𞤐𞤀𞤊𞤌𞥅𞤔𞤉 𞤖𞤌𞥅𞤈𞤓𞤘𞤌𞤂

𞤐𞤢𞤬𞤮𞥅𞤶𞤫 𞤳𞤮𞥅𞤪𞤳𞤢 𞤯𞤫𞤲

𞤖𞤮𞥅𞤪𞤵𞤺𞤮𞤤 𞤲𞤮 𞤥𞤢𞤪𞤭 𞤲𞤢𞤬𞤮𞥅𞤶𞤫 𞤯𞤵𞥅𞤯𞤵𞤯𞤫 𞤯𞤫 𞤤𞤭𞤥𞤼𞤮𞤼𞤢𞥄𞤳𞤮. 𞤖𞤢𞤳𞥆𞤫𞤪𞤫𞤲 𞤸𞤮𞥅𞤪𞤵𞤺𞤮𞤤 𞤲𞤮 𞤸𞤫𞥅𞤱𞤭 𞤲𞤢𞤬𞤢⹁ 𞤶𞤮𞥅𞤲𞤭 𞤳𞤮𞥅𞤪𞤳𞤢 𞤳𞤢𞤲 𞤲𞤮 𞤼𞤢𞤱𞤢𞥄 𞤫 𞤤𞤫𞤳𞥆𞤫𞥅𞤤𞤫 𞤯𞤫 𞤧𞤢𞤬𞤪𞤮𞥅𞤩𞤫 𞤩𞤫𞤲 𞤱𞤭𞤲𞤣𞤢𞤲𞤼𞤢 𞤯𞤫𞤲 𞤲𞤢𞥄𞤱𞤲𞤵𞤩𞤫 𞤩𞤫𞤲 𞤬𞤭𞥅 𞤲𞤮 𞤩𞤫 𞤲𞤣𞤭𞤳𞥆𞤭𞤪𞤢.

𞤑𞤢 𞤦𞤢𞤲𞤽𞤫 𞤣𞤭𞥅𞤲𞤢 𞤳𞤢𞤣𞤭⹁ 𞤸𞤮𞥅𞤪𞤵𞤺𞤮𞤤 𞤱𞤮𞤲𞤢𞥄 𞤫 𞤶𞤵𞥅𞤤𞤩𞤫 𞤩𞤫𞤲 𞤼𞤵𞤲 𞤱𞤢𞤯𞥆𞤭𞤲𞤢𞥄. 𞤐𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤘𞤫𞤲𞤮 𞤮𞤲 𞤼𞤢𞤺𞤭 𞤫𞤲⹁ 𞤥𞤮𞤰𞥆𞤭𞤲𞤭 𞤩𞤢𞤤𞥆𞤭 𞤥𞤫𞤫𞤲⹁ 𞤳𞤮 𞤑𞤢𞤲𞤳𞤮 𞤢𞤲𞤣𞤭 𞤳𞤮 𞤥𞤮𞤰𞥆𞤢𞤲𞤭 𞤫𞤲 𞤫 𞤳𞤮 𞤥𞤮𞤰𞥆𞤢𞤲𞤭 𞤩𞤢𞤤𞥆𞤭 𞤥𞤫𞤫𞤲. 𞤑𞤮 𞤯𞤵𞤥 𞤱𞤢𞤯𞤭 𞤧𞤭 𞤮 𞤱𞤢𞤯𞥆𞤭𞤲𞤭 𞤳𞤮𞥅𞤪𞤳𞤢 𞤸𞤮𞥅𞤪𞤫 𞤥𞤫𞤫𞤲 𞤧𞤢𞤦𞤵𞤲𞤢 𞤌𞤥𞤮 𞤢𞤲𞤣𞤭 𞤱𞤮𞤲𞤣𞤫𞤥𞤢 𞤳𞤮𞥅𞤪𞤳𞤢⹁ 𞤲𞤮 𞤱𞤮𞥅𞤲𞤣𞤢𞤲𞤭 𞤫𞤲 𞤫 𞤲𞤢𞤬𞤮𞥅𞤶𞤫 𞤯𞤵𞥅𞤯𞤵𞤯𞤫 𞤳𞤢 𞤦𞤢𞤲𞤽𞤫 𞤷𞤫𞤤𞥆𞤢𞤤 (𞤲𞤶𞤢𞤥𞤵) 𞤫 𞤳𞤢 𞤣𞤫𞤱𞤢𞤤. 𞤀𞤣𞤮 𞤋𞤧𞤤𞤢𞥄𞤥𞤵 𞤳𞤢𞤣𞤭⹁ 𞤴𞤭𞤥𞤩𞤫 𞤩𞤫𞤲 𞤱𞤢𞤯𞥆𞤭𞤲𞤢𞤲𞤮 𞤸𞤮𞥅𞤪𞤵𞤺𞤮𞤤. 𞤊𞤭𞥅 𞤳𞤮𞥅𞤪𞤳𞤢 𞤳𞤢𞤲 𞤲𞤮 𞤴𞤫𞤱𞤼𞤢𞥄 𞤳𞤢 𞤂𞤭𞤲𞤶𞤭𞥅𞤤𞤢 𞤫 𞤳𞤢 𞤚𞤢𞤱𞤈𞤫𞤱𞤼𞤢 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮𞥅𞤪𞤳𞤢 𞤳𞤢𞤲 𞤲𞤮 𞤱𞤮𞤲𞤣𞤭 𞤫 𞤥𞤮𞤰𞥆𞤫 𞤱𞤮𞤲𞤢𞤲𞤣𞤫 𞤲𞤫𞤯𞥆𞤢𞤲𞤳𞤫.

𞤒𞤮𞤺𞤢 𞤫 𞤲𞤢𞤬𞤮𞥅𞤶𞤫 𞤳𞤮𞥅𞤪𞤳𞤢:

𞤑𞤮𞥅𞤪𞤳𞤢 𞤩𞤫𞤴𞤣𞤢𞤴 𞤣𞤵𞥅𞤩𞤭 𞤲𞤫𞤱𞤭𞤲𞤢 𞤲𞤺𞤵𞥅𞤪𞤣𞤢𞤥 𞤲𞤫𞤯𞥆𞤮

𞤃𞤮 𞤲𞤢𞤲𞤭𞥅 𞤯𞤵𞤥⹁ 𞤮𞤲𞤼𞤭𞤺𞤭 𞤱𞤭𞤢𞤴  “𞤸𞤮𞤤 𞤲𞤮 𞤯𞤵𞤥 𞤱𞤮𞤲𞤭𞤪𞤭؟ 

𞥟 𞤐𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤻𞤢𞥄𞤥𞤵𞤺𞤮𞤤 𞤱𞤵𞥅𞤪𞤲𞤢𞤼𞤢⹁ 𞤥𞤮 𞤸𞤢𞤯𞤭𞤼𞤭𞤳𞤫 𞤲𞤮𞤲 𞤻𞤢𞥄𞤥𞤣𞤵⹁ 𞤸𞤮𞤤 𞤲𞤮 𞤲𞤺𞤵𞥅𞤪𞤣𞤢𞤥 𞤮𞤲𞤼𞤭𞤺𞤭 𞤶𞤵𞥅𞤼𞤭𞤪𞤼𞤢 ؟”  

𞤐𞤮 𞤱𞤮𞥅𞤣𞤭 𞤧𞤢𞤦𞤢𞥄𞤦𞤵𞥅𞤶𞤭 𞤯𞤵𞥅𞤯𞤵𞤯𞤭 𞤱𞤢𞤯𞤢𞤴𞤯𞤭 𞤸𞤢𞥄 𞤳𞤮𞥅𞤪𞤳𞤢 𞤶𞤵𞥅𞤼𞤭𞤲𞤢 𞤲𞤺𞤵𞥅𞤪𞤣𞤢𞤥. 𞤐𞤮 𞤼𞤢𞤱𞤢𞥄 𞤫 𞤳𞤮 𞤩𞤵𞤪𞤭 𞤼𞤫𞤲𞤼𞤵𞤣𞤫 𞤫 𞤯𞤭𞤲: 𞤴𞤢𞥄𞤱𞤲𞤵𞤺𞤮𞤤 𞤱𞤢𞤴𞤤𞤢𞤺𞤮𞤤 𞤻𞤢𞥄𞤥𞤣𞤵 𞤲𞤣𞤵𞤲 𞤳𞤢 𞤲𞤣𞤫𞤪 𞤪𞤫𞥅𞤣𞤵 𞤸𞤢𞥄 𞤻𞤢𞤲𞤲𞤣𞤵 𞤲𞤣𞤵𞤲 𞤱𞤮𞤲𞤼𞤢 𞤳𞤵𞤧𞤫𞤤 (𞤼𞤫𞥅𞤱𞤵) 𞤫 𞤰𞤭𞥅𞤰𞤢𞤥. 𞤑𞤮 𞤲𞤺𞤮𞤲 𞤱𞤢𞤴𞤤𞤮 𞤭𞤲𞥆𞤫𞤼𞤫𞥅 (𞤥𞤫𞤼𞤢𞤦𞤮𞤤𞤢𞥄𞤳𞤵) 𞤳𞤢 𞤘𞤫𞥅𞤣𞤢𞤲𞤳𞤮𞥅𞤪𞤫. 

𞤐𞤮 𞤲𞤫𞤯𞥆𞤮 𞤮𞤲 𞤲𞤢𞤱𞤴𞤭𞤪𞤼𞤢 𞤲𞤮𞤲⹁ 𞤳𞤮 𞤲𞤮𞤲 𞤥𞤫𞤼𞤢𞤦𞤮𞤤𞤢𞥄𞤳𞤵 𞤥𞤢𞤳𞥆𞤮 𞤲𞤺𞤵𞤲 𞤵𞤧𞤼𞤮𞤪𞤼𞤢. 𞤅𞤭 𞤥𞤫𞤼𞤢𞤦𞤮𞤤𞤢𞥄𞤳𞤵 𞤲𞤺𞤵𞤲 𞤲𞤮 𞤵𞤧𞤼𞤢𞥄𞤣𞤫⹁ 𞤳𞤮 𞤲𞤮𞤲 𞤳𞤢𞤣𞤭 𞤳𞤵𞤷𞥆𞤫 𞤯𞤫𞤲 𞤥𞤢𞤤𞥆𞤢 𞤼𞤫𞥅𞤱𞤵 𞤲𞤺𞤵𞤲 𞤵𞤧𞤼𞤮𞤪𞤼𞤢 𞤫 𞤩𞤢𞤤𞤲𞤣𞤵 𞤥𞤢𞤳𞥆𞤮 𞤲𞤣𞤵𞤲. 𞤑𞤮 𞤯𞤵𞤥 𞤱𞤢𞤯𞤭 𞤧𞤭 𞤩𞤢𞤤𞥆𞤭 𞤲𞤢𞤴𞤫𞥅𞤩𞤫 𞤩𞤫𞤲 𞤲𞤮 𞤻𞤵𞤯𞤭𞥅⹁ 𞤺𞤵𞤪𞤭𞤤 𞤲𞤺𞤭𞤤 𞤲𞤮 𞤢𞤷𞥆𞤭𞤼𞤭𞥅⹁ 𞤴𞤵𞤨𞥆𞤭𞤼𞤭𞥅.

𞤑𞤮𞥅𞤪𞤳𞤢 𞤳𞤢𞤲 𞤲𞤫𞥅𞤩𞤲𞤭𞤼𞤢𞤴 𞤲𞤢𞤴𞤫𞤱𞤵 𞤲𞤺𞤵𞤲⹁ 𞤧𞤢𞤦𞤵 𞤳𞤢 𞤩𞤫𞤴𞤣𞤢𞤴 𞤥𞤫𞤼𞤢𞤦𞤮𞤤𞤢𞥄𞤳𞤵 𞤲𞤺𞤵𞤲. 𞤑𞤢𞤣𞤭⹁ 𞤲𞤮 𞤲𞤫𞤯𞥆𞤮 𞤮𞤲 𞤲𞤢𞤱𞤴𞤭𞤪𞤼𞤢 𞤲𞤮𞤲⹁ 𞤳𞤮 𞤲𞤮𞤲 𞤳𞤢𞤣𞤭 𞤺𞤫𞥅𞤰𞤭 𞤩𞤢𞤤𞤲𞤣𞤵 𞤯𞤭𞤲 𞤲𞤢𞤱𞤴𞤭𞤪𞤼𞤢⹁ 𞤯𞤭 𞤧𞤮𞤱𞤮𞤲’𞤣𞤭𞤪𞤢 𞤫 𞤲𞤣𞤫𞤪 𞤩𞤢𞤤𞤲𞤣𞤵 𞤮𞤲𞤼𞤭𞤺𞤭 𞤲𞤣𞤵𞤲. 𞤑𞤮𞥅𞤪𞤳𞤢 𞤳𞤢𞤲 𞤲𞤮𞤲 𞤱𞤢𞤤𞥆𞤢𞤴 𞤩𞤢𞤤𞤲𞤣𞤵 𞤲𞤣𞤵𞤲 𞤲𞤮 𞤲𞤣𞤵 𞤧𞤫𞥅𞤣𞤭𞤪𞤢 𞤫 𞤯𞤭𞤲 𞤺𞤫𞥅𞤰𞤭 𞤳𞤭𞤯𞥆𞤭⹁ 𞤤𞤮𞤲𞤼𞤭𞤲𞤭𞤪𞤢 𞤯𞤭 𞤺𞤫𞥅𞤰𞤭 𞤳𞤫𞤧𞤭 𞤧𞤫𞤤𞥆𞤵𞤯𞤭.

𞤑𞤮 𞤯𞤭𞥅 𞤺𞤫𞥅𞤰𞤭 𞤱𞤮𞤲𞤭 𞤬𞤭𞥅 𞤳𞤢𞤤𞤢 𞤳𞤮 𞤱𞤵𞥅𞤪𞤭 𞤫 𞤼𞤢𞤺𞤫𞥅𞤬𞤮 𞤲𞤺𞤮𞤲. 𞤑𞤮 𞤳𞤢𞤲𞤶𞤭 𞤥𞤮𞤰𞥆𞤭𞤲𞤼𞤢 𞤳𞤢𞤤𞤢 𞤳𞤮 𞤱𞤮𞤲𞤭 𞤫 𞤲𞤣𞤫𞤪 𞤲𞤫𞤯𞥆𞤢𞤲𞤳𞤫⹁ 𞤫 𞤳𞤵𞤤𞥆𞤫 𞤫 𞤨𞤵𞤯𞤭. 𞤐𞤫𞤯𞥆𞤮 𞤳𞤢𞤤𞤢 𞤲𞤮 𞤥𞤢𞤪𞤭 𞤣𞤵𞤶𞤵𞤲𞤫 (𞤥𞤭𞤤𞤭𞤴𞤢𞥄𞤪𞤶𞤭) 𞤺𞤫𞥅𞤰𞤭 𞤳𞤢 𞤲𞤣𞤫𞤪 𞤩𞤢𞤤𞤲𞤣𞤵 𞤥𞤵𞤵𞤲. 𞤐𞤮 𞤮𞤲𞤼𞤭𞤺𞤭 𞤲𞤢𞤱𞤴𞤭𞤪𞤼𞤢 𞤲𞤮𞤲⹁ 𞤯𞤭𞥅 𞤺𞤫𞥅𞤰𞤭 𞤵𞤧𞤼𞤮𞤪𞤼𞤢.

𞤑𞤮𞥅𞤪𞤳𞤢 𞤳𞤢𞤣𞤭 𞤱𞤮𞤲𞤢𞤴 𞤧𞤢𞤦𞤵 𞤸𞤢𞥄 𞤲𞤺𞤢𞥄𞤲𞤣𞤭 𞤲𞤣𞤭𞤲 𞤴𞤢𞤥𞤭𞤪𞤢 𞤺𞤫𞥅𞤰𞤭 𞤯𞤭𞤲 𞤴𞤮 𞤯𞤭 𞤧𞤭𞤲𞤼𞤭𞤲 𞤳𞤢 𞤲𞤣𞤫𞤪  𞤩𞤢𞤤𞤲𞤣𞤵⹁ 𞤫𞤲𞤯𞤢𞤥 𞤥𞤢𞤤𞥆𞤢 𞤸𞤮𞤪𞤥𞤮𞥅𞤲𞤢𞤥 𞤧𞤫𞤥𞤦𞤭𞤲𞤢𞤴𞤯𞤢𞤲 𞤮𞤲𞤼𞤭𞤺𞤭⹁ 𞤼𞤭𞥅𞤯𞤭𞤲𞤢 𞤰𞤭𞤴𞤫 𞤥𞤢𞤳𞥆𞤮 𞤯𞤫𞤲. 

𞤑𞤮 𞤯𞤭𞥅 𞤬𞤮𞥅𞤬 𞤧𞤢𞤦𞤭𞤲𞤼𞤢 𞤩𞤫𞤴𞤣𞤢𞤺𞤮𞤤 𞤷𞤫𞤤𞥆𞤢𞤤 𞤮𞤲𞤼𞤭𞤺𞤭 𞤲𞤺𞤢𞤤. 𞤅𞤭 𞤷𞤫𞤤𞥆𞤢𞤤 𞤩𞤫𞤴𞤣𞤭𞤳𞤫⹁ 𞤲𞤺𞤵𞤪𞤣𞤢𞤥 𞤯𞤢𞤲 𞤲𞤫𞤱𞤮𞤼𞤮.

𞤑𞤮𞥅𞤪𞤳𞤢 𞤯𞤵𞤴𞤼𞤢𞤴 𞤼𞤮𞥅𞤳𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵 

𞤙𞤢𞥄𞤥𞤤𞤭 𞤯𞤵𞥅𞤯𞤵𞤯𞤭 𞤯𞤭 𞤼𞤢𞤱𞤢𞤼𞤢 𞤫𞤯𞤫𞤲 𞤻𞤢𞥄𞤥𞤢 𞤲𞤮 𞤱𞤮𞤲𞤣𞤭 𞤫 𞤼𞤮𞥅𞤳𞤫 𞤯𞤫 𞤥𞤮𞤰𞥆𞤢𞤲𞤢𞥄 𞤲𞤫𞤯𞥆𞤢𞤲𞤳𞤫. 𞤍𞤫𞤲 𞤼𞤮𞥅𞤳𞤫 𞤲𞤮 𞤭𞤱𞤢 𞤺𞤭𞤤𞤢 𞤫 𞤻𞤮𞤤𞤵 𞤸𞤵𞥅𞤱𞤼𞤮𞤪𞤢𞥄𞤲𞤺𞤵 𞤲𞤺𞤵𞤲 𞤳𞤢 𞤣𞤫𞤥𞤢𞤤 𞤸𞤢𞥄 𞤫 𞤲𞤮𞤳𞥆𞤵 𞤳𞤢 𞤻𞤢𞥄𞤥𞤤𞤭 𞤯𞤭𞤲 𞤥𞤮𞤰𞥆𞤭𞤲𞤼𞤫𞥅 𞤯𞤮𞤲. 𞤚𞤮𞥅𞤳𞤫 𞤯𞤫𞤲 𞤲𞤮 𞤭𞤱𞤢 𞤳𞤢𞤣𞤭 𞤳𞤢 𞤻𞤢𞤥𞤤𞤭 𞤯𞤭𞤲 𞤤𞤮𞥅𞤱𞤫𞤼𞤫𞥅 𞤯𞤮𞤲 𞤫 𞤳𞤮 𞤯𞤭 𞤤𞤮𞥅𞤱𞤫𞤼𞤫𞥅 𞤳𞤮𞤲 𞤫 𞤥𞤵𞤵𞤲. 𞤅𞤭 𞤲𞤫𞤯𞥆𞤮 𞤲𞤮 𞤸𞤮𞥅𞤪𞤵𞤣𞤫⹁ 𞤳𞤮 𞤸𞤫𞥅𞤱𞤭 𞤫 𞤯𞤫𞤲 𞤼𞤮𞥅𞤳𞤫 𞤴𞤢𞤤𞤼𞤢𞤴 𞤫 𞤲𞤣𞤫𞤪 𞤩𞤢𞤤𞤲𞤣𞤵 𞤥𞤢𞤳𞥆𞤮 𞤲𞤣𞤵𞤲.

 𞤑𞤮𞥅𞤪𞤳𞤢 𞤯𞤵𞤴𞤼𞤢𞤴 𞤩𞤫𞤤𞥆𞤫𞤪𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵 

𞤅𞤭 𞤲𞤫𞤯𞥆𞤮 𞤻𞤢𞥄𞤥𞤭𞥅⹁ 𞤳𞤮 𞤮 𞤻𞤢𞥄𞤥𞤭 𞤳𞤮𞤲 𞤤𞤢𞥄𞤼𞤢𞤲𞤼𞤮 𞤩𞤢𞤤𞤣𞤵 𞤥𞤢𞤳𞥆𞤮 𞤲𞤣𞤵𞤲⹁ 𞤧𞤵𞤥𞤮𞤶𞤢𞤥 𞤥𞤢𞤤𞥆𞤢 𞤳𞤵𞤩𞥆𞤢𞤥 𞤳𞤮 𞤲𞤣𞤵 𞤧𞤵𞤥𞤲𞤢. 𞤑𞤮𞤲𞤮 𞤧𞤭 𞤻𞤢𞥄𞤥𞤣𞤵 𞤲𞤣𞤵𞤲 𞤯𞤵𞥅𞤯𞤭𞥅 𞤩𞤵𞤪𞤭𞥅 𞤳𞤮 𞤩𞤢𞤤𞤲𞤣𞤵 𞤲𞤣𞤵𞤲 𞤸𞤢𞤼𞤮𞤲𞤶𞤭𞤲𞤭 𞤳𞤮𞤲 𞤫 𞤥𞤵𞤵𞤲⹁ 𞤸𞤫𞤣𞥆𞤭𞥅𞤯𞤵𞤲 𞤯𞤵𞤲 𞤱𞤮𞤲𞤼𞤢𞤴 𞤩𞤫𞤤𞥆𞤫𞤪𞤫. 𞤐𞤣𞤫𞤲 𞤩𞤫𞤤𞥆𞤫𞤪𞤫 𞤥𞤢𞤪𞤮𞤼𞤮 𞤳𞤢 𞤲𞤣𞤫𞤪 𞤩𞤢𞤤𞤲𞤣𞤵 𞤸𞤢𞥄 𞤻𞤢𞤤𞤲𞤣𞤫 𞤩𞤢𞤤𞤲𞤣𞤵 𞤲𞤣𞤵𞤲 𞤸𞤢𞤼𞤮𞤲𞤶𞤭𞤲𞤭 𞤫 𞤥𞤢𞤴𞤪𞤫. 𞤑𞤮𞤲𞤮 𞤧𞤮 𞤲𞤫𞤯𞥆𞤮 𞤮𞤲 𞤲𞤮 𞤸𞤮𞥅𞤪𞤭 𞤸𞤢𞤪𞤢𞤴 𞤻𞤢𞤥𞤣𞤵 𞤢𞤤𞤢𞥄 𞤳𞤮 𞤩𞤢𞤤𞤲𞤣𞤵 𞤲𞤣𞤵𞤲 𞤧𞤵𞤥𞤲𞤢. 𞤌𞤲𞤼𞤵𞤥𞤢⹁ 𞤩𞤢𞤤𞤲𞤣𞤵 𞤲𞤣𞤵𞤲 𞤬𞤵𞤯𞥆𞤮𞤼𞤮 𞤳𞤭𞤧𞤢𞤲 𞤧𞤵𞤥𞤲𞤵𞤺𞤮𞤤 𞤩𞤫𞤤𞥆𞤫𞤪𞤫 𞤥𞤢𞤪𞤭𞤲𞤮𞥅𞤲𞤣𞤫 𞤲𞤣𞤫𞤲 𞤫 𞤲𞤣𞤫𞤪 𞤥𞤢𞤴𞤪𞤵.

𞤑𞤮𞥅𞤪𞤳𞤢 𞤬𞤭𞤲𞤣𞤭𞤲𞤢𞤴 𞤲𞤺𞤢𞥄𞤲𞤣𞤭 𞤩𞤫𞤴𞤣𞤢 𞤲𞤺𞤫𞥅𞤼𞤵 

𞤑𞤮𞥅𞤪𞤳𞤢 𞤳𞤢𞤲 𞤱𞤢𞤤𞥆𞤢𞤴 𞤲𞤫𞤯𞥆𞤮 𞤣𞤢𞤯𞤵𞤺𞤮𞤤 𞤬𞤫𞥅𞤼𞤫𞤪𞤫 𞤫 𞤱𞤭𞤤𞤢𞥄𞤪𞤫 𞤫 𞤵𞤧𞤼𞤢𞥄𞤣𞤫 𞤲𞤺𞤫𞥅𞤼𞤵 𞤥𞤢𞤤𞥆𞤢 𞤸𞤢𞤳𞥆𞤭𞤤. 𞤅𞤢𞤦𞤵 𞤳𞤮𞥅𞤪𞤳𞤢 𞤳𞤢𞤲 𞤲𞤫𞥅𞤩𞤲𞤭𞤼𞤢𞤴 𞤴𞤫𞥅𞤦𞤢𞤺𞤮𞤤 𞤺𞤫𞥅𞤰𞤭 𞤲𞤺𞤢𞥄𞤲𞤣𞤭 𞤯𞤭𞤲. 𞤖𞤮𞥅𞤪𞤵𞤺𞤮𞤤 𞤱𞤮𞤲𞤢𞤴 𞤳𞤢𞤣𞤭 𞤧𞤢𞤦𞤵 𞤴𞤮 𞤺𞤫𞥅𞤰𞤭 𞤳𞤫𞤧𞤭 𞤩𞤫𞤴𞤣𞤢𞤲𞤮 𞤲𞤺𞤢𞥄𞤲𞤣𞤭 𞤲𞤣𞤭𞤲.  

 𞤑𞤮𞥅𞤪𞤳𞤢 𞤧𞤫𞤥𞤦𞤭𞤲𞤢𞤴 𞤣𞤢𞤯𞤭𞤼𞤮𞤪𞤯𞤫 𞤩𞤢𞤤𞤲𞤣𞤵 𞤲𞤣𞤵𞤲

 𞤒𞤢𞤤𞥆𞤭 𞤮𞤯𞤮𞤲 𞤢𞤲𞤣𞤭 𞤸𞤮𞤤 𞤳𞤮 𞤱𞤢𞤯𞤭 𞤲𞤢𞤱𞤲𞤵𞤯𞤮 𞤴𞤭𞤯𞤢𞥄 𞤻𞤢𞥄𞤥𞤵𞤺𞤮𞤤؟ 𞤍𞤵𞤥 𞤳𞤮 𞤳𞤢 𞤲𞤺𞤢𞥄𞤲𞤣𞤭 𞤭𞤥𞥆𞤮𞤪𞤭. 𞤑𞤮 𞤲𞤺𞤢𞥄𞤲𞤣𞤭 𞤲𞤣𞤭𞤲 𞤱𞤮𞤲𞤭 𞤴𞤢𞤥𞤭𞤪𞤣𞤫 𞤩𞤢𞤤𞤲𞤣𞤵 𞤲𞤣𞤵𞤲 𞤴𞤮 𞤲𞤣𞤵 𞤧𞤢𞤤𞤮 𞤻𞤢𞥄𞤥𞤣𞤵 𞤬𞤭𞥅 𞤲𞤮 𞤲𞤣𞤵 𞤸𞤭𞤤𞤲𞤮𞤪𞤢 𞤸𞤢𞤩𞤵𞤺𞤮𞤤 𞤲𞤢𞤱𞤲𞤢𞥄𞤪𞤫 𞤲𞤣𞤫𞤲 𞤼𞤵𞤲. 𞤍𞤵𞤲 𞤳𞤮 𞤬𞤭𞥅 𞤱𞤮𞤼𞤢 𞤣𞤮𞥅𞤤𞤫 𞤩𞤢𞤤𞤲𞤣𞤵 𞤲𞤣𞤵𞤲 𞤧𞤫𞤲𞤣𞤭𞤼𞤮 𞤸𞤢𞤳𞥆𞤵𞤲’𞤣𞤫  𞤱𞤢𞤴𞤤𞤵𞤺𞤵𞤤 𞤻𞤢𞤥𞤣𞤵 𞤫 𞤸𞤢𞤩𞤵𞤺𞤮𞤤 𞤻𞤢𞤱𞤵. 

𞤚𞤢𞤰𞤭𞤪𞤺𞤮𞤤 𞤳𞤮𞥅𞤪𞤳𞤢 𞤳𞤢𞤲 𞤣𞤭𞤥𞤯𞤫 𞤤𞤫𞤯𞥆𞤫 𞤩𞤵𞤪𞤭 𞤱𞤮𞤲𞤣𞤵𞤣𞤫 𞤫 𞤲𞤢𞤬𞤮𞥅𞤪𞤫 .

𞤑𞤮𞥅𞤪𞤳𞤢 𞤸𞤫𞤷𞥆𞤭𞤲𞤯𞤭𞤲𞤢𞤴 𞤺𞤵𞤪𞤭𞤤 𞤲𞤺𞤭𞤤 𞤳𞤢𞤻𞤵𞤲 𞤫 𞤩𞤢𞤤𞤲𞤣𞤵 𞤲𞤣𞤵𞤲

𞤐𞤣𞤫 𞤼𞤢𞤱𞤵𞤲𞤮𞥅 𞤳𞤮𞥅𞤪𞤳𞤢 𞤳𞤢𞤲 𞤸𞤫𞥅𞤯𞤭𞤲𞤼𞤭𞤲𞤢𞤴 𞤺𞤫𞥅𞤰𞤭 𞤩𞤢𞤤𞤲𞤣𞤵⹁ 𞤱𞤢𞤤𞥆𞤭𞤼𞤮𞥅 𞤲𞤣𞤵 𞤳𞤢𞤣𞤭 𞤲𞤮 𞤲𞤣𞤵 𞤧𞤫𞥅𞤣𞤭𞤪𞤢 𞤫 𞤼𞤮𞥅𞤳𞤫⹁ 𞤯𞤵𞤲 𞤯𞤮𞤲 𞤱𞤮𞤦𞤢𞤴 𞤧𞤢𞤦𞤵 𞤸𞤫𞤷𞥆𞤵𞤯𞤵𞤺𞤮𞤤 𞤺𞤵𞤪𞤭𞤤 𞤲𞤺𞤭𞤤. 𞤅𞤭 𞤺𞤵𞤪𞤭𞤤 𞤲𞤺𞤭𞤤 𞤸𞤫𞤷𞥆𞤭𞤯𞤭𞥅⹁ 𞤲𞤺𞤭𞤤 𞤸𞤫𞤲𞤼𞤮𞤼𞤮⹁ 𞤲𞤺𞤭𞤤 𞤶𞤢𞤤𞤦𞤢. 𞤍𞤵𞤲 𞤳𞤮 𞤥𞤢𞥄𞤲𞤣𞤫 𞤫 𞤥𞤢𞥄𞤲𞤣𞤫𞥅𞤶𞤭 𞤷𞤫𞤤𞥆𞤢𞤤.

 𞤑𞤮𞥅𞤪𞤳𞤢 𞤱𞤢𞤤𞥆𞤢𞤴 𞤲𞤫𞤯𞥆𞤮 𞤣𞤢𞤯𞤵𞤺𞤮𞤤 𞤲𞤢𞥄𞤱𞤲𞤢𞥄𞤶𞤫 𞤥𞤢𞤱𞤯𞤫

𞤐𞤮 𞤼𞤢𞤱𞤢𞥄 𞤫 𞤯𞤫𞤲 𞤲𞤢𞥄𞤱𞤲𞤢𞥄𞤶𞤫 𞤻𞤢𞤱𞤵 𞤤𞤫𞤱𞤻𞤵⹁ 𞤫 𞤩𞤵𞥅𞤪𞤭⹁ 𞤫 𞤳𞤢𞤲𞤧𞤫𞥅𞤪 𞤫 𞤲𞤢𞤱𞤲𞤢𞥄𞤶𞤫 𞤩𞤫𞤪𞤲𞤣𞤫 𞤳𞤢𞤻𞤵𞤲 𞤫 𞤻𞤢𞤱𞤵 𞤰𞤭𞥅𞤰𞤢𞤥⹁ 𞤫 𞤲𞤢𞤱𞤲𞤢𞥄𞤶𞤫 𞤯𞤫 𞤢𞤲𞤣𞤢𞥄𞤳𞤢 𞤬𞤭𞥅 𞤥𞤵𞤵𞤲.

𞤑𞤮𞥅𞤪𞤳𞤢 𞤲𞤮 𞤱𞤮𞤲𞤣𞤭 𞤫 𞤲𞤢𞤬𞤮𞥅𞤶𞤫 𞤸𞤫𞥅𞤱𞤵𞤯𞤫 𞤢𞤲𞤣𞤢𞥄𞤯𞤫 𞤫 𞤯𞤫 𞤢𞤲𞤣𞤢𞥄𞤳𞤢 𞤬𞤭𞥅 𞤥𞤵𞤵𞤲 𞤼𞤢𞤸𞤮. 𞤃𞤮 𞤸𞤮𞥅𞤪𞤭 𞤲𞤮𞤲⹁ 𞤱𞤮𞤲𞤢𞥄 𞤴𞤮 𞤮𞤲𞤼𞤭𞤺𞤭 𞤬𞤢𞤲𞤼𞤭𞤲 𞤻𞤢𞥄𞤥𞤣𞤵 𞤲𞤣𞤵𞤲 𞤬𞤫𞤱𞤲𞤣𞤮 𞤼𞤢𞤰𞤵𞤺𞤮𞤤⹁ 𞤸𞤢𞤩𞥆𞤭𞤼𞤮𞥅 𞤻𞤢𞥄𞤥𞤢𞤴 𞤫 𞤶𞤮𞥅𞤯𞤲𞤣𞤫 𞤱𞤮𞥅𞤼𞤫𞤪𞤫 𞤳𞤮 𞤻𞤢𞥄𞤥𞤢𞤴𞤲𞤮𞥅 𞤫 𞤲𞤣𞤫𞤪 𞤻𞤢𞤤𞥆𞤢𞤤. 𞤑𞤮 𞤴𞤮 𞤮𞤲𞤼𞤭𞤺𞤭 𞤸𞤢𞤳𞤭𞤲𞤣𞤭𞤲 𞤻𞤢𞤥𞤣𞤵 𞤲𞤣𞤵𞤲⹁ 𞤯𞤵𞤯𞥆𞤭𞤲𞤮𞤪𞤢 𞤣𞤭𞤥𞤯𞤫 𞤤𞤫𞤯𞥆𞤫 𞤫 𞤳𞤢𞥄𞤳𞤭 𞤥𞤢𞤤𞥆𞤢 𞤳𞤫𞤷𞥆𞤭 𞤷𞤵𞤲𞤼𞤵𞥅𞤶𞤫 𞤯𞤭𞤲⁏ 𞤪𞤫𞥅𞤲𞤮𞥅 𞤳𞤢𞤣𞤭 𞤫 𞤬𞤢𞤲𞤼𞤭𞤲𞤺𞤮𞤤 𞤤𞤢𞤥𞤯𞤢𞤲 (𞤥𞤢𞤲𞤣𞤢𞤲) 𞤫 𞤧𞤵𞤳𞥆𞤢𞤪 (𞤨𞤫𞤪𞤳𞤢𞤲). 

𞤍𞤵𞤲 𞤬𞤮𞤱 𞤳𞤮 𞤫 𞤴𞤵𞤪𞤥𞤫𞥅𞤲𞤣𞤫 𞤫 𞤣𞤵𞤽𞤢𞤴𞤫𞥅 𞤘𞤫𞤲𞤮 𞤅𞤫𞤲𞤭𞥅𞤯𞤮 𞤮𞤲.