𞤇𞤀𞤛𞤚𞤀𞤂 𞤉 𞤀𞤁𞤂𞤀𞤃
𞤔𞤢𞤲𞤺𞤮𞥅𞤱𞤮 𞤫 𞤶𞤢𞥄𞤩𞤭 𞤸𞤢𞤯𞤼𞤭𞤪𞤣𞤫 𞤑𞤢𞤤𞤭𞤬𞤮𞤪𞤲𞤭𞤴𞤢 𞤲𞤮 𞤬𞤭𞤪𞤼𞤭 𞤀𞤁𞤂𞤢𞤃 𞤫 𞤄𞤪𞤢𞥄𞤴.
𞤆𞤭𞥅𞤶𞤭 𞤯𞤭𞤯𞤭 𞤳𞤫𞤧𞤭 𞤧𞤭𞤲𞤷𞤢𞥄𞤥𞤢 𞤫 𞤢𞤣𞤤𞤢𞤥 𞤱𞤢𞤤𞥆𞤢𞤴𞤯𞤭 𞤦𞤵𞤥𞤩𞤫-𞤨𞤢𞤸𞤭𞤯𞤭 𞤩𞤫𞤲 𞤳𞤢𞤻𞤵𞤲 𞤫 𞤥𞤵𞥅𞤥𞤩𞤫 𞤩𞤫𞤲 𞤲𞤢𞤲𞤼𞤮𞤲𞥋𞤣𞤭𞤪𞤺𞤮𞤤 𞤸𞤢𞤳𞥆𞤵𞤲𞥋𞤣𞤫 𞤥𞤢𞤩𞥆𞤫⹁ 𞤬𞤢𞤸𞤥𞤮𞤼𞤭𞤪𞤢 𞤳𞤢𞤣𞤭 𞤫 𞤴𞤭𞤥𞤩𞤫 𞤸𞤫𞤣𞥆𞤭𞥅𞤩𞤫 𞤩𞤫𞤲.
𞤖𞤵𞥅𞤱𞤲𞤣𞤫 𞤢𞤪𞤢𞤲𞤫𞤪𞤫 𞤲𞤣𞤫𞤲⹁ 𞤳𞤮 𞤀𞤁𞤂𞤢𞤃 𞤫 𞤄𞤪𞤢𞥄𞤴.
𞤄𞤪𞤢𞥄𞤴 𞤳𞤮 𞤲𞤮𞥅𞤲𞤫 𞤦𞤭𞤲𞤣𞤭 𞤥𞤮𞤰𞥆𞤭𞤲𞤭𞤪𞤢𞥄𞤯𞤭 𞤼𞤮𞤩𞥆𞤫 𞤩𞤵𞥅𞤼𞤭𞤲𞤢𞥄𞤯𞤫 𞤸𞤮𞥅𞤪𞤫 𞤳𞤢𞤴𞤣𞤭 𞤸𞤢𞤪𞤢 𞤧𞤭 𞤦𞤵𞤥𞤯𞤮 𞤮𞤲 𞤥𞤫𞥅𞤥𞤭𞥅⹁ 𞤮 𞤱𞤢𞥄𞤱𞤢𞤴 𞤧𞤮𞤵𞤣𞤫 𞤳𞤮 𞤱𞤭𞤲𞤣𞤭𞥅 𞤳𞤮𞤲 𞤬𞤭𞥅 𞤲𞤮 𞤮 𞤶𞤢𞤲𞤺𞤭𞤪𞤢.
𞤑𞤮 𞤊𞤢𞤪𞤢𞤲𞤧𞤭𞥅𞤶𞤮 𞤭𞤲𞥆𞤫𞤼𞤫𞥅𞤯𞤮 𞤂𞤵𞤱𞤭𞥅 𞤄𞤪𞤢𞥄𞤴 𞤧𞤭𞤲𞤷𞤭 𞤧𞤭𞤬𞤢 𞤲𞤣𞤭𞥅 𞤦𞤭𞤲𞤣𞤮𞥅𞤣𞤭. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥘𞥒𞥔 𞤯𞤵𞤥 𞤱𞤢𞤯𞤭⹁ 𞤖𞤢𞤪𞤭 𞤳𞤮 𞤣𞤵𞥅𞤩𞤭 𞤧𞤢𞤨𞥆𞤮 𞤫 𞤶𞤮𞤱𞤭 𞤮 𞤥𞤢𞤪𞤭.
𞤐𞤣𞤫 𞤼𞤢𞤱𞤵𞤲𞤮𞥅 𞤲𞤮𞤲 𞤄𞤪𞤢𞥄𞤴 𞤳𞤮 𞤦𞤭𞤲𞤣𞤭 𞤭𞤱𞤪𞤢𞤴𞤯𞤭 𞤳𞤢 𞤲𞤢𞤲𞤮⹁ 𞤫 𞤸𞤭𞤲𞤤𞤫 𞤀𞤣𞤤𞤢𞤥 𞤳𞤮 𞤳𞤢 𞤻𞤢𞥄𞤥𞤵 𞤭𞤱𞤪𞤢𞤼𞤢⹁ 𞤲𞤮 𞤼𞤢𞤧𞤳𞤫𞥅𞤣𞤫 𞤬𞤭𞥅 𞤲𞤣𞤢𞥄𞤪𞤵𞤺𞤮𞤤 𞤳𞤮 𞤧𞤫𞤲𞤺𞤮 𞤸𞤮𞤲𞤺𞤮 𞤀𞤣𞤤𞤢𞤥 𞤳𞤢 𞤄𞤪𞤢𞥄𞤴 𞤭𞤱𞤪𞤢𞤼𞤢. 𞤅𞤭 𞤼𞤢𞤧𞤳𞤮 𞤲𞤺𞤮𞤲 𞤺𞤢𞤧𞤭𞥅⹁ 𞤫𞤩𞥆𞤮𞥅𞤪𞤫 𞤲𞤣𞤫𞤲 𞤳𞤮 𞤫𞤺𞥆𞤵𞤺𞤮𞤤 𞤣𞤫𞤬𞤼𞤫 𞤭𞤼𞥆𞤢 𞤯𞤫 𞤫 𞤀𞤣𞤤𞤢𞤥 𞤱𞤢𞤯𞤼𞤢 𞤯𞤫 𞤫 𞤄𞤪𞤢𞥄𞤴⹁ 𞤪𞤫𞤬𞤼𞤭 𞤥𞤵𞥅𞤤𞤢 𞤯𞤫⹁ 𞤱𞤫𞥅𞤩𞤭𞤲𞤢 𞤯𞤫 𞤱𞤮𞤲𞤢𞤲𞤣𞤫 𞤦𞤵𞤥𞤩𞤫 𞤩𞤫𞤲.
𞤖𞤵𞥅𞤱𞤲𞤣𞤫 𞤯𞤭𞤯𞤢𞤩𞤫𞤪𞤫 𞤲𞤣𞤫𞤲⹁ 𞤳𞤮 𞤀𞤣𞤤𞤢𞤥 𞤬𞤭𞥅 𞤥𞤵𞥅𞤥𞤩𞤫 𞤩𞤫𞤲 𞤥𞤢𞤤𞥆𞤢 𞤩𞤫𞥅 𞤩𞤫 𞤲𞤢𞤲𞤢𞤼𞤢𞥄-𞤸𞤢𞥄𞤤𞤢𞤼𞤢𞥄.
𞤑𞤮 𞤶𞤵𞥅𞤯𞤫 𞤯𞤫𞤲 𞤢𞤤𞤳𞤵𞤤𞤫 𞤯𞤫𞤲 𞤫𞤩𞥆𞤭𞤪𞤼𞤫𞥅⹁ 𞤳𞤮𞤲𞤺𞤭 𞤯𞤭𞤲 𞤳𞤢𞤣𞤭 𞤬𞤭𞤼𞤫𞥅 . 𞤍𞤵𞤥 𞤩𞤫𞤴𞤣𞤢𞤴 𞤲𞤢𞤲𞤼𞤮𞤲𞤣𞤭𞤪𞤢𞤤 𞤲𞤺𞤢𞤤 𞤸𞤢𞤳𞥆𞤵𞤲𞥋𞤣𞤫 𞤥𞤵𞥅𞤥𞤩𞤫 𞤩𞤫𞤲 𞤳𞤢𞤻𞤵𞤲 𞤫 𞤸𞤵𞥅𞤱𞤼𞤮𞤪𞤢𞤴𞤩𞤫 𞤀𞤣𞤤𞤢𞤥 𞤩𞤫⹁ 𞤱𞤢𞤤𞥆𞤭𞤼𞤮𞥅 𞤳𞤢𞤣𞤭 𞤥𞤵𞥅𞤥𞤩𞤫 𞤩𞤫𞤲 𞤳𞤢 𞤸𞤵𞥅𞤱𞤮𞤲𞥋𞤣𞤭𞤪𞤢𞤤.
𞤑𞤮 𞤖𞤢𞥄𞤪𞤭𞤧 𞤃𞤮𞤱𞤦𞤪𞤫𞤴⹁ 𞤱𞤮𞤲𞤭 𞤳𞤮 𞤱𞤢𞤤𞥆𞤭𞤬𞤭𞥅 𞤯𞤭𞥅 𞤨𞤭𞥅𞤶𞤭 𞤯𞤭𞤯𞤭. 𞤃𞤮𞥅𞤣𞤭 𞤖𞤢𞥄𞤪𞤭𞤧⹁ 𞤳𞤮 𞤶𞤢𞤲𞤺𞤮𞥅𞤱𞤮 𞤫 𞤶𞤢𞥄𞤩𞤭 𞤸𞤢𞤯𞤼𞤭𞤪𞤣𞤫 𞤑𞤢𞤤𞤭𞤬𞤮𞤪𞤲𞤭𞤴𞤢. 𞤏𞤮𞤲𞤢𞥄 𞤫 𞤆𞤵𞤤𞥆𞤮⹁ 𞤳𞤮𞤲𞤮 𞤳𞤮 𞤮 𞤶𞤭𞤲𞤺𞤢𞤲𞤮𞥅𞤱𞤮 𞤩𞤢𞤽𞤼𞤢𞤤 𞤀𞤣𞤤𞤢𞤥. 𞤌𞤥𞤮 𞤥𞤮𞤰𞥆𞤭𞤲𞤭 𞤳𞤢𞤣𞤭 𞤤𞤮𞤱𞤪𞤫 𞤬𞤭𞥅 𞤫𞤺𞥆𞤵𞤺𞤮𞤤 𞤳𞤢𞤤𞤢 𞤱𞤭𞤲𞤣𞤭𞤪𞤢𞥄 𞤦𞤭𞤲𞤣𞤭 𞤼𞤵𞤦𞤢𞥄𞤳𞤮 𞤥𞤢𞤤𞥆𞤢 𞤨𞤮𞤪𞤼𞤮⹁ 𞤲𞤢𞤩𞤢 𞤫 𞤀𞤣𞤤𞤢𞤥.
𞤌 𞤶𞤢𞥄𞤪𞤢𞥄𞤥𞤢 𞤬𞤮𞤼𞤢 𞤱𞤮𞤲𞤭𞥅 𞤺𞤮𞤤𞥆𞤫 𞤤𞤢𞤦𞤢𞥄𞤯𞤫
𞤏𞤮𞤲𞤭𞥅 𞤺𞤮𞤤𞥆𞤫 𞤤𞤢𞤦𞤢𞥄𞤯𞤫
𞤌𞤲 𞤔𞤢𞥄𞤪𞤢𞥄𞤥𞤢 𞤮𞤲 𞤱𞤫𞤤𞤼𞤢𞤲𞤢𞥄𞤥𞤢 𞤧𞤢𞤲𞥆𞤫
𞤃𞤫𞤯𞤫𞤲 𞤶𞤢𞤪𞤲𞤭 𞤮𞥅 𞤬𞤮𞤼𞤢 𞤲𞤮𞤲
𞤑𞤮 𞤺𞤮𞤤𞥆𞤫 𞤤𞤢𞤦𞤢𞤯𞤫. 𞤌𞤲 𞤶𞤢𞤪𞤢𞤥𞤢