𞤃𞤋𞥅𞤔𞤌 𞤀𞤃 𞤖𞤌𞥅𞤈𞤉 𞤍𞤋𞥅 𞤑𞤌𞤐𞤘𞤋 𞤔𞤉𞤂𞤋 𞤑𞤀𞤄𞤀 𞤄𞤋𞤐𞤚𞤓

𞤐𞤮 𞤲𞤭𞥅 𞤳𞤮 𞤔𞤉𞤂𞤋𞤑𞤀𞤄𞤀 𞤄𞤋𞤐𞤚𞤓 𞤱𞤭𞤴𞤭 𞤳𞤮𞤲: « 𞤑𞤮 𞤥𞤭 𞤥𞤢𞤲𞤭𞤲𞤳𞤢𞥄𞤶𞤮. 𞤍𞤫𞤥𞤺𞤢𞤤 𞤃𞤢𞤲𞤭𞤲𞤳𞤢 𞤳𞤮 𞤱𞤭𞤲𞤣𞤫𞤼𞤫𞤴𞤢𞤲𞤳𞤮𞤱𞤢𞤤. 𞤑𞤮𞤲𞤮 𞤯𞤫𞤥𞤺𞤢𞤤 𞤅𞤮𞥅𞤧𞤮⹁ 𞤳𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤼𞤢𞤲 𞤸𞤢𞥄𞤤𞤫𞤼𞤫𞥅. 𞤑𞤮𞤲𞤭𞤴𞤢𞤳𞤢𞥄𞤪𞤫 𞤲𞤣𞤫𞤲⹁ 𞤳𞤮 𞤫 𞤲𞤣𞤫𞤪 𞤘𞤭𞤲𞤫 𞤼𞤢𞤲 𞤸𞤢𞥄𞤤𞤫𞤼𞤫𞥅. 𞤆𞤵𞤤𞤢𞤪 𞤲𞤺𞤢𞤤⹁ 𞤳𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫 𞤼𞤢𞤲 𞤲𞤺𞤢𞤤 𞤸𞤢𞥄𞤤𞤫𞤼𞤫𞥅… “

𞤖𞤢𞤴 𞤧𞤮 𞤼𞤢𞤱𞤭𞥅 𞤥𞤭𞥅𞤶𞤮 𞤥𞤢𞤳𞥆𞤮 𞤲𞤺𞤮𞤲 𞤳𞤮 𞤪𞤫𞤱𞤪𞤵𞤺𞤮𞤤 𞤺𞤭𞤥𞤭 𞤬𞤭𞥅 𞤩𞤢𞤥𞤼𞤵𞤺𞤮𞤤 𞤯𞤫𞤥𞤯𞤫 𞤘𞤭𞤲𞤫 𞤯𞤫𞤲⹁ 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤫 𞤲𞤣𞤫𞥅 𞤸𞤭𞥅𞤪𞤣𞤫 𞤲𞤣𞤫 𞤮 𞤱𞤢𞤯𞤭 𞤆𞤢𞤪𞤭 𞤲𞤮 𞤱𞤮𞤲𞤣𞤭 𞤫 𞤽𞤢𞤳𞥆𞤫𞤪𞤫 𞤼𞤭𞥅𞤯𞤵𞤲’𞤣𞤫⁏ 𞤧𞤢𞤦𞤵 𞤸𞤮𞤥𞤮 𞤼𞤵𞥅𞤺𞤮𞤪𞤭 𞤨𞤫𞤲𞤢𞥄𞤤𞤫 𞤸𞤮𞥅𞤪𞤫 𞤯𞤫𞤴𞤢 𞤯𞤫𞤥𞤯𞤫⹁ 𞤸𞤮 𞤼𞤮𞥅𞤱𞤲𞤭 𞤯𞤫𞤥𞤺𞤢𞤤 𞤥𞤢𞤳𞥆𞤮 𞤲𞤺𞤢𞤤.

𞤊𞤵𞤯𞥆𞤮𞤪𞤺𞤮𞤤 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤱𞤭𞤴𞤵𞤺𞤮𞤤 “𞤃𞤭𞤲 𞤳𞤮 𞤥𞤭 𞤥𞤢𞤲𞤭𞤲𞤳𞤢𞥄𞤶𞤮”⹁ 𞤪𞤫𞤬𞤼𞤭 𞤩𞤫𞤴𞤣𞤭𞤼𞤢 𞤱𞤮𞤲𞤣𞤫𞤥𞤢 𞤃𞤢𞤲𞤭𞤲𞤳𞤢𞥄𞤪𞤫 𞤲𞤣𞤫𞤲 𞤳𞤮 𞤯𞤫𞤥𞤺𞤢𞤤 “𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞤱𞤢𞤤” 𞤺𞤢𞥄𞤴𞤭 𞤯𞤫𞤴𞤢 𞤯𞤫𞤥𞤯𞤫⹁ 𞤯𞤵𞤥 𞤳𞤮 𞤸𞤭𞤳𞥆𞤭𞤲𞤺𞤮𞤤 𞤤𞤫𞤻𞤮𞤤 𞤥𞤢𞤳𞥆𞤮 𞤲𞤺𞤮𞤤 𞤴𞤫𞥅𞤧𞤮⹁ 𞤫 𞤲𞤣𞤫𞤪 𞤴𞤫𞤪𞤮𞤲’𞤣𞤭𞤪𞤢𞤤 𞤩𞤵𞤪𞤲𞤣𞤭𞤲𞤺𞤢𞤤 𞤯𞤫𞤥𞤺𞤢𞤤 𞤥𞤢𞤳𞥆𞤮 𞤲𞤺𞤢𞤤. 𞤑𞤮 𞤱𞤮𞥅𞤱𞤭⹁ 𞤧𞤭 𞤲𞤫𞤯𞥆𞤮 𞤬𞤵𞤯𞥆𞤮𞤪𞤭𞥅 𞤽𞤭𞤻𞤮𞥅𞤪𞤫 𞤥𞤵𞤵𞤲 𞤲𞤣𞤫𞤲⹁ 𞤸𞤮𞤤𞥆𞤭𞤼𞤵𞤺𞤮𞤤 𞤼𞤢𞤸𞤮 𞤱𞤮𞤲𞤣𞤫𞤥𞤢⹁ 𞤳𞤮 𞤫 𞤣𞤫𞤲𞤼𞤢𞤤 𞤲𞤺𞤢𞤤 𞤮 𞤱𞤮𞤲𞤭 𞤽𞤭𞤻𞤵𞤣𞤫 𞤲𞤺𞤢𞤤 𞤮 𞤶𞤫𞤴𞤢𞥄⹁ 𞤳𞤮 𞤬𞤭𞥅 𞤴𞤮 𞤽𞤭𞤻𞤮𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤸𞤫𞤩𞤵 𞤣𞤢𞤪𞤲𞤣𞤫 𞤥𞤮𞤰𞥆𞤫𞤪𞤫 𞤫 𞤸𞤮𞥅𞤪𞤫 𞤣𞤫𞤲𞤼𞤢𞤤 𞤲𞤺𞤢𞤤 𞤮 𞤶𞤫𞤴𞤢𞥄𞤲𞤺𞤢𞤤 𞤫 𞤥𞤵𞤵𞤲. 𞤀𞤱𞤢 𞤳𞤮 𞤬𞤭𞥅 𞤸𞤮𞤲𞤯𞤵𞤥 𞤲𞤮𞤲⹁ 𞤸𞤮 𞤬𞤵𞤯𞥆𞤮𞤪𞤭 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤥𞤢𞤲𞤼𞤮𞥅𞤪𞤫 𞤱𞤮𞤲𞤢𞤲𞤣𞤫 𞤤𞤫𞤻𞤮𞤤 𞤥𞤢𞤳𞥆𞤮 𞤫 𞤸𞤮𞤴𞤲𞤣𞤫 𞤱𞤮𞤲𞤢𞤲𞤣𞤫 𞤯𞤭𞤴𞤢 𞤤𞤫𞤻𞤭 𞤧𞤮 𞤼𞤢𞤱𞤭𞥅 𞤥𞤭𞥅𞤶𞤮 𞤥𞤢𞤳𞥆𞤮 𞤲𞤺𞤮𞤲 𞤳𞤮 𞤥𞤢𞤱𞤲𞤭𞤲𞤺𞤮𞤤 𞤯𞤫𞤥𞤯𞤫 𞤘𞤭𞤲𞤫 𞤯𞤫𞤲 𞤬𞤮𞤨؟

𞤃𞤢𞤲𞤼𞤮𞤪𞤺𞤮𞤤 𞤭𞤱𞤣𞤭 𞤥𞤵𞤵𞤲 𞤳𞤮 𞤸𞤵𞥅𞤲𞤣𞤫 𞤬𞤮𞤼𞤵𞤲𞤣𞤫 𞤧𞤢𞤲𞥆𞤫. 𞤑𞤮𞤲𞤮 𞤲𞤣𞤫𞥅 𞤸𞤢𞥄𞤱𞤭𞤼𞤢𞥄𞤪𞤫 𞤲𞤮 𞤢𞤣𞥆𞤢 𞤷𞤢𞤯𞤫𞥅𞤤𞤫 𞤧𞤮 𞤼𞤢𞤱𞤭𞥅 𞤲𞤣𞤫 𞤱𞤮𞤲𞤣𞤭𞥅 𞤫 𞤤𞤫𞤧𞤯𞤭𞤲𞤺𞤮𞤤 (𞤶𞤢𞥄𞤧𞤭𞤲𞤺𞤮𞤤) 𞤯𞤫𞤥𞤯𞤫 𞤩𞤫𞤴𞤢 𞤴𞤭𞤥𞤩𞤫.

𞤑𞤮 𞤩𞤵𞤪𞤭 𞤥𞤫𞤼𞥆𞤵𞤣𞤫 𞤫 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤳𞤮 𞤲𞤺𞤢𞥄𞤤 𞤩𞤵𞤪𞤣𞤭𞤲𞤣𞤭𞤲𞤢𞤤 𞤼𞤵𞥅𞤺𞤭𞥅𞤲𞤺𞤢𞤤 𞤫 𞤬𞤫𞤲𞤢𞤲𞤣𞤫 𞤲𞤺𞤢𞤤 𞤮 𞤱𞤢𞤯𞤭. 𞤉 𞤥𞤭𞥅𞤶𞤮 𞤥𞤢𞤳𞥆𞤮⹁ 𞤯𞤫𞤥𞤺𞤢𞤤 𞤥𞤢𞤳𞥆𞤮 𞤲𞤺𞤢𞤤 𞤲𞤮 𞤵𞤣𞥆𞤭𞤼𞤭𞥅 𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲⹁ 𞤳𞤮𞤲𞤮 𞤅𞤮𞥅𞤧𞤮𞥅𞤪𞤫 𞤲𞤣𞤫𞤲 𞤫 𞤑𞤮𞤲𞤭𞤴𞤢𞤳𞤢𞥄𞤪𞤫 𞤲𞤣𞤫𞤲 𞤫 𞤆𞤵𞤤𞤢𞤪 𞤲𞤺𞤢𞤤 𞤲𞤮 𞤸𞤢𞤦𞥆𞤭𞥅 𞤴𞤭𞤥𞤮𞥅𞤩𞤫 𞤘𞤭𞤲𞤫 𞤩𞤫𞤲⹁ 𞤼𞤫𞥅𞤽𞤼𞤭𞤲𞤭𞥅𞤥𞤢 𞤳𞤢𞤲𞤳𞤮⹁ 𞤬𞤭𞥅 𞤴𞤢𞤤𞤼𞤵𞤺𞤮𞤤 𞤫 𞤲𞤭𞤩𞤪𞤫 𞤥𞤢𞤶𞥆𞤫. 𞤐𞤁𞤫𞥅 𞤱𞤫𞥅𞤩𞤭𞤼𞤢𞤲𞤣𞤫 𞤲𞤮 𞤤𞤫𞤧𞤭𞤲𞤯𞤭𞤲𞤢 𞤪𞤫𞤲𞤣𞤮𞥅𞤶𞤭 𞤫 𞤢𞥄𞤣𞤢𞥄𞤶𞤭 𞤯𞤭 𞤥𞤢𞤱𞤲𞤺𞤵 𞤥𞤵𞤵𞤲 𞤴𞤢𞤱𞤼𞤭 𞤳𞤫𞥅𞤪𞤭 𞤘𞤭𞤲𞤫 𞤯𞤭𞤲 𞤲𞤫𞥅𞤩𞤭𞥅.

𞤑𞤮𞤲𞤮 𞤺𞤮𞥅𞤲𞤺𞤢 𞤳𞤢𞤲 𞤲𞤮 𞤤𞤢𞥄𞤩𞤭. 𞤖𞤢𞤴 𞤧𞤭 𞤫𞤲 𞤸𞤢𞥄𞤯𞤵 𞤼𞤵𞤲 𞤫 𞤷𞤢𞤤𞤼𞤵𞤳𞤢 𞤊𞤵𞥅𞤼𞤢 𞤔𞤢𞤤𞤮𞥅 𞤳𞤢𞤲⹁ 𞤆𞤵𞤤𞤢𞤪 𞤲𞤺𞤢𞤤 𞤲𞤮 𞤸𞤢𞥄𞤤𞤫𞥅 𞤅𞤢𞤪𞤢𞤤𞤮𞤲⹁ 𞤘𞤭𞤲𞤫 𞤄𞤭𞤧𞤢𞤱𞤮⹁ 𞤘𞤢𞤥𞤦𞤭𞤴⹁ 𞤫 𞤃𞤢𞤤𞤭 𞤫 𞤅𞤫𞤲𞤫𞤺𞤢𞤤. 𞤑𞤢 𞤳𞤵𞥅𞤩𞤢𞤤 𞤲𞤮𞤲⹁ 𞤯𞤫𞤥𞤺𞤢𞤤 𞤆𞤵𞤤𞤢𞤪 𞤲𞤺𞤢𞤤 𞤲𞤮 𞤶𞤢𞥄𞤤𞤭𞥅 𞤫 𞤲𞤮𞤳𞥆𞤵𞥅𞤪𞤫 𞤴𞤢𞥄𞤶𞤵𞤲𞤣𞤫 𞤳𞤢 𞤖𞤭𞥅𞤪𞤲𞤢𞥄𞤲𞤺𞤫 𞤫 𞤳𞤢 𞤚𞤵𞤥𞤦𞤮 𞤀𞤊𞤪𞤭𞤳. 𞤑𞤮 𞤴𞤢𞤱𞤼𞤭 𞤺𞤵𞤶𞤵𞤲𞤫 𞥗𞥕 𞤴𞤭𞤥𞤩𞤫 𞤲𞤮 𞤲𞤮𞥅𞤼𞤮𞤪𞤢 𞤲𞤺𞤮𞥅𞤤 𞤤𞤫𞤻𞤮𞤤 𞤶𞤢𞥄𞤤𞤭𞥅𞤲𞤺𞤮𞤤 𞤫 𞤳𞤮 𞤴𞤢𞤱𞤼𞤭 𞤤𞤫𞤴𞤯𞤫 𞥒𞥐. 𞤅𞤮𞥅𞤧𞤮𞥅𞤪𞤫 𞤲𞤣𞤫𞤲 𞤳𞤢𞤻𞤵𞤲 𞤳𞤢𞤣𞤭 𞤲𞤮 𞤸𞤢𞥄𞤤𞤫𞥅 𞤼𞤮𞥅𞤲𞤭𞤲 𞤘𞤭𞤲𞤫⹁ 𞤸𞤢𞥄 𞤫 𞤲𞤣𞤫𞤪 𞤅𞤢𞤪𞤢𞤤𞤮𞤲. 𞤑𞤮𞤲𞤭𞤴𞤢𞤳𞤢𞥄𞤪𞤫 𞤲𞤣𞤫𞤲 𞤳𞤢𞤣𞤭⹁ 𞤲𞤣𞤫 𞤸𞤢𞥄𞤤𞤫𞤼𞤫 𞤑𞤮𞤼𞤣𞤭𞤾𞤢𞤪⹁ 𞤅𞤢𞤪𞤢𞤤𞤮𞤲 𞤫 𞤂𞤢𞤦𞤫𞤪𞤭𞤴𞤢.

𞤍𞤫𞥅 𞤯𞤫𞤥𞤯𞤫 𞤬𞤮𞤨 𞤲𞤮 𞤶𞤮𞤺𞤭𞥅 𞤨𞤫𞤰𞥆𞤭 𞤥𞤵𞤵𞤲⹁ 𞤪𞤫𞤲𞤣𞤮𞥅𞤶𞤭 𞤥𞤵𞤵𞤲 𞤫 𞤲𞤮𞥅𞤲𞤫 𞤲𞤮 𞤯𞤫 𞤱𞤫𞥅𞤩𞤭𞤼𞤭𞤪𞤼𞤢 𞤻𞤫𞥅𞤻𞤢𞤤 𞤥𞤢𞤶𞥆𞤫 𞤺𞤢𞤯𞤢 𞤤𞤫𞤴𞤣𞤭 𞤥𞤫𞤫𞤲 𞤲𞤣𞤭𞤲. 𞤑𞤮𞤲𞤮 𞤸𞤢𞤴 𞤧𞤭 𞤼𞤢𞤱𞤵𞤲𞤮 𞤺𞤮𞥅𞤼𞤢𞤤 𞤫 𞤯𞤫𞥅 𞤯𞤫𞤥𞤯𞤫 𞤳𞤮 𞤘𞤭𞤲𞤫 𞤼𞤢𞤲 𞤸𞤢𞥄𞤤𞤫𞤼𞤫𞥅⹁ 𞤯𞤵𞤥 𞤵𞤧𞤼𞤢𞤼𞤢𞥄 𞤸𞤢𞤴 𞤸𞤵𞥅𞤲𞤣𞤫 𞤫 𞤣𞤢𞤪𞤶𞤢 𞤥𞤢𞤺𞥆𞤢𞤤.

𞤖𞤮𞤤𞥆𞤵𞤺𞤮𞤤 𞤱𞤮𞤲𞤣𞤫𞤥𞤢 𞤯𞤫𞤥𞤺𞤢𞤤 𞤥𞤵𞤵𞤲 𞤳𞤮 «𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞥅𞤱𞤢𞤤» 𞤸𞤢𞤪𞤢 𞤲𞤮 𞤸𞤫𞥅𞤣𞤭𞤲𞤢 𞤯𞤫𞤴𞤢 𞤯𞤫𞤥𞤯𞤫 𞤫 𞤲𞤣𞤫𞤪 𞤳𞤫𞥅𞤪𞤮𞤤 𞤘𞤭𞤲𞤫 𞤲𞤺𞤮𞤤⹁ 𞤲𞤮 𞤸𞤮𞤤𞥆𞤭 𞤩𞤵𞤪𞤲𞤭𞤼𞤢𞥄𞤪𞤫 𞤲𞤣𞤫 𞤼𞤵𞥅𞤺𞤢𞥄𞤳𞤭 𞤫 𞤸𞤵𞥅𞤲𞤣𞤫. 𞤐𞤫𞤯𞥆𞤮 𞤳𞤢𞤤𞤢 𞤲𞤮 𞤱𞤢𞥄𞤱𞤭 𞤻𞤢𞥄𞤰𞤮𞤪𞤣𞤫 𞤯𞤫𞤥𞤺𞤢𞤤 𞤥𞤵𞤵𞤲⹁ 𞤱𞤢𞤤𞥆𞤭𞤼𞤮𞥅 𞤲𞤮 𞤲𞤺𞤢𞤤 𞤩𞤢𞤥𞤼𞤮𞤪𞤢 𞤸𞤢𞤪𞤢 𞤮𞤥𞤮 𞤪𞤮𞤳𞥆𞤭 𞤯𞤫𞤴𞤢 𞤯𞤫𞤥𞤯𞤫 𞤼𞤫𞤣𞥆𞤵𞤲𞥋𞤺𞤢𞤤 𞤺𞤮𞥅𞤼𞤢𞤤 𞤲𞤺𞤢𞤤.

𞤀𞤲𞤣𞤭𞤼𞤵𞤺𞤮𞤤 𞤲𞤣𞤫𞥅 𞤬𞤢𞤤𞤶𞤫𞤪𞤫 𞤥𞤢𞤳𞥆𞤮⹁ 𞤪𞤫𞤬𞤼𞤭 𞤬𞤫𞥅𞤱𞤲𞤭𞤼𞤢 𞤲𞤣𞤫 𞤴𞤫𞥅𞤧𞤮 𞤴𞤭𞤥𞤩𞤫 𞤩𞤫𞤲 𞤱𞤮𞤲𞤭 𞤼𞤫𞤣𞥆𞤵𞤲𞥋𞤺𞤢𞤤⹁ 𞤸𞤢𞤱𞤪𞤮𞤲’𞤣𞤭𞤪𞤲𞤺𞤢𞤤 𞤫 𞤥𞤭𞥅𞤶𞤮 𞤥𞤢𞤳𞥆𞤮 𞤬𞤭𞥅 𞤥𞤢𞤱𞤲𞤭𞤲𞤺𞤮𞤤 𞤯𞤫𞤥𞤯𞤫 𞤤𞤫𞤴𞤣𞤭 𞤥𞤫𞤫𞤲 𞤯𞤫𞤲 𞤬𞤮𞤨. 𞤅𞤮 𞤼𞤢𞤱𞤭𞥅 𞤳𞤮 𞤲𞤮𞥅𞤲 𞤱𞤮𞤲𞤭𞤪𞤭. 𞤑𞤮𞤲𞤮⹁ 𞤩𞤫𞥅 𞤲𞤶𞤮𞤬𞤮𞥅𞤩𞤫 𞤱𞤮𞤲𞤵𞤩𞤫 𞤧𞤵𞥅𞤴𞤲𞤵𞤣𞤫 𞤥𞤮 𞤴𞤮 𞤮 𞤷𞤢𞤼𞤮 𞤫 𞤯𞤭𞥅 𞤳𞤮𞤲𞤺𞤭⹁ 𞤥𞤢𞤤𞥆𞤢 𞤩𞤫𞥅 𞤱𞤮𞤲𞤵𞤩𞤫 𞤫𞤼𞤢𞥄𞤣𞤫 𞤲𞤮 𞤫𞤼𞤮𞤪𞤭 𞤱𞤮𞥅 𞤬𞤭𞥅 𞤣𞤢𞤤𞥆𞤭𞤲𞤺𞤮𞤤 𞤯𞤭⹁ 𞤩𞤫𞥅 𞤢𞤤𞤢𞥄 𞤱𞤢𞤤𞥆𞤵𞤣𞤫 𞤥𞤮 𞤸𞤢𞤴 𞤧𞤫𞥅𞤯𞤢. 𞤖𞤭𞤩𞤫 𞤱𞤮𞤯𞥆𞤭𞤲𞤼𞤭𞤲𞤣𞤫 𞤥𞤮 𞤫 𞤨𞤫𞥅𞤱𞤲𞤭𞤼𞤢𞤤 𞤱𞤢𞤤𞥆𞤭𞤼𞤮𞤼𞤮𞥅𞤲𞤺𞤢𞤤 𞤥𞤮 𞤣𞤫𞥅𞤰𞥆𞤭𞤲𞤣𞤫 𞤲𞤣𞤫𞥅 𞤣𞤵𞤳𞤮𞥅𞤪𞤫.

𞤑𞤢 𞤸𞤮𞤥𞤦𞤵𞤺𞤮𞤤⹁ 𞤣𞤢𞤤𞥆𞤭𞤲𞤮𞤪𞤺𞤮𞤤 𞤥𞤢𞤳𞥆𞤮 𞤱𞤮𞤲𞤣𞤫𞤥𞤢 𞤨𞤢𞤼𞤭 𞤥𞤢𞤳𞥆𞤮 𞤳𞤮 𞤆𞤵𞤤𞥆𞤮⹁ 𞤯𞤵𞤥 𞤵𞤧𞤼𞤢𞤼𞤢𞥄 𞤸𞤢𞤴 𞤸𞤵𞥅𞤲𞤣𞤫 𞤫 𞤲𞤣𞤫𞥅 𞤸𞤮𞤴𞤪𞤫 𞤲𞤣𞤫 𞤶𞤮 𞤸𞤮𞤤𞥆𞤭. 𞤋𞤱𞤣𞤭 𞤼𞤢𞤦𞤭𞤲𞤼𞤭𞤲𞤼𞤢𞥄 𞤧𞤫𞤤𞥆𞤵𞤺𞤮𞤤 𞤳𞤮𞤲𞤺𞤭 𞤥𞤢𞤤𞥆𞤢 𞤼𞤵𞥅𞤥𞤫. 𞤑𞤮 𞤳𞤮𞤲𞤺𞤭 𞤥𞤢𞤳𞥆𞤮 𞤯𞤭𞤲 𞤤𞤵𞥅𞤼𞤲𞤣𞤢𞥄⹁ 𞤳𞤮 𞤶𞤢𞥄𞤦𞤢𞤱𞤮𞤤 𞤥𞤢𞤶𞥆𞤭 𞤸𞤢𞤦𞥆𞤢𞥄.

𞤑𞤢 𞤼𞤭𞤺𞤭-𞤼𞤭𞤺𞤭 𞤲𞤮𞤲⹁ 𞤥𞤭 𞤬𞤫𞤤𞤢𞤼𞤢𞥄 𞤔𞤫𞤤𞤭 𞤑𞤢𞤦𞤢 𞤄𞤭𞤲𞤼𞤵 𞤳𞤮 𞤼𞤭𞥅𞤯𞤭⹁ 𞤬𞤭𞥅 𞤸𞤮𞤥𞤮 𞤤𞤫𞤧𞤭𞤲𞤯𞤭𞤲𞤭 𞤆𞤵𞤤𞤢𞤪 𞤲𞤺𞤢𞤤.

𞤔𞤫𞤤𞤭 𞤑𞤢𞤦𞤢 𞤄𞤭𞤲𞤼𞤵 𞤲𞤮 𞤴𞤭𞤥𞤭𞤣𞤭 𞤫 𞤃𞤋𞤒𞤀 𞤘𞤋𞤅𞤉⹁ 𞤣𞤫𞤦𞥆𞤮 𞤆𞤵𞤤𞥆𞤮 𞤥𞤮 𞤤𞤫𞤧𞤣𞤭 𞤅𞤫𞤲𞤫𞤺𞤢𞤤. 𞤉 𞤲𞤣𞤫𞤪 𞤲𞤺𞤮𞥅𞤤 𞤺𞤭𞤥𞤮𞤤⹁ 𞤸𞤢𞤴 𞤲𞤣𞤫 𞤱𞤮𞥅𞤼𞤫𞤪𞤫 𞤃𞤭𞤴𞤢 𞤘𞤭𞤧𞤫 𞤬𞤢𞤤𞤶𞤢𞥄𞤤𞤭⹁ 𞤸𞤢𞥄 𞤸𞤢𞥄𞤤𞤭 𞤆𞤵𞤤𞤢𞤪. 𞤑𞤮 𞤲𞤺𞤮𞥅𞤤 𞤺𞤢𞤤𞥆𞤮𞤤 𞤤𞤫 𞤩𞤵𞤪𞤭 𞤺𞤢𞤤𞥆𞤭 𞤯𞤭 𞤔𞤫𞤤𞤭 𞤑𞤢𞤦𞤢 𞤄𞤭𞤲𞤼𞤵 𞤱𞤢𞤯𞤭 𞤯𞤭𞤲 𞤬𞤮𞤨 𞤤𞤮𞤤𞥆𞤵𞤣𞤫 𞤳𞤢 𞤒𞤵𞥅𞤚𞤵𞤦. 𞤐𞤺𞤮𞤤 𞤸𞤫𞤩𞤭𞥅 𞤳𞤮 𞤴𞤢𞤱𞤼𞤭 𞤺𞤵𞤶𞤵𞤲𞤫 𞥗𞥐 𞤲𞤣𞤢𞥄𞤪𞤢𞤲𞤯𞤫.

𞤔𞤮𞥅𞤲𞤭⹁ 𞤧𞤭 𞤃𞤭𞤴𞤢 𞤘𞤭𞤧𞤫⹁ 𞤆𞤵𞤤𞥆𞤮 𞤮𞤲⹁ 𞤸𞤮𞤤𞥆𞤭𞥅 𞤸𞤢𞥄𞤶𞤢𞥄𞤳𞤢 𞤴𞤭𞤥𞤵𞤺𞤮𞤤 𞤫 𞤆𞤵𞤤𞤢𞤪⹁ 𞤸𞤮𞤤 𞤳𞤮 𞤧𞤭𞤳𞥆𞤭𞤲𞤼𞤢 𞤔𞤫𞤤𞤭 𞤑𞤢𞤦𞤢 𞤄𞤭𞤲𞤼𞤵 𞤱𞤮𞤲𞤣𞤫𞤥𞤢 𞤆𞤵𞤤𞤢𞤪 𞤲𞤮 𞤸𞤭𞤼𞥆𞤭 𞤺𞤢𞥄𞤲𞤭𞤲 𞤘𞤭𞤲𞤫؟ 𞤚𞤫𞥅𞤽𞤼𞤭𞤲𞤭𞥅 𞤧𞤮 𞤼𞤢𞤱𞤭𞥅 𞤳𞤮 𞤬𞤵𞤤𞤩𞤫 𞤘𞤭𞤲𞤫 𞤩𞤫𞤲 𞤼𞤢𞤲⹁ 𞤱𞤢𞤲𞤮 𞤅𞤢𞤴𞤬𞤮𞤲 𞤫 𞤖𞤢𞤦𞤭𞥅𞤦𞤵 𞤊𞤢𞤼𞤢𞤳𞤮𞥅⹁ 𞤱𞤢𞤯𞤭𞤣𞤭 𞤫 𞤥𞤢𞤳𞥆𞤮 𞤺𞤭𞤥𞤭 𞤫 𞤆𞤵𞤤𞤢𞤪.

𞤅𞤭 𞤢 𞤼𞤫𞤣𞥆𞤭𞤲𞤢𞥄𞤤𞤭 𞤸𞤮𞥅𞤪𞤫 𞤥𞤢𞥄𞤯𞤢 𞤢 𞤼𞤫𞤣𞥆𞤢𞤼𞤢𞥄. 𞤖𞤢𞤴 𞤧𞤮 𞤼𞤢𞤱𞤭𞥅 𞤔𞤫𞤤𞤭 𞤑𞤢𞤦𞤢 𞤄𞤭𞤲𞤼𞤮 𞤲𞤮 𞤬𞤫𞤤𞤲𞤭𞥅 𞤫 𞤴𞤫𞤱𞤼𞤫𞤪𞤫 𞤥𞤢𞤳𞥆𞤮 𞤲𞤣𞤫𞤲⹁ 𞤃𞤭𞤴𞤢 𞤘𞤭𞤧𞤫 𞤲𞤮 𞤼𞤢𞤱𞤢𞥄 𞤫 𞤸𞤮𞤤𞥆𞤵𞤩𞤫 𞤥𞤮 𞤩𞤫𞤲 𞤱𞤮𞤲𞤣𞤫𞤥𞤢 𞤆𞤵𞤤𞤢𞤪 𞤲𞤺𞤢𞤤 𞤸𞤭𞤼𞥆𞤢𞥄 𞤬𞤮𞤼𞤢 𞤼𞤮𞥅𞤲𞤭𞤲 𞤘𞤭𞤲𞤫.

𞤀𞤦𞤣𞤵𞤤𞥆𞤢𞥄𞤸𞤭 𞤔 𞤄𞤢𞤪𞤭