𞤃𞤌𞤒 𞤏𞤌𞤐𞤋 𞤃𞤓𞤖𞤀𞤃𞥆𞤀𞤁 (𞤔𞤀𞤃 𞤫 𞤑𞤋𞤅𞤀𞤂 𞤣𞤮𞤱 𞤃𞤀𞤑𞥆𞤌)
𞤑𞤮 𞤻𞤢𞤤𞤲𞤣𞤫 𞥒𞥐 𞤅𞤫𞥅𞤯𞤼𞤮 𞤫 𞤸𞤭𞤼𞤢𞥄𞤲𞤣𞤫 𞥕𞥗𞥐⹁ 𞤲𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤶𞤭𞤦𞤭𞤲𞤢𞥄 𞤳𞤢 𞤼𞤵𞤬𞤵𞤲𞤣𞤫 𞤃𞤀𞤑𞥆𞤀⹁ 𞤫 𞤲𞤣𞤫𞤪 𞤤𞤫𞤴𞤣𞤭 𞤱𞤭𞤴𞤫𞤼𞤫𞥅𞤲𞤣𞤭 𞤸𞤢𞤲𞤣𞤫 𞤅𞤢𞤱𞤵𞤣𞤭𞥅. 𞤍𞤵𞤥 𞤸𞤢𞤱𞤪𞤭 𞤫 𞤀𞥄𞤩𞤵𞤲’𞤣𞤫⹁ 𞤻𞤢𞤤𞤲𞤣𞤫 𞥑𞥒 𞤤𞤫𞤱𞤪𞤵 𞤆𞤢𞤪𞤢𞤲 𞤀𞤪𞤢𞤲𞤵𞤪𞤵 𞤫 𞤸𞤭𞤼𞤢𞥄𞤲𞤣𞤫 𞤙𞤭𞥅𞤱𞤢 𞤲𞤣𞤫𞤲. 𞤑𞤮 𞤳𞤢𞤲𞤳𞤮 𞤱𞤮𞤲𞤭 𞤢𞤣𞥆𞤵𞤯𞤮 𞤣𞤭𞥅𞤲𞤢 𞤋𞤧𞤤𞤢𞥄𞤥 𞤳𞤢𞤲. 𞤖𞤢𞤳𞥆𞤵𞤲𞥋𞤣𞤫 𞤢𞤲𞥆𞤢𞤦𞤢𞥄𞤩𞤫 𞤩𞤫 𞤘𞤫𞤲𞤮 𞤮𞤲 𞤭𞤥𞥆𞤭𞤲𞤭 𞤫 𞤴𞤭𞤥𞤩𞤫 𞤩𞤫𞤲⹁ 𞤳𞤮 𞤳𞤢𞤲𞤳𞤮 𞤱𞤮𞤲𞤭 𞤧𞤢𞤳𞥆𞤭𞤼𞤢𞥄𞤯𞤮 𞤲𞤵𞤤𞤫𞥅𞤣𞤫 𞤮𞤲.
𞤃𞤵𞤸𞤢𞤥𞥆𞤢𞤣 (𞤶𞤢𞤥 𞤫 𞤳𞤭𞤧𞤢𞤤 𞤫 𞤥𞤢𞤳𞥆𞤮)⹁ 𞤳𞤮 𞤫 𞤺𞤫𞤴𞤲𞤺𞤮𞤤 𞤄𞤢𞤲𞤵𞥅 𞤖𞤢𞥄𞥃𞤭𞤥 𞤶𞤫𞤴𞤢𞥄𞤲𞤺𞤮𞤤 𞤫 𞤤𞤫𞤻𞤮𞤤 𞤗𞤵𞤪𞤢𞤴𞥃 𞤲𞤺𞤮𞤤 𞤮 𞤶𞤭𞤦𞤭𞤲𞤢𞥄. 𞤐𞤺𞤮𞤤 𞤤𞤫𞤻𞤮𞤤 𞤲𞤮 𞤢𞤤𞤯𞤵𞤲𞤮𞥅 𞤶𞤮𞤺𞤭𞥅 𞤳𞤢𞤣𞤭 𞤷𞤫𞤥𞤦𞤫 𞤥𞤢𞤱𞤯𞤫. 𞤄𞤢𞥄𞤦𞤢 𞤥𞤢𞤳𞥆𞤮⹁ 𞤀𞤦𞤣𞤵𞤤𞥆𞤢𞥄𞤸𞤭 𞤩𞤭𞥅 𞤀𞤦𞤣𞤵𞤤 𞤃𞤵𞤼𞥆𞤢𞤤𞤭𞤦𞤭⹁ 𞤬𞤫𞤰𞥆𞤭𞤲𞥆𞤭 𞤢𞤣𞤮 𞤮 𞤣𞤢𞤻𞤫𞥅𞤣𞤫. 𞤒𞤵𞤥𞥆𞤢 𞤥𞤢𞤳𞥆𞤮⹁ 𞤀𞥄𞤥𞤭𞤲𞤢 𞤩𞤭𞥅 𞤏𞤢𞤸𞤦⹁ 𞤬𞤫𞤰𞥆𞤭𞤲𞤭 𞤳𞤢𞤻𞤵𞤲 𞤳𞤢𞤣𞤭 𞤸𞤢𞤪𞤭 𞤃𞤵𞤸𞤢𞤥𞥆𞤢𞤣 (𞤶𞤢𞤥 𞤫 𞤳𞤭𞤧𞤢𞤤 𞤣𞤮𞤱 𞤥𞤢𞤳𞥆𞤮) 𞤲𞤮 𞤥𞤢𞤪𞤭 𞤣𞤵𞥅𞤩𞤭 𞤶𞤫𞥅𞤺𞤮𞤮. 𞤐𞤣𞤫𞤲⹁ 𞤧𞤮𞤪𞤮 𞤥𞤢𞤳𞥆𞤮⹁ 𞤀𞤦𞤣𞤵𞤤 𞤃𞤵𞤼𞥆𞤢𞤤𞤭𞤦𞤭⹁ 𞤲𞤫𞤭 𞤥𞤮 𞤸𞤢𞥄 𞤮 𞤼𞤭𞤥𞥆𞤭𞤲𞤭 𞤣𞤵𞥅𞤩𞤭 𞤶𞤫𞥅𞤼𞤢𞤼𞤭. 𞤇𞤀𞥄𞤴𞤼𞤭 𞤮𞤲 𞤯𞤮𞤲 𞤳𞤢𞤣𞤭 𞤬𞤫𞤰𞥆𞤭𞤲𞤭𞥅⹁ 𞤦𞤢𞥄𞤨𞥆𞤢 𞤥𞤢𞤳𞥆𞤮 𞤀𞤦𞤵𞥅 𞤚𞤢𞥄𞤤𞤭𞤦 𞤲𞤫𞤭 𞤥𞤮.
𞤊𞤫𞤱𞤲𞤣𞤮 𞤮 𞤱𞤮𞤲𞤵𞤲𞤮𞥅 𞤰𞤢𞤯𞥆𞤵𞤪𞤥𞤢𞥄𞤶𞤮⹁ 𞤃𞤵𞤸𞤢𞤥𞥆𞤢𞤣 (𞤶𞤢𞤥 𞤫 𞤳𞤭𞤧𞤢𞤤 𞤫 𞤥𞤢𞤳𞥆𞤮) 𞤲𞤮 𞤱𞤮𞥅𞤱𞤵𞤲𞤮𞥅 𞤧𞤫𞤼𞤮𞤣𞤢𞥄𞤣𞤫 𞤫 𞤦𞤢𞥄𞤨𞥆𞤢 𞤥𞤵𞤵𞤲 𞤴𞤢𞤸𞤣𞤵 𞤡𞤢𞥄𞤥 (𞤅𞤭𞥅𞤪𞤭𞤴𞤢). 𞤇𞤢𞥄𞤴𞤼𞤭 𞤮 𞤸𞤫𞤤𞥆𞤭𞤬𞤢𞥄𞤥𞤢⹁ 𞤮 𞤤𞤢𞥄𞤼𞤭𞥅 𞤳𞤢𞤲𞤳𞤮 𞤳𞤢𞤣𞤭 𞤶𞤭𞤺𞥆𞤮𞤼𞤮𞥅𞤯𞤮 (𞤴𞤫𞥅𞤴𞤮𞥅𞤱𞤮) 𞤺𞤢𞤴𞤲𞤵𞤯𞤮.
𞤐𞤣𞤫 𞤮 𞤼𞤭𞤥𞥆𞤭𞤲𞤮𞥅 𞤣𞤵𞥅𞤩𞤭 𞥒𞥕⹁ 𞤮 𞤼𞤭𞤺𞥆𞤭 𞤷𞤫𞥅𞤥𞤫𞥅𞤯𞤮 𞤢𞤤𞤯𞤵𞤯𞤮 𞤭𞤲𞥆𞤫𞤼𞤫𞥅𞤯𞤮 𞤝𞤢𞤣𞤭𞥅𞤶𞤢𞤼𞤵 𞤩𞤭𞥅 𞤝𞤵𞤱𞤢𞤴𞤤𞤭𞤣. 𞤇𞤫 𞤱𞤮𞤲𞤣𞤭 𞤣𞤵𞥅𞤩𞤭 𞤲𞤮𞥅𞤺𞤢𞤴 𞤫 𞤶𞤫𞥅𞤺𞤮𞤮. 𞤇𞤫 𞤣𞤢𞤻𞤭𞤣𞤭 𞤩𞤭𞤩𞥆𞤫 𞤲𞤶𞤫𞥅𞤺𞤮𞤮. 𞤏𞤮𞤪𞤩𞤫 𞤯𞤭𞤯𞤮⹁ 𞤩𞤫𞤲 𞤳𞤮 𞤗𞤢𞥄𞤧𞤭𞤥 𞤫 𞤀𞤦𞤣𞤢𞤤𞥆𞤢𞤸⹁ 𞤳𞤮𞤲𞤮 𞤩𞤫𞥅 𞤯𞤭𞤯𞤮 𞤬𞤫𞤰𞥆𞤭𞤲𞤭 𞤤𞤢𞤱. 𞤈𞤫𞤱𞤩𞤫 𞤩𞤫𞤲 𞤳𞤮 𞤟𞤢𞤴𞤲𞤢𞤦⹁ 𞤈𞤵𞤹𞤢𞤴𞥆𞤢⹁ 𞤓𞤥𞥆𞤵 𞤑𞤵𞤤𞤼𞤵𞥅𞤥 𞤫 𞤊𞤢𞥄𞤼𞤭𞤥𞤢. 𞤑𞤮 𞤝𞤢𞤣𞤭𞥅𞤶𞤢 𞤼𞤢𞤲 𞤃𞤵𞤸𞤢𞤥𞥆𞤢𞤣 𞤶𞤮𞤺𞤭𞤲𞤮𞥅 𞤩𞤫𞤴𞤲𞤺𞤵 𞤸𞤢𞥄 𞤲𞤣𞤫 𞤸𞤮𞤲 𞤬𞤫𞤰𞥆𞤭𞤲𞤮𞥅 𞤣𞤵𞥅𞤩𞤭 𞤼𞤢𞤼𞤭 𞤢𞤣𞤮 𞤬𞤫𞤪𞤺𞤵 𞤲𞤺𞤵𞤲 𞤃𞤢𞤣𞤭𞥅𞤲𞤢.
𞤑𞤮 𞤩𞤢𞥄𞤱𞤮 𞤝𞤢𞤣𞤭𞥅𞤶𞤢 𞤬𞤫𞤰𞥆𞤭𞤲𞤣𞤫⹁ 𞤃𞤵𞤸𞤢𞤥𞥆𞤢𞤣 (𞤔𞤢𞤥 𞤫 𞤳𞤭𞤧𞤢𞤤 𞤣𞤮𞤱 𞤥𞤢𞤳𞥆𞤮) 𞤼𞤭𞤺𞥆𞤭𞤼𞤭. 𞤐𞤮 𞤼𞤢𞤱𞤢𞥄 𞤫 𞤩𞤫 𞤮 𞤼𞤭𞤺𞤵𞤲𞤮𞥅 𞤩𞤫𞤲⹁ 𞤅𞤢𞤱𞤣𞤢 𞤩𞤭𞥅 𞤟𞤢𞤥𞥇𞤢 𞤫 𞤀𞤴𞥃𞤢 𞤩𞤭𞥅 𞤀𞤦𞤵𞥅 𞤄𞤢𞤳𞤪. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞤲𞤣𞤫 𞤝𞤢𞤣𞤭𞥅𞤶𞤢 𞤬𞤭𞤰𞥆𞤭𞤲𞤭 𞤲𞤣𞤫𞤲⹁ 𞤲𞤵𞤤𞤢𞥄𞤯𞤮 𞤼𞤭𞤺𞥆𞤭 𞤅𞤢𞤱𞤣𞤢. 𞤼𞤢𞤱𞤭 𞤸𞤮𞤲 𞤳𞤮 𞤷𞤫𞥅𞤥𞤫𞥅𞤯𞤮 𞤥𞤮 𞤥𞤮𞥅𞤣𞤭 𞤥𞤵𞤵𞤲 𞤬𞤫𞤰𞥆𞤭𞤲𞥆𞤮 𞤩𞤢𞥄𞤱𞤮 𞤩𞤫 𞤪𞤵𞤼𞥆𞤢𞥄𞤣𞤫 𞤬𞤫𞤪𞤺𞤵 𞤲𞤺𞤵𞤲 𞤀𞤦𞤢𞤧𞤭𞤲𞤢𞥄.
𞤑𞤮 𞤩𞤵𞤪𞤭 𞤸𞤫𞥅𞤱𞤵𞤣𞤫 𞤫 𞤪𞤫𞤱𞤩𞤫 𞤩𞤫 𞤮 𞤩𞤢𞤽𞤵𞤲𞤮𞥅 𞤩𞤫𞤲⹁ 𞤢𞤥𞥆𞤢𞥄 𞤳𞤮 𞤷𞤫𞥅𞤥𞤫𞥅𞤩𞤫 𞤱𞤢𞤲𞤮 𞤅𞤢𞤱𞤣𞤢 𞤥𞤢𞤤𞥆𞤢 𞤳𞤮 𞤧𞤫𞥅𞤪𞤢𞤲𞤮𞥅𞤩𞤫 𞤱𞤢𞤲𞤮 𞤟𞤢𞤴𞤲𞤢𞤦 𞤩𞤭𞥅 𞤔𞤢𞤴𞥃. 𞤑𞤮 𞤀𞤴𞥃𞤢 𞤼𞤢𞤲 𞤱𞤮𞤲𞤭 𞤣𞤫𞤦𞥆𞤮 𞤥𞤮 𞤮 𞤼𞤭𞤺𞥆𞤭 𞤼𞤢𞤱𞤭 𞤮𞤲 𞤱𞤮𞤲𞤢𞥄 𞤷𞤫𞥅𞤥𞤫𞥅𞤯𞤮⹁ 𞤥𞤢𞤤𞥆𞤢 𞤧𞤫𞥅𞤪𞤢𞥄𞤯𞤮 𞤥𞤢𞤤𞥆𞤢 𞤶𞤭𞤴𞤢𞥄𞤯𞤮.
𞤃𞤵𞤸𞤢𞤥𞥆𞤢𞤣 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤲𞤮 𞤱𞤮𞥅𞤱𞤵𞤲𞤮𞥅 𞤱𞤫𞤣𞥆𞤭𞤼𞤢𞥄𞤲𞤣𞤫 𞤫 𞤬𞤢𞤥𞥆𞤫𞥅𞤪𞤫 𞤱𞤭𞤴𞤫𞤼𞤫𞥅𞤲𞤣𞤫 𞤖𞤋𞤈𞤀 𞤸𞤮𞥅𞤪𞤫 𞤬𞤫𞤤𞥆𞤮 𞤔𞤀𞤄𞤀𞤂𞤀𞤂 𞤐𞤓𞥅𞤈. 𞤉 𞤸𞤭𞤼𞤢𞥄𞤲𞤣𞤫 𞥖𞥑𞥐⹁ 𞤸𞤢𞤪𞤭 𞤮 𞤸𞤫𞤩𞤭𞥅 𞤣𞤵𞥅𞤩𞤭 𞥔𞥐⹁ 𞤀𞤤𞤤𞤢 𞤭𞤥𞥆𞤭𞤲𞤭 𞤔𞤭𞤦𞤪𞤭𞥅𞤤 𞤫 𞤥𞤢𞤳𞥆𞤮 𞤱𞤮𞤲𞤣𞤵𞤣𞤫 𞤫 𞤗𞤵𞤪𞥇𞤢𞥄𞤲𞤢 𞤸𞤢𞤪𞤭 𞤮𞤥𞤮 𞤳𞤢 𞤬𞤢𞤥𞥆𞤫𞥅𞤪𞤫 𞤖𞤋𞤈𞤀. 𞤔𞤭𞤦𞤪𞤭𞥅𞤤 𞤱𞤭𞤴𞤭 𞤥𞤮: “𞤶𞤢𞤲𞤺𞤵. 𞤌 𞤶𞤢𞥄𞤦𞤭𞥅⹁ “𞤃𞤭 𞤱𞤢𞥄𞤱𞤢𞤼𞤢𞥄 𞤶𞤢𞤲𞤺𞤵𞤣𞤫.” 𞤇𞤫 𞤺𞤫𞤪𞤣𞤭 𞤯𞤮𞤲 𞤸𞤢𞥄 𞤮 𞤸𞤵𞤲𞤶𞤭𞥅 𞤢𞥄𞤴𞤫𞥅𞤶𞤫 𞤯𞤫 𞤔𞤭𞤦𞤪𞤭𞥅𞤤 𞤤𞤮𞤲𞤺𞤭𞤲𞤭 𞤥𞤮 𞤯𞤫𞤲.
𞤁𞤵𞥅𞤩𞤭 𞤯𞤭𞤯𞤭 𞤔𞤭𞤦𞤪𞤭𞥅𞤤 𞤲𞤮 𞤢𞤪𞤣𞤫 𞤴𞤮𞤼𞥆𞤭𞤲𞤢 𞤫 𞤥𞤢𞤳𞥆𞤮 𞤢𞥄𞤴𞤫𞥅𞤶𞤫 𞤗𞤵𞤪𞥇𞤢𞥄𞤲𞤢 𞤯𞤫𞤲. 𞤑𞤮𞤲𞤮 𞤸𞤢𞤪𞤭 𞤮𞤲𞤼𞤵𞤥𞤢⹁ 𞤳𞤮 𞤫 𞤴𞤭𞤥𞤩𞤫 𞤧𞤫𞥅𞤯𞤢𞥄𞤩𞤫 𞤨𞤫𞤼 𞤱𞤢𞤲𞤮 𞤝𞤢𞤣𞤭𞥅𞤶𞤢 𞤫 𞤣𞤫𞤲𞤯𞤭𞤪𞤢𞥄𞤱𞤮 𞤥𞤵𞤵𞤲 𞤏𞤢𞤪𞤢𞤹𞤢⹁ 𞤮 𞤱𞤮𞤲𞤵𞤲𞤮𞥅 𞤸𞤢𞤤𞤬𞤭𞤲𞤢𞥄𞤣𞤫.
𞤑𞤮𞤲𞤮 𞤩𞤢𞥄𞤱𞤮 𞤣𞤵𞥅𞤩𞤭 𞤯𞤭𞤯𞤭 𞤯𞤭𞤲 𞤬𞤫𞤰𞥆𞤵𞤣𞤫⹁ 𞤮 𞤬𞤵𞤯𞥆𞤭 𞤴𞤮𞤼𞥆𞤭𞤲𞤣𞤫 𞤲𞤵𞤤𞤢𞤤 𞤋𞤧𞤤𞤢𞥄𞤥𞤵 𞤲𞤺𞤢𞤤 𞤫 𞤴𞤭𞤥𞤩𞤫 𞤥𞤢𞤳𞥆𞤢 𞤩𞤫𞤲 𞤳𞤢 𞤳𞤫𞤲𞤫. 𞤑𞤢 𞤢𞤪𞤢𞤲𞤵𞤲 𞤼𞤢𞤸𞤮⹁ 𞤴𞤭𞤥𞤩𞤫 𞤃𞤢𞤳𞥆𞤢 𞤩𞤫𞤲 𞤯𞤵𞥅𞤪𞤭𞥅 𞤥𞤮⹁ 𞤱𞤵𞤪𞤭𞤲 𞤩𞤫 𞤱𞤢𞤯𞤼𞤢𞤲𞤢𞥄𞤤𞤭 𞤸𞤭𞥅𞤤𞤢 𞤬𞤮𞤼𞤢 𞤫 𞤳𞤮 𞤮 𞤱𞤮𞤲𞤵𞤲𞤮𞥅 𞤸𞤢𞥄𞤤𞤵𞤣𞤫 𞤳𞤮𞤲. 𞤑𞤮 𞤪𞤫𞤱𞤩𞤫 𞤩𞤫𞤲 𞤫 𞤧𞤵𞤳𞤢𞥄𞤩𞤫 𞤩𞤫𞤲 𞤳𞤢𞤻𞤵𞤲 𞤫 𞤼𞤢𞤥𞤨𞤵𞤩𞤫 𞤩𞤫𞤲 𞤱𞤮𞤲𞤵𞤲𞤮𞥅 𞤼𞤢𞤱𞤼𞤵𞤣𞤫 𞤥𞤮.
𞤑𞤮𞤲𞤮 𞤮 𞤸𞤢𞤱𞤪𞤭 𞤫 𞤤𞤭𞤣𞥆𞤵 𞤥𞤢𞤱𞤲𞤺𞤵 𞤭𞤥𞥆𞤮𞤪𞤣𞤫 𞤫 𞤳𞤮𞥅𞤸𞤮𞥅𞤩𞤫 𞤃𞤢𞤳𞥆𞤢 𞤩𞤫𞤲. 𞤇𞤫𞤲 𞤼𞤢𞤥𞤨𞤭𞤲𞤭 𞤥𞤮⹁ 𞤳𞤢𞤲𞤳𞤮 𞤫 𞤶𞤮𞤳𞥆𞤵𞤩𞤫 𞤥𞤮 𞤩𞤫𞤲 𞤸𞤢𞥄 𞤩𞤫 𞤴𞤢𞤤𞤼𞤭𞤲𞤢𞥄 𞤫 𞤲𞤣𞤫𞤪 𞤃𞤢𞤳𞥆𞤢 𞤫 𞤸𞤭𞤼𞤢𞥄𞤲𞤣𞤫 𞥖𞥒𞥒.
𞤌𞤲𞤼𞤵𞤥𞤢⹁ 𞤳𞤢𞤲𞤳𞤮 𞤫 𞤶𞤮𞤳𞥆𞤵𞤩𞤫 𞤥𞤮 𞤩𞤫𞤲⹁ 𞤩𞤫 𞤬𞤫𞤪𞤭⹁ 𞤩𞤫 𞤴𞤢𞤸𞤭 𞤃𞤢𞤣𞤭𞥅𞤲𞤢. 𞤑𞤮 𞤯𞤮𞤲 𞤩𞤫 𞤢𞤣𞤭𞥅 𞤧𞤭𞤲𞤷𞤵𞤣𞤫 𞤥𞤮𞤬𞤼𞤫𞤪𞤫 𞤋𞤧𞤤𞤢𞥄𞤥𞤵. 𞤌 𞤣𞤵𞥅𞤥𞤭𞥅 𞤫 𞤱𞤢𞥄𞤶𞤢𞤺𞤮𞤤 𞤫 𞤴𞤢𞥄𞤻𞥆𞤵𞤺𞤮𞤤 𞤪𞤫𞤲𞤣𞤮 𞤋𞤧𞤤𞤢𞥄𞤥𞤵 𞤲𞤺𞤮𞤲. 𞤌 𞤢𞤪𞤣𞤭𞥅 𞤳𞤢𞤣𞤭 𞤳𞤮𞤲𞤭 𞤶𞤵𞥅𞤤𞤩𞤫 𞤫 𞤸𞤢𞤩𞤵𞤺𞤮𞤤 𞤸𞤫𞥅𞤬𞤫𞤪𞤩𞤫 𞤃𞤢𞤳𞥆𞤢 𞤩𞤫𞤲.
𞤉 𞤸𞤭𞤼𞤢𞥄𞤲𞤣𞤫 𞥖𞥓𞥐⹁ 𞤐𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣 𞤫 𞤶𞤮𞤳𞥆𞤵𞤩𞤫 𞤥𞤮 𞤩𞤫𞤲 𞤯𞤢𞤸𞤭 𞤃𞤢𞤳𞥆𞤢. 𞤇𞤢𞥄𞤴𞤼𞤭 𞤩𞤫 𞤲𞤢𞥄𞤼𞤭𞥅 𞤃𞤢𞤳𞥆𞤢⹁ 𞤲𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤴𞤢𞥄𞤬𞤢𞤲𞤭𞥅 𞤴𞤭𞤥𞤩𞤫 𞤃𞤢𞤳𞥆𞤢 𞤩𞤫𞤲 𞤤𞤫𞤼𞥆𞤫 𞤯𞤫 𞤩𞤫 𞤬𞤢𞤱𞤵𞤲𞤮𞥅 𞤥𞤮 𞤯𞤫𞤲⹁ 𞤳𞤢𞤲𞤳𞤮 𞤫 𞤶𞤮𞤳𞥆𞤵𞤲𞤮𞥅𞤩𞤫 𞤥𞤮 𞤩𞤫𞤲 𞤢𞤣𞤮 𞤩𞤫 𞤬𞤫𞤪𞤵𞤣𞤫 𞤃𞤢𞤣𞤭𞥅𞤲𞤢.
𞤑𞤮 𞤻𞤢𞤤𞤲𞤣𞤫 𞥘 𞤑𞤮𞤪𞤧𞤮 𞤫 𞤸𞤭𞤼𞤢𞥄𞤲𞤣𞤫 𞥖𞥓𞥒⹁ 𞤲𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣 (𞤴𞤮 𞤶𞤢𞤥 𞤫 𞤳𞤭𞤧𞤢𞤤 𞤣𞤵𞥅𞤥𞤮 𞤫 𞤥𞤢𞤳𞥆𞤮) 𞤬𞤫𞤰𞥆𞤭𞤲𞤭 𞤸𞤢𞤪𞤭 𞤮𞤥𞤮 𞤶𞤮𞤺𞤭𞥅 𞤣𞤵𞥅𞤩𞤭 𞥖𞥒. 𞤑𞤮 𞤃𞤢𞤣𞤭𞥅𞤲𞤢 𞤮 𞤵𞤦𞥆𞤢𞥄.
𞤐𞤺𞤵𞥅𞤪𞤲𞤣𞤢𞤥 𞤥𞤢𞤳𞥆𞤮 𞤫 𞤳𞤮 𞤮 𞤶𞤢𞤲𞤺𞤭𞤲𞤭 𞤳𞤮𞤲⹁ 𞤦𞤢𞤯𞤼𞤭𞤲𞤭𞥅 𞤬𞤮𞤼𞤢 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲. 𞤖𞤢𞤲𞤣𞤫 𞤋𞤧𞤤𞤢𞥄𞤥 𞤲𞤮 𞤼𞤢𞤱𞤢𞥄 𞤫 𞤤𞤢𞥄𞤱𞤭 𞤣𞤫𞤱𞤫 𞤩𞤵𞤪𞤵𞤯𞤭 𞤴𞤢𞥄𞤶𞤵𞤣𞤫 𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲. 𞤳𞤮 𞤩𞤵𞤪𞤭 𞤣𞤵𞤶𞤵𞤲𞤫 𞤯𞤭𞤯𞤭 𞤴𞤭𞤥𞤩𞤫 𞤲𞤮 𞤶𞤮𞤳𞥆𞤭 𞤋𞤧𞤤𞤢𞥄𞤥𞤵 𞤸𞤢𞤲𞤣𞤫.
𞤔𞤵𞥅𞤤𞤩𞤫 𞤩𞤫𞤲 𞤲𞤮 𞤧𞤫𞤲𞥆𞤭 𞤲𞤵𞤤𞤢𞥄𞤯𞤮 𞤳𞤵𞥅𞤩𞤮 𞤢𞤲𞥆𞤢𞤦𞤢𞥄𞤳𞤵. 𞤇𞤫 𞤱𞤢𞤯𞤭𞥅 𞤥𞤮 𞤳𞤢𞤣𞤭 𞤻𞤫𞤥𞤼𞤭𞤲𞤼𞤫𞥅𞤯𞤮 𞤫 𞤻𞤫𞤥𞤦𞤫𞤼𞤫𞥅𞤯𞤮. 𞤌 𞤱𞤢𞤯𞤭𞥅 𞤫 𞤲𞤣𞤫𞤪 𞤣𞤵𞥅𞤩𞤭 𞥒𞥒⹁ 𞤳𞤮 𞤸𞤢𞤴 𞤺𞤮𞥅𞤼𞤮𞥅 𞤥𞤫𞥅𞤯𞤢𞥄𞤲𞤮 𞤱𞤢𞤯𞤵𞤣𞤫.
𞤏𞤮𞤲𞤢𞥄 𞤥𞤫𞤸𞤪𞤫⹁ 𞤃𞤢𞤴𞤳𞤮𞤤 𞤖𞤢𞤪𞤼⹁ 𞤫 𞤲𞤣𞤫𞤪 𞤣𞤫𞤬𞤼𞤫𞤪𞤫 𞤥𞤢𞤳𞥆𞤮 𞤸𞤮𞥅𞤪𞤫 𞤴𞤭𞤥𞤩𞤫 𞥑𞥐𞥐 𞤩𞤵𞤪𞤵𞤩𞤫 𞤦𞤢𞤯𞤼𞤭𞤲𞤣𞤫 𞤫 𞤼𞤢𞥄𞤪𞤭𞥅𞤳𞤢 𞤲𞤫𞤯𞥆𞤢𞤲𞤳𞤫 𞤳𞤢 𞤸𞤮𞥅𞤪𞤫 𞤤𞤫𞤴𞤣𞤭⹁ 𞤳𞤮 𞤃𞤵𞤸𞤢𞤥𞥆𞤢𞤣 (𞤶𞤢𞤥 𞤫 𞤳𞤭𞤧𞤢𞤤 𞤣𞤮𞤱 𞤥𞤢𞤳𞥆𞤮) 𞤮 𞤱𞤢𞤯𞤭 𞤢𞤪𞤢𞤲𞤮. 𞤐𞤵𞤤𞤢𞥄𞤯𞤮 𞤃𞤵𞤸𞤢𞤥𞥆𞤢𞤣 𞤱𞤮𞤲𞤢𞥄 𞤀𞥄𞤪𞤢𞤦𞤫𞥅𞤩𞤫 𞤩𞤫𞤲 𞤼𞤢𞤲 𞤮 𞤱𞤢𞤴𞤤𞤭 𞤮 𞤭𞤼𞥆𞤭 𞤫 𞤥𞤢𞤶𞥆𞤫𞤪𞤫⹁ 𞤳𞤮 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤬𞤮𞤨 𞤮 𞤲𞤣𞤢𞤴𞤺𞤭𞤲𞤭𞤪𞤭 𞤋𞤧𞤤𞤢𞥄𞤥𞤵.
𞤑𞤮 𞤴𞤭𞤥𞤩𞤫 𞤪𞤮𞤲𞤵𞤩𞤫 𞤥𞤮 𞤩𞤫𞤲 𞤲𞤣𞤢𞤴𞤺𞤭𞤲𞤭 𞤉𞤪𞤮𞤨 𞤸𞤢𞤪𞤭 𞤫𞤪𞤮𞤨𞤲𞤢𞥄𞤩𞤫 𞤩𞤫𞤲 𞤲𞤮 𞤫 𞤲𞤭𞤩𞤫. 𞤑𞤮 𞤶𞤵𞥅𞤤𞤩𞤫 𞤪𞤮𞤲𞤵𞤩𞤫 𞤥𞤮 𞤩𞤫𞤲 𞤳𞤢𞤣𞤭 𞤴𞤭𞥅𞤼𞤭𞤲𞤣𞤭𞤲𞤭 𞤴𞤭𞤥𞤩𞤫 𞤩𞤫𞤲 𞤺𞤭𞤦𞤭 𞤬𞤵𞤯𞤲𞤢𞥄𞤲𞤺𞤫 𞤸𞤢𞥄 𞤸𞤭𞤪𞤲𞤢𞥄𞤲𞤺𞤫.
𞤋𞤧𞤳𞤭𞤲 🥰🥰🥰
𞤒𞤮 𞤶𞤢𞤥 𞤫 𞤳𞤭𞤧𞤢𞤤 𞤱𞤮𞤲𞤵 𞤫 𞤥𞤢𞤳𞥆𞤮.