𞤀𞤐𞤘𞤌𞤂𞤀𞥄 𞤅𞤌𞤈𞤚𞤋𞤑𞤉 𞤉 𞤌𞤆𞤉𞤑
𞤂𞤫𞤧𞤣𞤭 𞤀𞤲𞤺𞤮𞤤𞤢𞥄 𞤲𞤣𞤭𞤲 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤲𞤣𞤭 𞤧𞤮𞤪𞤼𞤮𞤼𞤮 𞤫 𞤥𞤮𞤶𞤮𞤦𞤫𞤪𞤫 𞤌𞤆𞤉𞤑 𞤲𞤣𞤫𞤲 𞤧𞤢𞤦𞤵 𞤴𞤫𞤣𞥆𞤮𞤲𞤣𞤭𞤪𞤢𞤤 𞤴𞤢𞤲𞤵𞤲’𞤺𞤢𞤤 𞤬𞤭𞥅 𞤫𞤥𞤦𞤫𞤪𞤫 𞤰𞤮𞥅𞤺𞤢𞤲𞤣𞤫 𞤸𞤢𞤨𞥆𞤢𞥄𞤲𞤣𞤫 𞤸𞤮𞥅𞤪𞤫 𞤤𞤫𞤧𞤣𞤭 𞤳𞤢𞤤𞤢.
𞤍𞤵𞤥 𞤱𞤢𞤯𞤭𞥅 𞤷𞤢𞤺𞥆𞤢𞤤 𞤬𞤫𞤱𞤶𞤮𞥅𞤪𞤫 𞤲𞤣𞤫 𞤰𞤫𞤼𞥆𞤭 𞤯𞤵𞤲⹁ 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤲𞤣𞤫 𞤤𞤢𞤪𞤫 𞥑𞥓 𞤫 𞤧𞤢𞤦𞤮𞤲’𞤣𞤭𞤪𞤢𞥄𞤶𞤫 𞤥𞤵𞤵𞤲 𞥑𞥐⹁ 𞤲𞤺𞤢𞤥 𞤵𞤧𞤼𞤵𞤺𞤮𞤤 𞤰𞤮𞥅𞤺𞤵𞤺𞤮𞤤 𞤲𞤫𞤦𞥆𞤢𞤥 𞤳𞤵𞤩𞥆𞤢𞤥 𞤬𞤭𞥅 𞤲𞤮 𞤷𞤮𞤺𞥆𞤵 𞤥𞤢𞤶𞥆𞤢𞤲 𞤩𞤫𞤴𞤣𞤮𞤪𞤢.
𞤉 𞤲𞤣𞤫𞤪 𞤁𞤵𞤦𞤵𞤲𞤫 𞥓𞥐 𞤦𞤢𞤪𞤭𞤤𞤶𞤭 𞤳𞤵𞤩𞥆𞤢𞤥⹁ 𞤯𞤭 𞤌𞤆𞤉𞤑 𞤰𞤮𞥅𞤺𞤢𞤼𞤢 𞤫 𞤻𞤢𞤤𞥆𞤢𞤤⹁ 𞤀𞤲𞤺𞤮𞤤𞤢 𞤼𞤵𞤲 𞤴𞤢𞤤𞤼𞤭𞤲𞤢𞤴 𞤦𞤢𞤪𞤭𞤤𞤶𞤭 𞤣𞤵𞤦𞤵𞤲𞤫𞤪𞤫 𞤱𞤮𞥅𞤼𞤫𞤪𞤫 𞤫 𞤳𞤮 𞤬𞤢𞤱𞤭.
𞤘𞤭𞤦𞤭 𞤲𞤺𞤢𞥄𞤤 𞤳𞤵𞤥𞤨𞤭𞤼𞤢𞤤 𞤴𞤢𞤤𞤼𞤭⹁ 𞤷𞤮𞤺𞥆𞤵 𞤳𞤵𞤩𞥆𞤢𞤥 𞤯𞤢𞤥 𞤶𞤭𞤨𞥆𞤮𞤪𞤭𞥅 𞤩𞤵𞤪𞤭 𞤁𞤢𞤤𞤢 𞤺𞤮𞥅𞤼𞤮⹁ 𞤶𞤮𞥅𞤲𞤭 𞤦𞤢𞤪𞤭𞤤 𞤸𞤫𞤱𞤼𞤭𞥅 𞤁𞤢𞤤𞤢 𞥗𞥘⹁𞥕.
𞤔𞤢𞥄𞤺𞤮𞤪𞤯𞤮 𞤀𞤲𞤺𞤮𞤤𞤢𞥄 𞤮𞤲 𞤳𞤢 𞤳𞤵𞤩𞥆𞤢𞤥 𞤫 𞤳𞤢 𞤲𞤺𞤢𞤤𞤵𞥅𞤶𞤭 𞤤𞤫𞤴𞤣𞤭 𞤸𞤮𞤤𞥆𞤭 𞤱𞤮𞤲𞤣𞤫 𞤀𞤲𞤺𞤮𞤤𞤢𞥄 𞤸𞤫𞤩𞤢𞤼𞤢𞥄 𞤸𞤢𞤴 𞤬𞤵𞤧 𞤫 𞤤𞤵𞤼𞥆𞤵𞤺𞤮𞤤 𞤫 𞤲𞤣𞤫𞤪 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫. 𞤊𞤭𞥅 𞤲𞤮 𞤥𞤫𞤲 𞤸𞤭𞤱𞤭𞤪𞤢 𞤳𞤫𞤩𞤫 𞤢𞤥𞤫𞤲⹁ 𞤥𞤫𞤲 𞤬𞤭𞤩𞤭𞥅 𞤧𞤮𞤪𞤼𞤢𞤺𞤮𞤤. 𞤅𞤭 𞤥𞤫𞤲 𞤤𞤵𞤼𞥆𞤭𞥅 𞤫 𞤌𞤆𞤉𞤑⹁ 𞤸𞤢𞤪𞤢𞤴 𞤳𞤮 𞤦𞤫𞥅 𞤀𞤲𞤺𞤮𞤤𞤢𞥄 𞤵𞤧𞤼𞤢 𞤰𞤮𞥅𞤺𞤢𞤲𞤣𞤫 𞤥𞤵𞤵𞤲 𞤲𞤣𞤫𞤲⹁ 𞤯𞤵𞤥 𞤤𞤫 𞤲𞤮 𞤤𞤵𞥅𞤲𞤣𞤭𞥅 𞤲𞤵𞤬𞤮𞥅𞤪𞤫 𞤫 𞤳𞤢𞥄𞤤𞤣𞤭𞤤𞤫 𞤢𞤥𞤫𞤲.
𞤑𞤮 𞤀𞤲𞤺𞤮𞤤𞤢𞥄 𞤫 𞤐𞤢𞤶𞤫𞤪𞤭𞤴𞤢 𞤱𞤮𞤲𞤭 𞤤𞤫𞤧𞤯𞤫 𞤩𞤵𞤪𞤢𞤴𞤯𞤫 𞤴𞤢𞤤𞤼𞤭𞤲𞤣𞤫 𞤳𞤵𞤩𞥆𞤢𞤥 𞤫 𞤲𞤣𞤫𞤪 𞤀𞤬𞤪𞤭𞤳 𞤂𞤢𞤸𞤫𞥅𞤪𞤭. 𞤍𞤫𞥅 𞤤𞤫𞤧𞤯𞤫 𞤯𞤭𞤯𞤭 𞤥𞤫𞥅𞤯𞤢𞥄 𞤱𞤫𞤤𞤼𞤮𞤪𞤣𞤫 𞤤𞤢𞤲𞤣𞤫𞥅𞤣𞤫 𞤴𞤮 𞤯𞤫 𞤵𞤴𞤼𞤵 𞤴𞤢𞤤𞤼𞤭𞤲𞤺𞤮𞤤 𞤳𞤵𞤩𞥆𞤢𞤥 𞤬𞤫𞤱𞤲𞤣𞤮 𞤳𞤢 𞤯𞤫 𞤩𞤵𞤪𞤭 𞤫 𞤸𞤢𞤼𞤮𞤲𞤶𞤭𞤲𞤣𞤫 𞤫 𞤷𞤫𞥅𞤣𞤫 𞤶𞤢𞤲𞤢𞤲𞤫.
𞤀𞤲𞤺𞤮𞤤𞤢𞥄⹁ 𞤤𞤫𞤧𞤣𞤭 𞤼𞤢𞤱𞤢𞤲𞤮𞥅𞤲𞤣𞤭 𞤫 𞤌𞤆𞤉𞤑 𞤩𞤵𞤪𞤭𞥅 𞤣𞤵𞥅𞤩𞤭 𞥑𞥖⹁ 𞤱𞤮𞤲𞤢𞥄 𞤲𞤣𞤭 𞤢𞤪𞤢𞤲𞤭𞤪𞤭 𞤫 𞤴𞤢𞤤𞤼𞤵𞤺𞤮𞤤 𞤫 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫. 𞤉𞤳𞤱𞤢𞤼𞤫𞥅𞤪𞤭⹁ 𞤉𞤲𞤣𞤮𞤲𞤫𞥅𞤧𞤭𞤴𞤢 𞤫 𞤑𞤢𞤼𞤢𞤪⹁ 𞤬𞤮𞤨 𞤱𞤢𞤯𞤭𞥅𞤲𞤮 𞤯𞤵𞤥.
𞤌𞤆𞤉𞤑 (OPEC – OPEP) 𞤳𞤮 𞤥𞤮𞤶𞤮𞤦𞤫𞤪𞤫 𞤤𞤫𞤧𞤯𞤫 𞤦𞤵𞤪𞤼𞤭𞤲𞤢𞤴𞤯𞤫 𞤥𞤢𞤤𞥆𞤢 𞤴𞤢𞤤𞤼𞤭𞤲𞤢𞤴𞤯𞤫 𞤳𞤵𞤩𞥆𞤢𞤥 𞤴𞤫𞥅𞤴𞤢 𞤳𞤢 𞤶𞤢𞤲𞤢𞤲𞤭𞤪𞤭. 𞤑𞤮 𞤄𞤢𞤿𞤣𞤢𞥄𞤣⹁ 𞤤𞤢𞥄𞤥𞤮𞤪𞤣𞤫 𞤋𞤪𞤢𞤳⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥖𞥐⹁ 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤧𞤭𞤲𞤷𞤢𞥄. 𞤑𞤮 𞤤𞤫𞤴𞤯𞤫 𞤶𞤮𞤱𞤭 𞤧𞤭𞤷𞤵𞤲𞤮𞥅 𞤲𞤣𞤫. 𞤍𞤫𞤲 𞤳𞤮 𞤋𞤪𞤢𞤲⹁ 𞤋𞤪𞤢𞤳⹁ 𞤑𞤵𞤱𞤢𞤴𞤼⹁ 𞤅𞤢𞤱𞤵𞤣𞤭𞥅 𞤫 𞤜𞤫𞤲𞤫𞤧𞤵𞤱𞤫𞤤𞤢. 𞤑𞤮𞤲𞤮 𞤢𞤣𞤮 𞤀𞤲𞤺𞤮𞤤𞤢𞥄 𞤧𞤮𞤪𞤼𞤢𞥄𞤣𞤫⹁ 𞤳𞤮 𞤤𞤫𞤴𞤯𞤫 𞥑𞥓 𞤼𞤢𞤱𞤢𞥄 𞤫 𞤲𞤶𞤵𞤩𞥆𞤵𞤣𞤭 𞤣𞤭𞤲. 𞤒𞤭𞥅𞤤𞤭𞤪𞤣𞤫 𞤲𞤣𞤫𞤲 𞤲𞤮 𞤶𞤮𞤯𞥆𞤭𞤲𞤢𞥄 𞤜𞤭𞤴𞤫𞤲⹁ 𞤤𞤢𞥄𞤥𞤮𞤪𞤣𞤫 𞤌𞤧𞤼𞤪𞤭𞤴𞤢.
𞤌𞤨𞤫𞤳 𞤳𞤮 𞤫 𞤲𞤣𞤫𞤪 𞤤𞤫𞤴𞤣𞤭 𞤸𞤮𞤲𞤣𞤭 𞤶𞤮𞥅𞤯𞤭𞤲𞤢𞥄