𞤑𞤀𞤚𞤀𞤈 𞥒𞥐𞥒𞥒⹁ 𞤛𞤀𞤂𞤀𞤏 𞤇𞤀𞥄𞤏𞤌 𞤛𞤀𞤂𞤀𞤏

𞤘𞤭𞤤𞤢 𞤫 𞤪𞤫𞤬𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥒𞥐 𞤶𞤮𞤤𞤮 𞥒𞥐𞥒𞥒⹁ 𞤴𞤭𞤥𞤩𞤫 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤬𞤮𞤱 𞤲𞤮 𞤬𞤫𞤱𞤼𞤭 𞤑𞤢𞤼𞤢𞤪 𞤬𞤭𞥅 𞤊𞤮𞥅𞤤𞤮𞤼𞤭𞤪𞤢𞤤 𞤢𞤣𞤵𞤲𞤢𞤴𞤳𞤮𞤱𞤢𞤤 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫.

𞤇𞤢𞥄𞤱𞤮 𞤅𞤀𞤏𞤓𞤁𞤋 𞤨𞤭𞤴𞤵𞤣𞤫 𞤀𞤈𞤔𞤀𞤐𞤚𞤋𞤐𞤀 𞤸𞤢𞤲𞤳𞤭 𞤳𞤵𞥅𞤤𞤫 𞤯𞤭𞤯𞤭 𞤱𞤵𞤪𞤼𞤢𞥄 𞤺𞤮𞥅𞤼𞤢𞤤⹁ 𞤸𞤢𞤲𞤣𞤫 𞤫 𞤻𞤢𞤤𞥆𞤢𞤤 𞤲𞤢𞤴𞤢𞤩𞤢𞤤 𞤲𞤺𞤢𞤤⹁ 𞤳𞤮 𞤁𞤌𞤒𞤅𞤂𞤀𞤐𞤁 (𞤀𞤤𞤥𞤢𞤲) 𞤸𞤫𞤩𞤭 𞤳𞤮 𞤽𞤢𞤤𞤯𞤭𞤲𞤭 𞤯𞤵𞤥 𞤫 𞤤𞤫𞤴 𞤳𞤮𞤴𞤯𞤫 𞤔𞤀𞤆𞤀𞤐 𞤧𞤢𞤦𞤵𞤲𞤢 𞤶𞤢𞤨𞤢𞤲𞤢𞥄𞤩𞤫 𞤩𞤫𞤲 𞤨𞤭𞤴𞤵𞤲𞤮 𞤩𞤫 𞤳𞤵𞥅𞤤𞤫 𞤯𞤭𞤯𞤭⹁ 𞤩𞤫 𞤱𞤵𞤪𞤼𞤭 𞤺𞤮𞥅𞤼𞤢𞤤.

𞤍𞤵𞤥 𞤸𞤮𞥅𞤤𞥆𞤭𞥅 𞤱𞤮𞤲𞤣𞤫𞤥𞤢 𞤫 𞤲𞤺𞤢𞤤 𞤬𞤮𞥅𞤤𞤮𞤼𞤭𞤪𞤢𞤤 𞤸𞤭𞤳𞥆𞤢⹁ 𞤸𞤢𞤴 𞤺𞤮𞥅𞤼𞤮 𞤱𞤮𞤼𞤢 𞤸𞤢𞤦𞥆𞤮 𞤳𞤮 𞤱𞤮𞥅𞤱𞤭 𞤳𞤮𞤲 𞤧𞤢𞤦𞤵𞤲𞤢 𞤸𞤢𞤴 𞤺𞤮𞥅𞤼𞤮 𞤼𞤭𞤶𞥆𞤢𞤲𞤮𞥅𞤳𞤭 𞤅𞤀𞤏𞤓𞤁𞤋 𞤣𞤢𞤪𞤼𞤮𞤼𞤮𞤲𞤮 𞤀𞤈𞤔𞤀𞤐𞤚𞤋𞤐𞤀 𞤧𞤢𞤳𞤢 𞤨𞤭𞤴𞤢 𞤩𞤫. 𞤍𞤵𞥅𞤯𞤵𞤩𞤫 𞤳𞤮 𞤶𞤭𞤩𞤭𞤲𞤮𞥅 𞤢𞤲𞤣𞤵𞤣𞤫⹁ 𞤳𞤮 𞤳𞤵𞥅𞤤𞤫 𞤶𞤫𞤤𞤵 𞤳𞤭𞤨𞥆𞤵 𞤂𞤭𞤴𞤮𞤲𞤫𞤤 𞤃𞤫𞤧𞤭 𞤲𞤺𞤵𞤲 𞤨𞤭𞤴𞤭𞤪𞤢𞤴𞤲𞤮𞥅 𞤅𞤢𞤱𞤵𞤣𞤭. 𞤔𞤢𞤳𞤢 𞤨𞤭𞤺𞥆𞤢𞤤 𞤲𞤺𞤢𞤤 𞤳𞤮 𞤳𞤢𞤥𞤩𞤫 𞤢𞤪𞤶𞤢𞤲𞤼𞤭𞤲𞤢𞥄𞤩𞤫 𞤩𞤫𞤲 𞤸𞤢𞤦𞥆𞤭𞤲𞤮𞥅.

𞤑𞤮 𞤲𞤢𞥄𞤣𞤢𞤲𞤭 𞤅𞤢𞤱𞤵𞤣𞤭 𞤳𞤵𞥅𞤤𞤫 𞤯𞤫𞤲 𞤳𞤮 𞤅𞤢𞥄𞤤𞤭𞤸𞤵 𞤀𞤤 𞤡𞤢𞤸𞤪𞤭 𞤳𞤢 𞤸𞤮𞤶𞤮𞤥𞤫𞤪𞤫 𞥔𞥙𞤩𞤫𞤪𞤫 𞤳𞤢𞤻𞤵𞤲 𞤫 𞤅𞤢𞤤𞤢𞥄𞤥 𞤀𞤤 𞤁𞤢𞤱𞤧𞤢𞤪𞤭 𞤳𞤢 𞤸𞤮𞤶𞤮𞤥𞤫𞤪𞤫 𞥕𞥓𞤩𞤫𞤪𞤫. 𞤑𞤮𞤲𞤮 𞤳𞤮 𞤂𞤭𞤴𞤮𞤲𞤫𞤤 𞤃𞤫𞤧𞤭 𞤢𞤣𞤭𞥅 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤱𞤮𞤲𞤢𞤲𞤣𞤫 𞤀𞤪𞤶𞤢𞤲𞤼𞤭𞤲𞤢 𞤳𞤢 𞤸𞤮𞤶𞤮𞤥𞤫𞤪𞤫 𞥑𞥐𞥋𞤩𞤫𞤪𞤫.

𞤕𞤢𞤺𞥆𞤢𞤤 𞤅𞤢𞤱𞤵𞤣𞤭 𞤫 𞤀𞤪𞤶𞤢𞤲𞤼𞤭𞤲𞤢⹁ 𞤤𞤫𞤴𞤯𞤫 𞤶𞥆𞤫𞤺𞤮𞤮 𞤬𞤭𞤶𞤵𞤲𞤮 𞤳𞤢𞤣𞤭 𞤸𞤢𞤲𞤳𞤭.

𞤁𞤢𞤲𞤥𞤢𞤪𞤳 𞤫 𞤚𞤵𞤲𞤭𞥅𞤧𞤭 𞤬𞤮𞤼𞥆𞤵𞤲𞤮 𞤳𞤮𞤲𞤮 𞤸𞤢𞤴 𞤺𞤮𞥅𞤼𞤮 𞤬𞤮𞥅𞤤𞤢𞥄𞤲𞤮. 𞤑𞤮 𞤱𞤢𞤲𞤮 𞤲𞤮𞤲 𞤳𞤢𞤣𞤭 𞤸𞤢𞤳𞥆𞤵𞤲’𞤣𞤫 𞤃𞤫𞤳𞤧𞤭𞤳 𞤫 𞤆𞤮𞤤𞤮𞤻 𞤧𞤫𞤪𞤼𞤭𞤪𞤭 𞤫 𞤸𞤮𞥅𞤪𞤫 𞤩𞤮𞤤𞤢𞤤. 𞤑𞤮𞤲𞤮 𞤳𞤵𞥅𞤤𞤫 𞤯𞤫𞤲 𞤸𞤭𞤦𞥆𞤵𞤲𞤮 𞤸𞤢𞥄 𞤣𞤮𞤭 𞤤𞤭𞥅𞤦𞤵𞤣𞤫 𞤸𞤢𞤳𞥆𞤵𞤲’𞤣𞤫 𞤊𞤢𞤪𞤢𞤲𞤧𞤭 𞤫 𞤌𞤧𞤼𞤢𞤪𞤢𞤤𞤭. 𞤌𞤧𞤼𞤢𞤪𞤢𞤤𞤭 𞤢𞤣𞤭𞤲𞤮 𞤱𞤢𞤯𞤵𞤣𞤫 𞤳𞤵𞥅𞤤𞤢𞤤 𞤳𞤮𞤲𞤮 𞤲𞤺𞤢𞤤 𞤱𞤮𞤲𞤼𞤢𞤲𞥆𞤮 𞤩𞤫 𞤳𞤢𞤼𞤢𞥄 𞤧𞤢𞤦𞤵𞤲𞤢 𞤊𞤢𞤪𞤢𞤲𞤧𞤭 𞤤𞤵𞥅𞤦𞤮𞤪𞤲𞤮 𞤩𞤫 𞤳𞤵𞥅𞤤𞤫 𞤲𞤢𞤴𞤭.

𞤌𞤤𞤭𞤾𞤭𞤴𞤫 𞤔𞥊𞤭𞤪𞤵 𞤲𞤢𞥄𞤣𞤢𞤲𞤭 𞤩𞤫 𞤳𞤵𞥅𞤤𞤫 𞥒⹁ 𞤀𞤣𞤪𞤭𞤴𞤫𞤲 𞤈𞤢𞤦𞤭𞤴𞤮 𞤱𞤢𞤯𞤭 𞤳𞤵𞥅𞤤𞤢𞤤. 𞤑𞤮 𞤐𞤦𞤢𞤨𞥆𞤫 𞤼𞤢𞤥𞥆𞤭𞤲𞤢𞤲𞥆𞤮 𞤊𞤢𞤪𞤢𞤲𞤧𞤭 𞤳𞤵𞥅𞤤𞤫 𞤯𞤫𞤲 𞤳𞤢 𞤸𞤮𞤶𞤮𞤥𞤫𞤪𞤫 𞥖𞥗𞥋.

𞤊𞤢𞤪𞤢𞤲𞤧𞤭 𞤼𞤢𞤦𞤭𞤲𞤼𞤭𞤲𞤭𞤪𞤭𞥅 𞤲𞤺𞤢𞤢𞤤 𞤨𞤮𞥅𞤤𞤺𞤢𞤤 𞤯𞤮𞥅 𞤱𞤮𞤲𞤣𞤫𞤥𞤢 𞤳𞤮 𞤳𞤢𞤥𞤩𞤫 𞤱𞤮𞤲𞤭 𞤳𞤢 𞤸𞤮𞥅𞤪𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤫 𞤲𞤣𞤫𞤪 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲. 𞤑𞤮 𞤳𞤢𞤥𞤩𞤫 𞤶𞤮𞤺𞤭𞥅 𞤬𞤫𞤤𞤺𞤮 𞤲𞤺𞤮𞤲 𞤬𞤫𞤱𞤲𞤣𞤮 𞤯𞤮𞥅 𞤧𞤢𞤦𞤵𞤲𞤢 𞤳𞤮 𞤳𞤢𞤥𞤩𞤫 𞤰𞤫𞤼𞥆𞤵𞤲𞤮𞥅 𞤲𞤺𞤮 𞤳𞤢 𞤬𞤮𞥅𞤤𞤮𞤼𞤭𞤪𞤢𞤤 𞤧𞤢𞤳𞥆𞤭𞤼𞤭𞥅𞤲𞤺𞤢𞤤 𞤱𞤢𞤯𞤵𞤣𞤫 𞤫 𞥒𞥐𞥑𞥘.


𞤖𞤢𞤲𞤣𞤫 𞤫 𞤐𞤶𞤫𞤧𞤤𞤢𞥄𞤪𞤫 𞤫 𞤲𞤺𞤢𞤢𞤤 𞤻𞤢𞥄𞤤𞤢𞤤 𞤲𞤢𞤴𞤢𞤩𞤢𞤤 𞤯𞤮𞤮⹁ 𞤻𞤢𞤤𞤲𞤣𞤫 𞥒𞥓 𞤔𞤮𞤤𞤮⹁ 𞤃𞤢𞤪𞤮𞤳 𞤫 𞤑𞤮𞤪𞤮𞤱𞤢𞤧𞤭 𞤬𞤮𞤼𞥆𞤵𞤲𞤮 𞤳𞤮𞤲𞤮 𞤩𞤫 𞤧𞤫𞥅𞤣𞤭𞤪𞤭 𞤩𞤮𞤤𞤢𞤤.

𞤉𞤧𞤨𞤢𞤻 𞤲𞤮 𞤧𞤢𞥄𞤼𞤭𞤲𞤢𞤲𞤭 𞤑𞤮𞤧𞤼𞤢 𞤈𞤭𞤳𞤢 𞤨𞤭𞤺𞥆𞤢𞤤 𞤧𞤢𞤦𞤵𞤲𞤢 𞤩𞤫 𞤱𞤢𞤯𞤭𞥅 𞤩𞤫 𞤳𞤵𞥅𞤤𞤫 𞤼𞤢𞤼𞤭 𞤸𞤢𞤴 𞤬𞤭𞤶𞤮 𞤲𞤺𞤮𞤲 𞤬𞤫𞤷𞥆𞤢𞥄𞤤𞤭 𞤫 𞤸𞤢𞤳𞥆𞤵𞤲’𞤣𞤫 𞤼𞤢𞤸𞤮. 𞤅𞤭 𞤩𞤫𞥅 𞤯𞤭𞤯𞤮 𞤺𞤢𞤴𞤲𞤭𞥅⹁ 𞤳𞤮 𞤄𞤫𞤤𞤧𞤭𞤳 𞤫 𞤑𞤢𞤲𞤢𞤣𞤢 𞤲𞤢𞤲𞤺𞤮𞤲’𞤣𞤭𞤪𞤼𞤢.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤚𞤢𞤦𞤢𞤤𞤣𞤫 𞤲𞤣𞤫𞤲 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤑𞤢𞤼𞤢𞤪