𞤃𞤀𞤂𞤋: 𞤑𞤓𞥅𞤇𞤀𞤂𞤔𞤌 𞤅𞤀𞥄𞤔𞤌 𞤑𞤀𞤃𞤀𞤈𞤀𞥄  𞤏𞤀𞤈𞤀𞥄𞤃𞤀

𞤑𞤵𞥅𞤩𞤢𞤤𞤶𞤮 𞤅𞤢𞥄𞤶𞤮 𞤑𞤢𞤥𞤢𞤪𞤢𞥄⹁ 𞤶𞤢𞥄𞤺𞤮𞤪𞤯𞤮 𞤂𞤫𞤧𞤣𞤭 𞤃𞤢𞤤𞤭 𞤲𞤣𞤭𞤲 𞤳𞤢 𞤑𞤭𞤱𞤢𞤤⹁ 𞤱𞤢𞤪𞤢𞥄𞤥𞤢 𞤖𞤢𞤲𞤳𞤭 𞤫 𞤸𞤮𞥅𞤪𞤦𞤭𞤪𞥆𞤫 𞤻𞤢𞤤𞤲𞤣𞤫 𞥒𞥕 𞤅𞤫𞥅𞤯𞤼𞤮 𞥒𞥐𞥒𞥖. 𞤍𞤵𞤥 𞤱𞤢𞤯𞤭𞥅 𞤲𞤣𞤫 𞤶𞤭𞤸𞤢𞥄𞤣𞤮𞥅𞤩𞤫 𞤩𞤫𞤲 𞤫 𞤃𞤵𞤪𞤼𞤵𞤩𞤫 𞤀𞥁𞤢𞤱𞤢𞥄𞤣 𞤩𞤫𞤲 𞤴𞤢𞤲𞤵𞤲𞤮𞥅 𞤫 𞤣𞤢𞥄𞤳𞤢𞥄𞤶𞤫 𞤳𞤮𞤲𞤵 𞤃𞤢𞤤𞤭 𞤲𞤺𞤵𞤲 𞤳𞤢 𞤤𞤢𞥄𞤥𞤮𞤪𞤣𞤫 𞤄𞤢𞤥𞤢𞤳𞤮⹁ 𞤳𞤢𞤻𞤵𞤲 𞤫 𞤑𞤭𞤣𞤢𞤤 𞤫 𞤘𞤢𞥄𞤱𞤮⹁ 𞤷𞤢𞤸𞤫 𞤸𞤭𞤳𞥆𞤮𞤪𞤯𞤫 𞤳𞤢 𞤲𞤢𞤲𞥆𞤢𞥄𞤲𞤺𞤫. 

 

𞤑𞤮 𞤢𞤪𞤢𞤲𞤵𞤲 𞤯𞤵𞤥 𞤲𞤭𞥅⹁ 𞤯𞤫𞥅 𞤨𞤫𞤤𞥆𞤫 𞤸𞤢𞤩𞤮𞥅𞤶𞤫 𞤯𞤭𞤯𞤭 𞤲𞤮 𞤱𞤢𞤯𞤼𞤮𞤣𞤵𞤣𞤫 𞤶𞤭𞤲𞤺𞤢 𞤤𞤢𞥄𞤥𞤵 𞤃𞤢𞤤𞤭 𞤲𞤺𞤵𞤲. 𞤑𞤮 𞤨𞤫𞤤𞥆𞤫 𞤱𞤮𞥅𞤱𞤵𞤲𞤮𞥅𞤯𞤫 𞤱𞤢𞤪𞤼𞤭𞤲’𞤣𞤭𞤪𞤣𞤫 𞤸𞤢𞤱𞤪𞤭 𞤴𞤢𞤲𞤭 𞤫 𞤣𞤮𞤱𞤤𞤢𞤤 𞤃𞤢𞤤𞤭 𞤲𞤺𞤢𞤤.

 

𞤑𞤭𞤣𞤢𞤤 𞤴𞤢𞤲𞤼𞤭𞥅 𞤫 𞤶𞤵𞥅𞤯𞤫 𞤥𞤵𞤪𞤼𞤵𞤩𞤫 𞤀𞥁𞤢𞤱𞤢𞥄𞤣 𞤩𞤫𞤲. 𞤔𞤭𞤸𞤢𞥄𞤣𞤮𞥅𞤩𞤫 𞤩𞤫𞤲 𞤳𞤢𞤲 𞤫𞤼𞤭𞥅 𞤸𞤢𞥄 𞤩𞤫 𞤲𞤢𞥄𞤼𞤭 𞤑𞤢𞤼𞤭⹁ 𞤧𞤢𞤸𞤪𞤫 𞤳𞤢 𞤣𞤢𞥄𞤳𞤢 𞤥𞤢𞤱𞤳𞤢 𞤳𞤮𞤲𞤵 𞤃𞤢𞤤𞤭 𞤲𞤺𞤵𞤲 𞤱𞤮𞤲𞤭⹁ 𞤩𞤫 𞤴𞤢𞤲𞤭 𞤫 𞤺𞤢𞤤𞥆𞤫 𞤅𞤢𞥄𞤶𞤮 𞤑𞤢𞤥𞤢𞤪𞤢⹁ 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤳𞤭𞤱𞤢𞤤. 𞤘𞤮𞥅𞤼𞤮 𞤫 𞤧𞤮𞤲𞥆𞤢𞥄𞤩𞤫 𞤥𞤢𞤳𞥆𞤮 𞤩𞤫𞤲 𞤳𞤢𞤻𞤵𞤲 𞤫 𞤸𞤮𞤯𞤭𞤣𞤭𞥅𞤩𞤫 𞤥𞤢𞤳𞥆𞤮 𞤯𞤵𞥅𞤯𞤵𞤩𞤫 𞤸𞤫𞤣𞥆𞤭𞥅 𞤫 𞤬𞤫𞤼𞥆𞤢𞤲𞤣𞤫 𞤤𞤢𞤲𞤷𞤵𞤲’𞤣𞤫 𞤸𞤵𞤩𞤫𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲. 𞤖𞤢𞤳𞥆𞤫𞤪𞤫 𞤬𞤫𞤼𞥆𞤢𞤲𞤣𞤫 𞤲𞤣𞤫𞤲 𞤲𞤮 𞤼𞤭𞥅𞤯𞤵𞤲𞤮𞥅⹁ 𞤸𞤢𞤴 𞤶𞤵𞥅𞤤𞤭𞤪𞤣𞤫 𞤱𞤮𞤲𞤵𞤲’𞤣𞤫 𞤥𞤮𞤺𞥆𞤮 𞤺𞤢𞤤𞥆𞤫 𞤯𞤫𞤲 𞤣𞤢𞤯𞤢𞥄𞤤𞤭.

 

𞤃𞤢𞥄𞤴𞤣𞤫 𞤮𞥅 𞤳𞤵𞥅𞤩𞤢𞤤𞤶𞤮 𞤵𞤣𞥆𞤭𞤼𞤭𞥅 𞤴𞤮𞤤𞤲𞤣𞤫 𞤥𞤢𞤱𞤲𞤣𞤫 𞤫 𞤤𞤢𞥄𞤥𞤵 𞤃𞤢𞤤𞤭 𞤲𞤺𞤵𞤲⹁ 𞤧𞤢𞤦𞤵𞤲𞤢 𞤮 𞤤𞤢𞥄𞤼𞤭𞤲𞤮 𞤼𞤵𞤺𞤢𞤤𞤢𞤤 𞤥𞤢𞤱𞤲𞤺𞤢𞤤 𞤱𞤮𞤲𞤢𞤲𞤣𞤫 𞤳𞤮𞤲𞤵 𞤲𞤺𞤵𞤲 𞤫 𞤲𞤣𞤫𞥅 𞤸𞤢𞤪𞤫 𞤲𞤣𞤫 𞤩𞤫 𞤱𞤮𞤲𞤭 𞤫 𞤥𞤵𞤵𞤲. 𞤑𞤮 𞤳𞤢𞤲𞤳𞤮 𞤳𞤢𞤣𞤭 𞤱𞤮𞤲𞤵𞤲𞤮𞥅 𞤧𞤢𞤦𞤵 𞤢𞤪𞤣𞤵 𞤸𞤢𞤩𞤢𞤲𞤮𞥅𞤩𞤫 𞤏𞤢𞤺𞤲𞤫𞥅𞤪 𞤩𞤫𞤲 𞤲𞤣𞤫𞤪 𞤃𞤢𞤤𞤭.

 

𞤘𞤭𞤤𞤢 𞤲𞤮𞤲 𞤩𞤫𞥅𞤲 𞤈𞤮𞤧𞤭𞤴𞤢𞥄𞤩𞤫 𞤢𞤪𞤭⹁ 𞤯𞤵𞥅𞤥 𞤶𞤢𞤪𞤭𞥅 𞤃𞤢𞤤𞤭 𞤳𞤮 𞤴𞤢𞤱𞤼𞤭 𞤁𞤵𞤦𞤵𞥅𞤪𞤫 (𞤥𞤭𞤤𞤭𞤴𞤢𞥄𞤪) 𞤱𞤮𞥅𞤼𞤫𞤪𞤫 𞤁𞤢𞤤𞤢. 

 

𞤄𞤢𞤯𞤼𞤢𞤲𞤫 𞤲𞤺𞤮𞥅 𞤥𞤢𞤧𞤭𞥅𞤦𞤮 𞤸𞤫𞤩𞤵𞤲’𞤺𞤮 𞤤𞤫𞤴𞤣𞤭 𞤲𞤣𞤭𞤲⹁ 𞤯𞤵𞥅𞤯𞤵𞤩𞤫 𞤲𞤮 𞤤𞤢𞤲𞤣𞤭𞤼𞤢𞥄𞤣𞤫 𞤧𞤮 𞤼𞤢𞤱𞤭𞥅 𞤲𞤺𞤢𞥄𞤤 𞤸𞤵𞥅𞤱𞤮𞤲’𞤣𞤭𞤪𞤢𞤤 𞤸𞤢𞤳𞥆𞤵𞤲’𞤣𞤫 𞤃𞤢𞤤𞤭 𞤫 𞤈𞤮𞥅𞤧𞤭𞤴𞤢 𞤢𞤣𞥆𞤢𞤲𞤭𞥅 𞤃𞤢𞤤𞤭 𞤳𞤮 𞤴𞤫𞤤𞤢𞤲𞤮𞥅 𞤳𞤮𞤲 𞤼𞤮 𞤦𞤢𞤲𞤽𞤫 𞤩𞤵𞤩𞤼𞤵. 

 

𞤅𞤢𞥄𞤶𞤮 𞤑𞤢𞤥𞤢𞤪𞤢𞥄 𞤥𞤢𞥄𞤴𞤭𞤪𞤭 𞤣𞤵𞥅𞤩𞤭 𞥔𞥗. 𞤑𞤮 𞤻𞤢𞤤𞤲𞤣𞤫 𞥒𞥒 𞤐𞤦𞤮𞥅𞤴𞤮 𞤮 𞤶𞤭𞤦𞤭𞤲𞤢𞥄 𞤑𞤢𞤼𞤭⹁ 𞤧𞤢𞤸𞤪𞤫 𞤲𞤣𞤫 𞤱𞤮𞤲𞤳𞤭𞤸𞤭 𞤥𞤢𞤳𞥆𞤮 𞤸𞤫𞤣𞥆𞤭𞥅 𞤫 𞤥𞤵𞤵𞤲.

𞤌𞤥𞤮 𞤼𞤢𞤱𞤢𞤲𞤮𞥅 𞤫 𞤧𞤮𞥅𞤪𞤭𞥅𞤩𞤫 𞤱𞤢𞤴𞤤𞤭𞤼𞤵𞤲𞤮𞥅𞤩𞤫 𞤩𞤫𞤲 𞤤𞤢𞥄𞤥𞤵 𞤋𞤦𞤪𞤢𞥄𞤸𞤭𞥅𞤥𞤢 𞤄𞤵𞥅𞤦𞤢𞤳𞤢𞤪 𞤑𞤫𞤴𞤼𞤢 𞤲𞤺𞤵𞤲 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥒𞥐. 𞤏𞤢𞤯𞤼𞤢𞤲𞤣𞤫 𞤬𞤮𞤤𞥆𞤵𞤪𞤵 𞤲𞤣𞤵𞤲⹁ 𞤮 𞤱𞤢𞤯𞤢𞥄 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤳𞤭𞤱𞤢𞤤. 𞤑𞤮𞤲𞤮 𞤲𞤣𞤫 𞤄𞤢𞥄 𞤐𞤣𞤢𞤱𞤵 𞤭𞤼𞥆𞤵𞤲𞤮𞥅 𞤥𞤮⹁ 𞤀𞥄𞤧𞤭𞤥𞤭𞥅 𞤘𞤮𞤴𞤼𞤢 𞤢𞤪𞤼𞤭𞤪𞤭 𞤥𞤮 𞤩𞤢𞥄𞤱𞤮 𞤩𞤫 𞤭𞤼𞥆𞤵𞤣𞤫 𞤄𞤢𞥄 𞤐𞤣𞤢𞤱.