𞤀𞤁𞤂𞤢𞤃⹁ 𞤀𞥄𞤂𞤀 𞤏𞤓𞥅𞤈𞤋𞤈𞤑𞤀⹁ 𞤏𞤓𞥅𞤈𞤐𞤋𞤈𞤑𞤀 𞤆𞤓𞤂𞤀𞤈

𞤀𞤁𞤂𞤢𞤃⹁ 𞤀𞥄𞤤𞤢 𞤏𞤵𞥅𞤪𞤭𞤪𞤳𞤢⹁ 𞤏𞤵𞥅𞤪𞤲𞤭𞤪𞤳𞤢 𞤆𞤵𞤤𞤢𞤪.
𞤘𞤭𞤤𞤢 𞤲𞤶𞤢𞤺𞥆𞤵 𞤆𞤮𞤪𞤼𞤮 𞤬𞤵𞤯𞥆𞤭 𞤀𞤬𞤪𞤭𞤳⹁ 𞤆𞤵𞤤𞤢𞤪 𞤫 𞤯𞤫𞤲𞤯𞤫 𞤀𞤬𞤪𞤭𞤳 𞤸𞤫𞤣𞥆𞤭𞥅𞤯𞤫 𞤯𞤫𞤲 𞤲𞤮 𞤱𞤢𞤴𞤤𞤢𞥄𞤣𞤫 𞤥𞤮𞤰𞥆𞤢 𞤼𞤫𞤲𞤼𞤭𞤲𞤭𞥅 𞤺𞤭𞤤𞤢 𞤲𞤣𞤭𞤥𞤢𞤲𞤳𞤢𞥄𞤳𞤵 𞤲𞤺𞤵𞤲 𞤸𞤫𞤩𞤼𞤭𞤼𞤢𞥄 𞤼𞤫𞤤𞤫𞤲 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐. 𞤑𞤮 𞤱𞤢𞤯𞤭 𞤲𞤮𞤲 𞤯𞤵𞤥⹁ 𞤳𞤮 𞤼𞤢𞤱𞤵𞤣𞤫 𞤶𞤮𞥅𞤲𞤭⹁ 𞤳𞤢 𞤣𞤵𞤯𞤫 𞤤𞤢𞥄𞤥𞤵⹁ 𞤳𞤮 𞤔𞤢𞤲𞤺𞤵𞤺𞤮𞤤 𞤫 𞤔𞤢𞤲𞤺𞤭𞤲𞤭𞤪𞤺𞤮𞤤 𞤫 𞤯𞤫𞤲𞤯𞤫 𞤨𞤮𞤪𞤼𞤮𞥅𞤩𞤫 𞤩𞤫𞤲 𞤤𞤮𞤤𞥆𞤭⹁ 𞤶𞤢𞥄𞤤𞤭𞥅 𞤳𞤢𞤣𞤭 𞤬𞤮𞤼𞤢.

𞤑𞤮 𞤸𞤢𞥄𞤲𞤵𞤲𞤮𞥅 𞤤𞤫⹁ 𞤩𞤢𞥄𞤱𞤮 𞤫𞤲 𞤸𞤫𞤩𞤼𞤵𞤣𞤫 𞤲𞤣𞤭𞤥𞤢𞤲𞤳𞤢𞥄𞤳𞤵 𞤥𞤫𞥅𞤯𞤫𞤲 𞤲𞤺𞤵𞤲⹁ 𞤳𞤮 𞤴𞤮 𞤫𞤲 𞤱𞤵𞥅𞤪𞤲𞤭𞤼𞤵 𞤯𞤫𞤲𞤯𞤫 𞤥𞤫𞥅𞤯𞤫𞤲 𞤯𞤫𞤲⹁ 𞤲𞤣𞤫 𞤼𞤢𞤱𞤵𞤲𞤮𞥅 𞤸𞤢𞤪𞤭 𞤸𞤭𞤯𞤫 𞤶𞤢𞤲𞤺𞤭𞤪𞤫𞥅𞤣𞤫 𞤲𞤮 𞤤𞤢𞤦𞤭𞤪𞤢𞥄 𞤢𞤣𞤮 𞤤𞤢𞥄𞤥𞤵 𞤨𞤮𞤪𞤼𞤮. 𞤏𞤢𞤲𞤮 𞤥𞤢𞥄𞤳𞤭𞤪𞤭 𞤲𞤮𞤲 𞤕𞤫𞤪𞤲𞤮 𞤀𞤤𞤭𞥅𞤱𞤵 𞤇𞤵𞥅𞤩𞤢 𞤐𞤣𞤭𞤴𞤢𞤲 “𞤀𞤣𞤮 𞤢𞤪𞤣𞤵 𞤆𞤮𞤪𞤼𞤮 𞤳𞤢 𞤥𞤫𞤫𞤲⹁ 𞤸𞤢𞤪𞤭 𞤶𞤢𞤲𞤺𞤣𞤫 𞤆𞤵𞤤𞤢𞤪 𞤬𞤮𞤳𞥆𞤭𞤲𞤼𞤭𞤲𞤭𞤪𞤢𞥄𞤥𞤢 𞤲𞤮 𞤤𞤢𞤦𞤭𞤪𞤢𞤲𞤮𞥅”.

𞤊𞤭𞥅 𞤳𞤢𞤤𞤢 𞤬𞤫𞤱𞤲𞤣𞤮 𞤤𞤢𞥄𞤥𞤵 𞤅𞤫𞥅𞤳𞤵 𞤚𞤓𞥅𞤈𞤉 𞤶𞤢𞤲𞤺𞤭𞤲𞤺𞤮𞤤 𞤫 𞤯𞤫𞤲𞤯𞤫 𞤥𞤫𞤫𞤲 𞤬𞤵𞤯𞥆𞤭𞤼𞤢𞤲𞤮⹁ 𞤸𞤢𞤪𞤭 𞤫𞤩𞥆𞤭𞤪𞤢𞤲𞤮𞥅𞤳𞤢 𞤲𞤮 𞤸𞤢𞥄𞤲𞤭𞤪𞤭 𞤲𞤮𞤲. 𞤑𞤮 𞤯𞤵𞤲 𞤸𞤢𞤯𞤵𞤲𞤮𞥅 𞤴𞤮 𞤺𞤢𞤧𞤭𞤪 𞤲𞤮 𞤬𞤢𞥄𞤤𞤭𞤪𞤢𞤯𞤫𞤲 𞤲𞤮𞤲. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤩𞤢𞥄𞤱𞤼𞤭 𞤤𞤢𞥄𞤥𞤵 𞤥𞤢𞤳𞥆𞤮 𞤲𞤺𞤵𞤲⹁ 𞤳𞤮 𞤨𞤮𞤪𞤼𞤮 𞤊𞤢𞤪𞤢𞤲𞤧𞤭𞥅𞤩𞤫 𞤢𞤣𞥆𞤢𞤲𞤮𞥅 𞤳𞤮 𞤲𞤣𞤢𞤪𞤼𞤭𞤲𞤢 𞤬𞤢𞤴𞤩𞤫 𞤩𞤫𞤲. 𞤍𞤮𞥅 𞤴𞤮 𞤩𞤫 𞤼𞤢𞤧𞤳𞤮 𞤧𞤭 𞤬𞤢𞤴𞤩𞤫 𞤩𞤫𞤲 𞤱𞤢𞥄𞤱𞤭𞥅 𞤸𞤭𞥅𞤧𞤮 𞤥𞤢𞤤𞥆𞤢 𞤱𞤭𞤲𞤣𞤵𞤺𞤮𞤤 𞤶𞤢𞤲𞤺𞤢⹁ 𞤩𞤫 𞤼𞤢𞤧𞤳𞤭𞥅 𞤧𞤭 𞤬𞤢𞤴𞤩𞤫 𞤩𞤫𞤲 𞤲𞤮 𞤱𞤢𞥄𞤱𞤭𞥅 𞤱𞤭𞤲𞤣𞤵𞤣𞤫 𞤶𞤢𞤲𞤺𞤢 𞤬𞤢𞤪𞤢𞤲𞤧𞤫𞥅𞤪𞤫 𞤲𞤣𞤫 𞤩𞤫 𞤶𞤢𞤲𞤺𞤢𞥄𞤲𞤮 𞤤𞤫.

𞤐𞤮 𞤢𞤲𞤣𞤢𞥄 𞤲𞤮𞤲 𞤼𞤢𞤧𞤳𞤢𞤪𞤢𞤲 𞤥𞤢𞤩𞥆𞤫 𞤳𞤢𞤲 𞤳𞤮 𞤸𞤮𞤤𞥆𞤵𞤲𞤮𞥅 𞤱𞤮𞥅 𞤸𞤮𞤤𞥆𞤭⹁ 𞤩𞤫 𞤱𞤭𞤢𞤼𞤢𞥄𞤲𞤮 𞤶𞤢𞤲𞤺𞤵𞤺𞤮𞤤 𞤫 𞤯𞤫𞤲𞤯𞤫 𞤥𞤫𞥅𞤯𞤫𞤲 𞤯𞤫𞤲 𞤲𞤮 𞤥𞤮𞤰𞥆𞤭. 𞤑𞤮 𞤯𞤵𞤥 𞤱𞤢𞤯𞤭 𞤺𞤭𞤤𞤢 𞤮𞤲𞤼𞤵𞤥𞤢 𞤶𞤢𞤲𞤺𞤵𞤺𞤮𞤤 𞤫 𞤯𞤫𞤲𞤯𞤫 𞤥𞤫𞤫𞤲 𞤯𞤫𞤲 𞤱𞤮𞤨𞥆𞤢𞥄.

𞤑𞤮 𞤀𞤷𞥆𞤭𞤲𞤼𞤭𞤲𞤺𞤮𞤤 𞤶𞤢𞤲𞤺𞤣𞤫 𞤆𞤵𞤤𞤢𞤪 𞤲𞤣𞤫𞤲 𞤫 𞤤𞤮𞤤𞥆𞤵𞤺𞤮𞤤 𞤶𞤢𞤲𞤺𞤵𞤺𞤢𞤤 𞤯𞤫𞤲𞤯𞤫 𞤶𞤢𞤲𞤢𞤲𞤫 𞤯𞤫𞤲 𞤱𞤢𞤯𞤭 𞤸𞤢𞥄 𞤸𞤢𞤲𞤣𞤫 𞤳𞤢 𞤬𞤫𞤱𞤲𞤣𞤭𞥅 𞤯𞤮𞤮⹁ 𞤆𞤵𞤤𞤢𞤪 𞤲𞤺𞤢𞤤 𞤲𞤮 𞤥𞤢𞥄𞤴𞤵𞤣𞤫 𞤧𞤫𞥅𞤯𞤢 𞤧𞤫𞥅𞤯𞤢. 𞤳𞤮 𞤯𞤵𞤥 𞤱𞤢𞤯𞤭⹁ 𞤴𞤭𞤥𞤩𞤫 𞤦𞤵𞤴 𞤸𞤢𞤲𞤣𞤫⹁ 𞤱𞤵𞤪𞤭𞤲 𞤫𞤯𞤫𞤲 𞤱𞤢𞥄𞤱𞤭 𞤱𞤭𞤵𞤣𞤫 𞤩𞤵𞤪𞤵𞤩𞤫 𞤩𞤫𞤲 𞤫 𞤊𞤵𞤤𞤩𞤫 𞤩𞤫𞤲⹁ 𞤲𞤣𞤫 𞤫𞤩𞤫 𞤱𞤮𞤱𞤤𞤢 𞤆𞤵𞤤𞤢𞤪⹁ 𞤩𞤫 𞤶𞤭𞤤𞥆𞤢𞤴 𞤸𞤢𞥄𞤤𞤢 𞤥𞤢𞤤𞥆𞤢 𞤸𞤢𞥄𞤤𞤢𞥄𞤶𞤭 𞤺𞤮𞥅⹁ 𞤱𞤢𞤲𞤮 𞤊𞤢𞤪𞤢𞤲𞤧𞤫𞥅𞤪𞤫 𞤥𞤢𞤤𞥆𞤢 𞤉𞤲𞤺𞤫𞤤𞤫𞥅𞤪𞤫 𞤥𞤢𞥄 𞤉𞤧𞤨𞤢𞤻𞤮𞥅𞤪𞤫 𞤥𞤢𞥄 𞤖𞤢𞤱𞤧𞤢𞥄𞤪𞤫 𞤥𞤢𞥄 𞤀𞥄𞤪𞤢𞤦𞤫𞥅𞤪𞤫 𞤫 𞤳𞤮 𞤲𞤢𞤲𞤣𞤭𞤼𞤢𞤼𞤢 𞤫 𞤯𞤫𞤲.

𞤅𞤭 𞤫𞤲 𞤰𞤫𞤼𞥆𞤭𞥅 𞤫 𞤥𞤭𞤧𞤢𞤤⹁ 𞤆𞤵𞤤𞤢𞤪 𞤊𞤵𞥅𞤼𞤢 𞤔𞤢𞤤𞤮𞥅 𞤲𞤺𞤢𞤤⹁ 𞤥𞤢𞥄 𞤱𞤭𞤫𞤲 𞤆𞤵𞤤𞤢𞤪 𞤺𞤭𞤲𞤫 𞤲𞤺𞤢𞤤 𞤫 𞤸𞤢𞥄𞤤𞤫𞥅𞤼𞤫𞥅 𞤲𞤺𞤢𞤤 𞤼𞤢𞤳𞥆𞤮 𞤥𞤵𞤵𞤲⹁ 𞤮 𞤼𞤢𞤱𞤢𞤴 𞤳𞤮 𞤩𞤢𞤣𞤲𞤭 𞤳𞤮𞤲𞤺𞤵𞤯𞤭 𞤷𞤢𞤨𞥆𞤢𞤲𞤯𞤫 𞤼𞤢𞤼𞤭 𞤫 𞤲𞤣𞤫𞤪 𞤼𞤫𞥅𞤥𞤫𞤣𞤫𞤪𞤫 𞤳𞤮 𞤶𞤢𞤲𞤢𞤲𞤭. 𞤍𞤵𞤥 𞤲𞤮𞤲 𞤸𞤮𞤤𞥆𞤢𞥄 𞤱𞤮𞤲𞤣𞤫𞤥𞤢 𞤊𞤵𞤤𞤩𞤫 𞤺𞤭𞤲𞤫 𞤩𞤫𞤲 𞤴𞤫𞤺𞥆𞤭𞤼𞤭𞥅 𞤼𞤢𞤼𞤢𞤩𞤢𞤤 𞤳𞤮𞤲𞤺𞤵𞤯𞤭 𞤆𞤵𞤤𞤢𞤪 𞤯𞤭𞤲⹁ 𞤥𞤢𞥄 𞤧𞤭 𞤆𞤵𞤤𞤢𞤪 𞤢𞤤𞤢𞥄 𞤴𞤫𞤪𞤵 𞤱𞤢𞤤𞥆𞤢 𞤤𞤮𞤲𞤼𞤮 𞤯𞤭𞤲 𞤳𞤮𞤲𞤺𞤵𞤯𞤭. 𞤑𞤮𞤲𞤮 𞤲𞤮𞤲⹁ 𞤯𞤵𞤲 𞤲𞤮 𞤸𞤵𞤤𞤩𞤭𞤲𞤢𞤲𞤭𞥅 𞤸𞤢𞥄𞤤𞤢 𞤳𞤢𞤲 𞤩𞤢𞤴 𞤢𞤪𞤮𞤴𞤢𞤴𞤩𞤫 𞤩𞤫𞤲 𞤳𞤮 𞤲𞤮 𞤩𞤫 𞤲𞤢𞤲𞤭𞤪𞤭 𞤲𞤮 𞤸𞤢𞥄𞤤𞤫𞥅 𞤱𞤮𞥅 𞤸𞤢𞤲𞤣𞤫⹁ 𞤩𞤫 𞤱𞤮𞤱𞤤𞤭𞤪𞤮𞤴𞤼𞤢 𞤳𞤢𞤥𞤩𞤫 𞤳𞤢𞤣𞤭 𞤶𞤢𞤲𞤺𞤮⁏ 𞤫 𞤸𞤭𞤲𞤤𞤫 𞤳𞤮 𞤬𞤫𞤷𞥆𞤫𞤪𞤫 𞤆𞤵𞤤𞤢𞤪 𞤬𞤫𞤷𞥆𞤫𞤪𞤫 𞤸𞤢𞥄𞤤𞤢𞥄𞤶𞤭 𞤶𞤢𞤲𞤢𞤲𞤭 𞤩𞤫 𞤱𞤮𞤲𞤭 𞤫 𞤲𞤢𞤲𞤵𞤣𞤫.

𞤒𞤫𞤼𞥆𞤮𞥅𞤪𞤫 𞤱𞤮𞥅𞤣𞤢𞤲𞤭𞥅 𞤺𞤫𞤲𞤮 𞤮𞤲⹁ 𞤴𞤮𞤺𞤢 𞤫 𞤊𞤵𞤤𞤩𞤫 𞤲𞤮 𞤼𞤭𞥅𞤯𞤲𞤢𞤲𞤭𞥅 𞤸𞤭𞤱𞤵𞤺𞤮𞤤 𞤆𞤵𞤤𞤢𞤪 𞤫 𞤆𞤵𞤤𞤢𞥄𞤺𞤵 𞤺𞤭𞤤𞤢 𞤕𞤫𞤪𞤲𞤮 𞤃𞤵𞤸𞤢𞤥𞥆𞤢𞤣𞤵 𞤅𞤢𞤥𞤦𞤢 𞤃𞤮𞤲𞤦𞤫𞤴𞤢𞥄 𞤸𞤢𞥄 𞤸𞤫𞤱𞤼𞤢 𞤕𞤪 𞤀𞤦𞤣𞤵𞤤𞥆𞤢𞥄𞤸𞤭 𞤫 𞤕𞤪 𞤋𞤦𞤵𞤪𞤢𞥄𞤸𞤭𞥅𞤥𞤢 𞤄𞤢𞤪𞤭 𞤧𞤭𞤲𞤷𞤵𞤩𞤫 𞤦𞤭𞤲𞤣𞤭 𞤀𞤁𞤂𞤢𞤃 𞤳𞤮 𞤱𞤵𞤪𞤲𞤭𞤼𞤢 𞤆𞤵𞤤𞤢𞤪⹁ 𞤧𞤫𞤤𞥆𞤭𞤲𞤢 𞤳𞤮 𞤱𞤮𞤱𞤤𞤫𞤼𞤫𞥅 𞤫 𞤳𞤮 𞤱𞤭𞤲𞤣𞤫𞤼𞤫𞥅.

𞤀𞤁𞤂𞤢𞤃 𞤳𞤮 𞤢𞤤𞤳𞤵𞤤𞤫 𞥒𞥘 𞤬𞤭𞥅 𞤆𞤵𞤤𞤢𞤪 𞤫 𞤢𞤤𞤳𞤵𞤤𞤫 𞥖 𞤩𞤫𞤴𞤣𞤭𞤼𞤢𞥄𞤯𞤫 𞤬𞤭𞥅 𞤴𞤮𞤺𞤢 𞤫 𞤯𞤫𞤲𞤯𞤫 𞤀𞤬𞤪𞤭𞤳𞤲𞤢𞥄𞤶𞤫. 𞤑𞤮 𞤯𞤵𞤲 𞤱𞤮𞤲𞤭 𞤢𞤤𞤳𞤵𞤤𞤫 𞥓𞥔 𞤼𞤢𞤱𞤼𞤭 𞤤𞤭𞤥𞤮𞥅𞤶𞤫 𞥑𞥐.

𞤀𞤁𞤂𞤢𞤃 𞤲𞤮 𞤬𞤭𞤪𞤭 𞤀𞤤𞤳𞤵𞤤𞤫 𞤁𞤢𞤲𞤣𞤢𞤴𞤯𞤫 𞤂𞤫𞤻𞤮𞤤 𞤃𞤵𞤤𞤵𞤺𞤮𞤤. 𞤊𞤭𞤪𞤮 𞤩𞤵𞤪𞤢𞤼𞤢𞥄 𞤲𞤺𞤮𞥅 𞤯𞤮𞤮. 𞤑𞤮 𞤱𞤢𞤯𞤭 𞤲𞤮𞤲 𞤸𞤭𞤲’𞤺𞤮 𞤸𞤵𞥅𞤩𞤭 𞤬𞤢𞥄𞤲𞤣𞤢𞥄𞤪𞤫 𞤧𞤭𞤲𞤷𞤵𞤺𞤮𞤤 𞤦𞤭𞤲𞤣𞤭 𞤯𞤭𞤲. 𞤍𞤵𞤥 𞤳𞤮 𞤱𞤵𞤪𞤲𞤭𞤼𞤵𞤺𞤮𞤤 𞤳𞤮 𞤥𞤢𞥄𞤴𞤵𞤲𞤮𞥅 (𞤶𞤢𞤲𞤺𞤣𞤫 𞤆𞤵𞤤𞤢𞤪)⁏ 𞤯𞤢𞤩𞥆𞤭𞤼𞤵𞤺𞤮𞤤 𞤳𞤮 𞤥𞤢𞤶𞥆𞤵𞤲𞤮𞥅 (𞤴𞤮𞤺𞤢 𞤫 𞤳𞤮𞤲𞤺𞤵𞤯𞤭 𞤆𞤵𞤤𞤢𞤪 𞤫 𞤨𞤭𞤲𞤫 𞤊𞤵𞤤𞤩𞤫)⁏ 𞤴𞤭𞥅𞤼𞤭𞤲𞤣𞤭𞤺𞤮𞤤 𞤳𞤮 𞤥𞤢𞤶𞥆𞤮𞤲𞥋𞤣𞤭𞤪𞤲𞤮𞥅 (𞤊𞤵𞤤𞤩𞤫 𞤢𞤣𞤵𞤲𞤢𞥄𞤪𞤵 𞤲𞤮 𞤥𞤢𞤶𞥆𞤮𞤲𞥋𞤣𞤭𞤪𞤲𞤮𞥅 𞤸𞤢𞥄 𞤼𞤢𞤱𞤭 𞤨𞤵𞤤𞤬𞤵𞤤𞤫 𞤯𞤫𞤲 𞤲𞤮 𞤧𞤫𞤪𞤼𞤵𞤣𞤫. 𞤆𞤵𞤤𞤢𞤪 𞤘𞤭𞤲𞤫 𞤲𞤮 𞤧𞤫𞥅𞤣𞤭 𞤧𞤫𞥅𞤯𞤢 𞤫 𞤆𞤵𞤤𞤢𞥄𞤪 𞤅𞤫𞤲𞤫𞤺𞤢𞤤⹁ 𞤊𞤵𞤤𞤬𞤵𞤤𞤣𞤫 𞤃𞤢𞤤𞤭 𞤲𞤮 𞤧𞤫𞥅𞤣𞤭 𞤫 𞤊𞤵𞤤𞤬𞤵𞤤𞤣𞤫 𞤑𞤢𞤥𞤫𞤪𞤵𞤲 𞤥𞤢𞥄 𞤐𞤢𞤶𞤫𞥅𞤪𞤭𞤴𞤢⹁ 𞤲𞤮𞤲 𞤲𞤮𞤲 𞤲𞤮𞤲).

𞤀𞤁𞤂𞤢𞤃 𞤢𞤪𞤭𞥅 𞤯𞤢𞤩𞥆𞤭𞤼𞤭𞥅 𞤸𞤢𞥄 𞤶𞤢𞥄𞤤𞤭𞤲𞤭𞥅 𞤳𞤮𞤲𞤺𞤵𞤯𞤭 𞤥𞤢𞤶𞥆𞤵𞤲𞤮𞥅𞤯𞤭 𞤫 𞤲𞤮𞤳𞥆𞤵𞥅𞤶𞤫 𞤺𞤮𞤮 𞤱𞤢𞤲𞤮 𞤻𞤢𞤤𞤯𞤭 𞤴𞤮𞤲𞤼𞤫𞤪𞤫 𞤯𞤭𞤲⹁ 𞤥𞤢𞥄 𞤤𞤫𞤦𞥆𞤭 𞤲𞤢𞥄𞤲𞤺𞤫𞤴𞤢𞤲𞤳𞤮𞥅𞤶𞤭 𞤯𞤭𞤲 𞤫 𞤳𞤮𞤲𞤺𞤵𞤯𞤭 𞤳𞤫𞤧𞤭 𞤺𞤮𞤮 𞤱𞤢𞤲𞤮 𞤬𞤮𞥅𞤺𞤭𞤪𞤺𞤢𞤤⹁ 𞤢𞤱𞤤𞤭𞤼𞤮𞤤⹁ 𞤫𞤱𞤲𞤮𞤪𞤳𞤵𞤲⹁…

𞤘𞤮𞤤𞥆𞤫 𞤀𞤁𞤂𞤢𞤃 𞤯𞤫𞤲 𞤸𞤢𞤲𞤣𞤫 𞤬𞤫𞤰𞥆𞤭𞥅 𞤱𞤭𞤲𞤣𞤭𞤲𞥋𞤣𞤭𞤪𞤢𞤲𞤺𞤮𞤤 𞤩𞤢𞤼𞤢𞥄𞤳𞤭 𞤥𞤢𞤤𞥆𞤢 𞤱𞤭𞤲𞤣𞤵𞤺𞤮𞤤 𞤸𞤫𞤧𞤤𞤫⹁ 𞤸𞤢𞤲𞤣𞤫 𞤀𞤁𞤂𞤢𞤃 𞤱𞤮𞤲𞤭𞥅 𞤱𞤭𞤲𞤣𞤭𞤪𞤯𞤵𞤲 𞤫 𞤶𞤢𞤲𞤺𞤭𞤪𞤯𞤵𞤲 𞤳𞤮 𞤬𞤫𞤰𞥆𞤭⹁ 𞤳𞤮 𞤬𞤫𞤱𞤲𞤣𞤭𞥅 𞤫 𞤳𞤮 𞤧𞤢𞥄𞤼𞤭𞥅. 𞤀𞤁𞤂𞤢𞤃 𞤱𞤮𞤲𞤭𞥅 𞤳𞤢𞤣𞤭 𞤳𞤮 𞤱𞤭𞤲𞤣𞤭𞤪𞤫𞥅 𞤶𞤢𞤲𞤺𞤭𞤪𞤫𞥅 𞤣𞤭𞥅𞤲𞤢 𞤫 𞤺𞤢𞤲𞤣𞤫 𞤳𞤫𞤧𞤫⁏ 𞤳𞤮 𞤣𞤢𞤱𞤪𞤮𞤪𞤫𞥅⹁ 𞤳𞤮 𞤤𞤢𞥄𞤥𞤮𞤪𞤫𞥅 𞤤𞤫𞤴𞤯𞤫 𞤫 𞤥𞤮𞤶𞤮𞤦𞤫 𞤢𞤣𞤵𞤲𞤢𞤴𞤢𞤲𞤳𞤮𞥅𞤶𞤫⹁ 𞤳𞤮 𞤴𞤫𞥅𞤴𞤭𞤪𞤫𞥅 𞤫 𞤳𞤮 𞤥𞤮𞤰𞥆𞤭𞤲𞤭𞤪𞤫𞥅 𞤨𞤭𞥅𞤶𞤭. 𞤄𞤭𞤲𞤣𞤭 𞤀𞤁𞤂𞤢𞤃 𞤯𞤭𞤭 𞤱𞤮𞤲𞤭𞥅 𞤳𞤮 𞤪𞤫𞤥𞤭𞤪𞤫𞥅⹁ 𞤢𞤴𞤲𞤭𞤪𞤫𞥅⹁ 𞤲𞤫𞤭𞤪𞤫𞥅 𞤣𞤢𞥄𞤦𞤫𞥅𞤶𞤭⁏ 𞤳𞤮 𞤺𞤮𞤤𞥆𞤭𞤪𞤫𞥅 𞤫 𞤬𞤮𞥅𞤺𞤭𞤪𞤯𞤫⹁ 𞤫 𞤫𞤱𞤲𞤮𞤪𞤯𞤫⹁ 𞤫 𞤢𞥄𞤤𞤢𞥄𞤶𞤭 𞤳𞤫𞤧𞤭 𞤸𞤫𞤣𞥆𞤭𞤼𞤭𞥅𞤯𞤭. 𞤑𞤢 𞤼𞤭𞤺𞤭 𞤼𞤭𞤺𞤭⹁ 𞤀𞤁𞤂𞤢𞤃 𞤱𞤮𞤲𞤭𞥅 𞤳𞤮 𞤱𞤵𞥅𞤪𞤭𞤪𞤫𞥅.

𞤀𞥄𞤤𞤢 𞤱𞤭𞤫𞤼𞤫𞥅𞤳𞤢 𞤀𞤁𞤂𞤢𞤃 𞤮𞤲 𞤲𞤮 𞤱𞤢𞤭 𞤱𞤢 𞤢𞥄𞤤𞤢𞥄𞤶𞤭 𞤸𞤫𞤣𞥆𞤭𞤼𞤭𞥅𞤯𞤭 𞤯𞤭𞤲 𞤬𞤮𞤨 𞤳𞤢 𞤢𞤣𞤵𞤲𞤢 𞤯𞤮𞤮. 𞤑𞤮 𞤢𞤲𞤣𞤵𞤯𞤮 𞤲𞤮 𞤳𞤢 𞤸𞤵𞥅𞤱𞤭𞤼𞤭𞤪𞤼𞤫𞥅 𞤱𞤮𞥅⹁ 𞤸𞤵𞥅𞤱𞤭𞤼𞤮𞤪𞤼𞤢⹁ 𞤳𞤮 𞤸𞤵𞥅𞤱𞤭𞤼𞤮𞤪𞤯𞤮 𞤱𞤮𞥅⹁ 𞤲𞤢𞤬𞤭𞤪𞤼𞤢 𞤲𞤢𞤬𞤭𞤼𞤮𞤪𞤢.

𞤔𞤢𞤲𞤺𞤵 𞤱𞤭𞤲𞤣𞤢𞥄 𞤺𞤮𞤤𞥆𞤭𞤼𞤭𞤪𞤢𞥄 𞤀𞤁𞤂𞤢𞤃⹁ 𞤲𞤢𞤬𞤢𞥄 𞤸𞤮𞥅𞤪𞤫 𞤥𞤢𞥄𞤯𞤢⹁ 𞤲𞤢𞤬𞤢𞥄 𞤩𞤫𞤴𞤲𞤺𞤵𞥅𞤪𞤫 𞤥𞤢𞤢⹁ 𞤲𞤢𞤬𞤢𞥄⹁ 𞤤𞤫𞤻𞤮𞤤 𞤥𞤢𞤢⹁ 𞤲𞤢𞤬𞤢𞥄 𞤤𞤫𞤴𞤣𞤭 𞤥𞤢𞥄𞤯𞤢⹁ 𞤲𞤢𞤬𞤢𞥄 𞤪𞤫𞤲𞤣𞤮 𞤥𞤢𞥄𞤯𞤢.

𞤀𞤦𞤣𞤵𞤧𞥆𞤢𞤤𞤢𞥄𞤥 𞤔𞤀𞤂𞥆𞤌

Abdoul Salam Diallo

𞤔𞤢𞤲𞤺𞤮𞥅𞤱𞤮 𞤳𞤢 𞤔𞤢𞥄𞤩𞤭𞤸𞤢𞤼𞥆𞤭𞤪𞤣𞤫 Zhejiang University, 𞤅𞤢𞤴𞤲𞤢.