𞤐𞤄𞤉𞤈𞤚𞤀𞤂 𞤂𞤉𞤒𞤁𞤋: 𞤚𞤌𞥅𞤙𞤉 𞤏𞤀𞤍𞤀𞤐𞤌𞥅𞤍𞤉 𞤋𞤚𞥆𞤀𞥄𞤃𞤀

𞤐𞤔𞤵𞤩𞥆𞤵𞤣𞤭 𞤘𞤫𞤲𞤯𞤫 𞤊𞤮𞤼𞥆𞤵𞤯𞤫 𞤯𞤫𞤲 𞤧𞤵𞤬𞤼𞤵𞤲𞤮 𞤸𞤢𞤲𞤳𞤭 𞤬𞤭𞥅 𞤶𞤢𞤩𞤵𞤺𞤮𞤤 𞤲𞤦𞤫𞤪𞤼𞤢𞤤 𞤂𞤢𞥄𞤤𞤢𞤺𞤢𞤤 𞤂𞤫𞤴𞤣𞤭 𞤳𞤫𞤧𞤢𞤤 𞤸𞤮𞤤𞥆𞤵𞤲’𞤺𞤢𞤤 𞤴𞤢𞥄𞤶𞤫𞥅𞤲𞤣𞤭 𞤀𞤬𞤪𞤭𞤳 𞤲𞤣𞤭𞤲 𞤼𞤭𞤺𞤭-𞤼𞤭𞤺𞤭. 

𞤐𞤄𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤩𞤵𞤪𞤵𞤲’𞤺𞤢𞤤 𞤸𞤵𞥅𞤱𞤼𞤮𞤪𞤫𞥅𞤣𞤫 𞤲𞤺𞤢𞤤 𞤸𞤢𞤲𞤣𞤫⹁ 𞤲𞤮 𞤽𞤭𞤻𞤭𞤪𞤢𞥄 𞤩𞤵𞤪𞤼𞤭𞤲𞤺𞤮𞤤 𞤫 𞤥𞤢𞤱𞤲𞤭𞤲𞤺𞤮𞤤 𞤳𞤢 𞤺𞤭𞤼𞤫⹁ 𞤤𞤫𞤴𞤯𞤫 𞤸𞤭𞥅𞤪𞤲𞤢𞥄𞤲𞤺𞤫 𞤯𞤫𞤲 (𞤉𞤪𞤮𞤨 𞤫 𞤀𞤥𞤫𞤪𞤭𞤳).

 

𞤐𞤔𞤵𞤩𞥆𞤵𞤣𞤭 𞤘𞤫𞤲𞤯𞤫 𞤊𞤮𞤼𞥆𞤵𞤯𞤫 𞤯𞤫𞤲 (ONU/UN)⹁ 𞤧𞤵𞤬𞤼𞤭𞥅 𞤬𞤭𞥅 𞤶𞤢𞤩𞤵𞤺𞤮𞤤 𞤲𞤦𞤫𞤪𞤼𞤢𞤤 𞤳𞤫𞤧𞤢𞤤 𞤸𞤮𞤤𞥆𞤵𞤲’𞤺𞤢𞤤 𞤴𞤢𞥄𞤲𞤶𞤭 𞤼𞤭𞤺𞤭𞥅𞤪𞤭 𞤤𞤫𞤴𞤯𞤫𞥅𞤤𞤫 𞤯𞤫𞤲. 𞤑𞤮 𞤬𞤢𞥄𞤲𞤣𞤢𞥄𞤪𞤫 𞤲𞤣𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤢𞤪𞤣𞤭𞤲𞤭 𞤬𞤭𞥅 𞤬𞤫𞥅𞤱𞤲𞤭𞤼𞤵𞤺𞤮𞤤 𞤼𞤮𞥅𞤻𞤫 𞤯𞤫 𞤣𞤵𞥅𞤩𞤭 𞤼𞤫𞥅𞤥𞤫𞤯𞥆𞤫.

𞤐𞤣𞤫𞥅 𞤬𞤢𞥄𞤲𞤣𞤢𞥄𞤪𞤫 𞤭𞤲𞥆𞤢𞥄𞤲𞤣𞤫 “𞤊𞤫𞥅𞤱𞤲𞤭𞤼𞤮 𞤐𞤄𞤫𞤪𞤼𞤢𞤤” 𞤲𞤣𞤫 𞤐𞤄𞤢𞤼𞤵 𞤃𞤢𞤱𞤲𞤺𞤵 𞤐𞤔𞤵𞤩𞥆𞤵𞤣𞤭 𞤘𞤫𞤲𞤯𞤫 𞤊𞤮𞤼𞥆𞤵𞤯𞤫 𞤯𞤫𞤲 (ONU/UN) 𞤶𞤢𞤩𞤭 𞤫 𞤥𞤢𞤱𞤲𞤣𞤫 𞤻𞤢𞤤𞤲𞤣𞤫 𞥔 𞤅𞤭𞤤𞤼𞤮 𞥒𞥐𞥒𞥖⹁ 𞤲𞤮 𞤸𞤵𞥅𞤤𞤢𞤲𞤭 𞤻𞤢𞥄𞤱𞤲𞤣𞤵𞤺𞤮𞤤 𞤼𞤮𞥅𞤻𞤫 𞤱𞤢𞤯𞤢𞥄𞤯𞤫 𞤺𞤭𞤦𞤭 𞤬𞤫𞤱𞤲𞤣𞤮 𞤳𞤢𞤪𞤸𞤢𞥄𞤳𞤵⹁ 𞤻𞤮𞤺𞥆𞤵𞤯𞤫 𞤫 𞤺𞤭𞤼𞤫 𞤴𞤭𞤥𞤩𞤫 𞤩𞤫𞤲⹁ 𞤴𞤢𞥄𞤶𞤫𞥅𞤲𞤣𞤭 𞤀𞤬𞤪𞤭𞤳 𞤲𞤣𞤭𞤲 𞤭𞤦𞤢 𞤱𞤢𞤯𞤭𞥅 𞤣𞤵𞥅𞤩𞤭 𞥔𞥕𞥐. 𞤍𞤵𞤥 𞤲𞤮𞤲 𞤲𞤮 𞤦𞤢𞤯𞤼𞤭𞤲𞤭 𞤫 𞤲𞤮 𞤀𞤣𞤲𞤢𞥄𞤪𞤵 𞤲𞤣𞤵𞤲 𞤴𞤭𞤴𞤭𞤪𞤼𞤢 𞤀𞤬𞤪𞤭𞤳 𞤳𞤢 𞤶𞤢𞤴𞤤𞤫⹁ 𞤳𞤢 𞤶𞤢𞤲𞤺𞤣𞤫 𞤫 𞤳𞤢 𞤣𞤢𞤱𞤪𞤮𞥅𞤪𞤫 𞤢𞤣𞤲𞤢𞥄𞤪𞤵.

𞤐𞤣𞤫𞥅 𞤬𞤭𞤩𞤢𞤲𞤣𞤫⹁ 𞤲𞤣𞤫 𞤤𞤫𞤴𞤯𞤫 𞤆𞤮𞤼𞥆𞤢𞤤 𞤀𞤬𞤪𞤭𞤳 (𞤆𞤀) 𞤳𞤢𞤻𞤵𞤲 𞤫 𞤤𞤫𞤴𞤣𞤭 𞤄𞤢𞤸𞤢𞤥𞤢𞥄𞤧 𞤢𞤣𞥆𞤭⹁ 𞤶𞤢𞤩𞤢𞥄𞤥𞤢 𞤫 𞤷𞤵𞤬𞤼𞤢𞤤: 𞤶𞤢𞤩𞤭 𞥑𞥖𞥔 𞤤𞤭𞤣𞥆𞤭𞥅 𞥑. 𞤂𞤫𞤴𞤯𞤫 𞤶𞤫𞥅𞤺𞤮𞤮 𞤧𞤵𞤬𞤼𞤢𞥄𞤲𞤮.

 

𞤑𞤮 𞤤𞤫𞤴𞤣𞤭 𞤚𞤮𞤺𞤮 𞤲𞤣𞤭𞤲 𞤢𞤪𞤣𞤭𞤲𞤮𞥅 𞤣𞤭𞤤𞥆𞤢𞤲𞤣𞤫 𞤆𞤮𞤼𞥆𞤢𞤤 𞤀𞤬𞤪𞤭𞤳 𞤲𞤺𞤢𞤤 𞤬𞤭𞥅 𞤵𞤧𞤼𞤵𞤺𞤮𞤤 𞤸𞤵𞥅𞤱𞤼𞤮𞤪𞤺𞤮𞤤 𞤲𞤦𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤.

𞤑𞤮 𞤘𞤫𞤪𞤢𞤪𞤣𞤵𞤧 𞤃𞤫𞤪𞤳𞤢𞤼𞤮𞥅𞤪 𞤧𞤭𞤲𞤷𞤵𞤲𞤮𞥅 𞤲𞤺𞤢𞥄𞤤 𞤲𞤦𞤫𞤪𞤼𞤢𞤤 𞤳𞤢 𞤼𞤫𞥅𞤥𞤭𞤲𞤢𞤲𞤣𞤫 𞥑𞥖𞤩𞤫𞤪𞤫. 𞤚𞤢𞤱𞤭 𞤲𞤮𞤲⹁ 𞤲𞤺𞤢𞥄𞤤 𞤲𞤮 𞤮𞥅𞤻𞤭 𞤴𞤢𞥄𞤶𞤫𞥅𞤲𞤣𞤭 𞤤𞤫𞤴𞤯𞤫𞥅𞤤𞤫 𞤯𞤫𞤲. 𞤐𞤺𞤢𞤤 𞤩𞤵𞤪𞤼𞤭𞤲𞤭 𞤯𞤫𞥅 𞤤𞤫𞤴𞤯𞤫 𞤩𞤢𞤣𞤭𞥅𞤯𞤫 𞤰𞤮𞤥𞤦𞤫 𞤯𞤫 (𞤷𞤮𞤩𞥆𞤭) 𞤯𞤭𞤯𞤭. 𞤉 𞤥𞤭𞤧𞤢𞤤⹁ 𞤲𞤦𞤫𞤪𞤼𞤢𞤤 𞤲𞤺𞤢𞤤 𞤬𞤮𞤼𞤭𞤲𞤣𞤭𞤲𞤭 𞤘𞤮𞤪𞤱𞤫𞤤𞤢𞤲𞤣𞤭 𞤫 𞤀𞤬𞤪𞤭𞤳⹁ 𞤖𞤭𞤲𞤤𞤫 𞤀𞤬𞤪𞤭𞤳 𞤲𞤮 𞤩𞤵𞤪𞤣𞤭𞤪𞤭 𞤘𞤮𞤪𞤱𞤫𞤤𞤢𞤲𞤣𞤭 𞤤𞤢𞥄𞤦𞤭 𞥑𞥔.

 

𞤒𞤮𞤺𞤢 𞤫 𞤽𞤭𞤻𞤮𞥅𞤩𞤫 𞤲𞤦𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤⹁ 𞤲𞤮 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤳𞤮 𞤱𞤢𞤯𞤭 𞤲𞤺𞤢𞥄𞤤 𞤲𞤦𞤫𞤪𞤼𞤢𞤤 𞤲𞤮 𞤸𞤵𞥅𞤱𞤼𞤮𞤪𞤫𞥅𞤣𞤫 𞤬𞤮𞤼𞤢⹁ 𞤳𞤮 𞤼𞤢𞤱𞤣𞤫 𞤲𞤺𞤢𞤤 𞤬𞤢𞤲𞤼𞤭𞤲𞤭⹁ 𞤪𞤫𞤬𞤼𞤭 𞤲𞤺𞤢𞤤 𞤼𞤵𞤥𞤦𞤭𞤼𞤭 𞤤𞤫𞤴𞤯𞤫 𞤸𞤭𞥅𞤪𞤲𞤢𞤲𞤳𞤮𞥅𞤶𞤫 𞤯𞤫𞤲 (𞤉𞤪𞤮𞤨 𞤫 𞤀𞤥𞤫𞤪𞤭𞤳 𞤐𞤢𞤲𞥆𞤢𞥄𞤪𞤭). 𞤍𞤵𞤥 𞤲𞤮𞤲⹁ 𞤲𞤮 𞤣𞤵𞥅𞤥𞤭𞤲𞤢𞤭 𞤥𞤭𞥅𞤶𞤮 𞤩𞤵𞤪𞤢𞤤 𞤤𞤫𞤴𞤯𞤫 𞤉𞤪𞤮𞤨 𞤯𞤫𞤲 𞤣𞤮𞤱 𞤤𞤫𞤴𞤯𞤫 𞤸𞤫𞤣𞥆𞤭𞥅𞤯𞤫 𞤯𞤫𞤲. 

“𞤂𞤫𞤴𞤣𞤭 𞤬𞤮𞤼𞤲𞤢𞥄𞤲𞤣𞤭 𞤳𞤮 𞤫 𞤲𞤦𞤫𞤪𞤼𞤢𞤤 𞤬𞤮𞤼𞤲𞤢𞥄𞤲𞤺𞤢𞤤 𞤬𞤵𞤯𞥆𞤮𞤼𞤮𞥅⹁” 𞤳𞤮 𞤯𞤵𞤥 𞤈𞤮𞤦𞤫𞥅𞤪 𞤁𞤭𞤧𞤫𞤴⹁ 𞤔𞤢𞥄𞤺𞤮𞤪𞤯𞤮 𞤚𞤮𞤺𞤮 𞤮𞤲 𞤳𞤢 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭⹁ 𞤴𞤫𞥅𞤼𞤭𞥅 𞤈𞤮𞤴𞤼𞤫𞥅𞥁 (Reuters) 𞤢𞤣𞤮 𞤧𞤵𞤬𞤼𞤮 𞤲𞤺𞤮𞤲 𞤫 𞤥𞤢𞤱𞤲𞤣𞤫.

𞤐𞤣𞤫𞥅 𞤬𞤭𞤩𞤢𞤲𞤣𞤫 𞤱𞤮𞤲𞤢𞥄 𞤧𞤢𞤪𞤭𞤴𞤢 𞤱𞤢𞤯𞥆𞤭𞤲𞤢𞥄𞤳𞤢⹁ 𞤳𞤢𞤣𞤭 “𞤲𞤣𞤫 𞤸𞤢𞤯𞤢𞤼𞤢𞥄 𞤸𞤵𞥅𞤱𞤼𞤮𞤪𞤺𞤮𞤤 𞤲𞤦𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤⹁ 𞤬𞤭𞥅 𞤴𞤭𞥅𞤤𞤮 𞤳𞤢 𞤸𞤮𞥅𞤪𞤫 𞤲𞤣𞤭𞤴𞤢𞤥 𞤥𞤢𞤤𞥆𞤢 𞤳𞤢 𞤱𞤫𞥅𞤴𞤮⹁ 𞤲𞤮𞤳𞥆𞤵 𞤳𞤢𞤤𞤢 𞤳𞤢 𞤲𞤺𞤢𞤤 𞤩𞤵𞤪𞤭 𞤥𞤮𞤰𞥆𞤢𞤲𞤣𞤫.” 𞤑𞤮 𞤯𞤵𞤥 𞤶𞤢𞥄𞤺𞤮𞤪𞤺𞤢𞤤 𞤚𞤮𞤺𞤮 𞤲𞤺𞤢𞤤 𞤸𞤮𞤤𞥆𞤭.

𞤁𞤫𞤲𞤼𞤢𞤤 𞤂𞤢𞤪𞤫 𞤀𞤥𞤫𞤪𞤭𞤳 — 𞤤𞤫𞤴𞤣𞤭 𞤲𞤣𞤭 𞤼𞤢𞤱𞤭 𞤳𞤮 𞤳𞤢𞤴𞤪𞤭 𞤼𞤢𞤲 𞤤𞤭𞤣𞥆𞤭𞥅 𞤬𞤢𞥄𞤲𞤣𞤢𞥄𞤪𞤫 𞤲𞤣𞤫𞤲 — 𞤱𞤭𞤴𞤭 𞤱𞤮𞤲𞤣𞤫𞤥𞤢 𞤲𞤣𞤫𞥅 𞤬𞤭𞤩𞤢𞤲𞤣𞤫 𞤲𞤮 𞤩𞤢𞤥𞤼𞤵𞤣𞤫 “𞤫𞤩𞥆𞤮𞥅𞤪𞤫 𞤥𞤭𞥅𞤶𞤮 𞤬𞤫𞥅𞤪𞤫𞤴𞤢𞤲𞤳𞤮𞥅𞤪𞤫” 𞤳𞤢𞤣𞤭 𞤳𞤮 𞤲𞤣𞤫 𞤱𞤫𞤤𞤧𞤭𞤲𞤢𞤴𞤲𞤣𞤫 𞤫 “𞤷𞤢𞤯𞤫𞥅𞤤𞤫 𞤼𞤭𞤺𞤭-𞤼𞤭𞤺𞤭𞥅𞤶𞤫 𞤬𞤫𞤱𞤼𞤵𞤯𞤫 𞤩𞤵𞥅𞤩𞤼𞤵 𞤫 𞤀𞤣𞤲𞤢𞥄𞤪𞤵 𞤲𞤣𞤵𞤲⹁ 𞤫 𞤬𞤭𞥅 𞤸𞤫𞤩𞤼𞤢𞥄𞤪𞤫 𞤥𞤢𞤤𞥆𞤢 𞤸𞤵𞥅𞤱𞤮𞤲’𞤣𞤭𞤪𞤢𞤤 𞤥𞤮𞤰𞥆𞤢𞤤”.

 

𞤃𞤮𞤳𞤭 𞤃𞤢𞤳𞤵𞤪𞤢⹁ 𞤸𞤮𞥅𞤪𞤫𞥅𞤶𞤮 𞤬𞤫𞤣𞥆𞤫 “𞤀𞤬𞤪𞤭𞤳 𞤐𞤮𞥊𞥅 𞤊𞤭𞤤𞤼𞤢” (Africa No Filter)⹁ 𞤣𞤢𞤪𞤢𞤲𞤭𞥅𞤲𞤣𞤫 “𞤊𞤫𞥅𞤱𞤲𞤭𞤼𞤫𞤲 𞤏𞤭𞤲𞤣𞤫𞤪𞤫 𞤲𞤣𞤫𞤲” 𞤱𞤫𞤤𞤼𞤮𞤪𞤭𞥅 𞤷𞤵𞤬𞤼𞤢𞤤 𞤲𞤺𞤢𞤤. 𞤌 𞤱𞤭𞤴𞤭 “𞤶𞤮𞥅𞤲𞤭 𞤺𞤮𞤤𞥆𞤫 𞤯𞤫𞤲 𞤼𞤭𞤺𞤭 𞤬𞤵𞤯𞥆𞤭𞤳𞤫”.

“𞤉𞤯𞤫𞤲 𞤬𞤢𞥄𞤤𞤢𞥄 𞤴𞤭𞤴𞤵𞤺𞤮𞤤 𞤦𞤫𞤪𞤼𞤫 𞤺𞤮𞥅𞤲𞤺𞤢𞥄𞤶𞤫 𞤳𞤢 𞤶𞤢𞤲𞤺𞤭𞤪𞤯𞤫⹁ 𞤳𞤢 𞤣𞤫𞤬𞤼𞤫⹁ 𞤳𞤢 𞤳𞤭𞤦𞤭𞤪𞤯𞤫⹁ 𞤳𞤢 𞤳𞤢𞤬𞤤𞤫 𞤫 𞤳𞤢 𞤸𞤢𞤳𞤼𞤭𞤧𞤵 𞤲𞤺𞤵 𞤣𞤵𞤶𞤵𞤲𞤫 𞤴𞤭𞤥𞤩𞤫 𞤸𞤵𞥅𞤱𞤼𞤮𞤪𞤼𞤢 𞤻𞤢𞤤𞤲𞤣𞤫 𞤳𞤢𞤤𞤢”.

𞤌 𞤩𞤫𞤴𞤣𞤭 𞤳𞤢𞤣𞤭: “𞤅𞤭 𞤫𞤲 𞤬𞤢𞤤𞤶𞤭𞥅 𞤫 𞤸𞤵𞥅𞤲𞤣𞤫 𞤤𞤫𞤧𞤯𞤵𞤲’𞤣𞤫 𞤱𞤢𞤲𞤮 𞤴𞤢𞥄𞤶𞤫𞥅𞤲𞤣𞤭 𞤀𞤬𞤪𞤭𞤳 𞤲𞤣𞤭𞤲 𞤫 𞤯𞤭𞥅 𞤣𞤵𞥅𞤩𞤭 𞤯𞤮𞥅 𞤬𞤮𞤨⹁ 𞤳𞤮 𞤸𞤮𞤲𞤯𞤵𞤥 𞤺𞤮𞥅 𞤳𞤢𞤣𞤭 𞤳𞤮 𞤴𞤮𞤱𞤭𞤼𞤭𞥅 𞤫 𞤀𞤬𞤪𞤭𞤳 𞤱𞤮𞤲𞤭 𞤳𞤮 𞤶𞤢𞤩𞤵𞤯𞤫𞤲 𞤼𞤢𞤱𞤢 𞤫𞤲 𞤼𞤫𞤬𞤢𞥄𞤤𞤭؟ 𞤀𞤬𞤪𞤭𞤳 𞤸𞤢𞤼𞤮𞤲𞤶𞤭𞤲𞤢𞥄 𞤫 𞤶𞤢𞤲𞤯𞤭𞤲𞤫𞥅𞤣𞤫. 𞤑𞤮 𞤴𞤭𞤴𞤭𞤪𞤫𞥅𞤣𞤫 𞤲𞤮 𞤲𞤣𞤭 𞤬𞤮𞤼𞤭𞤪𞤭 𞤲𞤮𞤲 𞤼𞤭𞤺𞤭“.

 

“ 𞤌𞥅𞤙𞤀𞥄𞤈𞤉 𞤐𞤌 𞤏𞤌𞤐𞤚𞤀 𞤘𞤌𞥅𞤐𞤘𞤀 𞤉 𞤃𞤋𞥅𞤔𞤌.”

𞤀𞤣𞤮 𞤷𞤵𞤬𞤼𞤢𞤤 𞤲𞤺𞤢𞤤⹁ 𞤤𞤫𞤴𞤣𞤭 𞤊𞤢𞤪𞤢𞤲𞤧𞤭 𞤲𞤣𞤭𞤲⹁ 𞤱𞤮𞥅𞤼𞤭𞤪𞤭 𞤫 𞤤𞤫𞤴𞤯𞤫 𞤱𞤮𞤲𞤢𞤲𞤯𞤫 𞤬𞤢𞥄𞤲𞤣𞤢𞥄𞤪𞤫 𞤲𞤣𞤫𞤲⹁ 𞤢𞤲𞤣𞤭𞤲𞥆𞤮 𞤱𞤮𞤲𞤣𞤫𞤥𞤢 𞤩𞤫 𞤫𞤩𞥆𞤭𞥅 𞤱𞤮𞤨𞥆𞤵𞤺𞤮𞤤 𞤲𞤦𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤.

𞤔𞤢𞥄𞤺𞤮𞤪𞤺𞤢𞤤 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭 𞤯𞤭𞤲 “𞤱𞤮𞤨𞥆𞤢𞤴 𞤲𞤦𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤 𞤧𞤵𞤩𞤮𞥅 𞤦𞤫𞤪𞤼𞤫 𞤺𞤢𞤧𞤢𞤴𞤯𞤫 𞤬𞤭𞥅 𞤸𞤢𞥄𞤶𞤵 𞤳𞤢𞤤𞤢⹁ 𞤩𞤵𞤪𞤢𞤴𞤯𞤫 𞤸𞤮𞤤𞥆𞤵𞤣𞤫 𞤴𞤢𞥄𞤶𞤫𞥅𞤲𞤣𞤭 𞤤𞤫𞤴𞤯𞤫 𞤯𞤫𞤲 𞤼𞤭𞤺𞤭⹁ 𞤴𞤢𞤸𞤣𞤵𞤯𞤫 𞤳𞤢𞤣𞤭 𞤫 𞤱𞤢𞤧𞤭𞤴𞤫𞥅𞤶𞤭 𞤲𞤦𞤫𞤪𞤼𞤭𞤲𞤳𞤮𞥅𞤩𞤫 𞤩𞤫𞤲 𞤫 𞤢𞤲𞤼𞤵𞤩𞤫 𞤩𞤫𞤲“. 𞤑𞤮 𞤯𞤵𞤥 𞤟𞤢𞤲-𞤐𞤮𞤱𞤫𞤤 𞤄𞤢𞤪𞤮⹁ 𞤔𞤢𞥄𞤺𞤮𞤪𞤯𞤮 𞤊𞤢𞤪𞤢𞤲𞤧𞤭 𞤮𞤲 𞤳𞤢 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭 𞤱𞤭𞤴𞤭 𞤫 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤳𞤢 𞤔𞤢𞥄𞤩𞤭𞥅𞤪𞤵 𞤅𞤮𞤪𞤦𞤮𞥅𞤲⹁ 𞤆𞤢𞤪𞤭.

𞤄𞤢𞤪𞤮 𞤱𞤭𞤴𞤭 𞤳𞤢𞤣𞤭: “𞤒𞤢𞥄𞤶𞤫𞥅𞤲𞤣𞤭 𞤂𞤢𞤪𞤫 𞤀𞤥𞤫𞤪𞤭𞤳⹁ 𞤈𞤮𞥅𞤧𞤭𞤴𞤢⹁ 𞤫 𞤕𞤢𞤴𞤲𞤢 𞤲𞤮 𞤬𞤢𞤲𞤼𞤭𞤲𞤢𞥄 𞤫 𞤺𞤭𞤼𞤫 𞤧𞤮 𞤫𞤩𞥆𞤭𞤲’𞤣𞤭𞤪𞤢𞥄𞤥𞤢 𞤫 𞤀𞤬𞤪𞤭𞤳⹁ 𞤀𞤥𞤫𞤪𞤭𞤳 𞤂𞤢𞤼𞤭𞤲 𞤥𞤢𞤤𞥆𞤢 𞤀𞥄𞤧𞤭𞤴𞤢 𞤊𞤵𞥅𞤯𞤲𞤢𞥄𞤲𞤺𞤫-𞤙𞤢𞥄𞤥𞤮⹁” 𞤌 𞤩𞤫𞤴𞤣𞤭 𞤳𞤢𞤣𞤭: “𞤌𞥅𞤻𞤢𞥄𞤶𞤫 𞤯𞤫𞤲 𞤲𞤮 𞤢𞤪𞤮𞤴𞤢 𞤳𞤢 𞤯𞤫 𞤬𞤵𞤯𞤢 𞤫 𞤲𞤮 𞤴𞤭𞤴𞤭𞤪𞤼𞤫𞥅 𞤲𞤮𞤲” 𞤳𞤢𞤣𞤭 “𞤱𞤢𞤹𞤵𞤼𞤵 𞤬𞤫𞥅𞤱𞤲𞤭𞤼𞤵𞤺𞤮𞤤 𞤸𞤫𞥅𞤱𞤭𞥅.”

 

𞤐𞤄𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤 𞤲𞤮 𞤸𞤵𞥅𞤱𞤼𞤮𞤪𞤫𞥅𞤣𞤫 𞤬𞤮𞤼𞤢 𞤳𞤢 𞤣𞤵𞤯𞤭𞤲𞤮𞤪𞤯𞤫⹁ 𞤳𞤮𞤲𞤮 𞤚𞤮𞤺𞤮 𞤲𞤮 𞤴𞤫𞤤𞤭𞥅 𞤱𞤢𞤴𞤤𞤵𞤺𞤮𞤤 𞤣𞤫𞤬𞤼𞤫 𞤐𞤦𞤫𞤪𞤼𞤭𞤲𞤳𞤮𞤱𞤢𞤤 𞤣𞤵𞤯𞤫 𞤤𞤫𞤴𞤣𞤭 𞤥𞤵𞤵𞤲 𞤯𞤫𞤲 𞤢𞤣𞤮 𞤸𞤭𞤼𞤢𞥄𞤲𞤣𞤫 𞤲𞤣𞤫𞤲 𞤸𞤵𞥅𞤩𞤵𞤣𞤫. 𞤑𞤮 𞤯𞤵𞤥 𞤁𞤭𞤧𞤫𞤴 𞤴𞤫𞥅𞤼𞤭𞥅 𞤈𞤮𞤴𞤼𞤫𞥅𞥁.

𞤌 𞤱𞤭𞤴𞤭 𞤳𞤢𞤣𞤭: 𞤚𞤮𞤺𞤮 𞤣𞤵𞤻𞤢𞤴 𞤯𞤭𞤴𞤢 𞤤𞤢𞥄𞤥𞤵𞥅𞤶𞤭⹁ 𞤫 𞤶𞤢𞤲𞤺𞤭𞤪𞤯𞤫⹁ 𞤫 𞤲𞤶𞤵𞤩𞥆𞤵𞤤𞤫 𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞥅𞤶𞤫 𞤫 𞤳𞤢𞤬𞤤𞤫 𞤳𞤢𞤪𞤢𞤤𞥆𞤫 𞤯𞤫𞤲 𞤬𞤭𞥅 𞤱𞤮𞤨𞥆𞤵𞤺𞤮𞤤 𞤲𞤦𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤⹁ 𞤸𞤵𞥅𞤱𞤼𞤮𞤪𞤢 𞤐𞤄𞤫𞤪𞤼𞤢𞤤 𞤂𞤫𞤴𞤣𞤭 𞤊𞤮𞤼𞤲𞤢𞥄𞤲𞤣𞤭.

𞤁𞤭𞤧𞤫𞤴 𞤴𞤵𞤩𞥆𞤭𞤲’𞤣𞤭𞤪𞤭 𞤭𞤥𞥆𞤢𞤲𞤣𞤫 𞤬𞤭𞥅 𞤶𞤢𞤩𞤵𞤺𞤮𞤤 𞤐𞤄𞤫𞤪𞤼𞤢𞤤 𞤲𞤺𞤢𞤤 𞤫 𞤼𞤭𞥅𞤯𞤲𞤢𞥄𞤶𞤫 𞤀𞤬𞤪𞤭𞤳 𞤬𞤭𞥅 𞤪𞤭𞥅𞤱𞤵𞤺𞤮𞤤 𞤲𞤣𞤮𞤲𞤣𞤭 𞤳𞤢𞤪𞤸𞤢𞥄𞤳𞤵 𞤲𞤣𞤭𞤲⹁ 𞤳𞤮𞤲𞤮 𞤲𞤮𞤲 𞤱𞤮𞤲𞤢𞥄 𞤬𞤭𞥅 𞤸𞤢𞤩𞤵𞤺𞤮𞤤 𞤉𞤪𞤮𞤨 𞤥𞤢𞤤𞥆𞤢 𞤈𞤫𞤲𞤣𞤮𞥅𞤶𞤭 𞤺𞤮𞥅.

𞤊𞤢𞥄𞤸𞤭𞤲⹁ 𞤮 𞤩𞤫𞤴𞤣𞤭 𞤱𞤮𞤲𞤣𞤫𞤥𞤢: “𞤒𞤢𞥄𞤶𞤵𞤺𞤮𞤤 𞤖𞤵𞥅𞤱𞤼𞤮𞤪𞤫𞥅𞤣𞤫 𞤲𞤦𞤫𞤪𞤼𞤢𞤤 𞤃𞤫𞤪𞤳𞤢𞤼𞤮𞥅𞤪 𞤲𞤺𞤢𞤤⹁ 𞤳𞤮 𞤼𞤢𞤤𞥆𞤢𞤤-𞤤𞤢𞤳𞥆𞤫 𞤳𞤢𞤪𞤸𞤢𞥄𞤳𞤵.” 

“𞤀𞤣𞤲𞤢𞥄𞤪𞤵 𞤲𞤣𞤵𞤲 𞤲𞤮 𞤱𞤢𞤴𞤤𞤢𞥄𞤣𞤫. 𞤀𞤬𞤪𞤭𞤳 𞤳𞤢𞤣𞤭 𞤲𞤮 𞤱𞤢𞤴𞤤𞤢𞥄𞤣𞤫.“