𞤆𞤀𞤁𞥆𞤓𞤂𞤉 𞤐𞤌 𞤚𞤋𞤔𞥆𞤀𞥄 𞤘𞤋𞤐𞤉 𞤉 𞤈𞤉𞤊𞤄𞤋𞤈𞥆𞤉

𞤐𞤶𞤵𞤩𞥆𞤵𞤣𞤭 𞤀𞤣𞤵𞤲𞤢𞤴𞤢𞤲𞤳𞤮𞥅𞤪𞤭 𞤲𞤣𞤭𞤲 𞤬𞤭𞥅 𞤕𞤫𞤤𞥆𞤢𞤤 (OMS/WHO/𞤐𞤔𞤀𞤕) 𞤴𞤫𞤯𞤭𞥅 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤨𞤢𞤣𞥆𞤵𞤤𞤫 𞤥𞤢𞤤𞥆𞤢 𞤱𞤢𞤳𞤧𞤫𞤲𞤶𞤭 𞤵𞤶𞤵𞤲𞤫 𞤧𞤢𞤨𞥆𞤮 𞤫 𞤺𞤮𞤮 𞤳𞤮 𞤩𞤫 𞤬𞤢𞤣𞥆𞤮𞤪𞤫𞥅 𞤲𞤺𞤵𞥅 𞤻𞤢𞤱𞤵 𞤑𞤮𞤾𞤭𞤣-𞥑𞥙. 𞤑𞤮 𞤫 𞤪𞤫𞤬𞤦𞤭𞤪𞥆𞤫⹁ 𞤬𞤢𞤩𞥆𞤭 𞤶𞤢𞤲𞤺𞤮⹁ 𞤯𞤫𞥅 𞤨𞤢𞤣𞥆𞤵𞤤𞤫 𞤼𞤭𞤶𞥆𞤢𞥄 𞤸𞤫𞤱𞤼𞤵𞤺𞤮𞤤 𞤘𞤭𞤲𞤫.
𞤉 𞤲𞤢𞥄𞤧𞤢𞥄𞤲𞤣𞤫 𞤯𞤮𞥅⹁ 𞤃𞤢𞤼𞤧𞤭𞤣𞤭𞤧𞤮 𞤃𞤮𞤱𞤫𞤼𞤭⹁ 𞤖𞤮𞥅𞤪𞤫𞥅𞤶𞤮 𞤅𞤢𞤤𞤲𞤣𞤵 𞤐𞤔𞤀𞤕 𞤲𞤣𞤵𞤲 𞤫 𞤲𞤣𞤫𞤪 𞤀𞤬𞤪𞤭𞤳𞤢𞥄⹁ 𞤸𞤮𞤤𞥆𞤭𞤼𞤭𞥅 𞤸𞤫𞤧𞤤𞤮𞥅𞤩𞤫 𞤩𞤫𞤲 𞤱𞤮𞤲𞤣𞤫𞤥𞤢 𞤫 𞤸𞤮𞥅𞤪𞤫 𞤯𞤫𞤲 𞤨𞤢𞤣𞥆𞤵𞤤𞤫 𞥑𞥑𞥐𞥐𞥐 (𞤺𞤵𞤤𞤵𞥅𞤶𞤫 𞤧𞤢𞤨𞥆𞤮 𞤫 𞤺𞤮𞤮) 𞤭𞤱𞤪𞤢𞤴𞤯𞤫 𞤔𞤫𞤲𞤫𞥅𞤾𞤢⹁ 𞤤𞤫𞤴𞤣𞤭 𞤅𞤵𞤱𞤭𞥅𞤧⹁ 𞤨𞤢𞤣𞥆𞤵𞤤𞤫 𞥘𞥖𞥐𞥐 (𞤵𞤶𞤵𞤲𞤫 𞤶𞤫𞥅𞤼𞤢𞥄𞤼𞤭 𞤫 𞤼𞤫𞥅𞤥𞤫𞤯𞥆𞤫 𞤶𞤫𞥅𞤺𞤮𞤮) 𞤲𞤮 𞤼𞤭𞤶𞥆𞤮𞤪𞤢𞥄 𞤭𞤥𞥆𞤮𞤪𞤣𞤫 𞤀𞤥𞤫𞤪𞤭𞤳𞤢𞥄. 𞤑𞤮 𞤴𞤢𞤱𞤼𞤭 𞤴𞤭𞤥𞤩𞤫 𞤣𞤵𞤦𞤵𞤲𞤫 𞤧𞤢𞤨𞥆𞤮𞤴 𞤫 𞤼𞤢𞤼𞤭 (𞤥𞤭𞤤𞤭𞤴𞤮𞤲 𞥑𞥓) 𞤲𞤮 𞤸𞤮𞤯𞤭 𞤘𞤭𞤲𞤫. 𞤖𞤢𞤪𞤢𞤴 𞤳𞤮 𞤯𞤵𞤥 𞤱𞤮𞤲𞤭 𞤯𞤫𞥅 𞤨𞤢𞤣𞥆𞤵𞤤𞤫 𞤲𞤮 𞤬𞤢𞤥𞤯𞤢𞤲𞤭 𞤤𞤭𞤥𞤮𞥅𞤪𞤫 𞤴𞤭𞤥𞤩𞤫 𞤘𞤭𞤲𞤫 𞤲𞤣𞤫𞤲 𞤬𞤮𞤼𞤢.
𞤃𞤵𞤸𞤢𞤥𞥆𞤢𞤣𞤵 𞤂𞤢𞤥𞤭𞥅𞤲 𞤒𞤢𞤲𞤧𞤢𞤲𞤫⹁ 𞤣𞤭𞥅𞤧𞤮𞤼𞤮𞥅𞤯𞤮 𞤔𞤢𞥄𞤺𞤮𞤪𞤢𞥄𞤯𞤮 𞤘𞤭𞤲𞤫 𞤮𞤲 𞤳𞤢 𞤕𞤫𞤤𞥆𞤢𞤤⹁ 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤲𞤮 𞤨𞤢𞤣𞥆𞤵𞤤𞤫 𞤯𞤫𞤲 𞤸𞤫𞤱𞤼𞤭𞤪𞤭 𞤘𞤭𞤲𞤫⹁ 𞤯𞤫 𞤧𞤫𞤲𞤣𞤭𞤼𞤫𞤼𞤫 𞤬𞤭𞥅 𞤲𞤮 𞤴𞤭𞤥𞤩𞤫 𞤩𞤫𞤲 𞤬𞤢𞤣𞥆𞤭𞤲𞤭𞤪𞤫𞥅.
𞤅𞤫𞤲𞤫𞤺𞤢𞤤 𞤳𞤢𞤲 𞤸𞤫𞤲𞤣𞤭𞤳𞤫 𞤼𞤢𞤸𞤮 𞤨𞤢𞤣𞥆𞤵𞤤𞤫 𞥒𞥐𞥐 𞥐𞥐𞥐 (𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤯𞤭𞤯𞤭) 𞤭𞤥𞥆𞤮𞤪𞤯𞤫 𞤕𞤢𞤴𞤲𞤢. 𞤉𞤩𞤫 𞤼𞤭𞤶𞥆𞤭𞥅 𞤳𞤣𞤢𞤭 𞤳𞤮 𞤩𞤢𞤣𞤭𞥅 𞤨𞤢𞤣𞥆𞤵𞤤𞤫 𞤣𞤵𞤦𞤵𞤲𞤫 𞤶𞤫𞥅𞤯𞤭𞤯𞤭 (𞤥𞤭𞤤𞤭𞤴𞤮𞤲 𞤶𞤫𞥅𞤯𞤭𞤯𞤭) 𞤫 𞤯𞤫𞥅 𞤶𞤮𞤲𞤼𞤫 𞤢𞤪𞤮𞥅𞤶𞤫. 𞤑𞤮 𞤴𞤢𞤱𞤼𞤭 𞤣𞤵𞤦𞤵𞤲𞤫 𞤧𞤢𞤨𞥆𞤮𞤴 𞤫 𞤶𞤫𞥅𞤯𞤭𞤯𞤭 (𞤥𞤭𞤤𞤭𞤴𞤮𞤲 𞥑𞥗) 𞤴𞤭𞤥𞤩𞤫 𞤲𞤮 𞤸𞤮𞤯𞤭 𞤅𞤫𞤲𞤫𞤺𞤢𞤤 𞤸𞤢𞤲𞤣𞤫.
𞤘𞤭𞤤𞤢 𞤲𞤺𞤵𞥅 𞤻𞤢𞤱𞤵 𞤬𞤵𞤯𞥆𞤭 𞤕𞤢𞤴𞤲𞤢⹁ 𞤲𞤺𞤵 𞤱𞤢𞤪𞤭𞥅 𞤣𞤵𞤦𞤵𞤲𞤫 𞤯𞤭𞤯𞤭 𞤫 𞤬𞤫𞤷𞥆𞤫𞤪𞤫 𞤴𞤭𞤥𞤩𞤫 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭. 𞤉 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲⹁ 𞤲𞤺𞤵 𞤪𞤢𞥄𞤩𞤭𞥅 𞤳𞤮 𞤩𞤵𞤪𞤭 𞤴𞤭𞤥𞤩𞤫 𞤵𞤶𞤵𞤲𞤫 𞤧𞤢𞤨𞥆𞤮 𞤫 𞤶𞤮𞤱𞤭. 𞤉 𞤲𞤣𞤫𞤪 𞤩𞤫𞥅𞤲⹁ 𞤷𞤢𞤨𞥆𞤢𞤲𞤯𞤫 𞤲𞤶𞤫𞥅𞤼𞤢𞤼𞤮 𞤫 𞤶𞤫𞥅𞤺𞤮𞤮 𞤥𞤢𞥄𞤴𞤭𞥅. 𞤑𞤮 𞤯𞤵𞤥 𞤶𞤢𞥄𞤺𞤮𞤪𞤢𞤤 𞤘𞤭𞤲𞤫 𞤲𞤺𞤢𞤤 𞤸𞤮𞤤𞥆𞤭. 𞤑𞤮𞤲𞤮 𞤲𞤮 𞤼𞤢𞤥𞤰𞤭𞤲𞤢𞥄 𞤳𞤢 𞤤𞤭𞤥𞤮𞥅𞤪𞤫 𞤲𞤣𞤫𞤲 𞤩𞤵𞤪𞤢 𞤯𞤵𞤥 𞤷𞤮𞤱𞤢𞤲𞤯𞤫. 𞤅𞤫𞤲𞤫𞤺𞤢𞤤 𞤳𞤢𞤲 𞤼𞤢𞤦𞤭𞤲𞤼𞤭𞤲𞤭𞥅 𞤳𞤮 𞤩𞤵𞤪𞤭 𞤵𞤶𞤵𞤲𞤫 𞤰𞤢𞤨𞥆𞤢𞤲𞤯𞤫 𞤼𞤢𞤼𞤭 𞤫 𞤯𞤭𞤯𞤮 𞤪𞤢𞥄𞤩𞤢𞥄𞤩𞤫⹁ 𞤳𞤢𞤻𞤵𞤲 𞤫 𞤼𞤫𞥅𞤥𞤫𞤯𞥆𞤫 𞤲𞤶𞤫𞥅𞤯𞤭𞤯𞤮 𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤲𞤢𞤴𞤮 𞤥𞤢𞥄𞤴𞤵𞤩𞤫 𞤧𞤢𞤦𞤵 𞤑𞤮𞤾𞤭𞤣-𞥑𞥙.
𞤐𞤣𞤫 𞤼𞤢𞤱𞤵𞤲𞤮𞥅 𞤲𞤺𞤵𞥅 𞤻𞤢𞤱𞤵 𞤢𞤤𞤢𞥄 𞤤𞤫𞤳𞥆𞤭⹁ 𞤨𞤢𞤣𞥆𞤵𞤤𞤫 𞤯𞤫𞤲 𞤳𞤢𞤣𞤭 𞤱𞤫𞥅𞤩𞤢𞤲𞤢𞥄𞤤𞤭 𞤴𞤭𞤥𞤩𞤫 𞤩𞤫𞤲 𞤬𞤮𞤱 𞤼𞤢𞤸𞤮⹁ 𞤳𞤮 𞤪𞤫𞤲𞤼𞤢𞤺𞤮𞤤 𞤫 𞤪𞤢𞥄𞤩𞤭𞤲𞤢𞤴𞤯𞤭 𞤯𞤭𞤲 𞤩𞤵𞤪𞤭 𞤫 𞤥𞤵𞤰𞥆𞤵𞤣𞤫.
𞤍𞤭𞤲 𞤳𞤮:
𞥑 – 𞤔𞤓𞥅𞤍𞤉 𞤍𞤉𞤐, 𞤤𞤮𞥅𞤼𞤢 𞤯𞤫 𞤧𞤮𞥅𞤲𞤮 𞤳𞤢𞤤𞤢. 𞤌𞤲𞤼𞤭𞤺𞤭 𞤧𞤮𞥅𞤯𞤮𞤪𞤢 𞤧𞤢𞥄𞤦𞤵𞤲𞤣𞤫 𞤫 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲
𞥒 – 𞤅𞤌𞤇𞥆𞤓𞤐𞥋𞤁𞤓 𞤐𞤁𞤓𞤐⹁ 𞤯𞤮𞤶𞥆𞤢 𞤥𞤢𞥄 𞤭𞥅𞤤𞤢 𞤫 𞤲𞤣𞤫𞤪 𞤥𞤢𞤴𞤪𞤵.
𞥓 – 𞤒𞤉𞥅𞤅𞤌 𞤐𞤘𞤌𞤐⹁ 𞤱𞤮𞤼𞤢 𞤮𞤲𞤼𞤭𞤺𞤭 𞤥𞤫𞥅𞤥𞤵 𞤲𞤺𞤮⹁ 𞤼𞤫𞤲𞤼𞤭𞤲𞤭𞥅 𞤧𞤭 𞤶𞤵𞥅𞤯𞤫 𞤯𞤫𞤲 𞤤𞤢𞥄𞤩𞤢𞥄.
𞥔 – 𞤚𞤉𞤆𞥆𞤉 𞤚𞤀𞤚𞤋⹁ 𞤴𞤮 𞤯𞤵𞤥 𞤱𞤮𞤲𞤵 𞤸𞤢𞤳𞥆𞤵𞤲’𞤣𞤫 𞤮𞤲𞤼𞤭𞤺𞤭 𞤫 𞤴𞤭𞤥𞤩𞤫 𞤩𞤫𞤲.
𞥕 – 𞤃𞤌 𞤅𞤌𞤋𞥅 𞤲𞤢𞤱𞤲𞤵𞤣𞤫⹁ 𞤴𞤮 𞤤𞤵𞤼𞥆𞤵 𞤳𞤢 𞤧𞤵𞥅𞤣𞤵 𞤥𞤵𞤵𞤲.
𞥖 – 𞤅𞤓𞥅𞤃𞤀 𞤳𞤭𞤲𞤢𞤤 𞤲𞤺𞤢𞤤 𞤫 𞤸𞤵𞤲𞤣𞤵𞤳𞤮 𞤳𞤮𞤲 𞤧𞤮 𞤼𞤢𞤱𞤭𞥅 𞤮𞤲𞤼𞤭𞤺𞤭 𞤴𞤢𞤤𞤼𞤢𞤴.