𞤃𞤋𞥅𞤔𞤌 𞤚𞤀𞥄𞤐𞤓𞤃 𞤂𞤉𞥅𞤂𞤉 𞤖𞤌𞥅𞤈𞤉 𞤊𞤋𞤒𞤀𞥄𞤑𞤓 𞤐𞤓𞥅𞤈𞤀
𞤅𞤫𞤲𞤫𞤺𞤢𞤤 : 𞤐𞤵𞥅𞤪𞤢 𞤄𞤢𞥄⹁ 𞤼𞤵𞤥𞤢 𞤲𞤣𞤫 𞤱𞤭𞤲𞤣𞤢𞤲𞤣𞤫 𞤧𞤮𞤪𞤼𞤢𞥄 𞤫 𞤸𞤮𞤤𞤺𞤮 𞤥𞤵𞤵𞤲
𞤏𞤢𞤯𞤭𞥅 𞤶𞤮𞤲𞤼𞤫 𞤦𞤵𞤴⹁ 𞤸𞤢𞤪𞤭 𞤐𞤵𞥅𞤪𞤢 𞤲𞤮 𞤱𞤫𞤥𞤦𞤫𞥅𞤣𞤫 𞤩𞤢𞥄𞤱𞤮 𞤸𞤮 𞤽𞤭𞤻𞤵𞤣𞤫 𞤣𞤢𞤱𞤪𞤮 𞤚𞤢𞥄𞤸𞤭𞤪𞤵 𞤅𞤢𞥄𞤪 𞤧𞤫𞤩𞤭𞤼𞤮𞤪𞤲𞤺𞤮 𞤻𞤢𞥄𞤥𞤮. 𞤑𞤮 𞤴𞤢𞤱𞤼𞤭 𞥗𞥐𞥐 𞤱𞤭𞤲𞤣𞤢𞤲𞤯𞤫 𞤴𞤵𞤱𞤢𞤴𞤯𞤫 𞤫 𞤸𞤮𞤴𞤲𞤢𞤴𞤯𞤫 𞤼𞤵𞥅𞤺𞤢𞥄𞤥𞤢 𞤫 𞤥𞤢𞤳𞥆𞤮. 𞤖𞤮 𞤧𞤢𞤳𞥆𞤭𞤼𞤮𞤪𞤭 𞤶𞤢𞥄𞤦𞤢𞤺𞤮𞤤 𞤱𞤮𞥅𞤼𞤫𞤪𞤫 𞤫 𞤱𞤭𞤲𞤣𞤢𞤲𞤯𞤫 𞤯𞤫𞤲⹁ 𞤳𞤢 𞤣𞤫𞤦𞥆𞤮 𞤺𞤮𞥅𞤼𞤮 𞤱𞤭𞤴𞤫𞤼𞤫𞥅𞤯𞤮 𞤃𞤫𞤪𞤭 𞤙𞤢𞥄𞤲𞤺 𞤱𞤫𞤲𞤺𞤭. 𞤑𞤮 𞤲𞤺𞤮𞥅𞤤 𞤶𞤢𞥄𞤦𞤢𞤱𞤮𞤤, 𞤼𞤢𞤰𞤢𞥄⹁ 𞤼𞤢𞤰𞤭𞤼𞤢𞥄⹁ 𞤭𞤼𞥆𞤢𞥄 𞤫 𞤳𞤮 𞤼𞤢𞤳𞥆𞤭𞥅𞤲𞤺𞤮𞤤 𞤳𞤮𞤲⹁ 𞤴𞤭𞥅𞤤𞤭𞤲𞤢𞥄 𞤳𞤢 𞤲𞤶𞤵𞤩𞥆𞤵𞤤𞤫 𞤼𞤮𞤳𞥆𞤮𞤲𞥋𞤣𞤭𞤪𞤫. 𞤖𞤢𞥄 𞤶𞤮𞥅𞤲𞤭 𞤸𞤮 𞤲𞤢𞤲𞤺𞤢𞥄𞤥𞤢⹁ 𞤸𞤮 𞤧𞤮𞤳𞤢𞥄𞤥𞤢.
𞤉 𞤱𞤭𞤴𞤭 𞤐𞤵𞥅𞤪𞤢⹁ 𞤸𞤭𞤲𞤮 𞤲𞤭𞥅 𞤳𞤮 𞤬𞤫𞤰𞥆𞤭 𞤳𞤮𞤲. 𞤖𞤢𞤪𞤭 𞤃𞤢𞤪𞤭 𞤙𞤢𞥄𞤲𞤺⹁ 𞤲𞤮 𞤸𞤮𞤤𞥆𞤵𞤣𞤫 𞤱𞤮𞤲𞤣𞤫𞤥𞤢 𞤳𞤮 𞤚𞤢𞥄𞤸𞤭𞤪𞤵 𞤅𞤢𞥄𞤪 𞤱𞤮𞤲𞤭 𞤸𞤮𞥅𞤪𞤫𞥅𞤶𞤮 𞤥𞤮 𞤸𞤮 𞤶𞤮𞤳𞥆𞤭 𞤮𞤲⹁ 𞤳𞤢𞤣𞤭 𞤷𞤫𞥅𞤪𞤲𞤮𞥅𞤶𞤮 𞤺𞤮𞥅𞤼𞤮 𞤲𞤮 𞤼𞤮𞥅𞤲⹁ 𞤳𞤮 𞤮𞥅𞤲 𞤱𞤮𞤲𞤭 𞤯𞤮𞤱𞤮𞥅𞤱𞤮 𞤥𞤢𞤳𞥆𞤮 𞤥𞤮 𞤮 𞤱𞤮𞥅𞤲𞤣𞤭𞤪𞤼𞤢 𞤮𞤲. 𞤐𞤣𞤫 𞤐𞤵𞥅𞤪𞤢 𞤱𞤭𞤲𞤣𞤭 « 𞤸𞤮𞥅𞤪𞤫𞥅𞤶𞤮 𞤥𞤮𞤮𞤲 »⹁ 𞤳𞤮 𞤚𞤢𞥄𞤸𞤭𞤪𞤵 𞤅𞤢𞥄𞤪⹁ 𞤸𞤮𞥅𞤪𞤫𞥅𞤶𞤮 𞤥𞤮 𞤮𞥅 𞤶𞤭𞤱𞤮 𞤱𞤭𞤴𞤭 𞤮𞤲 𞤳𞤮 𞤥𞤮 𞤥𞤵𞤵𞤲⹁ 𞤸𞤮 𞤶𞤮𞥅𞤨𞤭𞥅. 𞤌 𞤸𞤮𞤴𞤲𞤭 𞤳𞤢𞤣𞤭 𞤷𞤫𞥅𞤪𞤲𞤮𞥅𞤶𞤮 𞤥𞤮 𞤮𞥅 𞤣𞤫𞤦𞥆𞤮 𞤱𞤭𞤴𞤭 𞤮𞤲 𞤳𞤮 𞤷𞤫𞤪𞤲𞤮 𞤥𞤵𞤵𞤲. 𞤑𞤮𞤲𞤮 𞤳𞤢 𞤸𞤢𞤳𞤼𞤭𞤧𞤮, 𞤯𞤵𞤥 𞤱𞤢𞤴𞤤𞤭𞤼𞤢𞥄 𞤱𞤮𞤲𞤼𞤭 : « 𞤀𞤯𞤢 𞤴𞤫𞤲𞥆𞤵𞤣𞤫 𞤢𞤪𞤣𞤭𞥅𞤩𞤫 𞤢𞤥𞤫𞤲 𞤩𞤫𞤲 𞤳𞤢 𞤣𞤭𞥅𞤲𞤢 𞤫 𞤳𞤢 𞤣𞤢𞤱𞤪𞤮. »
𞤐𞤣𞤫𞥅 𞤼𞤵𞥅𞤥𞤢𞤲𞤣𞤫 𞤱𞤮𞤲𞤢𞥄 𞤳𞤫𞤧𞤵𞤲. 𞤐𞤁𞤫 𞤩𞤮𞥅𞤴𞤭𞥅 𞤴𞤭𞥅𞤤𞤢𞥄𞤲𞤣𞤫. 𞤇𞤫 𞤩𞤮𞥅𞤴𞤭𞥅 𞤼𞤵𞥅𞤥𞤵𞤣𞤫 𞤊𞤵𞤤𞤩𞤫 𞤊𞤵𞥅𞤼𞤢 𞤴𞤫𞤲𞥆𞤵𞤺𞤮𞤤 𞤢𞤪𞤣𞤭𞥅𞤩𞤫 𞤥𞤢𞤩𞥆𞤫 𞤩𞤫𞤲 𞤳𞤢 𞤣𞤭𞥅𞤲𞤢 𞤫 𞤸𞤮𞥅𞤪𞤫𞥅𞤩𞤫 𞤥𞤢𞤩𞥆𞤫 𞤩𞤫𞤲 𞤳𞤢 𞤣𞤢𞤱𞤪𞤮.
𞤖𞤭𞤲𞤤𞤫⹁ 𞤲𞤮 𞤱𞤮𞥅𞤣𞤭 𞤧𞤵𞤳𞤢𞥄𞤩𞤫 𞤔𞤮𞤤𞤬𞤵𞥅𞤩𞤫 𞤯𞤵𞥅𞤯𞤵𞤩𞤫 𞤴𞤫𞤲𞥆𞤮𞥅𞤩𞤫 𞤅𞤫𞤤𞥆𞤵 𞤁𞤢𞤤𞤫𞤲 𞤔𞤢𞤤𞥆𞤮 𞤳𞤢𞤻𞤵𞤲 𞤫 𞤢𞤪𞤣𞤭𞥅𞤩𞤫 𞤣𞤭𞥅𞤲𞤢 𞤊𞤵𞥅𞤼𞤢 𞤔𞤢𞤤𞤮𞥅 𞤩𞤫𞤲⹁ 𞤸𞤢𞤪𞤢 𞤲𞤮𞤲 𞤸𞤢𞤴 𞤤𞤭𞤥𞤼𞤢𞥄𞤳𞤢 𞤳𞤮𞤲𞤺𞤵𞤤𞤭 𞤳𞤭𞤤𞥆𞤢𞥄𞤳𞤵 𞤫 𞤲𞤺𞤢𞤴𞤲𞤺𞤵-𞤶𞤢𞤲𞤢𞤲𞤮 𞤳𞤮 𞤩𞤫 𞤬𞤢𞤱𞤭 𞤲𞤺𞤮𞥅 𞤪𞤫𞤲𞤣𞤮 𞤊𞤵𞥅𞤼𞤢 𞤔𞤢𞤤𞤮𞥅.
𞤖𞤭𞤲𞤮 𞤱𞤮𞥅𞤣𞤭 𞤧𞤵𞤳𞤢 𞤱𞤭𞤴𞤢𞥄𞤯𞤮 𞤳𞤮 𞤘𞤭𞤲𞤫𞤲𞤢𞥄𞤶𞤮⹁ 𞤭𞤲𞥆𞤭𞤼𞤭𞥅𞤯𞤮 𞤥𞤭 𞤧𞤭𞤳𞥆𞤭 𞤄𞤄 𞤈𞤢𞤧𞤼𞤢. 𞤌 𞤱𞤢𞤯𞤢𞤴𞤲𞤮 𞤯𞤮𞤱𞤤𞤭 𞤯𞤭 𞤮 𞤴𞤫𞤲𞥆𞤢𞤼𞤢 𞤬𞤮𞤨 𞤫 𞤥𞤵𞤵𞤲 : 𞤷𞤫𞥅𞤪𞤲𞤮𞥅𞤩𞤫 𞤩𞤫𞤲⹁ 𞤦𞤢𞥄𞤦𞤭𞤪𞤢𞥄𞤩𞤫 𞤩𞤫𞤲⹁ 𞤲𞤫𞥅𞤲𞤭𞤪𞤢𞥄𞤩𞤫 𞤩𞤫𞤲. 𞤃𞤭 𞤲𞤫𞤤𞤣𞤢𞥄𞤥𞤢 𞤯𞤮𞤱𞤤𞤵 𞤄𞤄 𞤈𞤢𞤧𞤼𞤢 𞤱𞤮𞥅𞤼𞤵. 𞤇𞤢𞤴𞤼𞤭 𞤥𞤭 𞤶𞤫𞤲𞤼𞤭𞤳𞤫 𞤲𞤺𞤵⹁ 𞤥𞤭 𞤣𞤮𞤭 𞤱𞤫𞤣𞥆𞤢𞥄𞤣𞤫 𞤫𞤱𞤲𞤮𞤪𞤺𞤢𞤤 𞤢𞤥 𞤲𞤺𞤢𞤤⹁ 𞤸𞤢𞤳𞥆𞤫𞤪𞤫𞤲 𞤸𞤢𞥄𞤤𞤢𞥄𞤶𞤭 𞤥𞤢𞤳𞥆𞤮 𞤯𞤭𞤲 𞤲𞤮 𞤧𞤮𞤩𞤵𞤲𞤮𞥅⹁ 𞤲𞤮 𞤴𞤢𞤳𞥆𞤭𞥅.
𞤃𞤭 𞤥𞤭𞥅𞤶𞤭𞥅⹁ 𞤼𞤢𞤱𞤢𞤴 𞤮𞥅 𞤲𞤮 𞤱𞤮𞤲𞤣𞤭 𞤫 𞤫𞤤𞥆𞤢 𞤥𞤢𞤱𞤳𞤢. 𞤐𞤮 𞤻𞤭𞤣𞥆𞤵𞤲𞤮𞥅⹁ 𞤲𞤮 𞤮 𞤱𞤮𞤲𞤵𞤲𞤮𞥅 𞤸𞤮𞤴𞤲𞤭𞤪𞤣𞤫 𞤴𞤭𞤥𞤩𞤫 𞤩𞤫𞤲 𞤬𞤮𞤨. 𞤑𞤮 𞤧𞤭𞤬𞤢 𞤮𞥅 𞤲𞤫𞤯𞥆𞤮 𞤭𞤻𞥆𞤢𞤼𞤢 𞤤𞤢𞤥 𞤼𞤭𞤺𞤭.
𞤑𞤮𞤲𞤮 𞤳𞤮 𞤯𞤮𞤮⹁ 𞤷𞤢𞤯𞤫𞥅𞤤𞤫 𞤯𞤫𞤲 𞤼𞤭𞤺𞤭-𞤼𞤭𞤺𞤭 𞤱𞤮𞤲𞤭: 𞤲𞤶𞤵𞤩𞥆𞤵𞤤𞤫 𞤼𞤮𞤳𞥆𞤮𞤲𞥋𞤣𞤭𞤪𞤢𞤤 𞤯𞤫𞤲 𞤸𞤢𞤱𞤼𞤭𞤲𞥋𞤣𞤭𞤪𞤢𞤴 𞤬𞤮𞤨 𞤱𞤢𞤯𞤢 𞤫 𞤳𞤮𞤪𞤵𞤲 𞤺𞤮𞥅𞤼𞤵𞤲. 𞤑𞤮 𞤲𞤭𞥅 𞤩𞤫𞥅 𞤰𞤫𞤼𞥆𞤭𞤪𞤭 𞤳𞤮 𞤮𞥅 𞤄𞤄 𞤈𞤢𞤧𞤼𞤢 𞤱𞤮𞤲𞤭 𞤫 𞤱𞤢𞤯𞤵𞤣𞤫 𞤳𞤮𞤲⹁ 𞤩𞤫 𞤱𞤭𞤴𞤭 𞤊𞤵𞤤𞤩𞤫 𞤘𞤭𞤲𞤫 𞤩𞤫𞤲 𞤲𞤮 𞤴𞤫𞤲𞥆𞤵𞤣𞤫 𞤳𞤮𞥅𞤸𞤮𞥅𞤩𞤫 𞤥𞤢𞤩𞥆𞤫 𞤩𞤫𞤲 𞤳𞤢 𞤣𞤭𞥅𞤲𞤢, 𞤼𞤢𞤱𞤢 𞤤𞤫 𞤳𞤮 𞤧𞤵𞤳𞤢 𞤺𞤮𞥅𞤼𞤮, 𞤱𞤢𞤤𞥆𞤢 𞤧𞤵𞤳𞤢𞥄𞤩𞤫 𞤧𞤫𞥅𞤯𞤢𞥄𞤩𞤫 𞤱𞤮𞤲𞤭 𞤱𞤢𞤯𞤵𞤣𞤫⹁ 𞤼𞤢𞤱𞤢 𞤳𞤢𞤣𞤭 𞤲𞤮 𞤱𞤢𞥄𞤱𞤭 𞤱𞤮𞤲𞤣𞤫 𞤸𞤢𞤪𞤢 𞤱𞤮𞤲𞤢𞥄 𞤸𞤢𞤴 𞤊𞤵𞤤𞤩𞤫.
𞤅𞤭 𞤼𞤢𞤱𞤭𞥅 𞤳𞤮 𞤆𞤵𞤤𞥆𞤮⹁ 𞤸𞤮𞤤 𞤳𞤮 𞤱𞤢𞤯𞤭⹁ 𞤧𞤮 𞤆𞤵𞤤𞥆𞤮 𞤺𞤮𞥅𞤼𞤮 𞤱𞤢𞤯𞤭𞥅𞤱𞤮𞤲𞤫𞤪𞤫⹁ 𞤳𞤮 𞤤𞤫𞤻𞤮𞤤 𞤥𞤢𞤳𞥆𞤮 𞤲𞤺𞤮𞤤 𞤬𞤮𞤨 𞤬𞤢𞤱𞤫𞤼𞤫𞥅؟ 𞤑𞤮 𞤯𞤮𞥅 𞤫𞤤𞥆𞤢 𞤳𞤢𞤲 𞤱𞤮𞤲𞤭.
𞤏𞤢𞤯𞤵𞤺𞤮𞤤 𞤯𞤵𞤥⹁ 𞤳𞤮 𞤬𞤫𞤲𞤢𞥄𞤲𞤣𞤫 𞤫 𞤼𞤮𞥅𞤻𞤫⹁ 𞤼𞤫𞥅𞤽𞤼𞤭𞤲𞤭𞥅 𞤲𞤣𞤫 𞤼𞤢𞤱𞤵𞤲𞤮𞥅 𞤩𞤫𞥅 𞤢𞤪𞤣𞤭𞥅𞤩𞤫 𞤥𞤢𞤩𞥆𞤫 𞤳𞤢 𞤣𞤭𞥅𞤲𞤢⹁ 𞤳𞤮 𞤩𞤫𞥅𞤲 𞤳𞤢𞤣𞤭 𞤱𞤮𞤲𞤭 𞤢𞤪𞤣𞤭𞥅𞤩𞤫 𞤊𞤵𞤤𞤩𞤫 𞤩𞤫𞤲 𞤳𞤢 𞤣𞤭𞥅𞤲𞤢. 𞤏𞤵𞤪𞤭𞤲 𞥙𞥙% 𞤫 𞤩𞤫𞥅 𞤢𞤪𞤣𞤭𞥅𞤩𞤫 𞤣𞤭𞥅𞤲𞤢 𞤳𞤮 𞤊𞤵𞤤𞤩𞤫 𞤥𞤢𞤤𞥆𞤢 𞤭𞤱𞤣𞤭 𞤊𞤵𞤤𞤩𞤫.
𞤖𞤮𞥅𞤪𞤫 𞤯𞤵𞤥⹁ 𞤲𞤮 𞤱𞤮𞥅𞤣𞤭 𞤴𞤮𞤺𞤢 𞤫 𞤩𞤫𞥅 𞤴𞤭𞤥𞤩𞤫 𞤶𞤵𞤳𞥆𞤵𞤩𞤫 𞤫 𞤶𞤮𞤺𞤮𞤪𞤺𞤮𞤤 𞤴𞤭𞤥𞤩𞤫 𞤤𞤫𞤻𞤮𞤤 𞤬𞤮𞤨 𞤱𞤢 𞤧𞤭 𞤳𞤮 𞤩𞤫 𞤺𞤮𞥅𞤼𞤵𞤲⹁ 𞤼𞤫𞥅𞤽𞤼𞤭𞤲𞤭𞥅 𞤲𞤮𞤲 𞤧𞤮 𞤼𞤢𞤱𞤭𞥅 𞤳𞤮 𞤊𞤵𞤤𞤩𞤫⹁ 𞤊𞤵𞤤𞤩𞤫 𞤘𞤭𞤲𞤫 𞤩𞤫𞤲 𞤲𞤮𞤲 𞤩𞤵𞤪𞤼𞤭𞤲𞤢𞤲𞤢.
𞤑𞤮 𞤲𞤭𞥅 𞤸𞤵𞥅𞤩𞤭𞤲𞤼𞤭𞤲𞤺𞤮𞤤 𞤬𞤮𞤨 𞤱𞤢𞤯𞤭𞤪𞤼𞤫𞥅 : 𞤺𞤮𞥅𞤼𞤮 𞤦𞤮𞤲𞥆𞤢⹁ 𞤬𞤮𞤨 𞤬𞤢𞤱𞤫𞥅.
𞤐𞤫𞤯𞥆𞤮 𞤲𞤮 𞤱𞤢𞥄𞤱𞤭 𞤽𞤭𞤻𞤵𞤣𞤫 𞤶𞤭𞤳𞥆𞤵 𞤸𞤢𞤪𞤢 𞤱𞤮𞤲𞤢𞥄 𞤪𞤫𞤲𞤣𞤮 𞤬𞤮𞤨 𞤮 𞤽𞤭𞤻𞤭. 𞤑𞤢𞤣𞤭 𞤲𞤫𞤯𞥆𞤮 𞤲𞤮 𞤱𞤢𞥄𞤱𞤭 𞤽𞤭𞤻𞤵𞤣𞤫 𞤣𞤢𞤱𞤪𞤮 𞤸𞤢𞤪𞤢 𞤮 𞤱𞤫𞤥𞤦𞤢𞥄𞤳𞤢 𞤬𞤮𞤼𞤣𞤫 𞤶𞤮𞤲𞤼𞤫.
𞤑𞤮 𞤚𞤀𞥄𞤐𞤓𞤃 𞤂𞤉𞥅𞤂𞤉 𞤱𞤭𞤲𞤣𞤭 𞤲𞤺𞤮𞥅𞤤 𞤳𞤵𞤯𞤮𞤤 𞤫 𞤊𞤢𞤪𞤢𞤲𞤧𞤭⹁ 𞤚𞤀𞤄𞤀𞤂𞤁𞤉 𞤬𞤭𞤪𞤼𞤭 𞤲𞤺𞤮𞤤 𞤫 𞤆𞤵𞤤𞤢𞤪.
𞤚𞤢𞥄𞤲𞤵𞤥 𞤂𞤫𞥅𞤤𞤫⹁ 𞤳𞤮 𞤣𞤫𞤦𞥆𞤮 𞤃𞤮𞤪𞤭𞤼𞤢𞤲𞥆𞤢𞥄𞤶𞤮 𞤶𞤮𞤺𞤭𞥅𞤯𞤮 𞤤𞤮𞤱𞤪𞤫 𞤳𞤢 𞤊𞤫𞤧𞤦𞤵𞤳 𞤫 𞤳𞤢 𞤒𞤵𞥅𞤼𞤵𞤦 𞤭𞤲𞥆𞤫𞤼𞤫𞥅𞤲𞤣𞤫 AGANISHA 𞤥𞤢𞤤𞥆𞤢 AGA GEOPOLITIQUE
𞤌𞤲 𞤶𞤢𞥄𞤪𞤢𞥄𞤥𞤢