𞤅𞤋𞤁𞤋𞤒𞤀 𞤚𞤓𞥅𞤈𞤉𞥅⹁ 𞤀𞤈𞤁𞤌 𞤔𞤀𞥄𞤘𞥆𞤀𞤂 𞤑𞤋𞤍𞥆𞤌 𞤘𞤋𞤐𞤉 𞤊𞤀𞥄𞤚𞤋𞥅𞤑𞤉

𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 : 𞤀𞤲𞤣𞤭𞤼𞤵𞤺𞤮𞤤 𞤐𞤫𞤯𞥆𞤮 𞤁𞤮𞤱𞤤𞤢𞤲𞤳𞤫𞥅𞤶𞤮

𞤋𞤲𞥆𞤢𞥄 𞤤𞤭𞤤𞥆𞤢𞥄𞤸𞤭 𞤱𞤢 𞤭𞤲𞥆𞤢𞥄 𞤭𞤤𞤢𞤴𞤸𞤭 𞤪𞤢𞥄𞤶𞤭𞤵𞥅𞤲.

𞤅𞤭𞤣𞤭𞤴𞤢 𞤚𞤵𞥅𞤪𞤫𞥅⹁ 𞤀𞤪𞤣𞤮 𞤑𞤭𞤯𞥆𞤮 𞤔𞤢𞥄𞤺𞥆𞤢𞤤 𞤘𞤭𞤲𞤫 𞤬𞤫𞤱𞤲𞤣𞤮 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫⹁ 𞤣𞤢𞤪𞤭𞥅𞤯𞤮 𞤤𞤢𞥄𞤦𞤭 𞤯𞤭𞤯𞤭 𞤫 𞤧𞤵𞥅𞤩𞤲𞤺𞤮 𞤬𞤭𞥅 𞤖𞤮𞥅𞤪𞤢𞥄𞤳𞤵 𞤤𞤫𞤴𞤣𞤭  𞤲𞤣𞤭𞤲⹁ 𞤬𞤢𞥄𞤼𞤭𞤳𞤫 𞤶𞤫𞤥𞥆𞤢 𞤫 𞤃𞤢𞤱𞤲𞤣𞤫 𞤻𞤢𞤤𞤲𞤣𞤫 𞥒𞥕 𞤅𞤭𞤤𞤼𞤮 𞤫 𞤅𞤢𞤬𞤪𞤮𞤪𞤣𞤫 𞤆𞤢𞤪𞤭. 𞤌 𞤬𞤫𞤰𞥆𞤭𞤲𞤭𞤪𞤭𞥅𞤣𞤵𞥅𞤩𞤭 𞥘𞥑 𞤸𞤮𞥅𞤪𞤫 𞤮 𞤱𞤢𞤱𞤢𞥄𞤤𞤭 𞤪𞤵𞤼𞥆𞤢𞤣𞤫 𞤘𞤭𞤲𞤫⹁ 𞤳𞤢 𞤤𞤫𞤴𞤣𞤭 𞤥𞤢𞤳𞥆𞤮.

𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤤𞤢𞥄𞤼𞤭𞤲𞤮 𞤀𞤪𞤣𞤮 𞤔𞤢𞥄𞤺𞥆𞤢𞤤 𞤸𞤢𞤳𞥆𞤵𞤲𞥋𞤣𞤫 𞥑𞥙𞥙𞥖 𞤫 𞥑𞥙𞥙𞥙. 𞤇𞤢𞥄𞤱𞤮 𞤯𞤵𞤥 𞤮 𞤸𞤭𞤼𞤢𞥄𞤲𞤣𞤫 𞥑𞥙𞥙𞥙⹁ 𞤮 𞤵𞤳𞥆𞤭𞥅 𞤫 𞤣𞤢𞤱𞤪𞤮 𞤫 𞤭𞤲𞤣𞤫 𞤬𞤫𞤣𞥆𞤫 UFR (𞤆𞤮𞤼𞥆𞤢𞤤 𞤁𞤮𞥅𞤤𞤫 𞤖𞤢𞤱𞤼𞤢𞥄𞤪𞤭𞤴𞤢𞤲𞤳𞤮𞥅𞤶𞤫)

 𞤒𞤮 𞤱𞤮𞤲𞤳𞤭𞤸𞤭 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤦𞤫𞤤𞤮 𞤫 𞤶𞤢𞤥.

 𞤚𞤮𞥅𞤲𞤭𞤲 𞤣𞤢𞤱𞤪𞤮𞥅𞤱𞤮 𞤮𞤲⹁ 𞤥𞤭𞤯𞤮 𞤢𞤲𞤣𞤭𞤼𞤭𞤪𞤢 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤱𞤮𞤲𞤵𞤺𞤮𞤤 𞤲𞤫𞤯𞥆𞤮 𞤥𞤮 𞤼𞤮𞤯𞥆𞤫𞥅𞤣𞤫 𞤥𞤵𞤵𞤲 𞤼𞤢𞤲 𞤴𞤮𞤲𞤵𞤲𞤮 𞤳𞤮 𞤱𞤢𞤴𞤤𞤢 𞤶𞤭𞤳𞥆𞤵𞥅𞤶𞤭 𞤯𞤭𞤲 𞤸𞤢𞥄 𞤳𞤢 𞤺𞤮𞤤𞥆𞤭𞤪𞤯𞤫 𞤤𞤢𞥄𞤥𞤵 𞤲𞤺𞤵𞤲 𞤅𞤫𞤪𞤫𞤳𞤮𞤪𞤫⹁ 𞤧𞤢𞤸𞤪𞤫 𞤱𞤮𞤯𞥆𞤭𞤼𞤮𞤪𞤲𞤣𞤫 𞤑𞤮𞤲𞤢𞥄𞤳𞤭𞤪𞤭 𞤳𞤮 𞤩𞤢𞤣𞤲𞤭 𞤳𞤭𞤤𞤮𞤥𞤫𞥅𞤼𞤭 𞤱𞤵𞤤𞤵𞥅𞤪𞤫.

 𞤐𞤣𞤫 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤼𞤮𞤯𞥆𞤢𞤲𞤮𞥅 𞤀𞤪𞤣𞤮 𞤔𞤢𞥄𞤺𞤮𞤪𞤯𞤮⹁ 𞤼𞤢𞤱𞤭 𞤥𞤭𞤯𞤮 𞤳𞤢 𞤣𞤵𞤯𞤢𞤤 𞤼𞤮𞥅𞤱𞤵𞤲𞥋𞤺𞤢𞤤 (𞤤𞤭𞥅𞤧𞤫𞥅)⹁ 𞤴𞤵𞤥𞥆𞤢 𞤢𞤥 𞤲𞤮 𞤶𞤮𞤺𞤭𞤲𞤮𞥅 𞤲𞤫𞥅𞤥𞤭𞤲𞤮𞤪𞤣𞤫 𞤨𞤢𞤥𞤢𞤪𞤫 𞤴𞤫𞥅𞤧𞤮 𞤅𞤫𞥅𞤳𞤭𞤪𞤣𞤫 𞤤𞤫𞤯𞥆𞤫 (𞤅𞤭𞤴𞤫𞤪𞤭𞥅) 𞤅𞤫𞤪𞤫𞤳𞤮𞤪𞤫 𞤲𞤣𞤫𞤲. 𞤘𞤮𞤤𞥆𞤢𞤲𞤢𞤴𞤲𞤮𞥅𞤩𞤫 𞤯𞤵𞥅𞤯𞤵𞤩𞤫 𞤲𞤣𞤫𞥅 𞤧𞤫𞥅𞤳𞤭𞤪𞤣𞤫 𞤫 𞤺𞤮𞤤𞥆𞤮𞥅𞤩𞤫 𞤭𞤱𞤪𞤵𞤩𞤫 𞤫 𞤺𞤮𞤤𞥆𞤭𞤪𞤯𞤫 𞤸𞤵𞥅𞤩𞤼𞤵𞤼𞤵𞤯𞤫 𞤯𞤫𞤲⹁ 𞤲𞤮 𞤢𞤪𞤢𞤴𞤲𞤮𞥅 𞤧𞤮𞤰𞥆𞤵𞤺𞤮𞤤 𞤯𞤮𞥅𞤲. 𞤒𞤮𞤺𞤢 𞤫 𞤥𞤢𞤩𞥆𞤫 𞤤𞤢𞤥𞤭𞤼𞤮𞤪𞤢 𞤯𞤵𞤥 𞤬𞤭𞥅 𞤻𞤢𞤤𞥆𞤵𞤺𞤮𞤤 𞤯𞤮𞥅𞤲 𞤫 𞤸𞤢𞥄𞤤𞤢⹁ 𞤫 𞤣𞤭𞥅 𞤪𞤵𞤼𞥆𞤢𞤺𞤮𞤤 𞤳𞤢 𞤺𞤮𞤤𞥆𞤫 𞤥𞤢𞤩𞥆𞤫.

𞤑𞤮𞤲𞤮 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤼𞤮𞤯𞥆𞤢𞥄 𞤼𞤵𞤲⹁ 𞤲𞤦𞤮𞥅𞤱𞤳𞤢 𞤳𞤢𞤲 𞤱𞤢𞤴𞤤𞤭𞥅 𞤳𞤭𞤧𞤢𞤲. 𞤔𞤮𞥅𞤲𞤭⹁ 𞤺𞤮𞤤𞥆𞤮𞥅𞤩𞤫 𞤤𞤢𞥄𞤥𞤵 𞤩𞤫𞤲 𞤢𞤪𞤢𞤴𞤲𞤮 𞤼𞤵𞤲 𞤻𞤢𞥄𞤥𞤢 𞤬𞤫𞤱𞤲𞤣𞤮 𞤧𞤮𞤰𞥆𞤢𞥄𞤪𞤭⹁ 𞤪𞤫𞤬𞤼𞤭 𞤩𞤫 𞤪𞤵𞤼𞥆𞤮𞥅 𞤳𞤢 𞤺𞤮𞤤𞥆𞤫 𞤲𞤮 𞤴𞤢𞥄𞤱𞤭𞤪𞤭. 𞤐𞤫𞥅𞤲𞤫 𞤢𞤥 𞤲𞤮 𞤱𞤫𞤤𞤼𞤮𞤪𞤲𞤮𞥅 𞤯𞤵𞤥⹁ 𞤸𞤢𞤴 𞤬𞤭𞥅 𞤼𞤢𞤱𞤭𞥅 𞤲𞤣𞤭𞥅 𞤲𞤫𞥅𞤣𞤭 𞤸𞤫𞤧𞤭𞤪𞤭 𞤲𞤮 𞤤𞤮𞤪𞥆𞤵𞤣𞤫 𞤧𞤫𞥅𞤯𞤢 𞤻𞤢𞥄𞤥𞤭𞤪𞤣𞤫 𞤲𞤣𞤫𞤲. 𞤇𞤫 𞤱𞤭𞤴𞤢𞤴𞤲𞤢𞤲𞤮 𞤥𞤫𞤲 : « 𞤅𞤭 𞤯𞤵𞤥 𞤶𞤮𞤳𞥆𞤭𞤪𞤭𞥅 𞤲𞤭𞥅⹁ 𞤘𞤭𞤲𞤫 𞤱𞤢𞤴𞤤𞤮𞤼𞤮⹁ 𞤴𞤢𞤤𞤼𞤢 𞤫 𞤼𞤢𞤥𞤨𞤫𞤪𞤫. » 𞤇𞤫 𞤴𞤫𞤼𞤮𞤼𞤮𞤲𞤮 𞤥𞤫𞤲 𞤱𞤮𞤲𞤣𞤫𞤥𞤢 𞤲𞤣𞤫𞥅 𞤧𞤮𞥅𞤦𞤭𞤲𞤢𞤲𞤣𞤫⹁ 𞤲𞤣𞤫 𞤩𞤫 𞤱𞤮𞤲𞤭 𞤴𞤭𞤴𞤵𞤣𞤫 𞤺𞤭𞤦𞤭 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤢𞤪𞤭 𞤳𞤢 𞤀𞤪𞤣𞤮𞤪𞤣𞤫 𞤲𞤮 𞤢𞤲𞤣𞤭𞤼𞤭𞤲𞤭 𞤩𞤫 𞤳𞤮 𞤩𞤫 𞤲𞤢𞤲𞤢𞤴𞤲𞤮𞥅 𞤲𞤮 𞤸𞤢𞥄𞤤𞤫𞥅 𞤸𞤮𞥅𞤪𞤫 𞤤𞤢𞥄𞤥𞤵 𞤒𞤢𞥄𞤧𞤭𞤲 𞤔𞤢𞤤𞥆𞤮.

 𞤃𞤭𞤲 𞤫 𞤳𞤮𞤼𞤮𞥅 𞤅𞤢𞤲𞤧𞤭𞥅 𞤄𞤢𞤪𞤭⹁ 𞤥𞤫𞤲 𞤧𞤫𞥅𞤣𞤭𞤼𞤭𞤲𞤮 𞤴𞤫𞤪𞤵 𞤥𞤵𞤵𞤲. 𞤊𞤫𞤱𞤲𞤣𞤮 𞤺𞤵𞤪𞤼𞤫 𞤯𞤫𞤲 𞤲𞤵𞤲⹁ 𞤥𞤫𞤯𞤫𞤲 𞤱𞤮𞥅𞤱𞤵𞤲𞤮𞥅 𞤬𞤭𞤶𞤵𞤣𞤵𞤣𞤫 𞤉𞤧𞤳𞤢𞤪𞤢𞥄𞤦𞤵𞤤 (Scrabble) 𞤫 𞤺𞤮𞤤𞥆𞤢𞤲𞤮𞥅𞤩𞤫 𞤯𞤢𞤤𞤭𞥅𞤪𞤫 𞤲𞤣𞤫𞤲 (𞤨𞤫𞤪𞤬𞤫𞤳𞤼𞤭𞥅). 𞤇𞤢𞥄𞤱𞤮 𞤼𞤮𞥅𞤯𞥆𞤫𞤣𞤫 𞤃𞤮𞥅𞤣𞤭 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅⹁ 𞤼𞤵𞤲 𞤩𞤫 𞤢𞤷𞥆𞤭𞤼𞤭 𞤢𞤪𞤵𞤣𞤫. 𞤙𞤢𞤤𞤲𞤣𞤫 𞤺𞤮𞥅⹁ 𞤥𞤫𞤲 𞤤𞤢𞤲𞤣𞤭𞥅 𞤩𞤫 𞤧𞤢𞤦𞤢𞥄𞤦𞤵 𞤢𞤷𞥆𞤵𞤼𞤵𞤺𞤮𞤤 𞤥𞤢𞤩𞥆𞤫⹁ 𞤩𞤫 𞤶𞤢𞥄𞤦𞤭𞥅 𞤥𞤫𞤲 : « 𞤔𞤮𞥅𞤲𞤭⹁ 𞤳𞤮 𞤧𞤮𞥅𞤦𞤫𞥅 𞤱𞤮𞤲𞤭 𞤳𞤢 𞤺𞤮𞤤𞥆𞤫. 𞤐𞤮 𞤱𞤢𞤯𞥆𞤭𞥅 𞤥𞤫𞤲 𞤺𞤮𞤤𞥆𞤵𞤺𞤮𞤤 𞤧𞤭 𞤥𞤫𞤲 𞤬𞤢𞥄𞤤𞤢𞥄𞤳𞤢 𞤭𞤼𞥆𞤫𞥅𞤣𞤫 𞤫 𞤺𞤮𞤤𞥆𞤫 𞤢𞤥𞤫𞤲 𞤯𞤫𞤲. »

 𞤐𞤮 𞤥𞤭 𞤥𞤢𞥄𞤲𞤣𞤮𞤪𞤭𞥅 𞤲𞤭𞥅 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅⹁ 𞤭𞤱𞤢𞤼𞤢𞥄 𞤫 𞤢𞤥 𞤨𞤮𞥅𞤥𞤢𞥄 : 𞤲𞤫𞤯𞥆𞤮 𞤥𞤮 𞤼𞤢𞤱𞤢𞤼𞤢 𞤺𞤭𞤦𞤭 𞤳𞤢 𞤺𞤮𞤤𞥆𞤭𞤪𞤣𞤫 𞤥𞤵𞤵𞤲 𞤑𞤮𞤲𞤢𞥄𞤳𞤭𞤪𞤭⹁ 𞤲𞤮 𞤱𞤢𞥄𞤱𞤵𞤲𞤮𞥅 𞤢𞤪𞤼𞤭𞤪𞤣𞤫 𞤧𞤮𞥅𞤦𞤭𞤲𞤢𞥄𞤪𞤫 𞤫 𞤺𞤮𞤤𞥆𞤫 𞤤𞤢𞥄𞤥𞤵 𞤱𞤮𞤲𞤺𞤵 𞤸𞤢𞥄 𞤫 𞤲𞤣𞤵𞤴𞤢 𞤧𞤮𞤩𞥆𞤵𞤲𞥋𞤣𞤵 𞤤𞤫𞤴𞤣𞤭 𞤲𞤣𞤭𞤲. 𞤍𞤵𞤥 𞤲𞤮 𞤩𞤢𞤲𞤺𞤭𞤲𞤭 𞤲𞤮 𞤤𞤢𞥄𞤩𞤭𞤪𞤭 𞤲𞤦𞤢𞥄𞤱𞤣𞤭 𞤥𞤢𞤳𞥆𞤮 𞤲𞤣𞤭𞤲⹁ 𞤸𞤮𞥅𞤤𞤢𞥄𞤪𞤫 𞤥𞤢𞤳𞥆𞤮 𞤫 𞤧𞤮𞥅𞤦𞤭𞤲𞤢𞥄𞤪𞤫 𞤲𞤣𞤫 𞤮 𞤮 𞤶𞤮𞤺𞤭𞤲𞤮𞥅.

 𞤏𞤵𞤪𞤭𞤲 𞤳𞤮 𞤯𞤵𞤥 𞤱𞤢𞤯𞤭⹁ 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥕⹁ 𞤥𞤭 𞤱𞤭𞤲𞤣𞤵𞤲𞤮 𞤥𞤭𞥅𞤶𞤮 𞤢𞤥 𞤫 𞤳𞤵𞤯𞤮𞤤 𞤶𞤵𞥅𞤼𞤵𞤲𞥋𞤺𞤮𞤤⹁ 𞤲𞤺𞤮𞤤 𞤡𞤫𞤳 𞤒𞤫𞤪𞤭𞤥 𞤅𞤫𞤳 𞤴𞤢𞤤𞤼𞤭𞤲𞤭 𞤳𞤢 𞤤𞤮𞤱𞤪𞤫 𞤥𞤵𞤵𞤲 conakryactu⹁ 𞤬𞤭𞥅 𞤲𞤮𞥅𞤣𞥆𞤵𞤺𞤮𞤤 𞤤𞤭𞤣𞥆𞤭𞥅𞤲𞤮𞥅𞤩𞤫 𞤩𞤫𞤲 𞤤𞤢𞥄𞤥𞤵 𞤀𞤤𞤬𞤢𞥄 𞤑𞤮𞤲𞤣𞤫 𞤲𞤺𞤵𞤲⹁ 𞤴𞤮 𞤩𞤫 𞤬𞤮𞤼𞥆𞤵⹁ 𞤩𞤫 𞤭𞤥𞥆𞤭𞤲𞤢 𞤣𞤵𞤪𞤱𞤮𞥅𞤱𞤮 𞤺𞤮𞥅𞤼𞤮⹁ 𞤮𞥅𞤲 𞤳𞤮 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅. 𞤉 𞤥𞤭𞥅𞤶𞤮 𞤢𞤥⹁ 𞤣𞤢𞤪𞤢𞤺𞤮𞤤 𞤥𞤢𞤳𞥆𞤮 𞤳𞤢𞤲𞤳𞤵 𞤼𞤢𞤲⹁ 𞤨𞤮𞤪𞤯𞤭𞤲𞤢𞤴𞤲𞤮 𞤲𞤣𞤫𞥅 𞤬𞤫𞤸𞤪𞤫 𞤦𞤮𞤲𞤣𞤫 « 𞤬𞤮𞤱 𞤴𞤮 𞤸𞤢𞤱𞤼𞤵 𞤸𞤢𞤩𞤢 𞤺𞤮𞥅𞤼𞤮 » 𞤲𞤣𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤼𞤵𞥅𞤺𞤮𞤪𞤢𞤴𞤲𞤮𞥅 𞤬𞤭𞥅 𞤸𞤵𞥅𞤱𞤼𞤮𞤪𞤺𞤮𞤤 𞤴𞤭𞤥𞤩𞤫 𞤩𞤫𞤲⹁ 𞤩𞤫𞤴𞤣𞤢 𞤳𞤢𞤣𞤭 𞤬𞤫𞤷𞥆𞤵𞤺𞤮𞤤 𞤤𞤫𞤻𞤭 𞤯𞤭𞤲.

 𞤃𞤭 𞤧𞤫𞤲𞤣𞤮𞤣𞤭𞤲𞤮 𞤳𞤢𞤣𞤭 𞤫 𞤴𞤮𞤺𞤢 𞤫 𞤸𞤮𞥅𞤪𞤫𞥅𞤩𞤫 𞤤𞤭𞤣𞥆𞤮 𞤲𞤺𞤮𞤲 𞤲𞤺𞤮𞥅 𞤥𞤭𞥅𞤶𞤮. 𞤑𞤮𞤲𞤮 𞤩𞤫 𞤦𞤵𞤺𞤭𞤼𞤭𞥅 𞤲𞤺𞤮⹁ 𞤬𞤭𞥅 𞤨𞤫𞤤𞥆𞤭𞤼𞤢𞤤 𞤱𞤮𞤲𞤣𞤫𞤥𞤢 𞤣𞤵𞤪𞤱𞤮𞥅𞤱𞤮 𞤥𞤢𞤩𞥆𞤫 𞤮𞤲 𞤲𞤮 𞤱𞤢𞥄𞤱𞤵𞤲𞤮𞥅 𞤬𞤮𞥅𞤤𞤵𞤣𞤫 𞤫 𞤭𞤲𞤣𞤫 𞤥𞤵𞤵𞤲 𞤳𞤢𞤻𞤵𞤲 𞤼𞤭𞤺𞤭. 𞤃𞤭 𞤢𞤲𞤣𞤭𞤲𞤼𞤭𞤲𞤭 𞤩𞤫 𞤱𞤮𞤲𞤣𞤫𞤥𞤢⹁ 𞤧𞤭 𞤩𞤫 𞤱𞤢𞤱𞤢𞥄𞤲𞤮 𞤬𞤮𞥅𞤤𞤵𞤣𞤫 𞤀𞤤𞤬𞤢𞥄 𞤑𞤮𞤲𞤣𞤫 𞤬𞤫𞤱𞤲𞤣𞤮 𞤮 𞤶𞤮𞤺𞤢𞤲𞤮𞥅𞤳𞤭 𞤤𞤢𞥄𞤥𞤵 𞤲𞤺𞤵𞤲⹁ 𞤲𞤮 𞤩𞤵𞤪𞤭 𞤧𞤢𞤼𞥆𞤢𞤲𞤣𞤫 𞤩𞤫 𞤶𞤮𞥅𞤲𞤭⹁ 𞤲𞤣𞤫 𞤼𞤢𞥄𞤱𞤵𞤲𞤮𞥅 𞤷𞤢𞤤𞤯𞤭 𞤤𞤢𞥄𞤥𞤵 𞤯𞤭𞤲 𞤬𞤮𞤨 𞤲𞤮 𞤫 𞤶𞤵𞥅𞤯𞤫 𞤥𞤢𞤳𞥆𞤮. 𞤑𞤭𞤪𞤫 𞤯𞤫𞤲 (𞤲𞤢𞤱𞤤𞤭𞥅𞤺𞤵)⹁ 𞤴𞤭𞤯𞤢𞤲𞤺𞤮𞤤 𞤸𞤮𞥅𞤪𞤫 𞤥𞤵𞤵𞤲 𞤳𞤢𞤻𞤵𞤲 𞤼𞤢𞤲 𞤱𞤢𞤯𞤭 𞤸𞤢𞥄 𞤣𞤮𞥅𞤤𞤫 𞤥𞤢𞤱𞤯𞤫 𞤤𞤭𞤣𞥆𞤮 𞤲𞤺𞤮𞤲 𞤨𞤮𞥅𞤯𞤼𞤮𞤲𞥋𞤣𞤭𞤪𞤭. 𞤃𞤭𞤯𞤮 𞤸𞤮𞥅𞤤𞤭𞥅 𞤸𞤮𞤯𞥆𞤭 𞤱𞤮𞤲𞤣𞤫𞤥𞤢 𞤳𞤮 𞤬𞤫𞥅𞤪𞤫 𞤥𞤢𞤱𞤲𞤣𞤫 𞤤𞤢𞥄𞤱𞤭𞥅 𞤯𞤮𞥅𞤲.

 𞤅𞤭𞤳𞥆𞤫 𞤱𞤮𞥅 𞤢𞤤𞤢𞥄 𞤱𞤮𞤲𞤣𞤫𞤥𞤢 𞤲𞤮 𞤱𞤮𞥅𞤣𞤭 𞤳𞤮 𞤃𞤮𞥅𞤣𞤭 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤬𞤫𞤤𞤭𞤪𞤫𞥅. 𞤒𞤭𞤥𞤩𞤫 𞤺𞤮𞥅 𞤱𞤢𞥄𞤱𞤢𞥄𞤤𞤭 𞤥𞤵𞤳 𞤴𞤢𞤬𞤢𞥄𞤣𞤫 𞤥𞤮 𞤼𞤢𞤱𞤼𞤵𞤺𞤮𞤤 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫 𞤳𞤢 𞤧𞤵𞤩𞤲𞤺𞤮 𞤸𞤮𞥅𞤪𞤢𞥄𞤳𞤵 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥘⹁ 𞤳𞤢 𞤮 𞤢𞤲𞤣𞤭𞤪𞤢𞤲𞤮𞥅 𞤧𞤭𞤲𞤷𞤵𞤺𞤮𞤤 𞤱𞤭𞤴𞤵𞤺𞤮𞤤 « 𞤑𞤮𞤴𞤲𞤺𞤢𞤤 𞤥𞤢𞥄𞤯𞤢⹁ 𞤳𞤮𞤴𞤲𞤺𞤢 𞤢𞤥 »⹁ 𞤸𞤭𞤲𞤤𞤫 𞤸𞤢𞤪𞤭 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫 𞤼𞤢𞤰𞤭𞥅 𞤺𞤢𞤦𞤭𞤼𞤢𞤲𞤶𞤭 𞤥𞤢𞤳𞥆𞤮 𞤯𞤭𞤲. 𞤆𞤫𞤸𞤫 𞤯𞤫 𞤮 𞤧𞤵𞤩𞤭𞤲𞤮𞥅 𞤯𞤫𞤲 𞤳𞤢𞤻𞤵𞤲 𞤫 𞤴𞤭𞤥𞤩𞤫 𞤩𞤫 𞤮 𞤧𞤵𞤩𞤭𞥅 𞤩𞤫𞤲 𞤼𞤢𞤱𞤼𞤵𞤺𞤮𞤤 𞤩𞤮𞥅𞤴𞤢𞤴 𞤱𞤵𞥅𞤪𞤲𞤵𞤣𞤫 𞤴𞤫𞤣𞥆𞤮𞤼𞤭𞤪𞤢𞤤 𞤲𞤺𞤢𞤤 𞤳𞤢 𞤣𞤢𞤱𞤪𞤮 𞤘𞤭𞤲𞤫.

 𞤑𞤮𞤲𞤮 𞤺𞤢𞥄𞤲𞤭𞤲 𞤤𞤵𞤪𞥆𞤫 𞤯𞤫𞤲⹁ 𞤸𞤢𞤴 𞤺𞤮𞥅𞤼𞤮 𞤱𞤢𞤱𞤢𞤼𞤢𞥄 𞤴𞤫𞤣𞥆𞤵𞤣𞤫 𞤲𞤦𞤢𞥄𞤱𞤳𞤢 𞤥𞤢𞤳𞥆𞤮 𞤳𞤢𞤲⹁ 𞤸𞤵𞤩𞤭𞤲𞥋𞤣𞤢𞤺𞤮𞤤 𞤥𞤢𞤳𞥆𞤮 𞤬𞤭𞤴𞤢𞤳𞤵𞥅𞤶𞤭 𞤯𞤭𞤲⹁ 𞤦𞤢𞥄𞤱𞤺𞤢𞤤 𞤥𞤢𞤳𞥆𞤮 𞤫 𞤣𞤢𞤪𞤲𞤣𞤫 𞤥𞤢𞤳𞥆𞤮 𞤱𞤮𞤲𞤵𞤺𞤮𞤤 𞤐𞤫𞤯𞥆𞤮 𞤁𞤮𞤱𞤤𞤢𞤴𞤢𞤲𞤳𞤫𞥅𞤶𞤮. 𞤌 𞤴𞤮𞤩𞤭𞤪𞤭𞥅 𞤳𞤢𞤣𞤭 𞤩𞤢𞤤𞤲𞤣𞤵 𞤥𞤢𞤳𞥆𞤮 𞤲𞤣𞤵𞤲⹁ 𞤣𞤢𞤪𞤢𞤲𞤣𞤫 𞤥𞤢𞤳𞥆𞤮 𞤲𞤣𞤫𞤲 𞤳𞤢 𞤣𞤢𞤱𞤪𞤮⹁ 𞤬𞤫𞤱𞤲𞤣𞤮 𞤥𞤢𞤧𞤭𞥅𞤦𞤮 𞤲𞤺𞤮𞤲 𞤻𞤢𞤤𞤲𞤣𞤫 𞥒𞥘 𞤅𞤭𞤤𞤼𞤮 𞥒𞥐𞥐𞥙. 𞤇𞤢𞥄𞤱𞤮 𞤯𞤵𞤥 𞤳𞤢𞤣𞤭⹁ 𞤮 𞤬𞤢𞤱𞤢𞥄 𞤼𞤮𞤪𞥆𞤢 𞤴𞤢𞤤𞤼𞤭𞤲𞤫𞥅𞤣𞤫 𞤫 𞤺𞤢𞤤𞥆𞤫 𞤥𞤢𞤳𞥆𞤮 𞤯𞤫𞤲 𞤱𞤮𞤲𞤵𞤯𞤫 𞤃𞤭𞤲𞤭𞤴𞤫𞥅𞤪 𞤻𞤢𞤤𞤲𞤣𞤫 𞥒𞥘 𞤕𞤮𞤤𞤼𞤮 𞥒𞥐𞥒𞥒.

 𞤃𞤢𞤧𞤭𞥅𞤦𞤮 𞤥𞤢𞤱𞤲𞤺𞤮 𞤲𞤺𞤮𞤲 𞤳𞤮 𞤼𞤢𞤱𞤣𞤫 𞤘𞤭𞤲𞤫 𞤥𞤫𞥅𞤯𞤢𞥄𞤤𞤭 𞤲𞤢𞤬𞤭𞤼𞤪𞤣𞤫 𞤲𞤮 𞤸𞤵𞥅𞤩𞤭𞤪𞤭⹁ 𞤲𞤦𞤮𞥅𞤱𞤳𞤢 𞤫 𞤦𞤢𞥄𞤱𞤯𞤫 𞤯𞤫 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤬𞤢𞥄𞤤𞤢𞤲𞤮𞥅 𞤸𞤫𞥅𞤪𞤼𞤭𞤲𞤢𞤲𞤣𞤫 𞤤𞤫𞤴𞤣𞤭 𞤥𞤢𞤳𞥆𞤮 𞤲𞤣𞤭𞤲. 𞤐𞤶𞤵𞤩𞥆𞤵𞤣𞤭 𞤤𞤢𞥄𞤥𞤵 𞤲𞤣𞤭 𞤮 𞤬𞤢𞥄𞤤𞤢𞤲𞤮𞥅 𞤱𞤢𞤴𞤤𞤵𞤣𞤫 𞤲𞤣𞤭𞤲⹁ 𞤧𞤢𞤳𞥆𞤭𞤼𞤮𞤪𞤭 𞤥𞤢𞤪𞤼𞤭𞤲𞤺𞤮𞤤 𞤥𞤮⹁ 𞤫 𞤤𞤮𞤪𞥆𞤵𞤺𞤮𞤤 𞤥𞤮⹁ 𞤫 𞤱𞤮𞤯𞥆𞤭𞤲𞤺𞤮𞤤 𞤥𞤮 𞤫 𞤤𞤫𞤴𞤣𞤭 𞤥𞤢𞤳𞥆𞤮 𞤲𞤣𞤭𞤲 𞤸𞤢𞥄 𞤳𞤢 𞤼𞤭𞤥𞥆𞤮𞥅𞤣𞤫 𞤦𞤢𞥄𞤤𞤯𞤫 𞤥𞤢𞤳𞥆𞤮.

 𞤑𞤮 𞤼𞤢𞤥𞤨𞤭𞤲𞤭 𞤫𞤲 𞤳𞤢𞤣𞤭⹁ 𞤳𞤮 𞤢𞤲𞤺𞤢𞤤 𞤱𞤢𞥄𞤱𞤵𞤺𞤮𞤤 𞤱𞤢𞤯𞤵𞤣𞤫 𞤸𞤮𞥅𞤪𞤫 𞤁𞤮𞤱𞤤𞤢𞤤𞤢 𞤲𞤺𞤢𞤤 𞤴𞤭𞤥𞤩𞤫 𞤬𞤢𞥄𞤥𞤵𞤩𞤫 𞤬𞤭𞤴𞤢𞤳𞤵𞥅𞤶𞤭 𞤥𞤢𞤺𞥆𞤢𞤤⹁ 𞤱𞤢𞤯𞥆𞤭𞤲𞤢𞤴𞤩𞤫 𞤳𞤢𞤣𞤭 𞤧𞤮𞥅𞤦𞤫𞥅 𞤫 𞤼𞤭𞥅𞤯𞤲𞤢𞥄𞤪𞤫. 𞤑𞤮 𞤩𞤵𞤪𞤭 𞤸𞤫𞥅𞤱𞤵𞤣𞤫⹁ 𞤲𞤦𞤢𞥄𞤱𞤳𞤭 𞤳𞤭𞤲 𞤫 𞤲𞤦𞤮𞥅𞤱𞤳𞤢 𞤳𞤢𞤲 𞤥𞤢𞤪𞤼𞤭𞤲𞤼𞤫 𞤧𞤢𞤦𞤵 𞤥𞤮𞤲𞤫𞥅⹁ 𞤥𞤭𞥅𞤶𞤢𞤲𞤢𞤺𞤮𞤤 𞤸𞤮𞥅𞤪𞤫 𞤥𞤵𞤵𞤲 𞤳𞤢𞤻𞤵𞤲 𞤼𞤢𞤲⹁ 𞤸𞤫𞤩𞥆𞤭𞤼𞤢𞤺𞤮𞤤 𞤫 𞤫𞤼𞤢𞤺𞤮𞤤 𞤬𞤭𞥅 𞤲𞤮 𞤤𞤵𞤼𞥆𞤭𞤪𞤢 𞤫 𞤤𞤢𞥄𞤥𞤵.

 𞤅𞤭𞤣𞤭𞤴𞤢 𞤚𞤵𞥅𞤪𞤫𞥅 𞤬𞤢𞥄𞤼𞤭𞤳𞤫⹁ 𞤳𞤮𞤲𞤮 𞤥𞤭𞤯𞤮 𞤸𞤫𞤣𞥆𞤮𞤣𞤭 𞤫 𞤥𞤭𞥅𞤶𞤮 𞤬𞤭𞥅 𞤥𞤢𞤳𞥆𞤮 𞤼𞤭𞥅𞤯𞤵𞤲𞥋𞤺𞤮 : 𞤼𞤢𞤱𞤣𞤫 𞤳𞤮 𞤮 𞤲𞤫𞤯𞥆𞤮 𞤥𞤮 𞤱𞤮𞤲𞤵𞤺𞤮𞤤 𞤥𞤵𞤵𞤲 𞤸𞤮𞥅𞤪𞤫 𞤶𞤢𞤺𞥆𞤢𞤤 𞤲𞤺𞤢𞤤 𞤲𞤮 𞤴𞤮𞤲𞤵𞤲𞤮𞥅 𞤳𞤮 𞤢𞤲𞤣𞤭𞤲𞤼𞤭𞤲𞤢 𞤳𞤢𞤤𞤢 𞤺𞤮𞤤𞤢𞤲𞤢𞤴𞤯𞤮 𞤤𞤢𞥄𞤥𞤵 𞤲𞤺𞤵𞤲⹁ 𞤺𞤭𞤦𞤭 𞤑𞤮𞤲𞤢𞥄𞤳𞤭𞤪𞤭 𞤸𞤢𞥄 𞤅𞤫𞤪𞤫𞤳𞤮𞤪𞤫⹁ 𞤱𞤮𞤲𞤣𞤫𞤥𞤢 𞤺𞤮𞤤𞥆𞤢𞤲𞤺𞤮𞤤 𞤤𞤢𞥄𞤥𞤵 𞤲𞤺𞤵𞤲 𞤳𞤮 𞤬𞤢𞤪𞤭𞤤𞥆𞤢 𞤱𞤮𞤲𞤢𞥄 𞤺𞤫𞤩𞤢𞤤.

 𞤃𞤭𞤯𞤮 𞤼𞤮𞤪𞤮𞥅 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤩𞤢𞤲𞥋𞤣𞤮𞤲𞥋𞤣𞤭𞤪𞤢𞥄𞤩𞤫 𞤥𞤢𞤳𞥆𞤮⹁ 𞤫 𞤸𞤵𞥅𞤱𞤮𞤲𞥋𞤣𞤭𞤪𞤢𞥄𞤩𞤫 𞤥𞤢𞤳𞥆𞤮 𞤳𞤢 𞤣𞤢𞤱𞤪𞤮⹁ 𞤫 𞤣𞤫𞤲𞤣𞤢𞥄𞤲𞤺𞤢𞤤 𞤪𞤫𞤲𞤣𞤮 𞤘𞤭𞤲𞤫 𞤲𞤺𞤮𞤲 𞤥𞤵𞤻𞥆𞤢𞤺𞤮𞤤 𞤴𞤢𞤪𞤤𞤮𞥅 𞤬𞤢𞥄𞤼𞤵𞤲𞤣𞤫 𞤥𞤢𞤳𞥆𞤮 𞤲𞤣𞤫𞤲.

 𞤒𞤮 𞤀𞤤𞤤𞤢𞥄 𞤴𞤢𞤱𞤼𞤢𞤲 𞤥𞤮 𞤺𞤮𞥅𞤨𞤭 𞤥𞤢𞤳𞥆𞤮⹁ 𞤮 𞤶𞤢𞤩𞥆𞤮𞥅 𞤥𞤮 𞤫 𞤲𞤣𞤫𞤪 𞤸𞤭𞤲𞥆𞤢𞤴𞤫𞥅 𞤃𞤢𞤳𞥆𞤮 𞤴𞤢𞥄𞤶𞤵𞤯𞤮 𞤮 𞤱𞤢𞤯𞤢 𞤀𞤤𞤶𞤢𞤲𞥆𞤢 𞤱𞤫𞥅𞤪𞤣𞤫 𞤥𞤢𞤳𞥆𞤮 𞤨𞤮𞥅𞤥𞤢𞥄.

 𞤒𞤮 𞤮 𞤦𞤫𞤤𞤮 𞤫 𞤶𞤢𞤥.

𞤑𞤵𞤯𞤮𞤤 𞤀𞤦𞤣𞤵𞤤𞤢𞥄𞤸𞤭 𞤔. 𞤄𞤢𞤪𞤭