𞤃𞤌𞤒 𞤏𞤌𞤐𞤋 𞤃𞤓𞤖𞤀𞤃𞥆𞤀𞤁 (𞤔𞤀𞤃 𞤫 𞤑𞤋𞤅𞤀𞤂 𞤣𞤮𞤱 𞤃𞤀𞤑𞥆𞤌)

𞤑𞤮 𞤻𞤢𞤤𞤲𞤣𞤫 𞥒𞥐 𞤅𞤫𞥅𞤯𞤼𞤮 𞤫 𞤸𞤭𞤼𞤢𞥄𞤲𞤣𞤫 𞥕𞥗𞥐⹁ 𞤲𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣𞤵 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤶𞤭𞤦𞤭𞤲𞤢𞥄 𞤳𞤢 𞤼𞤵𞤬𞤵𞤲𞤣𞤫 𞤃𞤀𞤑𞥆𞤀⹁ 𞤫 𞤲𞤣𞤫𞤪 𞤤𞤫𞤴𞤣𞤭 𞤱𞤭𞤴𞤫𞤼𞤫𞥅𞤲𞤣𞤭 𞤸𞤢𞤲𞤣𞤫 𞤅𞤢𞤱𞤵𞤣𞤭𞥅. 𞤍𞤵𞤥 𞤸𞤢𞤱𞤪𞤭 𞤫 𞤀𞥄𞤩𞤵𞤲’𞤣𞤫⹁ 𞤻𞤢𞤤𞤲𞤣𞤫 𞥑𞥒 𞤤𞤫𞤱𞤪𞤵 𞤆𞤢𞤪𞤢𞤲 𞤀𞤪𞤢𞤲𞤵𞤪𞤵 𞤫 𞤸𞤭𞤼𞤢𞥄𞤲𞤣𞤫 𞤙𞤭𞥅𞤱𞤢 𞤲𞤣𞤫𞤲. 𞤑𞤮 𞤳𞤢𞤲𞤳𞤮 𞤱𞤮𞤲𞤭 𞤢𞤣𞥆𞤵𞤯𞤮 𞤣𞤭𞥅𞤲𞤢 𞤋𞤧𞤤𞤢𞥄𞤥 𞤳𞤢𞤲. 𞤉 𞤲𞤣𞤫𞤪 𞤢𞤲𞥆𞤢𞤦𞤢𞥄𞤩𞤫 𞤩𞤫 𞤘𞤫𞤲𞤮 𞤭𞤥𞥆𞤭𞤲𞤭 𞤩𞤫𞤲 𞤫 𞤴𞤭𞤥𞤩𞤫 𞤩𞤫𞤲⹁ 𞤳𞤮 𞤳𞤢𞤲𞤳𞤮 𞤱𞤮𞤲𞤭 𞤧𞤢𞤳𞥆𞤭𞤼𞤭𞥅𞤯𞤮 𞤫 𞤲𞤵𞤤𞤢𞥄𞤳𞤵.

𞤃𞤵𞤸𞤢𞤥𞥆𞤢𞤣𞤵 (𞤶𞤢𞤥 𞤫 𞤳𞤭𞤧𞤢𞤤 𞤫 𞤥𞤢𞤳𞥆𞤮)⹁ 𞤳𞤮 𞤫 𞤺𞤫𞤴𞤲𞤺𞤮𞤤 𞤄𞤢𞤲𞤵𞥅 𞤖𞤢𞥄𞥃𞤭𞤥 𞤶𞤫𞤴𞤢𞥄𞤲𞤺𞤮𞤤 𞤫 𞤤𞤫𞤻𞤮𞤤 𞤗𞤵𞤪𞤢𞤴𞥃 𞤲𞤺𞤮𞤤 𞤮 𞤶𞤫𞤴𞤢𞥄. 𞤐𞤺𞤮𞥅𞤤 𞤤𞤫𞤻𞤮𞤤 𞤲𞤮 𞤢𞤤𞤯𞤵𞤲𞤮𞥅⹁ 𞤶𞤮𞤺𞤭𞥅 𞤳𞤢𞤣𞤭 𞤷𞤫𞤥𞤦𞤫 𞤥𞤢𞤱𞤯𞤫. 𞤄𞤢𞥄𞤦𞤢 𞤥𞤢𞤳𞥆𞤮⹁ 𞤀𞤦𞤣𞤵𞤤𞥆𞤢𞥄𞤸𞤭 𞤩𞤭𞥅 𞤀𞤦𞤣𞤵𞤤 𞤃𞤵𞤼𞥆𞤢𞤤𞤭𞤦𞤭⹁ 𞤬𞤫𞤰𞥆𞤭𞤲𞥆𞤭 𞤢𞤣𞤮 𞤮 𞤣𞤢𞤻𞤫𞥅𞤣𞤫. 𞤒𞤵𞤥𞥆𞤢 𞤥𞤢𞤳𞥆𞤮⹁ 𞤀𞥄𞤥𞤭𞤲𞤢 𞤩𞤭𞥅 𞤏𞤢𞤸𞤦⹁ 𞤬𞤫𞤰𞥆𞤭𞤲𞤭 𞤳𞤢𞤻𞤵𞤲 𞤳𞤢𞤣𞤭 𞤸𞤢𞤪𞤭 𞤃𞤵𞤸𞤢𞤥𞥆𞤢𞤣𞤵 (𞤶𞤢𞤥 𞤫 𞤳𞤭𞤧𞤢𞤤 𞤣𞤮𞤱 𞤥𞤢𞤳𞥆𞤮) 𞤲𞤮 𞤥𞤢𞤪𞤭 𞤣𞤵𞥅𞤩𞤭 𞤶𞤫𞥅𞤺𞤮𞤮. 𞤐𞤣𞤫𞤲⹁ 𞤧𞤮𞤪𞤮 𞤥𞤢𞤳𞥆𞤮⹁ 𞤀𞤦𞤣𞤵𞤤 𞤃𞤵𞤼𞥆𞤢𞤤𞤭𞤦𞤭⹁ 𞤲𞤫𞤸𞤭 𞤥𞤮 𞤸𞤢𞥄 𞤮 𞤼𞤭𞤥𞥆𞤭𞤲𞤭 𞤣𞤵𞥅𞤩𞤭 𞤶𞤫𞥅𞤼𞤢𞤼𞤭. 𞤇𞤢𞤴𞤼𞤭 𞤮𞤲 𞤯𞤮𞤲 𞤳𞤢𞤣𞤭 𞤬𞤫𞤰𞥆𞤭𞤲𞤭𞥅⹁ 𞤦𞤢𞥄𞤨𞥆𞤢 𞤥𞤢𞤳𞥆𞤮 𞤀𞤦𞤵𞥅 𞤚𞤢𞥄𞤤𞤭𞤦 𞤲𞤫𞤸𞤭 𞤥𞤮.

𞤊𞤫𞤱𞤲𞤣𞤮 𞤮 𞤱𞤮𞤲𞤵𞤲𞤮𞥅 𞤰𞤢𞤯𞥆𞤵𞤪𞤥𞤢𞥄𞤶𞤮⹁ 𞤃𞤵𞤸𞤢𞤥𞥆𞤢𞤣𞤵 (𞤶𞤢𞤥 𞤫 𞤳𞤭𞤧𞤢𞤤 𞤫 𞤥𞤢𞤳𞥆𞤮) 𞤲𞤮 𞤱𞤮𞥅𞤱𞤵𞤲𞤮𞥅 𞤧𞤫𞤼𞤮𞤣𞤢𞥄𞤣𞤫 𞤫 𞤦𞤢𞥄𞤨𞥆𞤢 𞤥𞤢𞤳𞥆𞤮 𞤴𞤢𞤸𞤣𞤵 𞤡𞤢𞥄𞤥 (𞤅𞤭𞥅𞤪𞤭𞤴𞤢). 𞤇𞤢𞤴𞤼𞤭 𞤮 𞤸𞤫𞤤𞥆𞤭𞤬𞤢𞥄𞤥𞤢⹁ 𞤮 𞤱𞤮𞤲𞤭 𞤳𞤢𞤲𞤳𞤮 𞤳𞤢𞤣𞤭 𞤶𞤭𞤺𞥆𞤮𞤼𞤮𞥅𞤯𞤮 (𞤴𞤫𞥅𞤴𞤮𞥅𞤱𞤮) 𞤺𞤢𞤴𞤲𞤵𞤯𞤮.

𞤐𞤣𞤫 𞤮 𞤼𞤭𞤥𞥆𞤭𞤲𞤵𞤲𞤮𞥅 𞤣𞤵𞥅𞤩𞤭 𞥒𞥕⹁ 𞤮 𞤼𞤭𞤺𞥆𞤭 𞤷𞤫𞥅𞤥𞤫𞥅𞤯𞤮 𞤢𞤤𞤯𞤵𞤯𞤮 𞤭𞤲𞥆𞤫𞤼𞤫𞥅𞤯𞤮 𞤝𞤢𞤣𞤭𞥅𞤶𞤢𞤼𞤵 𞤩𞤭𞥅 𞤝𞤵𞤱𞤢𞤴𞤤𞤭𞤣. 𞤇𞤫 𞤱𞤮𞤲𞤣𞤭 𞤣𞤵𞥅𞤩𞤭 𞤲𞤮𞥅𞤺𞤢𞤴 𞤫 𞤶𞤫𞥅𞤺𞤮𞤮. 𞤇𞤫 𞤣𞤢𞤻𞤭𞤣𞤭 𞤩𞤭𞤩𞥆𞤫 𞤲𞤶𞤫𞥅𞤺𞤮𞤮. 𞤐𞤮 𞤫 𞤥𞤢𞤩𞥆𞤫 𞤱𞤮𞤪𞤩𞤫 𞤯𞤭𞤯𞤮. 𞤇𞤫𞤲 𞤳𞤮 𞤗𞤢𞥄𞤧𞤭𞤥 𞤫 𞤀𞤦𞤣𞤢𞤤𞥆𞤢𞤸⹁ 𞤳𞤮𞤲𞤮 𞤩𞤫𞥅 𞤯𞤭𞤯𞤮 𞤲𞤮𞤲 𞤬𞤫𞤰𞥆𞤭𞤲𞤭 𞤤𞤢𞤱. 𞤈𞤫𞤱𞤩𞤫 𞤩𞤫𞤲 𞤳𞤮 𞤟𞤢𞤴𞤲𞤢𞤦⹁ 𞤈𞤵𞤹𞤢𞤴𞥆𞤢⹁ 𞤓𞤥𞥆𞤵 𞤑𞤵𞤤𞤼𞤵𞥅𞤥 𞤫 𞤊𞤢𞥄𞤼𞤭𞤥𞤢. 𞤑𞤮 𞤝𞤢𞤣𞤭𞥅𞤶𞤢 𞤼𞤢𞤲 𞤃𞤵𞤸𞤢𞤥𞥆𞤢𞤣𞤵 𞤪𞤫𞤧𞤵𞤲𞤮𞥅 𞤸𞤢𞥄 𞤲𞤣𞤫 𞤸𞤮𞤲 𞤬𞤫𞤰𞥆𞤭𞤲𞤭 𞤣𞤵𞥅𞤩𞤭 𞤼𞤢𞤼𞤭 𞤢𞤣𞤮 𞤬𞤫𞤪𞤺𞤵 𞤲𞤺𞤵𞤲 𞤃𞤢𞤣𞤭𞥅𞤲𞤢.

𞤑𞤮 𞤩𞤢𞥄𞤱𞤮 𞤝𞤢𞤣𞤭𞥅𞤶𞤢 𞤬𞤫𞤰𞥆𞤭𞤲𞤣𞤫⹁ 𞤃𞤵𞤸𞤢𞤥𞥆𞤢𞤣𞤵 (𞤔𞤢𞤥 𞤫 𞤳𞤭𞤧𞤢𞤤 𞤣𞤮𞤱 𞤥𞤢𞤳𞥆𞤮) 𞤩𞤢𞤽𞤭𞤼𞤭. 𞤐𞤮 𞤼𞤢𞤱𞤢𞥄 𞤫 𞤩𞤫 𞤮 𞤼𞤭𞤺𞤵𞤲𞤮𞥅 𞤩𞤫𞤲⹁ 𞤅𞤢𞤱𞤣𞤢 𞤩𞤭𞥅 𞤟𞤢𞤥𞥇𞤢 𞤫 𞤀𞤴𞥃𞤢 𞤩𞤭𞥅 𞤀𞤦𞤵𞥅 𞤄𞤢𞤳𞤪. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞤲𞤣𞤫 𞤝𞤢𞤣𞤭𞥅𞤶𞤢 𞤬𞤫𞤰𞥆𞤭𞤲𞤭 𞤲𞤣𞤫𞤲⹁ 𞤲𞤵𞤤𞤢𞥄𞤯𞤮 𞤼𞤭𞤺𞥆𞤭 𞤅𞤢𞤱𞤣𞤢⹁ 𞤼𞤢𞤱𞤭 𞤸𞤮𞤲 𞤳𞤮 𞤷𞤫𞥅𞤥𞤫𞥅𞤯𞤮 𞤥𞤮 𞤥𞤮𞥅𞤣𞤭 𞤥𞤵𞥅𞤯𞤵𞤲 𞤬𞤫𞤰𞥆𞤭𞤲𞥆𞤮 𞤩𞤢𞥄𞤱𞤮 𞤬𞤫𞤪𞤺𞤵 𞤲𞤺𞤵𞤲 𞤀𞤦𞤭𞤧𞤭𞤲𞤢𞥄.

𞤑𞤮 𞤩𞤵𞤪𞤭 𞤸𞤫𞥅𞤱𞤵𞤣𞤫 𞤫 𞤧𞤮𞤲𞥆𞤢𞥄𞤩𞤫 𞤩𞤫 𞤐𞤫𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣𞤵 𞤩𞤢𞤽𞤵𞤲𞤮𞥅 𞤩𞤫𞤲⹁ 𞤢𞤥𞥆𞤢𞥄 𞤳𞤮 𞤷𞤫𞥅𞤥𞤫𞥅𞤩𞤫 𞤱𞤢𞤲𞤮 𞤅𞤢𞤱𞤣𞤢 𞤥𞤢𞤤𞥆𞤢 𞤳𞤮 𞤧𞤫𞥅𞤪𞤢𞤲𞤮𞥅𞤩𞤫 𞤱𞤢𞤲𞤮 𞤟𞤢𞤴𞤲𞤢𞤦 𞤩𞤭𞥅 𞤔𞤢𞤴𞥃. 𞤑𞤮 𞤀𞤴𞥃𞤢 𞤼𞤢𞤲 𞤱𞤮𞤲𞤭 𞤧𞤮𞤲𞥆𞤢𞥄𞤶𞤮 𞤥𞤮 𞤮 𞤼𞤭𞤺𞥆𞤭 𞤼𞤢𞤱𞤭 𞤸𞤮𞤲 𞤱𞤮𞤲𞤢𞥄 𞤷𞤫𞥅𞤥𞤫𞥅𞤯𞤮⹁ 𞤥𞤢𞤤𞥆𞤢 𞤧𞤫𞥅𞤪𞤢𞥄𞤯𞤮 𞤥𞤢𞤤𞥆𞤢 𞤶𞤭𞤴𞤢𞥄𞤯𞤮.

𞤃𞤵𞤸𞤢𞤥𞥆𞤢𞤣𞤵 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤲𞤮 𞤱𞤮𞥅𞤱𞤵𞤲𞤮𞥅 𞤱𞤫𞤣𞥆𞤭𞤼𞤢𞥄𞤲𞤣𞤫 𞤫 𞤬𞤢𞤥𞥆𞤫𞥅𞤪𞤫 𞤱𞤭𞤴𞤫𞤼𞤫𞥅𞤲𞤣𞤫 𞤖𞤋𞤈𞤀 𞤳𞤢 𞤸𞤮𞥅𞤪𞤫 𞤬𞤫𞤤𞥆𞤮 𞤔𞤀𞤄𞤀𞤂𞤀𞤂 𞤐𞤓𞥅𞤈. 𞤉 𞤸𞤭𞤼𞤢𞥄𞤲𞤣𞤫 𞥖𞥑𞥐⹁ 𞤸𞤢𞤪𞤭 𞤮 𞤸𞤫𞤩𞤭𞥅 𞤣𞤵𞥅𞤩𞤭 𞥔𞥐⹁ 𞤀𞤤𞤤𞤢 𞤭𞤥𞥆𞤭𞤲𞤭 𞤔𞤭𞤦𞤭𞤪𞤭𞥅𞤤𞤵 𞤫 𞤥𞤢𞤳𞥆𞤮 𞤱𞤮𞤲𞤣𞤵𞤣𞤫 𞤫 𞤗𞤵𞤪𞥇𞤢𞥄𞤲𞤢 𞤸𞤢𞤪𞤭 𞤮𞤥𞤮 𞤳𞤢 𞤬𞤢𞤥𞥆𞤫𞥅𞤪𞤫 𞤖𞤋𞤈𞤀. 𞤔𞤭𞤦𞤭𞤪𞤭𞥅𞤤𞤵 𞤱𞤭𞤴𞤭 𞤥𞤮: “𞤶𞤢𞤲𞤺𞤵. 𞤌 𞤶𞤢𞥄𞤦𞤭𞥅⹁ “𞤃𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫.” 𞤇𞤫 𞤺𞤫𞤪𞤣𞤭 𞤯𞤮𞤲 𞤸𞤢𞥄 𞤮 𞤸𞤵𞤲𞤶𞤭𞥅 𞤢𞥄𞤴𞤫𞥅𞤶𞤫 𞤯𞤫 𞤔𞤭𞤦𞤭𞤪𞤭𞥅𞤤𞤵 𞤤𞤮𞤲𞤺𞤭𞤲𞤭 𞤥𞤮 𞤯𞤫𞤲.

𞤁𞤵𞥅𞤩𞤭 𞤯𞤭𞤯𞤭 𞤔𞤭𞤦𞤭𞤪𞤭𞥅𞤤𞤵 𞤲𞤮 𞤢𞤪𞤵𞤣𞤫 𞤴𞤮𞤼𞥆𞤭𞤲𞤢 𞤫 𞤥𞤢𞤳𞥆𞤮 𞤢𞥄𞤴𞤫𞥅𞤶𞤫 𞤗𞤵𞤪𞥇𞤢𞥄𞤲𞤢. 𞤑𞤮𞤲𞤮 𞤮𞤲𞤼𞤵𞤥𞤢⹁ 𞤳𞤮 𞤫 𞤴𞤭𞤥𞤩𞤫 𞤧𞤫𞥅𞤯𞤢𞥄𞤩𞤫 𞤼𞤢𞤲 𞤱𞤢𞤲𞤮 𞤝𞤢𞤣𞤭𞥅𞤶𞤢 𞤫 𞤣𞤫𞤲𞤯𞤭𞤪𞤢𞥄𞤱𞤮 𞤥𞤵𞤵𞤲 𞤏𞤢𞤪𞤢𞤹𞤢⹁ 𞤮 𞤱𞤮𞤲𞤵𞤲𞤮𞥅 𞤸𞤢𞤤𞤬𞤭𞤲𞤢𞥄𞤣𞤫.

𞤇𞤢𞥄𞤱𞤮 𞤣𞤵𞥅𞤩𞤭 𞤯𞤭𞤯𞤭 𞤬𞤫𞤰𞥆𞤵𞤣𞤫⹁ 𞤮 𞤬𞤵𞤯𞥆𞤭 𞤴𞤮𞤼𞥆𞤭𞤲𞤣𞤫 𞤲𞤵𞤤𞤢𞤤 𞤋𞤧𞤤𞤢𞥄𞤥𞤵 𞤲𞤺𞤢𞤤 𞤫 𞤴𞤭𞤥𞤩𞤫 𞤥𞤢𞤳𞥆𞤢 𞤩𞤫𞤲 𞤳𞤢 𞤳𞤫𞤲𞤫. 𞤑𞤢 𞤢𞤪𞤢𞤲𞤵𞤲 𞤼𞤢𞤸𞤮⹁ 𞤴𞤭𞤥𞤩𞤫 𞤃𞤢𞤳𞥆𞤢 𞤩𞤫𞤲 𞤯𞤵𞥅𞤪𞤭𞥅 𞤥𞤮⹁ 𞤱𞤵𞤪𞤭𞤲 𞤩𞤫 𞤱𞤢𞤯𞤼𞤢𞤲𞤢𞥄𞤤𞤭 𞤸𞤭𞥅𞤤𞤢 𞤬𞤮𞤼𞤢 𞤫 𞤳𞤮 𞤮 𞤱𞤮𞤲𞤵𞤲𞤮𞥅 𞤸𞤢𞥄𞤤𞤵𞤣𞤫 𞤳𞤮𞤲. 𞤑𞤮 𞤪𞤫𞤱𞤩𞤫 𞤩𞤫𞤲 𞤫 𞤧𞤵𞤳𞤢𞥄𞤩𞤫 𞤩𞤫𞤲 𞤳𞤢𞤻𞤵𞤲 𞤫 𞤼𞤢𞤥𞤨𞤵𞤩𞤫 𞤩𞤫𞤲 𞤩𞤵𞤪𞤵𞤲𞤮𞥅 𞤼𞤢𞤱𞤼𞤵𞤣𞤫 𞤥𞤮.

𞤑𞤮𞤲𞤮 𞤮 𞤸𞤢𞤱𞤪𞤭 𞤫 𞤤𞤭𞤣𞥆𞤵 𞤥𞤢𞤱𞤲𞤺𞤵 𞤭𞤥𞥆𞤮𞤪𞤣𞤫 𞤫 𞤳𞤮𞥅𞤸𞤮𞥅𞤩𞤫 𞤃𞤢𞤳𞥆𞤢 𞤩𞤫𞤲. 𞤇𞤫𞤲 𞤼𞤢𞤥𞤨𞤭𞤲𞤭 𞤥𞤮⹁ 𞤳𞤢𞤲𞤳𞤮 𞤫 𞤶𞤮𞤳𞥆𞤵𞤩𞤫 𞤥𞤮 𞤬𞤢𞥄 𞤩𞤫 𞤴𞤢𞤤𞤼𞤭𞤲𞤭 𞤩𞤫 𞤫 𞤲𞤣𞤫𞤪 𞤧𞤢𞤸𞤪𞤫 𞤃𞤢𞤳𞥆𞤢 𞤲𞤣𞤫𞤲 𞤬𞤫𞤱𞤲𞤣𞤮 𞤸𞤭𞤼𞤢𞥄𞤲𞤣𞤫 𞥖𞥒𞥒.

𞤌𞤲𞤼𞤵𞤥𞤢⹁ 𞤳𞤢𞤲𞤳𞤮 𞤫 𞤶𞤮𞤳𞥆𞤵𞤩𞤫 𞤥𞤮 𞤩𞤫𞤲⹁ 𞤩𞤫 𞤬𞤫𞤪𞤭⹁ 𞤩𞤫 𞤴𞤢𞤸𞤭 𞤒𞤢𞤼𞤪𞤭𞤦(𞤃𞤢𞤣𞤭𞥅𞤲𞤢). 𞤑𞤮 𞤯𞤮𞥅𞤲 𞤩𞤫 𞤢𞤣𞤭𞥅 𞤧𞤭𞤲𞤷𞤵𞤣𞤫 𞤥𞤮𞤬𞤼𞤫𞤪𞤫 𞤋𞤧𞤤𞤢𞥄𞤥𞤵. 𞤌 𞤣𞤵𞥅𞤥𞤭𞥅 𞤫 𞤱𞤢𞥄𞤶𞤢𞤺𞤮𞤤 𞤫 𞤴𞤢𞥄𞤻𞥆𞤵𞤺𞤮𞤤 𞤪𞤫𞤲𞤣𞤮 𞤋𞤧𞤤𞤢𞥄𞤥𞤵 𞤲𞤺𞤮𞤲. 𞤌 𞤢𞤪𞤣𞤭𞥅 𞤳𞤢𞤣𞤭 𞤳𞤮𞤲𞤭 𞤶𞤵𞥅𞤤𞤩𞤫 𞤫 𞤸𞤢𞤩𞤵𞤺𞤮𞤤 𞤸𞤫𞥅𞤬𞤫𞤪𞤩𞤫 𞤃𞤢𞤳𞥆𞤢 𞤩𞤫𞤲.

𞤉 𞤸𞤭𞤼𞤢𞥄𞤲𞤣𞤫 𞥖𞥓𞥐⹁ 𞤐𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣𞤵 𞤫 𞤶𞤮𞤳𞥆𞤵𞤲𞤮𞥅𞤩𞤫 𞤥𞤮 𞤩𞤫𞤲 𞤴𞤢𞤸𞤭 𞤃𞤢𞤳𞥆𞤢. 𞤇𞤢𞥄𞤴𞤼𞤭 𞤩𞤫 𞤲𞤢𞥄𞤼𞤭𞥅 𞤼𞤮𞥅⹁ 𞤲𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣𞤵 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤴𞤢𞥄𞤬𞤢𞤲𞤭𞥅 𞤴𞤭𞤥𞤩𞤫 𞤃𞤢𞤳𞥆𞤢 𞤩𞤫𞤲 𞤤𞤫𞤼𞥆𞤫 𞤯𞤫 𞤩𞤫𞥅𞤲 𞤬𞤢𞤱𞤵𞤲𞤮𞥅 𞤥𞤮 𞤳𞤢𞤲𞤳𞤮 𞤫 𞤶𞤮𞤳𞥆𞤵𞤩𞤫 𞤥𞤮 𞤩𞤫𞤲 𞤢𞤣𞤮 𞤩𞤫 𞤬𞤫𞤪𞤵𞤣𞤫 𞤃𞤢𞤣𞤭𞥅𞤲𞤢.

𞤑𞤮 𞤻𞤢𞤤𞤲𞤣𞤫 𞥘 𞤑𞤮𞤪𞤧𞤮 𞤫 𞤸𞤭𞤼𞤢𞥄𞤲𞤣𞤫 𞥖𞥓𞥒⹁ 𞤲𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣𞤵 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤬𞤫𞤰𞥆𞤭𞤲𞤭 𞤸𞤢𞤪𞤭 𞤮𞤥𞤮 𞤶𞤮𞤺𞤭𞥅 𞤣𞤵𞥅𞤩𞤭 𞥖𞥒. 𞤑𞤮 𞤃𞤢𞤣𞤭𞥅𞤲𞤢 𞤮 𞤵𞤦𞥆𞤢𞥄.

𞤐𞤺𞤵𞥅𞤪𞤲𞤣𞤢𞤥 𞤥𞤢𞤳𞥆𞤮 𞤫 𞤳𞤮 𞤮 𞤶𞤢𞤲𞤺𞤭𞤲𞤭 𞤳𞤮𞤲⹁ 𞤦𞤢𞤯𞤼𞤭𞤲𞤭𞥅 𞤬𞤮𞤼𞤢 𞤫 𞤢𞤣𞤭𞤲𞤢𞥄𞤪𞤵 𞤲𞤣𞤵𞤲. 𞤖𞤢𞤲𞤣𞤫 𞤋𞤧𞤤𞤢𞥄𞤥 𞤲𞤮 𞤼𞤢𞤱𞤢𞥄 𞤫 𞤤𞤢𞥄𞤱𞤭 𞤣𞤫𞤱𞤫 𞤩𞤵𞤪𞤵𞤯𞤭 𞤴𞤢𞥄𞤶𞤵𞤣𞤫 𞤫 𞤢𞤣𞤭𞤲𞤢𞥄𞤪𞤵 𞤲𞤣𞤵𞤲. 𞤳𞤮 𞤩𞤵𞤪𞤭 𞤣𞤵𞤶𞤵𞤲𞤫 𞤯𞤭𞤯𞤭 𞤴𞤭𞤥𞤩𞤫 𞤲𞤮 𞤶𞤮𞤳𞥆𞤭 𞤋𞤧𞤤𞤢𞥄𞤥𞤵 𞤸𞤢𞤲𞤣𞤫.

𞤔𞤵𞥅𞤤𞤩𞤫 𞤩𞤫𞤲 𞤲𞤮 𞤧𞤫𞤲𞥆𞤭 𞤲𞤵𞤤𞤢𞥄𞤯𞤮 𞤳𞤵𞥅𞤩𞤮 𞤢𞤲𞥆𞤢𞤦𞤢𞥄𞤳𞤵. 𞤇𞤫 𞤱𞤢𞤯𞤭𞥅 𞤥𞤮 𞤳𞤢𞤣𞤭 𞤻𞤫𞤥𞤼𞤭𞤲𞤼𞤫𞥅𞤯𞤮 𞤫 𞤻𞤫𞤥𞤦𞤫𞤼𞤫𞥅𞤯𞤮. 𞤐𞤵𞤤𞤢𞥄𞤯𞤮 𞤱𞤢𞤯𞤭𞥅 𞤫 𞤲𞤣𞤫𞤪 𞤣𞤵𞥅𞤩𞤭 𞥒𞥒⹁ 𞤳𞤮 𞤸𞤢𞤴 𞤺𞤮𞥅𞤼𞤮𞥅 𞤥𞤫𞥅𞤯𞤢𞥄 𞤱𞤢𞤯𞤵𞤣𞤫.

𞤏𞤮𞤲𞤢𞥄 𞤥𞤫𞤸𞤪𞤫⹁ 𞤃𞤢𞤴𞤳𞤮𞤤 𞤖𞤢𞤪𞤼⹁ 𞤫 𞤲𞤣𞤫𞤪 𞤣𞤫𞤬𞤼𞤫𞤪𞤫 𞤥𞤢𞤳𞥆𞤮 𞤸𞤮𞥅𞤪𞤫 𞤴𞤭𞤥𞤩𞤫 𞥑𞥐𞥐 𞤩𞤵𞤪𞤵𞤩𞤫 𞤦𞤢𞤯𞤼𞤭𞤲𞤣𞤫 𞤩𞤫𞤲 𞤫 𞤼𞤢𞥄𞤪𞤭𞥅𞤳𞤢 𞤲𞤫𞤯𞥆𞤢𞤲𞤳𞤫 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭⹁ 𞤲𞤮 𞤱𞤢𞤯𞤭 𞤃𞤵𞤸𞤢𞤥𞥆𞤢𞤣𞤵 (𞤶𞤢𞤥 𞤫 𞤳𞤭𞤧𞤢𞤤 𞤣𞤮𞤱 𞤥𞤢𞤳𞥆𞤮) 𞤢𞤪𞤢𞤲𞤮 𞤫 𞤥𞤢𞤩𞥆𞤫. 𞤐𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣𞤵 𞤱𞤮𞤲𞤢𞥄 𞤀𞥄𞤪𞤢𞤦𞤫𞥅𞤩𞤫 𞤩𞤫𞤲 𞤼𞤢𞤲 𞤮 𞤱𞤢𞤴𞤤𞤭 𞤮 𞤭𞤼𞥆𞤭 𞤫 𞤥𞤢𞤶𞥆𞤫𞤪𞤫⹁ 𞤳𞤮 𞤢𞤣𞤭𞤲𞤢𞥄𞤪𞤵 𞤲𞤣𞤵𞤲 𞤬𞤮𞤨 𞤮 𞤲𞤣𞤢𞤴𞤺𞤭𞤲𞤭𞤪𞤭 𞤋𞤧𞤤𞤢𞥄𞤥𞤵.

𞤑𞤮 𞤴𞤭𞤥𞤩𞤫 𞤪𞤮𞤲𞤵𞤩𞤫 𞤩𞤫𞤲 𞤲𞤢𞥄𞤱𞤮𞤤 𞤥𞤢𞤳𞥆𞤮 𞤲𞤺𞤮𞤤 𞤲𞤣𞤢𞤴𞤺𞤭𞤲𞤭 𞤉𞤪𞤮𞤨 𞤸𞤢𞤪𞤭 𞤫𞤪𞤮𞤨𞤲𞤢𞥄𞤩𞤫 𞤩𞤫𞤲 𞤲𞤮 𞤫 𞤲𞤭𞤩𞤫. 𞤑𞤮 𞤶𞤵𞥅𞤤𞤩𞤫 𞤩𞤫𞤲 𞤳𞤢𞤣𞤭 𞤴𞤭𞥅𞤼𞤭𞤲𞤣𞤭𞤲𞤭 𞤴𞤭𞤥𞤩𞤫 𞤩𞤫𞤲 𞤺𞤭𞤦𞤭 𞤬𞤵𞤯𞤲𞤢𞥄𞤲𞤺𞤫 𞤸𞤢𞥄 𞤸𞤭𞤪𞤲𞤢𞥄𞤲𞤺𞤫⹁ 𞤧𞤢𞥄𞤳𞤭𞤼𞤭 𞤺𞤢𞤲𞤣𞤢𞤤 𞤫 𞤬𞤢𞤸𞤥𞤵 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭.