤢𞥄𞤪𞤢𞥄𞤥𞤢https://tabalde.com/%F0%9E%A4%AE-%F0%9E%A4%B1%F0%9E%A4%A2%F0%9E%A4%AA%F0%9E%A4%AD-%F0%9E%A4%B4%F0%9E%A4%B5%F0%9E%A4%A5%F0%9E%A5%86%F0%9E%A4%A2-%F0%9E%A4%A5%F0%9E%A4%A2%F0%9E%A4%B3%F0%9E%A5%86%F0%9E%A4%AE-%F0%9E%A4%AC/